Naaj Jino Leto Letak Peba eo Nuuj kõn Aelõñ in Anij No. 38 ilo Tijem̦ba!
1. (1) Ta kajjitõk ko armej rej kajjitõk kaki kõn ro remej? (2) Ta eo jenaaj kõm̦m̦ane ilo Tijem̦ba me enaaj uwaake kajjitõk kein?
1 Mej ej ri kõjdat eo an aolep armej meñe eoktak kabuñ ko aer jen doon. (1 Ko. 15:26) Elõñ rej l̦õmn̦ak kõn kajjitõk kein, ro remej rej pãd ia? Im jenaaj ke bar lo er? Kõn men in, eklejia ko ipel̦aakin lal̦ in renaaj leto letak peba eo Nuuj kõn Aelõñ in Anij No. 38, im taitõl̦in ej “Ro Remej Renaaj Ke Bar Mour?” Jenaaj jino kõm̦m̦ane men in ilo Tijem̦ba 1 raan. Ñe ejem̦l̦o̦k iien ad leto letak peba in, jenaaj wõnm̦aanl̦o̦k wõt im kõjerbale ilo kwal̦o̦k naan.
2. Ewi wãween kar kõm̦m̦ane peba eo Nuuj kõn Aelõñ in Anij No. 38?
2 Kilen Kar Kõm̦m̦ane: Ke rar kõm̦m̦ane peba eo Nuuj kõn Aelõñ in Anij No. 38, rar kõm̦m̦ane bwe jen maroñ limi ñan ruo m̦õttan. Unin, ej kõnke armej ro ren loe taitõl̦ eo ekoba kajjitõk kein, “Ta l̦õmn̦ak eo am̦. . . aet? reban? bõlen?” Ñe ro rej riiti peba in rej kõpel̦l̦o̦ke, renaaj lo uwaak eo me ej pedped wõt ioon Baibõl̦ ñan kajjitõk eo ilo Taitõl̦ eo. Innem renaaj kile tokjãn kallim̦ur ko ilo Baibõl̦ eo ñan er. Bareinwõt, renaaj kile unin aer maroñ tõmake Baibõl̦ eo. Itulikin peba in, ewõr juon kajjitõk elukkuun em̦m̦an me armej ro remaroñ l̦õmn̦ak kake.
3. Ewi wãween ad naaj leto letak peba eo Nuuj kõn Aelõñ in Anij No. 38?
3 Kilen Leto Letak: Wãween ad naaj leto letak peba in enaaj ãinl̦o̦k wõt ñe jej leto letak peba in kũr ñan Kwõjkwõj eo im Kweilo̦k eo el̦ap (district convention). Em̦m̦aan ro rej lale eklejia ko renaaj kwal̦o̦k kõn wãween ad naaj jerbale jikin ko jej kwal̦o̦k naan ie me ej ekkejell̦o̦k wõt ñan lõta eo kar jilkinl̦o̦k ñan er me an Eprõl̦ 1, 2013. Ewõr jet eklejia ko me ejjab lukkuun l̦ap jikin ko kar karõk ñan aer kwal̦o̦k naan ie. Kõn men in, remaroñ kajjitõk ippãn eklejia ko repaake er me el̦ap territory ko aer ñe remaroñ jipañ er. Ñe kwõnaaj ebbõk am̦ peba eo Nuuj kõn Aelõñ in Anij No. 38, jouj im ebbõk ekkar ñan joñan eo kwõnaaj leto letak ilowaan juon wiik. El̦aññe eddedel̦o̦k ad leto letak peba in ilo jerbal in em̦ ñan em̦, eokwe jemaroñ leto letak peba in ilo iien ko rem̦m̦an tok. Ñe emaat aolep peba kein ak ejjañin jem̦l̦o̦k allõñ eo, eokwe jemaroñ wõnm̦aanl̦o̦k wõt im lel̦o̦k bok eo an allõñ eo. Ilo Jãdede eo jinointata ilo allõñ eo, ijello̦kun ad jino katak Baibõl̦ ippãn armej ro jenaaj jino leto letak peba in. Im ñe jej leto letak peba in ilo Jãdede im Jabõt, jemaroñ bar lel̦o̦k aer bok in riit ñe ekkar. Kwõj ke kõm̦m̦an karõk ko bwe en maroñ l̦apl̦o̦k iien am̦ naaj kwal̦o̦k naan ilo iien in?