Jen Anõke Rũkanaan ro Ãinwõt Zepanaia
1. (1) Ta ko rar wal̦o̦k ilo raan ko an rũkanaan Zepanaia? (2) Im etke em̦m̦an joñak eo an Zepanaia ñan kõj?
1 Ilo kar 600 jim̦a ko m̦okta jãn Kũraij, ear kanooj l̦ap an armej ro ilo Juda kabuñ ñan Beal. Ilo kar tõre in, ej kab m̦õj aer m̦an Amon, kiiñ eo enana. Im kiiõ Kiiñ Josaia ear jino an irooj ke ear dik wõt. (2 Kr. 33:21–34:1, UBS) Ilo iien in, Jeova ear kããlõt Zepanaia bwe en karoñ armej ro kõn An naaj bõktok jorrããn ioer. Meñe Zepanaia emaroñ kar itok jãn baam̦le eo an kiiñ ro ilo Juda, ak ear peran im jab ãliklik in kwal̦o̦k an Jeova dike men ko rũtõl ro ilo Juda rar kõm̦m̦ani. (Zp. 1:1, UBS; 3:1-4, UBS) Em̦m̦an jen anõke joñak in an Zepanaia ilo ad peran in kwal̦o̦k naan im jab kõtl̦o̦k bwe baam̦le ko ad ren kabõjrak kõj jãn ad karejar ñan Jeova. (Matu 10:34-37, UBS) Ta ennaan eo Zepanaia ear jiroñ armej ro kake, im ta ko rar wal̦o̦k tokãlik?
2. Ta eo jej aikuj kõm̦m̦ane bwe Jeova en maroñ lo̦mo̦o̦ren kõj ilo raan in kwi eo an?
2 Pukot Jeova: Jeova wõt emaroñ lo̦mo̦o̦ren kajjojo armej ilo raan in kwi eo an. Kõn men in, Zepanaia ear jiroñ armej in Juda bwe ren ‘pukot Jeova, pukot wãnõk, im pukot bõro ettã’ ke ejja kar wõr wõt iien. (Zp. 2:2, 3) Ejjel̦o̦k oktak men in ilo raan kein. Ãinwõt kar Zepanaia, jej jiroñ ro jet ñan pukot Jeova. Bõtab, jej aikuj bar kõm̦m̦ane men in im jek ilo bũruod bwe jejãmin ‘oktakl̦o̦k jãn Jeova.’ (Zp. 1:6) Jej “pukot Jeova” ilo ad lukkuun katak kõn Naan eo an im jar bwe en tõl kõj. Im jej “pukot wãnõk” ilo ad kõm̦m̦ani men ko rejim̦we ilo mour ko ad. Bareinwõt, jej “pukot bõro ettã” ilo ad kõttãik bũruod im l̦õmn̦ak ko ad im ilo ad m̦õkaj in l̦oore naan in tõl ko jãn doulul eo an Jeova.
3. Etke jej aikuj kate wõt kõj ilo jerbal in kwal̦o̦k naan im jab ebbeer?
3 Tõprak ko Rem̦m̦an: Naan in kakkõl ko an Zepanaia rar jelõt bũruon jet iaan armej ro ilo Juda. El̦aptata an kar men in kõm̦akũt Josaia, eo me ear jino pukot Jeova jãn ke ear dik wõt. Tokãlik, Josaia ear tõl armej ro bwe ren jol̦o̦k ekjab ko im kabuñ ko rewaan jãn aelõñ eo. (2 Kr. 34:2-5) Rainin, jej kwal̦o̦k naan ñan armej ro kõn ennaan eo kõn Aelõñ eo an Anij. Im meñe jet iaan armej rein rej ãinwõt ine ko me rar wõtlo̦k iturin ial̦, ijo edekãke, im ibwiljin kãlõklõk ko, bõtab ewõr jet iaaer rej ãinwõt ine ko me rar wõtlo̦k ilo bwidej eo em̦m̦an im tokãlik rar eddek im jebar leer. (Matu 13:18-23, UBS) Jej tõmak bwe el̦aññe jej poub wõt im karoñ ro jet kõn ta eo Aelõñ eo an Anij enaaj kõm̦m̦ane, Jeova enaaj jipañ wõt kõj ñan lo tõprak ko rem̦m̦an.—Sam 126:6.
4. Etke jej aikuj ‘kõttar wõt Jeova’?
4 Jet armej ilo Juda rar l̦õmn̦ak bwe ejjel̦o̦k men en̦ Jeova enaaj kar kõm̦m̦ane. Bõtab, Jeova ear kam̦oole naan ko an ke ear ba bwe raan in illu eo an elukkuun epaak. (Zp. 1:12, 14, UBS) Im ear lo̦mo̦o̦ren wõt ro rar lõke e. (Zp. 3:12, 17) Kõn men in, jen ‘kõttar wõt Jeova’ im lañlõñ ilo ad bõro wõt juon ippãn rũttõmak ro m̦õttad im karejar ñan Anij eo ad ekajoor!—Zp. 3:8, 9.