Ta L̦õmn̦ak eo an Jeova kõn Ña?
1. Ewi wãween an Baibõl̦ ãinwõt juon kilaj?
1 Ewi ikkutkut in am̦ kilaj im lale eok make? Kajjojo raan, elõñ iaad jej kilaje kõj kõnke ejipañ ñan ad jel̦ã ñe ettoonon turin mejãd ak ñe ewõr men en̦ jej aikuj kakõm̦anm̦anl̦o̦k. Kar kõkkar kõn Baibõl̦ ãinwõt juon kilaj. Eñin unin, ñe jej riiti Naan in Anij ej jipañ kõj ñan jel̦ã ta ko ippãd make me jej aikuj kakõm̦anm̦anil̦o̦k. Eaorõk men in kõnke Jeova ej kalimjek bũruon armej ak lukkuun kain armej rot kõj. (1 Sa. 16:7; Jem. 1:22-24, UBS) Naan in Anij emaroñ “ekajete kõn̦aan ko im l̦õmn̦ak ko ilo bũruon armej.” (Hi. 4:12, UBS) Riit Baibõl̦ im kõl̦mãnl̦o̦kjen̦ kõn men ko jej riiti kajjojo raan, emaroñ jipañ kõj ñan kile ta ko jej aikuj kakõm̦anm̦anil̦o̦k bwe en l̦apl̦o̦k ad jel̦ã kilen kwal̦o̦k naan. Ewi wãween?—Sam 1:1-3.
2. Ewi wãween an Baibõl̦ maroñ jipañ kõj ñan etale kõj make?
2 Kõjerbal Baibõl̦ Ãinwõt Juon Kilaj: Ñe jej riiti bwebwenato ko ilo Baibõl̦ kõn ro rar tiljek ñan Jeova, enaaj jipañ kõj ñan jel̦ã ta ko jen kõm̦m̦ani bwe Jeova en m̦õn̦õn̦õ ippãd. Ñan waanjoñak, Devid ear kwal̦o̦k an kaorõk etan Anij ke ear lukkuun jojomare. (1 Sa. 17:45, 46) Aiseia ear kaalikkar an peran ke ear ba bwe em̦õn̦õn̦õ in etal im kwal̦o̦k naan ilo juon jikin me ejjab pidodo ñan kwal̦o̦k naan ie. (Ais. 6:8, 9) Joñan an kar Jijej yokwe Jemãn ear watõk jerbal in kwal̦o̦k naan ãinwõt men eo me ej kakajoor im kam̦õn̦õn̦õiki. Ear jab watõk jerbal in kwal̦o̦k naan bwe ej juon men ekam̦m̦õkm̦õk. (Jon 4:34, UBS) Kũrjin ro ilo raan ko an rijjilõk ro rar kijejeto ilo kwal̦o̦k naan. Im rar lõke Jeova im jek ilo bũrueer bwe reban ebbeer. (Jrb. 5:41, 42, UBS; 2 Ko. 4:1; 2 Ti. 4:17, UBS) Ñe jej kõl̦mãnl̦o̦kjen̦ kõn joñak kein, renaaj jipañ kõj ñan etale kõj make im lale ta ko jemaroñ kõm̦m̦ani ñan kakõm̦anm̦anl̦o̦k wãween ad kõm̦m̦ane jerbal eo an Jeova.
3. Etke jejjab aikuj rum̦wij in kõm̦m̦an oktak?
3 M̦õkaj im Kõm̦m̦an Oktak: El̦aññe jaar kilaj im jej lo bwe ettoon turin mejãd ak jejjab jol̦o̦ke, eokwe enaaj kar ejjel̦o̦k tokjãn ad kilaj. Kõn men in, jemaroñ kajjitõk bwe Jeova en jipañ kõj ñan kile ta ko jej aikuj kakõm̦anm̦anl̦o̦k ippãd im jipañ kõj ñan kõm̦m̦an oktak. (Sam 139:23, 24, UBS; Luk 11:13) Innem, kõnke ekadu iien kiiõ im mour ko an armej repãd ilo kauwõtata, jejjab aikuj rum̦wij in kõm̦m̦an oktak bwe en em̦m̦anl̦o̦k wãween ad kwal̦o̦k naan.—1 Ko. 7:29; 1 Ti. 4:16.
4. Ta eo ej wal̦o̦k ñan juon eo ej riiti Naan in Anij im kõm̦m̦an oktak ñe ej lo bwe ewõr an likjab?
4 Men eo el̦apl̦o̦k an Jeova kalimjeke ippãn juon armej ej bũruon im jab paotokin. (1 Pi. 3:3, 4) Ta eo ej wal̦o̦k ñan juon eo ej riiti Naan in Anij im kõm̦m̦an oktak ñe ej lo bwe ewõr an likjab? Baibõl̦ ej ba bwe armej rot in ‘ejjab rũroñjake eo ej mel̦o̦kl̦o̦k, ak ej rũroñjake eo ej jerbale, im enaaj m̦õn̦õn̦õ ilo an kõm̦m̦ane men in.’ (Jem. 1:25) Enaaj l̦apl̦o̦k ad m̦õn̦õn̦õ im jel̦ã kilen kwal̦o̦k naan kõnke jej “romaakl̦o̦k kõn aiboojoj an [Jeova].”—2 Ko. 3:18, UBS.