Kilen bwe En Em̦m̦anl̦o̦k Wõt Ad Kwal̦o̦k Naan—Kwal̦o̦k Kilen Katak Baibõl̦ Ippãn Armej kõn Bok eo Katak ko Rem̦ool

Unin an Aorõk: Elõñ armej rejjab mel̦el̦e etke jej kajjitõk ippãer ñe rekõn̦aan katak Baibõl̦ ilo ejjel̦o̦k on̦ãn. Remaroñ l̦õmn̦ak bwe rej aikuj kobal̦o̦k ippãn juon kumi in rũkkatak ak bõk juon kooj in katak Baibõl̦. Kõn men in, ijello̦kun ad kajjitõk ñe rekõn̦aan katak Baibõl̦, etke jejjab kwal̦o̦k kilen ad katak Baibõl̦ ippãn armej ro? Kõm̦m̦ane men in ium̦win jejjo minit. Kwõmaroñ baj jutak wõt ilo kõjãm eo im kwal̦o̦k ñan armej eo joñan an pidodo im an naaj l̦apl̦o̦k an mel̦el̦e kõn kobban Baibõl̦ ñe ej katak.

Wãween Ad Kõm̦m̦ane Men In:

Ãlikin am̦ kwal̦o̦k kajjiem, kajjitõk ippãn rũm̦weo el̦aññe ej inepata kõn ilju im jekl̦aj.
Kaalikkar bwe elõñ rej bar inepata kõn men ko ej inepata kaki, im kwal̦o̦k kõn laajrakin katak ko ilo jinoin bok eo, Katak ko Rem̦ool. Kõmel̦el̦eiki bwe elõñ katak ko repidodo ilowaan bok in me rej kwal̦o̦k kõn ta ko Baibõl̦ ej katakin kõj kõn ilju im jekl̦aj, im bwe ebar wõr katak ko jet ie. Kajjitõk ippãn katak ta eo ej itoklimo kake.
Lel̦o̦k juon an bok, im komiro etal ñan katak eo ear kããlõte. Kwal̦o̦k bwe uwaak ko ñan kajjitõk ko ilo jinointata in katak eo repãd ilo pãrokõrããp ko komiro naaj etali.
Kajjitõk ippãn bwe en riiti pãrokõrããp 1 ñe ejjab jook ak mijak in riit. Ãlikin, kwõn riiti kajjitõk eo an pãrokõrããp eo im kiiõ komiro bwebwenato ippãn doon kõn uwaak eo. Riit im etale eoon ko me rej rejetake uwaak eo. Kwal̦o̦k ñane kilen am̦ kar kakõl̦l̦eiki uwaak eo ilo bok eo am̦.
Komiro wõnm̦aanl̦o̦k ñan pãrokõrããp eo juon ak kiiõ kajjitõk ippãn bwe en kajjioñ uwaake kajjitõk eo ilo naan ko an make.
Kam̦m̦oolole im nõbare, im kõm̦m̦an karõk ñan bar jepl̦aak bwe komiro en kõjem̦l̦o̦k katak eo.
Ñe ekkar kwõmaroñ kaalwõje kõn pija eo ilo jw.org/mh me ej ba, Ta ko Rej Wal̦o̦k Ñe Kõmij Katak Baibõl̦ Ippãn Armej?

Kõm̦m̦ane Men in Ilo Allõñ In:

Jar ñan Jeova bwe en kajeraam̦m̦an am̦ kate eok bwe kwõn jino juon am̦ rũkkatak kããl.—Pil. 2:13
Kajjioñ kwal̦o̦k kilen katak Baibõl̦ ippãn armej ro ilo am̦ kõjerbal bok eo Katak ko Rem̦ool, ñe eaab kwal̦o̦k pija in alwõj eo Ta ko Rej Wal̦o̦k Ñe Kõmij Katak Baibõl̦ Ippãn Armej? Kwõmaroñ baj kajjioñe men in ñe kwõj kwal̦o̦k naan.