Katak jãn Rukwal̦o̦k ro El̦ap Aer Jel̦ã Kwal̦o̦k Naan
El̦ap ad kam̦m̦oolol kõn rukwal̦o̦k ro ilo eklejia me el̦ap aer jel̦ã kwal̦o̦k naan. Jet iaaer eto aer kar tiljek im karejar ñan Jeova ium̦win elõñ iiõ. Bõlen jet rej kab kiiõ lukkuun jel̦ã kilen kwal̦o̦k naan. Em̦õj an rein loe an Jijej tõl eklejia ko ilo raan kein ãliktata ilo an kowõnm̦aanl̦o̦k wõt jerbalin kwal̦o̦k naan im kõm̦m̦an rũkal̦oor. (Matu 28:19, 20) Ilo aer bõk kun̦aaer ilo jerbal in kwal̦o̦k naan, rej bõk “maroñ eo ekanooj l̦ap” ñe rej iioone apañ im mãlejjoñ. (2 Ko. 4:7) Elukkuun lõñ men jemaroñ katak jãn rein. Im rem̦õn̦õn̦õ in jipañ ro jet kõn ta ko em̦õj aer katak im jel̦ã kaki. (Sam 71:18) Kõn men in, jej aikuj kortokjãn iien ko repel̦l̦o̦k ñan ad katak jãn er. Ewi wãween ad maroñ kõm̦m̦ane men in?
Ilo Jerbalin Kwal̦o̦k Naan. Bwe jen lo tõprak ilo ad kwal̦o̦k naan, rukwal̦o̦k ro rekããl im ro ejjab lukkuun l̦ap aer jel̦ã rej aikuj katak im kõmmãlmel. Enãj l̦ap aer katak el̦aññe rej kwal̦o̦k naan ippãn rukwal̦o̦k ro el̦ap aer jel̦ã kwal̦o̦k naan. (Lale katak eo ilo Naan in Keeañ eo an Pãpode 1, 2015 me ej ba “Kwõn Kijejeto Wõt ilo Jerbalin Kwal̦o̦k Naan” ilo pãrokõrããp 3 ium̦win unin tõl eo ej ba “Jipañ Rukwal̦o̦k Naan Kããl Ro.”) Ewi wãween am̦ kar lo tõprak jãn am̦ kar kwal̦o̦k naan ippãn rein?
Kwõmaroñ ke kajjitõk ippãn juon rukwal̦o̦k naan eo el̦ap an jel̦ã kwal̦o̦k naan bwe en jerbal ippam̦? El̦aññe rukwal̦o̦k naan in ejjab maroñ m̦akũtkũt ak em̦õjn̦o̦, kwõmaroñ bõkl̦o̦k rũkkatak eo am̦ ñan m̦weo im̦õn komijeel katak. Tokãlik, kwõmaroñ kajjitõk ippãn el̦aññe ewõr men en̦ ear loe me kwõmaroñ kakõm̦anm̦anl̦o̦k. Ak kwõmaroñ kajjitõk ñe ewõr an naanin rõjañ ñan kwe.
Bõk Am̦ Iien Ippãer: Kal̦apl̦o̦k am̦ jel̦ã kajjien rein ilo am̦ pãd im bõk am̦ iien ippãer. Kwõmaroñ kũr waj juon iaaer ñan iien Kabuñ eo an baam̦le n̦e am̦ im kwal̦o̦k kajjitõk ko ñane. Ak el̦aññe ejjab maroñ m̦akũtkũt im em̦õjn̦o̦, kwõmaroñ kõm̦m̦an karõk ñan kõm̦m̦ane iien Kabuñ eo an baam̦le ilo m̦weo im̦õn. Ilo iien in kwõmaroñ kajjitõk ippãn kõn wãween an kar oktak im jel̦ã kõn m̦ool eo. Kwõmaroñ bar kajjitõk kõn jeraam̦m̦an ko em̦õj an loe. Ak bõlen kõn wõnm̦aanl̦o̦k ko ej loe ilo eklejia eo. Kwõmaroñ bar kajjitõk kõn men ko rar kalañlõñ e m̦aantak ilo an karejar ñan Jeova.
Kwõj aikuj juon eo emel̦el̦e im keememej bwe rein ewõr bar joñan maroñ ko ippãer. Im ewõr joñan aer maroñ jipañ kõj. Rukwal̦o̦k rein rej bar ãinwõt kõj kõnke eokkõtaktak joñan men ko remaroñi ilo jerbalin kwal̦o̦k naan. (Rom 12:6-8, UBS) Jet remaroñ lukkuun rũtto im bõlen emaroñ dik aer iien ippãd. Meñe ãindein ak el̦ap ad maroñ katak jãn er kõnke el̦ap aer kar katak m̦aantak ilo aer tiljek im karejar ñan Jeova.