Bo̦o̦k in Kajjitõk
◼ Rukwal̦o̦k ro rej aikuj ke kõjerbal Internet ñan kwal̦o̦k naan ak katak ippãn armej ro rejaje kajjier me rej jokwe ilo bar juon aelõñ?
Jet rukwal̦o̦k ro em̦õj aer kõjerbal Internet ñan aer katak Baibõl̦ ippãn armej ro ilo ijoko em̦õj kamo jerbalin kwal̦o̦k ie, ak ilo ijoko eiiet rukwal̦o̦k ie. Jet iien ear wõr tõprak ko jãn men in. Bõtab, ewõr bar kauwõtata ko ñe rukwal̦o̦k ro rej bwebwenato ippãn armej rein rejaje kajjier ilo ijo rej ba chat room. Im ebar wõr kauwõtata ko ñe rej lel̦o̦k e-mail ko aer ñan armej rein. (Lale Ad Jerbal Ñan Ailiñ Eo an Jul̦ae 2007 ilo p. 7.) Meñe kõttõpar eo ad ej ñan tõpar armej ro em̦ool bũrueer kõn ennaan eo kõn Aelõñ eo, ak an juon jeid im jatid kõnnaan ippãn juon armej ejaje kajjien emaroñ tõll̦o̦k e ñan kõm̦m̦ao ko renana, ak ñan an bwebwenato ippãn juon eo ear diwõjl̦o̦k jãn m̦ool eo im jum̦ae. (1 Ko. 1:19-25, UBS; Kol. 2:8, UBS) Bareinwõt, ilo jikin ko me em̦õj kamo jerbalin kwal̦o̦k naan ie, kien ko aer remaroñ waje ta ko jej kõm̦m̦ani im jibwe ad katak ippãn armej ro ilo Internet. Im kiiõ wãween in emaroñ kõm̦m̦an menin an ro jeid im jatid ilo jikin kein pãd ilo kauwõtata. Kõn men in, rukwal̦o̦k ro ren jab kõjerbal Internet ñan kappukot armej ro ilo bar juon aelõñ ñan kwal̦o̦k naan ñan er.
El̦aññe jej kwal̦o̦k naan jabdewõt iien ñan juon rilikin me ear jam̦botok ñan aelõñ eo ad, jen jab kajjioñ kõm̦m̦an karõk bwe en katak ñe ejepl̦aak ñan aelõñ eo an m̦ae iien ra eo ad ej ba em̦m̦an. Ijello̦kun ad kõm̦m̦ane men in, em̦m̦anl̦o̦k jen kwal̦o̦k ñane kõn Weep jait eo ad bwe en bar bõk mel̦el̦e ko jet. Ak kwõmaroñ bar kwal̦o̦k kilen an maroñ tõpar ra eo ad ilo aelõñ eo ej jokwe ie. Jemaroñ bar ba ñane bwe en etal ñan juon iaan Im̦õn Kweilo̦k ko epaake m̦weo im̦õn. Jet iien ejjel̦o̦k Im̦õn Kweilo̦k ilo jet aelõñ. Ñe ekõn̦aan bwe juon en lol̦o̦k e ilo bukwõn eo an, jej aikuj kanne peba eo ej ba Please Follow Up (S-43). Innem jemaroñ lel̦o̦k ñan jekretari eo an eklejia eo ad bwe en kab etal ñan jw.org im jilkinl̦o̦k mel̦el̦e ko ñan eklejia eo ej pãd ijo jikin armej in. Ra eo me ej loloorjake jerbalin kwal̦o̦k ilo aelõñ eo an ejel̦ã kõn aolep wãween ko rej wal̦o̦k ijikin in im e eo em̦m̦antata ñan an karõk bwe juon en lol̦o̦k armej eo eitoklimo.—Lale Ad Jerbal ñan Anij eo an Juun 2014, ilo p. 7, im Ad Jerbal ñan Aelõñ Eo an Nobõm̦ba 2011, ilo p. 2.
El̦aññe ewõr juon armej jej kab jino jepl̦aak ippãn ej em̦m̦akũt ñan bar juon aelõñ ak el̦aññe jej katak kiiõ ippãn juon armej in aelõñ ko jet me jaar jel̦ã kajjien jãn Internet, eokwe ej menin aikuj bwe jen l̦oore naanin tõl kein ilõñ. Bõtab, jemaroñ wõnm̦aanl̦o̦k wõt ippãn ilo tõre in m̦ae iien ewõr juon rukwal̦o̦k ilo ijo jikin ej tõpare im katak ippãn. Bareinwõt, el̦aññe armej in ej jokwe ilo aelõñ eo me em̦õj aer kamo ak kabõjrak jerbalin kwal̦o̦k naan ie, jej aikuj lukkuun kõjparok ñe jej kõnono kõn Baibõl̦ ippãn ilo ad jeje lõta ñane, ko̦o̦l̦e, ak e-mail e.—Matu 10:16.