Ñããt eo Ailiñ in Anij Enaj Itok

“IROIJ, kwoj bar kajutak Ailiñ eo ilo Israel kiõ ke?” (Jerbal 1:6) Ri jilek ro rar kijoror in jelã ñããt eo Jesus enaj kajutak Ailiñ eo an. Rainin, enañin 2,000 yiõ ko tokelik, armij ro rej bareinwõt kijoror in jelã kin: Ñããt eo Ailiñ in Anij enaj itok?

Kinke Jesus ear kõmman bwe Ailiñ eo en unin tel in kwalok nan eo an, kwomaroñ kar kõtmene bwe ear konono kake kajitõk in. Im emol ear kõmman eindein! Elap an konono kin juõn ien ejejjet kar karõke me ear naetan “itok” ak bed eo an. (Matu 24:​37) Bed eo ej ekkeijaklok ñan ien jutak eo an Ailiñ in Messiah eo. Ta bed in? Jen etale emen katak ko remol me Bible eo ej kwalok kake kin bed eo an Christ.

1. Bed eo an Christ enaj jinoe ilo juõn ien eaetok elikin mij eo an. Jesus ear kwalok kin juõn parable me ear keidi e make ñan juõn emaan me ear “ilok ñõn juõn ene etolok bwe en bõk ailiñ in kiñ.” (Luk 19:​12) Ewi wãwen parable in kanan in ear jejjet kitien? Eokwe, Jesus ear mij im kar kajerkakbijeik e; inem ear illok ñan juõn “ene etolok,” melelen men in, lañ. Einwõt Jesus ear kanan kake ilo juõn parable einlok wõt in, ñe ej bar jeblak bwe en bõk ailiñ in king eo, men in enaj walok wõt “elikin juõn ien eaitok.”​​—Matthew 25:19.

Jet yiõ ko elikin an kar Jesus wanliñlok ñan lañ, ri jilek Paul ear jeje: “E [Jesus], ke emwij An katok kin juõn men in katok kin jerawiwi ko in drio, E ar jijõt i anbijmaroñõn Anij; Im jen ien in Ej kõtar ien kõmõn ro dri kijirãte eran neen.” (Dri Hibru 10:​12, 13) Inem juõn ien kõttar eaetok ear walok elikin an kar Jesus etal ñan lañ. Ear jemlok an kõttar ke Jehovah Anij ear kairoij Nejin bwe en King in Ailiñ in Messiah eo emwij kallimur kake jen etto. Eñin kar ien eo ke bed eo an Christ ear jinoe. Armij ro ion lal in renaj ke lo ien in ekabwilõñlõñ?

2. Bed eo ejamin alikar an mejed loe. Kememej wõt, Jesus ear konono kin kakõllan bed eo an. (Matu 24:3) Elañe armij ro remaroñ lo bed eo an kin mejeir, renaj aikwij ke juõn kakõlle? Ñan wanjoñok: Lemnak bwe kwoj etal in lale lojet. Kwomaroñ lo kakõlle ko turin ial eo me rej tel yuk, ak ñe kwoj tõbar barijet im jutak ie im kwoj lo aolepen den eo elap, kwonaj kar kõtmene ke ñan lo juõn kakõlle me ear je ilo nan ko rekilep “Lojet” im ewõr juõn made ekilep ej jitõñlok ñan lometo eo? Emol, jaab! Kwojjab aikwij juõn kakõlle ñan kwalok men eo emaroñ bidodo am lo kin mejõm.

Jesus ear kwalok kin kakõllan bed eo an, jab ñan kwalok juõn men me armij ro remaroñ lo kin mejeir, ak ñan jibañ ir ñan air kile bwe ewõr juõn men enaj walok ilo lañ. Inem, Jesus ear ba: “Ñe komij lo men kein re walok, komin jela bwe ailiñ in Anij ebak.” (Luk 21:​31) Inem, ewi wãwen, kakõlle eo enaj kar kwalok ñan ro rej bed ion lal bwe emwij an jinoe bed eo an Christ?

3. Kakõllan bed eo an Jesus enaj kar alikar ikijen juõn ien ej walok abañ ko relap ion lal. Jesus ear ba bwe bed eo an einwõt King ilo lañ enaj alikar ikijen tarinae ko, ñitta ko, makitkit lal ko, nañinmij ko relap, im kowadoñ ion lal. (Matu 24:​7-​12; Luk 21:​10, 11) Ta eo enaj kar kõmman aolep eñtan kein? Bible eo ej kamelele bwe Satan, “iroij in lõl in,” elap an illu bwe ejelã jidik wõt ien ibben kinke emwij an jinoe bed eo an Christ einwõt juõn King. (Jon 12:31; Reveles̃õn 12:​9, 12) Kein kamol rot kein im jemaroñ loi kin illu eo an Satan im bed eo an Christ elap an kar walok ilo ran kein ad. Elaptata jen 1914, yiõ eo me ri etale ro kin bwebwenato in armij rar kile bwe juõn oktak elap ear walok ilo juõn joñan ejañin kar walok einwõt mokta im ear jelet belakin lal.

Aolep men kein remaroñ einwõt news ko renana, ak ilo mol rejjab news ko renana. Ej melelen bwe Ailiñ in Messiah eo ej iroij ilo lañ kiõ. Mõttan jidik, kien in enaj jerbale iroij eo an ion aolepen lal in. Bõtab, ñan an armij ro maroñ tõmak im bed iumin iroij eo an, ewi wãwen renaj kar jelã kin Ailiñ in?

4. Kakõllan bed eo an Jesus enaj kar alikar ikijen jerbal in kwalok nan ibelakin lal. Jesus ear ba bwe bed eo an enaj kar einwõt “ran ko an Noa.”a (Matu 24:​37-​39) Noah ear jab baj kalek wa eo wõt; ear bareinwõt juõn “dri kwalok ekwojarjar.” (2 Piter 2:5) Noah ear kakkõl armij ro bwe ekajet eo jen Anij ear bojak in walok. Jesus ear ba bwe ilo bed eo an, ri kalor ro an ion lal renaj bareinwõt kakkõl armij ro. Ear kanan bwe: “Naj kwalok gospel in an ailiñ in lõñ i aolepen lõl kin men in kennan ñõn ailiñ otemjelok: ilo ien eo e naj itok jemlokõn.”​​—Matu 24:14.

Einwõt emwij ad loe ilo katak eo lok iman, Ailiñ in Anij enaj kokkure kien ko otemjej an lal in. Jerbal in kwalok nan ej kakkõl armij ro bwe kien in ilañ ebojak in jerbal, im ej lelok ien eo emõn ñan aolep ñan air deor jen jorrãn eo ej itok im ñan air erom ri karejar ro ion lal an Ailiñ in. Inem, kajitõk eo eaorõk ej, Ewi wãwen kwonaj emmakit?

Ailiñ in Anij Enaj ke News eo Emõn ñan Yuk?

Ennan eo me Jesus ear kwalok nan kake kar juõn kejatdikdik ejej uan. Ilo elõñ thousand yiõ ko remotlok elikin jumae eo ilo Eden, Jehovah Anij ear karõk ñan kajutak juõn kien me enaj kajimweiki aolep men, kajeblak armij ro retiljek ñan wãwen mour eo me Anij ear karõke jen jinoin​​—mour indio ilo juõn paradise ion lal. Ejelok jabdewõt men ej kairujruj lok jen ad jelã bwe kien in emwij kallimur kake jen etto ej iroij kiõ ilo lañ. Ejjab juõn lemnak ebin melele kake bõtab ej juõn men emol!

Kiõ, King eo Anij ear jitõñe ej iroij ilo bwiljin ro ri kijirãt e. (Sam 110:2) Ilo lal in enana im ej jenolok jen Anij, Messiah eo ej kajejjet kõnan eo an Jemen ñan bukõt ro rekõnan jelã kajjen Anij im kabuñ ñan e “ilo Jitõb im ilo mol.” (Jon 4:​24) Kejatdikdik eo ñan mour indio iumin iroij eo an Ailiñ eo an Anij ej bellok ñan armij ro jen bwij ko otemjej, dettan ko otemjej, im jabdewõt kadkadiir. (Jerbal 10:​34, 35) Kimij rejañ yuk ñan bõk ien in emõn im aibujuij ej bellok ñan yuk. Katak kin Ailiñ eo an Anij kiõ, bwe kwon maroñ mour ñan indio ilo lañliñ iumin iroij eo an ewãnik!​​—1 Jon 2:​17.

[Kamelele eo itulal]

[Pija ko ilo page 8]

News ko renana me jej roñ kajjojo ran rej kein kamol ko bwe ejjabto jen kiõ men ko remõn renaj itok

[Etan eo ej kõmman]

Antiaircraft gun: U.S. Army photo