Congregation Eo An Chriatian—Juõn Unjen Jibañ ñan Kakajur

POPI, juõn kõrã iturinlok 20 jima an yiõ, ear inebata kin juõn wãwen eo ekõmmetak ñan family eo kin jabwe in konono ibben jemen im jinen.a Elikin an kwalok buruen ñan juõn Christian elder im lio belen, ear jejelok ñan ir: “Kom kanuij in emol kin ami kar bõk ien ami konono ñan iõ. Komij jab jelã ewi joñan melelen men eo ñan iõ bwe komij kea. Ij kamolol Jehovah kin an letok ñan iõ armij ro I maroñ liki im konono ñan ir.”

Toula, juõn kõrã eo ejjab to jen ke ej kab juõn kõrã eo ejako belen im ewõr ruo nejin ajiri jodikdik, ear lo an bed ilo juõn wãwen eo ebin kin eñjake in inebata im abañ ko kin money. Lio im ajiri eo nejin ekkã an bõk kakajur jen lolok ko an Christian ri belele jen congregation eo. Elikin ear lo tõbrak ilo an kamadmõde abañ eo an, ear jilkinlok ñan ir juõn card, im ba: “Ien otemjej ij kememej kom ilo jar ko aõ. Ij kememej ien ko relõñ kom kin jibañ iõ im jurake iõ.”

Jet ien kwoj eñjake ke am “eddodo” kin an laplok ijjibed ko an lal in? (Matu 11:28) “Ien im men in walok” ko rej kabañ ke mour eo am kin wãwen ko rekõmmetak kwoj ioni? (Ekklisiastis 9:11) Inem kwoj jab make iam. Ak einwõt thousand ro rej eñtan ededelok air loe, kwe bareinwõt kwo maroñ lo jibañ eo ewõr melelen ilo congregation eo an Christian Ri Kennan ro an Jehovah. Ilo ebeben eo kein kajuõn C.E., ri jilek Paul ear lo bwe jet ri tõmak ro mõttan rar juõn “kakajur” ñan e. (Colossians 4:10, 11, NW) Emaroñ wõr juõn wãwen eo einlok wõt ibbam.

Jurake im Jibañ

Ilo Jeje ko ilo Christian Greek, nan eo “congregation” rej ukõte jen kajin Greek eo ek·kle·siʹa, melelen juõn kumi in armij ro rej kir don. Kobatok einwõt mõttan nan in rej lemnak ko rej bed im jurake eo ej ibben don.

Congregation eo an Christian ej debij mol eo kin Nan in Anij im keañ kin news eo emõn kin Ailiñ eo an. (1 Timote 3:15; 1 Piter 2:9) Bõtab, congregation eo ej bareinwõt letok jurake eo ilo jitõb im jibañ ñan ro rej kobalok ie. Ijin, juõn emaroñ lo juõn kumi in yokwe, lemnak, im jera ir ro rej kea, ro rej bojak im mõnõnõ in jibañ im kainemõn ro jet ilo ien eñtan.​—2 Dri Korint 7:5-7.

Ri kabuñ ro an Jehovah ien otemjej rej lo inemõn im jokane ilo congregation eo an. Ri jeje Psalm ear kwalok bwe ear lo lañliñ im juõn eñjake in jokane ibwiljin armij ro an Anij rej kuktok ibben don. (Sam Ko 27:4, 5; 55:14; 122:1) Einlok wõt rainin, congregation eo an Christian ej juõn dolul in ri tõmak ro rej mõttan don ro rej kalek im rejañ don.​—Jabõn Kennan Ko 13:20; Dri Rom 1:11, 12.

Ro uan congregation eo rej katakin ir ñan air “jerbale emõn ñõn armij otemjej, im elaplok ñõn ro rej ber ilo nukin tõmak.” (Dri Galetia 6:10) Katak eo ej bedbede ion Bible eo im rej bõke ej kamakit ir ñan kalikar yokwe in jimjãn jimjatin don im kautiej don. (Dri Rom 12:10; 1 Piter 3:8) Jimjãn jimjatin ro ilo jitõb maan im kõrã ro ilo congregation eo rej emmakit bwe ren joij, ainemõn, im yokwe. (Dri Epesõs 4:3) Jen air baj ri kabuñ wõt, rej kwalok yokwe im lemnak kin ro jet.​—Jemes 1:27.

Kin menin, ilo congregation eo, ro rej kenak rej lo mejatoto eo emãnãn einwõt juõn belakin family. (Mark 10:29, 30) Eñjake eo kin air einwõt mõttan im ebake juõn jar eo ewõr yokwe ie menin ej kakajurlok ir. (Sam Ko 133:1-3) Ikijen congregation eo, “ri karejar eo etiljek im meletlet” ej najirik ir mõñã ko rõũne ilo jitõb “ilo ien emõn.”​—Matu 24:45.

Jibañ Jen Yokwe eo An Overseer ro

Ro uan congregation eo an Christian remaroñ watõk ñan air lo ie yokwe, melele, im shepherd ro tellokiir ro rej letok jurake im rejañ eo ilo jitõb. Shepherd ro kin kadkad kein ibbeir rej einwõt “juõn jikin tilekek jen kõto im juõn ken tõrak jen lañ eo.” (Aiseia 32:1, 2) Elder ro emwij kãlet ir ilo jitõb, ak overseer ro, rej kejbãrok armij eo einwõt sheep ro an Anij, rejañ ri nañinmij im ro rej eñtan, im jibadõk air kajeblak ro rar bwid.​—Sam Ko 100:3; 1 Piter 5:2, 3.

Bwebõta, jar in elder eo an congregation eo ejjab juõn jar in ri kabel ilo jerbal in kakajur enbwin ak ri jerbal in ejmour, bwe ren maroñ kemour abañ ko ilo enbwin im lemnak an ri tõmak ro mõttair rej jelmaiki men kein. Ilo jukjuk im bed in, nañinmij ej “aikwiji juõn doctor.” (Luke 5:31, New World Translation) Mekarta, shepherd rot kein remaroñ jibañ ro rej bed ilo air aikwij ilo jitõb. (Jemes 5:14, 15) Jabdewõt ñe remaroñ, elder ro rej bareinwõt karõk ñan jibañ ro jet.​—Jemes 2:15, 16.

Wõn eo ej bed ilikin juõn karõk in yokwe eo einwõt in? Jehovah Anij make! Ri Kanan Ezekiel ej pijaikilok Jehovah einwõt an keañ: “I naj bukõt sheep ro aõ im kejbãrok ir. . . . I naj kõtlok ir jen jikin ko otemjej rar jebliklik ie . . . Ña make I naj najidik sheep ro aõ, im Ña make I naj kõmman bwe ren babu.” Anij ej bareinwõt lemnak kin sheep ro ejelok air kajur im remõjno.​—Ezekiel 34:11, 12, 15, 16, NW.

Jibañ eo Emol ilo Ien eo Ejejjet

Elukkun wõr ke jibañ eo emol ilo congregation eo an Christian? Aet, im joñok kein tok ilal rej kalikar wãwen ko reinjuõn jen don ko congregation eo ej kamol an jibañ ie.

◆ Luji juõn eo jitenburu. Leo belen Anna ear mij elikin juõn nañinmij eo ejjab bõjrak. “Jen ien eo, I ar bõk yokwe eo eokmãnãn jen Christian ro jeiõ im jatiõ,” kõrã eo ej ba. “Nan ko rejoij nan in jurake im kakajur jen ri tõmak ro mõtta rar etal wõt, ekoba atbokwõj ko jen eñjake in buru, rar kõmman bwe menono eo aõ en emmenono wõt jen an ebjak, im ij kamolol Jehovah. Yokwe eo air ear kõmman bwe in eñjake an lap air jurake iõ, leliñlok iõ, im kejbãrok ilo joij.” Kwe bareinwõt kwo maroñ ion wãwen rot in eidiñ ilo am luji juõn eo am jitenburu ilo mij. Ilo ien rot in, ro uan congregation eo remaroñ lewõj kainemõn eo ej menin aikwij im jurake eo ewõr eñjake ie.

◆ Nañinmij. Arthur, juõn traveling overseer jen Poland, ekkã an lolok congregation ko ilo Central Asia ñan an kakajur ir ilo jitõb. Ilo juõn ian ien lolok kein, ear nañinmij im an ejmourlok ear kanuij bin. “I kõnan jiroñ kom wãwen an ro jeiõ im jatiõ maan im kõrã ro ilo [juõn jikin ilo Kazakhstan] kar kejbãrok iõ,” Arthur ej kememej kin kamolol eo emũlal. “Maan im kõrã ro jeiõ im jatiõ, elõñ ro ijaje kajjiir​—im meñe ro ear wõr air itoklimo​—rar bõktok money, mõñã ko, im uno. . . . Im rar kõmman eindein kin elap lañliñ.

“Kalmenlokjen kin eñjake ko aõ ke iar bõk juõn envelope kin jet money ko ie im letter in tok ilokan: ‘Dear Brother, Ña ij jilkinwõj ñan yuk yokyokwe ko remãnãn. Mama ear letok ñan iõ money ñan ice cream, ak iar bebe ñan aõ lewõj ñan yuk ñan uno. Joij im mõkaj in ejmour. Jehovah ej aikwiji kij ñan juõn ien eaetok. Jerammõn. Im jiroñ kim elõñlok bwebwenato ko remõn, im menin katakin. Vova.’” Aet, einwõt an walok ilo wãwen in, dik im ritto ilo congregation eo remaroñ letok jibañ in kakajur ilo ien nañinmij ko.​—Dri Pilippai 2:25-29.

◆ Eñtan. Teri ear wõr an kõnan jen eñjake in buruen ñan jerbal einwõt juõn pioneer, ak full-time ri keañ an Ailiñ eo. Ak kin elõñ abañ ko, kõrã eo ear bõjrak jen an pioneer. “I ar eñjake an lap aõ bwid kin aõ kajeoñ in jerbal ilo jerbal in im ear jab aetok ñan aolepen juõn yiõ in aõ pioneer,” kõrã eo ej ba. Teri ear bwid an tõmak bwe kowãppen eo an Jehovah ear atartar ion wõt joñan jerbal eo ej kõmmane ñan e. (Keidi Mark 12:41-44.) Ilo an jadin eñtan, ear kamakelok ian make. Ak jibañ in kaemololo ear itok jen congregation eo.

Teri ej kememej: “Kõrã eo jatin juõn elder ear bojak im itok in jibañ iõ im roñjake iõ ke iar kwalok eñjake ko aõ. Ke iar ilok jen mweo imõn, iar eñjake an einwõt ñe emwij kotak jen iõ juõn men eo ear joon iõ. Jen ien eo im wõnmanlok, sister in ej pioneer im leo belen, juõn elder ilo congregation eo, rar letok jibañ eo eaorõk. Rar kir iõ aolep ran im kajitõk ewi wãwen jabdewõt ibba. . . . Rar kõtlok aõ jijet ilo ien katak Bible eo air jet ien, im iar bwilõñ kin tokjen an family ko bed im ebake don.”

Ejjab juõn men ejeja ñan elõñ​—meñe Christian ro emwij air wujleplok​—rej oktak im eñtan, ebwer, im make ian. Jej kamolol bwe jibañ eo ewõr yokwe, jab kibbon ie ewõr ilo congregation eo an Anij!​—1 Dri Tessalonika 5:14.

Elikin an lo kain rejetak rot in, kwe bareinwõt kwo maroñ bõk kain lemnak rot kein an juõn kõrã in Christian eo ear lo tõbrak ilo an jerbal ibben leo belen ke ear lap an nañinmij im ear je: “Kin yokwe im kejbãrok eo kar kwalok ñan kim, aõ eñjake ej einwõt ñe Jehovah ear bõk kim ilujen jorrãn eo ilo lopiden pein. Ij kamolol bwe ij mõttan dolul eo emõn an Jehovah!”

[Kamelele eo itulal]

[Pija ko ilo peij 30]

Jemaroñ lelok jibañ in kakajur ñan ro rej nañinmij, liãjlol, im men ko jet