Ewi Wãwen Jemaroñ Jibañ Ro Renaj Bed ilo Kwojkwoj in Kememej Eo?
1. Ta menin kennan eo elap naj kwalok kake ilo March 22, 2008?
1 Ilo March 22, 2008, elõñ million armij ro ibelakin lal renaj bõk juõn menin kennan elap. Ro renaj bed ilo Kwojkwoj in Kememej eo renaj roñ kin yokwe eo elap an Jehovah ikijen binmour eo ear letok ñan armij ro. (Jon 3:16) Renaj katak kin Ailiñ eo im wãwen Jehovah enaj kajerbale ñan kajejjet ankilan iaolepen lal. (Mat. 6:9, 10) Renaj make lo yokwe im burukuk eo an ro don Anij im lo karuwainene eo ad emãnãn.—Sam 133:1.
2. Ewi wãwen jemaroñ jibañ Ri Katak Bible ro me renaj bed ilo ien Kwojkwoj in Kememej Eo?
2 Ri Katak Bible Ro: Jet ian ro renaj bed ilo ien in enaj ro rej kab jino katak Bible eo ibbed. Jen kwalok kajjiir ñan ro jeid im jatid. Kamelele kin kwelok ko rej walok ilo week otemjej, im kaluij ir jidik kin Kingdom Hall eo. Ilo ien eo ri konono eo ej kwalok katak eo an, enaj rejañ rein bwe ren wõnmanlok wõt im kaddek kõtan eo air ibben Jehovah. Kwomaroñ kajerbal ennan ko an einwõt bedbedin juõn ennan in kõketak ñan rejañ ri katak ro am.
3. Ta eo jemaroñ kõmmane ñan rejañ ri kwalok ro rej inactive me rej bed ilo Kwojkwoj eo?
3 Ro Rej Inactive: Jet ian ro renaj bed ilo ien in ej ro rej inactive (ro emwij air bõjrak jen air kwalok nan iumin 6 alliñ ko ak elõñlok im jakkeini in kwelok). Jen bõk eddo eo ñan kwalok karuwainene eo emãnãn ñan ir. Bõprae ad kwalok kajitõk ko kin mour eo air me rejjab kõnan kennan kake im ba nan ko me remaroñ kajook ir. Ejjabto elikin Kwojkwoj in Kememej eo, elder ro rej aikwij lolok ro rej inactive me rar bed ilo kwelok eo, im nebar ir kin air kate ir ñan bed ilo Kwojkwoj eo, im kin juõn jitõb emãnãn kirtok ir ñan kwelok eo tok juõn an congregation.
4. Ewi wãwen kajjojo iad emaroñ jibañ ri lotok ro?
4 Ri Lotok Ro: Jet ian ro renaj bed enaj ro jejelã kajeir ak ro uan family ko ad me jaar kirtok ir. Ro jet remaroñ kar bõk nan in kir eo ilo ien eo kar kõmmane jerbal eo ejejuan. Ñe kwoj lo armij ro im kwojaje kajjiir, kwon kebak ir im kwalok kajjem im karuwaineneik ir. Bõlen rejañin kar bed ilo kwelok ko ad mokta. Ilo am bwebwenato ibbeir kwomaroñ jelã tu ia eo rej jokwe ie ñan am lolok ir. Kin am lolok ak konono ibbeir ilo telephone ilo ran ko elikin Kwojkwoj eo, kwomaroñ rejañ ir ñan kalaplok air jelã im lale elañe rekõnan katak Bible.
5. Ta eo jemaroñ ba ñan jino juõn katak kin Bible eo?
5 Jemaroñ kajerbal kamelele eo ilo katak in Kwojkwoj in Kememej eo einwõt bedbed eo ñan kwalok kin book in Jelãlokjen eo ñe jej bar jeblak. Ñan wanjoñok, ri konono eo ilo Kwojkwoj in Kememej eo enaj read Aiseia 65:21-23. Ilo ien bar jeblak eo am, kwomaroñ kwalok kin katak eo im ba, “Inaj kwalok jet jerammõn ko remaroñ walok kin tokjen binmour eo.” Inem jitõñlok ñan peij 9-10 ilo book in Jelãlokjen eo. Ak kwomaroñ ba, “Elõñ rej lemnak ñããt jenaj lo jejjet in kitien kanan eo an Aiseia.” Inem kiõ jitõñlok ñan paragraph 1-4 katak 11. Bar juõn wãwen ñan tilmake juõn katak kin Bible eo ej ñan kwalok kin ta eo ri kwalok katak eo ilo Kwojkwoj in Kememej eo ear ba, kwalok Jelãlokjen book eo, im kwalok kilen katak.
6. Ta ien ko remõn rebellok ñan kij ñe jej bokake nan in kakien an Jesus kin mij eo an?
6 Kij kajjojo jen bukõt ien ko remõn me rebellok ñan ad jibañ ri katak Bible ro, ri kwalok ro rej inactive, im ri lotok ro me renaj bed. (Luk 22:19) Emol Jehovah enaj kajerammõn jabdewõt laplok ko ilo jerbal in kwalok nan eo ad.