‘Kom̦win Yokwe Ri Tõmak ro M̦õttami’

Kar je naan kein ilo taitõl̦ in katak in enañin ruo to̦ujin iiõ ko remootl̦o̦k. (1 Pi. 2:​17, UBS) Meñe ãindein, el̦apl̦o̦k ad aikuj jerbale naan kein kiiõ! Ewi wãween jemaroñ kwal̦o̦k ad yokwe aolep ro jeid im jatid ipel̦aakin lal̦ in? Ewi wãween jemaroñ kõm̦m̦an bwe en jab jako ad yokwe doon meñe jej mour ilo juon lal̦ me edik an armej ro kwal̦o̦k yokwe? (Matu 24:​12) Lale el̦aññe kwõmaroñ uwaaki kajjitõk kein itulal̦ ãlikin am̦ alwõje pija eo etan Our Whole Association of Brothers.

(1) Ñããt eo jaar erom m̦õttan doulul in? (2) Ta m̦akũtkũt ko jilu me jej kõm̦m̦ani im bõk kun̦aad ie, ãinwõt aolep ri tõmak ro m̦õttad ipel̦aakin lal̦ in? (3) Ewi wãween ri tõmak ro m̦õttad rej kate er ñan kwal̦o̦k naan ilo (1) jikin ko rettol̦o̦k ilo Alaska, (2) wab ko ilo Europe, im (3) bul̦õn wõjke ko ilo aelõñ in Peru? (4) Etke jen jab l̦õmn̦ak bwe jerbal in kwal̦o̦k naan ej juon jerbal bajjek? (5) Kwal̦o̦k waanjoñak ko kõn wãween an Ri Kõnnaan ro an Jeova jipañ im kaenõm̦m̦an doon ilo (1) iien ko ej wõr m̦akũtkũt lal̦, (2) ñe ej wõr l̦añ ko rel̦l̦ap, im (3) ñe ej wõr tarin̦ae ilo aelõñ ko rej pãd ie? (6) Ta ko jemaroñ kõm̦m̦ani ñan kwal̦o̦k bwe jej yokwe ri tõmak ro m̦õttad ipel̦aakin lal̦ in? (Jon 13:​35) (7) Ta tokjãn ko rej wal̦o̦k jãn ad jerbal ippãn doon ñan kalõk Im̦õn Kweilo̦k ko ad? (8) Ewi wãween ri tõmak ro m̦õttad ilo Rojia im jet aelõñ ko ilo Europe rar epaake wõt Jeova meñe kien ko an aelõñ kein rar kamo aer jerbal in kwal̦o̦k naan? (9) Ta men ko rekabwilõñlõñ me elõñ iaan Ri Kõnnaan ro an Jeova rej kõm̦m̦ani ñan aer maroñ pãd ilo iien kweilo̦k ko rel̦l̦ap, im etke rej kõm̦m̦ani men kein? (10) Ewi wãween pija in ear jipañ im kakajoor eok ñan (1) keini am̦ kobal̦o̦k ippãn ri tõmak ro m̦õttam̦ ilo iien kweilo̦k ko ñan kabuñ ñan Jeova ippãn doon, (2) jipañ ro jet ilo iien aer aikuj, im (3) niknik in kwal̦o̦k naan jabdewõt iien kwõmaroñ? (11) Ewi wãween im ñããt eo jemaroñ kõjerbale pija in ilo jerbal in kwal̦o̦k naan?

Un eo el̦aptata unin ad pãd ilo doulul in ippãn ri tõmak ro m̦õttad ipel̦aakin lal̦ in ej kõnke jej yokwe Jeova. Innem jej m̦õn̦õn̦õ in katak kõn e im katakin ro jet kõn e. Im jej yokwe armej ro me Jeova ej yokwe er. Ñe jej jipañ er ilo iien aer aikuj, jejjab kõtmãne an Anij kam̦m̦oolole kõj. Bõtab, jej kam̦m̦oolol Anij kõnke jej watõk ri tõmak ro m̦õttad ãinwõt menin letok jãn e. M̦õttan jidik enaaj jako jukjukun pãd in me edik an armej ro kwal̦o̦k yokwe ie. Meñe ãindein, jen wõnm̦aanl̦o̦k wõt im kwal̦o̦k ad yokwe aolep ri tõmak ro m̦õttad ipel̦aakin lal̦ in!