Aihtabi takai nani wal las kupia kraukanka ba
Tahbi daukanka aihkika ba, Jehova Witniska asla aidrubanka tara nani ba ra daukisa. Aihtabi takaia aisanka ba danh takuya taim, aisasara ba mita makabisa aihtabi takai nani ba ai mina ra bui, naha makabi walanka wâl na ai bîla baikra tara param ni ansa munbia:
1. ¿Saurkam lâka wina kupiam lakram, man rayakam ba Jehova ra yabram bara kasak lukisma ki Jisas Kraist ba Gâd mita mangkan swak takan lâka yabaia dukiara?
2. ¿Tânkam brisma ki tahbi mai dauki ba wal upla sut mawanra marikisma man ba Jehova witnis bara naiwa piua wina Gâd asla takanka uplika kum sma?
Aihtabi takai nani ba “âu” wibia taim, Jisas atki wan sakan mana ba kasak luki ba marikisa, bara ai kupia aiska ni ai rayaka Jehova ra yaban “tânka ba param aisisa” upla sut mawanra (Ro. 10:9, 10). Sakuna naha makabi walanka nani na dukiara kaina wina witin nani ai pura suni aman luki kaikaia sa. Baku lika witin nani silp ai tânka pain bri si, ansa munan kabia.
¿Man ba puram suni rayakam ba Jehova ra pat yabram, bara pramis munram witin ra baman mayunma bara ai kupia lâka daukaia ba man mampara uba kulkisma ba?
¿Man rait pali lukisma tahbi daukan lâka ba baila pali briaia sma?
¿Aihtabi takuya taim, dîa sât kwalka dimaia sa ki? (1 Tim. 2:9, 10; Jan 15:19; Pil. 1:10).
Wan kwalka dimi ba “sinska yamni bri” bara “tânkira” kaia sa, kan baku lika yawan marikbia Gâd ra mayuni ba. Baha mita, tahbi daukan lâka bribia uplika nani ba dîa sât kwalka dimbia ba uba pamni bara tanhta apia kaia sa, ai kwalka ra ulbanka bara lilka nani bribia apia. Ani kwalka dimbia ba klin bara yamni kaia sa, baku sin baha yua kulkanka yabaia ba kat dimaia sa.
¿Aihtabi takuya taim, wan daukanka ba dîa sât kaia sa ki? (Lk. 3:21, 22).
Jisas aihtabi takan ba mita, aihtabi takai nani ra tânka kum mangkisa. Jisas nu kata aihtabi takaia ba pulaia dukia apia sa. Baha tâka ai lukanka, bara ai daukanka sâtka ba wina rispik marikan. Bahamna, tahbi daukuya pliska ba ra, yok pulaia, yawaia, apia kaka rispik luha dukia nani sin daukaia pliska kum apia sa. Kristian raya takan ba mita pura luanka tara kum brin ba baku pulaia sin apia sa. Aihtabi takaia ba lika, yua kum lilia pali sa. Sakuna wan liliaka ba, tânkira rispik lâka kat marikaia sa.
¿Aidrubanka nani ra dimaia bara kangrigisan ra kaia ba nahki hilp mai munbia rayakam yabram lâka ba kulkaia?
¿Aihtabi takma ningkara, dîa muni ban nit pali kabia awar nani ridi briaia silp stadikam briaia bara smalki taukaia dukiara?
KANGRIGISAN ALMUKKA NANI DÎA DAUKAIA BA
Smalki tataukra kum mita aihtabi takan daukisa aisabia taim, witin ra wiaia sa wahia 12 wina 51 makabi walanka nani ba laki kaikbia, baku sin “Aihtabi takras smalki tataukra ra maisa pakanka kum” (wahia 7). Bahara marikisa nahki ridi takaia almuk nani wal pana pana laiki kaikbia piua ra. Bâra sin wisa smalki tataukra ba ai bukka kwâkan briaia sip sa bara ridi taki dîa ulban ba sin kaikbia. Nit âpu sa upla kum bui witin ra hilp munbia kainara baha makabi walanka nani ridi daukaia.
Ya aihtabi takaia want uplika ba kangrigisan almuk nani daknika pura kakaira ba ra maisa pakaia sa. Uplika ba “Aihtabi takan dauki nani ra makabi walanka nani” laki kaikbia ningkara, almuk nani daknika pura kakaira bui uplika ra makabi walbia pura sunra dauki ai rayaka ba Jehova ra yaban ba dukiara bara pramis takan Jehova kupia lâka daukaia. Uplika ba pana âu wisa kaka, almuk nani daknika pura kakaira ba almuk wâl wahbi sâkbia —kumi bani pîska kum laki kaikbia— makabi walanka nani smalki tataukra wal. Aidrubanka tara ahkia kabia yua ba wiaia nit âpu.
Kau dauki ba baku, pîska bani awar kumi lamara, sakuna kau taim nit sa kaka awar kum pura kaia sip sa. Pîska bani pura sunra wal tâ krikaia sa. Almukka bara smalki tataukra ba isti munaia apia sa. Wahbi sakan almukka nani ba aihtabi takan dauki uplika wal piua baila pali asla takaia sa.
Kaikbia sa kaka, bitar sa laki kaikanka ba uplika kumi bani sait ra laki kaikanka ba bribia, dakni kum ra lika apia. Baku lika, makabi walbia sut ba mapara uplika kumi bani pana dîa luki ba wali muni, dîa pitka kat Baibil tânka bri ba, bara aihtabi takaia ridi sa sapa sin almukka ba mita latan kaikbia. Bara yakan kaka, ban kra uplika ba kau pri aisabia. Mâira nani kaka, sip sa wal sut asla iwi aisi laki kaikaia.
Aihtabi takaia want uplika ba mairin sa kaka, asla takbia pliska ra upla wala nani mita witin nani ra kaikaia sa kuna dîa aisi ba lika walaia apia. Upla wala yula kahbia nit sa taim, almuk kum kaia sip sa apia kaka hilp mamunra kum, sakuna ani laki kaikanka ra nit ba pas lukaia sa.
Kangrigisan ba almuk wiria brisa kaka, hilp mamunra lankira bara tânkira nani yus munaia sip sa “Kristian nani ba dîa kasak lukisa” (pas pîska ba) laiki kaikbia dukiara. Sekan pîska “Kristian nani iwanka tnatka ba” laki kaikbia dukiara piua bani almuk kum mihta ra kabia. Kangrigisan ba muihni lankira âpu kaka, impaki pura kakaira hilpka ba makabaia sip sa kangrigisan wala lamara almuk nani blîkbia dukiara.
Aihtabi takbia uplika ba tuktan sa kaka, ai aisika nani Jehova witnis ba witin yula kahbaia sa. Sakuna sip apia sa kaka, almuk wâl (apia kaka almuk kum hilp mamunra kum wal pas pîska ba lika) tuktika wal makabi walanka nani laki kaikan kabia.
Aihtabi takan dauki uplika ba mita, aitani pitka kat Baibil smalkanka tâ nani ba tânka brisa sapa almuk nani bui luki kaikaia sa. Baku sin, tânka kasak ba latwan kaikisa sapa, bara Jehova asla takanka ba rispik munisa sapa sin luki kaikaia sa. Sakuna, Baibil smalkanka tâ nani ba pan tânka briras sa kaka, man nani yama upla wala kum mita tâ baikbia. Bara naika aihtabi takaia ridi kabia. Wala nani mapara lika, ban kra smalki warkka kulki ba marikaia, bara Jehova Witnis asla takanka ba lâka mina munhtara sa marikaia wisi kau taimka nit sa. Naha tara daukaia —wibia sa kaka, aihtabi takaia dukiara— uplika ridi sa sapa pain luki kaikaia wisi, almuk nani mita pîska bani ra nahki piu wihka daukbia ba ai mihta ra sa. Almuk nani ba sip sa makabi walanka kum kum ra kau taimka yaia, sakuna makabi walanka sut ba lika laki kaikaia sa.
Pîska wâl ba laki kaikisi, uplika ba aihtabi takaia ridi, apia kaka ridi apia sa sapa, almukka wâl ba mita kaikbia. Baha kaikaia wisi, uplika wapanka brih aula ba, uplika ba lan takaia dukiara lal swapni lal karna sa sapa, bara ai iwanka tnatka ba sin luki kaikaia sa. Yawan pliki ba sika naha: Upla ba ai kupia Jehova ra lakan ba, bara Baibil smalkanka tâ nani ai tânka brin ba sin pliki banhwisna. Man nani hilpka painkira ni, aihtabi takai nani ba sika, smalkaia warkka ba pain aitani daukaia mata ridi banhwi kabia.
Ningkara, almuk kumi, apia kaka wâl mita, uplika ba wal asla aidrubi, aihtabi takaia sip sa sapa, sip apia sapa sin wibia. Aihtabi takaia sip sa wibia kaka, bakahnu “Aihtabi takai nani wal las kupia kraukanka ba” pîska ba laki kaikbia (wahia 53 wina 55). Smalki tataukra ba Baibil Smalkisa bukka bara Gâd Latwanka Lâka bukka ba kau stadi danh takras kaka, tahbi daukbia ningkara stadika ba ban bri kabia tnata prakbia ba kat. Witin ra maisa pakbia ani yua tahbi daukbia ba Registro de publicador de la congregación wauhkataya ba ra ulbia. Baku sin witin ra kupia kraukbia, naha wauhkataya ra almuk nani mita diara ulbia baha mita witin ra makabi walbia ai rayaka tânka kum kum, tânka nani na tnatka wâl ra yus munisa: asla takanka ba Jehova witnis warkka ba laki kaikbia dukiara, baku sin smalki tataukra ba spirit warkka nani daukbia bara spirit hilpka bribia. Baku sin smalki tataukra raya nani ra wibia ai rayaka tânka nani ba “Política global de protección de datos personales de los testigos de Jehová” wi ba baku yus munbia, jw.org ra mariki ba. Naha kupia kraukanka na 10 minit ra daukbia.
Smalki tataukra tahbi daukbia mani kum alkbia taim, almuk wâl witin wal asla taki kupia bukbia bara kupia kraukanka kum kum yabia. Witin nani kum ba ai daknika pura kakaira almukka kabia. Tuktan kum sa kaka, ai aisika nani Jehova witnis ba yula kahbaia sa. Almuk nani ba trai kaikbia lilia piua kum bara yamni kabia. Nahki spirit lainka ra pâwi auya ba dukiara aisabia, bara silp ai stadika ba ban bri kabia, Baibil aisi kaiki kabia bara pamali mayunra tihmika ra kabia, baku sin aidrubanka nani ra dimi kabia bara wik bani smalkaia warkka daukbia (Epe. 5:15, 16). Baibil Smalkisa bukka bara Gâd Latwanka Lâka bukka ba kau stadi danh takras kaka, almuk nani ba smalki tatakra kum plikbia stadika ba yabi kabia dukiara. Kau dauki ba baku, diara wâl mapara baman kupia kraukanka yabia. Kau yamni sa kupia param ni wiaia nahki diara sut pain dauki ba.