Слугинки на сатанизмот — дрогата и хеви метал музиката

КАРЛ А. РАШКЕ, директор на Институтот за хуманитарни науки при Универзитетот во Денвер, напишал: „Не е никаква случајност што дрогата, хеви метал [музиката], бруталноста и разузданото насилство станале дел од грозоморните знамиња што се размавтуваат над човечката опустошена состојба додека се приближуваме кон третата декада на ерата на Сатана“. Тој исто така рекол: „Може да се каже дека хеви метал рок музиката за самообликуваниот сатанизам е истото што и госпелот за христијанството. Мошне малку луѓе се преобраќаат на христијанството и тоа само преку слушање на госпелот на радио. Но, влијанието на хеви метал музиката е многу посилно. Таа ги оправдува невкусните работи во кои веќе се вклучени децата“.

Тоа е тешка оптужба против она што поголемиот дел од младите луѓе го сметаат за нормално одвраќање од грижите на животот — хеви метал музиката и дрогата. Дали тие оптужби се оправдани? Можно ли е дрогата и хеви метал музиката да се симптоми на сатанизмот? Разгледајте ги коментарите на луѓето кои лице в лице се соочиле со насилството на сатанистичките обожаватели и на оние кои ги истражувале.

„Раздразливата порака на хеви метал музиката, што можеби и не е за изненадување, е ‚религиозна‘ — во таа смисла што прокламира една виша сила која го надгледува универзумот. Силата, меѓутоа, не е Бог“, напишал Рашке во својата книга Painted Black (Обоено во црно). „Таа е . . . креирана од самиот Пранепријател.“ Тој додал: „Моќта и насилството што се поврзани со сатанистичкиот култ се нешто што може лесно да ги привлече младите лишени од надеж и со закржлавена совест. . . . Вознемирени и злоупотребени младинци, преку некакво притаено лошо искуство од раните години, веруваат дека Вишата сила мора да е зла. Хеви метал музиката ја потврдува таа ‚теологија‘ и ја претвора во музика.“

Д-р Пол Кинг од Универзитетот во Тенеси, кој пред Сенатот на САД сведочел за хеви метал музиката, рекол дека голем број вознемирени млади луѓе повеќе сакаат да слушаат музика која е со „неконвенционални теми на насилство, омраза, бунт, брутален секс, злоупотреба на жени и величење на Сатана. Кога во животот на еден млад човек е вклучена и дрога, тогаш таквата склоност е уште поверојатна“. Хеви метал музиката ја слави и ја велича моќта на злото, рекол Кинг. Во хеви метал музиката, „на концертите се слават злите дела до нови висини“, рекол тој.

Во следните извештаи разгледајте до што може да доведе потсвесната порака на хеви метал музиката.

Минатата година во Њу Џерси (САД), две 15-годишни момчиња брутално го убиле кучето лабрадор по име Принцеза, домашен љубимец на една фамилија. „Беше жртва за Сатана“, тврделе тие. Кучето го држеле обесено на синџир, го удирале со клоци додека не умрело, а потоа му го извадиле јазикот и го употребиле во еден сатанистички ритуал. Осакатеното тело го распнале на една голема метална кука и го обесиле во дворот на соседите. Биле пронајдени сатанистички белези на неговата глава, а на земјата под телото бил врежан пентаграм (ѕвезда со пет краци во круг — сатанистички симбол). Ноќта кога се случило убиството, тие ја слушале Deicide (што значи убиство на Бог), една дет метал рок група чиј пејач се фали дека ги измачува и ги убива животните.

Во Калифорнија, двајца заљубени тинејџери кои, според изјавите на пријателите, биле опседнати со обожавање на Сатана, на суров начин ја убиле мајката на девојката така што ја испрободиле и испоудирале со клуч за отшрафување. Во истото подрачје еден друг младинец му се помолил на Сатана, а потоа го застрелал татка си. Полицијата која го истражувала злосторството била убедена дека за тоа е виновна хеви метал музиката. „Во основа, оваа музика те учи дека не мораш да ги слушаш родителите и дека треба да живееш онака како што сакаш ти“, рекол еден полициски службеник.

Во Англија, жртвите на сериски групни силувања ја известиле полицијата дека еден од силувачите носел тетовирани знаци на една хеви метал рок група чии текстови содржат пораки на силување и насилство.

Во Арканзас (САД), еден тинејџер од село се обидел да ги убие родителите тепајќи ги прво со стап, а потоа сечејќи ги со месарски нож. Во неговиот касетофон полицијата нашла аудиокасета автоматски наместена на песната „Олтар за жртвување“, од една хеви метал група, во која на сет глас се извикува: „Првосвештеникот чека со кама в рака, истурајќи ја чистата девствена крв. Убиство за Сатана, церемонијална смрт, слушај ја секоја негова заповед. Влези во царството на Сатана . . . Научи ги светите зборови на фалба: ‚Хајл Сатана‘“.

Што се однесува до текстовите на другите песни што ги пеат развресканите членови на хеви метал групите — кои обожавателите честопати ги пеат на нивните концерти во состојба на дива избезуменост, или со часови ги слушаат на касетофон — каков ефект имаат таквите пораки врз младите кои се склони да паѓаат под влијание? На пример, размислете за следниве текстови: „Сатана, нашиот господар, со секој прв чекор нѐ води во злобно осакатување“ и „Излеј ја својата крв, нека тече кон мене. Земи ја мојата рака и пушти го својот живот . . . Ја истури крвта. Ја имам твојата душа“.

„Ако веќе признаваме дека порнографијата може да мотивира некого да злоупотребува дете“, напишал Карл Рашке, „зошто да не размислиме за тоа дека текстот кој извикува убиј, упропасти, осакати, измачувај, уништи, може навистина да наведе некој душевно болен човек да ги изврши токму тие дела?“

Истражувачите од целиот свет мислат дека злоупотребата на дрога и сатанизмот одат рака под рака. Поранешниот детектив при одделот за испитување на неморални постапки, Дејвид Тома, со жалење вели дека никогаш „не сретнал обожавател на Сатана што не се дрогира“. Употребата на дрога, известува списанието ’Teen, ги комплицира работите за тинејџерите „кои се свртуваат кон обожавање на ѓаволот, бидејќи тоа им отежнува да разликуваат што всушност е вистинско а што само изгледа како такво кога ќе се гледа низ маглата на дрогата и алкохолот“.

„Хеви метал музиката е тесно поврзана со употребата на дрога како што лотаријата е поврзана со зависните коцкари“, рекол Рашке. „Адолесцентот кој е зависник од хемикалии, присвојува еден начин на живот што се карактеризира со ароганција, бруталност, крадење и сексуално изживување — а сето тоа е засилено со викањето и завивањето на хеви метал групите.“

Без сомнение, еден млад човек станува лесен плен за влијанието на Сатана кога од мозокот ќе му се испере здравиот разум, а неговото место ќе го заменат перверзијата и насилството.

[Истакната мисла на страница 8]

Кога од мозокот ќе се испере здравиот разум и ќе навлезат перверзија и насилство, може да се стане лесен плен за влијанието на Сатана

[Слика на страница 7]

Со што го полниш својот мозок?