Радоста од набљудувањето на птиците

КОЛКУ поинаков би бил светов кога не би имало птици! Нивното чуруликање, нивните песни, нивните шарени бои и нивниот лет — сето тоа придонесува за прекрасната разновидност на животот. Но, колку често застануваме за да ги слушаме и набљудуваме? Ако живеете во град каде што Ве опкружува вревата и метежот на секојдневниот живот и бучавата од сообраќајот, можеби нема ни да ги забележите птиците во Вашето соседство. Дури и ако живеете на село, лесно може да ги земате здраво за готово. Но, дали би сакале одблизу да ги разгледате птиците во Вашето место?

Можете да го сторите токму тоа со помош на едноставна куќичка за хранење птици во дворот зад куќата, поставена во близина на прозорецот. Потоа ќе Ви треба двоглед и фотоапарат со добар телеобјектив — и малку стрпливост! При рака имајте филм со јака осетливост и добро илустриран прирачник за птици за да ги препознаете. Потоа гледајте, слушајте и уживајте!