„Најразорната пандемија во човечката историја“

ОД ДОПИСНИКОТ НА РАЗБУДЕТЕ СЕ! ВО ЈУЖНА АФРИКА

„Ниедна војна на лицето на земјата не е толку разорна како што е пандемијата на СИДА“ (ДРЖАВНИОТ СЕКРЕТАР НА САД КОЛИН ПАУЕЛ).

ПРВИОТ официјален извештај за СИДА-та (синдром на стекната имунодефициенција) се појави во јуни 1981. „Никој од оние што беа вклучени во тие рани денови на СИДА-та не можеше ни да си замисли до кој обем ќе се прошири епидемијата“, вели Питер Пјо, генерален директор на Заедничката програма на Обединетите нации за ХИВ/СИДА (UNAIDS). За 20 години таа стана најголемата пандемија на сите времиња, а има показатели дека ќе продолжи да се шири.

Се проценува дека повеќе од 36 милиони луѓе се инфицирани со ХИВ (вирус на човечка имунодефициенција), а други 22 милиона умреле од последиците на СИДА.a Во 2000, во целиот свет умреле од СИДА три милиони луѓе, највисок годишен број откако започна епидемијата. Ова е случај и покрај тоа што се користи терапија со антиретровирусни лекови, особено во побогатите земји.

СИДА-та ја напаѓа Африка

Субсахарска Африка, каде што се проценува дека има 25,3 милиони инфицирани лица, стана епицентар на оваа пандемија. Само во овој регион во 2000 умреле 2,4 милиони луѓе од последиците на СИДА-та, што претставува 80 проценти од вкупниот број жртви во светот. СИДА-та е главна причина за смрт во тој регион.b

Јужна Африка има повисок број на инфицирани луѓе од која и да е друга земја во светот — се проценува дека се работи за 4,7 милиони лица. Секој месец таму се раѓаат 5.000 ХИВ-позитивни бебиња. Во својот говор што го изнел на 13. меѓународна конференција за СИДА, што се одржа во Дурбан во јули 2000, поранешниот претседател на Јужна Африка, Нелсон Мандела, изјавил: „Бевме шокирани кога дознавме дека во Јужна Африка ќе умре од СИДА секој втор, односно половина од нашите млади луѓе. Најстрашно од сѐ е тоа што сите овие инфекции, за кои зборуваат статистиките, и човечкото страдање што доаѓа со нив . . . можеле и можат да се спречат“.

Нападот на СИДА-та во други земји

Стапките на инфекција брзо растат и во Источна Европа, Азија и на Карибите. На крајот на 1999, бројот на инфицирани лица во Источна Европа изнесувал 420.000. Била дадена приближна проценка дека до крајот на 2000 година таа бројка се зголемила на 700.000.

Едно истражување спроведено во шест големи американски градови открило пораст од 12,3 проценти на инфекции со ХИВ кај младите хомосексуалци. Освен тоа, само 29 проценти од оние што биле ХИВ-позитивни знаеле дека се инфицирани. Епидемиолозите што го спровеле ова истражување рекле: „Бевме многу обесхрабрени кога дознавме дека има толку малку ХИВ-позитивни мажи што знаат дека се инфицирани. Тоа значи дека новоинфицираните лица го пренесуваат вирусот без да се свесни за тоа“.

На еден состанок на експерти за СИДА-та, одржан во Швајцарија во мај 2001, оваа болест беше наречена „најразорната пандемија во човечката историја“. Како што се забележува, нападот на СИДА-та е особено жесток во субсахарска Африка. Нашата следна статија ќе разгледа зошто.

[Фусноти]

[Истакната мисла на страница 3]

„Најстрашно од сѐ е тоа што сите овие инфекции . . . и човечкото страдање . . . можеле и можат да се спречат“ (НЕЛСОН МАНДЕЛА).

[Слика на страници 2 и 3]

Многу луѓе што се инфицирани со ХИВ не се свесни за тоа

[Извор на слика на страница 3]

UN/DPI Photo 198594C/Greg Kinch