Можете да откриете конструирање во природата
КОГА се шетаме во природа, повеќето од нас ја забележуваат нејзината убавина. Таа може да се најде во китка цвеќе, во шарена птичка, во величествено дрво или во некоја впечатлива глетка. Многу луѓе ја припишуваат таквата убавина на Творец, односно на Вешт Конструктор.
Можеби си мислите дека само научниците можат да ги откријат сложените конструкции во природата. Меѓутоа, не Ви треба софистицирана научна опрема за да ги забележите различните форми во природата. Потребно Ви е само остро око, малку фантазија и ценење за убавината и обликот. Исто така, ќе треба одблизу да ги погледнете познатите нешта што можеби сте ги земале здраво за готово.
Една од наједноставните форми е спиралата. Можеме да ја видиме во толку познати нешта што ги направил човекот како, на пример, во замотано јаже или отворач за тапи. Меѓутоа, можете да најдете многу поелегантни спирали во морските школки или во шишарките. А ако внимателно погледнете во средината на сончогледот, повторно ќе го видите обликот на спиралата. Помалку очигледни облици во вид на спирала ја красат средината на розата и на пајажината.
Да ја погледнеме повнимателно пајажината. Прво, пајакот ги поставува главните потпорни нишки на својата мрежа, нешто како спиците на тркалото. Потоа тргнува од центарот и ги поврзува овие нишки со леплив свилен конец. Кружејќи околу центарот, пајакот ткае во кругови сѐ додека не ја заврши мрежата. Сѐ пошироките кругови на конецот прават спирала.
Друга интересна шара во природата е окцето. Окцата можеме да ги најдеме на најневеројатни места — на пердувите на птиците, на крилјата на пеперутките, па дури и на крлушките на рибите. Научниците укажуваат дека окцата можат да помогнат во додворувањето, можат да го измамат напаѓачот или да го одвлечат несаканото внимание. Најпознат пример каде што можат да се видат окца можеби е паунот, а неговото парадирање при додворувањето е едно од чудата во светот на природата. Александар Велики бил толку импресиониран од убавината на паунот што инсистирал оваа птица да биде заштитена насекаде каде што владеел.
Кругот и топката се исто така познати облици. Златната топка на сонцето што заоѓа или сребрената полна месечина постојано будат восхит кај нас. Многу цветови од фамилијата бели ради изгледаат како сонце, со жолт центар од кој како зраци излегуваат ливчиња во разни бои. Златното „око“ на овие цветови што ги има насекаде нуди гозба од нектар, кој ги привлекува пеперутките речиси исто толку лесно како што златната плажа привлекува туристи.
Бидејќи топката е најекономичен облик за пакување, плодовите и бобинките честопати се во облик на топчиња во различни димензии и бои. Нивните живи бои ги привлекуваат птиците, кои го разнесуваат семето во замена за вкусен оброк.
Се разбира, спиралите, окцата, круговите и топките се само неколку примери на многуте облици што се наоѓаат во природата. Иако некои имаат конкретна цел, други можеби служат само за украс или за камуфлажа. Како и да е, гледајте ги и уживајте во нив.
[Слика на целата страница 16]