Од нашите читатели

Како да најдете работа и да ја задржите (8 септември 2005) Благодарна сум за вашиот совет да се испита секоја можност за работа, дури и ако станува збор за работа која се смета за ниска. Од неодамна сакав да почнам да работам со скратено работно време за да посветам повеќе време на христијанската служба. Но, бев премногу избирлива. Потоа ми беше понудена една друга работа, која ја прифатив. Се работи за пониска работа, но се трудам да бидам задоволна со неа. Барем не сум психички исцрпена кога си доаѓам дома и можам да се концентрирам на моето лично проучување на Библијата.

М. И., Јапонија

Какво значење има за вас Први мај? (8 јули 2005) Учам во четврта година средно училиште, а празникот Први мај секоја година се слави во моето училиште. Се одржува генерална проба и од сите средношколци се бара да ја гледаат. И порано присуствував на овие проби, но празникот ја вознемируваше совеста на сестра ми. Оваа статија ми помогна да сфатам дека таа има право! Многу ви благодарам. Статијата дојде во право време!

К. К., Соединетите Држави

И покрај болеста, задржете смисла за хумор (8 јули 2005) Изминативе шест години се борам со рак на јајниците, и неколку пати бев на операција и на хемотерапија. Како Кончи, секогаш кога сум во состојба, се трудам да го поддржувам моето собрание и да присуствувам на сите состаноци и конгреси. Ракот е тешка болест и благодарна сум за советите на Кончи за тоа како да се справиме со лошите вести што изгледа ние болните од рак постојано ги добиваме од лекарите. Искуството на Кончи беше многу охрабрувачко за мене!

Б.Ф., Соединетите Држави

Јас сум болна од лупус, и еднаш имав дури и амнезија извесно време. Додека закрепнував, се обидував да ја задржам смислата за хумор. Неодамна, кога лежев во болница поради гастритис, се трудев да го правам истото. Се согласувам со зборовите на Кончи, „Не е смешно да се биде болен, но мораш да ја задржиш смислата за хумор“.

М. А., Венецуела

Лекари Неодамна ги прочитав уводните статии „Лекари — имаме ли разбирање за нив?“ (8 мај 2005) Многу ви благодарам што толку јасно ни ги пренесовте чувствата што ги имаат лекарите. Јас сум медицинска сестра, и од прва рака сум видела дека медицинскиот персонал и пациентите не се разбираат баш најдобро. Се надевам дека овие статии ќе им помогнат на многумина подобро да ги разберат медицинските лица и да ја ценат нивната работа.

Л. К., Русија

Еден лекар ми кажа дека го прочитал списанието со голем интерес. Тој го пофали истражувањето и рече дека во потполност се согласува со статиите. Ви благодарам за овие прекрасни статии.

Х. Ц., Германија

Како пациент, размислував само за себеси. Но, ова списание ми помогна да го разберам стресот што го доживуваат лекарите. Отсега, кога ќе се разболам, нема да зборувам за мојата болест само од моето гледиште, туку ќе го следам советот од рамката „Соработувајте со лекарот“. Сакам да бидам поразумен пациент.

Џ. М., Јапонија