Предрасуди — дали ги носиш во себе?

Луѓето може да имаат предрасуди не само кон оние што се од друга националност, раса, племе или јазик туку и кон оние што имаат поинаква верска, полова или социјална припадност. Некои имаат негативно мислење за другите судејќи ги според нивната возраст, образование, физички изглед или само затоа што имаат хендикеп. И покрај сето ова, тие сметаат дека немаат предрасуди.

Можно ли е и ти да си заразен со овој вирус — со предрасуди? Повеќето од нас лесно ќе забележиме ако некој друг има предрасуди. Но, малку потешко ги гледаме кај себеси. А факт е дека сите имаме некакви предрасуди. Професорот по социологија, Дејвид Вилијамс, вели дека, кога некој има лошо мислење за одредена група луѓе и кога ќе сретне некого од таа група, се однесува поинаку со него, а не и ни свесен дека го прави тоа.

На пример, Јовица живее во една балканска земја во која има и луѓе од друга етничка припадност кои другите не ги сакаат многу. Јовица вели: „Мислев дека нема ниту еден добар човек во тој народ. А сепак сметав дека немам предрасуди. Си велев: ’На крајот на краиштата, тоа е општопознат факт‘“.

Во многу земји има закони против расизам и други облици на предрасуди. Сепак, и понатаму има предрасуди. Зошто? Затоа што тие закони можат да ограничат само нечии постапки, но не можат да ги контролираат неговите мисли и чувства. А предрасудите извираат од умот и срцето. Дали тоа значи дека залудно се бориме против нив? Има ли лек за предрасудите?