Начини кои ги користат за да ја споделат добрата вест со другите

НА ХРИСТИЈАНИТЕ им е заповедано да ‚прават ученици од луѓето од сите нации‘, но тоа не значи да вршат притисок или сосила да ги преобраќаат другите. Исусовиот налог бил да им ја ‚објават добрата вест на кротките‘, ‚да ги преврзат оние со скршено срце‘, да ги ‚утешат сите кои тагуваат‘ (Матеј 28:19; Исаија 61:1, 2, NW; Лука 4:18, 19). Јеховините сведоци настојуваат да го прават тоа така што ја објавуваат добрата вест од Библијата. Исто како пророкот Језекиил од старо време и Јеховините сведоци денес се трудат да ги пронајдат „оние што жалат, кои воздивнуваат за гадотиите, што се вршат во него“ (Језекиил 9:4).

Најпознатиот начин што го користат за да ги пронајдат оние кои се вознемирени поради сегашниве околности е одење од куќа до куќа. На тој начин вложуваат позитивни напори да ги достигнат луѓето, исто како што правел Исус кога ‚одел од град до град и од село до село, проповедајќи и објавувајќи ја добрата вест за Божјето царство‘. Истото го правеле и неговите први ученици (Лука 8:1; 9:1—6; 10:1—9). Денес, онаму каде што е можно, Јеховините сведоци настојуваат да го посетат секој дом неколкупати годишно, обидувајќи се по неколку минути да разговараат со станарот на некоја тема што е од локален или од светски интерес. Во таа прилика нудат да се разгледаат еден или два библиски стиха и, ако станарот покаже интерес, Сведокот може да договори да наврати во некое друго погодно време за понатамошна дискусија. Ставаат на располагање Библии и литература која ја објаснува Библијата и, ако станарот изрази желба, со него бесплатно се води домашна библиска студија. Ширум светот, со поединци или со семејства, редовно се водат милиони вакви корисни библиски студии.

Друг начин на кој им се кажува ‚добрата вест за царството‘ на другите е преку состаноците кои се одржуваат во локалните Сали на Царството. Во нив Сведоците одржуваат состаноци секоја седмица. Еден од тие состаноци е јавното предавање на тема од општ интерес, а потоа се проучува некоја библиска тема или пророштво, при што како изворен материјал се користи списанието Стражарска кула. Друг состанок е школа на која Сведоците се обучуваат да бидат подобри објавители на добрата вест, а после неа следи дел посветен на дискусија за делото на сведочење на локалното подрачје. Исто така, еднаш седмично Сведоците се состануваат во приватни домови, во помали групи, за да ја проучуваат Библијата.

Сите овие состаноци се отворени за јавноста. На нив нема собирање прилози. Ваквите состаноци се корисни за сите. Во Библијата читаме: „Треба да гледаме како секој од нас може на најдобар начин да ги поттикне другите кон љубов и активна доброта, не оддалечувајќи се од нашите состаноци, како што прават некои, туку напротив, охрабрувајќи се еден со друг, толку повеќе колку што гледаме дека се приближува Судниот ден“. Приватното проучување и истражување се потребни, но состанувањето со другите стимулира: „Како што железо остри железо, така човек го изострува разумот на другиот“ (Евреите 10:24, 25, The New English Bible; Изреки 27:17).

Сведоците добро ги користат приликите да разговараат за добрата вест и кога доаѓаат во контакт со други луѓе во секојдневниот живот. Тоа може да биде размена на неколку зборови со некој сосед или сопатник во автобус или во авион, подолг разговор со некој пријател или роднина или, пак, дискусија со колега на работа за време на паузата. Голем дел од сведочењето што го вршел Исус кога бил на Земјата било токму од таква природа — додека пешачел покрај брегот, кога седел на некоја падина, кога бил поканет на вечера во нечиј дом, на свадба или кога патувал со рибарски чамец по Галилејското Море. Поучувал во синагогите и во храмот во Ерусалим. Секаде каде што одел, пронаоѓал прилики да зборува за Божјето Царство. Јеховините сведоци настојуваат и во тој поглед да ги следат неговите стапки (1. Петрово 2:21).

ПРОПОВЕДАЊЕ СО ПРИМЕР

Ниеден од овие начини на пренесување на добрата вест не би значел ништо ако оној кој Ви ја кажува не ги применува учењата лично. Да се зборува едно а да се прави друго е лицемерство, а поради религиозното лицемерство милиони луѓе се одвратиле од Библијата. Не е во ред да ја обвинуваме Библијата за тоа. Иако книжниците и фарисеите ги имале Хебрејските списи, Исус ги прогласил за лицемери. Тој рекол дека тие читаат од Мојсеевиот закон, а потоа пред своите ученици додал: „Правете и држете сѐ што ви кажуваат, но не правете според нивните дела, бидејќи тие зборуваат, а не прават“ (Матеј 23:3). Со својот пример на исправно живеење христијанинот може да каже повеќе отколку со часови да држи проповед. На ова им било укажано на христијанските сопруги чии сопрузи не биле соверници: „Да бидат придобиени без збор преку однесувањето на своите сопруги, поради тоа што биле очевидци на вашето чесно однесување“ (1. Петрово 3:1, 2).

Затоа Јеховините сведоци се трудат да им ја препорачаат добрата вест на другите и на овој начин: со тоа што и самите се пример во христијанското однесување кое им го препорачуваат на другите. Тие настојуваат ‚да им прават на другите исто како што сакаат другите да им прават ним‘ (Матеј 7:12). Се трудат да бидат такви со сите луѓе, не само со Сведоците, пријателите, соседите или со роднините. Тоа не им успева секогаш во потполност бидејќи се несовршени. Но, во срцето имаат желба да им прават добро на сите луѓе, не само со тоа што им кажуваат за добрата вест за Царството туку и со тоа што пружаат рака да помогнат секогаш кога можат (Јаков 2:14—17).

[Слика на страница 19]

Хаваи

[Слика на страница 19]

Венецуела

[Слика на страница 19]

Југославија

[Слики на страница 20]

Салите на Царството, дизајнирани на практичен начин, се места за библиска дискусија

[Слики на страница 21]

Во својот семеен живот и во контактите со другите, Сведоците искрено се трудат да го прават она што го застапуваат