Поканет си на Обласните конгреси ”Љубители на слободата“

ОД НОЕМВРИ 1989, слободата е тема која стана поистакната отколку било кога порано. Особено жителите на источноевропските земји се радуваат на поголемата политичка слобода отколку што ја имаа во последните 40 или повеќе изминати години.

Но, постои слобода која е далеку позначајна од било каква политичка слобода. За тоа можеме да читаме во Божјата Реч, Библијата. Исус Христос еднаш рекол: ”Ќе ја спознаете вистината, и вистината ќе ве ослободи“ (Јован 8:32, НС). Да, предадените христијани се ослободени од стравот од човекот и од ропството на гревот и смртта, како што читаме во Римјаните 6:18, 22 (НС). Исто така читаме дека ”каде е духот Јеховин, таму е слободата“ (2. Коринтјаните 3:17, НС). Всушност, Божјата Реч пружа светли изгледи дека и ’самата творба ќе биде ослободена од ропството на распадливоста и ќе ја има славната слобода на Божјите деца‘ (Римјаните 8:21, НС).

Секој што сака да стекне христијанска слобода во денешно време, мора да вложи вистински напор. Тоа никако не е само следење на линијата на помал отпор. А за да се продолжи да се ужива во таа слобода, потребен е дополнителен напор поради силите кои тежнеат да ни ја одземат слободата: Сатана Ѓаволот, неговиот зол свет и нашите сопствени наследени грешни наклоности. Јехова Бог пружил помош преку својата инспирирана Реч, преку својот свет дух и преку својата видлива организација (Лука 11:13, НС).

За да им помогнат на сите љубители на слободата уште поцврсто да се држат за слободата, овогодишните обласни конгреси на Јеховините сведоци оправдано ќе бидат посветени на темата ”Љубители на слободата“. Овие конгреси ќе траат три дена, со почеток во петок претпладне во 10.20, и ќе траат до 16.00 часот во недела. Сите кои ќе дојдат на тие конгреси ќе бидат духовно освежени и изградени преку возбудливите предавања, интересни интервјуа, делотворни прикази и впечатливата современа драма. Не би требало да се занемари ниту радоста од срдечното дружење со старите и новите пријатели, уживањето во пеењето на нашите Царски песни заедно со илјадници други, како и учеството во искрените јавни молитви.

Нека сите предадени слуги на Јехова не допуштат било што да ги спречи да присуствуваат во петок наутро кога почнуваат тие конгреси. И немој да заборавиш да ја понесеш не само Библијата и песнарката, туку и пенкало и бележник. Исто така, дојди со потполна свесност за своите духовни потреби како припадник на еден слободен народ (Матеј 5:3, НС).