Објавителите на Царството известуваат
Ја пуштиле нивната светлина да свети во Индија
ДОБРАТА вест за Царството, во Индија ја проповедаат 11.524 радосни Сведоци (Матеј 24:14). Оние 1.066 кои се крстија во текот на 1991 службена година, се објавители на Царството кои ја пуштаат нивната светлина да свети пред другите. Колку беа среќни сите што можеа да ги видат 28.866-те присутни на Спомен-свеченоста по повод Христовата смрт!
◻ Многумина првпат дознале за надежта на Царството преку неформално сведоштво. На пример, еден Сведок им зборувал за вистината на своите колеги на работа кои исто така биле дрводелци. Еден од колегите се одѕвал и почнал да ја пушта својата светлина пред своето семејство и пријателите. Тие пак радосно ја пренеле оваа прекрасна вест за Царството на други. Според извештаите, за само неколку години ‚преку 30 лица ја прифатиле вистината‘. Јехова го благословил него и неговите духовни браќа затоа што ја пуштиле нивната светлина да свети.
◻ Еден млад брат од едно друго собрание, ја пуштал својата светлина, сведочејќи им неформално на другите студенти на факултетот. Некои од нив се заинтересирале за надежта на Царството, па често им ја објаснувал Библијата сѐ до после полноќ. Еден од нив, католик, зазел цврст став за вистината и покрај тоа што свештеникот го предупредил за острите последици ако продолжи да се дружи со Сведокот. Меѓутоа, ученикот бил убеден дека од Сведокот ја учи библиската вистина и продолжил да расте во спознанието. Конечно се крстил и сега служи како слуга помошник во собранието. Тој се радува во надежта која произлегува од прекрасната светлина на вистината! (Римјаните 12:12).
◻ Еден друг, којшто го слушал овој млад Сведок, бил добро познат студент, атеист, кој имал обичај да ги исмејува оние што се изјаснувале дека веруваат во Бог, но еден ден се придружил во разговорот и поставил многу прашања. Бил изненаден кога добил логични одговори на сите свои прашања и дошол до заклучокот дека Библијата е Божја Реч. Растел во библиското спознание и најпосле се крстил. Неговиот татко, Хиндус, му се противел до таа мера што го исфрлил од дома. Меѓутоа, цврстиот став на овој младич за вистината бил награден кога двајца од неговите телесни браќа и двајца негови другари ја прифатиле вистината и се крстиле. Еден од неговите браќа сега служи во подружницата во Индија.
◻ Еден студент–активист исто така се вклучувал во разговорите со младиот студент. Тој бил страстен пушач и тежок пијаница. Еднаш сакал да претепа двајца студенти кои ја запознале вистината од Сведокот. Затоа што ја прифатиле вистината, тие одбиле да се придружат во еден штрајк на факултетот, а исто така не сакале да даруваат крв во текот на една акција што ја предводел студентот–активист. Овој младич сега е среќен што е носител на светлината како Сведок на Јехова.
◻ Во сите случаи, студентот кој прв ја пуштил својата светлина да свети им помогнал на 15 свои врсници да дојдат до предание и крштение со тоа што им сведочил неформално.
Радосно е да се видат многумина во оваа огромна земја како ја прифаќаат библиската надеж за Божјиот нов свет и се придружуваат на светското братство кое Јехова го собира да живее засекогаш под неговото Царство.