Среќна прилика — промоција на 104-от клас на Гилеад

„ОВА е среќен ден, и сите ние се радуваме.“ Со овие зборови Кери Барбер, член на Водечкото тело на Јеховините сведоци, ја отвори свеченоста за промоцијата на 104-от клас на Библиската школа Гилеад на Watchtower, на 14 март 1998. Публиката од 4.945 присутни беше поканета да ја започне приликата пеејќи ја песната на Царството број 208, со наслов „Песна на радоста“.

Практичен совет да се остане среќен

Уводниот дел од програмата — серија од пет кратки говори темелени на Библијата — даде некои практични совети за тоа како да се задржи радосниот дух кој го проникнуваше денот на промоцијата.

Првиот говор го изнесе Џозеф Имс од Одделот за пишување. Тој говореше на темата „Имитирај го духот на лојалните“, темелен на библискиот извештај од 2. Царства, поглавја 15 и 17, каде што Авесалом, Давидовиот син, сковал завера да му го одземе Царството кое му го дал Бог на неговиот татко, со тоа што подбуцнал револт. Меѓутоа, имало и такви кои му останале лојални на Јеховиниот помазаник, царот Давид. Каква лекција би можеле новите мисионери да извлечат од тоа? „Каде и да одите на вашата мисионерска доделба, лојално унапредувајте го духот на соработка и почитување кон теократскиот авторитет. Помагајте им на другите да го прават истото“, заклучи брат Имс.

Следен на програмата беше Дејвид Синклер, кој изложи десет барања — спомнати во Псалм 14 — за да бидеме гости во ‚Јеховиниот шатор‘ (NW). Неговиот говор, со наслов „Продолжете како гости во својот мисионерски шатор“, ги охрабри дипломираните студенти да го применуваат овој псалм на своите мисионерски доделби, каде што ќе бидат гости. Брат Синклер ја истакна важноста на живеењето според побожните мерила во сите времиња. Резултатот? Псалм 14:5 наведува: „Кој така постапува, нема никогаш да се поколеба“.

Следеше Џон Бар, член на Водечкото тело, и сврте внимание кон освежувачкиот ефект што го има пеењето на христијанските состаноци. Но, која е најрадосната песна што се пее ширум Земјата денес? Тоа е добрата вест за Божјето месијанско Царство. Каков е резултатот од сето тоа пеење, т. е. проповедање за Царството? Него концизно го изнесува втората строфа од песната број 208: „Преку проповедањето на Царството и христијанското поучување, многумина се привлечени на Јеховината страна. И тие пеат песни на радост, ги разгласуваат, ох толку надалеку и нашироко!“ Да, секој ден се крштаваат по околу 1.000 нови ученици. Брат Бар заклучи: „Зарем не е прекрасно да размислувате, браќа, дека вие сте испратени во подрачја за да ги сретнете оние луѓе кои баш чекаат за да ја чујат вашата песна на фалба?“

„Слушнете ги гласовите на искуството“, беше насловот на говорот кој потоа го изнесе Џејмс Мантс од Одделот за пишување. Тој истакна дека некои работи можат да се научат само преку лично искуство (Евреите 5:8). Сепак, Изреки 22:18 нѐ охрабрува да ‚го наклониме увото и да ги слушаме зборовите на мудрите‘, т. е. на оние кои стекнале искуство. Дипломираните студенти можат многу да научат од оние кои заминале пред нив. „Тие знаат како да се ценкаат со локалните дуќанџии. Знаат кои подрачја од градот да ги избегнуваат поради физичките или моралните опасности. Тие ги знаат ранливите точки на локалните луѓе. Долгогодишните мисионери знаат што ви е потребно за да бидете среќни и успешни на вашата доделба“, рече брат Мантс.

Говорејќи на темата „Ценете ја вашата теократска доделба“, Валас Ливеранс, архивар при школата Гилеад, објасни дека иако некои мисионери, како што биле апостол Павле, Тимотеј и Варнава, ги добиле своите доделби од Бог преку светиот дух или преку некоја чудесна манифестација, мисионерите кои се обучени во Гилеад се доделени на некое место на светското поле од страна на ‚верниот и разборит роб‘ (Матеј 24:45—47, NW). Тој ги спореди доделбите на мисионерите со местата каде што Гедеон ги доделил своите луѓе кои требало да се борат со Мадијамците (Судии 7:16—21). „Ценете ја својата мисионерска доделба. Токму како што секој од Гедеоновите војници ‚стоел на местото свое‘, така на вашата доделба гледајте како на ваше место. Имајте вера дека Јехова може да ве употреби токму како што ги употребил Гедеоновите тристотини“, поттикнал брат Ливеранс.

Кога си ориентиран кон луѓето — тоа резултира во среќа

Еднаш Стражарска кула коментирала: „Наместо да ги градиме нашите интереси и животи околу фабрички артикли и справи од сегашниов свет — работи кои немаат засигурување дека ќе продолжат — колку само е подобро и помудро да направиме луѓето да ни бидат вистински интерес и да научиме да наоѓаме вистинска радост правејќи нешто за другите“. Во склад со тоа, брат Марк Нумар, еден од инструкторите во школата Гилеад, дискутираше со една група студенти за нивните искуства од службата на теренот, и коментираше: „Покажувањето личен интерес за другите е она што ќе ве направи добри мисионери“.

Клучеви за среќа на странското поле

Кои се некои клучеви за успехот и среќата во мисионерското дело? Браќата Чарлс Вуди од Службениот оддел и Харолд Џексон — поранешен мисионер во Латинска Америка и асистент на Одборот за поучување — интервјуираа членови од различни одбори на подружници кои присуствувале во деветтиот клас од школата за персонал на подружницата. Следат примери од советот што тие имаа да го понудат:

Алберт Мусонда од Замбија забележа: „Кога мисионерот презема иницијатива да отиде и да ги поздрави браќата, тоа предизвикува добар дух, бидејќи браќата ќе му се приближат на мисионерот, а мисионерот ќе им се приближи ним“.

Роландо Моралес од Гватемала сугерираше дека кога пријателски настроените луѓе ќе им понудат нешто за пиење на новите мисионери, овие можат љубезно и тактично да одговорат: „Јас сум нов во земјава. Би сакал да можам да се напијам, но моето тело го нема природниот имунитет кој го има Вашето тело. Се надевам дека еден ден ќе можам да го прифатам, и ќе ми биде драго да го сторам тоа“. Кои се користите од таквиот одговор? „Луѓето нема да се навредат, а мисионерите ќе бидат љубезни со другите.“

Што може да им помогне на мисионерите да истраат на своите доделби? Брат Пол Крудас, дипломец на 79-от клас на Гилеад, кој служел во Либерија во изминатите 12 години, ја даде оваа забелешка: „Знам дека е точно тоа дека на родителите им недостигаат нивните деца. Но, постојат времиња кога мисионерот се обидува да се навикне на земјата, на околината, на културата, на луѓето. Можеби тој сака да си замине. Доколку од дома добие писмо кое му вели: ‚Многу ни недостигаш; не знаеме што ќе правиме без тебе‘, можеби тоа ќе биде сѐ што му треба за да си ги спакува торбите и да си замине дома. Многу е важно за роднините кои денес се тука да го запомнат ова“.

После интервјуата, завршниот говор на програмата го презентираше Теодор Џерес, член на Водечкото тело. Неговата тема беше „Држи го Царството на челно место во својот живот“. Како можат мисионерите да останат сосредоточени и да не бидат одвратени од нивното дело? Тој ги охрабри да имаат распоред за лична библиска студија која ќе им помогне да ги држат интересите на Царството на челно место во животот. А таму беше и овој навремен потсетник: „Некои мисионери ја занемариле личната студија бидејќи станале обземени со електронски справи, E-mail и со компјутерот. Треба да имаме добар осет за да бидеме урамнотежени во употребата на каква и да е алатка и да не трошиме прекумерно време на нешто што би можело да ја загрози нашата лична студија на Божјата Реч“.

После говорот на брат Џерес дојде врачувањето на дипломите и читањето на благодарното писмо од класот. Претставникот на класот вака ги изрази чувствата на сите нив: „Ние видовме опиплив доказ за љубовта за која Исус рекол дека ќе ги карактеризира неговите ученици и тоа повторно нѐ увери дека, каде и да сме, постои една топла, полна со љубов и како мајка организација која нѐ поддржува. Со таквата поддршка, ние сме спремни да одиме до краевите на Земјата“. Тоа беше трогателен заклучок на еден среќен ден на промоција за 104-от клас на Гилеад.

[Рамка на страница 24]

Податоци за класот

Број на застапени земји: 9

Број на земји во кои се доделени: 16

Број на студенти: 48

Број на брачни двојки: 24

Просечна старост: 33

Просек на години во вистината: 16

Просек на години во полновремена служба: 12

[Слика на страница 25]

104-от клас кој дипломираше на Библиската школа Гилеад на Watchtower

Во долнава листа, редовите се нумерирани однапред наназад, а имињата се наведени одлево надесно во секој ред

1) Ромеро М.; Хауварт Џ.; Блекбарн-Кејн Д.; Хохенгасер Е.; Вест Ш.; Том С. 2) Колон В.; Гленси Џ.; Коно Ј.; Друс П.; Там С.; Коно Т. 3) Там Д.; Цехмајстер С.; Гердел С.; Елвел Џ.; Данек П.; Тибадо Х. 4) Тејлор Е.; Хилдред Л.; Санчес М.; Андерсон Ш.; Бакнор Т.; Хохенгасер Е. 5) Хауварт Д.; Ворд Ш.; Хинч П.; Макдоналд Ј.; Санчес Т.; Том О. 6) Друс Т.; Тибадо Е.; Елвел Д.; Данек В.; Блекбарн-Кејн Д.; Ворд В. 7) Андерсон М.; Цехмајстер Р.; Макдоналд Р.; Бакнор Р.; Гленси С.; Гердел Г. 8) Ромеро Д.; Хинч Р.; Хилдред С.; Тејлор Џ.; Колон А.; Вест В.

[Слика на страница 26]

Браќата кои учествуваа во поучувањето на 104-от клас: (од лево) В. Ливеранс, Ј. Глас, К. Адамс, М. Нумар