Објавителите на Царството известуваат

Наоѓање на вистината на необично место

БОЖЈА волја е „сите видови луѓе да се спасат и да дојдат до точно спознание на вистината“ (1. Тимотеј 2:3, 4). За таа цел, Јеховините сведоци имаат отпечатено и дистрибуирано милиони примероци на Библијата и помагала за нејзино проучување. Понекогаш овие публикации им помогнале на оние со искрени срца да ја дознаат вистината на мошне неочекувани начини. Во врска со тоа, објавителите на Царството во Фритаун, Сиера Леоне, известуваат за следново искуство.

Осман бил вториот син во едно семејство со девет деца. Растејќи во религиозен дом, редовно одел на обожавање со татко му. Меѓутоа, она што неговата религија го поучувала за пеколот длабоко го загрижувало. Не можел да сфати како е можно еден милосрден Бог да ги мачи злобните луѓе горејќи ги во оган. Сите објаснувања што му биле понудени на Осман да ја разбере доктрината за пеколниот оган не успеале да го смират.

Еден ден, кога Осман имал 20 години, забележал една сина книга делумно закопана во канта за ѓубре. Бидејќи сакал книги, ја земал, ја исчистил и го видел насловот — Вистина која води до вечен живот.a

‚Каква вистина е ова?‘ се чудел Осман. Со разгорена љубопитност, Осман ја однел книгата дома и ја прочитал во еден здив. Колку бил возбуден што дознал дека Бог има лично име — Јехова! (Излез 34:5). Осман дознал и дека Божјата главна особина е љубовта и дека дури и помислата луѓето да се мачат во некое огнено место е нешто одвратно за Него (Еремија 32:35; 1. Јованово 4:8). На крај, прочитал дека Јехова наскоро ќе воспостави земен рај во кој луѓето ќе можат да живеат засекогаш (Псалм 37:29; Откровение 21:3, 4). Колку прекрасна вистина од еден милосрден Бог полн со љубов! Со длабоко ценење, Осман му се заблагодарил на Јехова затоа што му дозволил да ја пронајде вистината на едно многу необично место.

Неколку дена подоцна, со помош на некои негови пријатели, Осман ја нашол Салата на Царството на Јеховините сведоци и за првпат присуствувал на состанок. Додека бил таму, замолил еден Сведок да ја проучува Библијата со него. И покрај силното противење од семејството, Осман продолжил духовно да напредува и се крстил (Матеј 10:36). Денес служи како старешина во собранието. Колку е само прекрасно што сето ова било резултат на една библиска публикација најдена во канта за ѓубре!

[Фуснота]