Обласни конгреси за 1999 — „Божјата пророчка реч“
1 Кога Израелците биле непосредно пред влегувањето во Ветената земја, Мојсеј ги преколнувал да ја ценат Божјата поука. Тој им рекол: „Тие не се за вас празни зборови, туку ваш живот“ (5. Мој. 32:45—47). Зарем не сме му благодарни на Јехова за тоа што нашиот живот му е толку скапоцен што и понатаму нѐ води преку својата бесценета Реч? Затоа желно го исчекуваме тридневниот обласен конгрес „Божјата пророчка реч“ и она што Јехова го ставил на располагање за нас. Оваа година повторно ќе имаме еден обласен конгрес кој се планира за цела Македонија.
2 Несомнено веќе си направил подготовки да присуствуваш на секој ден од конгресот затоа што веруваш дека Јехова очекува од тебе да бидеш присутен. Биди уверен дека тој ги забележува поединечните напори и жртви што ги прават неговите слуги за да присуствуваат и со ценење се сеќава на нив (Евр. 6:10). Со тоа што ќе бидеме присутни на секој конгресен ден, од уводната песна до заклучната молитва, му покажуваме на Јехова дека ги цениме неговите зборови упатени до нас (5. Мој. 4:10). Исто така, покажуваме ценење за напорната работа на многуте наши браќа кои биле вклучени во подготовките за конгресот.
3 Подготовката која вклучува илјадници од Божјиот народ да се соберат на секоја конгресна локација бара планирање однапред и добра организација. Сознанието дека за нас со љубов се направени конгресни подготовки треба да нѐ поттикне да соработуваме, со цел „сѐ да се врши како прилега и уредно“ (1. Кор. 14:40). Следниве информации и потсетници се дадени за да пристигнеш на твојот конгрес целосно подготвен да уживаш во духовната храна и во христијанското дружење.
Пред конгресот
4 Дали на оние со кои водиш библиски студии и на другите заинтересирани им треба помош во личните подготовки да дојдат на конгресот? Она што ќе го видат и чујат таму може да ги поттикне да станат обожаватели на Јехова (1. Кор. 14:25). Старешините треба да бидат свесни за секого кој бара помош за сместување или транспорт, особено постарите членови од собранието, и со љубов да се погрижат да бидат задоволени нивните потреби (Гал. 6:10).
5 Дали ги заврши подготовките за сместување? Ако бидеш сместен во хотел, дали ги направи сите потребни подготовки преку старешините во твоето собрание? Ако твоето собрание сѐ уште не добило информации за ова, наскоро ќе ги добиеш. Те молиме, погрижи се колку што е можно порано да ги следиш упатствата и предлозите кои се дадени за да може да се води грижа за оваа работа и за да можеш да се сконцентрираш на духовните користи од програмата.
6 Ако ти требаат информации за некој друг конгрес, собранискиот секретар може да ти ги даде адресите на конкретните локации кои се наоѓаат на задната страница од формуларот „Барање за сместување со посебни потреби“. Те молиме, не телефонирај и не пишувај до управата на конгресниот објект.
7 Бидејќи Одделот за прва помош на конгресот е поставен само за интервенции во итни случаи, препорачуваме сами да си понесете на конгресот аспирин, завој, инхалатори, дигестивни средства и слични работи ако мислите дека можеби ќе ви требаат. Ако ти или некој твој драг моментално има некое сериозно заболување, како што се проблеми со срцето, дијабетес или постои опасност од напади, те молиме понеси ги на конгресот потребните лекарства за да се погрижиш за овие потреби како кога си дома или на годишен одмор. Би било мудро некој член на семејството или близок пријател кој ја разбира ситуацијата да биде во друштво на таквиот, бидејќи ќе биде во најдобра положба да ја даде потребната помош.
8 Веројатно ќе се укажат прилики за неформално сведочење додека патуваш до и од конгресот. Ќе бидеш ли подготвен да ја споделиш вистината со другите? Сите ние, вклучувајќи ги и децата, можеме да се ангажираме да нудиме трактати на вработените на бензиските пумпи, на патарините и на другите луѓе што ќе ги сретнеме додека патуваме. Ќе се укажат прилики да им врачиме на заинтересираните списанија, брошури или друга литература. Биди подготвен да им сведочиш неформално на луѓето кои инаку би биле пропуштени со повеќето вообичаени методи на проповедање.
За време на конгресот
9 Вратите на конгресната локација ќе бидат отворени во 8.00 секој ден. Можеш да чуваш места само за членовите на твоето потесно семејство или група во автомобилот. За постарите браќа и сестри ќе бидат резервирани пригодни седишта, а за инвалидите и оние на кои им треба пристап со количка ќе биде одвоен простор. Не е можно да се одвои посебно место на конгресната локација за оние кои имаат болести поврзани со животната средина или алергии. Секој ден кога си заминуваш од местото каде што си седел, те молиме провери дали си ги зел сите свои работи.
10 За да се собереме во голем број на нашиот обласен конгрес, од нас се бара да се подложиме на локалните закони, противпожарните прописи и другите безбедносни работи. Затоа, во зградата каде што се собираме не треба да се внесуваат детски колички и столици на расклопување. Тие се опасни зашто можат да спрепнат некого кога се минува пеш или меѓу редовите на седиштата. Меѓутоа, дозволени се детски безбедносни седишта прицврстени за седиштето до родителите.
11 Дали ќе се крстиш на овој обласен конгрес? На утринската сесија во сабота ќе бидат резервирани неколку реда седишта за кандидатите за крштавање, а редарите ќе те упатат на ова место. Ако е воопшто можно, те молиме седни таму уште пред да започнат сесиите. Понеси си ја Библијата, песнарката и скромен костим за капење. Искинати фармерки, маици со слогани и слична облека не е прикладна за една таква достоинствена прилика. Старешините кои со кандидатите за крштавање ги повторуваат прашањата од книгата Наша служба треба да се погрижат секој од нив да ги разбере овие точки. Бидејќи крштавањето е симбол на лично предание на Јехова Бог, не би било прикладно кандидатите да се држат за раце додека се крштаваат.
12 Можеш да користиш фотоапарат, видеокамера и магнетофон за снимање. Меѓутоа, кога ги сместуваш или ги користиш, не смееш да ги блокираш редовите, да го попречуваш видикот на другите или да го одвлекуваш вниманието од програмата. Тие мора да бидат на батерии — односно да не се приклучуваат за електричната или разгласната мрежа.
13 Бидејќи се зголемува употребата на мобилни телефони и пејџери, те молиме внимавај овие направи да не го одвлекуваат твоето внимание од програмата ниту, пак, концентрацијата на оние кои седат околу тебе. Не смее да се дозволи овие направи да ѕвонат додека седиш во публиката. Ако е неопходно да користиш мобилен телефон додека тече програмата, те молиме напушти ја салата.
14 Во полза на времето и за да биде поедноставно, Заедницата нѐ замоли сами да си носиме ручек секој ден на конгресот. Повеќето браќа го следеа ова упатство и увидоа дека кога почнува пладневната пауза, можат да седнат со своите семејства и да јадат од она што си го понеле за тој ден. Многумина рекле дека многу уживале во можноста да се опуштат во текот на пладневната пауза и да поминат повеќе време заедно со своите браќа и сестри. За ова е потребно однапред да се купат намирници и пијалаци и да се спакуваат во мал сад или ладилник кој може да се смести под седиштето. Молиме сите присутни да го следат ова упатство. Неодамна, директорите на објектите и продавачите на храна во објектите каде што се одржуваа нашите конгреси виделе како некои браќа го напуштаат местото за да купат храна од уличните продавачи и од блиските продавници за брза храна. Некои од продавачите на храна во конгресните објекти што се користат сега бараат да им се дозволи да ги отворат своите штандови со храна и да ги служат делегатите кои доаѓаат на нашите конгреси. Ако се дозволи тоа, многу световни луѓе би се мешале со нас во текот на денот. Исто така, би настанала гужва и долги редици околу штандовите и би се нарушила опуштената атмосфера на нашите конгреси. Затоа, молиме секој да се потруди да си понесе храна и пијалаци за секој ден на конгресот. Заинтересираните кои се со тебе на конгресот исто така треба да си понесат храна. Стаклени садови и алкохолни пијалаци не се допуштени во конгресните објекти.
15 Можеш ли доброволно да помагаш околу чистењето на објектот после сесиите секој ден? Или, пак, можеш ли да работиш во некој од другите конгресни оддели? Ако можеш да помогнеш, те молиме јави се во Одделот за доброволна служба на конгресот. Децата под 16-годишна возраст се добредојдени да работат заедно со родителот или со некое друго одговорно возрасно лице. Се разбира, секој може да помогне во чистењето на објектот со тоа што ќе собере секаков отпад и ќе го фрли на исправно место.
16 Добивме добри упатства за она што значи соодветна облека и дотерување на нашите конгреси. На пример, имаме упатства за оваа работа во додатоците од Наша служба за Царството, имаме илустрации и фотографии во нашата литература, а што е најважно од сѐ, го имаме она што Јехова го вели во Библијата (Рим. 12:2; 1. Тим. 2:9, 10). Луѓето знаат кои сме и зошто сме се собрале во нивниот град. Така, самата наша облека и дотерување се силно сведоштво. Повеќето од Јеховиниот народ даваат добар пример на ова подрачје. Меѓутоа, повремено го гледаме духот на светот одразен во облекувањето и дотерувањето на некои кои доаѓаат на нашите конгреси. Секаква облека која разоткрива, го доведува во прашање тврдењето на поединецот дека е духовна личност. Скромниот, чист и уреден изглед е она што е најпривлечно. Затоа, семејните поглавари треба да забележат што планираат да носат членовите на нивното семејство. Ова би важело и тогаш кога сме надвор од конгресната локација. Ако ги носиме нашите значки пред и после сесиите секој ден, тоа ќе биде уште една идентификација со Јехова и со неговиот чист народ. (Спореди Марко 8:38.)
17 Мудриот цар Соломон бил инспириран да забележи дека „безумието на детето му е приврзано за срцето“ и дека „момче, оставено без грижа, ги посрамува своите родители“ (Изр. 22:16; 29:15). За време на сесиите, помлади Сведоци оставени без надзор им сметале на браќата и сестрите кои се труделе да извлечат корист од програмата. Бидејќи родителите се одговорни пред Јехова за однесувањето на своите деца, мајката или таткото ќе можат да бидат сигурни дека децата добро се однесуваат и ја слушаат Јеховината поука само ако тие седат со нив. Редарите ќе им пристапат на сите кои го одвлекуваат вниманието и ќе побараат да престанат со тоа, љубезно потсетувајќи ги да внимаваат на програмата.
18 Бидејќи љубезно ја примаме јавноста на нашите конгреси, мудро е да бидеме претпазливи во врска со децата и личните поседи. Нашите деца се скапоцен подарок од Јехова. Но, знаеме дека светот ја одразува грабливата природа на Сатана. Затоа, те молиме во секое време биди свесен каде се твоите деца. Исто така, камерите, чантите и другите предмети од вредност треба да бидат со тебе во секое време и не оставај ги на седиштето. Провери дали твоето возило е заклучено и стави ги личните работи во багажникот или земи ги со себе. Ова го намалува искушението некој да провали во твоето возило.
19 Локалниот Оддел за сместување е желен да ти помогне ако се појави некој проблем со твојата хотелска резервација. Те молиме информирај го Одделот за сместување за секакви проблеми додека си сѐ уште на конгресот. Браќата со задоволство ќе ти помогнат да ја решиш работата за да можеш и понатаму да уживаш во конгресот. Исто така, во врска со сместувањето, те молиме, забележи го следново:
▪ Телевизијата и видеоуслугите кои се на располагање во хотелите честопати прикажуваат порнографски програми. Ако се побара, повеќето хотели ќе блокираат извесни канали или можности во твојата соба додека престојуваш во неа. Исто како дома, те молиме надгледувај како твоите деца го користат телевизорот.
20 Охрабрувачки е да се види како браќата и сестрите пишуваат забелешки за време на конгресните сесии. Кратките забелешки ќе ти помогнат да се сконцентрираш и да се потсетиш на главните мисли. Кога подоцна ќе ги разгледаш забелешките заедно со семејството и со пријателите, тоа ќе ти овозможи да медитираш за врвните мисли на конгресот и да не ги заборавиш.
21 Јеховиниот народ отсекогаш дарежливо приложувал за теократските интереси (2. Мој. 36:5—7; 2. Лет. 31:10; Рим. 15:26, 27). Твоите доброволни прилози за светското дело се користат за да се покријат трошоците поврзани со најмувањето на големите објекти во кои се одржуваат конгресите.
22 Како што е запишано во Амос 3:7, Јехова рекол дека тој „не прави ништо додека не им ја открие тајната Своја на Своите слуги — пророците“. Како оној „Кој открива тајни“, Јехова запишал во Библијата стотици пророштва кои биле точно и целосно исполнети (Дан. 2:28, 47). Допрва ќе се остварат некои величествени ветувања. Обласните конгреси за 1999, „Божјата пророчка реч“, ќе ја зајакнат твојата вера во Божјите ветувања. Внимателно слушај ја Јеховината реч за тебе. Применувај го она што ќе го видиш и ќе го чуеш — во службата, во собранието и во твојот личен живот. Се молиме за богат Јеховин благослов врз сите твои подготовки да присуствуваш секој ден на оваа богата духовна гозба!
[Истакната мисла на страница 3]
Планирај да присуствуваш цел ден во петок, сабота и недела!