Биди „горливо зафатен“ со твојата служба

¹ Кога читаме дека апостол Павле изработувал шатори додека бил во Коринт, можеби ќе заклучиме дека тоа ги ограничило неговите прилики да проповеда. Меѓутоа, во Дела 18:5 стои: „Павле почна горливо да се зафаќа со речта, сведочејќи им на Евреите за да докаже дека Исус е Христос“. Зошто Павле бил толку зафатен со проповедничката активност? Иако многумина во Коринт веќе станале верници, Господ потврдил дека во тој град ќе се направат уште многу ученици (Дела 18:8—11). Имаме ли и ние слична причина да бидеме горливо зафатени со нашата служба? Да. Можат да се најдат уште многу луѓе и да се поучат за вистината.

² Поминувај повеќе време во служба во текот на април: Веројатно имаш цел да бидеш зафатен во проповедањето на добрата вест секој месец. Но, извесни месеци ни даваат посебна прилика да бидеме „горливо зафатени“ со оваа активност. Еден од нив е и месецот април, во екот на сезоната на Меморијалот. Дали твоите околности ти дозволија да бидеш помошен пионер или да ги зголемиш своите напори во службата оваа пролет? Многу објавители кои го прават тоа добиле богати благослови (2. Кор. 9:6). Ако правиш сѐ што можеш, запомни дека Јехова е задоволен со твојата служба со сета душа (Лука 21:2—4). Какви и да ти се околностите, постави си за цел да бидеш ‚горливо зафатен‘ со твојата служба во текот на април. И не заборавај да го предадеш извештајот за служба на теренот на крајот на месецот за твоите напори да се вбројат заедно со напорите на останатите од Јеховиниот народ.

³ Посети ги новите кои дошле на Меморијалот: Во Македонија, на Меморијалот минатата година беа присутни 2.740 лица. Останува да видиме колку биле присутни оваа година. Сепак, извештаите покажуваат дека има извонреден потенцијал за уште поголема „жетва“ (Мат. 9:37, 38). Затоа, колку што е можно поскоро, направи подготовки да ги посетиш заинтересираните кои присуствувале на Меморијалот за да им пружиш духовна помош. Одложувањето на таквите посети може да му овозможи на ‚злобниот да го грабне словото на царството што е посеано во нивните срца‘ (Мат. 13:19). Брзата посета ќе покаже дека ти навистина си „горливо зафатен“ со твојата служба.

⁴ Продолжи да им помагаш на неактивните: Во февруари почна да се вложува посебен напор да им се помогне на неактивните. Ако има некои кои сѐ уште не добиле пастирска посета, старешините треба да договорат да ги посетат уште пред да заврши април. Старешините ќе настојуваат да одредат која е причината за проблемот на поединецот и како најдобро да му се помогне за повторно активно да му служи на Јехова. Оваа помош полна со љубов покажува дека старешините сериозно ја сфаќаат својата одговорност како пастири на „Божјето стадо“ (1. Пет. 5:2; Дела 20:28). Изданието на Стражарска кула од 15 септември 1993, страници 22, 23, дава извонредни предлози кои старешините можат да ги употребат кога пристапуваат кон некој од петте типични проблеми со кои се соочуваат неактивните. Некои сѐ уште можат да бидат повторно активирани во службата на теренот во текот на април.

⁵ Помогни им на уште повеќе лица да станат некрстени објавители: Дали твоите деца се квалификуваат да бидат нови објавители на добрата вест? Што е со другите со кои ја проучуваш Библијата? Ако им одобрат старешините, зарем април не би бил соодветно време за да станат објавители? Ако некој напредува и ја проучувал брошурата Бара и книгата Спознание, библиската студија може да се продолжи со втора книга — Божја реч или Обединети во обожавањето. Твојата цел е да му помогнеш на студентот да стекне поголем увид во вистината, да се квалификува за некрстен објавител и да стане предаден и крстен Сведок на Јехова (Ефеш. 3:17—19; 1. Тим. 1:12; 1. Пет. 3:21).

⁶ Твојот постојан и искрен интерес за библиските студенти може да им помогне да ја направат вистината своја сопственост. Еден Сведок се запознал со една постара двојка која од сѐ срце се согласила на библиска студија. Но, двојката ја одложувала студијата три седмици едноподруго. Конечно, студијата била започната. Потоа двојката ја откажувала студијата речиси секоја втора седмица. Меѓутоа, сопругата конечно напредувала до крштавање. „Кога се крсти таа“, раскажува братот, „очите ѝ беа полни со солзи радосници, а заради тоа ни потекоа солзи радосници на мојата сопруга и мене.“ Да, ‚горливата зафатеност‘ со добрата вест носи голема радост!

⁷ Библиското пророштво и светските настани покажуваат дека живееме длабоко во времето на крајот. Сега е време кога целиот Божји народ треба да биде ‚горливо зафатен‘ со објавувањето на добрата вест на другите. Апостол Павле нѐ уверува дека таквиот труд дефинитивно ‚не е залуден во врска со Господ‘ (1. Кор. 15:58).