„Секогаш стремете се да го правите она што е добро“

¹ Христијанскиот начин на живот вклучува ‚секогаш да се стремиме да им го правиме она што е добро на сите‘ (1. Сол. 5:15). Кога присуствуваме на нашите обласни конгреси, имаме многу прилики да направиме нешто добро за другите. Во тие прилики ние сме пред очите на јавноста и сите што нѐ сретнуваат формираат мислење за нас врз основа на начинот на кој постапуваме со нив. За да задржиме добра репутација како Јеховини сведоци, треба со нашите постапки да покажуваме дека ние ‚им искажуваме чест на сите видови луѓе‘ (1. Пет. 2:17). Тоа вклучува ‚да гледаме со личен интерес не само на сопствените работи туку со личен итерес и на туѓите‘ (Фил. 2:4). Разгледај каква примена наоѓа ова во нашето однесување на конгресната локација, како и во домовите на нашите браќа.

² Дали ќе ти треба сместување за време на конгресот? Ако да, стремењето да го правиме она што е добро се однесува и на нашето однесување додека престојуваме кај нашите браќа. Сигурно ја цениме гостољубивоста на оние што им го ставаат својот дом на располагање на конгресните делегати. Никогаш не сакаме да ја злоупотребуваме љубезноста на нашите браќа со тоа што премногу ќе бараме или ќе бидеме нељубезни. Од гостите што отседнуваат кај наши браќа сигурно се очекува да бидат уредни и чисти и да внимаваат да не го оштетуваат личниот имот. Не треба да очекуваме нашите домаќини да ја задоволуваат секоја наша потреба ниту да ни ја набават сета храна што ни е потребна додека трае конгресот. Сигурно ќе биде на место да се почитува нивната приватност и барањата што ќе ги постават (Гал. 6:10).

³ Да ги поучиме децата како да прават добро: Понекогаш, децата што биле оставени без исправен надзор од возрасните правеле проблеми (Посл. 29:15). Во некои случаи, родителите биле зафатени со други активности и ги оставиле децата без некој да ги надгледува. Некои деца биле забележани како трчаат или си играат на конгресната локација додека траела конгресната програма или пред и по неа. Ова им сметало и им создавало непријатности на другите присутни.

⁴ Родители, пред конгресот би било корисно да одвоите време за да разгледате со своите деца какво љубезно христијанско однесување се очекува од нив во секоја прилика и на секое место (Ефеш. 6:4). На пример, укажете им дека вистинската христијанска љубов „не се однесува непристојно, не ги бара сопствените интереси, не се раздразнува“ (1. Кор. 13:5). Возрасните можат да ги зајакнат овие зборови давајќи добар пример што ќе можат да го видат сите. Деца, вие можете да се стремите по она што е добро ако сте им послушни на своите родители и ако сте обѕирни кон оние околу вас (Кол. 3:20). Кога обединето се стремиме да им правиме добро на сите, ние ‚го украсуваме учењето на нашиот Спасител, Бог, во сѐ‘ (Тит 2:10).

⁵ Нашето добро однесување има позитивно влијание не само врз оние што нѐ набљудуваат туку и врз оние што се критички настроени кон нас од која и да е причина. Во сѐ што правиме на конгресот и во конгресниот град — сеедно дали одиме по улица, јадеме во ресторан или ги користиме приликите за да дадеме неформално сведоштво — нашиот христијански говор и постапки треба да докажат дека сакаме да се стремиме по она што е добро.

[Рамка на страница 4]

Те молиме запомни:

■ Биди стрплив и учтив кон сите.

■ Покажи ценење за сместувањето што си го добил.

■ Исправно надгледувај што прават твоите деца.