Како да се подготвуваме за Состанокот за нашата служба
1. Која е целта на Состанокот за нашата служба, и како можеме да извлечеме најголема корист од него?
1 Целта на Состанокот за нашата служба е да нѐ оспособи да бидеме поделотворни во службата на проповедање. На овој состанок главно се поучуваме за тоа како да ја проповедаме добрата вест за Царството, како да правиме ученици и како да ја објавуваме веста дека е близу Божјиот суд (Мат. 28:20; Мар. 13:10; 2. Пет. 3:7). Најголема корист од овој важен состанок извлекуваме кога сме добро подготвени и спремни да учествуваме.
2. Како можеме да се подготвиме за да слушаме говор?
2 Говор: Во упатствата за говорникот обично е наведено на која публикација се темели говорот. Можеш да го разгледаш тој материјал, вклучувајќи ги и наведените стихови, и да размислиш како би можел да ги примениш информациите во службата.
3. Како можеме да се подготвиме за дискусија со прашања и одговори?
3 Дискусија со прашања и одговори: Оваа точка ќе се води многу слично како Проучувањето на Стражарска кула, со краток вовед и заклучок. Подвлечи ги главните мисли во секој пасус и биди подготвен да дадеш кратки, промислени коментари.
4. Како можеме да се подготвиме за дискусија со присутните?
4 Дискусија со присутните: Оваа точка ќе биде изнесена како говор, но говорникот ќе вклучи и неколку коментари од присутните. Ако ги подвлечеш главните мисли и ако ги побараш наведените стихови, ќе можеш да коментираш кога ќе бидат поставени прашања. Братот што ќе ја води оваа точка ќе се труди да ги вклучи присутните за да се нагласат главните мисли.
5. Како ќе извлечеме најголема корист од приказите?
5 Прикази: Во некои точки ќе има реални прикази што ќе покажат како би можеле на нашето подрачје да ги користиме информациите што се разгледуваат. Старешини, искусни објавители или пионери ќе бидат замолени да учествуваат во приказите. За оваа точка би можел да се подготвиш така што ќе размислуваш на кој начин ќе биде изнесен приказот. Кога ќе се користи некоја од предложените презентации, размисли како ти би ја кажал и како би ја приспособил на различни станари. Не заборавај да ја понесеш публикацијата или списанието што ќе се нуди. Некои од овие презентации би можеле да ги вежбате за време на вашето Семејно проучување.
6. Зошто да се подготвуваме за Состанокот за нашата служба?
6 Состанокот за нашата служба ќе ни биде поинтересен ако сме подготвени и ако однапред размислуваме за убавите поуки што ќе ги добиеме. На тој начин ќе придонесеме за поголемо заемно охрабрување (Рим. 1:11, 12). Ако се подготвуваме за Состанокот за нашата служба, ќе можеме подобро да го извршиме налогот што ни е даден (2. Тим. 3:17).