Нова рубрика наменета за започнување библиски студии
1. Која нова рубрика ќе почне да излегува во Стражарска кула за широка публика, и која е нејзината намена?
1 Од следниот месец, во Стражарска кула за широка публика ќе почне да излегува една нова рубрика наменета за започнување библиски студии. Таа носи наслов „Учи од Божјата Реч“. Некои луѓе на подрачјето сигурно ќе ја читаат со задоволство, но рубриката всушност треба да ни помогне да водиме разговори и да ги поучуваме.
2. Какви обележја има оваа рубрика?
2 Главни обележја: Насловот и поднасловите се во облик на прашања кои ќе можеме да му ги поставиме на станарот за време на дискусијата. Клучните стихови се наведени, а не цитирани, за нашиот соговорник да има можност да учи директно од страниците на Божјата Реч. Пасусите се кратки за да можеме да ги разгледаме додека стоиме на врата. Секоја статија се осврнува на книгата Што учи Библијата за да можеме лесно да преминеме на таа публикација кога ќе дојде време за тоа.
3. Како би можеле да ја користиме оваа рубрика за да започнеме библиска студија во службата од куќа до куќа?
3 Како да ја користиме: Кога ги нудиш списанијата, би можел да го побудиш интересот на станарот со прашање што е поврзано со главната тема на статијата. На пример, во изданието од 1 јануари се разгледува вредноста на Библијата. Би можел да прашаш: „Дали за Вас Библијата е Божја Реч или само една добра книга? [Почекај да одговори.] Имам нешто интересно на оваа тема“. Покажи му го прашањето број 1, прочитај го пасусот под прашањето и побарај го наведениот стих во Библијата. Повторно прочитај го прашањето и замоли го станарот да одговори. Колку што дозволуваат околностите, разгледајте ги на овој начин и наредните нумерирани прашања од статијата. Пред да заминеш, посочи му го следното прашање што не сте го обработиле и договорете се конкретно кога да навратиш за да го разгледате одговорот заедно. Додека да му го однесеш следното списание, секоја седмица посети го станарот за да ги разгледате сите прашања од статијата. Друга можност е директно да му предложиш да ја проучувате Библијата. Потоа, со помош на оваа статија, покажи му како се прави тоа.
4. Како би можеле да ги користиме статиите од новата рубрика кога правиме повторни посети?
4 Оваа нова рубрика можеш исто така да ја користиш делотворно кога ги посетуваш луѓето на кои редовно им носиш списанија, како и на други повторни посети. Би можел едноставно да кажеш: „Во Стражарска кула има една нова рубрика. Би сакал да Ви покажам како се користи“. Се молиме оваа нова рубрика да им помогне уште на многу лица „добро да ја запознаат вистината“ (1. Тим. 2:4).