ഏദെൻ തോട്ടം ശരിക്കും ഉണ്ടായി​രു​ന്നോ?

ഏദെൻ തോട്ട​ത്തെ​ക്കു​റി​ച്ചും ആദാമി​നെ​യും ഹവ്വയെ​യും കുറി​ച്ചും നിങ്ങൾക്ക്‌ അറിയാ​മോ? ലോക​മെ​ങ്ങു​മുള്ള ആളുകൾക്ക്‌ അതു പരിചി​ത​മാണ്‌. ഉൽപത്തി 1:26–3:24 വരെയുള്ള വാക്യ​ങ്ങ​ളിൽ അതെപ്പറ്റി പറയു​ന്നുണ്ട്‌. നിങ്ങൾ അതു വായി​ച്ചു​നോ​ക്കി​യി​ട്ടു​ണ്ടോ? ആ വിവര​ണ​ത്തി​ന്റെ ചുരുക്കം ഇതാണ്‌:

ദൈവമായ യഹോവa പൊടി​യിൽനിന്ന്‌ ഒരു മനുഷ്യ​നെ സൃഷ്ടിച്ചു. അവന്‌ ആദാം എന്നു പേരിട്ടു. ഏദെൻ എന്ന പ്രദേ​ശ​ത്തുള്ള ഒരു തോട്ട​ത്തിൽ അവനെ ആക്കി. ദൈവം​തന്നെ ഉണ്ടാക്കിയ ഒരു തോട്ട​മാ​യി​രു​ന്നു അത്‌. ജല​സ്രോ​ത​സ്സു​കൾക്ക്‌ അരികെ മനോ​ഹ​ര​മായ പഴങ്ങൾ നിറഞ്ഞു​നിൽക്കുന്ന മരങ്ങ​ളൊ​ക്കെ​യുള്ള ഒരു തോട്ടം. ആ തോട്ട​ത്തി​ന്റെ നടുക്ക്‌ ‘ശരി​തെ​റ്റു​ക​ളെ​ക്കു​റി​ച്ചുള്ള അറിവി​ന്റെ വൃക്ഷം’ ഉണ്ടായി​രു​ന്നു. ആ മരത്തിൽനി​ന്നുള്ള പഴം കഴിക്കു​ന്ന​തിൽനിന്ന്‌ ദൈവം അവരെ വിലക്കി. അനുസ​ര​ണ​ക്കേടു കാണി​ച്ചാൽ അവർ മരിക്കു​മെ​ന്നും ദൈവം അവരോ​ടു പറഞ്ഞു. പിന്നീട്‌ യഹോവ ആദാമി​ന്റെ വാരി​യെ​ല്ലു​ക​ളിൽ ഒന്ന്‌ എടുത്ത്‌ ആദാമി​നു​വേണ്ടി ഒരു ഇണയെ, ഹവ്വ എന്ന സ്‌ത്രീ​യെ, സൃഷ്ടിച്ചു. ആ തോട്ടം കൃഷി ചെയ്‌ത്‌ പരിപാ​ലി​ക്കാ​നും മക്കളെ ഉത്‌പാ​ദി​പ്പിച്ച്‌ ഭൂമി മുഴുവൻ നിറയാ​നും ഉള്ള നിയമനം ദൈവം അവർക്കു കൊടു​ത്തു.

ഹവ്വ തനിച്ചാ​യി​രു​ന്ന​പ്പോൾ ഒരു സർപ്പം ഹവ്വയോ​ടു സംസാ​രി​ക്കു​ന്നു. വിലക്ക​പ്പെട്ട ആ പഴം കഴിക്കാൻ സർപ്പം ഹവ്വയെ പ്രലോ​ഭി​പ്പി​ച്ചു. അതു തിന്നാൽ മരിക്കു​മെന്നു ദൈവം പറഞ്ഞതു നുണയാ​ണെ​ന്നും പഴം കഴിച്ചാൽ ഹവ്വ ദൈവ​ത്തെ​പ്പോ​ലെ ആകു​മെ​ന്നും അതിലൂ​ടെ നല്ലതു വരുന്നതു കാണാൻ ദൈവം ആഗ്രഹി​ക്കു​ന്നി​ല്ലെ​ന്നും പറഞ്ഞാണു സർപ്പം ഹവ്വയെ പ്രലോ​ഭി​പ്പി​ച്ചത്‌. ആ പ്രലോ​ഭ​ന​ത്തിൽ വീണ ഹവ്വ പഴം കഴിച്ചു. പിന്നീട്‌ ആദാമും ഹവ്വയു​ടെ​കൂ​ടെ കൂടി ദൈവ​ത്തോട്‌ അനുസ​ര​ണ​ക്കേടു കാണിച്ചു. ദൈവം എന്തു ചെയ്‌തു? ആദാമി​നും ഹവ്വയ്‌ക്കും സർപ്പത്തി​നും ശിക്ഷ വിധിച്ചു. പറുദീ​സ​പോ​ലെ​യുള്ള ആ തോട്ട​ത്തിൽനിന്ന്‌ മനുഷ്യ​രെ പുറത്താ​ക്കിയ ദൈവം അവർ അവി​ടേക്കു തിരി​ച്ചു​ക​യ​റാ​തി​രി​ക്കാൻ ദൂതന്മാ​രെ കാവൽ നിറുത്തി.

ബൈബിളിലെ ഉൽപത്തി പുസ്‌ത​ക​ത്തിൽ രേഖ​പ്പെ​ടു​ത്തി​യി​രി​ക്കുന്ന സംഭവങ്ങൾ ശരിയാ​ണെന്നു മിക്ക പണ്ഡിത​ന്മാ​രും ബുദ്ധി​ജീ​വി​ക​ളും ചരി​ത്ര​കാ​ര​ന്മാ​രും വിശ്വ​സി​ച്ചി​രുന്ന ഒരു കാലം ഉണ്ടായി​രു​ന്നു. എന്നാൽ ഇന്നാകട്ടെ മിക്ക ആളുകൾക്കും ആ വിവര​ണ​ങ്ങ​ളി​ലൊ​ന്നും അത്ര വിശ്വാ​സ​മില്ല. ആദാം, ഹവ്വ എന്നിവ​രെ​ക്കു​റി​ച്ചും ഏദെൻ തോട്ട​ത്തെ​ക്കു​റി​ച്ചും ഉൽപത്തി പുസ്‌ത​ക​ത്തിൽ പറഞ്ഞി​രി​ക്കുന്ന കാര്യ​ങ്ങളെ ആളുകൾ ഇത്ര സംശയ​ത്തോ​ടെ കാണാൻ കാരണം എന്താണ്‌? അങ്ങനെ​യു​ള്ളവർ സാധാരണ പറയാ​റുള്ള നാലു വാദങ്ങൾ നോക്കാം.

1. ഏദെൻ തോട്ടം യഥാർഥ​ത്തി​ലുള്ള ഒരു സ്ഥലമാ​യി​രു​ന്നോ?

ഇങ്ങനെയൊരു സംശയം തോന്നാ​നുള്ള കാരണം എന്താണ്‌? തത്ത്വചിന്ത അതിനെ സ്വാധീ​നി​ച്ചി​ട്ടു​ണ്ടാ​കും. നൂറ്റാ​ണ്ടു​ക​ളോ​ളം ദൈവ​ശാ​സ്‌ത്രജ്ഞർ വിശ്വ​സി​ച്ചി​രു​ന്നത്‌ ഏദെൻ തോട്ടം ഭൂമി​യിൽ എവി​ടെ​യോ സ്ഥിതി ചെയ്യു​ന്നു​ണ്ടെ​ന്നാണ്‌. എന്നാൽ പിൽക്കാ​ലത്ത്‌ പ്ലേറ്റോ, അരി​സ്റ്റോ​ട്ടിൽ എന്നീ ഗ്രീക്കു തത്ത്വചി​ന്ത​ക​രു​ടെ ആശയങ്ങൾ സഭയെ സ്വാധീ​നി​ച്ചു. പൂർണ​ത​യുള്ള ഒന്നിനും ഭൂമി​യിൽ ആയിരി​ക്കാ​നാ​കി​ല്ലെ​ന്നും പൂർണ​ത​യു​ണ്ടെ​ങ്കിൽത്തന്നെ അതു സ്വർഗ​ത്തി​ലാ​യി​രി​ക്കു​മെ​ന്നും ആയിരു​ന്നു അവരുടെ വാദം. അതു​കൊണ്ട്‌ ദൈവം ഏദെൻ തോട്ടം സൃഷ്ടി​ച്ചതു സ്വർഗ​ത്തി​ന​ടു​ത്തുള്ള ഏതെങ്കി​ലും സ്ഥലത്താ​യി​രി​ക്കും എന്നു ദൈവ​ശാ​സ്‌ത്രജ്ഞർ വിശ്വ​സി​ക്കാൻ തുടങ്ങി.b ഭൂമി​യി​ലെ ദുഷിച്ച അവസ്ഥക​ളിൽനി​ന്നെ​ല്ലാം അകലെ അങ്ങ്‌ ഉയരത്തിൽ ഏതോ ഒരു വലിയ പർവത​ത്തി​ന്റെ മുകളി​ലാ​യി​രു​ന്നു ഏദെൻ തോട്ട​മെന്നു ചിലർ വാദിച്ചു. അത്‌ ഉത്തര​ധ്രു​വ​ത്തി​ലോ ദക്ഷിണ​ധ്രു​വ​ത്തി​ലോ ആയിരു​ന്നെന്നു ചിലർ പറഞ്ഞു. അതു ചന്ദ്രനി​ലോ അതിന​ടു​ത്തുള്ള മറ്റേ​തെ​ങ്കി​ലും സ്ഥലത്തോ ആയിരു​ന്നെന്നു വാദി​ച്ച​വ​രും ഉണ്ട്‌. ഇതു​കൊ​ണ്ടൊ​ക്കെ​ത്തന്നെ ഏദെൻ തോട്ടം എന്നത്‌ ഒരു സങ്കൽപ​ക​ഥ​യാ​ണെന്ന്‌ ആളുകൾ വിശ്വ​സി​ച്ചു​പോ​യ​തിൽ അതിശ​യി​ക്കാ​നില്ല. ഏദെൻ തോട്ട​ത്തി​ന്റെ സ്ഥാന​ത്തെ​ക്കു​റിച്ച്‌ ബൈബിൾ പറയു​ന്നതു വിശ്വ​സി​ക്കാ​നാ​കി​ല്ലെന്ന്‌ ഇക്കാലത്തെ പല പണ്ഡിത​ന്മാ​രും അഭി​പ്രാ​യ​പ്പെ​ടു​ന്നു. അങ്ങനെ​യൊ​രു സ്ഥലമേ ഇല്ലായി​രു​ന്നു എന്നാണ്‌ അവർ പറയു​ന്നത്‌.

എന്നാൽ ബൈബിൾ തരുന്ന സൂചന അതല്ല. കാരണം ഉൽപത്തി 2:8-14 വരെയുള്ള വാക്യ​ങ്ങ​ളിൽ ബൈബിൾ ആ സ്ഥലത്തിന്റെ കൃത്യ​മായ വിശദാം​ശങ്ങൾ തരുന്നുണ്ട്‌. ഉദാഹ​ര​ണ​ത്തിന്‌, ഏദെൻ എന്ന പ്രദേ​ശ​ത്തി​ന്റെ കിഴക്കു ഭാഗത്താ​യി​രു​ന്നു ആ തോട്ട​മെന്നു ബൈബിൾ പറയുന്നു. അതിനെ നനയ്‌ക്കാൻ ഒരു നദിയു​ണ്ടാ​യി​രു​ന്നെ​ന്നും അതു നാലായി പിരി​ഞ്ഞെ​ന്നും അതിന്‌ ഓരോ​ന്നി​നും പേര്‌ ഉണ്ടായി​രു​ന്നെ​ന്നും അതു പറയുന്നു. കൂടാതെ ഓരോ നദിയും ഏതു ഭാഗത്തു​കൂ​ടി​യാണ്‌ ഒഴുകി​യ​തെ​ന്നും ആ വിവരണം പറയുന്നു. ഏദെൻ തോട്ട​ത്തി​ന്റെ ഇന്നത്തെ സ്ഥാനം എവി​ടെ​യാ​ണെന്നു കണ്ടെത്താൻ പണ്ഡിത​ന്മാർ ബൈബി​ളി​ലെ ഈ വിശദാം​ശങ്ങൾ ആകാം​ക്ഷ​യോ​ടെ പരി​ശോ​ധി​ച്ചി​ട്ടുണ്ട്‌. എങ്കിലും അവരുടെ കണ്ടെത്ത​ലു​കൾക്കൊ​ന്നും പരസ്‌പ​ര​യോ​ജി​പ്പില്ല. എന്നു​വെച്ച്‌ അതിന്റെ അർഥം ഏദെൻ തോട്ടം, അതിലെ നദികൾ ഇതൊക്കെ ഒരു സങ്കൽപ​മാ​ണെ​ന്നാ​ണോ?

ഇങ്ങനെയൊന്നു ചിന്തി​ക്കുക: ഏദെൻ തോട്ടം സൃഷ്ടി​ക്ക​പ്പെ​ട്ടിട്ട്‌ 6,000 വർഷ​ത്തോ​ള​മാ​യി. ഈ കാലയ​ള​വി​നു​ള്ളിൽ ഏദെൻ തോട്ടം ഉണ്ടായി​രുന്ന സ്ഥലത്തിനു പല മാറ്റങ്ങ​ളും സംഭവി​ച്ചി​ട്ടുണ്ട്‌. ഉദാഹ​ര​ണ​ത്തിന്‌ നദികൾ ഒഴുകു​ന്ന​തി​ന്റെ ദിശ മാറി​യി​ട്ടു​ണ്ടാ​കും. ഇനി, ഇടയ്‌ക്കി​ടെ ഭൂകമ്പങ്ങൾ ഉണ്ടാകാൻ സാധ്യ​ത​യുള്ള പ്രദേ​ശ​മാണ്‌ അത്‌. ലോകത്തെ വലിയ ഭൂകമ്പ​ങ്ങ​ളിൽ ഏകദേശം 17 ശതമാ​ന​വും ഉണ്ടാകു​ന്നത്‌ ഈ ഭൂപ്ര​ദേ​ശ​ത്താണ്‌. അതു​കൊ​ണ്ടു​തന്നെ ആ പ്രദേ​ശ​ത്തിന്‌ സ്വാഭാ​വി​ക​മാ​യും മാറ്റങ്ങൾ ഉണ്ടായി​ട്ടു​ണ്ടാ​കും. ഇനി, നോഹ​യു​ടെ കാലത്തെ ജലപ്ര​ള​യ​ത്തി​ലും അവിടെ ഒരുപാ​ടു മാറ്റങ്ങൾ സംഭവി​ച്ചി​ട്ടു​ണ്ടാ​കും. അതു​കൊണ്ട്‌ ഏദെൻ തോട്ട​ത്തി​ന്റെ കൃത്യ​മായ സ്ഥാനം എവി​ടെ​യാ​യി​രു​ന്നെന്നു കണ്ടുപി​ടി​ക്കാൻ ബുദ്ധി​മു​ട്ടാണ്‌. മാത്രമല്ല ഈ വിവരണം രേഖ​പ്പെ​ടു​ത്തി​യി​രി​ക്കാൻ സാധ്യ​ത​യുള്ള മോശ അത്‌ എഴുതി​യ​പ്പോൾ ഏദെൻ തോട്ടം നിലവി​ലു​ണ്ടാ​യി​രു​ന്നില്ല. അതു​കൊ​ണ്ടു​തന്നെ വാമൊ​ഴി​യാ​യുള്ള വിവര​ങ്ങ​ളോ മുമ്പു​ണ്ടാ​യി​രുന്ന രേഖക​ളോ ഒക്കെ ഉപയോ​ഗി​ച്ചാ​യി​രി​ക്കാം മോശ ഇത്‌ എഴുതി​യത്‌. എങ്കിലും അപ്പോ​ഴേ​ക്കും ആ സംഭവ​ങ്ങ​ളെ​ല്ലാം നടന്നിട്ട്‌ ഏകദേശം 2,500 വർഷം കടന്നു​പോ​യി​രു​ന്നെന്ന്‌ ഓർക്കണം.c

ഇങ്ങനെയൊക്കെയാണെങ്കിലും ഏദെൻ തോട്ട​ത്തെ​ക്കു​റി​ച്ചുള്ള വിവര​ണ​ത്തി​നു വിശ്വാ​സ്യത നൽകുന്ന ചില വസ്‌തു​ത​ക​ളുണ്ട്‌: ഉൽപത്തി വിവരണം ഏദെൻ തോട്ടത്തെ ഒരു യഥാർഥ​സ്ഥ​ല​മാ​യി​ട്ടാ​ണു ചിത്രീ​ക​രി​ച്ചി​രി​ക്കു​ന്നത്‌. കാരണം ഏദെനി​ലൂ​ടെ ഒഴുകി​യി​രുന്ന നാലു നദിക​ളിൽ രണ്ടെണ്ണം യൂഫ്ര​ട്ടീസ്‌ നദിയും ടൈ​ഗ്രിസ്‌ അഥവാ ഹിദ്ദേക്കൽ നദിയും ഇന്നും ഒഴുകു​ന്നുണ്ട്‌. ഏതാണ്ട്‌ അടുത്ത​ടുത്ത സ്ഥലങ്ങളിൽനി​ന്നു​ത​ന്നെ​യാണ്‌ അവയുടെ ഉത്ഭവം. ഇനി, ഉൽപത്തി​യി​ലെ വിവര​ണ​ത്തിൽ നദികൾ ഒഴുകുന്ന സ്ഥലങ്ങ​ളെ​ക്കു​റി​ച്ചും അവി​ടെ​യു​ണ്ടാ​യി​രുന്ന പേരു​കേട്ട പ്രകൃ​തി​വി​ഭ​വ​ങ്ങ​ളെ​ക്കു​റി​ച്ചും എല്ലാം പറയു​ന്നുണ്ട്‌. മോശ​യു​ടെ നാളിൽ ജീവി​ച്ചി​രുന്ന ഇസ്രാ​യേ​ല്യർക്ക്‌ ഏദെൻ തോട്ട​ത്തി​ന്റെ സ്ഥാനം മനസ്സി​ലാ​ക്കാൻ ഈ വിവരങ്ങൾ ധാരാ​ള​മാ​യി​രു​ന്നു.

എന്നാൽ ഐതി​ഹ്യ​ങ്ങ​ളും മുത്തശ്ശി​ക്ക​ഥ​ക​ളും ഇങ്ങനെ​യാ​ണോ? സാധാരണ അത്തരം കഥകൾ വിശദാം​ശങ്ങൾ ഒഴിവാ​ക്കാ​റാ​ണു പതിവ്‌. കാരണം ആളുകൾ വിശദാം​ശ​ങ്ങ​ളു​ടെ വിശ്വാ​സ്യ​തയെ ചോദ്യം ചെയ്യാൻ സാധ്യ​ത​യുണ്ട്‌. അതു​കൊ​ണ്ടു​തന്നെ “പണ്ടുപണ്ട്‌, അങ്ങു ദൂരെ ഒരു നാട്ടിൽ” എന്നു പറഞ്ഞാണ്‌ അത്തരം കഥകൾ തുടങ്ങാ​റു​ള്ളത്‌. എന്നാൽ ചരി​ത്ര​ത്തി​ന്റെ കാര്യം അങ്ങനെയല്ല. ഏദെ​നെ​ക്കു​റി​ച്ചുള്ള വിവര​ണ​ത്തിൽ ഉള്ളതു​പോ​ലെ യഥാർഥ ചരി​ത്ര​വി​വ​ര​ണ​ങ്ങ​ളിൽ ആവശ്യ​മായ വിശദാം​ശ​ങ്ങ​ളു​ണ്ടാ​യി​രി​ക്കും.

2. ദൈവം ആദാമി​നെ സൃഷ്ടി​ച്ചത്‌ പൊടി​യിൽനി​ന്നാ​ണെ​ന്നും ഹവ്വയെ ഉണ്ടാക്കി​യത്‌ ആദാമി​ന്റെ വാരി​യെ​ല്ലിൽനി​ന്നാ​ണെ​ന്നും പറയു​ന്നതു വിശ്വ​സി​ക്കാ​നാ​കു​മോ?

മണ്ണിൽ കാണുന്ന മൂലക​ങ്ങ​ളിൽനി​ന്നാ​ണു മനുഷ്യ​ശ​രീ​രം രൂപ​പ്പെ​ട്ടി​ട്ടു​ള്ള​തെന്ന്‌ ആധുനി​ക​ശാ​സ്‌ത്രം കണ്ടെത്തി​യി​ട്ടുണ്ട്‌. മനുഷ്യ​ശ​രീ​ര​ത്തി​ലെ മൂലക​ങ്ങ​ളായ ഹൈ​ഡ്ര​ജ​നും ഓക്‌സി​ജ​നും കാർബ​ണും എല്ലാം മണ്ണിലു​ള്ള​താണ്‌. പക്ഷേ ഈ മൂലകങ്ങൾ വെച്ച്‌ എങ്ങനെ​യാ​ണു ജീവനുള്ള ഒന്നിനെ സൃഷ്ടി​ക്കാ​നാ​കുക?

ജീവൻ തനിയെ ഉണ്ടായ​താണ്‌ എന്നാണ്‌ പല ശാസ്‌ത്ര​ജ്ഞ​ന്മാ​രു​ടെ​യും വാദം. ലളിത​മായ ഒരു ജീവരൂ​പം ആദ്യം ഉണ്ടാ​യെ​ന്നും കോടി​ക്ക​ണ​ക്കി​നു വർഷങ്ങൾകൊണ്ട്‌ അതു പതി​യെ​പ്പ​തി​യെ കൂടുതൽ സങ്കീർണ​മായ ജീവരൂ​പ​മാ​യി മാറി​യെ​ന്നും ആണ്‌ അവർ പറയു​ന്നത്‌. പക്ഷേ ഈ “ലളിതം” എന്ന വാക്ക്‌ അൽപ്പം തെറ്റി​ദ്ധ​രി​പ്പി​ക്കു​ന്ന​താണ്‌. കാരണം സൂക്ഷ്‌മ​ദർശി​നി​യി​ലൂ​ടെ മാത്രം കാണാ​വുന്ന ഏകകോശ ജീവി​ക​ളു​ടെ ഘടന​പോ​ലും അതിശ​യി​പ്പി​ക്കും​വി​ധം സങ്കീർണ​മാണ്‌. ഏതെങ്കി​ലും ഒരു ജീവരൂ​പം ആകസ്‌മി​ക​മാ​യി ഉണ്ടായി എന്നതിനു യാതൊ​രു തെളി​വും ഇതുവ​രെ​യില്ല. അങ്ങനെ​യൊ​രു ആകസ്‌മിക സംഭവം ഇനി ഒരിക്ക​ലും ഉണ്ടാകാ​നും സാധ്യ​ത​യില്ല. ശരിക്കും എല്ലാ ജീവജാ​ല​ങ്ങ​ളു​ടെ​യും രൂപക​ല്‌പന നോക്കി​യാൽത്തന്നെ ഇതി​ന്റെ​യെ​ല്ലാം പിന്നിൽ നമ്മളെ​ക്കാ​ളെ​ല്ലാം വളരെ​യ​ധി​കം ബുദ്ധി​ശ​ക്തി​യുള്ള ഒരാളു​ണ്ടെന്നു വളരെ വ്യക്തമാണ്‌.d—റോമർ 1:20.

മനോഹരമായ സംഗീ​ത​മോ ഉജ്ജ്വല​മായ ഒരു പെയി​ന്റി​ങ്ങോ സാങ്കേ​തിക വിദ്യ​യു​ടെ അത്ഭുത​പ്പെ​ടു​ത്തുന്ന ഒരു നേട്ടമോ കണ്ട്‌ നിങ്ങൾക്ക്‌ ആശ്ചര്യം തോന്നി​യി​ട്ടു​ണ്ടോ? അതു തനിയെ ഉണ്ടായ​താ​ണെന്നു നിങ്ങൾ വിശ്വ​സി​ക്കു​മോ? ഒരിക്ക​ലു​മില്ല. എന്തായാ​ലും അതിന്റെ പിന്നിൽ ആരെങ്കി​ലും പ്രവർത്തി​ച്ചി​ട്ടു​ണ്ടാ​കു​മെന്നു നിങ്ങൾക്ക്‌ അറിയാം. എന്നാൽ സങ്കീർണ​ത​യു​ടെ​യോ സൗന്ദര്യ​ത്തി​ന്റെ​യോ വിദഗ്‌ധ​മായ രൂപക​ല്‌പ​ന​യു​ടെ​യോ കാര്യ​ത്തിൽ ഇവയൊ​ന്നും മനുഷ്യ​ശ​രീ​ര​ത്തി​ന്റെ അടുത്തു​പോ​ലും എത്തില്ല എന്നതാണു സത്യം. അപ്പോൾപ്പി​ന്നെ മനുഷ്യ​നെ ഒരാൾ സൃഷ്ടി​ച്ച​ത​ല്ലെന്നു പറഞ്ഞാൽ അതു നമുക്കു വിശ്വ​സി​ക്കാ​നാ​കു​മോ? അതി​നെ​ക്കു​റിച്ച്‌ ഉൽപത്തി വിവരണം കുറച്ച്‌ വിശദാം​ശ​ങ്ങൾകൂ​ടി തരുന്നുണ്ട്‌. ഭൂമി​യി​ലെ എല്ലാ ജീവരൂ​പ​ങ്ങ​ളി​ലും​വെച്ച്‌ മനുഷ്യൻ മാത്ര​മാ​ണു ദൈവ​ത്തി​ന്റെ ഛായയിൽ സൃഷ്ടി​ക്ക​പ്പെ​ട്ട​തെന്ന്‌. (ഉൽപത്തി 1:26) അതു​കൊ​ണ്ടാ​ണു ഭൂമി​യി​ലെ മറ്റു സൃഷ്ടി​കൾക്കൊ​ന്നും ഇല്ലാത്ത ഒരു കഴിവ്‌ മനുഷ്യ​നു​ള്ളത്‌. ദൈവ​ത്തെ​പ്പോ​ലെ പുതി​യ​പു​തിയ കാര്യങ്ങൾ നിർമി​ക്കാ​നുള്ള ആഗ്രഹം. അങ്ങനെ മനുഷ്യൻ സംഗീ​ത​രം​ഗ​ത്തും കലാരം​ഗ​ത്തും സാങ്കേ​തിക വിദ്യ​യി​ലും വിസ്‌മ​യി​പ്പി​ക്കുന്ന നേട്ടങ്ങൾ കൈവ​രി​ക്കു​ന്നു. നമുക്ക്‌ ഇത്ര​യൊ​ക്കെ സാധി​ക്കു​ന്നെ​ങ്കിൽ സൃഷ്ടി​ക്കാ​നുള്ള ദൈവ​ത്തി​ന്റെ അപാര​മായ കഴിവു​കണ്ട്‌ മനുഷ്യ​രായ നമ്മൾ അത്ഭുത​പ്പെ​ടേ​ണ്ട​തില്ല.

ഇനി ആദാമി​ന്റെ വാരി​യെ​ല്ലിൽനി​ന്നാ​ണു ഹവ്വയെ സൃഷ്ടി​ച്ച​തെന്നു പറയു​ന്നതു സത്യമാ​ണോ? ശരിക്കും അങ്ങനെ​യൊ​രു കാര്യം ചെയ്യാൻ ദൈവ​ത്തിന്‌ എന്തെങ്കി​ലും ബുദ്ധി​മു​ട്ടു​ണ്ടോ?e ദൈവ​ത്തി​നു വേണ​മെ​ങ്കിൽ മറ്റു മാർഗങ്ങൾ ഉപയോ​ഗി​ക്കാ​മാ​യി​രു​ന്നു. പക്ഷേ, ആദാമി​ന്റെ വാരി​യെ​ല്ലിൽനിന്ന്‌ ഹവ്വയെ ഉണ്ടാക്കി​യ​തിന്‌ അതി​ന്റേ​തായ ഒരു പ്രാധാ​ന്യ​മു​ണ്ടാ​യി​രു​ന്നു. ആദാമും ഹവ്വയും തമ്മിൽ വിവാഹം കഴിക്കാ​നും ‘ഒരു ശരീര​മെ​ന്ന​പോ​ലെ’ അവർ തമ്മിൽ അടുത്ത​ബന്ധം ഉണ്ടായി​രി​ക്കാ​നും ദൈവം ആഗ്രഹി​ച്ചു. (ഉൽപത്തി 2:24) പരസ്‌പരം പൂരക​ങ്ങ​ളാ​യി​രി​ക്കാ​നും എന്നേക്കും നിലനിൽക്കുന്ന ഒരു ബന്ധം ആസ്വദി​ക്കാ​നും ഒക്കെ കഴിയുന്ന രീതി​യിൽ സ്‌ത്രീ​യെ​യും പുരു​ഷ​നെ​യും സൃഷ്ടി​ച്ചത്‌ സ്രഷ്ടാ​വി​ന്റെ ജ്ഞാനത്തി​ന്റെ​യും സ്‌നേ​ഹ​ത്തി​ന്റെ​യും ശക്തമായ തെളി​വല്ലേ?

കൂടാതെ ഒരൊറ്റ അച്ഛന്റെ​യും അമ്മയു​ടെ​യും പിൻത​ല​മു​റ​ക്കാ​രാ​ണു ഭൂമി​യി​ലെ എല്ലാ മനുഷ്യ​രു​മെന്ന്‌ ആധുനിക ജനിത​ക​ശാ​സ്‌ത്രം സ്ഥിരീ​ക​രി​ച്ചി​ട്ടുണ്ട്‌. അങ്ങനെ നോക്കു​മ്പോൾ സൃഷ്ടി​യെ​ക്കു​റി​ച്ചുള്ള ഉൽപത്തി​യി​ലെ വിവരണം നമുക്ക്‌ ഉറപ്പാ​യും വിശ്വ​സി​ക്കാൻ കഴിയി​ല്ലേ?

3. അറിവിന്റെ വൃക്ഷവും ജീവവൃ​ക്ഷ​വും ഒരു കെട്ടു​ക​ഥ​യാ​ണോ?

ഈ വൃക്ഷങ്ങൾക്ക്‌ അസാധാ​ര​ണ​മായ ദിവ്യ​ശ​ക്തി​യു​ണ്ടെന്ന്‌ ഉൽപത്തി പുസ്‌തകം പഠിപ്പി​ക്കു​ന്നില്ല. പകരം അവ സാധാരണ മരങ്ങളാ​യി​രു​ന്നു. യഹോവ അവയ്‌ക്ക്‌ ഒരു പ്രതീ​കാ​ത്മ​ക​മായ അർഥം നൽകി​യെന്നേ ഉള്ളൂ.

മനുഷ്യരും ചില​പ്പോൾ ഇതു​പോ​ലെ ചെയ്യാ​റി​ല്ലേ? അതു മനസ്സി​ലാ​ക്കാൻ ഒരു ഉദാഹ​രണം നോക്കാം. കോട​തി​യെ അവഹേ​ളി​ക്ക​രു​തെ​ന്നും അങ്ങനെ ചെയ്‌താൽ അതു കോട​തി​യ​ല​ക്ഷ്യ​ക്കു​റ്റം ആകു​മെ​ന്നും ചില ജഡ്‌ജി​മാർ മുന്നറി​യി​പ്പു നൽകാ​റുണ്ട്‌. എന്നാൽ അതിന്റെ അർഥം കോട​തി​യി​ലെ ഫർണി​ച്ച​റു​ക​ളെ​യോ ഉപകര​ണ​ങ്ങ​ളെ​യോ കോട​തി​മു​റി​യെ​ത്ത​ന്നെ​യോ അവഹേ​ളി​ക്ക​രുത്‌ എന്നല്ല. മറിച്ച്‌ കോടതി പ്രതി​നി​ധീ​ക​രി​ക്കുന്ന നീതി​ന്യാ​യ വ്യവസ്ഥയെ അവഹേ​ളി​ക്ക​രുത്‌ എന്നാണ്‌. കൂടാതെ പല ഭരണാ​ധി​കാ​രി​ക​ളു​ടെ​യും പരമാ​ധി​കാ​രത്തെ സൂചി​പ്പി​ക്കാൻ ചെങ്കോ​ലും കിരീ​ട​വും പ്രതീ​ക​ങ്ങ​ളാ​യി ഉപയോ​ഗി​ച്ചി​ട്ടുണ്ട്‌.

അങ്ങനെയെങ്കിൽ ഏദെൻ തോട്ട​ത്തി​ലെ ഈ രണ്ടു വൃക്ഷങ്ങൾ എന്തി​നെ​യാ​ണു പ്രതീ​ക​പ്പെ​ടു​ത്തി​യത്‌? പലരും സങ്കീർണ​മായ പല വിശദീ​ക​ര​ണ​ങ്ങ​ളും കൊടു​ത്തി​ട്ടുണ്ട്‌. എന്നാൽ അതിന്റെ ശരിക്കു​മുള്ള ഉത്തരം വളരെ ലളിത​മാണ്‌. അതേസ​മയം വളരെ പ്രാധാ​ന്യ​മു​ള്ള​തും. ശരി​തെ​റ്റു​ക​ളെ​ക്കു​റി​ച്ചുള്ള അറിവി​ന്റെ വൃക്ഷം പ്രതീ​ക​പ്പെ​ടു​ത്തി​യതു ദൈവ​ത്തി​നു​മാ​ത്രം അവകാ​ശ​മുള്ള ഒരു കാര്യ​ത്തെ​യാണ്‌—ശരിയും തെറ്റും എന്താ​ണെന്നു തീരു​മാ​നി​ക്കാ​നുള്ള ദൈവ​ത്തി​ന്റെ അവകാ​ശത്തെ. (യിരെമ്യ 10:23) അതു​കൊ​ണ്ടാണ്‌ ആ മരത്തിൽനിന്ന്‌ ഭക്ഷിക്കു​ന്നത്‌ അത്രയ്‌ക്കു കുറ്റക​ര​മാ​യി​രു​ന്നത്‌. ഇനി, ജീവവൃ​ക്ഷ​ത്തി​ന്റെ കാര്യ​മോ? അതു പ്രതീ​ക​പ്പെ​ടു​ത്തി​യതു ദൈവ​ത്തി​നു മാത്രം നൽകാൻ കഴിയുന്ന ഒരു കാര്യ​ത്തെ​യാണ്‌, മരണമി​ല്ലാത്ത ജീവി​തത്തെ.—റോമർ 6:23.

4. സംസാരിക്കുന്ന സർപ്പം ഒരു മുത്തശ്ശി​ക്ക​ഥ​യാ​ണോ?

ഉൽപത്തിയിലെ ഈ വിവരണം മനസ്സി​ലാ​ക്കാൻ കുറച്ച്‌ ബുദ്ധി​മു​ട്ടാണ്‌ എന്നതു ശരിയാണ്‌. എന്നാൽ ബൈബി​ളി​ലെ ബാക്കി ഭാഗങ്ങൾ കൂടി വായി​ക്കു​മ്പോൾ ഏദെനിൽ യഥാർഥ​ത്തിൽ സംഭവി​ച്ചത്‌ എന്താ​ണെന്ന്‌ നമുക്കു മനസ്സി​ലാ​കും.

ആരാണ്‌ അല്ലെങ്കിൽ എന്താണ്‌ ഏദെനി​ലെ സർപ്പ​ത്തെ​ക്കൊണ്ട്‌ സംസാ​രി​പ്പി​ച്ചത്‌? പുരാതന ഇസ്രാ​യേ​ലി​ലെ ആളുകൾക്ക്‌ ആ സർപ്പത്തി​ന്റെ പങ്കി​നെ​ക്കു​റിച്ച്‌ കൂടുതൽ കാര്യങ്ങൾ അറിയാ​മാ​യി​രു​ന്നു. ഉദാഹ​ര​ണ​ത്തിന്‌ മൃഗങ്ങൾക്കു സംസാ​രി​ക്കാൻ കഴിയി​ല്ലെ​ങ്കി​ലും ഒരു ആത്മവ്യ​ക്തി​ക്കു മൃഗങ്ങ​ളെ​ക്കൊണ്ട്‌ സംസാ​രി​പ്പി​ക്കാൻ കഴിയു​മെന്ന്‌ അവർക്ക്‌ അറിയാ​മാ​യി​രു​ന്നു. ബിലെ​യാ​മി​നെ​ക്കു​റി​ച്ചുള്ള മോശ​യു​ടെ വിവര​ണ​ത്തിൽ ദൈവ​ത്തി​ന്റെ ഒരു ദൂതൻ ബിലെ​യാ​മി​ന്റെ കഴുതയെ മനുഷ്യ​നെ​പ്പോ​ലെ സംസാ​രി​ക്കാൻ ഇടയാ​ക്കി​യ​താ​യി പറയു​ന്നുണ്ട്‌.—സംഖ്യ 22:26-31; 2 പത്രോസ്‌ 2:15, 16.

ഇനി, ദൈവ​ത്തി​ന്റെ ശത്രു​ക്ക​ളായ മറ്റ്‌ ആത്മശക്തി​കൾക്ക്‌ അഥവാ ദുഷ്ടാ​ത്മാ​ക്കൾക്ക്‌ അത്ഭുതങ്ങൾ പ്രവർത്തി​ക്കാൻ കഴിയു​മോ? ഈജി​പ്‌തി​ലെ ചില മന്ത്രവാ​ദി​കൾക്കും ദൈവം ചെയ്‌ത​തു​പോ​ലുള്ള അത്ഭുതങ്ങൾ അനുക​രി​ക്കാൻ കഴിഞ്ഞു. അവരും തങ്ങളുടെ വടികളെ പാമ്പാക്കി മാറ്റു​ന്നതു മോശ കണ്ടതാണ്‌. ഇത്തരം അത്ഭുതങ്ങൾ പ്രവർത്തി​ക്കാ​നുള്ള ശക്തി അവർക്കു കിട്ടി​യതു ദുഷ്ടാ​ത്മാ​ക്ക​ളിൽനി​ന്നാണ്‌.—പുറപ്പാട്‌ 7:8-12.

സാധ്യതയനുസരിച്ച്‌ ദൈവ​പ്ര​ചോ​ദി​ത​മാ​യി മോശ​ത​ന്നെ​യാ​ണു ഇയ്യോ​ബി​ന്റെ പുസ്‌തകം എഴുതി​യത്‌. ദൈവ​ത്തി​ന്റെ എല്ലാ വിശ്വസ്‌ത ദാസരു​ടെ​യും നിഷ്‌ക​ളങ്കത ചോദ്യം ചെയ്‌ത ദൈവ​ത്തി​ന്റെ മുഖ്യ​ശ​ത്രു​വായ സാത്താ​നെ​ക്കു​റിച്ച്‌ ആ പുസ്‌ത​ക​ത്തിൽ ഒരുപാ​ടു കാര്യങ്ങൾ പറയു​ന്നുണ്ട്‌. (ഇയ്യോബ്‌ 1:6-11; 2:4, 5) ഈ കാരണ​ങ്ങൾക്കൊ​ണ്ടൊ​ക്കെ ദൈവ​ത്തോ​ടുള്ള വിശ്വ​സ്‌തത തകർക്കാൻ പാമ്പിനെ ഉപയോ​ഗിച്ച്‌ ഹവ്വയെ വഞ്ചിച്ചതു സാത്താ​നാ​യി​രി​ക്കാ​മെന്ന്‌ ഇസ്രാ​യേ​ല്യർ ചിന്തി​ച്ചി​ട്ടു​ണ്ടാ​കി​ല്ലേ? അതിനു സാധ്യ​ത​യുണ്ട്‌.

സർപ്പത്തിലൂടെ ഹവ്വയോ​ടു സംസാ​രി​ച്ചതു ശരിക്കും സാത്താ​നാ​യി​രു​ന്നോ? സാത്താൻ “നുണയ​നും നുണയു​ടെ അപ്പനും” ആണെന്ന്‌ യേശു പിന്നീടു പറഞ്ഞു. (യോഹ​ന്നാൻ 8:44) ആദ്യത്തെ നുണ പറഞ്ഞതു സാത്താ​നാ​യ​തു​കൊ​ണ്ടല്ലേ യേശു സാത്താനെ നുണയു​ടെ അപ്പൻ എന്നു വിളി​ച്ചത്‌. ഹവ്വയോ​ടാ​ണു സർപ്പം ആദ്യത്തെ നുണ പറഞ്ഞത്‌. വിലക്ക​പ്പെട്ട പഴം കഴിച്ചാൽ മരിക്കു​മെന്ന ദൈവ​ത്തി​ന്റെ മുന്നറി​യി​പ്പി​നു നേർവി​പ​രീ​ത​മാ​യി സാത്താൻ പറഞ്ഞു: “നിങ്ങൾ മരിക്കില്ല, ഉറപ്പ്‌.” (ഉൽപത്തി 3:4) വ്യക്തമാ​യും സർപ്പത്തി​ലൂ​ടെ ഹവ്വയോ​ടു സംസാ​രി​ച്ചതു സാത്താ​നാ​യി​രു​ന്നെന്നു യേശു​വിന്‌ അറിയാ​മാ​യി​രു​ന്നു. അതു​കൊ​ണ്ടാ​ണു യേശു അപ്പൊ​സ്‌ത​ല​നായ യോഹ​ന്നാ​നു കൊടുത്ത വെളി​പാ​ടിൽ സാത്താനെ ‘പഴയ പാമ്പ്‌’ എന്നു വിളി​ച്ചി​രി​ക്കു​ന്നത്‌.—വെളി​പാട്‌ 1:1; 12:9.

ശക്തനായ ഒരു ആത്മജീ​വിക്ക്‌ സർപ്പ​ത്തെ​ക്കൊണ്ട്‌ സംസാ​രി​പ്പി​ക്കാൻ കഴിയു​മെ​ന്നതു വിശ്വ​സി​ക്കാൻ ബുദ്ധി​മു​ട്ടാ​യി തോന്നു​ന്നു​ണ്ടോ? വാസ്‌ത​വ​ത്തിൽ ആത്മജീ​വി​ക​ളെ​ക്കാൾ വളരെ ശക്തി കുറഞ്ഞ മനുഷ്യർക്കു​പോ​ലും പാവകൾ സംസാ​രി​ക്കു​ന്ന​താ​യി തോന്നി​പ്പി​ക്കാൻ കഴിയും. ഇനി സാങ്കേ​തി​ക​വി​ദ്യ​യു​ടെ സഹായ​ത്തോ​ടെ മൃഗങ്ങൾപോ​ലും സംസാ​രി​ക്കു​ന്ന​താ​യി തോന്നി​പ്പി​ക്കാ​നും കഴിയും.

ഏറ്റവും ശക്തമായ തെളിവ്‌

ഉൽപത്തിയിലെ വിവരണം സത്യമാണ്‌ എന്നതിന്‌ ഇനിയും എന്തെങ്കി​ലും സംശയ​മു​ണ്ടോ? അതൊരു ചരി​ത്ര​സ​ത്യ​മാണ്‌ എന്നതിന്‌ ശക്തമായ തെളി​വുണ്ട്‌.

ഉദാഹരണത്തിന്‌ യേശു​ക്രി​സ്‌തു​വി​നെ ”വിശ്വ​സ്‌ത​നും സത്യവാ​നും ആയ സാക്ഷി” എന്നു വിളി​ച്ചി​രി​ക്കു​ന്നു. (വെളി​പാട്‌ 3:14) പൂർണ​മ​നു​ഷ്യ​നായ യേശു ഒരിക്ക​ലും നുണ പറഞ്ഞി​ട്ടില്ല. സത്യത്തെ ഒരുത​ര​ത്തി​ലും വളച്ചൊ​ടി​ച്ചി​ട്ടു​മില്ല. ഏറ്റവും പ്രധാ​ന​മാ​യി ഒരു മനുഷ്യ​നാ​യി ഭൂമി​യിൽ വരുന്ന​തി​നും വളരെ മുമ്പ്‌, “ലോകം ഉണ്ടാകു​ന്ന​തി​നു മുമ്പ്‌” താൻ പിതാ​വായ യഹോ​വ​യോ​ടൊ​പ്പം ഉണ്ടായി​രു​ന്നെന്നു യേശു പഠിപ്പി​ച്ചു. (യോഹ​ന്നാൻ 17:5) അതായത്‌ ഭൂമി​യിൽ ജീവൻ ഉണ്ടാകു​ന്ന​തി​നു മുമ്പു​തന്നെ യേശു ജീവി​ച്ചി​രു​ന്നു. ഇതിലും വിശ്വ​സ​നീ​യ​മായ മറ്റൊരു സാക്ഷ്യം ഇനി കിട്ടാ​നു​ണ്ടോ?

ആദാമും ഹവ്വയും ജീവി​ച്ചി​രുന്ന വ്യക്തികൾ ആണെന്നു യേശു പറഞ്ഞു. ഒരു പുരു​ഷന്‌ ഒരു സ്‌ത്രീ എന്ന, വിവാഹം സംബന്ധിച്ച യഹോ​വ​യു​ടെ നിലവാ​രം വിശദീ​ക​രി​ച്ച​പ്പോൾ യേശു ആദാമി​ന്റെ​യും ഹവ്വയു​ടെ​യും വിവാ​ഹ​ത്തെ​ക്കു​റിച്ച്‌ പരാമർശി​ച്ചു. (മത്തായി 19:3-6) ഏദെൻ തോട്ടം ഒരു കെട്ടു​ക​ഥ​യാ​യി​രു​ന്നെ​ങ്കിൽ, ആദാമും ഹവ്വയും ഒരിക്ക​ലും ജീവി​ച്ചി​രു​ന്നി​ട്ടി​ല്ലെ​ങ്കിൽ യേശു വഞ്ചിക്ക​പ്പെ​ട്ടെ​ന്നോ അല്ലെങ്കിൽ യേശു നുണയ​നാ​യി​രു​ന്നെ​ന്നോ വരും. അതിനു രണ്ടിനും ഒരു സാധ്യ​ത​യു​മില്ല. ഏദെൻ തോട്ട​ത്തി​ലെ സംഭവങ്ങൾ ഓരോ​ന്നും യേശു സ്വർഗ​ത്തി​ലി​രുന്ന്‌ കാണു​ന്നു​ണ്ടാ​യി​രു​ന്നു. അതി​നെ​ക്കാൾ വലിയ വേറെ എന്തു തെളി​വാ​ണു വേണ്ടത്‌?

വാസ്‌തവത്തിൽ ഉൽപത്തി പുസ്‌ത​ക​ത്തിൽ വിശ്വ​സി​ക്കാൻ പറ്റാത്ത​വർക്കു യേശു​വി​ലും വിശ്വ​സി​ക്കാൻ പറ്റില്ല എന്നു വരും. ഇനി, അവർക്ക്‌ ബൈബി​ളി​ലെ വളരെ പ്രധാ​ന​പ്പെട്ട പഠിപ്പി​ക്ക​ലു​ക​ളും ആശ്വാസം നൽകുന്ന വാഗ്‌ദാ​ന​ങ്ങ​ളും മനസ്സി​ലാ​ക്കാ​നും കഴിയാ​തെ വരും. അത്‌ എങ്ങനെ​യാ​ണെന്നു നമുക്കു നോക്കാം.

[അടിക്കുറിപ്പുകൾ]