ന്യത്തം​ചെ​യ്യുന്ന വിത്തു​കു​തി​രകൾ—‘ഒരു രാജാ​വി​നു യോജി​ച്ചത്‌’

വിളക്കു​കൾ അണയ്‌ക്കു​മ്പോൾ ആകാംക്ഷ ജനിക്കു​ന്നു. പൊടു​ന്നനെ നമ്മുടെ കാതുകൾ ഉണർവ്വു് നൽകുന്ന സംഗീതം കൊണ്ടു് നിറയു​ന്നു. ഐതി​ഹാ​സിക ആൻഡാ​ലൂ​സി​യൻ വിത്തു​കു​തി​ര​ക​ളു​ടെ​യും അവയുടെ ലോക​പ്ര​ശസ്‌ത അനന്തര​ഗാ​മി​ക​ളായ ലിപ്പി​സാ​നേ​ഴ്‌സി​ന്റെ​യും ഒരു നിര കൗതു​ക​പൂർവ്വം പ്രവേ​ശി​ക്കു​ന്ന​തു് കാണി​ക്കു​ന്ന​തി​നു് അന്ധകാ​ര​ത്തി​ലൂ​ടെ സ്‌പോട്ട്‌ ലൈറ്റ്‌ പായുന്നു. വേഷഭൂ​ഷാ​ദി​ക​ളാൽ അലങ്കരി​ക്ക​പ്പെ​ട്ടു്, സ്‌പാ​നിഷ്‌ പ്രഭു വർഗ്ഗ​ത്തെ​പ്പോ​ലെ വസ്‌ത്ര​ധാ​രണം ചെയ്‌ത സ്‌ത്രീ​പു​രു​ഷൻമാ​രാൽ നയിക്ക​പ്പെ​ട്ടു് തിളങ്ങുന്ന വിത്തു​കു​തി​രകൾ മങ്ങിയ ഇരുട്ടിൽ നിഴൽപോ​ലെ നിൽക്കു​ന്നു—കണ്ണഞ്ചി​പ്പി​ക്കുന്ന ഒരു കാഴ്‌ച​തന്നെ!

ഇപ്പോൾ സംഗീ​ത​ത്തി​നൊ​ത്തു് അവ ഹോട്ടെ ഇക്കോൾ (“ഹൈസ്‌കൂൾ മാതൃ​കകൾ) എന്നു വിളി​ക്ക​പ്പെ​ടുന്ന സുന്ദര​മായ ചലനങ്ങൾ നടത്തി​ത്തു​ട​ങ്ങു​ന്നു. ഒരു വിത്തു കുതിര 45 ഡിഗ്രീ ചെരു​വിൽ പിൻകാ​ലി​ന്റെ മുട്ടിനു കീഴി​ലുള്ള ഭാഗം ഊന്നി ഇരിക്കു​ന്നു. എഴു​ന്നേ​ല്‌ക്കു​ന്ന​തി​നുള്ള അടയാളം ലഭിക്കു​ന്ന​തു​വരെ അവൻ (വളരെ സമനി​ല​യും പേശീ​നി​യ​ന്ത്ര​ണ​വും ആവശ്യ​മുള്ള) ഈ നിലയിൽ ഇരിക്കു​ന്നു. ഈ ചലനത്തെ ലിവോഡ്‌ എന്നു വിളി​ക്കു​ന്നു. മറ്റൊ​ന്നു് കോർബെറ്റെ അവതരി​പ്പി​ക്കു​ന്നു. കുതിര പിൻകാ​ലിൽ നിവർന്നു നിൽക്കു​ക​യും ഒരു ചെറിയ നൃത്ത പരമ്പര അവതരി​പ്പി​ക്കു​ക​യും ചെയ്യുന്നു. എങ്കിലും മറ്റൊരു ചലനം പിയാ​ഫീ​യാ​ണു്, ഇതിൽ സമയം നോക്കുന്ന ഒരു പടയാ​ളി​യേ​പ്പോ​ലെ കാലുകൾ ഉയർത്തി സുന്ദര​മാ​യി മെല്ലെ ചലിപ്പി​ച്ചു​കൊ​ണ്ടു് കുതിര ഓട്ടത്തി​നും സാധാരണ നടത്തയ്‌ക്കും ഇടക്കുള്ള ഒരു നടത്ത പ്രദർശി​പ്പി​ക്കു​ന്നു.

എങ്കിലും ഇതി​ലെ​ല്ലാം അത്യന്തം പകി​ട്ടേ​റിയ പ്രദർശനം കാപ്രി​യോൾ ആണു്, നൃത്തം ചെയ്യുന്ന വിത്തു​കു​തി​രകൾ അങ്ങേയറ്റം പ്രാഗൽഭ്യ​മു​ള്ള​തി​നു​മാ​ത്രം ചെയ്യാൻ കഴിയുന്ന ഒന്നുതന്നെ. കുതിര അതിന്റെ താളം മനസ്സി​ലാ​ക്കു​ക​യും അതിന്റെ മുൻകാ​ലു​കൾ നെഞ്ചി​ന​ടി​യിൽ ചേർത്തു​പി​ടി​ച്ചു് വായു​വിൽ അനേകം അടി കുതി​ച്ചു​ചാ​ടു​ക​യും ചെയ്യുന്നു. ഒരു ചാട്ടയ​ടി​യു​ടെ ശബ്ദം കേൾക്കു​മ്പോൾ കുതിര പിൻകാ​ലു​കൾകൊ​ണ്ടു് തൊഴി​ക്കു​ന്നു. ഒരു നിമി​ഷ​ത്തേ​ക്കു് കുതിര കെട്ടു​ക​ഥ​ക​ളി​ലെ പറക്കും കുതി​ര​യേ​പ്പോ​ലെ കാണ​പ്പെ​ടു​ന്നു.

കഴിഞ്ഞ വർഷങ്ങ​ളിൽ ആയിരങ്ങൾ അനേക പ്രദർശ​ന​ങ്ങ​ളി​ലാ​യി ഈ അത്ഭുത​മൃ​ഗ​ങ്ങ​ളേ​ക്കൊ​ണ്ടു് പുളകി​ത​രാ​യി​ട്ടു​ണ്ടു് എന്നാൽ മനോ​ഹ​ര​മായ ഈ ചലനങ്ങൾ ആദ്യകാ​ല​ത്തു് വിനോ​ദി​പ്പി​ക്കു​ന്ന​തി​നു് ഉദ്ദേശി​ച്ചി​രു​ന്നതല്ല. പിന്നെ​യോ ഭയം ജനിപ്പി​ക്കു​ന്ന​തി​നു് സംവി​ധാ​നം ചെയ്‌തി​രു​ന്ന​താ​യി​രു​ന്നു​വെ​ന്നു് സദസ്സിൽ ഏതാനും പേർ മാത്രമേ തിരി​ച്ച​റി​ഞ്ഞു​ള്ളു. അതെ, നൃത്തം ചെയ്യുന്ന ആൻഡാ​ലൂ​സി​യൻ ഒരു കാലത്തു് മാരക​മായ ഒരു യുദ്ധാ​യു​ധ​മാ​യി​രു​ന്നു.

ഒരു രാജാ​വി​നു യോജി​ച്ച​തു്

ആൻഡാ​ലൂ​സി​യൻ സാധാരണ പടക്കു​തി​രയല്ല. അതിന്റെ പാരമ്പ​ര്യം എട്ടാം നൂറ്റാ​ണ്ടു​വരെ പുറ​കോ​ട്ടു​ചെ​ല്ലു​ന്നു. അക്കാല​ത്തു് ആഫ്രി​ക്ക​യി​ലെ മൂർ വംശജ​രായ രാജാ​ക്കൻമാർ ദക്ഷിണ സ്‌പെ​യിൻ ആക്രമി​ച്ചു് കീഴട​ക്കു​ക​യും വേഗത്തിൽ ഓടുന്ന അവരുടെ കുതി​ര​ക​ളും ഐബീ​രി​യൻ ഉപദ്വീ​പി​ലെ ചുറു​ചു​റു​ക്കുള്ള കുതി​ര​ക​ളും തമ്മിൽ ചേർത്തു് സങ്കരവർഗ്ഗത്തെ ഉണ്ടാക്കു​ക​യും ചെയ്‌തു. രേഖയിൽ ഏറ്റവും പഴക്കമുള്ള സങ്കരവർഗ്ഗം എന്നു് അവയെ വിളി​ക്കു​ന്നു. പുരാ​ത​ന​കാ​ല​ത്തു് ഒരു ചാക്കു സ്വർണ്ണം വിലയുള്ള ഒരു കുതിര ഇവി​ടെ​യു​ണ്ടാ​യി​രു​ന്നു. ഇന്നു​പോ​ലും വിശി​ഷ്ട​മായ ചില വിത്തു​കു​തി​ര​കൾക്കു് ഒരെണ്ണ​ത്തി​നു് ഏതാണ്ടു് 2,00,000 ഡോളർ വിലയു​ണ്ടു്.

എന്നാൽ ഈ കുതി​രയെ ഇത്ര വിലയു​ള്ള​താ​ക്കി​ത്തീർക്കു​ന്ന​തെ​ന്താ​ണു്? പതി​നേ​ഴാം നൂറ്റാ​ണ്ടിൽ ന്യൂ കാസിൽ പ്രഭു​വായ വില്യം കാവൻഡിഷ്‌ ഇപ്രകാ​രം എഴുതി: ലോക​ത്തിൽ സ്ഥിതി​ചെ​യ്യു​ന്ന​തിൽ ഏറ്റവും അന്തസ്സുള്ള കുതിര അവനാ​ണു്. അത്യന്തം സുന്ദരൻ. ഒരു രാജാ​വി​നു് തന്റെ ജയോ​ത്സ​വ​ഘോ​ഷ​യാ​ത്ര​യിൽ സവാരി ചെയ്യാൻ ഏറ്റവും യോജി​ച്ച​തും. ഞാൻ അതിന്റെ ബുദ്ധി​യേ​യും മെരു​ക്ക​ത്തെ​യും ധൈര്യ​ത്തെ​യും സ്‌തു​തി​ക്കു​ന്നു.” പരാ​ക്ര​മി​യായ റിച്ചാർഡ്‌ ഒരു വെള്ള ആൻഡാ​ലൂ​സി​യന്റെ പുറത്തി​രു​ന്നു് സൈ​പ്ര​സ്സി​ലെ സിറി​യാ​ക്കാർക്കെ​തി​രെ വിജയം നേടി​യ​തി​ലോ എഴുത്തു​കാ​ര​നായ സർ വാൾട്ടർ സ്‌ക്കോ​ട്ടു് തന്റെ കഥാപു​രു​ഷ​നായ ഐവ​നോ​യെ അതിന്റെ പുറത്തി​രു​ത്താൻ തെര​ഞ്ഞെ​ടു​ത്ത​തി​ലോ ഒട്ടും അതിശ​യി​ക്കാ​നില്ല.

ആദ്യകാ​ലം മുതൽ ആൻഡാ​ലൂ​സി​യനെ വളർത്തു​ന്നവർ ഒരു യുദ്ധകു​തി​ര​യെന്ന നിലയി​ലുള്ള അതിന്റെ കഴിവു് മനസ്സി​ലാ​ക്കി​യി​രു​ന്നു. ഇപ്പോൾ സദസ്സിനെ പുളകം കൊള്ളി​ക്കുന്ന ആ മനോഹര ചലനങ്ങൾ പോർക്ക​ള​ത്തിൽ മാരക​മാ​യി​രു​ന്നു. ഈ അത്ഭുത യുദ്ധയ​ന്ത്ര​ത്തിൽ ഇരിക്കുന്ന ഒരു രാജാ​വി​നെ കാണു​ന്ന​തു​തന്നെ കാൽന​ട​ക്കാ​രായ പടയാ​ളി​ക​ളു​ടെ ഹൃദയ​ങ്ങ​ളിൽ ഭീതി പരത്തു​മാ​യി​രു​ന്നു.

ധീരൻ എന്നാൽ ശാന്തൻ

യുദ്ധത്തി​ലുള്ള ആൻഡാ​ലൂ​സി​യന്റെ നാളുകൾ പൊയ്‌പ്പോ​യി​രി​ക്കു​ന്നു. എന്നിരു​ന്നാ​ലും പടക്കു​തി​ര​യു​ടെ പരാ​ക്ര​മ​ശീ​ലം നിമിത്തം സ്‌പെ​യി​നി​ലെ കുപ്ര​സിദ്ധ കാള​പ്പോ​രിൽ അതിനെ ദുർവ്വി​നി​യോ​ഗി​ക്കു​ന്നു​വെ​ന്നു​ള്ള​തു് സങ്കടകരം തന്നെ. കാള​പ്പോർ നടത്തു​ന്ന​യാ​ളെ അഥവാ റിജോ​നീ​ഡ​റെ​യും വഹിച്ചു​കൊ​ണ്ടു്, വേഗത്തിൽ കുതി​ക്കു​ന്ന​തും പെട്ടന്നു​തി​രി​യു​ന്ന​തും അപകട​കാ​രി​യു​മായ പോർക്കാ​ള​കളെ ആൻഡാ​ലൂ​സി​യൻ നിർഭയം നേരി​ടു​ന്നു. കാള കുതി​രയെ ആക്രമി​ക്കു​മ്പോൾ റിജോ​നീ​ഡർ പറ്റിയ സമയത്തി​നാ​യി കാത്തി​രി​ക്കു​ക​യും ചെരി​ഞ്ഞു് കാളയു​ടെ കഴുത്തിൽ രണ്ടു് ബാൻഡ​റീ​ല്ലകൾ അഥവാ അമ്പുകൾ എയ്യുക​യും ചെയ്യുന്നു.

എന്നിരു​ന്നാ​ലും ആൻഡാ​ലൂ​സി​യൻ സ്വാഭാ​വി​ക​മാ​യും ഒരു യുദ്ധ​ക്കൊ​തി​യൻ മൃഗമാ​ണെ​ന്നു് പറയാൻ പറ്റില്ല. ആശ്ചര്യ​ക​ര​മെ​ന്നു് പറയട്ടെ അവ ശാന്തരാ​ണു്, ഒരു സ്‌ത്രീ​ക്കു് അവയുടെ പുറത്തു കയറി​യി​രി​ക്കാൻ തക്കമുള്ള ശാന്തത. എന്നാൽ ചില സമയങ്ങ​ളിൽ വിത്തു​കു​തി​ര​കളെ കൈകാ​ര്യം ചെയ്യു​ന്ന​തു് കൂടുതൽ പ്രയാ​സ​ക​ര​മാ​യി​രു​ന്നേ​ക്കാം. ഇണചേ​രുന്ന കാലങ്ങ​ളിൽ അവ ഒരു പെൺകു​തി​ര​ക്കു​വേണ്ടി അന്യോ​ന്യം പോരാ​ടി​യേ​ക്കാം. എന്നാൽ സാധാ​ര​ണ​ഗ​തി​യിൽ ആൻഡാ​ലൂ​സി​യൻ പരസ്‌പരം രമ്യത​യിൽ പോകു​ന്നു. ഒരു സ്ഥലത്തു് ഒരു കുതി​ര​ല​യ​ത്തിൽ 30 വിത്തു​കു​തി​ര​ക​ളെ​യും ഒരു പെൺകു​തി​ര​യേ​യും അടുത്ത​ടു​ത്തു് കെട്ടി​യി​രി​ക്കു​ന്നു. എങ്കിലും അവയുടെ ശ്രേഷ്ട ഗുണം മുന്നിട്ടു നിൽക്കു​ന്നു. അവർ അങ്ങേയറ്റം മാന്യൻമാ​രെ​ന്ന​പോ​ലെ ശാന്തരാ​യി നിന്നു.

ഈ കുതിര ഒരു രാജാ​വി​നു് യോജി​ച്ച​താ​യി​രി​ക്കു​ന്ന​തിൽ അതിശ​യി​ക്കാ​നില്ല. ആൻഡാ​ലൂ​സി​യൻ വിത്തു​കു​തിര ഇയ്യോ​ബ്‌ 39:19-22-ൽ ദൈവം ചോദിച്ച കാര്യങ്ങൾ ഓർമ്മ​യിൽ വരുത്തു​ന്നു. “നിനക്കു് അതിന്റെ കഴുത്തിൽ കുഞ്ചി​രോ​മം അണിയി​ക്കാ​മോ? നിനക്കു് അതിനെ വെട്ടു​ക്കി​ളി​യേ​പ്പോ​ലെ ചാടി​ക്കാ​മോ? അതിന്റെ ഹുങ്കാര പ്രതാപം ഭയങ്കര​മാ​ണു്. അതു് താഴ്വ​ര​യിൽ മാന്തി കരുത്തിൽ ആഹ്ലാദി​ക്കു​ന്നു; അതു് ആയുധ​ക്കൂ​ട്ടത്തെ എതിർത്തു ചെല്ലുന്നു. അതു് കൊടും ഭീതിയെ പരിഹ​സി​ക്കു​ന്നു, ഭയപ്പെ​ടു​ന്നു​മില്ല.” അതു​പോ​ലെ​തന്നെ, സുന്ദര​നും ശാന്തശീ​ല​നും തികഞ്ഞ ധൈര്യ​ശാ​ലി​യു​മായ ആൻഡാ​ലൂ​സി​യൻ കുതിര ‘കുതിര ശക്തി നൽകാൻ കഴിവുള്ള’ ജ്ഞാനി​യായ സ്രഷ്ടാ​വി​ന്റെ ശക്തിയു​ടെ മറ്റൊരു പ്രകട​ന​മാ​ണു്.