എന്റെ കുടും​ബ​ത്തി​നു പ്രതി​രോ​ധ​കു​ത്തി​വ​യ്‌പ്‌ എടുക്ക​ണ​മോ?

“കുട്ടിക്കു കുത്തി​വ​യ്‌പെ​ടു​ക്കാ​നുള്ള സമയമാ​യി,” ഡോക്ടർ പറയുന്നു. ഒരുപക്ഷേ ഒരു ചെറിയ കുട്ടിക്ക്‌ അതു കേൾക്കാൻ അത്ര സുഖമുള്ള പ്രസ്‌താ​വ​നയല്ല, എന്നാൽ അതു പൊതു​വെ മാതാ​പി​താ​ക്ക​ളിൽനിന്ന്‌ ആത്മവി​ശ്വാ​സം വർധി​പ്പി​ക്കുന്ന ഒരു പുഞ്ചി​രി​യി​ലും സമ്മതഭാ​വ​ത്തി​ലും കലാശി​ച്ചി​രി​ക്കു​ന്നു.

എന്നാൽ അടുത്ത കാലത്തു കുട്ടി​കൾക്കും മുതിർന്ന​വർക്കും നൽകുന്ന പൊതു​വെ അംഗീ​ക​രി​ക്ക​പ്പെ​ടുന്ന പ്രതി​രോധ കുത്തി​വ​യ്‌പു രീതികൾ സംബന്ധി​ച്ചു സംശയങ്ങൾ ഉയർന്നു വന്നിട്ടുണ്ട്‌. ഏതെല്ലാം കുത്തി​വ​യ്‌പു​ക​ളാ​ണു യഥാർഥ​ത്തിൽ ആവശ്യ​മാ​യി​രി​ക്കു​ന്നത്‌? അവയുടെ ദോഷ​ഫ​ലങ്ങൾ സംബന്ധി​ച്ചെന്ത്‌? ഒരു വാക്‌സി​ന്റെ നിർമാ​ണ​ത്തിൽ ഏതെങ്കി​ലും വിധത്തിൽ രക്തം ഉൾപ്പെ​ട്ടി​ട്ടു​ണ്ടോ?

കരുത​ലു​ള്ള ഒരു ക്രിസ്‌തീയ കുടും​ബം പരിചി​ന്തി​ക്കേണ്ട നല്ല ചോദ്യ​ങ്ങ​ളാ​ണിവ. ഇവയുടെ ഉത്തരങ്ങൾക്കു നിങ്ങളു​ടെ കുട്ടി​ക​ളു​ടെ​യും ഒപ്പം നിങ്ങളു​ടെ​ത​ന്നെ​യും ആരോ​ഗ്യ​ത്തിൻമേ​ലും ഭാവി​മേ​ലും നേരി​ട്ടുള്ള ഒരു ഫലം ചെലു​ത്താൻ കഴിയും.

പശ്ചാത്തലം

മിക്ക നാടു​ക​ളി​ലും പോളി​യോ​രോ​ഗത്തെ സംബന്ധിച്ച ഭയത്തെ അന്തിമ​മാ​യി അവസാ​നി​പ്പിച്ച ഫലപ്ര​ദ​മായ ഒരു വാക്‌സിൻ 1950-കളിൽ അവതരി​പ്പി​ക്ക​പ്പെട്ടു. ഫലപ്ര​ദ​മായ പ്രതി​രോധ കുത്തി​വ​യ്‌പു പരിപാ​ടി​ക​ളു​ടെ ഫലമായി 1980 ആയതോ​ടെ മുഴു ലോക​ത്തു​നി​ന്നും വസൂരി​ബാധ നിർമാർജനം ചെയ്‌ത​താ​യി പ്രഖ്യാ​പി​ക്ക​പ്പെട്ടു. ബെഞ്ചമിൻ ഫ്രാങ്ക്‌ളി​ന്റെ ഈ വാക്കു​കളെ ഇതു സ്ഥിരീ​ക​രി​ച്ച​താ​യി തോന്നി: “ഒരൗൺസ്‌ പ്രതി​രോ​ധം ഒരു പൗണ്ട്‌ ഔഷധ​ത്തി​നു​തക്ക മൂല്യ​മു​ള്ള​താണ്‌.”

പല രോഗ​ങ്ങ​ളെ​യും—ടെററ​നസ്‌, പോളി​യോ, തൊണ്ട​മുള്ള്‌ (diphtheria), വില്ലൻചുമ (pertussis) എന്നിവ അവയിൽ ചിലതാണ്‌—നിയ​ന്ത്രി​ക്കു​ന്ന​തിൽ ഇന്നു പ്രതി​രോധ കുത്തി​വ​യ്‌പു പരിപാ​ടി​കൾ പൊതു​വെ ഫലപ്ര​ദ​മാ​യി​രി​ക്കു​ന്നു. ഇനിയും പ്രതി​രോധ കുത്തി​വ​യ്‌പ്‌ ഏതെങ്കി​ലും കാരണ​ത്താൽ കർശന​മ​ല്ലാ​ത്ത​താ​യി​ത്തീ​രു​മ്പോൾ രോഗം മടങ്ങി​വ​ന്നി​രി​ക്കു​ന്ന​താ​യി തെളി​ഞ്ഞി​ട്ടുണ്ട്‌. വില്ലൻചു​മ​യോ​ടുള്ള ബന്ധത്തിൽ ഒരു രാജ്യത്ത്‌ അതു സംഭവി​ച്ചു.

ഈ പ്രതി​രോ​ധ​മ​രു​ന്നു​കൾ എന്തു ചെയ്യുന്നു? അടിസ്ഥാ​ന​പ​ര​മാ​യി, അവ രണ്ടിൽ ഏതെങ്കി​ലു​മൊ​രു വിധത്തിൽ രോഗ​ബീ​ജ​ങ്ങ​ളും വൈറ​സു​ക​ളും ഉൾപ്പെടെ രോഗാ​ണു​ക്കൾ (pathogens) എന്നു വിളി​ക്ക​പ്പെ​ടുന്ന രോഗ​പ്പ​കർച്ച നടത്തുന്ന ഘടകങ്ങ​ളു​ടെ ആക്രമ​ണ​ത്തി​നെ​തി​രെ ശരീര​ത്തി​ന്റെ പ്രതി​രോ​ധ​ശേ​ഷി​യെ ശക്തി​പ്പെ​ടു​ത്തു​ന്നു. ഒന്നാമത്തെ വിധം ഉത്തേജിത പ്രതി​രോ​ധം (active immunization) എന്നു വിളി​ക്ക​പ്പെ​ടു​ന്നു. ഈ സംഗതി​യിൽ മരുന്നിൽ അടങ്ങി​യി​രി​ക്കു​ന്നതു ശരീര​ത്തിന്‌ അപകടം വരുത്താത്ത വിധത്തിൽ വ്യത്യാ​സ​പ്പെ​ടു​ത്തിയ ശക്തി ക്ഷയിപ്പി​ച്ച​തോ മൃതമാ​ക്കി​യ​തോ ആയ രോഗാ​ണു (അഥവാ അതിന്റെ വിഷം) ആണ്‌. ശരീര​ത്തി​ന്റെ സ്വന്തം പ്രതി​രോധ വ്യവസ്ഥകൾ രോഗാ​ണു​ക്കളെ നശിപ്പി​ക്കുന്ന ആൻറി​ബോ​ഡി​കൾ എന്നു വിളി​ക്ക​പ്പെ​ടുന്ന കൊല​യാ​ളി തൻമാ​ത്ര​കളെ ഉത്‌പാ​ദി​പ്പി​ച്ചു തുടങ്ങു​ന്നു, അതിനു യഥാർഥ രോഗാ​ണു പ്രവേ​ശി​ച്ചാൽ അതി​നെ​തി​രെ പൊരു​താൻ കഴിയും. പ്രതി​രോ​ധ​മ​രു​ന്നിൽ രോഗാ​ണു​വി​ഷ​ത്തി​ന്റെ (toxin) സത്ത്‌ അടങ്ങി​യി​ട്ടു​ണ്ടെ​ങ്കിൽ അതിനെ നിർവി​ഷകം (toxoid) എന്നു വിളി​ക്കു​ന്നു. അതു ശക്തി ക്ഷയിപ്പിച്ച ജീവനുള്ള രോഗാ​ണു​ക്ക​ളിൽനി​ന്നോ ചത്ത ജീവി​ക​ളിൽനി​ന്നോ ആണ്‌ ഉണ്ടാക്കു​ന്ന​തെ​ങ്കിൽ അതിനെ വാക്‌സിൻ എന്നു വിളി​ക്കു​ന്നു.

നിങ്ങൾക്കു സങ്കല്‌പി​ക്കാൻ കഴിയു​ന്ന​തു​പോ​ലെ ഈ മരുന്നു​കൾ സത്വര പ്രതി​രോ​ധ​ശേഷി ഉളവാ​ക്കു​ന്നില്ല. സംരക്ഷണം നൽകുന്ന ആൻറി​ബോ​ഡി​കളെ നിർമി​ക്കാൻ ശരീര​ത്തിന്‌ ഒരു കാലയ​ളവ്‌ ആവശ്യ​മാണ്‌. ഈ ഉത്തേജിത പ്രതി​രോ​ധ​ങ്ങ​ളിൽ പൊതു​വെ പ്രതി​രോധ മരുന്നു​ക​ളാ​യി കരുത​പ്പെ​ടുന്ന, കുട്ടി​കൾക്കു നൽകുന്ന എല്ലാ മരുന്നു​ക​ളും കുത്തി​വ​യ്‌പു​ക​ളും ഉൾപ്പെ​ടു​ന്നു. ഒന്നി​ലൊ​ഴി​കെ (പിന്നീടു ചർച്ച ചെയ്‌തി​രി​ക്കു​ന്നു) നിർമാ​ണ​ത്തി​ന്റെ ഒരു ഘട്ടത്തി​ലും ഇവയി​ലൊ​ന്നി​ലും രക്തത്തിന്റെ ഉപയോ​ഗം ഉൾപ്പെ​ടു​ന്നില്ല.

മറേറ പ്രവർത്ത​ന​ക്രമം അന്യ പ്രതി​രോ​ധം (passive immunization) എന്നു വിളി​ക്ക​പ്പെ​ടു​ന്നു. ഇതു സാധാ​ര​ണ​മാ​യി പേപ്പട്ടി വിഷം​പോ​ലെ ഗുരു​ത​ര​മായ ഒരു രോഗ​ത്തിന്‌ ഒരു വ്യക്തി വിധേ​യ​മാ​കുന്ന സാഹച​ര്യ​ങ്ങൾക്കു​വേണ്ടി ഉള്ളതാണ്‌. ആ സംഗതി​യിൽ ശരീര​ത്തിന്‌ അതിന്റെ സ്വന്തം പ്രതി​രോ​ധ​ശേഷി വികസി​പ്പി​ച്ചെ​ടു​ക്കാ​നുള്ള സമയമില്ല. അതു​കൊണ്ട്‌ അപ്പോൾത്തന്നെ നിർമി​ക്ക​പ്പെ​ട്ടി​ട്ടുള്ള മററാ​രു​ടെ​യെ​ങ്കി​ലും ആൻറി​ബോ​ഡി​കൾ രോഗാ​ണു​ക്കൾക്കെ​തി​രെ പൊരു​താൻ അണുബാ​ധ​യു​ണ്ടായ വ്യക്തി​യിൽ കുത്തി​വ​യ്‌ക്കാൻ കഴിയും. ഗാമ ഗ്ലോബു​ലിൻ, പ്രതി​വി​ഷം (antitoxin), ഉയർന്ന അളവിൽ ആൻറി​ബോ​ഡി​കൾ അടങ്ങിയ സീറം (hyperimmune serum) തുടങ്ങി​യവ പ്രതി​രോ​ധ​ശേ​ഷി​യുള്ള മനുഷ്യ​രു​ടെ​യോ മൃഗങ്ങ​ളു​ടെ​യോ രക്തസത്ത​യിൽനിന്ന്‌ ഉണ്ടാക്കുന്ന മരുന്നു​ക​ളു​ടെ മററു പേരു​ക​ളാണ്‌. കടമെ​ടുത്ത ഈ പ്രതി​രോ​ധങ്ങൾ അഥവാ അന്യ പ്രതി​രോ​ധങ്ങൾ അക്രമി​യെ ചെറുത്തു തോൽപ്പി​ക്കാൻ ശരീര​ത്തി​നു സത്വര​വും എന്നാൽ താത്‌കാ​ലി​കം മാത്ര​വും ആയ സഹായം നൽകാൻ ഉദ്ദേശി​ച്ചു​ള്ള​വ​യാണ്‌. പെട്ടെ​ന്നു​തന്നെ കടമെ​ടുത്ത ആൻറി​ബോ​ഡി​കൾ അന്യമാം​സ്യ​മാ​യി ശരീര​ത്തിൽനി​ന്നു പുറന്ത​ള്ള​പ്പെ​ടു​ന്നു.

എന്റെ കുട്ടിക്കു പ്രതി​രോ​ധ​മ​രു​ന്നു കൊടു​ക്ക​ണ​മോ?

എന്നാൽ ഈ പശ്ചാത്ത​ല​ത്തിൽ ചിലർ വീണ്ടും സംശയി​ച്ചേ​ക്കാം, ‘എന്റെ കുട്ടിക്ക്‌ ഏതു പ്രതി​രോ​ധ​മ​രു​ന്നു​ക​ളാ​ണു കൊടു​ക്കേ​ണ്ടത്‌?’ കുട്ടി​കൾക്കുള്ള പ്രതി​രോ​ധ​മ​രു​ന്നു​കൾ സത്വരം ലഭ്യമാ​യി​രി​ക്കുന്ന ലോക​ത്തി​ന്റെ മിക്ക ഭാഗങ്ങ​ളി​ലും യഥാസ​മ​യ​ത്തുള്ള പ്രതി​രോധ കുത്തി​വ​യ്‌പു​കൾ ഏതു രോഗ​ങ്ങളെ ഉദ്ദേശി​ച്ചു നടത്തി​യോ ആ രോഗ​ങ്ങ​ളു​ടെ ഗണ്യമായ കുറവിൽ കലാശി​ച്ചി​രി​ക്കു​ന്നു.

ശിശു​രോ​ഗ​വി​ദ​ഗ്‌ധ​രു​ടെ അമേരി​ക്കൻ അക്കാദമി ലോക​ത്തി​നു ചുററു​മുള്ള സമാന​മായ മററു സ്ഥാപന​ങ്ങ​ളോ​ടുള്ള യോജി​പ്പിൽ അനേക വർഷങ്ങ​ളാ​യി പിൻവ​രുന്ന രോഗ​ങ്ങൾക്കു യഥാസ​മ​യ​ത്തുള്ള പ്രതി​രോ​ധ​മ​രു​ന്നു​കൾ ശുപാർശ ചെയ്‌തി​ട്ടുണ്ട്‌: തൊണ്ട​മുള്ള്‌, വില്ലൻചുമ, ടെററ​നസ്‌. സാധാ​ര​ണ​ഗ​തി​യിൽ മൂന്നും കൂടെ ഒരുമി​ച്ചു ഡിപി​ററി എന്ന പേരിൽ ഒരു കുത്തി​വ​യ്‌പു നൽക​പ്പെ​ടു​ന്നു, അങ്ങനെ ചുരു​ങ്ങി​യതു രണ്ടു മാസം ഇടവിട്ട്‌ മൂന്നു ബൂസ്‌ററർ ഡിപി​ററി കുത്തി​വ​യ്‌പു​ക​ളും. അതിനു​പു​റമെ, അഞ്ചാം​പ​നി​ക്കും മുണ്ടി​നീ​രി​നും ജർമൻ മീസിൽസി​നും ഉള്ള പ്രതി​രോ​ധ​മ​രു​ന്നു​കൾ ഒരു വയസ്സു കഴിഞ്ഞ കുട്ടി​കൾക്ക്‌ എംഎംആർ എന്ന ഒററ ഡോസാ​യി കൊടു​ക്കു​ന്നു. മാത്ര​വു​മല്ല ഡിപി​റ​റി​യ്‌ക്കു സമാന​മായ ക്രമത്തിൽ പോളി​യോ​യ്‌ക്കുള്ള നാലു ഡോസ്‌ മരുന്നും (ഒപിവി) വായി​ലൂ​ടെ കൊടു​ക്കു​ന്നു.a

ആവശ്യ​മാ​യ ബൂസ്‌ററർ ഡോസു​ക​ളു​ടെ എണ്ണം വ്യത്യാ​സ​പ്പെ​ട്ടി​രു​ന്നേ​ക്കാ​മെ​ങ്കി​ലും പല സ്ഥലങ്ങളി​ലും യഥാസ​മ​യ​ത്തുള്ള ഈ കുത്തി​വ​യ്‌പു​കൾ കർശന​മാണ്‌. അടുത്ത കാലത്ത്‌ അഞ്ചാം​പ​നി​യു​ടെ അനേകം കേസുകൾ ഉണ്ടായ​തി​നെ​ത്തു​ടർന്നു ചില സാഹച​ര്യ​ങ്ങ​ളിൽ അഞ്ചാം​പ​നി​ക്കുള്ള വാക്‌സി​ന്റെ കൂടുതൽ ബൂസ്‌ററർ ഡോസു​കൾ ശുപാർശ ചെയ്യ​പ്പെ​ട്ടി​രി​ക്കു​ന്നു. വിശദാം​ശ​ങ്ങൾക്കാ​യി നിങ്ങൾ നിങ്ങളു​ടെ പ്രദേ​ശത്തെ ഒരു ഡോക്ടറെ കാണേണ്ട ആവശ്യം വന്നേക്കാം.

ഇവയ്‌ക്കു പുറമേ, ന്യൂ​മോ​ണിയ വാക്‌സി​നും (ന്യൂ​മോ​വാ​ക്‌സ്‌) ഉണ്ട്‌. ഏതെങ്കി​ലും കാരണം നിമിത്തം ചിലതരം ന്യൂ​മോ​ണിയ വരാൻ സാധ്യ​ത​യുള്ള കുട്ടി​കൾക്കും മുതിർന്ന​വർക്കും ഇത്‌ ആജീവ​നാന്ത രോഗ​പ്ര​തി​രോ​ധ​ശേഷി നൽകു​ന്ന​താ​യി തോന്നു​ന്നു.

കുട്ടി​കൾക്കു​ള്ള മറെറാ​രു വാക്‌സിൻ ഹിബ്‌ വാക്‌സിൻ എന്നു വിളി​ക്ക​പ്പെ​ടു​ന്നു. ശൈശ​വ​കാ​ലത്തു ബാധി​ക്കുന്ന ഹീമോ​ഫീ​ലസ്‌ ഇൻഫ്‌ളു​വൻസ എന്ന ഒരു സാധാരണ രോഗാ​ണു​വി​നെ​തി​രെ സംരക്ഷണം നൽകാ​നാണ്‌ ഇതു നൽകു​ന്നത്‌. ഈ അണുക്കൾ കുട്ടി​ക​ളിൽ പലതരം രോഗ​ങ്ങ​ളു​ണ്ടാ​ക്കു​ന്നു, ഇവയിൽ ഏററവും ശ്രദ്ധേ​യ​മാ​യതു രൂക്ഷമായ ഒരുതരം മസ്‌തി​ഷ്‌ക​വീ​ക്ക​മാണ്‌. ഈ വാക്‌സിൻ പൊതു​വെ സുരക്ഷി​ത​മെന്നു തെളി​ഞ്ഞി​രി​ക്കു​ന്നു, കുട്ടി​കൾക്കുള്ള പ്രതി​രോധ കുത്തി​വ​യ്‌പു​ക​ളു​ടെ ഭാഗമാ​യി അത്‌ അധിക​മ​ധി​കം ശുപാർശ ചെയ്യ​പ്പെ​ട്ടു​വ​രി​ക​യാണ്‌.

എന്നാൽ ചൂടു​പ​നി​ക്കു യഥാകാല പ്രതി​രോധ മരുന്നു​കൾ ഇതുവ​രെ​യും ഉണ്ടായി​ട്ടില്ല. വസൂരി​ക്കുള്ള പ്രതി​രോ​ധ​മ​രു​ന്നു മേലാൽ ലഭ്യമല്ല, കാരണം നേരത്തെ പരാമർശി​ച്ച​പോ​ലെ ലോക​വ്യാ​പ​ക​മാ​യി നടത്തിയ ഒരു പ്രതി​രോധ കുത്തി​വ​യ്‌പു പരിപാ​ടി ഈ മാരക​രോ​ഗത്തെ തുടച്ചു​നീ​ക്കി​യി​രി​ക്കു​ന്നു.

ദോഷ​ഫ​ലങ്ങൾ സംബന്ധി​ച്ചെന്ത്‌?

പ്രതി​രോ​ധ​മ​രു​ന്നു​ക​ളു​ടെ ദോഷ​ഫ​ലങ്ങൾ സംബന്ധി​ച്ചെന്ത്‌? കുട്ടി​യു​ടെ പെട്ടെ​ന്നുള്ള കരച്ചി​ലും താത്‌കാ​ലി​ക​മായ കണ്ണുനീ​രും ഒഴിച്ച്‌ അനേകം മരുന്നു​കൾക്കും ദോഷ​ഫ​ലങ്ങൾ സാധാ​ര​ണ​മാ​യി പരിമി​ത​വും താത്‌കാ​ലി​ക​വു​മാണ്‌—അങ്ങേയ​ററം പോയാൽ ഒന്നോ രണ്ടോ ദിവസത്തെ പനിയു​ണ്ടാ​യേ​ക്കാം. എന്നിരു​ന്നാ​ലും ഈ മരുന്നു​ക​ളു​ടെ അപകടങ്ങൾ സംബന്ധി​ച്ചു പല മാതാ​പി​താ​ക്കൾക്കും ഉത്‌ക​ണ്‌ഠ​ക​ളുണ്ട്‌. ഒരു വൈദ്യ​ശാ​സ്‌ത്ര പഠനം തങ്ങളുടെ കുട്ടി​ക​ളു​ടെ ആരോ​ഗ്യം സംബന്ധിച്ച മാതാ​പി​താ​ക്ക​ളു​ടെ ഉത്‌ക​ണ്‌ഠ​ക​ളെ​ക്കു​റി​ച്ചു സർവേ നടത്തി, സർവേ ചെയ്യപ്പെട്ട മാതാ​പി​താ​ക്ക​ളിൽ 57 ശതമാനം പേരും പ്രതി​രോധ കുത്തി​വ​യ്‌പു​ക​ളു​ടെ പ്രത്യാ​ഘാ​തത്തെ സംബന്ധിച്ച്‌ ഉത്‌ക​ണ്‌ഠ​പ്പെട്ടു.

സമീപ കാലത്തു ഡിപി​റ​റി​യി​ലെ ഒരു ഘടക​ത്തെ​ക്കു​റിച്ച്‌, അതായത്‌ വില്ലൻചു​മ​യെ​ക്കു​റി​ച്ചു വലിയ ഉത്‌കണ്‌ഠ പ്രചരി​ച്ചി​ട്ടുണ്ട്‌. ഈ മരുന്നി​ന്റെ വിജയം മുമ്പു ഭയപ്പെ​ട്ടി​രുന്ന ഒരു രോഗ​ത്തി​ന്റെ ഗണ്യമായ കുറവിൽ കലാശി​ച്ചി​രി​ക്കു​ന്നു —ഒരു രാജ്യത്തു മാത്രം പ്രതി​വർഷം വാക്‌സി​നു മുമ്പു​ണ്ടാ​യി​രുന്ന 2,00,000 കേസു​ക​ളിൽനി​ന്നു വാക്‌സി​ന്റെ വ്യാപ​ക​മായ ഉപയോ​ഗ​ത്തെ​ത്തു​ടർന്ന്‌ 2,000 കേസു​ക​ളാ​യി കുറഞ്ഞു. എന്നിരു​ന്നാൽത്ത​ന്നെ​യും നൽകപ്പെട്ട ഏതാണ്ട്‌ 1,00,000 ഡോസു​ക​ളിൽ ഒന്നിൽ ഗുരു​ത​ര​മായ ദോഷ​ഫ​ലങ്ങൾ—പെട്ടെ​ന്നുള്ള രോഗ​മൂർച്ഛ​യും മസ്‌തി​ഷ്‌ക​നാ​ശം പോലും—ഉണ്ടായി.

ഈ പ്രത്യാ​ഘാ​തം വളരെ അപൂർവ​മാ​ണെ​ന്നി​രി​ക്കെ, സ്‌കൂ​ളിൽ ചേർക്കാൻ കുട്ടിക്കു യോഗ്യത കിട്ടു​ന്ന​തി​നു തങ്ങളുടെ കുട്ടിക്കു കുത്തി​വ​യ്‌പെ​ടു​ക്കു​ക​യ​ല്ലാ​തെ മററു മാർഗ​ങ്ങ​ളി​ല്ലെന്നു കാണുന്ന അനേകം മാതാ​പി​താ​ക്ക​ളു​ടെ​യും ഭാഗത്ത്‌ ഇതു കുറച്ച്‌ ഉത്‌ക​ണ്‌ഠ​യ്‌ക്ക്‌ ഇട നൽകുന്നു. അസാധാ​ര​ണ​മാ​ണെ​ങ്കി​ലും വില്ലൻചുമ ഒരു സമൂഹത്തെ ബാധി​ക്കു​മ്പോൾ വളരെ നാശോൻമു​ഖ​മാ​യ​തു​കൊ​ണ്ടു ശരാശരി കുട്ടിക്ക്‌ “ഈ വാക്‌സിൻ, രോഗം പിടി​പെ​ടു​ന്ന​തി​നെ​ക്കാൾ വളരെ​യ​ധി​കം സുരക്ഷി​ത​മാണ്‌” എന്നു വിദഗ്‌ധർ നിഗമനം ചെയ്‌തി​രി​ക്കു​ന്നു. “നേരത്തെ കൊടുത്ത ഒരു ഡോസ്‌ മരുന്നു കോച്ച​ലി​ലോ മസ്‌തി​ഷ്‌ക​വീ​ക്ക​ത്തി​ലോ കേന്ദ്ര​നാ​ഡീ​വ്യ​വ​സ്ഥ​യി​ലെ രോഗ​ല​ക്ഷ​ണ​ങ്ങ​ളി​ലോ തകർച്ച​യി​ലോ കലാശി​ക്കാ​ത്ത​പ്പോൾ” പ്രതി​രോ​ധ​മ​രു​ന്നു കൊടു​ക്കാൻ ആ വിദഗ്‌ധർ ഉപദേ​ശി​ക്കു​ന്നു. “‘അമിത​മായ ഉറക്കമോ വളരെ​യ​ധി​കം കരച്ചി​ലോ (മൂന്നു മണിക്കൂ​റോ അതില​ധി​ക​മോ നേര​ത്തേ​ക്കുള്ള നിറു​ത്താ​തെ​യുള്ള കരച്ചിൽ) 105°ഫാരൻഹീററിലധികം (40.5°സെൽഷ്യസ്‌) താപനി​ല​യോ’ ഉണ്ടാകുന്ന ശിശു​ക്കൾക്കു വാക്‌സി​ന്റെ കൂടുതൽ ഡോസു​കൾ കൊടു​ക്ക​രുത്‌.”b

പല നാടു​ക​ളി​ലും ഈ പ്രശ്‌ന​ത്തി​ന്റെ യഥാർഥ പരിഹാ​രം സമ്പൂർണ മൃത​കോ​ശ​ങ്ങ​ള​ട​ങ്ങാത്ത വാക്‌സി​നാണ്‌. ആശാവ​ഹ​മായ പ്രതീ​ക്ഷ​ക​ളോ​ടെ ഇപ്പോൾ ജപ്പാനിൽ കൊടു​ത്തു​വ​രു​ന്ന​തു​പോ​ലുള്ള വാക്‌സി​നു​ക​ളാണ്‌ അവ. പുതി​യ​തും കൂടുതൽ സുരക്ഷി​ത​വും ആയ ഈ വാക്‌സിൻ മററു രാജ്യ​ങ്ങ​ളി​ലും ലഭ്യമാ​യി​ക്കൊ​ണ്ടി​രി​ക്കു​ന്നു.

യഥാകാ​ല​ങ്ങ​ളിൽ കുട്ടി​കൾക്കു കൊടു​ക്കുന്ന മററു പ്രതി​രോ​ധ​മ​രു​ന്നു​ക​ളും ഫലപ്ര​ദ​വും താരത​മ്യേന സുരക്ഷി​ത​വും ആണെന്നു കൂടെ​ക്കൂ​ടെ തെളി​ഞ്ഞി​രി​ക്കു​ന്നു.

മുതിർന്ന​വർക്കുള്ള പ്രതി​രോധ കുത്തി​വ​യ്‌പു​കൾ സംബന്ധി​ച്ചെന്ത്‌?

ഒരിക്കൽ ഒരു വ്യക്തി പൂർണ വളർച്ച​യിൽ എത്തിയാൽ അയാൾ മനസ്സിൽ പിടി​ക്കേണ്ട ചില ഉത്തേജിത പ്രതി​രോ​ധ​മ​രു​ന്നു​കൾ ഉണ്ട്‌. കുട്ടി​ക്കാ​ലത്തു രോഗ​മു​ണ്ടാ​കു​ക​യോ പ്രതി​രോധ കുത്തി​വ​യ്‌പെ​ടു​ക്കു​ക​യോ ചെയ്‌ത​തി​ന്റെ ഫലമായി പ്രായ​പൂർത്തി​യായ എല്ലാവർക്കും അഞ്ചാം​പ​നി​ക്കും മുണ്ടി​നീ​രി​നും ജർമൻ മീസിൽസി​നും എതിരായ പ്രതി​രോ​ധ​ശേഷി ഉണ്ടായി​രി​ക്കണം. അത്തരം പ്രതി​രോ​ധ​ശേഷി സംബന്ധി​ച്ചു സംശയം ഉണ്ടാകു​ന്നെ​ങ്കിൽ ഡോക്ടർ പ്രായ​പൂർത്തി​യായ ഒരാൾക്ക്‌ ഒരു എംഎംആർ ഡോസ്‌ ശുപാർശ ചെയ്‌തേ​ക്കാം.

പത്തു വർഷത്തിൽ ഒരിക്ക​ലോ മറേറാ ഉള്ള ടെററ​നസ്‌ നിർവി​ഷ​ക​ത്തി​ന്റെ ഒരു ഡോസ്‌ മരുന്നു ഹനുസ്‌തം​ഭനം (lockjaw) തടയാ​നുള്ള മാർഗ​മെന്ന നിലയിൽ ഒരു നല്ല ആശയമാ​യി കരുത​പ്പെ​ടു​ന്നു. പ്രായ​മായ വ്യക്തി​ക​ളും പഴകിയ രോഗ​മു​ള്ള​വ​രും വാർഷി​ക​മാ​യുള്ള ഇൻഫ്‌ളു​വൻസാ പ്രതി​രോധ ചികിത്സ സംബന്ധി​ച്ചു തങ്ങളുടെ ഡോക്ട​റു​മാ​യി പരി​ശോ​ധന നടത്താൻ ആഗ്രഹി​ച്ചേ​ക്കാം. ലോക​ത്തി​ന്റെ ചില ഭാഗങ്ങ​ളി​ലേക്കു യാത്ര ചെയ്യു​ന്നവർ മഞ്ഞപ്പനി, കോളറ, പ്ലീഹ​രോ​ഗം, ടൈ​ഫോ​യ്‌ഡ്‌, പ്ലേഗ്‌ ഇവയി​ലേ​തെ​ങ്കി​ലും വ്യാപ​ക​മാ​യി​രി​ക്കുന്ന ദേശ​ത്തേ​ക്കാ​ണു പോകു​ന്ന​തെ​ങ്കിൽ അവയ്‌ക്കെ​തി​രെ പ്രതി​രോധ കുത്തി​വ​യ്‌പു നടത്തു​ന്ന​തി​നെ​ക്കു​റി​ച്ചു പരിചി​ന്തി​ക്കണം.

മറെറാ​രു ഉത്തേജിത പ്രതി​രോ​ധ​മ​രു​ന്നു ശ്രദ്ധ അർഹി​ക്കു​ന്നു, എന്തു​കൊ​ണ്ടെ​ന്നാൽ രക്തത്തിൽനിന്ന്‌ ഉണ്ടാക്കുന്ന ഒരേ​യൊ​രു ഉത്തേജിത പ്രതി​രോ​ധ​മ​രുന്ന്‌ അതു മാത്ര​മാണ്‌. ഹെപ്‌റ​റാ​വാ​ക്‌സ്‌-ബി എന്നു വിളി​ക്ക​പ്പെ​ടുന്ന ഹെപ്പ​റെ​റ​റ​റിസ്‌-ബി വാക്‌സി​നാണ്‌ അത്‌. ഹെപ്പ​റെ​റ​റ​റിസ്‌ ബി ബാധിച്ച രോഗി​ക​ളിൽനി​ന്നുള്ള രക്തോ​ത്‌പ​ന്ന​ങ്ങ​ളു​മാ​യി യാദൃ​ച്ഛി​ക​മാ​യി സമ്പർക്ക​ത്തിൽ വന്നേക്കാ​വുന്ന ആരോ​ഗ്യ​രക്ഷാ പ്രവർത്തകർ പോലുള്ള ചില വ്യക്തി​കളെ ഉദ്ദേശി​ച്ചു​കൊ​ണ്ടുള്ള പ്രതി​രോ​ധ​മ​രു​ന്നാണ്‌ ഇത്‌. ഒരു വമ്പിച്ച മുന്നേ​ററം എന്നു വാഴ്‌ത്ത​പ്പെ​ടു​ന്നു​ണ്ടെ​ങ്കി​ലും അതിന്റെ നിർമാ​ണ​രീ​തി നിമിത്തം ഈ വാക്‌സിൻ പലർക്കും ഉത്‌കണ്‌ഠ ഉളവാ​ക്കി​യി​രി​ക്കു​ന്നു.

അടിസ്ഥാ​ന​പ​ര​മാ​യി, പ്രത്യേ​ക​തരം ഹെപ്പ​റെ​റ​റ​റിസ്‌-ബി വൈറസ്‌ ബാധി​ച്ച​വ​രിൽനി​ന്നു രക്തം ശേഖരി​ക്കു​ക​യും അതിൽനി​ന്നു വൈറ​സു​ക​ളെ​യെ​ല്ലാം കൊന്ന​ശേഷം ഒരു പ്രത്യേ​ക​തരം ഹെപ്പ​റെ​റ​റ​റിസ്‌-ബി രോഗാ​ണു​വി​നെ ശേഖരി​ക്കു​ന്നു. ശുദ്ധി​ചെയ്‌ത, വീര്യം കെടു​ത്തിയ ഈ രോഗാ​ണു​വി​നെ ഒരു വാക്‌സി​നാ​യി കുത്തി​വ​യ്‌ക്കാൻ കഴിയും. എന്നിരു​ന്നാ​ലും, ലൈം​ഗി​ക​മാ​യി അഴിഞ്ഞ നടത്തയു​ള്ളവർ പോലുള്ള രോഗ​ബാ​ധി​ത​രായ ആളുക​ളിൽനി​ന്നുള്ള രക്തോ​ത്‌പ​ന്നങ്ങൾ സ്വീക​രി​ക്കു​ന്ന​തി​ന്റെ അപകടത്തെ ഭയപ്പെട്ട്‌ പല ആളുക​ളും ഈ വാക്‌സിൻ സ്വീക​രി​ക്കാൻ വിസമ്മ​തി​ക്കു​ന്നു. അതിനു​പു​റമെ ഈ വാക്‌സിൻ മറെറാ​രു വ്യക്തി​യു​ടെ രക്തത്തിൽനിന്ന്‌ എടുക്കു​ന്ന​തു​കൊ​ണ്ടു മനസ്സാ​ക്ഷി​ബോ​ധ​മുള്ള ചില ക്രിസ്‌ത്യാ​നി​കൾ ഇതി​നോട്‌ എതിർപ്പു​ള്ള​വ​രാണ്‌.c

വ്യത്യ​സ്‌ത​മാ​യ എന്നാൽ തുല്യ​ശ​ക്തി​യുള്ള ഒരു ഹെപ്പ​റെ​റ​റ​റിസ്‌-ബി വാക്‌സിൻ പുറത്തു വന്നതോ​ടെ ഹെപ്പ​റെ​റ​റ​റിസ്‌ വാക്‌സി​നെ​തി​രെ​യുള്ള അത്തരം എതിർപ്പു​കൾ ഫലപ്ര​ദ​മാ​യി നീക്കം ചെയ്യ​പ്പെ​ട്ടി​രി​ക്കു​ന്നു. യീസ്‌ററ്‌ കോശ​ങ്ങ​ളിൽ വാക്‌സിൻ ഉത്‌പാ​ദി​പ്പി​ക്കുന്ന ഒരു ജനിതക സാങ്കേ​തി​ക​വി​ദ്യ​യി​ലൂ​ടെ​യാണ്‌ ഇത്‌ ഉണ്ടാക്കു​ന്നത്‌, അതിൽ മനുഷ്യ​രക്തം ഉൾപ്പെ​ട്ടി​ട്ടില്ല. നിങ്ങൾ ആരോ​ഗ്യ​രക്ഷാ പ്രവർത്ത​ന​രം​ഗ​ത്താ​ണു ജോലി നോക്കു​ന്ന​തെ​ങ്കിൽ അഥവാ മറേറ​തെ​ങ്കി​ലും കാരണ​ത്താൽ ഹെപ്പ​റെ​റ​റ​റിസ്‌-ബി വാക്‌സിൻ സ്വീക​രി​ക്കേണ്ട ഒരു വ്യക്തി​യാ​ണെ​ങ്കിൽ ഈ വിഷയം നിങ്ങളു​ടെ ഡോക്ട​റു​മാ​യി ചർച്ച​ചെ​യ്യാൻ നിങ്ങൾ ആഗ്രഹി​ച്ചേ​ക്കാം.

വാക്‌സിൻ ഉത്‌പാ​ദ​ന​ത്തിൽ രക്തം

രക്തത്തിന്റെ ദുർവി​നി​യോ​ഗം സംബന്ധിച്ച ബൈബി​ളി​ന്റെ വിലക്കിൽ താത്‌പ​ര്യ​മെ​ടു​ക്കുന്ന ക്രിസ്‌ത്യാ​നി​കൾക്ക്‌ ഇത്‌ ഒരു പ്രധാ​ന​പ്പെട്ട പ്രശ്‌നം ഉന്നയി​ക്കു​ന്നു. (പ്രവൃ​ത്തി​കൾ 15:28, 29) മറേറ​തെ​ങ്കി​ലും വാക്‌സി​നു​കൾ രക്തത്തിൽനിന്ന്‌ ഉണ്ടാക്കു​ന്ന​വ​യാ​ണോ?

പൊതു​വെ, ഹെപ്‌റ​റാ​വാ​ക്‌സ്‌-ബി ഒഴിച്ച്‌, ഉത്തേജിത പ്രതി​രോ​ധ​മ​രു​ന്നു​കൾ ഒന്നും രക്തത്തിൽനിന്ന്‌ ഉത്‌പാ​ദി​പ്പി​ക്കു​ന്ന​വയല്ല. ദൃഷ്ടാ​ന്ത​ത്തിന്‌ ഇതിൽ കുട്ടി​കൾക്കുള്ള എല്ലാ പ്രതി​രോ​ധ​മ​രു​ന്നു​ക​ളും ഉൾപ്പെ​ടു​ന്നു.

അന്യ പ്രതി​രോ​ധ​മ​രു​ന്നി​നെ സംബന്ധി​ച്ചു മറിച്ചാ​ണു വാസ്‌തവം. തുരു​മ്പിച്ച ആണിമേൽ ചവിട്ടി​യ​ശേഷം അല്ലെങ്കിൽ ഒരു പട്ടിയു​ടെ കടി​കൊ​ണ്ട​ശേഷം അങ്ങനെ സാധ്യ​ത​യ​നു​സ​രിച്ച്‌ അണുബാ​ധ​യു​ണ്ടാ​യ​ശേഷം ഒരുവൻ കുത്തി​വ​യ്‌പെ​ടു​ക്കാൻ ഉപദേ​ശി​ക്ക​പ്പെ​ടു​മ്പോൾ മരുന്നു​കൾ (അവ കേവലം യഥാസ​മ​യ​ങ്ങ​ളി​ലുള്ള ബൂസ്‌റ​റ​റു​കൾ അല്ലെങ്കിൽ) ഉയർന്ന അളവിൽ ആൻറി​ബോ​ഡി​കൾ അടങ്ങിയ സീറം ആയിരി​ക്കു​മെ​ന്നും അതു രക്തം ഉപയോ​ഗിച്ച്‌ ഉണ്ടാക്കി​യ​താ​യി​രി​ക്കു​മെ​ന്നും ഒരുവനു നിഗമനം ചെയ്യാൻ കഴിയും. ഇത്‌ ആർഎച്ച്‌ ഇമ്യൂൺ ഗ്ലോബു​ലി​നെ (Rhogam) സംബന്ധി​ച്ചും സത്യമാണ്‌, രക്തത്തിൽ ആർഎച്ച്‌-ഘടകമുള്ള ശിശു​ക്ക​ളു​ടെ ജനനസ​മ​യ​ത്തെ​ന്ന​പോ​ലെ ആർഎച്ച്‌-അനുകൂല (Rh-positive) രക്തവു​മാ​യി ഏതെങ്കി​ലും കാരണ​വ​ശാൽ സമ്പർക്ക​ത്തിൽ വരുന്ന ആർഎച്ച്‌-പ്രതി​കൂല (Rh-negative) അമ്മമാർക്കു മിക്ക​പ്പോ​ഴും അതു ശുപാർശ ചെയ്യ​പ്പെ​ടു​ന്നു.

ഈ അന്യ പ്രതി​രോ​ധ​മ​രു​ന്നു​കൾ രക്തത്തിന്റെ പ്രശ്‌നം സംബന്ധി​ച്ചു ശ്രദ്ധയർഹി​ക്കു​ന്ന​താ​യ​തു​കൊ​ണ്ടു മനസ്സാ​ക്ഷി​ബോ​ധ​മുള്ള ഒരു ക്രിസ്‌ത്യാ​നി ഏതു നിലപാ​ടു സ്വീക​രി​ക്കും? ഈ പത്രി​ക​യി​ലും ഇതിന്റെ കൂട്ടു​പ്ര​സി​ദ്ധീ​ക​ര​ണ​മായ വീക്ഷാ​ഗോ​പു​ര​ത്തി​ലും നേരത്തെ വന്നിട്ടുള്ള ലേഖനങ്ങൾ പൊരു​ത്ത​മുള്ള ഒരു നിലപാട്‌ അവതരി​പ്പി​ച്ചി​ട്ടുണ്ട്‌: ഈ ചികിത്സ തനിക്കും തന്റെ കുടും​ബ​ത്തി​നും സ്വീക​രി​ക്ക​ണോ​യെന്ന്‌ ഓരോ ക്രിസ്‌ത്യാ​നി​യു​ടെ​യും ബൈബിൾ പരിശീ​ലിത മനസ്സാ​ക്ഷി​യ​നു​സ​രി​ച്ചു തീരു​മാ​നി​ക്കേ​ണ്ട​താണ്‌.d

എന്റെ കുടും​ബം പ്രതി​രോ​ധ​മ​രു​ന്നു​കൾ സ്വീക​രി​ക്ക​ണ​മോ?

ക്രിസ്‌ത്യാ​നി​കൾക്കു ജീവ​നോ​ടു വലിയ ആദരവുണ്ട്‌, തങ്ങളുടെ കുടും​ബ​ത്തി​ന്റെ ആരോ​ഗ്യ​ത്തി​നു​വേണ്ടി ഏററവും നല്ലതു ചെയ്യാൻ അവർ ആഗ്രഹി​ക്കു​ക​യും ചെയ്യുന്നു. നിങ്ങളു​ടെ കുടും​ബ​ത്തി​നു പ്രതി​രോ​ധ​മ​രു​ന്നു​കൾ വേണോ എന്നു മനസ്സാ​ക്ഷി​പൂർവം തീരു​മാ​നി​ക്കു​ക​യെ​ന്നതു നിങ്ങളു​ടെ വ്യക്തി​പ​ര​മായ തീരു​മാ​ന​മാണ്‌.—ഗലാത്യർ 6:5.

ഈ സ്ഥിതി​വി​ശേ​ഷത്തെ ഒരു വിദഗ്‌ധൻ ഇപ്രകാ​രം നന്നായി സംഗ്ര​ഹി​ച്ചു: “തങ്ങളുടെ കുട്ടി​ക്കാ​യുള്ള ഓരോ ചികി​ത്സ​യും മാതാ​പി​താ​ക്കൾ അറിഞ്ഞി​രി​ക്കേ​ണ്ട​തുണ്ട്‌. അവർ തങ്ങളുടെ കുട്ടി​യു​ടെ നിയമാ​നു​സൃത രക്ഷിതാ​ക്ക​ളെ​ക്കാൾ കവിഞ്ഞ​വ​രാണ്‌. മക്കൾ അവരെ ആശ്രയിച്ച്‌ എത്രകാ​ലം ജീവി​ക്കു​ന്നു​വോ അത്രയും​കാ​ലം അവരുടെ ക്ഷേമത്തി​നും സംരക്ഷ​ണ​ത്തി​നും അവർ ഉത്തരവാ​ദി​ക​ളാണ്‌.” പ്രതി​രോ​ധ​മ​രു​ന്നു​കൾ സ്വീക​രി​ക്കുന്ന ഈ കാര്യ​ത്തി​ലും അതു​പോ​ലെ​തന്നെ മററു വൈദ്യ​പ​ര​മായ കാര്യ​ങ്ങ​ളി​ലും യഹോ​വ​യു​ടെ സാക്ഷികൾ ആ ഉത്തരവാ​ദി​ത്വം വളരെ ഗൗരവ​മാ​യി എടുക്കു​ന്നു.—ഒരു ഡോക്ടർ സംഭാവന ചെയ്‌തത്‌. (g93 8/8)

[അടിക്കു​റി​പ്പു​കൾ]

[26-ാം പേജിലെ ചതുരം]

രക്തത്തിൽനിന്നു വേർതി​രി​ച്ചെ​ടു​ക്കാത്ത പ്രതി​രോ​ധ​മ​രു​ന്നു​കൾ

കുട്ടികൾക്കുള്ള പ്രതി​രോ​ധ​മ​രു​ന്നു​കൾ (DPT, OPV, MMR)

ഹിബ്‌ വാക്‌സിൻ

ന്യൂമോവാക്‌സ്‌

ടോക്‌സോയ്‌ഡ്‌സ്‌ (നിർവി​ഷ​കങ്ങൾ)

ഫ്‌ളൂവിനുള്ള മരുന്നു​കൾ

റീകോംബിവാക്‌സ്‌-എച്ച്‌ബി

രക്തത്തിൽനിന്നു വേർതി​രി​ച്ചെ​ടു​ക്കുന്ന പ്രതി​രോ​ധ​മ​രു​ന്നു​കൾ

ഹെപ്‌ററാവാക്‌സ്‌-ബി

റോഗം

ആൻറിടോക്‌സിൻസ്‌ (പ്രതി​വി​ഷങ്ങൾ)

ആൻറിവെനിൻസ്‌ (പാമ്പി​ന്റെ​യും എട്ടുകാ​ലി​യു​ടെ​യും വിഷത്തിന്‌)

ഇമ്യൂൺ ഗ്ലോബു​ലിൻസ്‌ (പലവിധ രോഗ​ങ്ങൾക്ക്‌)

ഗാമ ഗ്ലോബു​ലിൻ

ഹൈപ്പർ ഇമ്യൂൺ സീറം ഔഷധങ്ങൾ (ദൃഷ്ടാ​ന്ത​ത്തിന്‌, പേപ്പട്ടി​വി​ഷ​ത്തി​നെ​തി​രായ സീറം)