അമ്മയുടെ പാലിനെ അനുകൂ​ലി​ക്കുന്ന തെളി​വു​കൾ

നൈജീരിയയിലെ ഉണരുക! ലേഖകൻ

സ്വാ​ദേ​റി​യ​തും എളുപ്പ​ത്തിൽ ദഹിക്കു​ന്ന​തും വളരുന്ന ശിശു​ക്ക​ളു​ടെ എല്ലാ പോഷ​കാ​വ​ശ്യ​ങ്ങ​ളും നിറ​വേ​റ​റു​ന്ന​തു​മായ ഒരു ശിശു ആഹാര​ത്തെ​ക്കു​റി​ച്ചു സങ്കല്‌പി​ക്കുക. രോഗം വരാതെ സൂക്ഷി​ക്കു​ന്ന​തും രോഗം ചികി​ത്സി​ക്കു​ന്ന​തു​മായ ഒരു “അത്ഭുത മരുന്നി”നെക്കു​റിച്ച്‌ ഒന്നു വിഭാ​വ​ന​ചെ​യ്യുക. പണച്ചെ​ല​വി​ല്ലാ​ത്ത​തും ഭൂമു​ഖത്ത്‌ എല്ലായി​ട​ത്തും ഉള്ള കുടും​ബ​ങ്ങൾക്കു നിഷ്‌പ്ര​യാ​സം ലഭ്യമാ​കു​ന്ന​തു​മായ ഒരു ആഹാര​ത്തെ​ക്കു​റി​ച്ചു​തന്നെ.

അസാധ്യം എന്നു നിങ്ങൾ പറയു​മോ? കൊള്ളാം, വ്യവസായ ശാസ്‌ത്ര​ജ്ഞൻമാർ വികസി​പ്പി​ച്ചെ​ടു​ത്ത​ത​ല്ലെ​ങ്കി​ലും അങ്ങനെ​യൊ​രു ഉത്‌പന്നം നിലവി​ലുണ്ട്‌. അത്‌ അമ്മയുടെ പാലാണ്‌.

ഈ അത്ഭുത ഭോജ്യം മനുഷ്യ​വർഗ​ത്തി​ന്റെ ചരി​ത്ര​ത്തി​ലു​ട​നീ​ളം ശിശു​സം​ര​ക്ഷ​ണ​ത്തിന്‌ അത്യന്താ​പേ​ക്ഷി​ത​മാ​യി കണക്കാ​ക്ക​പ്പെ​ട്ടി​രി​ക്കു​ന്നു. ഉദാഹ​ര​ണ​മാ​യി​പ്പ​റ​ഞ്ഞാൽ, ഫറവോ​ന്റെ പുത്രി ശിശു​വാ​യി​രുന്ന മോശയെ കണ്ടപ്പോൾ അവനെ ‘മുലയൂ​ട്ടി വളർത്തു​ന്ന​തിന്‌ ഒരു . . . സ്‌ത്രീ​യെ’ വിളി​ച്ചു​കൊ​ണ്ടു​വ​രു​ന്ന​തിന്‌ അവന്റെ സഹോ​ദ​രി​യെ പറഞ്ഞയ​ച്ച​താ​യി ബൈബിൾ നമ്മോടു പറയുന്നു. (പുറപ്പാട്‌ 2:5-9, പി.ഒ.സി. ബൈ.) പിൽക്കാ​ലത്ത്‌, ഗ്രീക്ക്‌, റോമാ സമുദാ​യ​ങ്ങ​ളിൽ ധനിക​രായ മാതാ​പി​താ​ക്ക​ളു​ടെ കുഞ്ഞു​ങ്ങൾക്കു പാലു കൊടു​ക്കാൻ സാധാ​ര​ണ​മാ​യി നല്ല ആരോ​ഗ്യ​മുള്ള ധാത്രി​മാ​രെ നിയോ​ഗി​ച്ചി​രു​ന്നു. എന്നിരു​ന്നാ​ലും, കഴിഞ്ഞ ദശകങ്ങ​ളിൽ മുലയൂ​ട്ടൽ സമ്പ്രദാ​യം തീരെ കുറഞ്ഞു​പോ​യി​രി​ക്കു​ന്നു. മുലപ്പാൽ ആധുനിക സാങ്കേ​തിക വിദ്യ​യു​ടെ ശിശു ഫോർമു​ല​ക​ളെ​ക്കാൾ തരംതാ​ഴ്‌ന്ന​താ​ണെന്ന്‌ അനേകം ആളുകളെ ചിന്തി​ക്കാ​നി​ട​യാ​ക്കിയ പരസ്യ​ങ്ങ​ളാണ്‌ ഇതിന്റെ ഭാഗി​ക​മായ കാരണം. എന്നാൽ “മുലയൂ​ട്ട​ലാണ്‌ അത്യുത്തമ”മെന്നു കൂടുതൽ കൂടുതൽ അമ്മമാർ തിരി​ച്ച​റി​ഞ്ഞു വരുന്ന​തോ​ടെ ആ പ്രവണത ഇന്നു നേരെ​മ​റി​ച്ചാ​യി​ക്കൊ​ണ്ടി​രി​ക്കുക​യാണ്‌.

അത്യുത്തമ പോഷ​കാ​ഹാ​രം

ശിശു​ക്കളെ പോറ​റാ​നുള്ള സ്രഷ്ടാ​വി​ന്റെ അന്ത:നിർമിത ക്രമീ​ക​ര​ണ​ത്തെ​ക്കാൾ മെച്ചമായ എന്തെങ്കി​ലും ശാസ്‌ത്രജ്ഞർ കണ്ടുപി​ടി​ച്ചി​ട്ടു​ണ്ടോ? ഇല്ല. ഐക്യ​രാ​ഷ്‌ട്ര ശിശു​ക്ഷേ​മ​നി​ധി (യുനി​സെഫ്‌) ഇപ്രകാ​രം പ്രസ്‌താ​വി​ക്കു​ന്നു: “ജീവി​ത​ത്തി​ലെ ആദ്യത്തെ നാലു​മു​തൽ ആറുവ​രെ​യുള്ള മാസങ്ങ​ളിൽ ശിശു​ക്കൾക്കു പററിയ ഏററവും നല്ല ഭക്ഷണവും പാനീ​യ​വും മുലപ്പാൽ ഒന്നുമാ​ത്ര​മാണ്‌.” ജീവി​ത​ത്തി​ലെ ആദ്യത്തെ ഏതാനും മാസങ്ങ​ളി​ലെ ശിശു​വി​ന്റെ ആരോ​ഗ്യ​ക​ര​മായ വളർച്ചക്കു ജീവൽപ്ര​ധാ​ന​മായ എല്ലാ മാംസ്യ​ങ്ങ​ളും വളർച്ച​ക്കുള്ള ഉത്തേജ​ക​ങ്ങ​ളും കൊഴു​പ്പു​ക​ളും കാർബോ​ഹൈ​ഡ്രേ​റ​റു​ക​ളും എൻ​സൈ​മു​ക​ളും ജീവക​ങ്ങ​ളും കേവല മൂലക​ങ്ങ​ളും മുലപ്പാ​ലിൽ അടങ്ങി​യി​രി​ക്കു​ന്നു.

മുലപ്പാൽ നവജാത ശിശു​ക്കൾക്ക്‌ അത്യു​ത്ത​മാ​ഹാ​രം ആണെന്നു മാത്രമല്ല, അവർക്കാ​വ​ശ്യ​മാ​യി​രി​ക്കുന്ന ഏക ആഹാര​വും അതുത​ന്നെ​യാണ്‌. “ഒരു സാധാരണ ശിശു​വി​ന്റെ പോഷ​കാ​വ​ശ്യ​ങ്ങൾ നിറ​വേ​റ​റു​ന്ന​തിന്‌ ജീവി​ത​ത്തി​ലെ ആദ്യത്തെ നാലു​മു​തൽ ആറുവ​രെ​യുള്ള മാസങ്ങ​ളിൽ മുലപ്പാ​ല​ല്ലാ​തെ മറേറ​തെ​ങ്കി​ലും ആഹാര​മോ ദ്രാവ​ക​മോ ജലം പോലു​മോ ആവശ്യ​മില്ല” എന്ന്‌ 1992 മേയിൽ ലോകാ​രോ​ഗ്യ സമ്മേളനം ആവർത്തി​ച്ചു സ്ഥിരീ​ക​രി​ച്ചു. ഉഷ്‌ണ​മുള്ള, വരണ്ട കാലാ​വ​സ്ഥ​ക​ളിൽ പോലും ശിശു​വി​ന്റെ ദാഹം ശമിപ്പി​ക്കു​ന്ന​തി​നു മതിയായ ജലം മുലപ്പാ​ലിൽ അടങ്ങി​യി​ട്ടുണ്ട്‌. കൂടു​ത​ലായ വെള്ളമോ പഞ്ചസാര ചേർത്ത പാനീ​യ​ങ്ങ​ളോ കുപ്പി​യിൽ കുടി​പ്പി​ക്കു​ന്നത്‌ അനാവ​ശ്യ​മാ​ണെന്നു മാത്രമല്ല, കുഞ്ഞ്‌ മുലകു​ടി പൂർണ​മാ​യി നിർത്തു​ന്ന​തിന്‌ അത്‌ ഇടയാ​ക്കു​ക​യും ചെയ്‌തേ​ക്കാം. കാരണം കുപ്പി​യിൽ കുടി​ക്കു​ന്നതു താരത​മ്യേന എളുപ്പ​മാ​യ​തു​കൊ​ണ്ടു കുഞ്ഞുങ്ങൾ അതു സാധാ​ര​ണ​മാ​യി കൂടുതൽ ഇഷ്ടപ്പെ​ടു​ന്നു. തീർച്ച​യാ​യും, ജീവി​ത​ത്തി​ലെ ആദ്യത്തെ ഏതാനും മാസങ്ങൾക്കു​ശേഷം മററു ഭക്ഷണപാ​നീ​യങ്ങൾ ശിശു​വി​ന്റെ ആഹാര​ക്ര​മ​ത്തോ​ടു ക്രമേണ ചേർക്കേ​ണ്ട​താണ്‌.

ശിശു​ക്ക​ളു​ടെ ആരോ​ഗ്യ​ക​ര​മായ വളർച്ച​യും വികാ​സ​വും മെച്ച​പ്പെ​ടു​ത്തു​ന്ന​തി​നു ഘടകപ​ദാർഥങ്ങൾ ഇത്രയ്‌ക്കും സമീകൃ​ത​മാ​യുള്ള മറെറാ​രു വസ്‌തു​വു​മില്ല. പുനരു​ത്‌പാ​ദക ആരോ​ഗ്യം—ആഗോള പ്രശ്‌നങ്ങൾ [ഇംഗ്ലീഷ്‌] എന്ന പുസ്‌തകം ഇപ്രകാ​രം പ്രസ്‌താ​വി​ക്കു​ന്നു: “മുലപ്പാ​ലി​നു പകരമാ​യി ഒരു വസ്‌തു കണ്ടുപി​ടി​ക്കാ​നുള്ള ശ്രമങ്ങൾ വിജയി​ച്ചി​ട്ടില്ല. ശിശു​പോ​ഷണം സംബന്ധിച്ച ചരി​ത്ര​ഗ്ര​ന്ഥ​ങ്ങ​ളി​ലാ​ക​മാ​നം മുലകു​ടി​ക്കുന്ന ശിശു​ക്ക​ളെ​ക്കാൾ കുടി​ക്കാ​ത്ത​വർക്ക്‌ രോഗ​ബാ​ധ​യു​ടെ​യും വികല​പോ​ഷ​ണ​ത്തി​ന്റെ​യും വമ്പിച്ച അപകട​സാ​ധ്യ​ത​യു​ണ്ടെ​ന്ന​തി​ന്റെ തെളി​വു​ക​ളുണ്ട്‌.”

മുലയൂ​ട്ടൽ ജീവൻ രക്ഷിക്കു​ന്നു

ലോകാ​രോ​ഗ്യ സംഘടന (ഡബ്ലിയു​എച്ച്‌ഒ) പറയു​ന്ന​ത​നു​സ​രിച്ച്‌, എല്ലാ അമ്മമാ​രും തങ്ങളുടെ കുഞ്ഞു​ങ്ങളെ ആദ്യത്തെ നാലു​മു​തൽ ആറുവ​രെ​യുള്ള മാസങ്ങ​ളിൽ മറെറാ​ന്നും കൊടു​ക്കാ​തെ മുലയൂ​ട്ടി​യി​രു​ന്നെ​ങ്കിൽ ലോക​വ്യാ​പ​ക​മാ​യുള്ള പത്തു ലക്ഷം ശിശു മരണങ്ങൾ ഓരോ വർഷവും തടയാ​മാ​യി​രു​ന്നു. “ഒരു ദരിദ്ര സമൂഹ​ത്തി​ലെ കുപ്പി​പ്പാൽ കുടി​ക്കുന്ന ഒരു കുഞ്ഞിന്‌ മുലപ്പാൽ മാത്രം കുടി​ക്കുന്ന ഒരു കുഞ്ഞി​നെ​ക്കാൾ അതിസാ​രം നിമിത്തം മരണമ​ട​യാൻ ഏകദേശം 15 മടങ്ങും ന്യൂ​മോ​ണിയ നിമിത്തം മരിക്കാൻ 4 മടങ്ങും കൂടുതൽ സാധ്യ​ത​യുണ്ട്‌” എന്ന്‌ 1992-ലെ ലോക​ത്തി​ലെ കുട്ടി​ക​ളു​ടെ അവസ്ഥ [ഇംഗ്ലീഷ്‌] എന്ന യുനി​സെഫ്‌ റിപ്പോർട്ടു പ്രസ്‌താ​വി​ക്കു​ന്നു.

എന്തു​കൊ​ണ്ടാണ്‌ ഇങ്ങനെ സംഭവി​ക്കു​ന്നത്‌? ഒരു കാരണം പൊടി​പ്പാൽ അമ്മയുടെ പാലി​നെ​ക്കാൾ പോഷ​ക​പ​ര​മാ​യി രണ്ടാം​ത​ര​മാ​ണെന്നു മാത്രമല്ല, അതു പലപ്പോ​ഴും അശുദ്ധ ജലം ഉപയോ​ഗിച്ച്‌ അമിത​മാ​യി നേർപ്പി​ക്കു​ക​യും അണുനിർമാർജനം ചെയ്യാത്ത കുപ്പി​ക​ളി​ലാ​ക്കി കൊടു​ക്കു​ക​യും ചെയ്യുന്നു എന്നതാണ്‌. അങ്ങനെ ബാക്ടീ​രി​യ​യും വൈറ​സു​ക​ളും കുപ്പി​പ്പാ​ലി​നെ എളുപ്പ​ത്തിൽ മലിന​മാ​ക്കു​ന്നു. ഈ ബാക്ടീ​രി​യ​യും വൈറ​സു​ക​ളു​മാണ്‌ വികസ്വര രാജ്യ​ങ്ങ​ളി​ലെ കുട്ടി​ക​ളു​ടെ മുഖ്യ കൊല​യാ​ളി​ക​ളായ അതിസാ​ര​ത്തി​നും ശ്വാസ​കോശ സംബന്ധ​മായ രോഗ​ബാ​ധ​കൾക്കും ഇടയാ​ക്കു​ന്നത്‌. നേരെ​മ​റിച്ച്‌, മുലയിൽനി​ന്നു നേരിട്ടു വരുന്ന പാൽ പെട്ടെന്നു മലിനീ​ക​രി​ക്ക​പ്പെ​ടു​ന്നില്ല, കൂട്ടി​ക്ക​ലർത്തേണ്ട ആവശ്യ​മില്ല, അഴുക്കാ​കു​ന്നില്ല, കൂടുതൽ നേർത്തു​പോ​കു​ന്നു​മില്ല.

മുലയൂ​ട്ടൽ ജീവനെ രക്ഷിക്കു​ന്ന​തി​ന്റെ രണ്ടാമത്തെ കാരണം രോഗ​ത്തി​നെ​തി​രെ ശിശു​വി​നെ സംരക്ഷി​ക്കുന്ന ആൻറി​ബോ​ഡി​കൾ അമ്മയുടെ പാലിൽ അടങ്ങി​യി​രി​ക്കു​ന്നു എന്നതാണ്‌. അതിസാ​ര​മോ മററു രോഗ​ബാ​ധ​ക​ളോ ഉണ്ടായാൽ പോലും മുലകു​ടി​ക്കുന്ന ശിശു​ക്ക​ളിൽ അവ സാധാ​ര​ണ​മാ​യി കഠിന​പ്പെ​ടാ​റില്ല, ചികിത്സ എളുപ്പ​വു​മാണ്‌. മുലകു​ടി​ക്കുന്ന കുഞ്ഞു​ങ്ങൾക്കു ദന്ത രോഗ​വും ക്യാൻസ​റും പ്രമേ​ഹ​വും അലർജി​ക​ളും വരാൻ പ്രവണത കുറവു​ള്ള​താ​യി കാണ​പ്പെ​ടു​ന്നു എന്നും ഗവേഷകർ അഭി​പ്രാ​യ​പ്പെ​ടു​ന്നു. കൂടാതെ ശക്തിയാ​യി വലി​ക്കേണ്ടി വരുന്ന​തു​കൊണ്ട്‌ മുലയൂ​ട്ടൽ ശിശു​ക്ക​ളു​ടെ മുഖത്തുള്ള അസ്ഥിക​ളു​ടെ​യും പേശി​ക​ളു​ടെ​യും ശരിയായ വളർച്ചയെ ത്വരി​ത​പ്പെ​ടു​ത്തി​യേ​ക്കാം.

അമ്മമാർക്കുള്ള പ്രയോ​ജ​ന​ങ്ങൾ

മുലയൂ​ട്ടൽ കുഞ്ഞിനു മാത്രമല്ല, അമ്മയ്‌ക്കും പ്രയോ​ജനം ചെയ്യുന്നു. ഒരു സംഗതി, കുഞ്ഞിന്റെ മുലനു​കരൽ പാലിന്റെ ഉത്‌പാ​ദ​ന​ത്തി​നും ഒഴുക്കി​നും മാത്രമല്ല ഗർഭാ​ശ​യ​ത്തി​ന്റെ സങ്കോ​ച​ന​ത്തി​നും ഇടയാ​ക്കുന്ന ഓക്‌സി​റേ​റാ​സിൻ എന്ന ഹോർമോ​ണി​ന്റെ ഉത്‌പാ​ദ​നത്തെ ഉത്തേജി​പ്പി​ക്കു​ന്നു. പ്രസവ​ത്തി​നു​ശേഷം ഗർഭാ​ശയം വേഗത്തിൽ സങ്കോ​ചി​ക്കു​മ്പോൾ നീണ്ടകാ​ല​ത്തേ​ക്കുള്ള രക്തസ്രാ​വ​ത്തി​നു സാധ്യത കുറവാണ്‌. കൂടാതെ മുലയൂ​ട്ടൽ അണ്ഡരൂ​പ​വൽക്ക​ര​ണ​ത്തി​ന്റെ പുനരാ​രം​ഭ​ത്തി​നും ആർത്തവ​ത്തി​നും കാലതാ​മസം വരുത്തു​ന്നു. ഇത്‌ അടുത്ത ഗർഭധാ​ര​ണത്തെ താമസി​പ്പി​ക്കു​ന്നു. ഗർഭധാ​ര​ണ​ങ്ങൾക്കി​ട​യി​ലെ നീണ്ട ഇടവേ​ളകൾ കൂടുതൽ ആരോ​ഗ്യ​മുള്ള അമ്മമാ​രെ​യും കുഞ്ഞു​ങ്ങ​ളെ​യും അർഥമാ​ക്കു​ന്നു.

മുലയൂ​ട്ടൽ അണ്ഡാശ​യ​ത്തി​ലെ​യും സ്‌തന​ത്തി​ലെ​യും അർബു​ദ​ത്തി​ന്റെ അപകട​സാ​ധ്യത കുറയ്‌ക്കു​ന്നു എന്നുള്ള​താ​ണു സ്‌ത്രീ​കൾക്കുള്ള മറെറാ​രു പ്രയോ​ജനം. കുഞ്ഞിനെ മുലയൂ​ട്ടുന്ന ഒരു സ്‌ത്രീ​ക്കു സ്‌തനാർബു​ദ​ത്തി​നുള്ള അപകട​സാ​ധ്യത അവൾ മുലയൂ​ട്ടി​യി​ല്ലെ​ങ്കിൽ ഉണ്ടാകു​മാ​യി​രു​ന്ന​തി​ന്റെ പകുതി​യാ​ണെന്നു ചില വിദഗ്‌ധർ പറയുന്നു.

മുലയൂ​ട്ട​ലി​ന്റെ പ്രയോ​ജ​നങ്ങൾ പട്ടിക​പ്പെ​ടു​ത്തു​മ്പോൾ അമ്മയും കുഞ്ഞും തമ്മിലുള്ള ഉററബന്ധം നമുക്ക്‌ അവഗണി​ക്കാ​വു​ന്നതല്ല. മുലയൂ​ട്ട​ലിൽ ആഹാരം കൊടു​ക്കൽ മാത്രമല്ല അധര സമ്പർക്ക​വും ചർമ സ്‌പർശ​വും ശാരീ​രി​ക​മായ ചൂടും ഉൾപ്പെ​ട്ടി​രി​ക്കു​ന്ന​തി​നാൽ അമ്മയ്‌ക്കും കുഞ്ഞി​നും ഇടയിൽ ഒരു സുപ്ര​ധാന ബന്ധം കരുപ്പി​ടി​ച്ചു​വ​രു​ന്ന​തി​നും ഒരുപക്ഷേ കുട്ടി വൈകാ​രി​ക​വും സാമൂ​ഹി​ക​വു​മാ​യി വികാസം പ്രാപി​ക്കു​ന്ന​തി​നും അതു കാരണ​മാ​കു​ന്നു.

മുലയൂ​ട്ടാൻ തീരു​മാ​ന​മെ​ടു​ക്കൽ

ചില പ്രത്യേക ആവശ്യങ്ങൾ നിറ​വേ​റ​റു​ന്ന​പക്ഷം മിക്ക അമ്മമാ​രും തങ്ങളുടെ കുഞ്ഞു​ങ്ങൾക്കു മതിയായ പാൽ നൽകാൻ ശാരീ​രി​ക​മാ​യി പ്രാപ്‌ത​രാണ്‌. ജനനത്തി​നു​ശേഷം എത്രയും പെട്ടെന്ന്‌ അതായത്‌, കുഞ്ഞിനെ പ്രസവിച്ച ശേഷമുള്ള ആദ്യത്തെ മണിക്കൂ​റി​നു​ള്ളിൽ മുലയൂ​ട്ടൽ ആരംഭി​ച്ചി​രി​ക്കണം. (ആദ്യത്തെ മുലപ്പാ​ലായ കൊള​സ്‌ട്രം എന്നു വിളി​ക്കുന്ന കട്ടിയുള്ള മഞ്ഞ പദാർഥം ശിശു​ക്കൾക്കു ഗുണക​ര​മാണ്‌. അത്‌ അവരെ രോഗ​ബാ​ധ​യിൽനി​ന്നു സംരക്ഷി​ക്കു​ക​യും ചെയ്യുന്നു.) അതിനു​ശേഷം, ഒരു നിശ്ചിത ക്രമം അനുസ​രി​ച്ചാ​യി​രി​ക്കാ​തെ, രാത്രി​യി​ലുൾപ്പെടെ കുഞ്ഞു​ങ്ങ​ളു​ടെ ആവശ്യം അനുസ​രിച്ച്‌ അവരെ കുടി​പ്പി​ക്കേ​ണ്ട​താണ്‌. മുലയൂ​ട്ടു​മ്പോൾ കുഞ്ഞിനെ ശരിയായ രീതി​യിൽ പിടി​ക്കു​ന്ന​തും പ്രധാ​ന​മാണ്‌. അനുഭ​വ​പ​രി​ച​യ​വും അനുക​മ്പ​യും ഉള്ള ഒരു ഉപദേ​ശ​കക്ക്‌ ഈ കാര്യ​ങ്ങ​ളിൽ സഹായം നൽകാൻ കഴിയും.

തന്റെ കുഞ്ഞിനെ മുലയൂ​ട്ട​ണ​മോ വേണ്ടയോ എന്നുള്ള ഒരു അമ്മയുടെ തീരു​മാ​നം തീർച്ച​യാ​യും അതു ചെയ്യു​ന്ന​തി​നുള്ള അവളുടെ ശാരീ​രിക പ്രാപ്‌തി​യെ മാത്രമല്ല ആശ്രയി​ച്ചി​രി​ക്കു​ന്നത്‌. 1992-ലെ ലോക​ത്തി​ലെ കുട്ടി​ക​ളു​ടെ അവസ്ഥ ഇപ്രകാ​രം റിപ്പോർട്ടു ചെയ്യുന്നു: “തങ്ങളുടെ കുഞ്ഞു​ങ്ങൾക്കു സാധ്യ​മായ ഏററവും നല്ല തുടക്ക​മി​ട്ടു​കൊ​ടു​ക്കാൻ അമ്മമാർക്കു കഴി​യേ​ണ്ട​തിന്‌ അവർക്ക്‌ ആശുപ​ത്രി​ക​ളു​ടെ പിന്തുണ ആവശ്യ​മാണ്‌; എന്നാൽ അവർക്കു മുലയൂ​ട്ടൽ തുടർന്നു​കൊ​ണ്ടു​പോ​ക​ണ​മെ​ങ്കിൽ തൊഴി​ലു​ട​മ​ക​ളു​ടെ​യും തൊഴി​ലാ​ളി സംഘട​ന​ക​ളു​ടെ​യും സമൂഹ​ങ്ങ​ളു​ടെ​യും—മനുഷ്യ​രു​ടെ​യും പിന്തുണ കൂടെ ആവശ്യ​മാ​യി​രി​ക്കും.” (g93 9/22)

[13-ാം പേജിലെ ചതുരം]

വികസ്വര ലോക​ത്തി​ലെ മുലയൂ​ട്ടൽ

1. ഒരു കുഞ്ഞിന്റെ ജീവി​ത​ത്തി​ലെ ആദ്യത്തെ നാലു​മു​തൽ ആറുവ​രെ​യുള്ള മാസങ്ങ​ളിൽ സാധ്യ​മായ ഏററവും നല്ല ഭക്ഷണപാ​നീ​യം മുലപ്പാൽ ഒന്നുമാ​ത്ര​മാണ്‌.

2. ജനനത്തി​നു ശേഷം എത്രയും പെട്ടെന്നു ശിശുക്കൾ മുലകു​ടി ആരംഭി​ക്കേ​ണ്ട​താണ്‌. സത്യത്തിൽ എല്ലാ അമ്മമാർക്കും തങ്ങളുടെ കുഞ്ഞു​ങ്ങളെ മുലയൂ​ട്ടാൻ കഴിയും.

3. കുഞ്ഞിന്റെ ആവശ്യ​ത്തി​നു മതിയായ മുലപ്പാൽ ഉത്‌പാ​ദി​പ്പി​ക്കു​ന്ന​തി​നു കൂടെ​ക്കൂ​ടെ കുടി​പ്പി​ക്കേ​ണ്ട​തുണ്ട്‌.

4. കുപ്പി​പ്പാൽ കൊടു​ക്കു​ന്നത്‌ ഗുരു​ത​ര​മായ രോഗ​ത്തി​ലേ​ക്കും മരണത്തി​ലേ​ക്കും നയി​ച്ചേ​ക്കാം.

5. മുലയൂ​ട്ടൽ കുഞ്ഞിന്റെ രണ്ടാമത്തെ വയസ്സി​ലേ​ക്കും സാധ്യ​മെ​ങ്കിൽ അതിൽ കൂടുതൽ നാള​ത്തേ​ക്കും തുട​രേ​ണ്ട​തുണ്ട്‌.

ഉറവിടം: യുനി​സെഫ്‌, ഡബ്ലിയു​എച്ച്‌ഒ, യുനെ​സ്‌കോ എന്നീ സംഘട​നകൾ ചേർന്നു പ്രസി​ദ്ധീ​ക​രിച്ച ജീവി​ത​ത്തി​നു​വേ​ണ്ടി​യുള്ള യാഥാർഥ്യ​ങ്ങൾ [ഇംഗ്ലീഷ്‌].

[14-ാം പേജിലെ ചതുരം]

മുലയൂട്ടലും എയ്‌ഡ്‌സും

ലോകാ​രോ​ഗ്യ സംഘട​ന​യും യുനി​സെ​ഫും, 1992 ഏപ്രിൽ അവസാനം എയ്‌ഡ്‌സും മുലയൂ​ട്ട​ലും തമ്മിലുള്ള ബന്ധം പരിഗ​ണി​ക്കു​ന്ന​തി​നാ​യി വിദഗ്‌ധ​രു​ടെ ഒരു അന്താരാ​ഷ്‌ട്ര സംഘത്തെ വിളി​ച്ചു​കൂ​ട്ടി. എയ്‌ഡ്‌സു സംബന്ധിച്ച ലോകാ​രോ​ഗ്യ സംഘട​ന​യു​ടെ ആഗോള പരിപാ​ടി​യു​ടെ ഡയറക്ട​റായ ഡോ. മൈക്കിൾ മേഴ്‌സൺ യോഗ​ത്തി​ന്റെ ആവശ്യം വിശദീ​ക​രി​ച്ചു. അദ്ദേഹം ഇപ്രകാ​രം പറഞ്ഞു: “മുലയൂ​ട്ടൽ കുട്ടി​യു​ടെ അതിജീ​വ​ന​ത്തിന്‌ അത്യന്താ​പേ​ക്ഷി​ത​മായ ഒരു ഘടകം ആണ്‌. മുലയൂ​ട്ടി​യാൽ കുഞ്ഞ്‌ എയ്‌ഡ്‌സ്‌ ബാധിച്ചു മരിക്കാ​നുള്ള അപകട​സാ​ധ്യത ഉണ്ടെന്നു​വ​രി​കി​ലും മുലയൂ​ട്ടി​യി​ല്ലെ​ങ്കിൽ കുഞ്ഞ്‌ മററു കാരണ​ങ്ങ​ളാൽ മരിക്കാ​നുള്ള സാധ്യ​ത​യു​ണ്ടെന്നു വിവേ​ചി​ച്ച​റി​യേ​ണ്ട​തുണ്ട്‌.”

ലോകാ​രോ​ഗ്യ സംഘടന പ്രസ്‌താ​വി​ക്കു​ന്ന​ത​നു​സ​രിച്ച്‌ എച്ച്‌ഐവി ബാധി​ത​രായ അമ്മമാർക്കു ജനിക്കുന്ന കുഞ്ഞു​ങ്ങ​ളിൽ ഏതാണ്ടു മൂന്നി​ലൊന്ന്‌ രോഗ​ബാ​ധി​ത​രാ​യി​ത്തീ​രു​ന്നു. മാതാ​വിൽനി​ന്നു ശിശു​വി​ലേ​ക്കുള്ള രോഗ​സം​ക്ര​മണം നടക്കു​ന്നത്‌ അധിക​വും ഗർഭധാ​രണ സമയത്തും പ്രസവ​സ​മ​യ​ത്തും ആണെങ്കി​ലും മുലയൂ​ട്ടു​മ്പോ​ഴും അതു സംഭവി​ക്കാം എന്നതിനു തെളി​വുണ്ട്‌. എന്നിരു​ന്നാ​ലും, ലോകാ​രോ​ഗ്യ സംഘടന ഇപ്രകാ​രം പ്രസ്‌താ​വി​ക്കു​ന്നു, “എച്ച്‌ഐവി ബാധി​ത​രായ അമ്മമാർ മുലയൂ​ട്ടുന്ന കുഞ്ഞു​ങ്ങ​ളിൽ ബഹുഭൂ​രി​പ​ക്ഷ​വും മുലയൂ​ട്ട​ലി​ലൂ​ടെ രോഗ​ബാ​ധി​ത​രാ​കു​ന്നില്ല.”

വിദഗ്‌ധ​രു​ടെ സമിതി ഇപ്രകാ​രം നിഗമനം ചെയ്‌തു: “ശിശു​മ​ര​ണ​ത്തി​ന്റെ മുഖ്യ​കാ​ര​ണങ്ങൾ സാം​ക്ര​മിക രോഗ​ങ്ങ​ളും വികല​പോ​ഷ​ണ​വും ആയിരി​ക്കു​ക​യും ശിശു​മ​ര​ണ​നി​രക്ക്‌ ഉയർന്നി​രി​ക്കു​ക​യും ചെയ്യു​ന്നി​ടത്തെ എച്ച്‌ഐവി ബാധി​ത​രുൾപ്പെ​ടെ​യുള്ള ഗർഭി​ണി​കളെ മുഖ്യ​മാ​യി ബുദ്ധ്യു​പ​ദേ​ശി​ക്കേ​ണ്ടത്‌ കുഞ്ഞു​ങ്ങളെ മുലയൂ​ട്ടാ​നാ​യി​രി​ക്കണം. ഇതിന്റെ കാരണം മുലപ്പാ​ലി​ലൂ​ടെ എച്ച്‌ഐവി ബാധക്കുള്ള അവരുടെ കുഞ്ഞിന്റെ സാധ്യത മുലയൂ​ട്ടു​ന്നി​ല്ലെ​ങ്കിൽ മററു കാരണ​ങ്ങ​ളാൽ മരണമ​ട​യു​ന്ന​തി​നുള്ള സാധ്യ​ത​യെ​ക്കാൾ കുറവാ​യി​രു​ന്നേ​ക്കാ​മെ​ന്ന​താണ്‌.

“നേരെ​മ​റിച്ച്‌, ശിശു​മ​ര​ണ​ത്തി​ന്റെ മുഖ്യ​കാ​രണം സാം​ക്ര​മിക രോഗ​ങ്ങ​ള​ല്ലാ​തി​രി​ക്ക​യും ശിശു​മ​ര​ണ​നി​രക്കു താഴ്‌ന്നി​രി​ക്കു​ക​യും ചെയ്യുന്ന ചുററു​പാ​ടു​ക​ളിൽ, എച്ച്‌ഐവി ബാധി​ച്ചി​ട്ടു​ള്ള​താ​യി അറിയ​പ്പെ​ടുന്ന ഗർഭി​ണി​കളെ സാധാ​ര​ണ​മാ​യി ബുദ്ധ്യു​പ​ദേ​ശി​ക്കേ​ണ്ടത്‌ തങ്ങളുടെ കുഞ്ഞു​ങ്ങളെ മുലയൂ​ട്ടു​ന്ന​തി​നു പകരം സുരക്ഷി​ത​മായ മറേറ​തെ​ങ്കി​ലും രീതി​യിൽ പോറ​റാ​നാ​യി​രി​ക്കണം.”