വാഴപ്പഴം—ഒരു വിശിഷ്ട ഫലം

ഹോണ്ടുറസിലെ ഉണരുക! ലേഖകൻ

ഗ്രീക്കു​കാ​രും അറബി​ക​ളും അതിനെ “വിശി​ഷ്ട​മായ ഫലവൃക്ഷം” എന്നു വിളിച്ചു. പൊ.യു.മു. 327-ൽ മഹാനായ അലക്‌സാ​ണ്ട​റി​ന്റെ സൈന്യ​ങ്ങൾ ഇത്‌ ഇൻഡ്യ​യിൽ കണ്ടെത്തി. ഒരു പഴയ കഥ പറയു​ന്ന​ത​നു​സ​രിച്ച്‌ ഭാരത​ത്തി​ലെ ഋഷിവര്യൻമാർ അതിന്റെ തണലിൽ വിശ്ര​മി​ക്കു​ക​യും അതിന്റെ ഫലം ഭക്ഷിക്കു​ക​യും ചെയ്‌തി​രു​ന്നു. അതു​കൊണ്ട്‌ “ജ്ഞാനി​ക​ളു​ടെ ഫലം” എന്ന്‌ അതു വിളി​ക്ക​പ്പെട്ടു. അത്‌ എന്താണ്‌? അതോ, വാഴപ്പഴം!

എന്നാൽ വാഴപ്പഴം ഏഷ്യയിൽനി​ന്നു കരീബി​യൻ പ്രദേ​ശത്ത്‌ എത്തിയത്‌ എങ്ങനെ​യാണ്‌? മുൻകാ​ല​ങ്ങ​ളി​ലെ അറബി​ക​ളായ വ്യാപാ​രി​കൾ വാഴത്ത​ടകൾ ഏഷ്യയിൽനിന്ന്‌ ആഫ്രി​ക്ക​യു​ടെ പൂർവ​തീ​രത്ത്‌ എത്തിച്ചു. ആ പ്രദേ​ശത്ത്‌ വാഴ വളരു​ന്നതു കണ്ട പോർട്ടു​ഗീ​സു​കാ​രായ പര്യ​വേ​ക്ഷകർ 1482-ൽ അതിന്റെ തടകൾ കുറെ കൈവ​ശ​മാ​ക്കി. അതിന്‌ ബനാന [വാഴയ്‌ക്ക] എന്ന ആഫ്രിക്കൻ പേരു​തന്നെ സ്വീക​രിച്ച അവർ അതു കാനറി ദ്വീപു​ക​ളി​ലെ പോർട്ടു​ഗീസ്‌ കോള​നി​ക​ളിൽ എത്തിച്ചു. അടുത്ത പടി അററ്‌ലാൻറി​ക്കി​നു കുറുകെ പുതിയ ലോക​ത്തേ​ക്കുള്ള ഒരു യാത്ര​യാ​യി​രു​ന്നു. കൊള​മ്പ​സി​ന്റെ സമു​ദ്ര​പ​ര്യ​വേക്ഷണ യാത്ര​കൾക്കും കുറെ വർഷങ്ങൾക്കു ശേഷം 1516-ലാണ്‌ അത്‌ അവി​ടെ​യെ​ത്തി​യത്‌. സ്‌പാ​നീഷ്‌ മിഷന​റി​മാർ വാഴ​ച്ചെ​ടി​കൾ ദ്വീപു​ക​ളി​ലേ​ക്കും ഉഷ്‌ണ​മേ​ഖ​ല​യിൽ കിടക്കുന്ന കരീബി​യൻ വൻകര​യി​ലേ​ക്കും എത്തിച്ചു. ഇപ്രകാ​രം, മധ്യ അമേരി​ക്ക​യി​ലും തെക്കേ അമേരി​ക്ക​യി​ലും എത്തുന്ന​തിന്‌ ഈ വിശിഷ്ട ഫലസസ്യ​ത്തിന്‌ ലോക​ത്തി​നു ചുററും പകുതി ദൂരം സഞ്ചരി​ക്കേണ്ടി വന്നു.

1690-ൽ വാഴപ്പഴം ആദ്യമാ​യി കരീബി​യൻ ദ്വീപു​ക​ളിൽനിന്ന്‌ ന്യൂ ഇംഗ്ലണ്ടി​ലെ​ത്തി​യെന്ന്‌ റിപ്പോർട്ടു ചെയ്യ​പ്പെ​ടു​ന്നു. പ്യൂരി​റ​റൻമാർ ഈ വിചിത്ര ഫലം പുഴു​ങ്ങി​യെ​ങ്കി​ലും അതവർക്ക്‌ ഇഷ്ടമാ​യില്ല. തെക്കേ അമേരി​ക്ക​യി​ലെ​യും മധ്യ അമേരി​ക്ക​യി​ലെ​യും രാജ്യ​ങ്ങ​ളി​ലും അതു​പോ​ലെ​തന്നെ മററ്‌ ഉഷ്‌ണ​മേ​ഖലാ രാജ്യ​ങ്ങ​ളി​ലും ഉള്ള ലക്ഷക്കണ​ക്കി​നാ​ളു​കൾ പച്ച വാഴയ്‌ക്ക പുഴുങ്ങി സ്വാ​ദോ​ടെ ഭക്ഷിക്കു​ന്നു.

വാഴ​ത്തോ​ട്ട​ങ്ങൾ

1870-നും 1880-നും ഇടയിൽ വാഴയ്‌ക്ക കയററു​മതി ചെയ്യു​ന്ന​തി​ന്റെ സാധ്യത യൂറോ​പ്പി​ലെ​യും വടക്കേ അമേരി​ക്ക​യി​ലെ​യും പലതരം വ്യാപാ​രി​ക​ളു​ടെ താത്‌പ​ര്യ​ത്തെ ഉണർത്തി. അവർ കമ്പനികൾ രൂപവ​ത്‌ക​രി​ക്കു​ക​യും ഫിൻകാസ്‌ എന്നു വിളി​ക്ക​പ്പെ​ടുന്ന വാഴ​ത്തോ​ട്ടങ്ങൾ നട്ടുപി​ടി​പ്പി​ക്കു​ക​യും ചെയ്‌തു. ഈ ഉദ്ദേശ്യ​ത്തിൽ തൊഴി​ലാ​ളി​ക​ളും എഞ്ചിനി​യർമാ​രും വനം വെട്ടി​ത്തെ​ളി​ക്കു​ക​യും റോഡു​കൾ നിർമി​ക്കു​ക​യും തീവണ്ടി​പ്പാ​ത​യും വാർത്താ​വി​നി​മയ മാർഗ​ങ്ങ​ളും സ്ഥാപി​ക്കു​ക​യും ചെയ്യേ​ണ്ടി​യി​രു​ന്നു. തൊഴി​ലാ​ളി​കൾക്കും അവരുടെ കുടും​ബ​ങ്ങൾക്കും വേണ്ടി വീടു​ക​ളും വിദ്യാ​ല​യ​ങ്ങ​ളും ആശുപ​ത്രി​ക​ളു​മുള്ള ഗ്രാമങ്ങൾ പണിതു. ലോക​ത്തി​നു ചുററും വാഴപ്പഴം എത്തിക്കാൻ നീരാവി കൊ​ണ്ടോ​ടുന്ന കപ്പലുകൾ സജ്ജീകൃ​ത​മാ​യി. ഈ വ്യവസാ​യം വളർന്ന​തോ​ടെ കമ്പനികൾ വാഴ നട്ടുവ​ളർത്തുന്ന രാജ്യ​ങ്ങ​ളിൽ കൂടുതൽ സ്ഥലം വാങ്ങി.

വടക്കേ അമേരി​ക്ക​യിൽ കഴിക്കുന്ന വാഴപ്പ​ഴ​ത്തി​ന്റെ 90 ശതമാ​ന​വും ഇന്നു പ്രദാനം ചെയ്യു​ന്നത്‌ ലാററി​ന​മേ​രി​ക്കൻ രാജ്യ​ങ്ങ​ളാണ്‌. കയററു​മതി നടത്തുന്ന പ്രമു​ഖ​രാ​ജ്യം ബ്രസീ​ലാണ്‌. ഈ പട്ടിക​യിൽ ഹോണ്ടു​റ​സി​ന്റെ സ്ഥാനം ആറാമ​താണ്‌. ഈ രാജ്യം വർഷം​തോ​റും നൂറു കോടി കിലോ​ഗ്രാം വാഴയ്‌ക്ക കയററു​മതി ചെയ്യുന്നു.

വാഴ വളരുന്ന വിധം

വാഴ​ച്ചെടി ഒരു വൃക്ഷമല്ല. ഇതിനു വൃക്ഷത​ന്തു​ക്ക​ളില്ല. പകരം ഒരു പനപോ​ലെ തോന്നി​ക്കുന്ന ഇത്‌ ഒരു വമ്പൻ സസ്യമാണ്‌. കാലാ​വ​സ്ഥ​യും മണ്ണും ഈ ചെടി​യു​ടെ വളർച്ച​യെ​യും വലിപ്പ​ത്തെ​യും നിർണ​യി​ക്കു​ന്നു. ചൂടുള്ള, ഈർപ്പ​മുള്ള കാലാ​വ​സ്ഥ​ക​ളിൽ വാഴ​ച്ചെ​ടി​കൾ ഏററവും നന്നായി വളരുന്നു. ഫലപു​ഷ്ട​വും മണൽനി​റ​ഞ്ഞ​തും നല്ല നീർവാർച്ച​യു​ള്ള​തു​മായ എക്കൽമ​ണ്ണിൽ അതു തഴച്ചു​വ​ള​രു​ന്നു. നല്ല വളർച്ച ലഭിക്കു​ന്ന​തിന്‌ താപനില ഒരു സമയത്തും 20 ഡിഗ്രി സെൽഷ്യ​സി​നു താഴെ പോകാൻ പാടില്ല.

ഒരു കൃഷി തുടങ്ങു​ന്ന​തിന്‌ വളർച്ച​യെ​ത്തിയ വാഴക​ളു​ടെ കാണ്ഡത്തി​ന്റെ മണ്ണിന​ടി​യി​ലുള്ള ഭാഗത്തു​നിന്ന്‌ അടർത്തി​യെ​ടു​ക്കുന്ന വാഴക്ക​ന്നു​കൾ എന്നറി​യ​പ്പെ​ടുന്ന വാഴവി​ത്തു​കൾ നടേണ്ട​തുണ്ട്‌. അഞ്ചു മീററർ അകലത്തി​ലാ​യി ഒരടി ആഴത്തിൽ കുഴി​യെ​ടുത്ത്‌ ഈ വിത്തുകൾ അവയിൽ നടുന്നു. മൂന്നാ​ലാ​ഴ്‌ച​ക്കു​ള്ളിൽ പച്ചനി​റ​ത്തി​ലുള്ള മുളകൾ പൊട്ടാൻ തുടങ്ങും. അവ വളർന്നു വരു​മ്പോൾ ഇറുകെ ചുററി​യി​രി​ക്കുന്ന പച്ച ഇലകൾ നിവർന്ന്‌ വിടരും. വാഴ​ച്ചെ​ടി​കൾ വളരെ വേഗം വളരും—ദിവസ​വും ഏതാണ്ട്‌ മൂന്നു സെൻറി​മീ​റ​റ​റോ​ളം. പത്തു മാസത്തി​നു​ശേഷം പൂർണ വളർച്ച​യെ​ത്തുന്ന വാഴ ഒരു പനയോ​ടു സാദൃ​ശ്യ​മാണ്‌. അതിന്‌ മൂന്നു മീററർമു​തൽ ആറു മീററർവരെ ഉയരം കാണും.

പൂർണ​വ​ളർച്ച​യെ​ത്തിയ വാഴ​ച്ചെ​ടി​യിൽ, ഒരു ആവരണം പോലെ വർത്തി​ക്കുന്ന ഇലകൾക്കി​ട​യിൽ പർപ്പിൾ നിറത്തി​ലുള്ള ചെറിയ ഇലക​ളോ​ടൊ​പ്പം ഒരു വലിയ മുകു​ള​വും അങ്കുരി​ക്കു​ന്നു. അതിനു​ശേഷം ചെറു പൂക്കു​ലകൾ ഉണ്ടാകു​ന്നു. ഒരു വാഴ ഒരു കുല മാത്രമേ പുറ​പ്പെ​ടു​വി​ക്കു​ന്നു​ള്ളൂ. 30 മുതൽ 50 വരെ കിലോ തൂക്കമുള്ള അതിന്‌ 9-നും 16-നും ഇടയ്‌ക്കു പടലകൾ ഉണ്ടായി​രി​ക്കും. ഒരു കൈ എന്നു വിളി​ക്ക​പ്പെ​ടുന്ന ഓരോ പടലയി​ലും 10 മുതൽ 20 വരെ വാഴയ്‌ക്ക ഉണ്ടായി​രി​ക്കും. അതു​കൊണ്ട്‌ വാഴയ്‌ക്കാ​യ്‌ക്കു വിരലു​കൾ എന്നു പറയും.

വാഴയ്‌ക്ക ആദ്യം താഴേക്ക്‌, നില​ത്തേക്കു വളരുന്നു. പിന്നീ​ടാണ്‌ അതു ചുണ്ടിൽനി​ന്നു പുറ​ത്തേക്ക്‌, വെളി​യി​ലേക്കു വളരു​ന്നത്‌. അങ്ങനെ സുവി​ദി​ത​മായ വാഴയ്‌ക്കാ വളവ്‌ ഉണ്ടാകു​ന്നു. വളർച്ച​യു​ടെ സമയത്തെ പോഷ​ണ​വും സംരക്ഷ​ണ​വും സംബന്ധി​ച്ചെന്ത്‌? വാഴക്കാ​യ്‌ക്കു ചെടി​യിൽനി​ന്നുള്ള ഊർജ​മെ​ല്ലാം കിട്ടു​ന്ന​തി​നു തക്കസമ​യത്ത്‌ അതിന്റെ ചുണ്ട്‌ ഒടിച്ചു​ക​ള​യു​ന്നു. എന്നിട്ട്‌ കീടങ്ങളെ അകററി​നിർത്താൻ ഒരു പ്ലാസ്‌റ​റിക്‌ കൂടു​കൊണ്ട്‌ കുല പൊതി​യു​ന്നു. വാഴയ്‌ക്ക മുകളി​ലേക്കു വളർന്ന്‌ അതിന്റെ ഭാരം വർധി​ക്കു​ന്ന​തു​കൊണ്ട്‌ കുലയു​ടെ ഭാരം​കൊ​ണ്ടോ കാററു​കൊ​ണ്ടോ വാഴ പിടരാ​തി​രി​ക്കാൻ അതിനെ മററു വാഴക​ളു​ടെ ചുവട്ടി​ലേക്കു വലിച്ചു കെട്ടി​നിർത്തു​ന്നു. ഒടുവിൽ, വെട്ടാ​റായ കുലകൾ ഏതെന്നു സൂചി​പ്പി​ക്കു​ന്ന​തി​നു നിറമുള്ള ഒരു റിബൺ കൂടിൽ കെട്ടുന്നു.

വാഴയു​ടെ ഇലകളിൽ മരുന്നു തളിക്കു​ന്ന​തി​നു​വേണ്ടി തോട്ട​ത്തി​ന്റെ മീതെ​കൂ​ടി എല്ലാ ദിവസ​വും വിമാ​നങ്ങൾ പറക്കാ​റുണ്ട്‌. ഇത്‌ അവയെ മൂന്നു പ്രമുഖ രോഗ​ങ്ങ​ളിൽനി​ന്നു സംരക്ഷി​ക്കു​ന്നു. അതി​ലൊ​ന്നാണ്‌ പനാമാ​രോ​ഗം. ഈ രോഗം വരു​മ്പോൾ പൂപ്പലു​കൾ ചില വാഴ​ച്ചെ​ടി​കളെ നശിപ്പി​ക്കു​ന്നു. എന്നാൽ, അത്തരം വാഴകൾ മാററി, ഈ രോഗത്തെ ചെറു​ത്തു​നിൽക്കു​ന്ന​തരം വാഴകൾ നടുന്നു. മറെറാ​ന്നാണ്‌ ബാക്ടീ​രിയ ഉണ്ടാക്കുന്ന മാക്കോ രോഗം. രോഗം ബാധിച്ച വാഴക​ളും രോഗം പരത്തുന്ന പ്രാണി​കളെ ആകർഷി​ക്കുന്ന പുഷ്‌പ​ങ്ങ​ളും നീക്കം ചെയ്‌തു​കൊണ്ട്‌ അതിനെ നിയ​ന്ത്രി​ക്കു​ന്നു. അടുത്ത​താണ്‌ സിഗാ​റേ​റാക്ക രോഗം. ഇതു ചെടി​യു​ടെ ഇലകളെ നശിപ്പി​ക്കു​ന്നു, എന്നാൽ പെട്ടെ​ന്നു​തന്നെ രാസമ​രു​ന്നു​കൾ ഉപയോ​ഗി​ച്ചാൽ വാഴക്കാ​യ്‌ക്കു കേടു​വ​രു​ത്തു​ക​യില്ല. വാഴക്കാ​യ്‌ക്കു ധാരാളം വെള്ളം ആവശ്യ​മാണ്‌. ജലസേ​ചനം വഴിയും ഉയർന്ന മർദമുള്ള സ്‌​പ്രെ​യ​റു​കൾ ഉപയോ​ഗി​ച്ചും വെള്ളം പ്രദാനം ചെയ്യുന്നു. വാഴ​ത്തോ​ട്ടം പുല്ലും കളയു​മി​ല്ലാ​തെ സൂക്ഷി​ക്കു​ന്നു എന്നുകൂ​ടി കൂട്ടി​ച്ചേർക്കേ​ണ്ട​താണ്‌.

തോട്ട​ത്തിൽനി​ന്നു മേശയി​ലേക്ക്‌

കുല വെട്ടാ​റാ​യി എന്നു റിബണി​ന്റെ നിറം സൂചി​പ്പി​ക്കുന്ന സമയത്ത്‌, വെട്ടാൻ പാകത്തി​ലുള്ള വലിപ്പ​മു​ള്ള​വ​യാ​ണോ എന്ന്‌ ആദ്യം അവയെ അളന്നു​നോ​ക്കു​ന്നു. മറെറാ​രു ശ്രദ്ധേ​യ​മായ വസ്‌തുത വാഴയ്‌ക്ക വാഴയിൽത്തന്നെ നിന്നു പഴുക്കാൻ അനുവ​ദി​ക്കാ​റില്ല എന്നതാണ്‌, തദ്ദേശീ​യർക്കു തിന്നാൻ വേണ്ടി​യു​ള്ളതു പോലും. എന്താണ​തി​ന്റെ കാരണം? കാരണം അതിന്റെ രുചി നഷ്ടമാ​കും. വിള​വെ​ടുപ്പ്‌ എപ്പോൾ നടത്തണ​മെന്നു തീരു​മാ​നി​ക്കു​ന്ന​തി​നു മുമ്പ്‌ കയററി അയയ്‌ക്കേണ്ട സ്ഥലത്തേ​ക്കുള്ള ദൂരവും കൊണ്ടു​പോ​കുന്ന വിധവും പരിചി​ന്തി​ക്കേ​ണ്ട​തുണ്ട്‌. ഒരു തൊഴി​ലാ​ളി കുലകൾ വാക്കത്തി​കൊണ്ട്‌ വെട്ടി​യെ​ടു​ക്കു​ന്നു, എന്നിട്ട്‌ പായ്‌ക്കു ചെയ്യുന്ന സ്ഥലത്തേക്ക്‌ അവ കൊണ്ടു​പോ​കു​ന്നു. വാഴക്കുല വെട്ടി​യെ​ടു​ത്ത​ശേഷം വാഴ​ച്ചെ​ടി​യെ എന്തു ചെയ്യും? അതു മുറിച്ച്‌ അതിന്റെ സ്ഥാനത്തു വളരുന്ന മററു വാഴകൾക്കു വളമായി ഇടും.

പായ്‌ക്കു ചെയ്യുന്ന സ്ഥലത്തു വാഴയ്‌ക്കകൾ കഴുകി വൃത്തി​യാ​ക്കു​ന്നു. ചതഞ്ഞ വാഴയ്‌ക്ക തൊഴി​ലാ​ളി​കൾക്കും അവരുടെ കുടും​ബ​ങ്ങൾക്കും തിന്നു​ന്ന​തി​നു വേണ്ടി എടുത്തു​മാ​റ​റു​ന്നു. ചെറിയ കായ്‌കൾ രുചി വർധി​പ്പി​ക്കു​ന്ന​തി​നു വേണ്ടി​യും കുട്ടി​ക​ളു​ടെ ആഹാര​ത്തി​നു വേണ്ടി​യും ഉപയോ​ഗി​ക്കും. ഏററവും നല്ല വാഴയ്‌ക്ക 18 കിലോ​വീ​തം പെട്ടി​യി​ലാ​ക്കി ശീതി​ക​ര​ണി​കൾ ഉള്ള ട്രെയി​നു​ക​ളി​ലും കപ്പലു​ക​ളി​ലു​മാ​യി വിദേ​ശ​ത്തേക്ക്‌ അയയ്‌ക്കു​ന്നു.

തുറമു​ഖ​ത്തു​വച്ച്‌ ഫലത്തിന്റെ ഗുണം പരി​ശോ​ധി​ക്കു​ക​യും അതിന്റെ ചൂട്‌ അളക്കു​ക​യും ചെയ്യുന്നു. വാഴയിൽനി​ന്നു വെട്ടി​യെ​ടു​ത്തു കഴിഞ്ഞാൽ അതു മാർക്ക​റ​റിൽ എത്തുന്ന​തു​വരെ പച്ചയാ​യി​ത്തന്നെ ഇരിക്കണം. വാഴയ്‌ക്ക ശീഘ്രം കേടു​വ​ന്നു​പോ​കു​ന്ന​താ​യ​തു​കൊണ്ട്‌ അതിന്റെ ശേഖര​ണ​വും, കപ്പലി​ലുള്ള അയയ്‌ക്ക​ലും കടയിലെ വിൽപ്പ​ന​യും 10 മുതൽ 20 വരെ ദിവസ​ത്തി​നു​ള്ളിൽ കഴിഞ്ഞി​രി​ക്കണം. പഴുക്കാ​തി​രി​ക്കാൻ വേണ്ടി വാഴയ്‌ക്ക 12-13 ഡിഗ്രി സെൽഷ്യസ്‌ താപനി​ല​യിൽ സൂക്ഷി​ക്കു​ന്നു. കയററി അയയ്‌ക്കാ​നുള്ള ആധുനിക സൗകര്യ​ങ്ങൾ ഉള്ളതു​കൊണ്ട്‌, മധ്യ അമേരി​ക്ക​യിൽനി​ന്നും തെക്കേ അമേരി​ക്ക​യിൽനി​ന്നും കാനഡ, യൂറോപ്പ്‌ എന്നിങ്ങ​നെ​യുള്ള വിദൂര സ്ഥലങ്ങളി​ലേക്ക്‌ യാതൊ​രു കുഴപ്പ​വും കൂടാതെ അയയ്‌ക്കാ​നാ​കും.

പ്രാ​യോ​ഗിക മൂല്യ​വും പോഷ​ണ​വും

നൂറോ അതിൽ കൂടു​ത​ലോ തരം വാഴക​ളുണ്ട്‌. കുള്ളൻ വാഴയ്‌ക്ക​യാ​ണു സാധാ​ര​ണ​മാ​യി കാണാ​റു​ള്ളത്‌. അതു മുഖ്യ​മാ​യും യൂറോപ്പ്‌, കാനഡ, ഐക്യ​നാ​ടു​കൾ എന്നിവി​ട​ങ്ങ​ളി​ലേക്കു കയററി അയയ്‌ക്കു​ന്നു. കയററി അയയ്‌ക്കാ​നാ​വാ​ത്ത​വി​ധം കട്ടികു​റഞ്ഞ തൊലി​യുള്ള വലിപ്പം കുറഞ്ഞ ഇനങ്ങൾ ഹോണ്ടു​റ​സിൽ കാണാം. ഇവ മാൻസാന (ആപ്പിൾ) എന്നും റെഡ്‌ ജമെയ്‌ക്ക എന്നും അറിയ​പ്പെ​ടു​ന്നു.

വാഴയി​ല​യിൽ ഉപയോ​ഗ​പ്ര​ദ​മായ നാരു​ക​ളുണ്ട്‌. ഉഷ്‌ണ​മേ​ഖലാ രാജ്യ​ങ്ങ​ളിൽ ഈ ഇലകൾ വ്യത്യസ്‌ത ഉദ്ദേശ്യ​ങ്ങൾക്കാ​യി ഉപയോ​ഗി​ക്കു​ന്നു. ഒരു ചന്തസ്ഥലം സന്ദർശി​ക്കു​മ്പോൾ ഇത്തരം ഇലകൾ വിൽക്കാൻ വേണ്ടി തെരു​വിൽ കൂട്ടി​വെ​ച്ചി​രി​ക്കു​ന്നത്‌ കാണാം. പല നാടു​ക​ളി​ലും വളരെ പ്രസി​ദ്ധി​യുള്ള ഒരു ഭക്ഷണമായ ചൂടൻ ററമാ​ലേസ്‌ പൊതി​യാൻ ഇത്‌ ഉപയോ​ഗി​ക്കു​ന്നു.

ഹോണ്ടു​റ​സി​ലു​ള്ള അനേക​മാ​ളു​കൾക്കു ഭക്ഷണ​ത്തോ​ടൊ​പ്പം വാഴപ്പഴം കഴിക്കു​ന്നത്‌ ഇഷ്ടമാണ്‌. ഹോണ്ടു​റ​സി​ന്റെ വടക്കേ തീരത്തുള്ള ആസ്വാ​ദ്യ​മായ ഒരു ഭക്ഷണമാണ്‌ മാച്ചുക്ക. പഴുക്കാത്ത വാഴയ്‌ക്ക ഒരു ഉരലി​ലിട്ട്‌ ചതച്ച്‌ അതിൽ സുഗന്ധ​വ്യ​ഞ്‌ജ​നങ്ങൾ ഇടു​മ്പോൾ കിട്ടുന്ന ഈ മിശ്രി​ത​ത്തിൽ ഞണ്ടും ചേർത്ത്‌ എണ്ണയിൽ പാകം ചെയ്‌താണ്‌ ഇത്‌ ഉണ്ടാക്കു​ന്നത്‌.

ഐക്യ​നാ​ടു​ക​ളിൽ വർഷം​തോ​റും ഏതാണ്ട്‌ 1,100 കോടി വാഴയ്‌ക്ക ഭക്ഷണത്തി​നാ​യി ഉപയോ​ഗി​ക്കു​ന്നു. വലി​യൊ​ര​ളവ്‌ കാനഡ, ബ്രിട്ടൻ, യൂറോ​പ്യൻ രാജ്യങ്ങൾ എന്നിവി​ട​ങ്ങ​ളി​ലേ​ക്കും പോകു​ന്നു. ഈ കായ്‌ തിന്നാൽ പോഷ​ക​പ്ര​ദ​മായ എന്തു പ്രയോ​ജ​ന​ങ്ങ​ളാ​ണു​ള്ളത്‌? ജീവകം എ, ജീവകം ബി, കാർബോ​ഹൈ​ഡ്രേ​റ​റു​കൾ, ഫോസ്‌ഫ​റസ്‌, പൊട്ടാ​സി​യം എന്നിവ വാഴയ്‌ക്ക​യിൽ സമൃദ്ധ​മാ​യുണ്ട്‌.

വാഴയ്‌ക്കാ​യ്‌ക്ക്‌ എത്ര ഉപയോ​ഗ​ങ്ങ​ളാ​ണെ​ന്നോ! പലഹാ​രങ്ങൾ, ധാന്യ​മി​ശ്രി​തങ്ങൾ, പലതരം പഴങ്ങളു​ടെ സംയു​ക്തങ്ങൾ, പൈ, കേക്കുകൾ, കൂടാതെ പേരു​കേട്ട ബനാന സ്‌പ്ലി​ററ്‌ എന്നിവ​യ്‌ക്കും പററി​യ​താണ്‌ വാഴപ്പഴം. അടുത്ത തവണ നിങ്ങൾ ഒരു വാഴപ്പഴം തിന്നു​മ്പോൾ അതിന്റെ വിശി​ഷ്ട​മായ ഗുണങ്ങ​ളെ​ക്കു​റി​ച്ചു ചിന്തി​ക്കുക. ഈ പഴത്തിന്‌ അതി​ന്റെ​തന്നെ പാക്കിം​ഗുണ്ട്‌. അതു ജീവക​ങ്ങ​ളും ലവണങ്ങ​ളും കൊണ്ട്‌ സമ്പന്നമാണ്‌. അതേ, നിങ്ങളു​ടെ മേശയിൽ എത്താൻ വാഴയ്‌ക്ക ലോക​ത്തി​ന്റെ പകുതി ദൂരം സഞ്ചരി​ച്ചി​രി​ക്കാം.