കുഴപ്പ​ക്കാ​ര​നായ ഒരു കുട്ടി​യു​ടെ മാതാ​പി​താ​ക്ക​ളാ​യി​രി​ക്കൽ

“ഇന്നെങ്ങ​നെ​യു​ണ്ടാ​യി​രു​ന്നു?” കാറിൽ അള്ളിപ്പി​ടി​ച്ചു​ക​യ​റുന്ന മകൻ ജിമ്മി​യോട്‌ സൂസൻ ചോദി​ക്കു​ന്നു. അവൾ അവനെ സ്‌കൂ​ളിൽനി​ന്നു കൂട്ടി​ക്കൊ​ണ്ടു വരിക​യാ​യി​രു​ന്നു. അവൻ നെററി​ചു​ളി​ച്ചു, കേട്ട ഭാവം നടിച്ചില്ല. “ഓ, ഇന്നത്ര രസകര​മ​ല്ലാ​യി​രു​ന്നി​രി​ക്കാം,” അവൾ സഹതാ​പ​പൂർവം പറഞ്ഞു. എന്നിട്ടു ചോദി​ച്ചു: “ആകട്ടെ, നിനക്ക​തേ​ക്കു​റി​ച്ചെ​ന്തെ​ങ്കി​ലും പറയാ​നു​ണ്ടോ?”

“എന്നെ​യൊ​ന്നു വെറുതെ വിടൂ,” അവൻ മറുപ​ടി​യെ​ന്നോ​ണം പിറു​പി​റു​ത്തു.

“എനിക്കു നിന്നെ​ക്കു​റി​ച്ചു വല്ലാത്ത ഉത്‌ക​ണ്‌ഠ​യാണ്‌. നിന​ക്കൊ​ട്ടും സന്തോ​ഷ​മി​ല്ല​ല്ലോ. ഞാൻ നിന്നെ സഹായി​ക്കാം.“

“എനിക്ക്‌ ആരു​ടെ​യും സഹായ​മൊ​ന്നും വേണ്ട!” അവൻ ആക്രോ​ശി​ച്ചു. “എന്നെ​യൊ​ന്നു ശല്യം ചെയ്യാ​തി​രു​ന്നാൽ മതി! എനിക്കു നിങ്ങ​ളോ​ടു വെറു​പ്പാണ്‌! ഞാനൊ​ന്നു മരിച്ചു​പോ​യി​രു​ന്നെ​ങ്കിൽ!”

“ജിമ്മി!” സൂസൻ ദീർഘ​മാ​യൊ​ന്നു നിശ്വ​സി​ച്ചു. “നീ എന്നോട്‌ ഇത്തരം വർത്തമാ​നം പറഞ്ഞാ​ലു​ണ്ട​ല്ലോ നീ—നീ നല്ല അടി വാങ്ങി​ക്കും! ഞാൻ മര്യാ​ദ​യ്‌ക്കാ​ണു ചോദി​ച്ചത്‌. നിന​ക്കെ​ന്തു​പ​റ​റി​യെന്ന്‌ എനിക്ക​റി​യില്ല. ഞാൻ പറയു​ന്ന​തും ചെയ്യു​ന്ന​തും ഒന്നും നിനക്കി​ഷ്ട​പ്പെ​ടു​ന്നില്ല.”

ദിവസം മുഴു​വ​നും ജോലി​ചെ​യ്‌തു ക്ഷീണിച്ചു വലഞ്ഞ സൂസൻ ഇങ്ങനെ​യൊ​രു കുട്ടിയെ തനിക്ക്‌ എങ്ങനെ കിട്ടി എന്ന്‌ അതിശ​യി​ച്ചു​കൊണ്ട്‌ വാഹന​ങ്ങൾക്കി​ട​യി​ലൂ​ടെ വണ്ടി വെട്ടിച്ച്‌ ഓടി​ക്ക​യാണ്‌. അവൾക്കു സംഭ്രാ​ന്തി​യും നിസ്സഹാ​യ​ത​യും കോപ​വും അതു​പോ​ലെ​തന്നെ തന്റെ സ്വന്തം പുത്ര​നോട്‌ വിരക്തി​യും തോന്നി. കുററ​ബോ​ധം അവളുടെ മനസ്സിനെ അലട്ടി​ക്കൊ​ണ്ടു​മി​രു​ന്നു. അവനെ—തന്റെ സ്വന്തം കുഞ്ഞിനെ—വീട്ടി​ലേക്കു കൊണ്ടു​പോ​കാൻ അവൾക്കു ഭീതി​യാണ്‌. അന്നു സ്‌കൂ​ളിൽ സംഭവി​ച്ച​തെ​ന്താ​ണെന്ന്‌ അവൾക്ക്‌ ഇപ്പോൾ അറിയ​ണ​മെന്നേ ഇല്ല. അധ്യാ​പിക വീണ്ടും ഫോണിൽക്കൂ​ടി ജിമ്മി​യു​ടെ പ്രശ്‌നം സംസാ​രി​ക്കു​മെ​ന്ന​തി​നു സംശയ​മില്ല. ചില സമയങ്ങ​ളിൽ സൂസന്‌ കേവലം സഹിച്ചു നിൽക്കാ​നാ​യില്ല.

ഇങ്ങനെ നിസ്സാ​ര​ങ്ങ​ളെന്നു തോന്നുന്ന സംഭവങ്ങൾ ഉത്‌ക​ണ്‌ഠാ നിർഭ​ര​വും ശക്തവു​മായ വൈകാ​രിക അഗ്നിപ​രീ​ക്ഷ​ക​ളാ​യി പൊട്ടി​ത്തെ​റി​ക്കു​ന്നു. പ്രശ്‌ന​ങ്ങ​ളു​മാ​യി ഏററു​മു​ട്ടു​മ്പോൾ തികച്ചും ഉഗ്രമായ രീതി​യിൽ പ്രതി​ക​രി​ക്കു​ക​യെ​ന്ന​താണ്‌ എഡിഡി/എഡിഎ​ച്ച്‌ഡി​യുള്ള അല്ലെങ്കിൽ “കുഴപ്പ​ക്കാർ” എന്നു മുദ്ര​യുള്ള കുട്ടി​ക​ളു​ടെ സ്വഭാവം. അവർ പെട്ടെന്നു പൊട്ടി​ത്തെ​റി​ച്ചു​കൊണ്ട്‌ മാതാ​പി​താ​ക്കളെ കുപി​ത​രും പരി​ഭ്രാ​ന്ത​രും ആത്യന്തി​ക​മാ​യി അവശരു​മാ​ക്കി​ത്തീർക്കു​ന്നു.

വിലയി​രു​ത്ത​ലും ഇടപെ​ട​ലും

സാധാ​ര​ണ​മാ​യി, ഈ കുട്ടികൾ ബുദ്ധി​മാൻമാ​രും സർഗവാ​സ​ന​യു​ള്ള​വ​രും തൊട്ടാ​വാ​ടി​ക​ളു​മാണ്‌. അസാധാ​ര​ണ​മായ ആവശ്യ​ങ്ങ​ളോ​ടു കൂടി​യ​വ​രും തൻമൂലം പ്രത്യേക രീതി​യിൽ മനസ്സി​ലാ​ക്കേ​ണ്ട​വ​രു​മായ ആരോ​ഗ്യ​മുള്ള കുട്ടി​ക​ളാണ്‌ ഇവരെന്ന്‌ തിരി​ച്ച​റി​യേ​ണ്ടതു പ്രധാ​ന​മാണ്‌. ഇത്തരം കുട്ടി​ക​ളു​ടെ മാതാ​പി​താ​ക്കൾ വിജയ​ക​ര​മെന്നു കണ്ടെത്തി​യി​രി​ക്കുന്ന ചില തത്ത്വങ്ങ​ളും ആശയങ്ങ​ളും ഇതാ.

ഒന്ന്‌, കുട്ടിയെ ആകുല​പ്പെ​ടു​ത്തുന്ന സാഹച​ര്യ​ങ്ങ​ളും ഉത്തേജ​ക​കാ​രി​ക​ളും എന്തെന്നു തിരി​ച്ച​റി​യാൻ പഠി​ക്കേ​ണ്ട​തുണ്ട്‌. (താരത​മ്യം ചെയ്യുക: സദൃശ​വാ​ക്യ​ങ്ങൾ 20:5.) മാതാ​വോ പിതാ​വോ വൈകാ​രിക സംഘട്ട​ന​ങ്ങൾക്കു മുമ്പ്‌ കുട്ടി​യി​ലു​ണ്ടാ​കുന്ന ലക്ഷണങ്ങൾ നിരീ​ക്ഷി​ക്കേ​ണ്ട​തും സത്വരം ഇടപെ​ടേ​ണ്ട​തും അത്യാ​വ​ശ്യ​മാണ്‌. വർധിച്ച നിരാ​ശ​യും ഒരു പ്രത്യേക സാഹച​ര്യ​ത്തെ കൈകാ​ര്യം ചെയ്യാ​നുള്ള ശേഷി​ക്കു​റ​വും പ്രതി​ഫ​ലി​ക്കുന്ന മുഖഭാ​വ​മാണ്‌ മുഖ്യ​മായ ഒരു സൂചന. കുട്ടിയെ സ്വയം നിയ​ന്ത്രി​ക്കാൻ ഓർമി​പ്പി​ക്കുന്ന ദയാപു​ര​സ്സ​ര​മായ വാക്കുകൾ ഉച്ചരി​ക്കു​ന്ന​തോ ആവശ്യ​മെ​ങ്കിൽ കുട്ടിയെ ആ സാഹച​ര്യ​ത്തിൽനി​ന്നു മാററി​ക്കൊ​ണ്ടു​പോ​കു​ന്ന​തോ സഹായ​ക​മാ​യേ​ക്കാം. ഉദാഹ​ര​ണ​ത്തിന്‌, ഇടവേ​ളകൾ ഫലപ്ര​ദ​മാണ്‌. ഒരു ശിക്ഷണ​മാ​യി​രി​ക്കു​ന്ന​തി​നെ​ക്കാ​ളു​പരി ഇത്‌ കുട്ടി​ക്കും മാതാ​പി​താ​ക്കൾക്കും ശാന്തത വീണ്ടെ​ടുത്ത്‌ വിവേ​ക​പൂർവം മുന്നോ​ട്ടു പോകു​ന്ന​തി​നുള്ള ഒരു മാർഗ​മാ​യി​രി​ക്കണം.

ഇവിടെ നൽകി​യി​രി​ക്കുന്ന ഉദാഹ​ര​ണ​ത്തിൽ ജിമ്മി നിസ്സാ​ര​മായ ചോദ്യ​ങ്ങ​ളോട്‌ അതിരു​ക​ടന്നു പ്രതി​ക​രി​ച്ചു. സാധാരണ എല്ലാദി​വ​സ​ങ്ങ​ളി​ലും ജിമ്മി ഇങ്ങനെ​ത​ന്നെ​യാണ്‌. ഈ കോപ​വും വെറു​പ്പും തങ്ങളോ​ടു മനഃപൂർവം കാട്ടു​ന്ന​താ​ണെന്നു മാതാ​പി​താ​ക്കൾ വിചാ​രി​ക്കുക എളുപ്പ​മാ​ണെ​ങ്കി​ലും സമ്മർദം സഹിക്കാൻ മേലാ​താ​കു​മ്പോൾ ഈ കുട്ടി​കൾക്കു പലപ്പോ​ഴും ഗ്രഹണ​പ്രാ​പ്‌തി (വിവേചന) നഷ്ടമാ​കു​ന്നു എന്ന്‌ മനസ്സി​ലാ​ക്കേ​ണ്ടത്‌ അത്യന്താ​പേ​ക്ഷി​ത​മാണ്‌. അതു​കൊണ്ട്‌ ഉൾക്കാ​ഴ്‌ച​യോ​ടെ പ്രവർത്തി​ക്കേ​ണ്ടത്‌ പ്രധാ​ന​മാണ്‌. (സദൃശ​വാ​ക്യ​ങ്ങൾ 19:11) ജിമ്മി​യു​ടെ കാര്യ​ത്തിൽ, സംഭാ​ഷ​ണ​ത്തിന്‌ നിർബ​ന്ധി​ക്കാ​തി​രു​ന്നു​കൊ​ണ്ടും മകന്‌ തന്നേത്തന്നെ നിയ​ന്ത്രി​ക്കു​ന്ന​തി​നുള്ള സമയം നൽകി​ക്കൊ​ണ്ടും സൂസനു സാഹച​ര്യ​ത്തെ ശാന്തമാ​ക്കാ​മാ​യി​രു​ന്നു. ആ ദിവസ​ത്തി​ലെ സംഭവങ്ങൾ അവർക്കു പിന്നീട്‌ ചർച്ച​ചെ​യ്യാ​മാ​യി​രു​ന്നു.

സമ്മർദ​ത്താൽ കുഴങ്ങിയ കുട്ടികൾ

ആധുനിക ലോകത്തെ ബാധി​ക്കു​ന്ന​ത്ര​യും ഗുരു​ത​ര​മായ പ്രശ്‌ന​ങ്ങ​ളും സമ്മർദ​ങ്ങ​ളും ഉത്‌ക​ണ്‌ഠ​ക​ളും മനുഷ്യ​കു​ടും​ബത്തെ മുമ്പൊ​രി​ക്ക​ലും ബാധി​ച്ചി​ട്ടില്ല. കാലം മാറി​യി​രി​ക്കു​ന്നു. ആവശ്യങ്ങൾ വർധി​ച്ചി​രി​ക്കു​ന്നു, കുട്ടി​ക​ളിൽനിന്ന്‌ കൂടുതൽ ആവശ്യ​പ്പെ​ടു​ക​യും ചെയ്യുന്നു. ഈ വിഷയത്തെ സംബന്ധിച്ച്‌ നല്ല കുട്ടികൾ, മോശ​മായ സ്വഭാവം (ഇംഗ്ലീഷ്‌) എന്ന പുസ്‌തകം ഇപ്രകാ​രം വിശദീ​ക​രി​ക്കു​ന്നു: “കുട്ടികൾ അനുഭ​വി​ക്കു​ന്ന​താ​യി കാണ​പ്പെ​ടുന്ന മിക്ക പ്രശ്‌ന​ങ്ങ​ളും മാറുന്ന സാമൂ​ഹിക പ്രതീ​ക്ഷകൾ നിമി​ത്ത​മോ അവയുടെ സ്വാധീ​ന​ത്താ​ലോ ഉണ്ടാകു​ന്ന​താണ്‌.” എഡിഡി/എഡിഎ​ച്ച്‌ഡി​യുള്ള കുട്ടി​കൾക്ക്‌ സ്‌കൂൾ ഒരു പേടി സ്വപ്‌ന​മാണ്‌. തങ്ങളുടെ തന്നെ പോരാ​യ്‌മ​ക​ളോ​ടു പൊരു​ത്ത​പ്പെ​ട്ടു​പോ​കാൻ പോരാ​ടുന്ന ഈ കുട്ടി​ക​ളു​ടെ ഉത്‌കണ്‌ഠ വർധി​പ്പി​ക്കാൻ മറെറാ​രു കാര്യം കൂടി​യുണ്ട്‌. പ്രതി​കൂ​ല​വും അപകട​ക​ര​വു​മാ​യി കാണ​പ്പെ​ടുന്ന സാഹച​ര്യ​ത്തിൽ തുടർച്ച​യാ​യി വേഗം വേഗം മാറി​ക്കൊ​ണ്ടി​രി​ക്കുന്ന സാങ്കേ​തിക പുരോ​ഗ​തി​ക​ളു​ടെ ഒരു സ്‌ഫോ​ട​ന​ത്തോ​ടു പൊരു​ത്ത​പ്പെ​ട്ടു​പോ​കാൻ അവർ നിർബ​ന്ധി​ത​രാണ്‌. ഈ പ്രശ്‌ന​ങ്ങ​ളെ​ല്ലാം വഹിക്കാൻ കുട്ടി​കൾക്കു വൈകാ​രി​ക​മാ​യി തീരെ പക്വത​യില്ല. അവർക്കു മാതാ​പി​താ​ക്ക​ളു​ടെ സഹായം ആവശ്യ​മാണ്‌.

ഉരസൽ കുറയ്‌ക്കു​ക

ഏറെ സന്തുഷ്ട​രും ആരോ​ഗ്യ​വാൻമാ​രു​മായ കുട്ടികൾ ഉണ്ടായി​രി​ക്കു​ന്ന​തി​നു ക്രമവും സ്ഥിരത​യും ഉള്ള ഒരു ചുററു​പാട്‌ പ്രദാനം ചെയ്യേ​ണ്ടതു പ്രധാ​ന​മാണ്‌. ഭവനത്തിൽ ഉരസൽ കുറയ്‌ക്കാ​നുള്ള ഫലപ്ര​ദ​മായ ഒരു പദ്ധതി ലഘുവായ ഒരു ജീവിത രീതി​യിൽ തുടങ്ങി​യേ​ക്കാം. ഈ കുട്ടികൾ വികാ​ര​ങ്ങൾക്ക്‌ അടി​പ്പെ​ടു​ന്ന​വ​രും ശ്രദ്ധാ​ശൈ​ഥി​ല്യം അനുഭ​വി​ക്കു​ന്ന​വ​രും അമിത ചുറു​ചു​റു​ക്കു​ള്ള​വ​രും ആയിരി​ക്കു​ന്ന​തി​നാൽ അമി​തോ​ത്തേ​ജ​ന​ത്തി​ന്റെ പ്രതി​കൂല ഫലം കുറയ്‌ക്കേ​ണ്ടത്‌ ആവശ്യ​മാണ്‌. ഈ കുട്ടി​കൾക്ക്‌ ഒരു സമയത്ത്‌ കളിക്കാൻ കൊടു​ക്കുന്ന കളിപ്പാ​ട്ട​ങ്ങ​ളു​ടെ എണ്ണം കുറയ്‌ക്കുക. ഒരു സമയത്ത്‌ ഒരു ഗൃഹ​ജോ​ലി​യോ പരിപാ​ടി​യോ മാത്രം ചെയ്‌തു​നോ​ക്കട്ടെ. ഈ കുട്ടികൾ തന്നെ പലപ്പോ​ഴും ചിട്ടയി​ല്ലാ​ത്ത​വ​രാ​യ​തു​കൊണ്ട്‌ കാര്യങ്ങൾ ചിട്ട​പ്പെ​ടു​ത്തു​ന്നതു നിരാശ കുറയ്‌ക്കു​ന്നു. അവർ കൈകാ​ര്യം ചെയ്യേണ്ട ഇനങ്ങൾ എത്ര കുറവും എത്ര എളുപ്പ​ത്തിൽ എടുക്കാ​വു​ന്ന​തു​മാ​ണോ അത്ര എളുപ്പ​മാ​യി​രി​ക്കും അവർക്കു ചെയ്യാ​നുള്ള പ്രധാന കാര്യങ്ങൾ.

ഭവനത്തിൽ സമ്മർദം കുറയ്‌ക്കാ​നുള്ള ഫലപ്ര​ദ​മായ മറെറാ​രു മാർഗം പ്ലാൻ ചെയ്‌ത​തും കർക്കശ​മ​ല്ലാ​ത്ത​തു​മായ ഒരു ക്രമം നടപ്പാ​ക്കു​ന്ന​താണ്‌. ഇതു കുട്ടി​കൾക്ക്‌ ഒരു സ്ഥിരതാ​ബോ​ധം നൽകും. സംഭവങ്ങൾ നടക്കുന്ന കൃത്യ​മായ സമയം അനു​ക്ര​മ​ത്തി​ന്റെ അഥവാ സംഭവങ്ങൾ നടക്കുന്ന ക്രമത്തി​ന്റെ അത്രയും പ്രധാ​നമല്ല. പിൻവ​രു​ന്ന​തു​പോ​ലെ​യുള്ള പ്രാ​യോ​ഗിക നിർദേ​ശങ്ങൾ ബാധക​മാ​ക്കു​ന്ന​തി​നാൽ ഇതു സാധി​ക്കും. ലളിത​വും നന്നായി സമീകൃ​ത​വു​മായ ഭക്ഷണങ്ങ​ളി​ലൂ​ടെ​യും ലഘുഭ​ക്ഷ​ണ​ങ്ങ​ളി​ലൂ​ടെ​യും സമയാ​സ​മ​യ​ങ്ങ​ളിൽ ഉചിത​മായ പോഷണം പ്രദാനം ചെയ്യുക. ഉറങ്ങു​ന്ന​തി​നു മുമ്പുള്ള ചിട്ടകൾ ഊഷ്‌മ​ള​വും സ്‌നേ​ഹ​പൂർവ​ക​വും അയവു​ള്ള​തും ആക്കിത്തീർക്കുക. കടയിൽ പോക്ക്‌ ഉയർന്ന​തോ​തിൽ ചുറു​ചു​റു​ക്കുള്ള കുട്ടി​കളെ അമിത​മാ​യി ഉത്തേജി​പ്പി​ക്കു​ന്നു. അതു​കൊണ്ട്‌ മുൻകൂ​ട്ടി പ്ലാൻ ചെയ്യു​ക​യും വളരെ​യ​ധി​കം കടകളിൽ കയറാ​തി​രി​ക്കാൻ ശ്രമി​ക്കു​ക​യും ചെയ്യുക. ഉല്ലാസ​വേ​ള​കൾക്കാ​യി പുറത്തു​പോ​കു​മ്പോൾ ഏതു രീതി​യി​ലുള്ള പെരു​മാ​റ​റ​മാ​ണു നിങ്ങൾ പ്രതീ​ക്ഷി​ക്കു​ന്നത്‌ എന്ന്‌ വിശദീ​ക​രി​ച്ചു കൊടു​ക്കുക. വികാ​ര​ത്തി​ന​ടി​പ്പെ​ടുന്ന സ്വന്തം സ്വഭാ​വത്തെ നിയ​ന്ത്രി​ക്കു​ന്ന​തിന്‌ പ്രത്യേക ആവശ്യ​ങ്ങ​ളുള്ള കുട്ടിയെ കൃത്യ​മായ നിഷ്‌ഠകൾ സഹായി​ക്കു​ന്നു. കൂടാതെ അത്‌ മാതാ​പി​താ​ക്ക​ളു​ടെ പ്രതി​ക​രണം മുൻകൂ​ട്ടി​ക്കാ​ണാൻ കുട്ടി​കളെ സഹായി​ക്കു​ക​യും ചെയ്യുന്നു.

കാര്യങ്ങൾ പ്ലാൻ ചെയ്യു​ന്ന​തോ​ടൊ​പ്പം ഒരു നിയമ​വ്യ​വസ്ഥ രൂപീ​ക​രി​ക്കു​ന്ന​തും വിട്ടു​വീ​ഴ്‌ച​യി​ല്ലാത്ത നിയമങ്ങൾ ലംഘി​ച്ചാ​ലുള്ള പരിണ​ത​ഫ​ലങ്ങൾ ഉൾപ്പെ​ടു​ത്തു​ന്ന​തും പ്രയോ​ജ​ന​പ്ര​ദ​മാണ്‌. സ്ഥിരവും ഇണകൾക്ക്‌ ഇരുവർക്കും സമ്മതവു​മായ കൃത്യ​മായ നിയമങ്ങൾ വെക്കു​ന്നതു കുട്ടികൾ അനുവർത്തി​ക്കേണ്ട സ്വഭാവം സംബന്ധിച്ച അതിർവ​ര​മ്പു​കൾ വെക്കു​ക​യും സ്വന്തം പ്രവൃ​ത്തി​ക​ളു​ടെ ഉത്തരവാ​ദി​ത്വം വഹിക്കാൻ അവരെ പഠിപ്പി​ക്കു​ക​യും ചെയ്യുന്നു. ആവശ്യ​മെ​ങ്കിൽ (പിതാ​വി​നും മാതാ​വി​നും കുട്ടി​ക്കും ഓർമി​ക്കാ​നാ​യി) നിയമ​ങ്ങ​ളു​ടെ ഒരു പട്ടിക​യു​ണ്ടാ​ക്കി കാണാ​വുന്ന ഒരു സ്ഥാനത്തു പതിക്കുക. വൈകാ​രിക ഭദ്രത​യു​ടെ താക്കോൽ സ്ഥിരത​യാണ്‌.

കുട്ടി​യു​ടെ പ്രാഥ​മ്യ​ങ്ങ​ളും ഇഷ്ടാനി​ഷ്ട​ങ്ങ​ളും മനസ്സി​ലാ​ക്കി അവയോ​ടു പൊരു​ത്ത​പ്പെ​ടു​ന്നതു ഭവനത്തി​ലെ അനാവ​ശ്യ​മായ സമ്മർദത്തെ ലഘൂക​രി​ക്കാൻ വളരെ​യ​ധി​കം സഹായി​ക്കു​ന്നു. ക്രമം​കെ​ട്ടും വികാ​ര​ങ്ങൾക്ക്‌ അടി​പ്പെ​ട്ടും പ്രവർത്തി​ക്കു​ന്നത്‌ ഈ കുട്ടി​ക​ളു​ടെ പ്രത്യേക സ്വഭാ​വ​മാ​യ​തു​കൊണ്ട്‌ മററു കുട്ടി​ക​ളോ​ടുള്ള അവരുടെ ഇടപെടൽ വളരെ പ്രയാ​സ​ക​ര​മായ ഒരു അനുഭ​വ​മാ​യി​രി​ക്കും. പ്രത്യേ​കി​ച്ചു കളിപ്പാ​ട്ടങ്ങൾ പങ്കു​വെ​ക്കുന്ന കാര്യ​ത്തിൽ അവർ ഏററു​മു​ട്ടു​ന്നു. അതു​കൊണ്ട്‌ പങ്കു​വെ​യ്‌ക്കാ​വുന്ന തരത്തി​ലുള്ള, ഇഷ്ടപ്പെട്ട ഇനങ്ങൾ തിര​ഞ്ഞെ​ടു​ക്കാൻ മാതാ​പി​താ​ക്കൾ അത്തരം കുട്ടി​കളെ അനുവ​ദി​ച്ചേ​ക്കാം. കൂടാതെ, കളിക്കൂ​ട്ടു​കാ​രു​ടെ എണ്ണം കുറച്ചു​കൊ​ണ്ടും അമിത​മാ​യി ആവേശം കൊള്ളി​ക്കാ​ത്ത​ത​ര​ത്തി​ലുള്ള നിർമാ​ണാ​ത്മ​ക​മായ ചില പ്രവർത്ത​നങ്ങൾ മാത്രം അനുവ​ദി​ച്ചു​കൊ​ണ്ടും അവരുടെ ക്ഷമകേട്‌ നിയ​ന്ത്രി​ക്കാ​വു​ന്ന​താണ്‌.

അനാവ​ശ്യ​മാ​യ രൂപങ്ങ​ളിൽ ഞെക്കി​യൊ​തു​ക്കു​ന്ന​തും രൂപ​പ്പെ​ടു​ത്തു​ന്ന​തും ഒഴിവാ​ക്കേ​ണ്ട​തും ഓരോ കുട്ടി​യെ​യും അവന്റേ​തായ അല്ലെങ്കിൽ അവളു​ടേ​തായ രീതി​യിൽ വളരാ​ന​നു​വ​ദി​ക്കേ​ണ്ട​തും മാതാ​പി​താ​ക്കളെ സംബന്ധി​ച്ചി​ട​ത്തോ​ളം പ്രധാ​ന​മാണ്‌. ഒരു കുട്ടിക്ക്‌ ഒരു പ്രത്യേക ആഹാര​ത്തോ​ടോ വസ്‌ത്ര​ത്തോ​ടോ വെറു​പ്പാ​ണെ​ങ്കിൽ അത്‌ ഒഴിവാ​ക്കുക. ഈർഷ്യ​യു​ടെ ഈ കൊച്ചു മുള്ളുകൾ പോരാ​ട്ട​ത്തി​നു​തക്ക വിലയു​ള്ളതല്ല. ചുരു​ക്കി​പ്പ​റ​ഞ്ഞാൽ, കാണു​ന്ന​തെ​ല്ലാം നിയ​ന്ത്രി​ക്കാൻ ശ്രമം ചെലു​ത്താ​തി​രി​ക്കുക. സമനി​ല​യു​ള്ള​വ​രാ​യി​രി​ക്കുക. എന്നാൽ ഒരു ക്രിസ്‌തീയ കുടും​ബ​ത്തി​നു സ്വീകാ​ര്യ​മാ​യി​രി​ക്കുന്ന കാര്യങ്ങൾ സംബന്ധി​ച്ചു തീരു​മാ​ന​ങ്ങ​ളെ​ടു​ക്കു​മ്പോൾ അവയോ​ടു പററി നിൽക്കുക.

സ്വഭാ​വത്തെ നിയ​ന്ത്രി​ക്കൽ

പെരു​മാ​റ​റ​സ്ഥി​ര​ത​യി​ല്ലാത്ത കുട്ടി​കൾക്ക്‌ കൂടുതൽ നിയ​ന്ത്രണം ആവശ്യ​മു​ള്ള​താ​യി കണ്ടുവ​രു​ന്നു. അതു​കൊണ്ട്‌ കൂടെ​ക്കൂ​ടെ ശിക്ഷി​ക്കേണ്ടി വരു​മ്പോൾ മിക്ക മാതാ​പി​താ​ക്കൾക്കും വല്ലാത്ത കുററ​ബോ​ധം അനുഭ​വ​പ്പെ​ടു​ന്നു. എന്നാൽ ശിക്ഷണ​വും ദ്രോ​ഹ​വും തമ്മിലുള്ള വ്യത്യാ​സം തിരി​ച്ച​റി​യേ​ണ്ടതു പ്രധാ​ന​മാണ്‌. മൊത്തം ശാരീ​രിക ദ്രോ​ഹ​ത്തി​ന്റെ 21 ശതമാനം സംഭവി​ക്കു​ന്നത്‌ കുട്ടികൾ അക്രമാ​സ​ക്ത​മായ സ്വഭാവം പ്രകടി​പ്പി​ക്കു​മ്പോ​ഴാ​ണെന്ന്‌ റിപ്പോർട്ടു പ്രകട​മാ​ക്കു​ന്ന​താ​യി ശിക്ഷണത്തെ ബാലജന ദ്രോ​ഹ​മാ​ക്കി​മാ​റ​റുന്ന സൂക്ഷ്‌മ​രേഖ (ഇംഗ്ലീഷ്‌) എന്ന പുസ്‌തകം പറയുന്നു. ആയതി​നാൽ, എഡിഡി/എഡിഎ​ച്ച്‌ഡി​യുള്ള കുട്ടി​കൾക്ക്‌ “ശാരീ​രിക ദ്രോ​ഹ​ത്തി​നും അവഗണ​ന​യ്‌ക്കും ഉള്ള വലിയ സാധ്യ​ത​യുണ്ട്‌” എന്ന്‌ ഗവേഷണം നിഗമനം ചെയ്യുന്നു. പ്രത്യേക ആവശ്യ​ങ്ങ​ളുള്ള കുട്ടി​കളെ വളർത്തു​ന്നത്‌ സമ്മർദ​പൂർണ​മാ​ണെ​ന്നുള്ള കാര്യം അനി​ഷേ​ധ്യ​മാണ്‌. എന്നാൽ അവരെ നിയ​ന്ത്രി​ക്കു​ന്നത്‌ ആരോ​ഗ്യാ​വ​ഹ​വും സന്തുലി​ത​വു​മായ വിധത്തിൽ ആയിരി​ക്കണം. ഈ കുട്ടികൾ സാധാ​ര​ണ​മാ​യി ഏറെ ബുദ്ധി​മ​തി​ക​ളും വളരെ​യ​ധി​കം സർഗാ​ത്മ​ക​രു​മാ​യ​തു​കൊണ്ട്‌ ന്യായ​വാ​ദം ആവശ്യ​മുള്ള സാഹച​ര്യ​ങ്ങൾ കൈകാ​ര്യം ചെയ്യു​മ്പോൾ അവർ മാതാ​പി​താ​ക്കൾക്കു വെല്ലു​വി​ളി ഉയർത്തു​ന്നു. ഈ കുട്ടി​കൾക്ക്‌ പലപ്പോ​ഴും മാതാ​പി​താ​ക്ക​ളു​ടെ ഏററവും ബുദ്ധി​പൂർവ​ക​മായ ന്യായ​വാ​ദ​ങ്ങ​ളു​ടെ​പോ​ലും കുറവു​കൾ ചൂണ്ടി​ക്കാ​ട്ടുന്ന ഒരു സ്വഭാ​വ​മുണ്ട്‌. അവരെ അതിന്‌ അനുവ​ദി​ക്കാ​തി​രി​ക്കുക! മാതാ​വോ പിതാ​വോ എന്ന നിലയി​ലുള്ള നിങ്ങളു​ടെ അധികാ​രം നിലനിർത്തുക.

സൗഹാർദ​പ​ര​മാ​യി, എന്നാൽ ഉറപ്പോ​ടെ ഹ്രസ്വ​മായ വിശദീ​ക​ര​ണങ്ങൾ നൽകുക; മററു വാക്കു​ക​ളിൽ പറഞ്ഞാൽ, അധികം വിവരി​ക്കാ​തി​രി​ക്കുക, വിട്ടു​വീഴ്‌ച ചെയ്യാൻ പാടി​ല്ലാത്ത നിയമങ്ങൾ വിട്ടു​വീഴ്‌ച ചെയ്യാ​തി​രി​ക്കുക. നിങ്ങളു​ടെ “ഉവ്വു” ഉവ്വു എന്നും “ഇല്ല” ഇല്ല എന്നും ആയിരി​ക്കട്ടെ. (താരത​മ്യം ചെയ്യുക: മത്തായി 5:37.) കുട്ടികൾ നയത​ന്ത്ര​ജ്ഞരല്ല; അതു​കൊണ്ട്‌ അവരു​മാ​യുള്ള ഇടപെ​ട​ലു​കൾ വാദ​പ്ര​തി​വാ​ദം, കോപം, നൈരാ​ശ്യം എന്നിവ​യി​ലേക്കു നയിക്കു​ക​യും ആക്രോ​ശ​ത്തി​ലും അക്രമ​ത്തിൽ പോലും ചെന്നെ​ത്തു​ക​യും ചെയ്യുന്നു. (എഫെസ്യർ 4:31) അതു​പോ​ലെ തന്നെ വളരെ​യ​ധി​കം മുന്നറി​യി​പ്പു കൊടു​ക്കു​ന്ന​തും ഒഴിവാ​ക്കുക. ശിക്ഷണം ആവശ്യ​മാ​ണെ​ങ്കിൽ അത്‌ ഉടനടി നൽകേ​ണ്ട​താണ്‌. ഒരു നിഷേ​ധാ​ത്മക ലോക​ത്തിൽ ക്രിയാ​ത്മ​ക​രായ കുട്ടി​കളെ വളർത്തൽ (ഇംഗ്ലീഷ്‌) എന്ന പുസ്‌തകം ഇപ്രകാ​രം ഉദ്‌ബോ​ധി​പ്പി​ക്കു​ന്നു: “ശാന്തത, ശുഭാ​പ്‌തി വിശ്വാ​സം, ദൃഢത—അധികാ​രം എന്നു പറഞ്ഞാൽ അതാണ്‌.” കൂടാതെ ദ ജർമൻ ട്രിബ്യൂ​ണി​ലെ വിശി​ഷ്ട​മായ നിർദേ​ശങ്ങൾ ശ്രദ്ധി​ക്കുക: “എല്ലായ്‌പോ​ഴും കുട്ടി​യു​ടെ ശ്രദ്ധ പിടി​ച്ചു​പ​റ​റും വിധം അതി​നോ​ടു സംസാ​രി​ക്കുക: അതിന്റെ പേര്‌ കൂടെ​ക്കൂ​ടെ ഉപയോ​ഗി​ക്കുക, ദൃഷ്ടി​സ​മ്പർക്കം പുലർത്തുക, ലളിത​മായ ഭാഷ ഉപയോ​ഗി​ക്കുക.”

ദ്രോ​ഹി​ക്കു​ന്നത്‌ മാതാ​പി​താ​ക്കൾക്ക്‌ നിയ​ന്ത്രണം നഷ്ടമാ​കു​മ്പോ​ഴാണ്‌. ഒരു മാതാ​വോ പിതാ​വോ ആക്രോ​ശി​ക്കു​മ്പോൾ അവനോ അവൾക്കോ അപ്പോൾതന്നെ നിയ​ന്ത്രണം നഷ്ടപ്പെ​ട്ടി​രി​ക്കു​ന്നു. സദൃശ​വാ​ക്യ​ങ്ങൾ 15-ാം അധ്യായം കുട്ടി​കളെ വളർത്തു​ന്ന​തി​നെ​യും ശിക്ഷണം നൽകു​ന്ന​തി​നെ​യും കുറിച്ചു സംസാ​രി​ക്കു​ന്നു. ഉദാഹ​ര​ണ​ത്തിന്‌, 4-ാം വാക്യം ഇപ്രകാ​രം പ്രസ്‌താ​വി​ക്കു​ന്നു: “നാവിന്റെ ശാന്തത ജീവവൃ​ക്ഷം; അതിന്റെ വക്രത​യോ മനോ​വ്യ​സനം”; (ചെരി​ച്ചെ​ഴു​ത്തു ഞങ്ങളു​ടേത്‌.) 18-ാം വാക്യം: “ക്രോ​ധ​മു​ള്ളവൻ കലഹം ഉണ്ടാക്കു​ന്നു; ദീർഘ​ക്ഷ​മ​യു​ള്ള​വ​നോ കലഹം ശമിപ്പി​ക്കു​ന്നു”; (ചെരി​ച്ചെ​ഴു​ത്തു ഞങ്ങളു​ടേത്‌.) അവസാ​ന​മാ​യി 28-ാം വാക്യം: “നീതി​മാൻ മനസ്സിൽ ആലോ​ചി​ച്ചു ഉത്തരം പറയുന്നു.” (ചെരി​ച്ചെ​ഴു​ത്തു ഞങ്ങളു​ടേത്‌.) അതു​കൊണ്ട്‌, നാം എന്തു പറയു​ന്നു​വെ​ന്നതു മാത്രമല്ല പിന്നെ​യോ എങ്ങനെ പറയു​ന്നു​വെ​ന്ന​തും തിരി​ച്ച​റി​യേ​ണ്ടത്‌ പ്രധാ​ന​മാണ്‌.

നിന്ദി​ക്കലല്ല, പിന്നെ​യോ പ്രശം​സി​ക്കൽ

വളർത്തി​ക്കൊ​ണ്ടു​വ​രാൻ പ്രയാ​സ​മുള്ള കുട്ടികൾ നിർമാ​ണാ​ത്മ​ക​വും വിചി​ത്ര​വും ഭ്രാന്തു​പി​ടി​ച്ച​തു​പോ​ലു​മായ കാര്യങ്ങൾ ചെയ്യു​ന്ന​തു​കൊണ്ട്‌ മാതാ​പി​താ​ക്കൾ പെട്ടെന്നു തെററു​ക​ണ്ടു​പി​ടി​ക്ക​യും പരിഹ​സി​ക്ക​യും ശകാരി​ക്ക​യും കോപി​ച്ചു തട്ടിക്ക​യ​റു​ക​യും ചെയ്യാൻ പ്രവണത കാട്ടുന്നു. എന്നിരു​ന്നാ​ലും, ററു​ഡേ​യ്‌സ്‌ ഇംഗ്ലീഷ്‌ വേർഷൻ പറയു​ന്ന​ത​നു​സ​രിച്ച്‌ ബൈബിൾ എഫേസ്യർ 6:4-ൽ “ക്രിസ്‌തീയ ശിക്ഷണ​ത്തി​ലും പ്രബോ​ധ​ന​ത്തി​ലും” കുട്ടി​കളെ വളർത്തി​ക്കൊ​ണ്ടു​വ​രാൻ മാതാ​പി​താ​ക്കളെ പ്രബോ​ധി​പ്പി​ക്കു​ന്നു. യേശു തെററു​കാ​രെ എങ്ങനെ​യാണ്‌ ശിക്ഷി​ച്ചത്‌? ന്യായ​മാ​യും ദൃഢമാ​യും പടികൾ സ്വീക​രി​ച്ചു​കൊണ്ട്‌ യേശു പ്രബോ​ധ​നാ​ത്മ​ക​മായ ശിക്ഷണം ഉപയോ​ഗി​ച്ചു. തൻമൂലം ആളുകൾ പരിശീ​ലി​പ്പി​ക്ക​പ്പെ​ടു​ക​യും പഠിപ്പി​ക്ക​പ്പെ​ടു​ക​യു​മാ​ണു​ണ്ടാ​യത്‌. ശിക്ഷണം എന്നു പറയു​ന്നത്‌ ഒരു പ്രക്രി​യ​യാണ്‌, ഒരു പ്രബോ​ധന രീതി​യാണ്‌. കുട്ടി​ക​ളോട്‌ ഇടപെ​ടു​മ്പോൾ അത്‌ സാധാ​ര​ണ​മാ​യി കൂടെ​ക്കൂ​ടെ വേണ്ടി​വ​രു​ന്നു.—1992, സെപ്‌റ​റം​ബർ 8 ഉണരുക!യിലെ (ഇംഗ്ലീഷ്‌) “ബൈബി​ളി​ന്റെ വീക്ഷണം . . . ‘ശിക്ഷണ​ത്തി​നുള്ള വടി’—അതു പഴഞ്ചനോ?,” എന്ന ലേഖനം കാണുക.

ശരിയായ രീതി​യി​ലുള്ള ശിക്ഷണം ആശ്രയ​ത്തി​ന്റെ​യും ഊഷ്‌മ​ള​ത​യു​ടെ​യും സ്ഥിരത​യു​ടെ​യും ഒരു അന്തരീക്ഷം സൃഷ്ടി​ക്കു​ന്നു; അതു​കൊണ്ട്‌ ശിക്ഷണം ആവശ്യ​മാ​യി​രി​ക്കു​മ്പോൾ വിശദാം​ശങ്ങൾ നൽകി​ക്കൊണ്ട്‌ അത്‌ നടപ്പാ​ക്കണം. കുട്ടി​കളെ പരിശീ​ലി​പ്പി​ക്കു​മ്പോൾ ഉടനടി​യൊ​ന്നും പരിഹാ​ര​മു​ണ്ടാ​വില്ല. എന്തു​കൊ​ണ്ടെ​ന്നാൽ കുട്ടികൾ പഠിച്ചു​വ​രു​ന്നതു സാവധാ​ന​മാണ്‌, അതിന്‌ സമയ​മെ​ടു​ക്കും. ഏതൊരു കുട്ടി​യെ​യും, പ്രത്യേ​കിച്ച്‌ വളർത്തി​ക്കൊ​ണ്ടു​വ​രാൻ വിഷമ​മുള്ള കുട്ടി​കളെ, ശരിയായ രീതി​യിൽ വളർത്തി​യെ​ടു​ക്ക​ണ​മെ​ങ്കിൽ വളരെ​യ​ധി​കം ശ്രദ്ധയും സ്‌നേ​ഹ​വും സമയവും പ്രയത്‌ന​വും ആവശ്യ​മാണ്‌. പിൻവ​രുന്ന ഈ ചെറിയ ചൊല്ല്‌ ഓർമി​ക്കാൻ എളുപ്പ​മാണ്‌: “നിങ്ങൾ അർഥമാ​ക്കു​ന്നതു പറയുക, പറയു​ന്നത്‌ അർഥമാ​ക്കുക, നിങ്ങൾ ചെയ്യു​മെന്നു പറയു​ന്നത്‌ ചെയ്യുക.”

ഉപദ്ര​വ​ക​ര​മാ​യ സ്വഭാ​വ​മുള്ള കുട്ടി​ക​ളോട്‌ ഇടപെ​ടു​മ്പോ​ഴുള്ള ഏററവും നിരാ​ശാ​പൂർണ​മായ പ്രശ്‌ന​ങ്ങ​ളി​ലൊന്ന്‌ ശ്രദ്ധയാ​കർഷി​ക്കാ​നുള്ള അവരുടെ അതി​മോ​ഹ​മാണ്‌. ഒട്ടുമി​ക്ക​പ്പോ​ഴും അവർക്കു കിട്ടു​ന്നത്‌ ക്രിയാ​ത്മ​ക​മായ ശ്രദ്ധയ്‌ക്കു പകരം നിഷേ​ധാ​ത്മ​ക​മായ ശ്രദ്ധയാണ്‌. എന്നാൽ, ശ്രദ്ധി​ക്കാ​നും പ്രശം​സി​ക്കാ​നും നന്നായി പെരു​മാ​റി​യ​തി​നോ ഒരു ജോലി നന്നായി ചെയ്‌ത​തി​നോ പ്രതി​ഫലം നൽകാ​നും വേഗത​യു​ള്ള​വ​രാ​യി​രി​ക്കുക. ഇത്‌ കുട്ടിക്ക്‌ വളരെ പ്രോ​ത്സാ​ഹ​ജ​ന​ക​മാ​യി​രി​ക്കും. ആദ്യ​മൊ​ക്കെ നിങ്ങളു​ടെ ശ്രമങ്ങൾ അതിശ​യോ​ക്തി​പ​ര​മാ​യി തോന്നി​യേ​ക്കാം. എന്നാൽ അവ ഫലങ്ങൾക്കു തക്ക മൂല്യ​മു​ള്ള​താണ്‌. ചെറു​തെ​ങ്കി​ലും തൽക്ഷണം ലഭിക്കുന്ന പ്രതി​ഫ​ല​ങ്ങ​ളാണ്‌ കുട്ടി​കൾക്ക്‌ ആവശ്യം.

ഗ്രെഗി​നെ​ക്കൊ​ണ്ടു പിതാ​വി​നുള്ള ബുദ്ധി​മുട്ട്‌

“കിൻറർഗാർട്ട​നി​ലാ​യി​രു​ന്ന​പ്പോൾ അഞ്ചാമത്തെ വയസ്സിൽ ഞങ്ങളുടെ മകൻ ഗ്രെഗിന്‌ എഡിഎ​ച്ച്‌ഡി ഉള്ളതായി രോഗ​നിർണയം തെളി​യി​ച്ചു. അന്ന്‌ ഞങ്ങൾ ഒരു ശിശു​വ​ളർച്ചാ ശാസ്‌ത്ര​ജ്ഞനെ കണ്ടു. ഗ്രെഗിന്‌ തീർച്ച​യാ​യും എഡിഎ​ച്ച്‌ഡി ഉണ്ടെന്ന്‌ അദ്ദേഹം സ്ഥിരീ​ക​രി​ച്ചു. അദ്ദേഹം ഞങ്ങളോ​ടു പറഞ്ഞു: ‘ഇത്‌ അവന്റെ​യോ നിങ്ങളു​ടെ​യോ കുഴപ്പമല്ല, അവന്‌ അതു സംബന്ധിച്ച്‌ ഒന്നും ചെയ്യാ​നാ​വില്ല, എന്നാൽ നിങ്ങൾക്കാ​കും.’

“എഡിഎ​ച്ച്‌ഡി​യെ തരണം ചെയ്യു​ന്ന​തിന്‌ ഞങ്ങളുടെ മകനെ സഹായി​ക്കാൻ മാതാ​പി​താ​ക്ക​ളെന്ന നിലയിൽ ഞങ്ങൾക്കുള്ള വലിയ ഉത്തരവാ​ദി​ത്വ​ത്തെ സുവ്യ​ക്ത​മാ​ക്കി തന്ന ആ വാക്കു​ക​ളെ​പ്പ​ററി ഞങ്ങൾ പലപ്പോ​ഴും ചിന്തി​ക്കാ​റുണ്ട്‌. അന്നു ഡോക്ടർ ഞങ്ങൾക്കു വായി​ക്കാ​നാ​യി സാഹി​ത്യ​ങ്ങൾ തന്നുവി​ട്ടു. കഴിഞ്ഞ മൂന്നു വർഷങ്ങൾകൊ​ണ്ടു ഞങ്ങൾക്കു ലഭിച്ച പരിജ്ഞാ​നം മാതാ​പി​താ​ക്ക​ളെന്ന നിലയിൽ ഞങ്ങൾക്കു ഗ്രെഗി​നോ​ടുള്ള ഉത്തരവാ​ദി​ത്വ​ങ്ങൾ നിറ​വേ​റ​റു​ന്ന​തിൽ വളരെ പ്രധാ​ന​മാ​യി​രു​ന്നി​ട്ടുണ്ട്‌ എന്ന്‌ ഞങ്ങൾ വിശ്വ​സി​ക്കു​ന്നു.

“ശരിയായ സ്വഭാ​വ​ത്തിന്‌ ഊന്നൽ നൽകേ​ണ്ട​തും മുന്നറി​യി​പ്പു​കൾ നൽകേ​ണ്ട​തും മോശ​മായ സ്വഭാവം കാണി​ക്കു​മ്പോൾ ആവശ്യ​മെ​ങ്കിൽ ശിക്ഷി​ക്കേ​ണ്ട​തും എഡിഎ​ച്ച്‌ഡി​യുള്ള ഒരു കുട്ടിയെ വളർത്തി​ക്കൊ​ണ്ടു​വ​രു​ന്ന​തിൽ മർമ​പ്ര​ധാ​ന​മാണ്‌. നിങ്ങൾക്ക്‌ എത്രയ​ധി​കം പ്ലാനും സ്ഥിരത​യും ഉള്ളവരാ​യി​രി​ക്കാൻ കഴിയു​ന്നു​വോ അത്രയ​ധി​കം മെച്ചമാ​യി​രി​ക്കും പ്രതി​ഫ​ല​ങ്ങ​ളും. ലളിത​മായ ഈ പ്രസ്‌താ​വ​ന​ക​ളാണ്‌ ഒരുപക്ഷേ ഒരു എഡിഎ​ച്ച്‌ഡി കുട്ടിയെ വളർത്തി​ക്കൊ​ണ്ടു​വ​രു​ന്ന​തി​ലെ മുഖ്യ ഘടകം. എന്നാൽ നിങ്ങൾക്ക്‌ ഇത്‌ ഒരു ദിവസം തന്നെ പല തവണ ചെയ്യേ​ണ്ടി​വ​രു​ന്ന​തു​കൊണ്ട്‌ പറയു​ന്ന​തു​പോ​ലെ എളുപ്പമല്ല ചെയ്യാൻ.

“ഞങ്ങൾ ഏററവും ഫലപ്ര​ദ​മാ​യി കണ്ടിരി​ക്കുന്ന ഒരു ഉപായം ഇടവേ​ളകൾ അനുവ​ദി​ക്കു​ന്ന​താണ്‌. മോശ​മായ ഒരു സ്വഭാവം മാററു​ന്ന​തിന്‌ ഞങ്ങൾ ഇടവേ​ളകൾ അനുവ​ദി​ക്കു​മ്പോ​ഴെ​ല്ലാം കൂടുതൽ ക്രിയാ​ത്മ​ക​മായ ഒരു പെരു​മാ​റ​റ​ത്തിന്‌ ഊന്നൽ നൽകുന്ന ഒരു പരിപാ​ടി​യും ഇടും. ഇത്‌ അംഗീ​കാ​ര​ത്തി​ന്റെ ഒരു വാക്കോ, ആലിം​ഗ​ന​മോ അല്ലെങ്കിൽ ഒരു സമ്മാന​മോ പദവി​യോ ആയിരി​ക്കാം. ഞങ്ങൾ കടയിൽ ചെന്ന്‌ ഒരു സ്‌ററി​ക്കർ ചാർട്ട്‌ വാങ്ങി. ഉചിത​മായ പെരു​മാ​ററം എന്തെന്ന്‌ ഞങ്ങൾ അതിന്റെ മുകളിൽ എഴുതി​വെച്ചു. ഗ്രെഗ്‌ ഉചിത​മാ​യി പെരു​മാ​റു​ന്ന​താ​യി കാണുന്ന ഓരോ പ്രാവ​ശ്യ​വും ചാർട്ടിൽ ഒട്ടിക്കാൻ ഞങ്ങൾ അവന്‌ ഒരു സ്‌ററി​ക്കർ കൊടു​ക്കും. ചാർട്ട്‌ നിറയു​മ്പോൾ, ഉദാഹ​ര​ണ​ത്തിന്‌ 20 സ്‌ററി​ക്ക​റാ​കു​മ്പോൾ, അവനൊ​രു പ്രതി​ഫലം ലഭിക്കും. ഈ പ്രതി​ഫലം സാധാ​ര​ണ​മാ​യി അവൻ യഥാർഥ​ത്തിൽ ആസ്വദി​ക്കുന്ന എന്തെങ്കി​ലു​മാ​യി​രി​ക്കും, പാർക്കിൽ പോകു​ന്ന​തു​പോ​ലെ. അത്‌ നന്നായി പ്രവർത്തി​ക്കാൻ അവനെ പ്രേരി​പ്പി​ക്കു​ന്ന​തു​കൊണ്ട്‌ സഹായ​ക​മാണ്‌. താൻ എങ്ങനെ​യാണ്‌ പെരു​മാ​റു​ന്ന​തെ​ന്നും പ്രതി​ഫ​ല​ത്തോട്‌ എത്രമാ​ത്രം അടുത്താ​ണെ​ന്നും സ്‌ററി​ക്കർ ഒട്ടിക്കു​മ്പോൾ അവന്‌ കാണാൻ കഴിയും.

“ഞങ്ങൾ ഫലപ്ര​ദ​മാ​യി കണ്ടിരി​ക്കുന്ന മറെറാ​രു രീതി, തിര​ഞ്ഞെ​ടു​ക്കാൻ ഗ്രെഗി​നെ അനുവ​ദി​ക്കു​ന്ന​താണ്‌. നേരിട്ട്‌ ആജ്ഞാപി​ക്കു​ന്ന​തി​നു പകരം ഞങ്ങൾ തിര​ഞ്ഞെ​ടു​ക്കാൻ അവനെ അനുവ​ദി​ക്കു​ന്നു. ഒന്നുകിൽ അവന്‌ ഉചിത​മാ​യി പെരു​മാ​റാം അല്ലെങ്കിൽ ന്യായ​മായ പരിണ​ത​ഫലം അനുഭ​വി​ക്കാം. ഇത്‌ ഉത്തരവാ​ദി​ത്വ​മു​ള്ള​വ​നാ​യി​രി​ക്കാ​നും ശരിയായ തീരു​മാ​ന​ങ്ങ​ളെ​ടു​ക്കാ​നും അവനെ പഠിപ്പി​ക്കു​ന്നു. കടയി​ലോ റെസ്‌റ​റ​റൻറി​ലോ മോശ​മാ​യി പെരു​മാ​റു​ന്ന​തു​പോ​ലെ അത്‌ തുടർന്നു​പോ​കുന്ന ഏതെങ്കി​ലും ഒരു പ്രശ്‌ന​മാ​ണെ​ങ്കിൽ, പ്രതി​ഫലം നൽകി​ക്കൊ​ണ്ടുള്ള ഒരു സ്‌ററി​ക്കർ ചാർട്ട്‌ ഉപയോ​ഗി​ക്കാൻ കഴിയും. അങ്ങനെ ഉചിത​മായ പെരു​മാ​റ​റ​ത്തി​ന്റെ പ്രയോ​ജ​നങ്ങൾ അവൻ മനസ്സി​ലാ​ക്കു​ക​യും അവന്റെ പുരോ​ഗ​തി​ക​ളിൽ ഞങ്ങൾ അംഗീ​കാ​രം പ്രകട​മാ​ക്കു​ക​യും ചെയ്യുന്നു.

“സ്വഭാ​വ​ത്തെ​യും പ്രതി​ക​ര​ണ​ങ്ങ​ളെ​യും നിയ​ന്ത്രി​ക്കാ​നുള്ള കുട്ടി​യു​ടെ പ്രാപ്‌തി​യെ എഡിഎ​ച്ച്‌ഡി ബാധി​ക്കുന്ന കാര്യം മിക്ക ആളുകൾക്കും അറിയാൻ പാടില്ല. കൂടുതൽ മെച്ചമാ​യി ശ്രമി​ക്കുന്ന പക്ഷം ഈ കുട്ടി​കൾക്ക്‌ തങ്ങളുടെ ശ്രദ്ധാ പരിധി​യും സ്വഭാ​വ​വും നിയ​ന്ത്രി​ക്കാൻ കഴിയു​മെ​ന്നും അവർ പരാജ​യ​പ്പെ​ടു​ന്നെ​ങ്കിൽ അത്‌ മാതാ​പി​താ​ക്ക​ളു​ടെ കുററ​മാ​ണെ​ന്നും പല ആളുക​ളും വിശ്വ​സി​ക്കു​ന്നു.

“രാജ്യ​ഹാ​ളി​ലെ സഭാ​യോ​ഗ​ത്തിൽ രണ്ടു മണിക്കൂർനേരം അനങ്ങാ​തെ​യി​രി​ക്ക​ണ​മെന്നു പറയു​ന്നത്‌ എഡിഎ​ച്ച്‌ഡി​യുള്ള ഒരു കുട്ടിയെ സംബന്ധി​ച്ചി​ട​ത്തോ​ളം ശാരീ​രി​ക​മാ​യി അസാധ്യ​മാണ്‌. വെറും അഞ്ചു വയസ്സു​ണ്ടാ​യി​രു​ന്ന​പ്പോൾ ഗ്രെഗ്‌ ഓരോ മീററിം​ഗി​നും മുമ്പു കരഞ്ഞു​കൊണ്ട്‌ ചോദി​ക്കു​ന്നത്‌ ഞങ്ങൾ ഒരിക്ക​ലും മറക്കില്ല, ‘ഇത്‌ വലിയ മീററിം​ഗാ​ണോ ചെറിയ മീററിം​ഗാ​ണോ?’ അത്‌ രണ്ടു മണിക്കൂർ നേരത്തെ മീററിം​ഗാ​ണെ​ങ്കിൽ അവൻ വലിയ വായിൽ കരയു​മാ​യി​രു​ന്നു. എന്തു​കൊ​ണ്ടെ​ന്നാൽ അത്രയും സമയം ഇരിക്കാൻ തനിക്കു സാധ്യ​മ​ല്ലെന്ന്‌ അവനറി​യാ​മാ​യി​രു​ന്നു. അതുണ്ടാ​ക്കുന്ന ക്രമ​ക്കേ​ടു​ക​ളും പരിമി​തി​ക​ളും ഞങ്ങൾ വകവെ​ച്ചു​കൊ​ടു​ക്കേ​ണ്ടി​യി​രി​ക്കു​ന്നു. ആരെക്കാ​ളു​മ​ധി​ക​മാ​യി യഹോവ ഈ ക്രമ​ക്കേട്‌ മനസ്സി​ലാ​ക്കു​ന്നു​ണ്ടെന്നു ഞങ്ങൾക്ക​റി​യാം. അത്‌ ആശ്വാ​സ​ത്തി​നുള്ള ഒരു കാരണ​മാണ്‌. ഇപ്പോൾ ഗ്രെഗ്‌ ചികി​ത്സ​യി​ലല്ല. അവന്‌ പ്രായ​ത്തി​നു തക്ക വിദ്യാ​ഭ്യാ​സ പുരോ​ഗ​തി​യു​മുണ്ട്‌.

“യഹോ​വയെ ഞങ്ങളുടെ പ്രത്യാ​ശ​യാ​ക്കു​ന്ന​തും പുതിയ ലോക​ത്തി​ലേക്കു ദൃഷ്ടി​കളെ നടുന്ന​തു​മാ​ണു ഞങ്ങളെ നിലനിർത്തി​പ്പോ​രുന്ന സംഗതി. ഞങ്ങളുടെ പ്രത്യാശ ഇപ്പോൾതന്നെ ഗ്രെഗിന്‌ വളരെ​യ​ധി​കം അർഥവ​ത്താണ്‌. പറുദീ​സാ ഭൂമി​യിൽ യഹോവ എഡിഎ​ച്ച്‌ഡി നീക്കി​ക്ക​ള​യു​ന്ന​തി​നെ​ക്കു​റി​ച്ചു ചിന്തി​ക്കു​മ്പോൾ അവൻ യഥാർഥ​ത്തിൽ ആവേശം കൊള്ളു​ന്നു. അവന്റെ കണ്ണുകൾ നിറയു​ക​പോ​ലും ചെയ്യുന്നു.”

[9-ാം പേജിലെ ചതുരം]

സൽസ്വഭാവത്തിനുള്ള സാധ്യ​മായ പ്രതി​ഫ​ലങ്ങൾ:

1. പ്രശംസ—ഒരു ജോലി നന്നായി ചെയ്‌ത​തി​നുള്ള പ്രശം​സാ​വാ​ക്കു​കൾ; സ്‌നേഹം, ആലിം​ഗ​നങ്ങൾ, മുഖഭാ​വ​ങ്ങ​ളിൽ ഊഷ്‌മളത എന്നിവ​യോ​ടൊ​പ്പം സൽസ്വ​ഭാ​വ​ത്തി​നു പ്രകട​മാ​ക്കുന്ന വിലമ​തിപ്പ്‌.

2. ചാർട്ട്‌ പദ്ധതി—സൽസ്വ​ഭാ​വത്തെ പ്രോ​ത്സാ​ഹി​പ്പി​ക്കു​ന്ന​തി​നാ​യി ആകർഷ​ക​മായ സ്‌ററി​ക്ക​റു​ക​ളോ നക്ഷത്ര​ങ്ങ​ളോ ഒട്ടിച്ച ചാർട്ട്‌ ശ്രദ്ധയാ​കർഷി​ക്കുന്ന ഒരു സ്ഥാനത്തു പ്രദർശി​പ്പി​ക്കു​ന്നു.

3. നല്ല കാര്യ​ങ്ങ​ളു​ടെ ലിസ്‌ററ്‌—സ്വീകാ​ര്യ​വും പ്രശം​സ​നീ​യ​വു​മായ നേട്ടങ്ങ​ളു​ടെ തന്നെ. കുട്ടി നല്ലതെ​ന്തെ​ങ്കി​ലും ചെയ്യുന്ന ഓരോ പ്രാവ​ശ്യ​വും, ആദ്യ​മൊ​ക്കെ അത്‌ എത്ര നിസ്സാ​ര​മാ​യി​രു​ന്നാ​ലും, എഴുതി​യി​ടു​ക​യും കുടും​ബാം​ഗ​ങ്ങ​ളിൽ ഒരാളെ വായി​ച്ചു​കേൾപ്പി​ക്കു​ക​യും ചെയ്യുക.

4. ഒരു സ്വഭാവ സൂചിക—കുട്ടി എന്തെങ്കി​ലും നല്ല കാര്യം ചെയ്യു​മ്പോൾ കുട്ടി​യു​ടെ പ്രായ​മ​നു​സ​രിച്ച്‌ ഒരു ജാറിൽ പയറോ മിഠാ​യി​യോ ഇട്ടു​കൊ​ടു​ക്കു​ന്നു (കാണാ​വുന്ന പ്രോ​ത്സാ​ഹനം). സിനി​മ​യ്‌ക്കു പോകൽ, മഞ്ഞിൽ തെന്നി​ക്ക​ളി​ക്കൽ (skating), അല്ലെങ്കിൽ ഒരു റെസ്‌റ​റ​റൻറിൽനിന്ന്‌ ആഹാരം കഴിക്കൽ എന്നിങ്ങനെ കുടും​ബം പോകാൻ ഏതായാ​ലും തീരു​മാ​നി​ച്ചി​രുന്ന എവി​ടെ​യെ​ങ്കി​ലും പ്രതി​ഫ​ല​മാ​യി കൊണ്ടു​പോ​കുന്ന ഒരു പോയിൻറു വ്യവസ്ഥ സ്ഥാപി​ക്കു​ക​യെ​ന്ന​താണ്‌ ലക്ഷ്യം. “നീ നന്നായി പെരു​മാ​റി​യി​ല്ലെ​ങ്കിൽ നമ്മൾ പോകില്ല” എന്ന്‌ കുട്ടി​യോട്‌ പറയു​ന്ന​തി​നു​പ​കരം “നീ നല്ലതാ​യി​രു​ന്നാൽ നമുക്ക്‌ പോകാം” എന്നു പറയുക. മാററം വരുത്താൻ ന്യായ​മായ സമയം അനുവ​ദി​ക്കു​ന്ന​തോ​ടൊ​പ്പം നിഷേ​ധാ​ത്മക ചിന്താ​ഗ​തി​യെ ക്രിയാ​ത്മക ചിന്താ​ഗ​തി​യാ​യി മാററുക എന്നതാണ്‌ താക്കോൽ.

[7-ാം പേജിലെ ചിത്രം]

സംഭാഷണങ്ങൾക്ക്‌ ചില​പ്പോൾ വൈകാ​രി​ക​മാ​യി ആളിക്ക​ത്താൻ കഴിയും

[8-ാം പേജിലെ ചിത്രം]

തീരുമാനങ്ങൾ എടുക്കു​മ്പോൾ അവ വിശദീ​ക​രി​ച്ചു​കൊ​ടു​ക്കു​ക​യും അവയോ​ടു പററി നിൽക്കു​ക​യും ചെയ്യുക

[10-ാം പേജിലെ ചിത്രം]

അവൻ അഭിമാ​ന​ത്തോ​ടെ ചാർട്ടിൽ ഒരു പുതിയ സ്‌ററി​ക്കർ കൂട്ടി​ച്ചേർക്കു​ന്നു