“അടങ്ങി​യി​രുന്ന്‌ ശ്രദ്ധിക്കൂ!”

ശ്രദ്ധക്കുറവും അമിത ചുറു​ചു​റു​ക്കും ഉൾപ്പെട്ട ക്രമ​ക്കേടു പേറി​യുള്ള ജീവിതം

“കാളിനെ ലാളിച്ചു വഷളാ​ക്കി​യ​താ​ണെന്നു ജിം എപ്പോ​ഴും പറയും. ഞങ്ങൾ—അതായത്‌ ഞാൻ—അവനു നല്ല ശിക്ഷണം നൽകി​യാൽ അവൻ നന്നാകു​മ​ത്രേ. അപ്പോ​ഴതാ, ഈ ഡോക്ടർ പറയുന്നു, അത്‌ എന്റെയോ ഞങ്ങളു​ടെ​യോ കാളിന്റെ അധ്യാ​പ​ക​രു​ടെ​യോ കുറ്റമല്ല, ഞങ്ങളുടെ കൊച്ചു​മ​കനു വാസ്‌ത​വ​ത്തിൽ എന്തോ കുഴപ്പ​മു​ണ്ടെന്ന്‌.”

കാളിന്‌ ശ്രദ്ധക്കു​റ​വും അമിത ചുറു​ചു​റു​ക്കും ഉൾപ്പെട്ട ക്രമ​ക്കേട്‌ (എഡിഎ​ച്ച്‌ഡി) ആണ്‌. ശ്രദ്ധക്കു​റവ്‌, അനിയ​ന്ത്രിത പെരു​മാ​റ്റം, അമിത ചുറു​ചു​റുക്ക്‌ എന്നിവ ഇതിന്റെ സവി​ശേ​ഷ​ത​ക​ളാണ്‌. സ്‌കൂൾ പ്രായ​ത്തി​ലുള്ള കുട്ടി​ക​ളിൽ 3 മുതൽ 5 വരെ ശതമാ​ന​ത്തിന്‌ ഈ ക്രമ​ക്കേ​ടു​ണ്ടെന്നു കണക്കാ​ക്ക​പ്പെ​ടു​ന്നു. “ചാനൽ സെലക്ട​റു​കൾക്കു കേടു​പ​റ്റിയ ടിവി സെറ്റുകൾ പോ​ലെ​യാണ്‌ അവരുടെ മനസ്സ്‌,” പഠന വിദഗ്‌ധ​നായ പ്രിസില്ല എൽ. വേൽ പറയുന്നു. “അടുക്കും ചിട്ടയു​മി​ല്ലാ​തെ ചിന്തകൾ ഒന്നിനു​പു​റകേ ഒന്നായി ഉണ്ടാകു​ന്നു.”

എഡിഎ​ച്ച്‌ഡി-യുടെ മൂന്നു സുപ്ര​ധാന ലക്ഷണങ്ങൾ നമുക്കു പരിചി​ന്തി​ക്കാം.

ശ്രദ്ധക്കു​റവ്‌: എഡിഎ​ച്ച്‌ഡി ഉള്ള കുട്ടിക്ക്‌ പ്രാധാ​ന്യ​മി​ല്ലാത്ത വിവരങ്ങൾ അവഗണിച്ച്‌ ഒരു വിഷയ​ത്തിൽ മാത്രം ശ്രദ്ധ കേന്ദ്രീ​ക​രി​ക്കാൻ കഴിയു​ക​യില്ല. അങ്ങനെ, പുറ​മേ​നി​ന്നുള്ള കാഴ്‌ചകൾ, ശബ്ദങ്ങൾ, ഗന്ധങ്ങൾ എന്നിവ നിമിത്തം എളുപ്പ​ത്തിൽ അവനു ശ്രദ്ധാ​ശൈ​ഥി​ല്യ​മു​ണ്ടാ​കു​ന്നു.a അവൻ തീർച്ച​യാ​യും ശ്രദ്ധ ചെലു​ത്തു​ന്നു. അവന്റെ ചുറ്റു​പാ​ടു​മുള്ള പ്രത്യേ​കി​ച്ചൊ​ന്നും അവന്റെ ശ്രദ്ധ പിടി​ച്ചു​പ​റ്റു​ന്നില്ല. ഏതിനാ​ണു പ്രഥമ ശ്രദ്ധ നൽകേ​ണ്ട​തെന്ന്‌ അവനു നിർണ​യി​ക്കാൻ സാധി​ക്കു​ന്നില്ല.

അനിയ​ന്ത്രി​ത പെരു​മാ​റ്റം: എഡിഎ​ച്ച്‌ഡി ഉള്ള കുട്ടി ചിന്തി​ക്കു​ന്ന​തി​നു മുമ്പു പ്രവർത്തി​ക്കു​ന്നു. പരിണ​ത​ഫ​ലങ്ങൾ അവൻ കണക്കി​ലെ​ടു​ക്കു​ന്നില്ല. അവന്റെ ആസൂ​ത്ര​ണ​വും വിലയി​രു​ത്ത​ലും മോശ​മാ​യി​രി​ക്കും. ചില​പ്പോൾ അവന്റെ പ്രവൃ​ത്തി​കൾ അപകട​ക​ര​വു​മാ​യി​രി​ക്കും. “അവൻ തെരു​വി​ലേക്ക്‌ ഓടി​പ്പോ​കും, ജനാല​പ്പ​ടി​യി​ലേക്കു കയറും, മരത്തിൽ വലിഞ്ഞു​ക​യ​റും,” ഡോ. പോൾ വെൻഡർ എഴുതു​ന്നു. “ഇതിന്റെ ഫലമായി അവനു പല അനാവ​ശ്യ​മായ ചതവു​ക​ളും മുറി​വു​ക​ളും പറ്റുന്നു. എന്നിട്ടു ഡോക്ടറെ കാണുന്നു.”

അമിത ചുറു​ചു​റുക്ക്‌: അമിത ചുറു​ചു​റു​ക്കുള്ള കുട്ടികൾ എപ്പോ​ഴും അസ്വസ്ഥ​രാ​യി​രി​ക്കും. അവർക്ക്‌ അടങ്ങി​യി​രി​ക്കാൻ സാധി​ക്കു​ക​യില്ല. “പ്രായ​മാ​യാൽപ്പോ​ലും അവരെ സൂക്ഷ്‌മ​മാ​യി നിരീ​ക്ഷി​ക്കു​ക​യാ​ണെ​ങ്കിൽ കാലുകൾ, കാൽപ്പാ​ദം, കൈത്ത​ണ്ടകൾ, കൈകൾ, ചുണ്ടുകൾ അല്ലെങ്കിൽ നാക്ക്‌ എന്നിവ​യെ​ല്ലാം അവർ ചലിപ്പി​ച്ചു​കൊ​ണ്ടി​രി​ക്കു​ന്ന​താ​യി കാണാം,” അദ്യശ്യ അംഗ​വൈ​ക​ല്യം (ഇംഗ്ലീഷ്‌) എന്ന തന്റെ പുസ്‌ത​ക​ത്തിൽ ഗോർഡോൺ സെർഫോൻടീൻ പറയുന്നു.

എങ്കിലും, ശ്രദ്ധക്കു​റ​വും അനിയ​ന്ത്രിത പെരു​മാ​റ്റ​വും ഉള്ള ചില കുട്ടികൾ അമിത ചുറു​ചു​റു​ക്കു​ള്ള​വ​രാ​യി​രി​ക്കണ​മെ​ന്നില്ല. അവരുടെ ക്രമ​ക്കേ​ടി​നെ ചില​പ്പോൾ വെറും ശ്രദ്ധക്കു​റവു നിമി​ത്ത​മുള്ള ക്രമ​ക്കേട്‌ അല്ലെങ്കിൽ എഡിഡി എന്നു വിളി​ക്കു​ന്നു. എഡിഡി “യാതൊ​രു വിധത്തി​ലു​മുള്ള അമിത ചുറു​ചു​റു​ക്കും കൂടാ​തെ​തന്നെ ഉണ്ടാകാ​മെ​ന്നും അല്ലെങ്കിൽ ഏത്‌ അളവി​ലു​മുള്ള—തീരെ ശ്രദ്ധി​ക്ക​പ്പെ​ടാ​ത്ത​തോ അസഹ്യ​പ്പെ​ടു​ത്തു​ന്ന​തോ വളരെ കൂടു​ത​ലോ ആയ—അമിത ചുറു​ചു​റു​ക്കി​നോ​ടൊ​പ്പം ഉണ്ടാകാ​മെ​ന്നും” ഡോ. റൊനാൾഡ്‌ ഗോൾഡ്‌ബർഗ്‌ വിശദ​മാ​ക്കു​ന്നു.

എഡിഎ​ച്ച്‌ഡി ഉണ്ടാകാ​നുള്ള കാരണ​മെന്ത്‌?

വർഷങ്ങ​ളി​ലു​ട​നീ​ളം, ശ്രദ്ധാ​സം​ബ​ന്ധ​മായ പ്രശ്‌ന​ങ്ങൾക്കു കാരണ​മാ​യി എല്ലാറ്റി​നെ​യും കുറ്റ​പ്പെ​ടു​ത്തി​യി​ട്ടുണ്ട്‌, വളർത്തു​ദോ​ഷ​ത്തെ​മു​തൽ ഫ്‌ളൂ​റ​സൻറ്‌ പ്രകാ​ശ​സം​വി​ധാ​ന​ത്തെ​വരെ. എഡിഎ​ച്ച്‌ഡി, പ്രത്യേക മസ്‌തിഷ്‌ക പ്രവർത്ത​ന​ങ്ങ​ളി​ലെ ക്രമ​ക്കേ​ടു​ക​ളോ​ടു ബന്ധപ്പെ​ട്ടി​രി​ക്കു​ന്ന​താ​യി ഇപ്പോൾ കരുതു​ന്നു. 1990-ൽ ദേശീയ മാനസി​കാ​രോ​ഗ്യ ഇൻസ്റ്റി​റ്റ്യൂട്ട്‌, എഡിഎ​ച്ച്‌ഡി ഉള്ള പ്രായ​പൂർത്തി​യായ 25 പേരെ പരി​ശോ​ധി​ച്ച​പ്പോൾ, ചലന​ത്തെ​യും ശ്രദ്ധ​യെ​യും നിയ​ന്ത്രി​ക്കുന്ന തലച്ചോ​റി​ന്റെ ഭാഗങ്ങ​ളിൽ ഗ്ലൂക്കോസ്‌ ഉപാപ​ചയം വളരെ മന്ദഗതി​യി​ലാ​ണു നടക്കു​ന്ന​തെന്നു കണ്ടെത്തു​ക​യു​ണ്ടാ​യി. 40 ശതമാനം എഡിഎ​ച്ച്‌ഡി കേസു​ക​ളു​ടെ കാര്യ​ത്തിൽ വ്യക്തി​യു​ടെ ജനിതക ഘടന ഒരു പങ്കു വഹിക്കു​ന്ന​താ​യി കാണ​പ്പെ​ടു​ന്നു. ദ ഹൈപ്പ​റാ​ക്‌റ്റീവ്‌ ചൈൽഡ്‌ ബുക്ക്‌ പറയു​ന്ന​ത​നു​സ​രിച്ച്‌, എഡിഎ​ച്ച്‌ഡി-യുമായി ബന്ധപ്പെ​ട്ടി​രി​ക്കാ​വുന്ന മറ്റു ഘടകങ്ങൾ, ഗർഭകാ​ലത്ത്‌ മദ്യമോ മയക്കു​മ​രു​ന്നോ ഉപയോ​ഗി​ക്കു​ന്ന​തും ഈയ വിഷബാ​ധ​യും ഒറ്റപ്പെട്ട കേസു​ക​ളിൽ ആഹാര​ക്ര​മ​വു​മാണ്‌.

എഡിഎ​ച്ച്‌ഡി ഉള്ള കൗമാ​ര​പ്രാ​യ​ക്കാ​രും യുവാ​ക്ക​ളും

എഡിഎ​ച്ച്‌ഡി ഒരു ബാല്യ​കാല അവസ്ഥയ​ല്ലെന്നു ഡോക്ടർമാർ അടുത്ത​കാ​ലത്തു കണ്ടെത്തി​യി​രി​ക്കു​ന്നു. “മാതാ​പി​താ​ക്കൾ കുട്ടി​കളെ ചികി​ത്സ​യ്‌ക്കു കൊണ്ടു​വ​രു​മ്പോൾ, ‘കുട്ടി​യാ​യി​രു​ന്ന​പ്പോൾ ഞാനും ഇങ്ങനെ​ത​ന്നെ​യാ​യി​രു​ന്നു’ എന്നു പറയു​ന്നതു സാധാ​ര​ണ​മാണ്‌. എന്നിട്ട്‌, വരിയിൽനിൽക്കാ​നും യോഗ​ങ്ങൾക്ക്‌ അടങ്ങി​യി​രി​ക്കാ​നും കാര്യങ്ങൾ ചെയ്‌തു​തീർക്കാ​നും ഇപ്പോ​ഴും തങ്ങൾക്കു ബുദ്ധി​മു​ട്ടു​ണ്ടെന്ന്‌ അവർ സമ്മതി​ക്കും,” ഡോ. ലാറി സിൽവർ പറയുന്നു. എഡിഎ​ച്ച്‌ഡി ഉള്ള കുട്ടി​ക​ളിൽ പകുതി​യോ​ളം പേർക്കും അതിന്റെ ചില ലക്ഷണങ്ങൾ കൗമാ​ര​പ്രാ​യ​ത്തി​ലും മുതിർന്ന പ്രായ​ത്തി​ലും ഉള്ളതായി ഇപ്പോൾ വിശ്വ​സി​ക്ക​പ്പെ​ടു​ന്നു.

എഡിഎ​ച്ച്‌ഡി ഉള്ളവർ കൗമാ​ര​പ്രാ​യ​ത്തി​ലെ​ത്തു​മ്പോൾ അപകട​ക​ര​മായ പെരു​മാ​റ്റ​രീ​തി​കൾവി​ട്ടു കുറ്റകൃ​ത്യ​ങ്ങ​ളി​ലേക്കു തിരി​ഞ്ഞേ​ക്കാം. “അവൻ കോ​ളെജ്‌ വരെ എത്തി​ല്ലെ​ന്നാ​യി​രു​ന്നു എന്റെ വേവലാ​തി,” എഡിഎ​ച്ച്‌ഡി-യുള്ള ഒരു കൗമാ​ര​പ്രാ​യ​ക്കാ​രന്റെ അമ്മ പറയുന്നു. “അവൻ ജയിലിൽ പോ​കേ​ണ്ടി​വ​ര​രു​തേ എന്നാണ്‌ എന്റെ ഇപ്പോ​ഴത്തെ പ്രാർഥന.” അത്തരം ഭയം അസ്ഥാന​ത്ത​ല്ലെന്ന്‌ അമിത ചുറു​ചു​റു​ക്കുള്ള 103 യുവാ​ക്കളെ, ഈ ക്രമ​ക്കേ​ടി​ല്ലാത്ത 100 കുട്ടി​ക​ളു​ടെ ഒരു സംഘവു​മാ​യി താരതമ്യ പഠനം നടത്തി​യ​തി​ലൂ​ടെ വ്യക്തമാ​കു​ന്നു. “അമിത ചുറു​ചു​റു​ക്കു​കാ​രു​ടെ സംഘത്തി​ലെ കുട്ടി​ക​ളു​ടെ കാര്യ​ത്തിൽ 20-കളുടെ ആരംഭ​മാ​കു​മ്പോ​ഴേ​ക്കും അറസ്റ്റു ചെയ്യ​പ്പെ​ട്ട​താ​യുള്ള രേഖക​ളു​ണ്ടാ​കാ​നുള്ള സാധ്യത ഇരട്ടി​യാ​യി​രു​ന്നു, കുറ്റകൃ​ത്യ​വി​ചാ​ര​ണ​യ്‌ക്കുള്ള സാധ്യത അഞ്ചിര​ട്ടി​യാ​യി​രു​ന്നു, ജയിലി​ലാ​കാ​നുള്ള സാധ്യത ഒമ്പതി​ര​ട്ടി​യാ​യി​രു​ന്നു,” ന്യൂസ്‌വീക്ക്‌ റിപ്പോർട്ടു ചെയ്യുന്നു.

പ്രായ​പൂർത്തി​യായ ഒരാളെ സംബന്ധി​ച്ചി​ട​ത്തോ​ളം, എഡിഎ​ച്ച്‌ഡി പ്രത്യേക പ്രശ്‌നങ്ങൾ ഉളവാ​ക്കി​യേ​ക്കാം. ഡോ. എഡ്‌ന കോപ്‌ലാൻഡ്‌ പറയുന്നു: “അമിത ചുറു​ചു​റു​ക്കുള്ള കുട്ടി വളർന്നു വലുതാ​കു​മ്പോൾ കൂടെ​ക്കൂ​ടെ തൊഴിൽ മാറുന്ന, ഒട്ടേറെ തവണ അധികാ​ര​സ്ഥാ​ന​ത്തു​നി​ന്നു പിരി​ച്ചു​വി​ട​പ്പെ​ടുന്ന, ദിവസം മുഴുവൻ പാഴാ​ക്കുന്ന, അസ്വസ്ഥ​നായ ഒരാളാ​യി മാറി​യേ​ക്കാം.” കാരണം മനസ്സി​ലാ​കാ​തെ പോകു​മ്പോൾ ഈ ലക്ഷണങ്ങൾ വിവാ​ഹ​ബ​ന്ധത്തെ ഉലച്ചേ​ക്കാം. “കൊച്ചു കൊച്ചു സംഭാ​ഷ​ണ​ങ്ങ​ളിൽപ്പോ​ലും ഞാൻ പറയു​ന്നതു മുഴുവൻ അദ്ദേഹം കേൾക്കില്ല. അദ്ദേഹം എപ്പോ​ഴും മറ്റെവി​ടെ​യോ ആണെന്നു തോന്നും,” എഡിഎ​ച്ച്‌ഡി ഉള്ള ഒരു മനുഷ്യ​ന്റെ ഭാര്യ പറയുന്നു.

തീർച്ച​യാ​യും, ഇത്തരം സ്വഭാ​വ​വി​ശേ​ഷങ്ങൾ പല ആളുക​ളി​ലും സാധാ​ര​ണ​മാ​യി കാണാം. കുറഞ്ഞ​പക്ഷം, ചെറി​യൊ​ര​ള​വി​ലെ​ങ്കി​ലും. “അത്തരം ലക്ഷണങ്ങൾ എല്ലായ്‌പോ​ഴും ഉണ്ടായി​രു​ന്നി​ട്ടു​ണ്ടോ എന്നു ചോദി​ക്കേ​ണ്ടി​യി​രി​ക്കു​ന്നു,” ഡോ. ജോർജ്‌ ഡോറി പറയുന്നു. ഉദാഹ​ര​ണ​ത്തിന്‌, തൊഴിൽ നഷ്ടപ്പെ​ട്ട​ശേ​ഷ​മോ ഭാര്യ​യു​ടെ പ്രസവ​ത്തോ​ടെ​യോ മാത്ര​മാണ്‌ ഒരാൾക്ക്‌ ഓർമ​ക്കേ​ടു​ണ്ടാ​കാൻ തുടങ്ങി​യ​തെ​ങ്കിൽ അത്‌ ഒരു വൈക​ല്യ​മ​ല്ലെന്ന്‌ അദ്ദേഹം അഭി​പ്രാ​യ​പ്പെ​ടു​ന്നു.

അതിലു​മു​പ​രി, ഒരു വ്യക്തിക്കു യഥാർഥ​ത്തിൽ എഡിഎ​ച്ച്‌ഡി ഉണ്ടെങ്കിൽ ലക്ഷണങ്ങൾ സർവവ്യാ​പ​ക​മാ​യി​രി​ക്കും—അതായത്‌, വ്യക്തി​യു​ടെ ജീവി​ത​ത്തി​ന്റെ എല്ലാ വശങ്ങ​ളെ​യും അതു ബാധി​ക്കും. ശ്രദ്ധാ​ശൈ​ഥി​ല്യ​മി​ല്ലാ​തെ ഒരു പ്രവൃ​ത്തി​പോ​ലും പൂർത്തി​യാ​ക്കാൻ കഴിയാ​ത്ത​താ​യി കാണപ്പെട്ട, ബുദ്ധി​മാ​നും ഉത്സാഹി​യു​മായ 38 വയസ്സു​കാ​രൻ ഗാരി​യു​ടെ കാര്യം ഇതുത​ന്നെ​യാ​യി​രു​ന്നു. അദ്ദേഹം ഇതി​നോ​ടകം 120-ലേറെ തൊഴി​ലു​കൾ ചെയ്‌തി​ട്ടുണ്ട്‌. “എനിക്ക്‌ ഒട്ടും വിജയി​ക്കാ​നാ​കു​ക​യി​ല്ലെന്ന വസ്‌തുത ഞാൻ അംഗീ​ക​രി​ച്ചു​ക​ഴി​ഞ്ഞു,” അദ്ദേഹം പറഞ്ഞു. എന്നാൽ, ഗാരി​ക്കും മറ്റു പലർക്കും—കുട്ടി​കൾക്കും കൗമാ​ര​പ്രാ​യ​ക്കാർക്കും മുതിർന്ന​വർക്കും—എഡിഎ​ച്ച്‌ഡി തരണം ചെയ്യാ​നുള്ള സഹായം ലഭിച്ചി​ട്ടുണ്ട്‌. എങ്ങനെ?

[അടിക്കു​റിപ്പ്‌]