ശാസ്‌ത്ര കൽപ്പി​തകഥ—ജനപ്രീ​തി​യി​ലേ​ക്കുള്ള അതിന്റെ ഉയർച്ച

അമേരി​ക്കൻ ചലച്ചിത്ര വ്യവസാ​യത്തെ സംബന്ധി​ച്ചി​ട​ത്തോ​ളം, 1982 എന്ന വർഷം ഒരു പ്രഥമ​സം​ഭ​വ​ത്തി​നു സാക്ഷ്യം വഹിച്ചു. 1982/83-ലെ സീസണിൽ ഏറ്റവും പേരു​കേട്ട “ചലച്ചി​ത്ര​താ​രം” ഒരു വ്യക്തി ആയിരു​ന്നില്ല. ദി ഇല്ലസ്‌​ട്രേ​റ്റഡ്‌ ഹിസ്റ്ററി ഓഫ്‌ ദ സിനിമ പറയു​ന്ന​ത​നു​സ​രിച്ച്‌, ഇറ്റി: ദി എക്‌സ്‌ട്രാ​ടെ​റ​സ്‌ട്രി​യൽ എന്ന ചലച്ചി​ത്ര​ത്തിൽ താരമാ​യി തിളങ്ങിയ, ബഹിരാ​കാ​ശ​ത്തു​നി​ന്നുള്ള, വിചി​ത്ര​മെ​ങ്കി​ലും ഏതോ വിധത്തിൽ അഴകുള്ള, ഇറ്റി എന്ന കഥാപാ​ത്ര​മാ​യി​രു​ന്നു അത്‌.

സമീപ വർഷങ്ങ​ളിൽ ശാസ്‌ത്ര കൽപ്പി​ത​ക​ഥ​യ്‌ക്കു (science fiction—എസ്‌എഫ്‌) ലഭിച്ചു​കൊ​ണ്ടി​രി​ക്കുന്ന വർധിച്ച ജനപ്രീ​തി​യു​ടെ ഒരു തെളിവു മാത്ര​മാ​ണു ശ്രദ്ധേ​യ​മായ ഈ സാഹച​ര്യം. ഒരിക്കൽ നിലവാ​രം കുറഞ്ഞ മാസി​ക​കൾക്ക്‌ അയച്ചു​കൊ​ടു​ത്തി​രു​ന്ന​തും ഏകാന്ത​രും സ്വപ്‌ന​ജീ​വി​ക​ളും ഇഷ്ടപ്പെ​ട്ടി​രു​ന്ന​തു​മായ ശാസ്‌ത്ര കൽപ്പി​തകഥ ഇപ്പോൾ മുഖ്യ​ധാ​രാ​വി​നോ​ദ​ത്തി​ന്റെ ഒരു സുസ്ഥാ​പിത ഭാഗമാ​യി​ത്തീർന്നി​രി​ക്കു​ക​യാണ്‌. എന്നാൽ നാടകീ​യ​മായ ഈ ജനപ്രീ​തി ലഭിച്ച​തി​ന്റെ പിന്നി​ലുള്ള കാരണ​മെ​ന്താണ്‌?

ഈ ചോദ്യ​ത്തിന്‌ ഉത്തരം ലഭിക്കു​ന്ന​തിന്‌, ആദ്യമാ​യി ശാസ്‌ത്ര കൽപ്പി​ത​ക​ഥ​യു​ടെ ചരിത്രം നാം പരി​ശോ​ധി​ക്കേ​ണ്ട​തുണ്ട്‌. അമ്പരപ്പും മതിപ്പും ഉളവാ​ക്കുന്ന തിനു വേണ്ടി​യോ വെറും വിനോ​ദ​ത്തി​നു വേണ്ടി​യോ ആളുകൾ സ്‌മര​ണാ​തീ​ത​കാ​ലം മുതൽതന്നെ സങ്കൽപ്പ​ക​ഥകൾ പറഞ്ഞി​ട്ടുണ്ട്‌. എന്നിരു​ന്നാ​ലും, 17-ഉം 18-ഉം നൂറ്റാ​ണ്ടു​ക​ളിൽ യൂറോപ്പ്‌ ശാസ്‌ത്രീ​യ​വും ഭൗതി​ക​വു​മായ പുരോ​ഗ​തി​യു​ടെ ഒരു കാലഘ​ട്ട​ത്തിൽ പ്രവേ​ശി​ച്ചു. പരമ്പരാ​ഗ​ത​മായ ആശയങ്ങ​ളും അധികാ​ര​ങ്ങ​ളും പഴഞ്ചനാ​ണെന്നു പറഞ്ഞ്‌ പലരും വിവാ​ദ​മു​യർത്താൻ തുടങ്ങി. അത്തര​മൊ​രു സാഹച​ര്യ​ത്തിൽ, ഭാവി​യിൽ ശാസ്‌ത്ര പുരോ​ഗതി മനുഷ്യ​വർഗത്തെ എങ്ങനെ സ്വാധീ​നി​ക്കു​മെ​ന്നതു സംബന്ധി​ച്ചു ചിലർ ഊഹാ​പോ​ഹങ്ങൾ നടത്താൻ തുടങ്ങി.

കൃത്യ​മാ​യി പറഞ്ഞാൽ, ആരാണു ശാസ്‌ത്ര കൽപ്പി​ത​ക​ഥ​യ്‌ക്കു തുടക്ക​മി​ട്ടത്‌ എന്നുള്ളത്‌ ഒരു തർക്കവി​ഷ​യ​മാണ്‌. പതി​നേ​ഴാം നൂറ്റാ​ണ്ടി​ലെ ഗ്രന്ഥകർത്താ​ക്ക​ളായ ഫ്രാൻസിസ്‌ ഗോഡ്‌വി​നും സിറ​നോ​ഡെ​ബർഷെ​റാ​ക്കും, ബഹിരാ​കാ​ശ​യാ​ത്ര ഉൾപ്പെട്ട കൽപ്പിത കൃതികൾ എഴുതു​ക​യു​ണ്ടാ​യി. 1818-ൽ മേരി ഷെല്ലി ഫ്രാ​ങ്കെൻസ്റ്റീൻ, ഓർ ദ മോഡേൺ പ്രൊ​മി​ത്യൂസ്‌ എന്ന തന്റെ പുസ്‌ത​ക​ത്തിൽ ജീവനെ സൃഷ്ടി​ക്കാൻ പ്രാപ്‌തി​യുള്ള ഒരു ശാസ്‌ത്ര​ജ്ഞനെ ചിത്രീ​ക​രി​ക്കു​ക​യും അതിന്റെ ഭീതി​ദ​മായ പ്രത്യാ​ഘാ​ത​ങ്ങളെ വരച്ചു​കാ​ട്ടു​ക​യും ചെയ്‌തു.

മനുഷ്യ​സ​മൂ​ഹ​ത്തി​ന്റെ പിഴവു​കളെ എടുത്തു​കാ​ട്ടാൻ ചില എഴുത്തു​കാർ ഇത്തരം സങ്കൽപ്പത്തെ ഉപയോ​ഗി​ച്ചു. അങ്ങനെ ജോനഥൻ സ്വിഫ്‌റ്റ്‌ 18-ാം നൂറ്റാ​ണ്ടി​ലെ ഇംഗ്ലീഷ്‌ സമുദാ​യത്തെ പരിഹ​സി​ച്ച​പ്പോൾ, അദ്ദേഹം തന്റെ കൃതി​ക​ളി​ലൂ​ടെ ഒരു കൂട്ടം സാങ്കൽപ്പിക സമു​ദ്ര​യാ​ത്രകൾ അവതരി​പ്പി​ക്കു​ക​യു​ണ്ടാ​യി. അതിന്റെ അനന്തര​ഫ​ല​മാ​യി​രു​ന്നു ഗളിവ​റു​ടെ യാത്രകൾ. അതു ശാസ്‌ത്ര കൽപ്പി​ത​ക​ഥ​യി​ലെ “ആദ്യത്തെ സാഹിത്യ മാസ്റ്റർപീസ്‌” എന്നു വിളി​ക്ക​പ്പെട്ട, ശക്തമായ സ്വാധീ​നം ചെലു​ത്തിയ, ഒരു ദൃഷ്ടാ​ന്ത​ക​ഥ​യാ​യി​രു​ന്നു.

എന്നാൽ, ശാസ്‌ത്ര കൽപ്പിത നോവ​ലി​നെ ആധുനിക രൂപത്തി​ലാ​ക്കി​യ​തി​ന്റെ ബഹുമതി സാധാ​ര​ണ​മാ​യി ആരോ​പി​ക്ക​പ്പെ​ടാ​റു​ള്ളത്‌ ജൂൾസ്‌ വേണി​നും എച്ച്‌. ജി. വെൽസി​നു​മാണ്‌. 1865-ൽ വേൺ ഭൂമി​യിൽനി​ന്നു ചന്ദ്രനി​ലേക്ക്‌ എന്ന കൃതിക്കു ജന്മം കൊടു​ത്തു—അതു വിജയ​പ്ര​ദ​മായ നോവ​ലു​ക​ളു​ടെ ഒരു പരമ്പര​യാ​യി​രു​ന്നു. 1895-ൽ എച്ച്‌. ജി. വെൽസി​ന്റെ പ്രസിദ്ധ ഗ്രന്ഥമായ കാലയ​ന്ത്രം രംഗ​പ്ര​വേശം ചെയ്‌തു.

കൽപ്പി​തകഥ യാഥാർഥ്യ​മാ​കു​ന്നു

1900-ത്തിന്റെ തുടക്ക​ത്തിൽ ഈ ദാർശ​നി​ക​ന്മാ​രു​ടെ സ്വപ്‌ന​ങ്ങ​ളിൽ ചിലതി​നു സാക്ഷാ​ത്‌കാ​രം നൽകാൻ തുടങ്ങു​ക​യാ​യി​രു​ന്നു ശാസ്‌ത്ര​കാ​ര​ന്മാർ. ഡി ഗ്രോസ്സൻ (മഹാന്മാർ) എന്ന പുസ്‌തകം പറയു​ന്ന​ത​നു​സ​രിച്ച്‌, മനുഷ്യ​രു​ടെ ബഹിരാ​കാ​ശ​യാ​ത്ര എന്ന ജൂൾസ്‌ വേണിന്റെ സ്വപ്‌നം സാക്ഷാ​ത്‌ക​രി​ക്കാ​നുള്ള ശ്രമത്തിൽ ജർമൻ ഭൗതി​ക​ശാ​സ്‌ത്ര​ജ്ഞ​നായ ഹെർമാൻ ഓബെർത്ത്‌ വർഷങ്ങൾ ചെലവ​ഴി​ക്കു​ക​യു​ണ്ടാ​യി. ബഹിരാ​കാ​ശ​യാ​ത്ര​യ്‌ക്ക്‌ ഒരു ശാസ്‌ത്രീയ അടിസ്ഥാ​ന​മി​ടാൻ ഓബെർത്തി​ന്റെ കണക്കു​കൂ​ട്ട​ലു​കൾ സഹായി​ച്ചു. എന്നിരു​ന്നാ​ലും, ശാസ്‌ത്ര​കൽപ്പി​തകഥ സ്വാധീ​നം ചെലു​ത്തിയ ശാസ്‌ത്രജ്ഞൻ അദ്ദേഹം മാത്ര​മാ​യി​രു​ന്നില്ല. ശാസ്‌ത്ര കൽപ്പി​ത​ക​ഥ​യു​ടെ പ്രസിദ്ധ എഴുത്തു​കാ​ര​നായ റേയ്‌ ബ്രാഡ്‌ബറി ഇങ്ങനെ പറയുന്നു: “ജർമനി​യിൽ വേൺഹെർ ഫോൺ ബ്രാവ്‌ണും അദ്ദേഹ​ത്തി​ന്റെ സഹപ്ര​വർത്ത​ക​രും ഹൂസ്റ്റണി​ലെ​യും കേപ്പ്‌ കെന്നടി​യി​ലെ​യും എല്ലാവ​രും ചെറു​പ്പ​കാ​ലത്ത്‌ എച്ച്‌. ജി. വെൽസി​ന്റെ​യും ജൂൾസ്‌ വേണി​ന്റെ​യും കൃതികൾ വായി​ക്കു​ക​യു​ണ്ടാ​യി. തങ്ങൾ വളർന്നു​വ​ലു​താ​കു​മ്പോൾ അതെല്ലാം യാഥാർഥ്യ​മാ​ക്കു​മെന്ന്‌ അവർ തീരു​മാ​നി​ച്ചി​രു​ന്നു.”

വാസ്‌ത​വ​ത്തിൽ, പല രംഗങ്ങ​ളി​ലെ​യും പുതിയ കണ്ടുപി​ടി​ത്ത​ങ്ങ​ളു​ടെ ചവിട്ടു​പ​ടി​യാ​യി മാറി​യി​രി​ക്കു​ന്നു ശാസ്‌ത്ര കൽപ്പി​തകഥ. “ശാസ്‌ത്ര കൽപ്പി​തകഥ മുന്നമേ പ്രവചി​ക്കാത്ത കണ്ടുപി​ടി​ത്ത​ങ്ങ​ളും കണ്ടെത്ത​ലു​ക​ളും” അധിക​മി​ല്ലെന്നു ഗ്രന്ഥകാ​ര​നായ റെണെ ഓത്ത്‌ അവകാ​ശ​പ്പെ​ടു​ന്നു. അന്തർവാ​ഹി​നി​കൾ, റോ​ബോ​ട്ടു​കൾ, മനുഷ്യർ കയറിയ റോക്ക​റ്റു​കൾ തുടങ്ങി​യ​വ​യൊ​ക്കെ യാഥാർഥ്യ​ങ്ങ​ളാ​യി​ത്തീ​രു​ന്ന​തി​നു വളരെ മുമ്പു​തന്നെ ശാസ്‌ത്ര കൽപ്പി​ത​ക​ഥ​യി​ലെ സാധാ​ര​ണ​ഘ​ട​ക​ങ്ങ​ളാ​യി​രു​ന്നു. “ശാസ്‌ത്ര കൽപ്പി​തകഥ വായി​ക്കു​ക​യെ​ന്നാൽ മനസ്സിനെ വലിച്ചു​നീ​ട്ടുക” എന്നതാ​ണെന്നു ശാസ്‌ത്ര കൽപ്പി​ത​ക​ഥ​ക​ളു​ടെ എഴുത്തു​കാ​ര​നായ ഫ്രെഡ​റിക്‌ പോൾ തറപ്പി​ച്ചു​പ​റ​യു​ന്നു.

യഥാർഥ​ത്തിൽ എല്ലാ ശാസ്‌ത്ര കൽപ്പി​ത​ക​ഥ​യും ശാസ്‌ത്ര​ത്തെ​ക്കു​റി​ച്ചു​ള്ളതല്ല എന്നതു തീർച്ച​യാണ്‌. ഏറ്റവും പ്രസി​ദ്ധി​യുള്ള ചില ശാസ്‌ത്ര-കൽപ്പിത കഥാപു​സ്‌ത​ക​ങ്ങ​ളും ചലച്ചി​ത്ര​ങ്ങ​ളും വാസ്‌ത​വ​ത്തിൽ ചിലർ ശാസ്‌ത്ര​സ​ങ്കൽപ്പം എന്നു വിളി​ക്കു​ന്ന​തി​ന്റെ രൂപങ്ങ​ളാ​യി​രി​ക്കാം. ശാസ്‌ത്ര കൽപ്പി​ത​ക​ഥ​യിൽ പലപ്പോ​ഴും ശാസ്‌ത്രീയ യുക്തി​യാണ്‌ അതിന്റെ മുഖമു​ദ്ര, അതേസ​മയം സങ്കൽപ്പ​ക​ഥകൾ അവയുടെ ഗ്രന്ഥകർത്താ​വി​ന്റെ സങ്കൽപ്പ​ത്തിൽ മാത്രം ഒതുങ്ങു​ന്ന​വ​യാണ്‌. മാജി​ക്കും മാന്ത്രി​ക​വി​ദ്യ​യും പോലും ഒരു പങ്കു വഹി​ച്ചേ​ക്കാം.

എന്നിരു​ന്നാ​ലും, ഭാവിയെ സംബന്ധിച്ച ശാസ്‌ത്ര കൽപ്പി​ത​ക​ഥ​യു​ടെ വീക്ഷണങ്ങൾ എത്ര കൃത്യ​ത​യു​ള്ള​താണ്‌. എല്ലാ ശാസ്‌ത്ര കൽപ്പി​ത​ക​ഥ​യും വായി​ക്കാ​നും കാണാ​നും തക്ക മൂല്യ​മു​ള്ള​താ​ണോ? പിൻവ​രുന്ന ലേഖനങ്ങൾ ഈ ചോദ്യ​ങ്ങ​ളെ​ക്കു​റി​ച്ചു പരിചി​ന്തി​ക്കും.

[3-ാം പേജിലെ ചിത്രം]

ജൂൾസ്‌ വേണിന്റെ “ഭൂമി​യിൽനി​ന്നു ചന്ദ്രനി​ലേക്ക്‌” എന്ന നോവൽ ബഹിരാ​കാശ യാത്ര​യി​ലുള്ള താത്‌പ​ര്യ​ത്തി​നു തിരി​കൊ​ളു​ത്താൻ വളരെ സഹായി​ച്ചു

[3-ാം പേജിലെ ചിത്ര​ത്തിന്‌ കടപ്പാട്‌]

Rocket Ship: General Research Division/The New York Public Library/Astor, Lenox and Tilden Foundations