പാപ്പാ​യു​ടെ യുഎൻ സന്ദർശനം എന്തു നേടി?

ന്യൂ​യോർക്ക്‌ നഗരത്തിൽ യുഎൻ-നെ അഭിസം​ബോ​ധന ചെയ്യു​ന്ന​തി​നു​വേ​ണ്ടി​യുള്ള, അറ്റ്‌ലാൻറി​ക്കി​നു മീതെ​കൂ​ടി​യുള്ള തന്റെ വിമാ​ന​യാ​ത്ര​യോ​ടെ ജോൺ പോൾ II-ാമൻ പാപ്പാ മൊത്തം 10,00,000-ത്തിലേറെ കിലോ​മീ​റ്റർ സഞ്ചരി​ച്ചു​ക​ഴി​ഞ്ഞി​രി​ക്കു​ന്നു. 1995 ഒക്ടോബർ 4-ാം തീയതി ആയിരു​ന്നു അത്‌, പാപ്പാ എന്ന നിലയി​ലുള്ള അദ്ദേഹ​ത്തി​ന്റെ 68-ാമത്തെ വിദേ​ശ​യാ​ത്ര. സംശയ​ലേ​ശ​മെ​ന്യേ, റോമൻ കത്തോ​ലി​ക്കാ സഭയുടെ ചരി​ത്ര​ത്തിൽ ഏറ്റവും വ്യാപ​ക​മാ​യി യാത്ര ചെയ്‌തി​ട്ടുള്ള പാപ്പാ അദ്ദേഹം​തന്നെ.

മഴയു​ണ്ടാ​യി​രു​ന്ന ഒരു ബുധനാഴ്‌ച, അദ്ദേഹം ന്യൂ ജേഴ്‌സി​യി​ലെ നൂവാർക്ക്‌ അന്താരാ​ഷ്ട്ര വിമാ​ന​ത്താ​വ​ള​ത്തി​ലെത്തി, വിശി​ഷ്ട​വ്യ​ക്തി​കൾക്ക്‌ ഇതുവരെ ഏർപ്പെ​ടു​ത്തി​യി​ട്ടു​ള്ള​തി​ലേക്ക്‌ ഏറ്റവും വലിയ സുരക്ഷാ​മ​റ​ക​ളി​ലൊ​ന്നാ​യി​രു​ന്നു അദ്ദേഹ​ത്തി​നു​ചു​റ്റും ഏർപ്പെ​ടു​ത്തി​യി​രു​ന്നത്‌. പാപ്പായെ സംരക്ഷി​ക്കാൻ ഏതാണ്ട്‌ 8,000 ഫെഡറൽ അധികാ​രി​ക​ളും നഗരാ​ധി​കാ​രി​ക​ളും നിയമി​ക്ക​പ്പെ​ട്ട​താ​യി കണക്കാ​ക്ക​പ്പെ​ട്ടി​രു​ന്നു. ഹെലി​ക്കോ​പ്‌റ്റ​റു​ക​ളും സ്‌ക്യൂ​ബാ ഡൈവ​റു​ക​ളും ഉൾപ്പെട്ട “സുരക്ഷാ​സ​ന്നാ​ഹ​ങ്ങ​ളു​ടെ ഒരു വൻ പുറ​ന്തോട്‌” എന്ന്‌ ഒരു റിപ്പോർട്ട്‌ അതിനെ വിശേ​ഷി​പ്പി​ച്ചു.

സന്ദർശനം എന്തിനു​വേണ്ടി?

വിമാ​ന​ത്താ​വ​ള​ത്തി​ലെ അദ്ദേഹ​ത്തി​ന്റെ പ്രഭാ​ഷ​ണ​ത്തിൽ, തന്റെ മുൻഗാ​മി​യാ​യി​രുന്ന പോൾ VI-ാമൻ പാപ്പാ “മേലാൽ യുദ്ധം അരുത്‌, വീണ്ടു​മൊ​രി​ക്ക​ലും യുദ്ധം അരുത്‌!” എന്ന ആഹ്വാ​ന​ത്തോ​ടെ യുഎൻ ജനറൽ അസംബ്ലി​യെ സംബോ​ധന ചെയ്‌ത​താ​യി അദ്ദേഹം അനുസ്‌മ​രി​ച്ചു. “അരനൂ​റ്റാ​ണ്ടു മുമ്പ്‌ യുഎൻ-ന്‌ രൂപം നൽകിയ ആദർശ​ങ്ങ​ളും താത്‌പ​ര്യ​ങ്ങ​ളും, ഉദ്ദേശ്യം അന്വേ​ഷി​ക്കുന്ന ഒരു ലോക​ത്തിൽ മുമ്പെ​ന്ന​ത്തേ​ക്കാ​ള​ധി​കം അത്യന്താ​പേ​ക്ഷി​ത​മാ​ണെന്ന [തന്റെ] ഉറച്ച ബോധ്യം പ്രകടി​പ്പി​ക്കാ​നാണ്‌” താൻ തിരി​ച്ചെ​ത്തി​യി​രി​ക്കു​ന്ന​തെന്ന്‌ ജോൺ പോൾ II-ാമൻ പറഞ്ഞു.

നൂവാർക്കി​ലു​ള്ള സേക്രഡ്‌ ഹാർട്ട്‌ കത്തീ​ഡ്ര​ലി​ലെ തന്റെ സായാഹ്ന പ്രാർഥ​ന​യിൽ ഇപ്രകാ​രം പറഞ്ഞു​കൊ​ണ്ടു പാപ്പാ വീണ്ടും യുഎൻ-നുള്ള തന്റെ പിന്തുണ വെളി​പ്പെ​ടു​ത്തി: “മാനവ​കു​ടും​ബ​ത്തി​ന്റെ പൊതു​വായ നന്മയ്‌ക്കു വേണ്ടി​യാണ്‌ ആ സംഘടന സ്ഥിതി ചെയ്യു​ന്നത്‌. തന്മൂലം സുവി​ശേ​ഷ​ത്തി​ന്റെ പ്രത്യാ​ശയെ സാക്ഷ്യ​പ്പെ​ടു​ത്തി​ക്കൊണ്ട്‌ പാപ്പാ അവിടെ സംസാ​രി​ക്കു​ന്നതു തികച്ചും ഉചിത​മാണ്‌.” അദ്ദേഹം കൂട്ടി​ച്ചേർത്തു: “അതു​കൊണ്ട്‌, സമാധാ​ന​ത്തി​നു​വേ​ണ്ടി​യുള്ള നമ്മുടെ പ്രാർഥന ഐക്യ​രാ​ഷ്ട്ര​സം​ഘ​ട​ന​യ്‌ക്കും വേണ്ടി​യു​ള്ള​താണ്‌. അസ്സീസി​യി​ലെ വിശുദ്ധ ഫ്രാൻസിസ്‌ . . . സമാധാ​ന​സ്‌നേ​ഹി​യും സമാധാ​ന​ശിൽപി​യു​മാ​യി തിരി​ച്ച​റി​യ​പ്പെ​ടു​ന്നു. ലോക​മെ​മ്പാ​ടും നീതി​ക്കും സമാധാ​ന​ത്തി​നും വേണ്ടി​യുള്ള യുഎൻ-ന്റെ പ്രവർത്ത​ന​ങ്ങ​ളു​ടെ മേൽ അദ്ദേഹ​ത്തി​ന്റെ മധ്യസ്ഥ​ത്തി​നാ​യി നമുക്കു പ്രാർഥി​ക്കാം.”

യുഎൻ-നുള്ള തന്റെ പ്രസം​ഗ​ത്തിൽ, നിരവധി രാജ്യ​ങ്ങ​ളിൽ സ്വാത​ന്ത്ര്യം പുനഃ​സ്ഥാ​പി​ക്ക​പ്പെ​ട്ട​തായ കിഴക്കൻ യൂറോ​പ്പിൽ, 1989-ലുണ്ടായ അക്രമ​ര​ഹിത രാഷ്ട്രീയ മാറ്റങ്ങളെ അദ്ദേഹം പുകഴ്‌ത്തു​ക​യു​ണ്ടാ​യി. “ഇടുങ്ങി​യ​തും അനന്യ​വു​മായ ദേശീയത”യിൽ നിന്നു വിഭി​ന്ന​മായ “യഥാർഥ ദേശഭക്തി”യെ അദ്ദേഹം പ്രോ​ത്സാ​ഹി​പ്പി​ച്ചു. ഏതൽക്കാല വ്യവസ്ഥി​തി​യു​ടെ അനീതി​യെ​ക്കു​റിച്ച്‌ അദ്ദേഹം ഇപ്രകാ​രം പറഞ്ഞു: “കോടി​ക്ക​ണ​ക്കി​നാ​ളു​കൾ ദാരി​ദ്ര്യ​ത്താൽ—പട്ടിണി, പോഷ​കാ​ഹാ​ര​ക്കു​റവ്‌, രോഗം, നിരക്ഷരത, അവമതി​ക്കൽ എന്നിവ​യാൽ—കഷ്ടപ്പെ​ടു​മ്പോൾ . . . സ്വന്തം പ്രയോ​ജ​ന​ത്തി​നു വേണ്ടി മറ്റൊ​രാ​ളെ ചൂഷണം ചെയ്യാ​നുള്ള അവകാശം ആർക്കും ഇല്ലെന്ന്‌ നാം നമ്മെത്തന്നെ ഓർമ​പ്പെ​ടു​ത്തണം.”

എന്നിട്ട്‌ അദ്ദേഹം ഇപ്രകാ​രം പ്രസ്‌താ​വി​ച്ചു: “ഇത്തരം ഉഗ്രമായ വെല്ലു​വി​ളി​കളെ നാം നേരി​ടവേ, ഐക്യ​രാ​ഷ്ട്ര​സം​ഘ​ട​ന​യു​ടെ പങ്ക്‌ അംഗീ​ക​രി​ക്കു​ന്ന​തിൽ നാം പരാജ​യ​പ്പെ​ടു​ന്ന​തെ​ങ്ങനെ?” യുഎൻ, “ലോക​രാ​ഷ്ട്ര​ങ്ങൾക്കെ​ല്ലാം ആശ്വാസം പകരുന്ന, ഒരു സാൻമാർഗിക സങ്കേത​മാ​യി​ത്തീ​രേണ്ട” ആവശ്യ​മു​ണ്ടെന്ന്‌ അദ്ദേഹം പറഞ്ഞു. “മുഴു​മാ​ന​വ​കു​ടും​ബ​ത്തി​ന്റെ​യും ഐക്യ​ദാർഢ്യം” വളർത്തി​ക്കൊ​ണ്ടു​വ​രാ​നുള്ള ആവശ്യകത അദ്ദേഹം ഊന്നി​പ്പ​റഞ്ഞു.

യഥാർഥ സമാധാ​നം—ഏത്‌ ഉറവിൽനിന്ന്‌?

ഒട്ടേറെ മികച്ച അഭി​പ്രാ​യ​പ്ര​ക​ട​നങ്ങൾ അദ്ദേഹം നടത്തി എന്നതിൽ തെല്ലും സംശയ​മില്ല. എങ്കിലും തന്റെ നീണ്ട പ്രസം​ഗ​ത്തിൽ എപ്പോ​ഴെ​ങ്കി​ലും മനുഷ്യ​വർഗ​ത്തി​ന്റെ പ്രശ്‌ന​ങ്ങൾക്കുള്ള ദൈവ​ത്തി​ന്റെ പരിഹാ​ര​ത്തി​ലേക്ക്‌—യേശു​ക്രി​സ്‌തു മുഖാ​ന്ത​ര​മുള്ള അവന്റെ രാജ്യ​ഭ​ര​ണ​ത്തി​ലേക്ക്‌—അദ്ദേഹം ലോക​നേ​താ​ക്ക​ളു​ടെ ശ്രദ്ധതി​രി​ച്ചു​വോ? (മത്തായി 6:10) ഇല്ല. വാസ്‌ത​വ​ത്തിൽ, യുഎൻ-നുള്ള തന്റെ പ്രഭാ​ഷ​ണ​ത്തിൽ ഒരിക്കൽപോ​ലും അദ്ദേഹം ബൈബിൾ ഉദ്ധരി​ച്ചില്ല. അതേസ​മയം, “അടുത്ത നൂറ്റാ​ണ്ടി​ലും അടുത്ത സഹസ്രാ​ബ്ദ​ത്തി​ലും മനുഷ്യ​നു യോഗ്യ​മായ ഒരു സംസ്‌കാ​രം, അതായത്‌ സ്വാത​ന്ത്ര്യ​ത്തി​ന്റെ ഒരു യഥാർഥ സംസ്‌കാ​രം ദൈവ​കാ​രു​ണ്യ​ത്താൽ നമുക്കു കെട്ടി​പ്പ​ടു​ക്കാൻ സാധി​ക്കും,” എന്ന്‌ അദ്ദേഹം പറഞ്ഞു. ബൈബിൾ വിദ്യാർഥി​കളെ സംബന്ധി​ച്ചി​ട​ത്തോ​ളം, ആ അഭി​പ്രാ​യ​പ്ര​ക​ട​ന​ത്തിൽ 4,000-ത്തിലേറെ വർഷങ്ങൾക്കു മുമ്പ്‌ പുരാതന ബാബേ​ലിൽ മാനവ​ശ്ര​മ​ങ്ങ​ളു​ടെ ഫലമായി തങ്ങൾക്കു മനുഷ്യ​വർഗത്തെ ഏകീക​രി​ക്കാൻ സാധി​ക്കു​മെന്നു വിചാ​രി​ച്ച​വ​രു​ടെ ഈ പ്രഖ്യാ​പനം പ്രതി​ധ്വ​നി​ക്കു​ന്ന​താ​യി തോന്നി​യേ​ക്കാം: “വരുവിൻ; നാം ഭൂതല​ത്തിൽ ഒക്കെയും ചിതറി​പ്പോ​കാ​തി​രി​പ്പാൻ ഒരു പട്ടണവും ആകാശ​ത്തോ​ളം എത്തുന്ന ഒരു ഗോപു​ര​വും പണിക; നമുക്കു ഒരു പേരു​ണ്ടാ​ക്കുക.” (ഉല്‌പത്തി 11:4) അങ്ങനെ, ഈ വീക്ഷണ​ഗ​തി​പ്ര​കാ​രം യുഎൻ-നിൽ പ്രതി​നി​ധീ​ക​രി​ക്ക​പ്പെട്ട മനുഷ്യ​വർഗ​ത്തി​ന്റെ രാഷ്ട്രീയ നേതാ​ക്ക​ന്മാ​രാണ്‌ സ്വാത​ന്ത്ര്യം അടിസ്ഥാ​ന​മാ​ക്കി​യുള്ള പുതി​യൊ​രു സംസ്‌കാ​രം കെട്ടി​പ്പ​ടു​ക്കാൻ പോകു​ന്നത്‌.

എന്നാൽ, മനുഷ്യ​ന്റെ രാഷ്ട്രീയ ഗവൺമെൻറു​ക​ളു​ടെ​യും യുഎൻ-ന്റെ തന്നെയും ഭാവി​യെ​ക്കു​റി​ച്ചു ബൈബിൾ പ്രവചനം എന്താണു പറയു​ന്നത്‌? അവരെ കാത്തി​രി​ക്കുന്ന ഭാവി​യെ​ക്കു​റി​ച്ചു ദാനീ​യേ​ലി​ന്റെ​യും വെളി​പ്പാ​ടി​ന്റെ​യും പുസ്‌ത​കങ്ങൾ വ്യക്തമായ ഒരു ചിത്രം നൽകുന്നു. അന്ത്യനാ​ളു​ക​ളിൽ, ‘മനുഷ്യ​രു​ടെ കൈക​ളാൽ നശിപ്പി​ക്ക​പ്പെ​ടാത്ത’വിധം ഒരു കൂറ്റൻ കല്ലു​പോ​ലെ ദൈവം തന്റെ രാജ്യ​ഭ​ര​ണാ​ധി​പ​ത്യം സ്ഥാപി​ക്കു​മെന്നു ദാനി​യേൽ പ്രവചി​ച്ചു. അത്‌ എന്തു നടപടി സ്വീക​രി​ക്കും? “ഈ രാജാ​ക്ക​ന്മാ​രു​ടെ കാലത്തു സ്വർഗ്ഗ​സ്ഥ​നായ ദൈവം ഒരുനാ​ളും നശിച്ചു​പോ​കാത്ത ഒരു രാജത്വം സ്ഥാപി​ക്കും. . . . അതു ഈ രാജത്വ​ങ്ങളെ ഒക്കെയും തകർത്തു നശിപ്പി​ക്ക​യും എന്നേക്കും നിലനി​ല്‌ക്കു​ക​യും ചെയ്യും.” മാനുഷ ഗവൺമെൻറു​ക​ളു​ടെ സ്ഥാനത്ത്‌ മുഴു​മ​നു​ഷ്യ​വർഗ​ത്തി​നും വേണ്ടി​യുള്ള നീതി​നി​ഷ്‌ഠ​മായ ഒരൊറ്റ ഭരണാ​ധി​പ​ത്യം വരും.—ദാനീ​യേൽ 2:44, 45.

യുഎൻ-ന്‌ എന്തു സംഭവി​ക്കേ​ണ്ട​താണ്‌? വെളി​പാ​ടി​ന്റെ 17-ാം അധ്യായം യുഎൻ-നെയും (അൽപകാ​ലം നില​കൊണ്ട അതിന്റെ മുൻഗാ​മി​യാ​യി​രുന്ന സർവരാ​ജ്യ​സ​ഖ്യ​ത്തെ​യും) “നാശത്തി​ലേക്കു പോകു​വാൻ ഇരിക്കുന്ന” കടുഞ്ചു​വ​പ്പു​നി​റ​മുള്ള കാട്ടു​മൃ​ഗ​മാ​യി ചിത്രീ​ക​രി​ക്കു​ന്നു. (വെളി​പ്പാ​ടു 17:8)a യഥാർഥ​സ​മാ​ധാ​ന​ത്തി​നു​വേ​ണ്ടി​യുള്ള യഹോ​വ​യു​ടെ ഉറവിടം അപൂർണ​മായ ഏതെങ്കി​ലും മാനവ മാധ്യ​മമല്ല, അതിന്റെ അനുയാ​യി​കൾ എത്രതന്നെ ആത്മാർഥ​ത​യു​ള്ള​വ​രാ​ണെ​ങ്കി​ലും. വാഗ്‌ദാ​നം ചെയ്യപ്പെട്ട ദൈവ​രാ​ജ്യ​ത്തി​ലൂ​ടെ, പുനരു​ത്ഥാ​നം ചെയ്‌ത സ്വർഗ​ത്തി​ലെ യേശു​ക്രി​സ്‌തു​വി​ന്റെ കരങ്ങളി​ലൂ​ടെ​യാണ്‌ യഥാർഥ സമാധാ​നം വരിക. വെളി​പ്പാ​ടു 21:3-5-ലെ ദൈവ​ത്തി​ന്റെ വാഗ്‌ദാ​ന​നി​വൃ​ത്തി​ക്കുള്ള അടിസ്ഥാ​നം അതാണ്‌: “ഇതാ, മനുഷ്യ​രോ​ടു കൂടെ ദൈവ​ത്തി​ന്റെ കൂടാരം; അവൻ അവരോ​ടു​കൂ​ടെ വസിക്കും; അവർ അവന്റെ ജനമാ​യി​രി​ക്കും; ദൈവം താൻ അവരുടെ ദൈവ​മാ​യി അവരോ​ടു​കൂ​ടെ ഇരിക്കും. അവൻ അവരുടെ കണ്ണിൽനി​ന്നു കണ്ണുനീർ എല്ലാം തുടെ​ച്ചു​ക​ള​യും. ഇനി മരണം ഉണ്ടാക​യില്ല; ദുഃഖ​വും മുറവി​ളി​യും കഷ്ടതയും ഇനി ഉണ്ടാക​യില്ല. ഒന്നാമ​ത്തേതു കഴിഞ്ഞു​പോ​യി.”

സന്ദർശനം—സ്വാധീ​നം എത്രമാ​ത്രം?

പാപ്പാ തന്റെ പ്രസം​ഗ​ങ്ങ​ളിൽ ബൈബി​ളിൽനി​ന്നു പരാമർശ​നങ്ങൾ നടത്തി​യ​പ്പോൾ തങ്ങളുടെ ബൈബി​ളു​ക​ളെ​ടു​ക്കാ​നോ പരാമർശങ്ങൾ പരി​ശോ​ധി​ക്കാ​നോ കത്തോ​ലി​ക്കാ വിശ്വാ​സി​കൾ പ്രോ​ത്സാ​ഹി​പ്പി​ക്ക​പ്പെ​ട്ടോ? ബഹുഭൂ​രി​പക്ഷം പേരും ഒരു ബൈബിൾ കൊണ്ടു​പോ​യ​തു​പോ​ലു​മില്ല എന്നതാണു വാസ്‌തവം. സദസ്യർക്കു ബൈബിൾ എടുത്തു​നോ​ക്കാൻ കഴി​യേ​ണ്ട​തി​നു വിരള​മാ​യേ പാപ്പാ ഏതെങ്കി​ലും നിർദിഷ്‌ഠ ബൈബിൾ പരാമർശങ്ങൾ നടത്തി​യു​ള്ളു.

ഒരു ഉദാഹ​രണം, ന്യൂ ജേഴ്‌സി​യി​ലെ ജൈൻഡ്‌സ്‌ സ്റ്റേഡി​യ​ത്തിൽവെച്ച്‌ 83,000 പേരോട്‌ അദ്ദേഹം സംസാ​രി​ച്ച​പ്പോ​ഴ​ത്തേ​താ​യി​രു​ന്നു. അദ്ദേഹം പറഞ്ഞു: “ജീവനു​ള്ള​വ​രു​ടെ​യും മരിച്ച​വ​രു​ടെ​യും ന്യായാ​ധി​പ​നെ​ന്ന​നി​ല​യി​ലുള്ള കർത്താ​വി​ന്റെ തിരി​ച്ചു​വ​ര​വി​നാ​യി നാം കാത്തി​രി​ക്കു​ന്നു. മഹത്ത്വ​ത്തി​ലുള്ള അവന്റെ തിരി​ച്ചു​വ​ര​വി​നാ​യി, ദൈവ​രാ​ജ്യം അതിന്റെ പൂർണ​ത​യിൽ വരുന്ന​തി​നാ​യി നാം കാത്തി​രി​ക്കു​ന്നു. സങ്കീർത്ത​ന​ങ്ങ​ളി​ലെ ഇടവി​ടാ​തെ​യുള്ള ക്ഷണം അതാണ്‌: ‘ധൈര്യ​പൂർവം കർത്താ​വി​നാ​യി കാത്തി​രിക്ക; ഉറച്ച ഹൃദയ​മു​ള്ള​വ​രാ​യി​ക്കുക, കർത്താ​വി​നാ​യി കാത്തി​രിക്ക.’” എന്നാൽ സങ്കീർത്ത​ന​ങ്ങ​ളിൽനിന്ന്‌ അദ്ദേഹം ഉദ്ധരി​ച്ചത്‌ ഏതു വാക്യ​മാ​യി​രു​ന്നു? മാത്രമല്ല ഏത്‌ കർത്താ​വി​നെ​യാണ്‌ അദ്ദേഹം പരാമർശി​ച്ചത്‌—യേശു​വി​നെ​യോ ദൈവ​ത്തെ​യോ? (സങ്കീർത്തനം 110:1 താരത​മ്യം ചെയ്യുക) വത്തിക്കാൻ പത്രമായ ലൊ​സേർവാ​റ്റോ​റേ റോമാ​നോ പറയു​ന്ന​ത​നു​സ​രിച്ച്‌ അദ്ദേഹം സങ്കീർത്തനം 27:14 ഉദ്ധരി​ക്കു​ക​യാ​യി​രു​ന്നു. കുറേ​ക്കൂ​ടെ വ്യക്തമാ​യി അതി​പ്ര​കാ​രം വായി​ക്ക​പ്പെ​ടു​ന്നു: “യാഹ്‌വേ​യി​ങ്കൽ പ്രത്യാശ വെക്കുക, ശക്തി​പ്പെ​ട്ടി​രിക്ക, നിന്റെ ഹൃദയം ധൈര്യ​പ്പെ​ട്ടി​രി​ക്കട്ടെ, യാഹ്‌വേ​യി​ങ്കൽ പ്രത്യാശ വെക്കുക.” (ദ ജറുസ​ലേം ബൈബിൾ) അതെ, നാം യാഹ്‌വേ​യി​ങ്കൽ അല്ലെങ്കിൽ കർത്താ​വായ യേശു​ക്രി​സ്‌തു​വി​ന്റെ ദൈവ​മായ യഹോ​വ​യി​ങ്കൽ പ്രത്യാശ വെക്കണം.—യോഹ​ന്നാൻ 20:17.

ചരി​ത്ര​ത്തി​ലു​ട​നീ​ളം, കത്തോ​ലി​ക്കാ വൈദി​ക​രും നേതാ​ക്ക​ന്മാ​രും രാഷ്ട്ര​ങ്ങൾക്കി​ട​യിൽ സമാധാ​നം പടുത്തു​യർത്തി​യി​ട്ടു​ണ്ടോ? വംശീയ, വർഗീയ, ഗോ​ത്ര​പ​ര​മായ ഭിന്നതകൾ പരിഹ​രി​ക്കു​ന്ന​തി​നു കത്തോ​ലി​ക്കാ പഠിപ്പി​ക്ക​ലു​കൾ ഉതകി​യി​ട്ടു​ണ്ടോ? 1994-ൽ കിഴക്കൻ മധ്യ ആഫ്രി​ക്ക​യി​ലെ റുവാ​ണ്ട​യിൽ നടന്ന കൂട്ടക്കു​രു​തി​കൾ, മുൻ യൂഗോ​സ്ലാ​വി​യ​യിൽ കഴിഞ്ഞ ഏതാനും വർഷങ്ങ​ളിൽ നടന്ന വിനാ​ശ​ക​ര​മായ യുദ്ധങ്ങൾ എല്ലാം​തന്നെ മാനവ​ഹൃ​ദ​യ​ത്തിൽ പതിയി​രി​ക്കുന്ന ആഴമേ​റിയ വിദ്വേ​ഷ​ത്തെ​യും മുൻവി​ധി​ക​ളെ​യും ഇല്ലാതാ​ക്കു​ന്ന​തിൽ മതവി​ശ്വാ​സങ്ങൾ പൊതു​വേ പരാജ​യ​മ​ട​ഞ്ഞി​രി​ക്കു​ന്ന​താ​യി ദൃഷ്ടാ​ന്തീ​ക​രി​ക്കു​ന്നു. ബദ്ധപ്പെട്ടു നടത്തുന്ന വാരം​തോ​റു​മുള്ള കുമ്പസാ​ര​മോ കുർബാ​ന​യി​ലെ ക്രമമായ പങ്കെടു​ക്ക​ലോ ആളുകൾ ചിന്തി​ക്കു​ക​യും പ്രവർത്തി​ക്കു​ക​യും ചെയ്യുന്ന രീതിക്കു മാറ്റം​വ​രു​ത്താൻ പോകു​ന്നില്ല. അതി​നേ​ക്കാൾ ശക്തമായ ഒരു സ്വാധീ​നം വേണ്ടി​യി​രി​ക്കു​ന്നു, ദൈവ​വ​ചനം വിശ്വാ​സി​യു​ടെ ഹൃദയ​വും മനസ്സും തുളച്ചി​റ​ങ്ങാൻ അനുവ​ദി​ക്ക​പ്പെ​ടു​മ്പോൾ മാത്രം ഉളവാ​കുന്ന ഒന്ന്‌.

സത്യ​ക്രി​സ്‌ത്യാ​നി​യു​ടെ നടത്തയി​ലു​ണ്ടാ​കുന്ന മാറ്റത്തി​ന്റെ അടിസ്ഥാ​നം, മതപര​മായ അനുഷ്‌ഠാ​ന​ക്ര​മ​ങ്ങ​ളു​ടെ ഫലമാ​യി​ട്ടു​ള​വാ​കുന്ന വൈകാ​രിക പ്രതി​ക​ര​ണമല്ല, മറിച്ച്‌, ഓരോ വ്യക്തി​യെ​യും സംബന്ധിച്ച ദൈ​വേ​ഷ്ട​ത്തെ​ക്കു​റി​ച്ചുള്ള യുക്തി​ഭ​ദ്ര​മായ ഗ്രാഹ്യ​മാണ്‌. അപ്പോ​സ്‌ത​ല​നായ പൗലോസ്‌ എഴുതി: “നിങ്ങൾക്കു ചുറ്റു​മുള്ള ലോക​ത്തി​ന്റെ പെരു​മാ​റ്റ​ത്തിന്‌ അനുരൂ​പ​മാ​കാ​തെ പുതിയ മനസ്സിന്‌ അനുരൂ​പ​മാ​യി നിങ്ങളു​ടെ പെരു​മാ​റ്റം രൂപാ​ന്ത​ര​പ്പെ​ടട്ടെ. ദൈ​വേഷ്ടം കണ്ടെത്താ​നും നല്ലത്‌, ദൈവം ആവശ്യ​പ്പെ​ടു​ന്നത്‌, ചെയ്യാ​നുള്ള ഉത്തമസം​ഗതി എന്തെന്നു മനസ്സി​ലാ​ക്കാ​നു​മുള്ള മാർഗം ഇതു മാത്ര​മാണ്‌.” (റോമർ 12:1, 2, JB) ദൈ​വേഷ്ടം സംബന്ധിച്ച സൂക്ഷ്‌മ​പ​രി​ജ്ഞാ​ന​ത്തി​ലേക്കു നയിക്കുന്ന ദൈവ​വ​ച​ന​ത്തി​ന്റെ പഠനത്തി​ലൂ​ടെ​യാണ്‌ ഈ പുതിയ പെരു​മാ​റ്റം നേടി​യെ​ടു​ക്കു​ന്നത്‌. മനസ്സിനെ പ്രചോ​ദി​പ്പി​ക്കു​ന്ന​തും ക്രിസ്‌തീയ നടത്തയിൽ കലാശി​ക്കു​ന്ന​തു​മായ ഒരു ആത്മീയ ശക്തി അത്‌ ഉളവാ​ക്കു​ന്നു.—എഫെസ്യർ 4:23; കൊ​ലൊ​സ്സ്യർ 1:9, 10.

സഭ ഒരു “നിർണാ​യക വഴിത്തി​രി”വിലോ?

സ്‌പാ​നിഷ്‌ പത്രമായ എൽ പായീസ്‌, ജോൺ പോൾ II-ാമൻ പാപ്പായെ, 75-ാം വയസ്സി​ലും “അസാധാ​രണ വ്യക്തി​പ്ര​ഭാവ”മുള്ള ഒരാൾ എന്നു വിശേ​ഷി​പ്പി​ച്ചു. ഒരു യു.എസ്‌. പത്രമാ​കട്ടെ, അദ്ദേഹത്തെ “ബഹുജന മാധ്യമ വിദഗ്‌ധൻ” എന്നു വിളിച്ചു. മാധ്യ​മങ്ങൾ കൈകാ​ര്യം ചെയ്യുന്ന കാര്യ​ത്തി​ലും ബഹുജ​നത്തെ തങ്ങളുടെ മക്കളു​മാ​യി കൂട്ടി​യി​ണ​ക്കു​ന്ന​തി​ലും അദ്ദേഹം വിദഗ്‌ധ​നാണ്‌. തന്റെ യാത്ര​ക​ളിൽ, വത്തിക്കാൻ നഗരത്തിൽ സ്ഥാപി​ക്ക​പ്പെ​ട്ടി​രി​ക്കുന്ന പാപ്പാ​യു​ടെ സിംഹാ​സ​നത്തെ ഏറ്റവും നന്നായി അദ്ദേഹം പ്രതി​നി​ധാ​നം ചെയ്യുന്നു. യുഎൻ-ൽ വത്തിക്കാന്‌ ഔദ്യോ​ഗിക അംഗീ​കാ​ര​മു​ണ്ടെ​ങ്കി​ലും, സംഘട​ന​യു​ടെ​മേ​ലുള്ള പാപ്പാ​യു​ടെ അനു​ഗ്രഹം അതിന്‌ യഹോ​വ​യാം ദൈവ​ത്തി​ന്റെ അനു​ഗ്ര​ഹ​മു​ണ്ടെന്ന ഉറപ്പു നൽകു​ന്നില്ല.

പാപ്പാ​യു​ടെ സന്ദർശ​ന​ത്തോ​ടുള്ള പ്രതി​ക​ര​ണങ്ങൾ വ്യത്യ​സ്‌ത​മാ​യി​രു​ന്നു. തുറസ്സായ സ്ഥലത്തു നടത്തപ്പെട്ട കുർബാ​ന​യ്‌ക്കു പ്രവേ​ശനം ലഭിച്ച ഒട്ടേറെ കത്തോ​ലി​ക്കർക്ക്‌ ആ അനുഭവം വൈകാ​രി​ക​മാ​യി തങ്ങളെ ഉദ്ധരി​ച്ച​താ​യി തോന്നി. എങ്കിലും ചില കത്തോ​ലി​ക്കാ നേതാ​ക്ക​ന്മാർ സന്ദർശ​ന​ത്തെ​യും അതിന്റെ സാധ്യ​മായ ഫലങ്ങ​ളെ​യും കുറേ​ക്കൂ​ടെ നിഷേ​ധാ​ത്മക വീക്ഷണ​ത്തോ​ടെ​യാ​ണു കൈ​ക്കൊ​ണ്ടത്‌. കാത്തലിക്ക്‌ നാഷണൽ സെന്റർ ഫോർ പാസ്റ്ററൽ ലീഡർഷി​പ്പി​ന്റെ പ്രസി​ഡ​ന്റായ തിമോ​ത്തി ബി. റേഗൻ, “പാപ്പാ​യു​ടെ സന്ദർശനം വൃഥാ​വി​ലാ​യി” എന്നു പറഞ്ഞതാ​യി ദ ന്യൂ​യോർക്ക്‌ ടൈംസ്‌ ഉദ്ധരി​ക്കു​ന്നു. “ഒട്ടേറെ ആളുകളെ സംബന്ധി​ച്ചി​ട​ത്തോ​ളം സന്ദർശനം, ഉന്നമി​പ്പി​ക്കു​ന്ന​തും വിശു​ദ്ധ​കർമ​പ​ര​മാ​യി പ്രസക്ത​വു​മാ​യി​രു”ന്നെങ്കി​ലും പല കത്തോ​ലി​ക്കാ നേതാ​ക്ക​ന്മാ​രെ​യും സംബന്ധി​ച്ചി​ട​ത്തോ​ളം അതു “പാപ്പാ​യ്‌ക്ക്‌ കേൾക്കു​ന്ന​തി​നുള്ള അവസര​വും ആശയവി​നി​യമം നടത്തു​ന്ന​തി​നുള്ള ഏർപ്പാ​ടു​ക​ളും” പ്രദാനം “ചെയ്‌തില്ല”. ഒട്ടേറെ കത്തോ​ലി​ക്കർക്ക്‌ ബ്രഹ്മച​ര്യം, ജനനനി​യ​ന്ത്രണം, വിവാ​ഹ​മോ​ചനം എന്നീ വാദവി​ഷ​യ​ങ്ങളെ സംബന്ധി​ച്ചു തങ്ങൾ ഒരു സ്വഗത​ഭാ​ഷണം കേൾക്കാൻ നിർബ​ന്ധി​ത​രാ​ണെ​ന്നാണ്‌ തോന്നു​ന്നത്‌.

“സഭ നിർണാ​യ​ക​മായ ഒരു വഴിത്തി​രി​വി​ലാ”ണെന്നു ചില കത്തോ​ലിക്ക അധികാ​രി​കൾ സമ്മതി​ക്കു​ന്നു, ഒട്ടേറെ കത്തോ​ലി​ക്കർക്ക്‌ “പ്രത്യേ​കി​ച്ചും ചെറു​പ്പ​ക്കാർക്കു കത്തോ​ലി​ക്ക​നാ​യി​രി​ക്കു​ക​യെ​ന്നാൽ എന്താണെന്ന ബോധം നഷ്ടപ്പെ​ട്ടു​കൊ​ണ്ടി​രി​ക്കു​ക​യാ​ണെ”ന്നും അവർ ഭയപ്പെ​ടു​ന്നു. കത്തോ​ലി​ക്കാ പാരമ്പ​ര്യ​വാ​ദി​യായ ജെയിംസ്‌ ഹിച്ച്‌കോക്ക്‌ “പ്രശ്‌നത്തെ, അധിക​മ​ധി​കം യാഥാ​സ്ഥി​തി​ക​മാ​യി​ക്കൊ​ണ്ടി​രി​ക്കുന്ന പുരോ​ഹിത ശ്രേണി​യും ഏതാണ്ട്‌ സ്വത​ന്ത്ര​ചി​ന്താ​ഗ​തി​ക്കാ​രായ ‘ഇടനില കാര്യ​നിർവാ​ഹക’രും തമ്മിലുള്ള വിനാ​ശ​ക​ര​മായ ശീതസ​മ​ര​മാ​യി വീക്ഷി​ക്കു​ന്നു”

സഭാ​ശ്രേ​ണി​യി​ലെ പ്രതി​സ​ന്ധി​യെ പാപ്പാ​യു​ടെ സന്ദർശനം എപ്രകാ​രം ബാധി​ക്കു​മെ​ന്ന​തി​നെ​പ്പറ്റി ഹിച്ച്‌കോക്ക്‌ പ്രസ്‌താ​വി​ച്ചു: “അദ്ദേഹം ഇവിടെ വരുന്നു, സ്‌തു​തി​ക്ക​പ്പെ​ടു​ന്നു, സ്വന്തരാ​ജ്യ​ത്തേക്കു മടങ്ങി​പ്പോ​കു​ന്നു—ഒന്നും സംഭവി​ക്കു​ന്നില്ല. പരിണ​ത​ഫ​ലങ്ങൾ നിരാ​ശാ​ജ​ന​ക​മാ​ണെ​ന്നാണ്‌ എന്റെ വീക്ഷണം.” യഥാർഥ സമാധാ​ന​ത്തി​ന്റെ ഉറവിടം എവിടെ കണ്ടെത്താ​മെന്ന്‌ യുഎൻ-ലെ രാഷ്ട്രീയ നേതാ​ക്ക​ളോ​ടു പറയാ​നുള്ള ഒരവസരം പാപ്പാ തീർച്ച​യാ​യും പാഴാ​ക്കി​ക്ക​ളഞ്ഞു.

യുഎൻ ചാർട്ട​റും മനുഷ്യ​ന്റെ പ്രചര​ണ​വും “സമാധാ​ന​വും സുരക്ഷി​ത​ത്വ​വും” എന്ന ലക്ഷ്യത്തിന്‌ ഊന്നൽ നൽകു​ന്നു​ണ്ടെ​ങ്കി​ലും, വഞ്ചിക്ക​പ്പെ​ട​രുത്‌. ബൈബിൾ മുന്നറി​യി​പ്പു നൽകുന്നു: “അവർ ‘സമാധാ​ന​മെ​ന്നും സുരക്ഷി​ത​ത്വ​മെ​ന്നും!’ പറയു​ന്ന​തെ​പ്പോ​ഴോ അപ്പോൾത്തന്നെ ഗർഭി​ണി​ക്കു പ്രസവ​വേ​ദ​ന​യു​ണ്ടാ​കു​ന്ന​തു​പോ​ലെ പെട്ടെന്നു നാശം അവരു​ടെ​മേൽ വരും; അവർ യാതൊ​രു വിധത്തി​ലും രക്ഷപ്പെ​ടു​ക​യില്ല.” (1 തെസ്സ​ലോ​നീ​ക്യർ 5:3, NW) യഥാർഥ സമാധാ​ന​വും സുരക്ഷി​ത​ത്വ​വും ദൈവ​ത്തി​ന്റെ ഇഷ്ടപ്ര​കാ​ര​വും അവന്റെ മാർഗ​ത്തി​ലൂ​ടെ​യും മാത്രമേ വരിക​യു​ള്ളൂ—അവന്റെ രാജ്യ​ഭ​ര​ണാ​ധി​പ​ത്യ​ത്തി​ലൂ​ടെ, അല്ലാതെ യുഎൻ-ലൂടെയല്ല.

[അടിക്കു​റിപ്പ്‌]

[22-ാം പേജിലെ ചിത്ര​ത്തിന്‌ കടപ്പാട്‌]

UN photos