ആരോ​ഗ്യാ​വ​ഹ​മ​ല്ലാത്ത ജീവി​ത​രീ​തി​കൾ—ഒടു​ക്കേണ്ടി വരുന്ന വില എത്ര?

“രോഗം എല്ലാ മനുഷ്യ​രു​ടെ​യും യജമാ​ന​നാണ്‌,” ഒരു ഡാനിഷ്‌ പഴഞ്ചൊല്ല്‌ പറയുന്നു. നീണ്ടു​നിൽക്കുന്ന ഒരു രോഗ​ത്തി​ന്റെ പിടി​യി​ല​മർന്നി​രി​ക്കുന്ന ഏതൊ​രാ​ളും ഈ “യജമാനൻ” ഒരു ക്രൂര​നാ​ണെന്ന്‌ വൈമു​ഖ്യ​മി​ല്ലാ​തെ സാക്ഷ്യ​പ്പെ​ടു​ത്തും! എന്നാൽ, അസുഖം മിക്ക​പ്പോ​ഴും ഒരു യജമാ​ന​നെ​പ്പോ​ലെ ആയിരി​ക്കാ​തെ ക്ഷണിക്ക​പ്പെട്ട ഒരതി​ഥി​യെ​പ്പോ​ലെ ആണെന്നു മനസ്സി​ലാ​ക്കു​മ്പോൾ നിങ്ങൾ അത്ഭുത​പ്പെ​ട്ടേ​ക്കാം. രോഗി​കൾ ആശുപ​ത്രി​യിൽ ചെലവ​ഴിച്ച ദിവസ​ങ്ങ​ളു​ടെ 30 ശതമാനം, ഒഴിവാ​ക്കാ​മാ​യി​രുന്ന രോഗ​ങ്ങ​ളും പരിക്കു​ക​ളും നിമി​ത്ത​മാ​യി​രു​ന്നെന്ന്‌ രോഗ​നി​യ​ന്ത്രണ-നിവാരണ യു.എസ്‌. കേന്ദ്രങ്ങൾ പറയുന്നു. കാരണം? ആരോ​ഗ്യാ​വ​ഹ​മ​ല്ലാ​ത്ത​തും അപകട​ക​ര​വു​മായ ജീവി​ത​രീ​തി​കൾ. ചില ഉദാഹ​ര​ണങ്ങൾ പരിചി​ന്തി​ക്കുക.

പുകവലി. 53 വയസ്സുള്ള ഐറയ്‌ക്ക്‌, എംഫി​സി​മാ എന്ന അസുഖ​മുണ്ട്‌. ഏകദേശം നാൽപ്പതു വർഷത്തെ പുകവ​ലി​യു​ടെ സമ്മാന​മാ​ണത്‌. ചികി​ത്സ​യ്‌ക്ക്‌ അദ്ദേഹ​ത്തിന്‌ എപ്പോ​ഴും ഓക്‌സി​ജൻ സിലിണ്ടർ ആവശ്യ​മാണ്‌. ഇതിന്‌ പ്രതി​മാ​സം 400 ഡോളർ ചെലവു​വ​രും. 1994-ൽ ചികി​ത്സ​യ്‌ക്കാ​യി 9 ദിവസം ആശുപ​ത്രി​യിൽ കിട​ക്കേണ്ടി വന്നപ്പോൾ ചെലവാ​യത്‌ 18,000 ഡോള​റാണ്‌. അങ്ങനെ ഐറയു​ടെ ആരോ​ഗ്യ​പ​രി​പാ​ല​ന​ത്തി​നാ​യി ആ വർഷം ചെലവാ​യത്‌ 20,000-ത്തിലേറെ ഡോളർ. ഇത്ര​യൊ​ക്കെ​യാ​യി​ട്ടും പുകവലി ഉപേക്ഷി​ക്കേ​ണ്ടത്‌ അടിയ​ന്തി​ര​മാ​ണെന്ന്‌ അദ്ദേഹ​ത്തി​നു തോന്നു​ന്നില്ല. “എനിക്കി​പ്പോ​ഴും ഈ അവിശ്വ​സ​നീ​യ​മായ ആസക്തി​യുണ്ട്‌,” അദ്ദേഹം പറയുന്നു.

ഐറയു​ടേത്‌ ഒരൊ​റ്റ​പ്പെട്ട സംഭവമല്ല. പുകവ​ലി​യു​ടെ അപകട​ങ്ങ​ളെ​ക്കു​റിച്ച്‌ നല്ല അറിവു​ണ്ടെ​ങ്കി​ലും ലോക​മൊ​ട്ടാ​കെ ആളുകൾ ദിവസേന 1,500 കോടി സിഗരറ്റ്‌ വലിക്കു​ന്നു. ഐക്യ​നാ​ടു​ക​ളിൽ പുകവലി സംബന്ധ​മായ അസുഖ​ങ്ങ​ളു​ടെ ചികി​ത്സ​യ്‌ക്കു പ്രതി​വർഷം 5,000 കോടി ഡോളർ ചെലവാ​കു​ന്ന​താ​യി കണക്കാ​ക്ക​പ്പെ​ട്ടി​രി​ക്കു​ന്നു. അതായത്‌ ശരാശരി കണക്കനു​സ​രിച്ച്‌ 1993-ൽ, വാങ്ങിയ ഓരോ പായ്‌ക്കറ്റ്‌ സിഗര​റ്റി​നും പുകവലി സംബന്ധ​മായ ചികി​ത്സ​യ്‌ക്കാ​യി 2.06 ഡോളർ വീതം ചെലവാ​യി​ട്ടു​ണ്ടെ​ന്നർഥം.

ഒരു കുട്ടി ജനിക്കു​മ്പോൾത്തന്നെ പുകവലി സംബന്ധ​മായ ചികി​ത്സാ​ച്ചെ​ല​വു​കൾ ആരംഭി​ക്കു​ക​യാ​യി. ഒരുദാ​ഹ​രണം പറഞ്ഞാൽ, പുകവ​ലി​ക്കാ​രായ അമ്മമാർക്കു ജനിക്കുന്ന കുഞ്ഞു​ങ്ങൾക്ക്‌ മുച്ചു​ണ്ടും അണ്ണാക്കിൽ വിള്ളലും ഉണ്ടാകാൻ ഇരട്ടി സാധ്യ​ത​യു​ണ്ടെന്ന്‌ ഐക്യ​നാ​ടു​ക​ളിൽ നടത്തിയ ഒരു പഠനം കണ്ടെത്തു​ക​യു​ണ്ടാ​യി. ഈ വൈക​ല്യം നേരേ​യാ​ക്കാൻ രണ്ടു വയസ്സി​നു​ള്ളിൽ നാലു ശസ്‌ത്ര​ക്രി​യകൾ നടത്തേ​ണ്ടി​വ​ന്നേ​ക്കാം. ഇതി​നോ​ടു ബന്ധപ്പെട്ട ശരാശരി ആയുഷ്‌കാല ചികി​ത്സാ​ച്ചെ​ലവ്‌ ഓരോ​രു​ത്തർക്കും 1,00,000 ഡോളർ വീതമാണ്‌. തീർച്ച​യാ​യും, ജന്മനാ​ലുള്ള വൈക​ല്യം ഉളവാ​ക്കുന്ന വൈകാ​രിക വേദന പണം​കൊണ്ട്‌ അളക്കാൻ സാധ്യമല്ല.

പല പുകവ​ലി​ക്കാ​രും സാമൂ​ഹിക സുരക്ഷി​തത്വ ആനുകൂ​ല്യ​ങ്ങൾ വാങ്ങി​ക്കാ​റാ​കു​ന്ന​തു​വരെ ജീവി​ക്കു​ന്നി​ല്ലെ​ന്ന​തു​കൊണ്ട്‌ പുകവലി സംബന്ധ​മായ അസുഖ​ങ്ങ​ളു​ടെ ഉയർന്ന ചികി​ത്സാ​ച്ചെ​ല​വു​കൾ, ഫലത്തിൽ തട്ടിക്ക​ഴി​ക്ക​പ്പെ​ടു​ന്ന​താ​യി ചിലർ പറയുന്നു. എങ്കിലും ദ ന്യൂ ഇംഗ്ലണ്ട്‌ ജേർണൽ ഓഫ്‌ മെഡി​സിൻ പറയു​ന്ന​പ്ര​കാ​രം, “ഈ നിഗമനം ഒരു തർക്കവി​ഷ​യ​മാണ്‌; അതിലു​മു​പരി പുകവലി നിമി​ത്ത​മുള്ള അകാല​മ​ര​ണങ്ങൾ ആരോ​ഗ്യ​പ​രി​പാ​ലന ചെലവു​കൾ നിയ​ന്ത്രി​ക്കാ​നുള്ള മനുഷ്യ​ത്വ​പ​ര​മായ ഒരു മാർഗ​മ​ല്ലെന്നു മിക്കവ​രും സമ്മതി​ക്കും.”

മദ്യ ദുരു​പ​യോ​ഗം. മദ്യ ദുരു​പ​യോ​ഗത്തെ കരൾവീ​ക്കം, ഹൃ​ദ്രോ​ഗങ്ങൾ, ആമാശ​യ​വീ​ക്കം, കുടൽപ്പുണ്ണ്‌, ആഗ്നേയ​ഗ്രന്ഥീ വീക്കം എന്നിവ​യുൾപ്പെടെ നിരവധി ആരോ​ഗ്യ​പ്ര​ശ്‌ന​ങ്ങ​ളു​മാ​യി ബന്ധപ്പെ​ടു​ത്തി​യി​രി​ക്കു​ന്നു. ന്യൂ​മോ​ണി​യ​പോ​ലുള്ള സാം​ക്ര​മിക രോഗങ്ങൾ എളുപ്പ​ത്തിൽ പിടി​പെ​ടാ​നും ഇതിട​യാ​ക്കും. ഡോ. സ്റ്റാൻറൺ പീലെ പറയു​ന്ന​ത​നു​സ​രിച്ച്‌, ഓരോ വർഷവും ഐക്യ​നാ​ടു​ക​ളിൽ “മദ്യപാ​നം നിയ​ന്ത്രി​ക്കാൻ കഴിയാ​ത്ത​വരെ ചികി​ത്സി​ക്കാൻ 1,000 കോടി ഡോള​റാണ്‌ ചെലവ​ഴി​ക്കു​ന്നത്‌.”

മദ്യം മിക്ക​പ്പോ​ഴും ഗർഭാ​ശ​യ​ത്തി​ലെ ഭ്രൂണത്തെ ബാധി​ക്കു​ന്നു. ഗർഭകാ​ലത്ത്‌ അമ്മമാർ മദ്യപി​ക്കു​ന്ന​തി​ന്റെ ഫലമായി ഓരോ വർഷവും ഐക്യ​നാ​ടു​ക​ളിൽത്തന്നെ പതിനാ​യി​ര​ക്ക​ണ​ക്കി​നു കുട്ടി​ക​ളാണ്‌ വൈക​ല്യ​മു​ള്ള​വ​രാ​യി ജനിക്കു​ന്നത്‌. ഈ ശിശു​ക്ക​ളിൽ ചിലർക്ക്‌ ഫീറ്റൽ ആൽക്ക​ഹോൾ സിൻ​ഡ്രോം (എഫ്‌എ​എസ്‌) ഉള്ളതാ​യും മിക്ക​പ്പോ​ഴും ഇവർ ശാരീ​രി​ക​വും മാനസി​ക​വു​മായ വൈക​ല്യ​ങ്ങൾ നിമിത്തം ദുരി​ത​മ​നു​ഭ​വി​ക്കു​ന്ന​താ​യും കണ്ടെത്തി​യി​രി​ക്കു​ന്നു. എഫ്‌എ​എസ്‌ ഉള്ള ഒരു കുട്ടിയെ ജീവി​ത​കാ​ലം മുഴുവൻ ചികി​ത്സി​ക്കാൻ 14 ലക്ഷം ഡോളർ വേണ്ടി​വ​രും.

മദ്യം ആത്മനി​യ​ന്ത്ര​ണത്തെ കുറയ്‌ക്കു​ന്ന​തു​കൊണ്ട്‌ അമിത മദ്യപാ​ന​ത്തി​നു മിക്ക​പ്പോ​ഴും ഒരുവനെ അക്രമാ​സ​ക്ത​നാ​ക്കാൻ കഴിയും. വൈദ്യ​ചി​കിത്സ ആവശ്യ​മായ പരിക്കു​ക​ളിൽ ഇതു കലാശി​ച്ചേ​ക്കാം. മദ്യപി​ച്ചു വണ്ടി​യോ​ടി​ക്കുന്ന ആളുകൾ വരുത്തി​വെ​ക്കുന്ന നഷ്ടങ്ങളും ചില്ലറയല്ല. എട്ടു വയസ്സു​കാ​രി ലിൻസി​യു​ടെ കാര്യ​മെ​ടു​ക്കാം. അവൾ അമ്മയോ​ടൊ​പ്പം കാറിൽ യാത്ര​ചെ​യ്യു​ക​യാ​യി​രു​ന്നു. അപ്പോൾ മദ്യപി​ച്ചു വണ്ടി​യോ​ടി​ച്ചി​രുന്ന ഒരാളു​ടെ വാഹനം അവരുടെ കാറിൽ വന്നിടി​ച്ചു. ലിൻസി​യെ കാറിന്റെ പിൻസീ​റ്റിൽനി​ന്നു പുറ​ത്തേക്കു വലി​ച്ചെ​ടു​ക്കേ​ണ്ടി​വന്നു. ഏഴാഴ്‌ച ആശുപ​ത്രി​യിൽ കഴിഞ്ഞ അവൾ നിരവധി ശസ്‌ത്ര​ക്രി​യ​കൾക്കു വിധേ​യ​യാ​യി. അവളുടെ ചികി​ത്സ​യ്‌ക്കു ചെലവാ​യ​തോ, 3,00,000-ത്തിലേറെ ഡോളർ. എന്തായാ​ലും അവൾ ഒരുവി​ധ​ത്തിൽ രക്ഷപ്പെട്ടു.

മയക്കു​മ​രു​ന്നു ദുരു​പ​യോ​ഗം. അമേരി​ക്ക​യിൽ മയക്കു​മ​രു​ന്നു ദുരു​പ​യോ​ഗം നിമിത്തം പ്രതി​വർഷം 6,700 കോടി ഡോളർ ചെലവാ​കു​ന്ന​താ​യി ഒരു ഗവേഷക കണക്കാ​ക്കു​ന്നു. ന്യൂ​യോർക്കി​ലുള്ള കൊളം​ബോ യൂണി​വേ​ഴ്‌സി​റ്റി​യി​ലെ, ആസക്തി​ക്കും ആസക്തി​യു​ള​വാ​ക്കുന്ന വസ്‌തു​ക്ക​ളു​ടെ ദുരു​പ​യോ​ഗ​ത്തി​നു​മെ​തി​രെ​യുള്ള ഒരു കേന്ദ്ര​ത്തി​ന്റെ പ്രസി​ഡ​ന്റായ ജോസഫ്‌ എ. കലഫാ​നോ ജൂനിയർ, പ്രശ്‌ന​ത്തി​ന്റെ ചെല​വേ​റിയ മറ്റൊരു വശം ചൂണ്ടി​ക്കാ​ട്ടു​ന്നു: “പ്രതി​ദി​നം 2,000 ഡോളർ നൽകേണ്ട നവജാത ശിശു​ക്ക​ളു​ടെ വാർഡു​കൾ, ഗർഭകാ​ലത്ത്‌ ക്രാക്ക്‌ ഉപയോ​ഗി​ച്ചി​രുന്ന അമ്മമാർക്കു ജനിച്ച ശിശു​ക്ക​ളെ​ക്കൊ​ണ്ടു നിറഞ്ഞി​രി​ക്കു​ന്നു. ഒരു ദശകം​മുമ്പ്‌ ഇത്തരം ശിശു​ക്കളെ കാണുക വിരള​മാ​യി​രു​ന്നു. . . . അതിജീ​വി​ക്കുന്ന ഓരോ കുട്ടി​യെ​യും പ്രായ​പൂർത്തി​യാ​കു​ന്ന​തു​വരെ ചികി​ത്സി​ക്കാൻ 10 ലക്ഷം ഡോളർ വേണ്ടി​വ​രും.” ഇതിനു​പു​റമേ, “1994-ൽ, മയക്കു​മ​രു​ന്നു ദുരു​പ​യോ​ഗ​ത്തോ​ടു ബന്ധപ്പെട്ട—രോഗി​കളെ ആശുപ​ത്രി​ക​ളിൽ കിടത്തി​യുള്ള—ചികി​ത്സ​യ്‌ക്കാ​യി ചെലവാ​യത്‌ ഏതാണ്ട്‌ 300 കോടി ഡോള​റാണ്‌. ഇതിനുള്ള കാരണം ഗർഭി​ണി​കൾ പ്രസവ​പൂർവ പരിച​ര​ണങ്ങൾ തേടാ​ഞ്ഞ​തും മയക്കു​മ​രു​ന്നു ദുരു​പ​യോ​ഗം നിർത്താ​ഞ്ഞ​തു​മാണ്‌,” കലഫാ​നോ അഭി​പ്രാ​യ​പ്പെ​ടു​ന്നു.

ഈ ദുശ്ശീലം മനുഷ്യ ജീവി​ത​ത്തിൽ വരുത്തി​വെ​ക്കുന്ന ഗണനാ​തീത ഭവിഷ്യ​ത്തു​കൾ കണക്കി​ലെ​ടു​ക്കു​മ്പോൾ സാഹച​ര്യ​ത്തി​ന്റെ ശോകാ​ത്മകത വർധി​ക്കു​ന്നു. വൈവാ​ഹിക കലഹങ്ങൾ, അവഗണി​ക്ക​പ്പെട്ട കുട്ടികൾ, സാമ്പത്തിക വിഭവ​ങ്ങ​ളു​ടെ ശോഷണം എന്നിവ മയക്കു​മ​രു​ന്നു ദുരു​പ​യോ​ഗ​ത്താൽ അലങ്കോ​ല​പ്പെട്ട ഭവനങ്ങളെ ബാധി​ക്കുന്ന സാധാരണ പ്രശ്‌ന​ങ്ങ​ളാണ്‌.

ലൈം​ഗി​ക അരാജ​ക​ത്വം. ഐക്യ​നാ​ടു​ക​ളിൽ ഓരോ വർഷവും 1 കോടി 20 ലക്ഷത്തി​ലേറെ ആളുകൾക്ക്‌ ലൈം​ഗി​ക​രോ​ഗങ്ങൾ പിടി​പെ​ടു​ന്നു. ഇതുമൂ​ലം, വികസിത രാഷ്‌ട്ര​ങ്ങ​ളിൽ ഏറ്റവും ഉയർന്ന ലൈം​ഗി​ക​രോഗ നിരക്കു​ള്ളത്‌ ഐക്യ​നാ​ടു​ക​ളി​ലാണ്‌. ജോൺസ്‌ ഹോപ്‌കിൻസ്‌ യൂണി​വേ​ഴ്‌സി​റ്റി സ്‌കൂൾ ഓഫ്‌ ഹൈജീൻ ആൻഡ്‌ പബ്ലിക്‌ ഹെൽത്തി​ലെ ഡേവിഡ്‌ സെലൻറാ​നോ ഇതിനെ “ഒരു ദേശീയ നാണ​ക്കേട്‌” എന്നു വിളി​ക്കു​ന്നു. എയ്‌ഡ്‌സി​നെ ഉൾപ്പെ​ടു​ത്താ​തെ ഈ രോഗങ്ങൾ മൂലമു​ണ്ടാ​കുന്ന നേരി​ട്ടുള്ള ചെലവ്‌ പ്രതി​വർഷം ഏതാണ്ട്‌ 1,000 കോടി ഡോള​റാണ്‌. ഏറ്റവു​മ​ധി​കം അപകട​ത്തി​ലാ​യി​രി​ക്കു​ന്നത്‌ കൗമാ​ര​പ്രാ​യ​ക്കാ​രാ​ണെ​ന്നു​ള്ള​തിൽ അതിശ​യി​ക്കാ​നില്ല! ഒരു റിപ്പോർട്ടു പറയു​ന്ന​തി​നു​സ​രിച്ച്‌, 12-ാം ഗ്രേഡിൽ എത്തു​മ്പോ​ഴേ​ക്കും ഏതാണ്ട്‌ 70 ശതമാനം കുട്ടികൾ ലൈം​ഗി​ക​ബ​ന്ധ​ത്തിൽ ഏർപ്പെ​ട്ടി​ട്ടു​ണ്ടാ​യി​രി​ക്കും, 40 ശതമാ​ന​ത്തോ​ട​ടു​ത്തു കുട്ടി​കൾക്ക്‌ കുറഞ്ഞതു നാല്‌ ലൈം​ഗി​ക​പ​ങ്കാ​ളി​ക​ളെ​ങ്കി​ലും ഉണ്ടായി​രി​ക്കും.

എയ്‌ഡ്‌സ്‌ ആരോ​ഗ്യ​സം​ബ​ന്ധ​മായ ഒരു ദുരന്ത​മാണ്‌. 1996-ന്റെ ആരംഭ​ത്തിൽ, ലഭ്യമായ ഏറ്റവും ഫലപ്ര​ദ​മായ ചികി​ത്സ​യ്‌ക്കാ​യി—മുൻകാല ഔഷധ​ങ്ങ​ളു​ടെ​യും പ്രോ​ട്ടീസ്‌ ഇൻഹി​ബി​റ്റ​റു​ക​ളു​ടെ​യും സംയു​ക്ത​ത്തിന്‌—ഒരു വ്യക്തിക്ക്‌ പ്രതി​വർഷം 12,000 ഡോള​റി​നും 18,000 ഡോള​റി​നും ഇടയ്‌ക്കു പണച്ചെ​ല​വു​വ​രു​മാ​യി​രു​ന്നു. എന്നാൽ ഇത്‌, രോഗി​യു​ടെ​യും ജോലി​യിൽനി​ന്നോ സ്‌കൂ​ളിൽനി​ന്നോ അവധി​യെ​ടുത്ത്‌ അയാളെ പരിച​രി​ക്കു​ന്ന​വ​രു​ടെ​യും ഉത്‌പാ​ദ​ന​ക്ഷ​മ​താ​നഷ്ടം ഉൾപ്പെ​ടുന്ന, എയ്‌ഡ്‌സി​ന്റെ അദൃശ്യ ചെലവി​ന്റെ ഒരു ഭാഗം മാത്ര​മാണ്‌. 2,000-ാമാ​ണ്ടോ​ടെ എച്ച്‌ഐവി-യും എയ്‌ഡ്‌സും കൂടി​ച്ചേർന്ന്‌ 35,600 കോടി ഡോള​റി​നും 51,400 കോടി ഡോള​റി​നും ഇടയ്‌ക്കു പണം ഒഴുക്കി​ക്ക​ള​ഞ്ഞി​രി​ക്കും—ഓസ്‌​ട്രേ​ലി​യ​യു​ടെ​യോ ഇന്ത്യയു​ടെ​യോ മുഴു സമ്പത്തും ഒഴുക്കി​ക്ക​ള​യു​ന്ന​തി​നു തുല്യ​മാ​യി​രി​ക്കും ഇത്‌.

അക്രമം. 1992-ൽ അക്രമം നിമി​ത്ത​മു​ണ്ടായ ചികി​ത്സാ​ച്ചെ​ലവ്‌ 1,350 കോടി ഡോള​റാ​യി​രു​ന്നെന്ന്‌ യു.എസ്‌. സർജൻ ജനറലാ​യി​രു​ന്ന​പ്പോൾ ജോയ്‌സെ​ലിൻ എൽഡർസ്‌ റിപ്പോർട്ടു ചെയ്‌തു. യു.എസ്‌. പ്രസി​ഡ​ന്റായ ബിൽ ക്ലിൻറൺ ഇപ്രകാ​രം അഭി​പ്രാ​യ​പ്പെട്ടു: “അമേരി​ക്ക​യിൽ ആരോ​ഗ്യ​പ​രി​പാ​ലന സംബന്ധ​മായ ചെലവ്‌ ഇത്ര ഉയർന്ന​താ​യി​രി​ക്കാ​നുള്ള കാരണം നമ്മുടെ അത്യാ​ഹി​ത​വി​ഭാ​ഗം നിറയെ മുറി​വേ​റ്റ​വ​രും വെടി​യേ​റ്റ​വ​രു​മു​ള്ള​തു​കൊ​ണ്ടാണ്‌.” ദ ജേർണൽ ഓഫ്‌ ദി അമേരി​ക്കൻ മെഡിക്കൽ അസോ​സി​യേഷൻ ഐക്യ​നാ​ടു​ക​ളി​ലെ അക്രമത്തെ “ഒരു പൊതു​ജ​നാ​രോ​ഗ്യ അടിയ​ന്തി​രത” എന്നു വിളി​ക്കു​ന്നതു നല്ല കാരണ​ത്തോ​ടെ​യാണ്‌. റിപ്പോർട്ടു തുടരു​ന്നു: അക്രമം ഒരു രോഗ​മ​ല്ലെ​ന്നതു ശരിതന്നെ. എങ്കിലും വ്യക്തി​യു​ടെ​യും പൊതു​ജ​ന​ത്തി​ന്റെ​യും ആരോ​ഗ്യ​ത്തി​ന്മേ​ലുള്ള അതിന്റെ പ്രഭാവം പല ശാരീ​രിക അസുഖ​ങ്ങ​ളു​ടെ അത്രയും​തന്നെ ശക്തമാണ്‌—ഒരുപക്ഷേ അതിൽ കൂടു​ത​ലും.”

1993-ലെ ആദ്യത്തെ ഒമ്പതു മാസങ്ങ​ളിൽ അക്രമ​ത്തി​നി​ര​യായ ഓരോ വ്യക്തി​ക്കും വേണ്ടിവന്ന ശരാശരി ചെലവ്‌ 9,600 ഡോള​റാ​യി​രു​ന്നു​വെന്ന്‌ കൊള​റാ​ഡൊ​യി​ലെ 40 ആശുപ​ത്രി​കൾ നൽകിയ ഒരു റിപ്പോർട്ട്‌ പറയുന്നു. ആശുപ​ത്രി​യി​ലാ​ക്കി​യ​വ​രിൽ പകുതി​യി​ലേറെ പേർ ഇൻഷ്വ​റൻസ്‌ എടുക്കാ​ഞ്ഞ​വ​രാ​യി​രു​ന്നു. കുറെ​പ്പേർ തങ്ങളുടെ ചെലവു വഹിക്കാൻ കഴിവി​ല്ലാ​ത്ത​വ​രോ മനസ്സി​ല്ലാ​ത്ത​വ​രോ ആയിരു​ന്നു. ഇത്തരം സാഹച​ര്യ​ങ്ങൾ ഉയർന്ന നികുതി, ഉയർന്ന ഇൻഷ്വ​റൻസ്‌ പ്രീമി​യം, ഉയർന്ന ആശുപ​ത്രി ബില്ലുകൾ എന്നിവ​യ്‌ക്കു കാരണ​മാ​കു​ന്നു. കൊള​റാ​ഡൊ ആശുപ​ത്രി സമിതി റിപ്പോർട്ടു ചെയ്യുന്നു: “നമു​ക്കെ​ല്ലാ​വർക്കും പണം നഷ്ടമാ​കു​ന്നു.”

ജീവി​ത​രീ​തി​ക​ളിൽ മാറ്റം

മാനു​ഷിക കാഴ്‌ച​പ്പാ​ടിൽ, ആരോ​ഗ്യാ​വ​ഹ​മ​ല്ലാത്ത ജീവിതം നയിക്കാ​നുള്ള പ്രവണത ഗതിമാ​റ്റി​വി​ടാ​മെന്ന പ്രതീ​ക്ഷ​യ്‌ക്കു വകയി​ല്ലെന്നു തോന്നും. “അമേരിക്ക ഒരു ഏദെൻ തോട്ട​മൊ​ന്നു​മല്ല, ലഹരി​പ​ദാർഥ​ങ്ങ​ളു​ടെ ദുരു​പ​യോ​ഗ​ത്തിൽനിന്ന്‌ നാം ഒരിക്ക​ലും വിമുക്തി നേടാൻ പോകു​ന്നില്ല,” കൊളം​ബിയ യൂണി​വേ​ഴ്‌സി​റ്റി​യു​ടെ ഒരു റിപ്പോർട്ടു പറയുന്നു. “എന്നാൽ നാം ഈ ദുരു​പ​യോ​ഗ​ത്തിന്‌ എത്രയ​ധി​കം കടിഞ്ഞാ​ണി​ടു​ന്നു​വോ അത്രയ​ധി​കം സത്‌ഫ​ലങ്ങൾ—കൂടുതൽ ആരോ​ഗ്യ​മുള്ള കുട്ടികൾ, അക്രമ​ത്തി​ലും കുറ്റകൃ​ത്യ​ത്തി​ലു​മുള്ള കുറവ്‌, നികു​തി​യി​ളവ്‌, ആരോ​ഗ്യ​പ​രി​പാ​ലന ചെലവു​ക​ളി​ലുള്ള കുറവ്‌, ഉയർന്ന ലാഭങ്ങൾ, കൂടുതൽ വിദ്യാ​സ​മ്പ​ന്ന​രായ വിദ്യാർഥി​കൾ, എയ്‌ഡ്‌സ്‌ രോഗ​ങ്ങ​ളി​ലുള്ള കുറവ്‌ എന്നിങ്ങ​നെ​യുള്ള ഫലങ്ങൾ—നമുക്കു ലഭിക്കും.”

ആ ലക്ഷ്യം കൈവ​രി​ക്കാൻ ഏറ്റവും സഹായ​ക​മാ​യത്‌ ബൈബി​ളാ​ണെന്ന്‌ യഹോ​വ​യു​ടെ സാക്ഷികൾ കണ്ടെത്തി​യി​രി​ക്കു​ന്നു. ബൈബിൾ ഒരു സാധാരണ പുസ്‌ത​കമല്ല. അത്‌ മനുഷ്യ​ന്റെ സ്രഷ്ടാ​വായ യഹോ​വ​യാം ദൈവ​ത്താൽ നിശ്വ​സ്‌ത​മാ​ക്ക​പ്പെ​ട്ട​താണ്‌. (2 തിമൊ​ഥെ​യൊസ്‌ 3:16, 17) ‘ശുഭക​ര​മാ​യി പ്രവർത്തി​പ്പാൻ നിന്നെ അഭ്യസി​പ്പി​ക്ക​യും നീ പോ​കേ​ണ്ടുന്ന വഴിയിൽ നിന്നെ നടത്തു​ക​യും ചെയ്യു​ന്നത്‌’ അവനാണ്‌. (യെശയ്യാ​വു 48:17) ബൈബി​ളിൽ നൽകി​യി​രി​ക്കുന്ന തത്ത്വങ്ങൾ ആരോ​ഗ്യാ​വ​ഹ​മാണ്‌. അതിന്റെ ബുദ്ധ്യു​പ​ദേ​ശ​ത്തിന്‌ അനുസൃ​ത​മാ​യി നടക്കു​ന്നവർ സത്‌ഫ​ലങ്ങൾ കൊയ്യും.

ഉദാഹ​ര​ണ​ത്തിന്‌, എസ്ഥേർ ഒരിക്കൽ ഒരു കടുത്ത പുകവ​ലി​ക്കാ​രി​യാ​യി​രു​ന്നു.a അവൾ യഹോ​വ​യു​ടെ സാക്ഷി​ക​ളോ​ടൊ​ത്തു ബൈബിൾ പഠിക്കാൻ തുടങ്ങി​യ​ശേഷം ന്യൂ​യോർക്കി​ലെ ബ്രുക്ലി​നി​ലുള്ള യഹോ​വ​യു​ടെ സാക്ഷി​ക​ളു​ടെ ലോകാ​സ്ഥാ​നം ഒരു ദിവസം ചുറ്റി​ന​ടന്നു കാണാൻ ബൈബിൾ അധ്യാ​പിക അവളെ ക്ഷണിച്ചു. ആദ്യം എസ്ഥേർ ഒന്നു മടിച്ചു. യഹോ​വ​യു​ടെ സാക്ഷികൾ പുകവ​ലി​ക്കു​ക​യി​ല്ലെന്ന്‌ അറിയാ​മാ​യി​രു​ന്ന​തു​കൊണ്ട്‌ അവരോ​ടൊത്ത്‌ താൻ എങ്ങനെ ഒരു ദിവസം​മു​ഴു​വൻ ചെലവ​ഴി​ക്കു​മെന്ന്‌ അവൾ ചിന്തിച്ചു. അതു​കൊണ്ട്‌ എസ്ഥേർ ഒരു സിഗരറ്റ്‌ അവളുടെ പേഴ്‌സിൽ കരുതി. പുകവ​ലി​ക്കാ​നുള്ള പ്രേര​ണ​യു​ണ്ടാ​കു​ന്ന​പക്ഷം ആരും കാണാതെ കക്കൂസിൽ പോയി അതു വലിക്കാ​മെന്ന്‌ അവൾ മനസ്സിൽ കരുതി. ആസൂ​ത്രണം ചെയ്‌ത​തു​പോ​ലെ​തന്നെ അൽപ്പം ചുറ്റി​ന​ട​ന്നു​ക​ണ്ട​ശേഷം എസ്ഥേർ സ്‌ത്രീ​കൾക്കുള്ള കക്കൂസിൽപോ​യി സിഗരറ്റ്‌ പുറ​ത്തെ​ടു​ത്തു. എന്നാൽ ഒരു കാര്യം അവളുടെ ശ്രദ്ധയിൽപ്പെട്ടു. മുറി അത്യന്തം വൃത്തി​യു​ള്ള​താ​യി​രു​ന്നു, അവിടു​ത്തെ വായു ശുദ്ധമാ​യി​രു​ന്നു. “സിഗരറ്റ്‌ വലിച്ചു​കൊണ്ട്‌ ആ സ്ഥലം വൃത്തി​കേ​ടാ​ക്കാൻ എനിക്കു തോന്നി​യില്ല. അതു​കൊണ്ട്‌ ഞാൻ അതു കക്കൂസി​ലി​ട്ടു വെള്ള​മൊ​ഴി​ച്ചു​ക​ളഞ്ഞു. അതിൽപ്പി​ന്നെ ഞാൻ സിഗരറ്റ്‌ തൊട്ടി​ട്ടേ​യില്ല!”

ലോക​വ്യാ​പ​ക​മാ​യി എസ്ഥേറി​നെ​പ്പോ​ലെ ലക്ഷക്കണ​ക്കി​നാ​ളു​കൾ ബൈബിൾ തത്ത്വങ്ങ​ളോ​ടു ചേർച്ച​യിൽ ജീവി​ക്കാൻ പഠിക്കു​ന്നു. അവർ പ്രയോ​ജ​ന​മ​നു​ഭ​വി​ക്കു​ന്നു. തങ്ങൾ ജീവി​ക്കുന്ന സമുദാ​യ​ത്തിന്‌ അവർ വലിയ മുതൽക്കൂ​ട്ടാ​യി​ത്തീ​രു​ന്നു. സർവോ​പരി, അവർ തങ്ങളുടെ സ്രഷ്ടാ​വായ യഹോ​വ​യാം ദൈവ​ത്തിന്‌ ബഹുമതി കൈവ​രു​ത്തു​ന്നു.—സദൃശ​വാ​ക്യ​ങ്ങൾ 27:11 താരത​മ്യം ചെയ്യുക.

മനുഷ്യൻ എത്ര ശ്രമി​ച്ചാ​ലും “ഏദെൻ തോട്ടം” പുനർനിർമി​ക്കാൻ പറ്റി​ല്ലെ​ങ്കി​ലും ദൈവം അതു ചെയ്യു​മെന്ന്‌ ബൈബിൾ പറയുന്നു. 2 പത്രൊസ്‌ 3:13 ഇപ്രകാ​രം പറയുന്നു: “എന്നാൽ നാം അവന്റെ വാഗ്‌ദ​ത്ത​പ്ര​കാ​രം നീതി വസിക്കുന്ന പുതിയ ആകാശ​ത്തി​ന്നും പുതിയ ഭൂമി​ക്കു​മാ​യി​ട്ടു കാത്തി​രി​ക്കു​ന്നു.” (യെശയ്യാ​വു 51:3 താരത​മ്യം ചെയ്യുക.) ആ പുതിയ ഭൂമി​യിൽ ആരോ​ഗ്യ​പ​രി​പാ​ലനം വീണ്ടു​മൊ​രി​ക്ക​ലും ഉത്‌ക​ണ്‌ഠ​പ്പെ​ടേണ്ട ഒരു സംഗതി​യാ​യി​രി​ക്കു​ക​യില്ല. കാരണം, മനുഷ്യ​വർഗം പൂർണാ​രോ​ഗ്യ​ത്തോ​ടെ ജീവിതം ആസ്വദി​ക്കും, ദൈവം ആരംഭ​ത്തിൽ ഉദ്ദേശിച്ച വിധത്തിൽ. (യെശയ്യാ​വു 33:24) ദൈവ​ത്തി​ന്റെ വാഗ്‌ദാ​ന​ങ്ങ​ളെ​ക്കു​റി​ച്ചു കൂടുതൽ അറിയാൻ നിങ്ങൾക്കു താത്‌പ​ര്യ​മു​ണ്ടോ? നിങ്ങളെ സഹായി​ക്കാൻ യഹോ​വ​യു​ടെ സാക്ഷി​കൾക്കു സന്തോ​ഷ​മേ​യു​ള്ളൂ.

[അടിക്കു​റിപ്പ്‌]

[26-ാം പേജിലെ ചിത്ര​ത്തിന്‌ കടപ്പാട്‌]

© 1985 P. F. Bentley/Black Star