മലമ്പനി​ക്കെ​തി​രെ​യുള്ള യുദ്ധത്തി​ന്റെ ആദ്യപാ​ഠ​ങ്ങ​ളി​ലേക്ക്‌

ആഭ്യന്ത​ര​യു​ദ്ധങ്ങൾ, കുറ്റകൃ​ത്യം, തൊഴി​ലി​ല്ലായ്‌മ തുടങ്ങി​യ​വ​യി​ലേ​ക്കും മറ്റു പ്രതി​സ​ന്ധി​ക​ളി​ലേ​ക്കും ലോക​ശ്രദ്ധ കേന്ദ്രീ​കൃ​ത​മായ ഇക്കാലത്ത്‌ മലമ്പനി മൂലമുള്ള മരണങ്ങൾ പ്രധാന വാർത്ത​കൾക്കു പറ്റിയ വിഷയ​മേയല്ല. എന്നിരു​ന്നാ​ലും, ലോകാ​രോ​ഗ്യ സംഘടന (ഡബ്ലിയു​എച്ച്‌ഒ) പറയു​ന്ന​ത​നു​സ​രിച്ച്‌ ലോക ജനസം​ഖ്യ​യു​ടെ പകുതി​യോ​ളം ഇന്ന്‌ മലമ്പനി​യു​ടെ ഭീഷണി​യിൻകീ​ഴി​ലാണ്‌. “ഉഷ്‌ണ​മേ​ഖലാ രോഗ​ങ്ങ​ളിൽ ഏറ്റവും വ്യാപ​ക​വും അതിമാ​ര​ക​വു​മായ രോഗ​ങ്ങ​ളി​ലൊ​ന്നായ മലമ്പനി” പ്രതി​വർഷം ഏകദേശം 30 കോടി​മു​തൽ 50 കോടി​വരെ ആളുകൾക്കു പിടി​പെ​ടു​ന്നു. എന്നാലത്‌ എത്രമാ​ത്രം മാരക​മാണ്‌?

ഓരോ 20 സെക്കൻഡി​ലും ആരെങ്കി​ലും മലമ്പനി നിമിത്തം മരിക്കു​ന്നു. 15 ലക്ഷത്തി​ലേറെ ആളുകൾ ഓരോ വർഷവും ഇതു നിമിത്തം മരിക്കു​ന്നെന്ന്‌ ഇതു കാണി​ക്കു​ന്നു—ആഫ്രിക്കൻ രാജ്യ​മായ ബോട്‌സ്വാ​ന​യു​ടെ ജനസം​ഖ്യ​യ്‌ക്കു തുല്യ​മാ​ണിത്‌. മലമ്പനി മൂലമുള്ള പത്തു മരണങ്ങ​ളിൽ ഒമ്പതെ​ണ്ണ​വും ആഫ്രി​ക്ക​യു​ടെ ഉഷ്‌ണ​മേ​ഖലാ പ്രദേ​ശ​ങ്ങ​ളി​ലാണ്‌ ഉണ്ടാകു​ന്നത്‌. ഇങ്ങനെ മരിക്കു​ന്ന​വ​രിൽ അധിക​വും കൊച്ചു കുട്ടി​ക​ളാണ്‌. അമേരി​ക്ക​ക​ളിൽ മലമ്പനി​യു​ണ്ടാ​കാൻ ഏറ്റവും കൂടുതൽ സാധ്യ​ത​യുള്ള സ്ഥലം ആമസോൺ പ്രദേ​ശ​മാ​ണെന്ന്‌ ഡബ്ലിയു​എച്ച്‌ഒ രേഖ​പ്പെ​ടു​ത്തി​യി​രി​ക്കു​ന്നു. വനനശീ​ക​ര​ണ​ത്തി​ന്റെ​യും മറ്റു പരിസ്ഥി​തി മാറ്റങ്ങ​ളു​ടെ​യും അനന്തര​ഫ​ല​മെ​ന്ന​വണ്ണം മലമ്പനി രോഗി​ക​ളു​ടെ എണ്ണം ലോക​ത്തി​ന്റെ ആ ഭാഗത്തു വർധി​ച്ചു​വ​രു​ന്നു. ബ്രസീ​ലി​ലെ ചില ആമസോ​ണി​യൻ സമുദാ​യ​ങ്ങ​ളി​ലെ തദ്ദേശ​വാ​സി​ക​ളിൽ 1,000-ത്തിൽ 500 പേർക്കു​വീ​തം രോഗ​ബാ​ധ​യു​ണ്ടാ​ക​ത്ത​ക്ക​വണ്ണം ഇപ്പോൾ പ്രശ്‌നം അത്ര ഗുരു​ത​ര​മാണ്‌.

ആഫ്രി​ക്ക​യി​ലോ അമേരി​ക്ക​ക​ളി​ലോ ഏഷ്യയി​ലോ അല്ലെങ്കിൽ മറ്റെവി​ടെ​യെ​ങ്കി​ലു​മോ ആയാലും മലമ്പനി പ്രമു​ഖ​മാ​യും ബാധി​ക്കു​ന്നത്‌ ഏറ്റവും പാവപ്പെട്ട ജനങ്ങ​ളെ​യാണ്‌. ഇവർക്ക്‌ “ആരോഗ്യ പരിപാ​ലന വിഭാ​ഗ​ങ്ങ​ളിൽ നിന്നുള്ള സേവനങ്ങൾ ലഭ്യമാ​കാൻ കുറഞ്ഞ സാധ്യ​ത​യേ​യു​ള്ളൂ. വ്യക്തി​പ​ര​മായ സംരക്ഷ​ണ​ത്തി​നു​വേ​ണ്ടുന്ന സംഗതി​ക​ളു​ടെ ചെലവു വഹിക്കാൻ ഇവർക്കു പ്രയാ​സ​മാ​യി​രി​ക്കും. സുസം​ഘ​ടിത മലമ്പനി നിയന്ത്രണ പ്രവർത്ത​ന​ങ്ങൾക്ക്‌ എത്തി​പ്പെ​ടാൻ ഏറ്റവും പ്രയാ​സ​വും ഇവരു​ടെ​യ​ടു​ത്താ​യി​രി​ക്കും” എന്ന്‌ ഡബ്ലിയു​എച്ച്‌ഒ പറയുന്നു. എങ്കിലും ദരി​ദ്ര​രായ ഇവരുടെ സ്ഥിതി തീരെ ആശയറ്റതല്ല. കഴിഞ്ഞ ഏതാനും വർഷങ്ങ​ളാ​യി മലമ്പനി മരണങ്ങൾ തടയു​ന്ന​തി​നുള്ള മാർഗ​ങ്ങ​ളിൽ ഏറ്റവു​മ​ധി​കം വിജയ​സാ​ധ്യ​ത​യുള്ള ഒന്നിന്റെ ലഭ്യത വർധി​ച്ചി​രി​ക്കു​ന്നു എന്ന്‌ ഉഷ്‌ണ​മേ​ഖലാ-രോഗ ഗവേഷ​ണത്തെ സംബന്ധി​ച്ചുള്ള ഒരു വാർത്താ​പ​ത്രി​ക​യായ റ്റിഡിആർ ന്യൂസ്‌ പറയുന്നു. ആ ജീവരക്ഷാ വസ്‌തു​വി​ന്റെ പേര്‌? കീടനാ​ശി​നി​യിൽ മുക്കിയ കൊതു​കു​വ​ലകൾ.

വലകൊ​ണ്ടുള്ള നേട്ടങ്ങൾ

കൊതു​കു​വ​ല​ക​ളു​ടെ ഉപയോ​ഗം പരിഹാ​ര​മാർഗ​ങ്ങ​ളു​ടെ ആദ്യപാ​ഠ​ത്തി​ലേ​ക്കുള്ള മടങ്ങലാ​ണെ​ങ്കി​ലും, മലമ്പനി​ക്കെ​തി​രെ​യുള്ള യുദ്ധത്തിൽ അവ ഉപയോ​ഗി​ക്കു​ന്ന​തി​ന്റെ ഫലപ്ര​ദ​ത്വ​ത്തെ​ക്കു​റി​ച്ചു നടത്തിയ പരീക്ഷ​ണങ്ങൾ “വളരെ ആവേശ​ജ​ന​ക​മായ ഫലങ്ങൾ” നൽകി​യി​രി​ക്കു​ന്നു എന്ന്‌ ഡബ്ലിയു​എച്ച്‌ഒ-യുടെ ആഫ്രിക്കൻ ഓഫീസ്‌ ഡയറക്ട​റായ ഡോ. ഇബ്രാ​ഹീം സാംബ, പാനോസ്‌ ഇൻസ്റ്റി​റ്റ്യൂ​ട്ടി​ന്റെ ഒരു വാർത്താ​പ​ത്രി​ക​യായ പാനോസ്‌ ഫീച്ചേ​ഴ്‌സി​നോ​ടു പറഞ്ഞു. ഉദാഹ​ര​ണ​മാ​യി കെനി​യ​യിൽ കീടനാ​ശി​നി​യിൽ മുക്കിയ കൊതു​കു​വ​ല​ക​ളു​ടെ ഉപയോ​ഗം അഞ്ചു വയസ്സിനു താഴെ​യുള്ള കുട്ടി​ക​ളു​ടെ മരണസം​ഖ്യ മൂന്നി​ലൊ​ന്നാ​ക്കി കുറച്ചു. ഇത്‌ മലമ്പനി മരണങ്ങ​ളു​ടെ മാത്രം കാര്യമല്ല, മൊത്ത​ത്തി​ലുള്ള മരണനി​ര​ക്കി​ലാണ്‌ കുറവു വന്നിരി​ക്കു​ന്നത്‌. ജീവൻ രക്ഷിക്കു​ന്ന​തി​നു പുറമേ “വലകൾ, ആരോഗ്യ പരിപാ​ലന സേവന വിഭാ​ഗ​ങ്ങ​ളു​ടെ ഭാരം ഗണ്യമാ​യി കുറ​ച്ചേ​ക്കാം.” കാരണം വളരെ കുറച്ചു രോഗി​ക​ളെയേ, മലമ്പനി നിമിത്തം ആശുപ​ത്രി​യിൽ കിടത്തി ചികി​ത്സി​ക്കേണ്ടി വരുക​യു​ള്ളൂ.

എങ്കിലും, ഒരു പ്രശ്‌നം ഇനിയും പരിഹ​രി​ക്കേ​ണ്ട​താ​യുണ്ട്‌: കൊതു​കു​വ​ല​ക​ളു​ടെ ചെലവ്‌ ആരു വഹിക്കും? ഒരു ആഫ്രിക്കൻ രാജ്യത്തെ ആളുക​ളോട്‌ സംഭാ​വ​നകൾ ആവശ്യ​പ്പെ​ട്ട​പ്പോൾ മിക്കവ​രും പിൻവ​ലി​ഞ്ഞു. ഇതിൽ അത്ഭുത​വു​മില്ല. കാരണം ആരോഗ്യ പരിപാ​ല​ന​ത്തി​നാ​യി ആളൊ​ന്നുക്ക്‌ 5 ഡോള​റിൽ താഴെ (യു.എസ്‌.) മാത്രം ചെലവ​ഴി​ക്കുന്ന രാജ്യ​ങ്ങ​ളിൽ ജീവി​ക്കുന്ന ആളുകളെ സംബന്ധിച്ച്‌, ഒരു കൊതു​കു​വല—കീടനാ​ശി​നി​യിൽ മുക്കി​യ​തോ അല്ലാത്ത​തോ ആയി​ക്കൊ​ള്ളട്ടെ—ഒരു ആർഭാ​ടം​ത​ന്നെ​യാണ്‌. എന്നിരു​ന്നാ​ലും, ഈ പ്രതി​രോധ നടപടി മലമ്പനി രോഗി​ക​ളു​ടെ ചികി​ത്സയെ അപേക്ഷിച്ച്‌, ഗവൺമെൻറു​കൾക്കു കുറഞ്ഞ ചെലവേ വരുത്തു​ന്നു​ള്ളു​വെ​ന്ന​തി​നാൽ, “കീടനാ​ശി​നി​യിൽ മുക്കിയ കൊതു​കു​വ​ലകൾ വിതരണം ചെയ്യു​ന്ന​തി​നും അതിനു​വേണ്ട ധനം സമാഹ​രി​ക്കു​ന്ന​തി​നും സർക്കാ​രി​ന്റെ പരിമി​ത​മായ ഫണ്ടുകൾ ഫലപ്ര​ദ​മാ​യി ചെലവ​ഴി​ക്കു​ന്നതു തക്ക മൂല്യ​മു​ള്ള​താണ്‌” എന്ന്‌ യുഎൻ-ൽ നിന്നുള്ള വിദഗ്‌ധർ അഭി​പ്രാ​യ​പ്പെ​ടു​ന്നു. കൊതു​കു​വ​ലകൾ ലഭ്യമാ​ക്കു​ന്നത്‌ വാസ്‌ത​വ​ത്തിൽ ഗവൺമെൻറു​കളെ സംബന്ധി​ച്ചി​ട​ത്തോ​ളം ഫണ്ടുകൾ ലാഭി​ക്കു​ന്ന​തി​നുള്ള ഒരു മാർഗ​മാ​യി​രു​ന്നേ​ക്കാം. എന്നാൽ, ലക്ഷക്കണ​ക്കി​നു​വ​രുന്ന അവരുടെ ദരി​ദ്ര​രായ പൗരന്മാ​രെ സംബന്ധി​ച്ചി​ട​ത്തോ​ളം അത്‌ വളരെ കൂടുതൽ അർഥമാ​ക്കി​യേ​ക്കാം—അവരുടെ ജീവൻ രക്ഷിക്കാ​നുള്ള ഒരു മാർഗം.

[31-ാം പേജിലെ ചിത്ര​ത്തിന്‌ കടപ്പാട്‌]

CDC, Atlanta, Ga.