കിളി​മ​ഞ്ചാ​രോ—ആഫ്രി​ക്ക​യു​ടെ മേൽക്കൂര

കെനിയയിലെ ഉണരുക! ലേഖകൻ

വെറും 150 വർഷം മുമ്പു​വരെ ആഫ്രിക്കൻ ഉൾപ്ര​ദേ​ശ​ങ്ങ​ളു​ടെ വലി​യൊ​രു ഭാഗം ഭൂപട​ത്തിൽ രേഖ​പ്പെ​ടു​ത്ത​പ്പെ​ട്ടി​രു​ന്നില്ല. പുറം​ലോ​കത്തെ സംബന്ധി​ച്ചി​ട​ത്തോ​ളം ഈ വലിയ ഭൂഖണ്ഡം, മനുഷ്യർ എത്തി​പ്പെ​ട്ടി​ട്ടി​ല്ലാത്ത ദുരൂഹത നിറഞ്ഞ ഒരു സ്ഥലമാ​യി​രു​ന്നു. കാലാ​ന്ത​ര​ത്തിൽ പൂർവ ആഫ്രി​ക്ക​യിൽനിന്ന്‌ പല പല കഥകൾ വന്നെത്തി. അവയി​ലൊന്ന്‌ യൂറോ​പ്യ​ന്മാർക്ക്‌ പ്രത്യേ​കി​ച്ചും വിചി​ത്ര​മാ​യി തോന്നി​ച്ചു. ജർമൻ മിഷന​റി​മാ​രായ യോഹാ​ന്നസ്‌ റേപ്‌മാ​നും യോഹാൻ എൽ. ക്രേപ്‌ഫും നൽകിയ ഒരു റിപ്പോർട്ടാ​യി​രു​ന്നു അത്‌. 1848-ൽ, ഭൂമധ്യ​രേ​ഖ​യ്‌ക്ക​ടു​ത്താ​യി ഉച്ചിയിൽ മഞ്ഞുമൂ​ടി​ക്കി​ട​ക്ക​ത്ത​ക്ക​വി​ധം അത്ര ഉയരമുള്ള ഒരു പർവതം കണ്ടെന്ന്‌ അവർ അവകാ​ശ​പ്പെട്ടു.

ഉഷ്‌ണ​മേ​ഖ​ലാ ആഫ്രി​ക്ക​യിൽ മഞ്ഞുമൂ​ടി​ക്കി​ട​ക്കുന്ന ഒരു പർവതം സ്ഥിതി​ചെ​യ്യു​ന്നു​വെന്ന വാർത്തയെ യൂറോ​പ്യ​ന്മാർ സംശയി​ക്കുക മാത്രമല്ല, ചിരി​ച്ചു​ത​ള്ളു​ക​യും ചെയ്‌തു. എന്നിരു​ന്നാ​ലും, ഒരു കൂറ്റൻ പർവത​ത്തെ​ക്കു​റി​ച്ചുള്ള വിവര​ണങ്ങൾ ഭൂമി​ശാ​സ്‌ത്ര​ജ്ഞ​ന്മാ​രി​ലും പര്യ​വേ​ക്ഷ​ക​രി​ലും കൗതു​ക​മു​ണർത്തി. ഒടുവിൽ അവർ ആ മിഷന​റി​മാ​രു​ടെ റിപ്പോർട്ടു​കൾ സ്ഥിരീ​ക​രി​ച്ചു. പൂർവ ആഫ്രി​ക്ക​യിൽ, കിളി​മ​ഞ്ചാ​രോ എന്നു വിളി​ക്ക​പ്പെ​ടുന്ന മഞ്ഞണിഞ്ഞ ഒരു അഗ്നിപർവതം ഉണ്ടായി​രു​ന്നു​വെ​ന്നു​ള്ളത്‌ സത്യമാ​യി​രു​ന്നു. ചില ആളുകൾ അതിന്റെ അർഥം “മഹത്ത്വ​ത്തി​ന്റെ പർവതം” എന്നാ​ണെന്നു കരുതി.

ആഫ്രി​ക്ക​യു​ടെ “മേൽക്കൂര”

ഇന്ന്‌, കിളി​മ​ഞ്ചാ​രോ വശ്യമായ മനോ​ഹാ​രി​ത​യ്‌ക്കും മതിപ്പു​ള​വാ​ക്കുന്ന ഉയരത്തി​നും പേരു​കേ​ട്ട​താണ്‌. പശ്ചാത്ത​ല​ത്തിൽ, അങ്ങകലെ ആഢ്യത്വ​ത്തോ​ടെ തലയു​യർത്തി നിൽക്കുന്ന “കിളി.” പൊടി​പാ​റുന്ന വരണ്ട ആഫ്രിക്കൻ സമതല​ത്തി​ലൂ​ടെ വിഹരി​ക്കുന്ന ആനക്കൂട്ടം. ഇതി​നോ​ളം രമണീ​യ​വും ഓർമ​യിൽ തങ്ങിനിൽക്കു​ന്ന​തു​മായ ദൃശ്യങ്ങൾ വേറെ​യി​ല്ലെ​ന്നു​തന്നെ പറയാം.

ആഫ്രിക്കൻ ഭൂഖണ്ഡ​ത്തിൽ വെച്ച്‌ ഏറ്റവും ഉയരം കൂടി​യ​തും ലോക​ത്തി​ലെ സുഷു​പ്‌തി​യി​ലാണ്ട ഏറ്റവും വലിയ അഗ്നിപർവ​ത​ങ്ങ​ളിൽ ഒന്നുമാണ്‌ കിളി​മ​ഞ്ചാ​രോ. ടാൻസാ​നി​യ​യിൽ, ഭൂമധ്യ​രേ​ഖ​യ്‌ക്കു തെക്ക്‌ കെനിയൻ അതിർത്തി​ക്കു തൊട്ട​ടു​ത്താണ്‌ അതു സ്ഥിതി​ചെ​യ്യു​ന്നത്‌. ഇവിടെ ഭൂമി 400 കോടി ഘനമീറ്റർ അഗ്നിപർവത പദാർഥങ്ങൾ പുറന്ത​ള്ളി​യി​ട്ടുണ്ട്‌. മേഘങ്ങളെ ചുംബി​ക്കുന്ന കൊടു​മു​ടി​ക​ളോ​ടു കൂടിയ ഈ പർവതം അങ്ങനെ രൂപം​കൊ​ണ്ടി​രി​ക്കു​ന്നു.

ഒറ്റപ്പെ​ട്ടു​നിൽക്കു​ന്ന​തു​കൊ​ണ്ടാണ്‌ ഈ പർവതം കൂടുതൽ ഭീമാ​കാ​ര​മാ​യി തോന്നി​ക്കു​ന്നത്‌. ഒറ്റപ്പെ​ട്ടു​നിൽക്കുന്ന അത്‌, സമു​ദ്ര​നി​ര​പ്പിൽനിന്ന്‌ ഏതാണ്ട്‌ 900 മീറ്റർ ഉയരത്തിൽ സ്ഥിതി​ചെ​യ്യുന്ന, കാടു​പി​ടിച്ച നിർജല പ്രദേ​ശ​മായ മാ​സൈ​യിൽനിന്ന്‌ 5,895 മീറ്റർ ഉയർന്നു​നിൽക്കു​ന്നു! കിളി​മ​ഞ്ചാ​രോ​യെ ആഫ്രി​ക്ക​യു​ടെ മേൽക്കൂര എന്നു ചില​പ്പോൾ വിളി​ക്കു​ന്ന​തിൽ അതിശ​യി​ക്കാ​നില്ല.

കിളി​മ​ഞ്ചാ​രോ​യെ “മരുയാ​ത്രി​ക​രു​ടെ പർവതം” എന്നും വിളി​ച്ചി​രു​ന്നു. കാരണം, തിളങ്ങുന്ന വെൺമ​യേ​റിയ ഒരു മാർഗ​ദീ​പം​പോ​ലെ അതിന്റെ വലിയ ഹിമപ്പ​ര​പ്പു​ക​ളും ഹിമാ​നി​ക​ളും നൂറു​ക​ണ​ക്കി​നു കിലോ​മീ​റ്റ​റു​കൾക്ക​കലെ—ഏതു ദിശയിൽനി​ന്നും—ദൃശ്യ​മാ​യി​രു​ന്നു. പോയ നൂറ്റാ​ണ്ടു​ക​ളിൽ ആഫ്രിക്കൻ വനാന്ത​ര​ങ്ങ​ളിൽനിന്ന്‌ അടിമ​കളെ കൂടാതെ, ആനക്കൊ​മ്പും സ്വർണ​വും കൊണ്ടു​പോ​യി​രുന്ന മരുയാ​ത്രി​കരെ മിക്ക​പ്പോ​ഴും നയിച്ചി​രു​ന്നത്‌ മഞ്ഞുമൂ​ടി​ക്കി​ട​ക്കുന്ന ഈ കൊടു​മു​ടി​യാണ്‌.

അതിന്റെ ആകർഷ​ക​മായ ശൃംഗങ്ങൾ

കിളി​മ​ഞ്ചാ​രോ​യ്‌ക്ക്‌ രണ്ട്‌ അഗ്നിപർവത ശൃംഗ​ങ്ങ​ളുണ്ട്‌. പ്രധാന അഗ്നിപർവത കൊടു​മു​ടി കിബോ​യാണ്‌. അതിന്റെ മനോ​ഹ​ര​മായ കോണാ​കൃ​തി​യി​ലുള്ള നെറു​ക​യിൽ സദാ ഹിമവും മഞ്ഞും മൂടി​ക്കി​ട​ക്കു​ന്നു. കിഴക്കാ​യി മറ്റൊരു കൊടു​മു​ടി​യുണ്ട്‌. അതിന്റെ പേരാണ്‌ മാവെൻസി. അതിന്‌ 5,150 മീറ്റർ ഉയരമുണ്ട്‌. ആഫ്രി​ക്ക​യി​ലെ ഏറ്റവും ഉയരം​കൂ​ടിയ ഗിരി​ശൃം​ഗ​ങ്ങ​ളിൽ, കിബോ​യും കെനിയ പർവത​വും കഴിഞ്ഞാൽ അടുത്ത സ്ഥാനം അതിനാണ്‌. കിബോ​യു​ടെ മിനു​സ​മുള്ള, ചെരി​വാർന്ന വശങ്ങളിൽനി​ന്നു വ്യത്യ​സ്‌ത​മാ​യി, എല്ലാ വശങ്ങളി​ലും ചെങ്കു​ത്തായ ശിലാ​ഭി​ത്തി​ക​ളുള്ള മാവെൻസി പരുപ​രുത്ത, മനോ​ഹ​ര​മാ​യി കൊത്തു​പ​ണി​കൾ ചെയ്യ​പ്പെ​ട്ട​തു​പോ​ലെ തോന്നി​ക്കുന്ന ഒരു കൊടു​മു​ടി​യാണ്‌. കിബോ​യു​ടെ​യും മാവെൻസി​യു​ടെ​യും കൊടു​മു​ടി​കൾ 4,600 മീറ്റർ ഉയരത്തിൽവെച്ച്‌, ചിതറി​ക്കി​ട​ക്കുന്ന ഉരുളൻ പാറക്ക​ല്ലു​ക​ളോ​ടു​കൂ​ടിയ, ചെരി​വാർന്ന ഒരു വിസ്‌തൃത സമതല​ത്താൽ ബന്ധിപ്പി​ക്ക​പ്പെ​ട്ടി​രി​ക്കു​ന്നു. കിബോ​യു​ടെ പടിഞ്ഞാ​റാണ്‌ ഷിറ സ്ഥിതി​ചെ​യ്യു​ന്നത്‌. വളരെ​ക്കാ​ലം മുമ്പ്‌ കാറ്റി​ന്റെ​യും ജലത്തി​ന്റെ​യും പ്രവർത്തനം മൂലം ദ്രവീ​ക​രണം സംഭവിച്ച, തകർന്ന​ടിഞ്ഞ ഒരു പുരാതന അഗ്നിപർവ​ത​ത്തി​ന്റെ അവശി​ഷ്ട​ങ്ങ​ളാ​ണിത്‌. ഇപ്പോൾ അത്‌, സമു​ദ്ര​നി​ര​പ്പിൽനിന്ന്‌ 4,000 മീറ്റർ ഉയരത്തിൽ സ്ഥിതി​ചെ​യ്യുന്ന, തരിശായ, ഭയജന​ക​മായ ഒരു പീഠഭൂ​മി​യാണ്‌.

ഒരു പരിസ്ഥി​തി വിസ്‌മ​യം

കിളി​മ​ഞ്ചാ​രോ​യു​ടെ പരിസ്ഥി​തി​വ്യൂ​ഹ​ത്തിന്‌ ഉയരം, മഴ, സസ്യങ്ങൾ എന്നിവയെ അടിസ്ഥാ​ന​മാ​ക്കി വേർതി​രി​ച്ചി​രി​ക്കുന്ന വിവിധ മേഖല​ക​ളുണ്ട്‌. അടിവാ​ര​ങ്ങ​ളിൽ മനുഷ്യ​സ്‌പർശ​മേൽക്കാത്ത ഉഷ്‌ണ​മേ​ഖലാ വനങ്ങളുണ്ട്‌. ഇവിടെ ആനകളും കാട്ടു​പോ​ത്തു​ക​ളും കൂട്ട​ത്തോ​ടെ വിഹരി​ക്കു​ന്നു. അങ്ങുയരെ വനത്തിന്റെ മേൽപ്പ​ര​പ്പിൽ വിവി​ധ​യി​നം വാനര​ന്മാർ വസിക്കു​ന്നു. ഇടതൂർന്ന്‌ നിൽക്കുന്ന കുറ്റി​ച്ചെ​ടി​കൾക്കു​ള്ളിൽ ഒളിച്ചി​രി​ക്കുന്ന നാണം​കു​ണു​ങ്ങി​ക​ളായ പർവത ബുഷ്‌ബ​ക്കു​ക​ളെ​യും ഡ്യൂക്ക​റു​ക​ളെ​യും ഒരു സന്ദർശ​കന്‌ ചില​പ്പോൾ കാണാം.

വനത്തിനു മേലെ​യാണ്‌ ഹെതർ മേഖല. ശക്തമായ കാറ്റേറ്റ്‌ വളഞ്ഞു​കു​ത്തി നിൽക്കുന്ന വയസ്സൻ വൃക്ഷങ്ങൾ. അവയെ പൊതി​ഞ്ഞി​രി​ക്കുന്ന പായലു​കൾ വൃദ്ധന്മാ​രു​ടെ നീണ്ടു നരച്ച താടിയെ ഓർമി​പ്പി​ക്കു​ന്നു. ഇവിടെ മലഞ്ചെ​രു​വി​ലാ​യി കൂറ്റൻ ഹെതർച്ചെ​ടി​കൾ തഴച്ചു​വ​ള​രു​ന്നു. പുൽപ്പു​റ​ങ്ങ​ളും അങ്ങിങ്ങാ​യി കാണുന്ന നിറപ്പ​കി​ട്ടാർന്ന പൂക്കളു​ടെ കൂട്ടങ്ങ​ളും ആ പ്രദേ​ശത്തെ ഒരു മനോഹര ദൃശ്യ​മാ​ക്കി​ത്തീർക്കു​ന്നു.

വൃക്ഷനി​ര​ക​ളിൽനിന്ന്‌ വീണ്ടും ഉയരത്തി​ലാ​യി പാഴ്‌നി​ലങ്ങൾ ദൃശ്യ​മാ​കു​ന്നു. വൃക്ഷങ്ങൾക്കു പകരം നാലു മീറ്റ​റോ​ളം പൊക്കം വരുന്ന കൂറ്റൻ ഗ്രൗണ്ട്‌സെ​ല്ലു​കൾ എന്നു വിളി​ക്ക​പ്പെ​ടുന്ന ചെടി​ക​ളും വലിയ കാബേ​ജു​കൾക്കോ ഐറോ​വ്യ​മുൾച്ചെ​ടി​കൾക്കോ സദൃശ​മായ ലോ​ബെ​ലി​യകൾ എന്ന അസാധാ​രണ ചെടി​ക​ളും വളർന്നു നിൽക്കു​ന്നു. ഉരുളൻ പാറകൾക്കും പാറമ​ട​ക്കു​കൾക്കും ചുറ്റു​മാ​യി വൈ​ക്കോ​ലു​പോ​ലെ​യുള്ള, തൊട്ടാ​വാ​ടി​ക​ളായ എവർലാ​സ്റ്റിങ്‌ പൂക്കൾ വളർന്നു​നിൽക്കു​ന്നു. മങ്ങിയ രജതവർണ​മുള്ള ഭൂവി​ലാ​സ​ത്തിന്‌ അൽപ്പം നിറം പകരു​ന്നത്‌ ഇതു മാത്ര​മാണ്‌.

വീണ്ടും ഉയരത്തി​ലേക്കു പോയാൽ തരിശു​നി​ലങ്ങൾ ആൽപ്‌സ്‌ മേഖല​യ്‌ക്കു വഴിമാ​റു​ന്നു. ആ സ്ഥലത്തിന്‌, കടും​ത​വി​ട്ടും ചാരനി​റ​വും ഇടകലർന്ന മങ്ങിയ നിറമാ​ണു​ള്ളത്‌. ഫലഭൂ​യി​ഷ്‌ഠ​മ​ല്ലാത്ത, ഉണങ്ങി വരണ്ട ഈ പ്രദേ​ശത്ത്‌ വേരു​പി​ടി​ക്കാൻ കഴിയുന്ന ചെടികൾ ഒന്നും​തന്നെ ഇല്ലെന്നു പറയാം. ഈ സ്ഥലത്ത്‌ കിബോ, മാവെൻസി എന്നീ രണ്ട്‌ പ്രധാന കൊടു​മു​ടി​ക​ളും ഒരു വലിയ മൺത്തി​ട്ട​യാൽ ബന്ധിപ്പി​ക്ക​പ്പെ​ട്ടി​രി​ക്കു​ന്നു. ഇത്‌ ഉയരത്തിൽ സ്ഥിതി​ചെ​യ്യുന്ന ഉണങ്ങി വരണ്ട, പാറക​ളുള്ള ഒരു മരുഭൂ​മി​യാണ്‌. ഇവിടെ അതിരു​കടന്ന താപനി​ല​യാ​ണു​ള്ളത്‌. പകൽ സമയത്ത്‌ താപനില 38 ഡിഗ്രി സെൽഷ്യസ്‌ വരെ ഉയർന്നേ​ക്കാം. രാത്രി​യി​ലാ​കട്ടെ അത്‌ ഹിമാ​ങ്ക​ത്തി​ലും താഴുന്നു.

ഒടുവിൽ നമ്മൾ പർവത തുഞ്ച​ത്തെ​ത്തു​ന്നു. ഇവിടെ ശീതള​മായ ശുദ്ധവാ​യു​വാ​ണു​ള്ളത്‌. കടും നീലാ​കാ​ശ​ത്തി​ന്റെ പശ്ചാത്ത​ല​ത്തിൽ, പർവത​ത്തി​ന്റെ ഇരുണ്ട​നി​റ​ത്തിൽനി​ന്നു വ്യത്യ​സ്‌ത​മാ​യി വെളുത്ത്‌ ശുദ്ധമായ വലിയ ഹിമാ​നി​ക​ളും ഹിമപ്പ​ര​പ്പു​ക​ളും നില​കൊ​ള്ളു​ന്നു. വായു നേർത്ത​താണ്‌, സമു​ദ്ര​നി​ര​പ്പിൽ കാണ​പ്പെ​ടു​ന്ന​തി​ലും ഏതാണ്ട്‌ പകുതി ഓക്‌സി​ജനേ അതിൽ അടങ്ങി​യി​ട്ടു​ള്ളൂ. കിബോ​യു​ടെ പരന്ന ഉച്ചിയി​ലാണ്‌ അഗ്നിപർവ​ത​ത്തി​ന്റെ മുഖം. ഇത്‌ ഏതാണ്ട്‌ പൂർണ വൃത്താ​കൃ​തി​യി​ലു​ള്ള​താണ്‌, ഇതിന്റെ വ്യാസ​മാ​കട്ടെ 2.5 കിലോ​മീ​റ്റ​റും. അഗ്നിപർവത മുഖത്തി​ന​കത്ത്‌ പർവത​ത്തി​ന്റെ അകക്കാ​മ്പിൽ ഒരു വലിയ ചാരക്കു​ഴി​യുണ്ട്‌. അതിന്റെ കുറു​കെ​യുള്ള നീളം 300 മീറ്ററാണ്‌. താഴ്‌ച​യാ​കട്ടെ, 120 മീറ്ററും. ചെറിയ ധൂമര​ന്ധ്ര​ങ്ങ​ളിൽനിന്ന്‌ (പുകദ്വാ​രങ്ങൾ) ചൂടുള്ള സൾഫ്യൂ​റിക്ക്‌ പുകപ​ട​ലങ്ങൾ സാവധാ​നം, തണുത്ത വായു​വി​ലേ​ക്കു​യ​രു​ന്നു. സുഷു​പ്‌തി​യി​ലാണ്ട അഗ്നിപർവ​ത​ത്തി​നു​ള്ളി​ലെ പ്രക്ഷു​ബ്ധാ​വ​സ്ഥ​യെ​യാണ്‌ ഇതു കാണി​ക്കു​ന്നത്‌.

കിളി​മ​ഞ്ചാ​രോ​യു​ടെ കൂറ്റൻ ആകാര​വും പിണ്ഡവും തനതായ ഒരു കാലാ​വ​സ്ഥ​യ്‌ക്ക്‌ ഇടയാ​ക്കു​ന്നു. ഇന്ത്യൻ മഹാസ​മു​ദ്ര​ത്തിൽനിന്ന്‌ അർധ നിർജല നിമ്‌ന​പ്ര​ദേ​ശ​ങ്ങ​ളി​ലേക്ക്‌ വീശി​യ​ടി​ക്കുന്ന ഈർപ്പ​മുള്ള കാറ്റ്‌ പർവത​ത്തി​ന്മേൽ പതിച്ച്‌ മുകളി​ലേക്ക്‌ വ്യതി​ച​ലി​ച്ചു പോകു​ന്നു. അവി​ടെ​വെച്ച്‌ അത്‌ തണുക്കു​മ്പോൾ മഴയു​ണ്ടാ​കു​ന്നു. ഇത്‌ താഴ്‌ന്ന ചെരി​വു​കളെ ഫലഭൂ​യി​ഷ്‌ഠ​മാ​ക്കു​ന്നു. കാപ്പി​യും പർവതാ​ടി​വാ​ര​ത്തിൽ വസിക്കുന്ന ആളുകളെ പോറ്റുന്ന ഭക്ഷ്യവി​ള​ക​ളു​മാണ്‌ ഇവിടു​ത്തെ കൃഷി.

“കിളി”യെ കീഴടക്കൽ

മഞ്ഞുമൂ​ടി​ക്കി​ട​ക്കുന്ന അതിന്റെ കൊടു​മു​ടി​യിൽ എത്തി​പ്പെ​ടാൻ ശ്രമി​ക്കു​ന്ന​വരെ ഉപദ്ര​വി​ച്ചേ​ക്കാ​വുന്ന ഭൂത​പ്രേ​താ​ദി​കൾ അതിന്റെ ചെരി​വു​ക​ളിൽ കുടി​യി​രു​ന്ന​താ​യി കിളി​മ​ഞ്ചാ​രോ​യ്‌ക്കു സമീപം വസിക്കുന്ന ആളുകൾ അന്ധമായി വിശ്വ​സി​ച്ചി​രു​ന്നു. ഇതു നിമിത്തം അവിടു​ത്തെ താമസ​ക്കാർ അതിന്റെ നെറു​ക​യിൽ കയറാൻ ധൈര്യ​പ്പെ​ട്ടി​രു​ന്നില്ല. ഒടുവിൽ 1889-ൽ രണ്ട്‌ ജർമൻ പര്യ​വേ​ക്ഷകർ ആ പർവതം കയറി ആഫ്രി​ക്ക​യു​ടെ ഏറ്റവും പൊക്ക​മുള്ള സ്ഥാനത്തു കാലു​കു​ത്തി. രണ്ടാമത്തെ കൊടു​മു​ടി​യായ മാവെൻസി കയറാൻ കൂടുതൽ സാങ്കേ​തിക തടസ്സങ്ങ​ളു​ണ്ടാ​യി​രു​ന്ന​തി​നാൽ 1912-ലാണ്‌ അത്‌ കീഴട​ക്കി​യത്‌.

ഇന്ന്‌ നല്ല ആരോ​ഗ്യ​മുള്ള ആർക്കും കിളി​മ​ഞ്ചാ​രോ കയറാൻ സാധി​ക്കും. പൂർവ ആഫ്രി​ക്ക​യി​ലെ സന്ദർശ​കർക്കി​ട​യിൽ ഇതു വളരെ പ്രചാ​ര​മേ​റി​ക്ക​ഴി​ഞ്ഞി​രി​ക്കു​ന്നു. പർവതം കയറാൻ ആഗ്രഹി​ക്കുന്ന ആളുകൾക്കാ​യി ടാൻസാ​നി​യൻ പാർക്ക്‌ അധികാ​രി​കൾ വളരെ സുസം​ഘ​ടി​ത​മായ ക്രമീ​ക​ര​ണങ്ങൾ ചെയ്‌തി​രി​ക്കു​ന്നു. വസ്‌ത്ര​ങ്ങ​ളും ഉപകര​ണ​ങ്ങ​ളും വാടക​യ്‌ക്കു ലഭിക്കും. പരിശീ​ലനം നേടിയ ചുമട്ടു​കാർക്കും വഴികാ​ട്ടി​കൾക്കും പുറമേ, പർവതാ​രോ​ഹ​ണ​ത്തി​ലു​ട​നീ​ളം താമസി​ക്കാൻ സുഖസൗ​ക​ര്യ​ങ്ങ​ളുള്ള ലോഡ്‌ജു​ക​ളും ലഭ്യമാണ്‌. പർവത​ത്തിൽ വ്യത്യസ്‌ത തലങ്ങളിൽ നന്നായി കെട്ടി​യു​ണ്ടാ​ക്കിയ കുടി​ലു​ക​ളുണ്ട്‌. ഇവ പർവതാ​രോ​ഹ​കന്‌ പാർപ്പി​ടം പ്രദാനം ചെയ്യുന്നു.

കിളിമഞ്ചാരോയുടെ നേരി​ട്ടുള്ള കാഴ്‌ച ഹൃദയാ​വർജ​ക​വും ഭാവനയെ തൊട്ടു​ണർത്തു​ന്ന​തു​മാണ്‌. ദൈവ​ത്തെ​ക്കു​റി​ച്ചുള്ള ഈ വാക്കുകൾ ഒരുവന്‌ വൈമു​ഖ്യ​മി​ല്ലാ​തെ സമ്മതി​ക്കാ​നാ​കും: “അവൻ . . . തന്റെ ശക്തിയാൽ പർവ്വത​ങ്ങളെ ഉറപ്പി​ക്കു​ന്നു.” (സങ്കീർത്തനം 65:6) അതേ, ആഫ്രി​ക്ക​യ്‌ക്കു​മീ​തെ അങ്ങുയ​ര​ത്തിൽ കിളി​മ​ഞ്ചാ​രോ മഹാ സ്രഷ്ടാ​വിന്‌ പ്രൗഢ​മായ സാക്ഷ്യം വഹിച്ചു​കൊണ്ട്‌ ഒറ്റയ്‌ക്കു നില​കൊ​ള്ളു​ന്നു.

[16-ാം പേജിലെ ഭൂപടം]

(പൂർണ​രൂ​പ​ത്തിൽ കാണു​ന്ന​തി​നു പ്രസി​ദ്ധീ​ക​രണം നോക്കുക.)

ആഫ്രിക്ക

കെനിയ

കിളിമഞ്ചാരോ

ടാൻസാനിയ