വിജ്ഞാ​ന​യു​ഗത്തെ നിങ്ങൾക്കു നേരി​ടാ​നാ​കുന്ന വിധം

ആയിര​ത്തി​ത്തൊ​ള്ളാ​യി​ര​ത്തി​ത്തൊ​ണ്ണൂ​റു​ക​ളു​ടെ വിജ്ഞാ​ന​യു​ഗ​ത്തിന്‌, നമ്മെ തുടർന്നും ഉത്‌ക​ണ്‌ഠ​പ്പെ​ടു​ത്താൻ പോന്ന പല വശങ്ങളു​മു​ണ്ടെന്ന വസ്‌തു​തയെ നാം അഭിമു​ഖീ​ക​രി​ച്ചേ പറ്റൂ. ഇവയിൽ ചിലതി​ന്മേൽ നമുക്ക്‌ വളരെ കുറച്ചു മാത്രം നിയ​ന്ത്ര​ണ​മേ​യു​ള്ളൂ, അല്ലെങ്കിൽ ഒട്ടും​ത​ന്നെ​യില്ല. എന്നാൽ അത്തരം ഉത്‌ക​ണ്‌ഠകൾ അപ്പാ​ടെ​യ​ല്ലെ​ങ്കി​ലും ഏറിയ പങ്കും ഇല്ലാതാ​ക്കാ​നുള്ള ചില മാർഗ​ങ്ങ​ളുണ്ട്‌. വിജ്ഞാ​ന​യു​ഗത്തെ നേരി​ടു​ന്നത്‌ വെല്ലു​വി​ളി​കൾ നിറഞ്ഞ​താ​ണെ​ങ്കി​ലും പ്രതി​ഫ​ല​ദാ​യ​ക​മായ ഒരു കാര്യ​മാ​ണെന്ന്‌ നാം പറഞ്ഞേ​ക്കാം.

വിജ്ഞാ​ന​ത്തി​ന്റെ സ്വീകർത്താ​ക്ക​ളും ദാതാ​ക്ക​ളും

ഇവരി​ലൊ​രാ​ളാ​യി സ്വയം തരംതി​രി​ച്ചി​ട്ടു​ണ്ടെ​ങ്കി​ലും ഇല്ലെങ്കി​ലും ജീവി​ത​ത്തി​ലു​ട​നീ​ളം നാമെ​ല്ലാ​വ​രും ഒരു പരിധി​വരെ സ്വീകർത്താ​ക്ക​ളും ദാതാ​ക്ക​ളു​മാണ്‌. എന്നിരു​ന്നാ​ലും നമ്മുടെ മസ്‌തി​ഷ്‌കം വിവരങ്ങൾ സ്വീക​രിച്ച്‌ അപഗ്ര​ഥി​ക്കു​ന്നത്‌ പല വിധങ്ങ​ളി​ലാണ്‌. ഉപബോധ തലത്തിൽ വിവരങ്ങൾ അപഗ്ര​ഥി​ക്കാ​നുള്ള മസ്‌തി​ഷ്‌ക​ത്തി​ന്റെ വിസ്‌മ​യാ​വ​ഹ​മായ കഴിവ്‌ ഉൾപ്പെ​ടു​ന്ന​താണ്‌ ഒന്ന്‌.

മറ്റൊന്ന്‌, സംഭാ​ഷ​ണ​ത്തി​ലെ​ന്ന​പോ​ലെ, വിവരങ്ങൾ ബോധ തലത്തിൽ അപഗ്ര​ഥി​ക്ക​പ്പെ​ടുന്ന രീതി​യാണ്‌. ഇത്തരത്തിൽ വിവരങ്ങൾ അപഗ്ര​ഥി​ക്കു​ന്ന​തിൽ നമുക്ക്‌ വളരെ​യ​ധി​കം നിയ​ന്ത്ര​ണ​മുണ്ട്‌—ദാതാ​ക്ക​ളെ​ന്ന​നി​ല​യി​ലും സ്വീകർത്താ​ക്ക​ളെ​ന്ന​നി​ല​യി​ലും. പൊള്ള​യായ സംഭാ​ഷ​ണ​ങ്ങ​ളു​ടെ കാര്യ​ത്തിൽ “മിന​ക്കെ​ടുക മാത്രമല്ല വായാ​ടി​ക​ളും പരകാ​ര്യ​ത്തിൽ ഇടപെ​ടു​ന്ന​വ​രു​മാ​യി അരുതാ​ത്തതു സംസാ​രി​ക്കു”കയും ചെയ്യു​ന്ന​വ​രെ​ക്കു​റിച്ച്‌ ബൈബിൾ മുന്നറി​യി​പ്പു നൽകുന്നു. (1 തിമൊ​ഥെ​യൊസ്‌ 5:13) മറ്റു വിധത്തിൽ പറഞ്ഞാൽ, പൊള്ള​യായ കാര്യ​ങ്ങ​ളെ​യോ ഉപദ്ര​വ​ക​ര​മായ വിവര​ങ്ങ​ളെ​യോ കുറിച്ച്‌ സംസാ​രി​ച്ചു​കൊണ്ട്‌ വളരെ​യ​ധി​കം സമയം ചെലവ​ഴി​ക്കാ​തി​രി​ക്കാൻ ശ്രദ്ധി​ക്കണം. കുശു​കു​ശുപ്പ്‌ തൊഴി​ലാ​ക്കിയ ഒരു വ്യക്തി​യാ​കാ​തി​രി​ക്കുക. വില​യേ​റിയ സമയവും ഊർജ​വും പാഴാ​കു​മെന്നു മാത്രമല്ല അത്‌ നമ്മെയും മറ്റുള്ള​വ​രെ​യും ഉത്‌ക​ണ്‌ഠാ​കു​ല​രാ​ക്കു​ക​യും ചെയ്യും. ഈ പ്രക്ഷുബ്ധ ലോകത്ത്‌ ജീവി​ച്ചു​പോ​കു​ന്ന​തിന്‌ അനിവാ​ര്യ​വും കെട്ടു​പ​ണി​ചെ​യ്യു​ന്ന​തു​മായ കാര്യ​ങ്ങ​ളിൽ മുഴു​കി​യി​രി​ക്കാ​നോ അത്തരം വിവരങ്ങൾ പങ്കിടാ​നോ ഉള്ള സന്ദർഭങ്ങൾ നിങ്ങൾക്കു നഷ്ടമാ​യേ​ക്കാം.

വായന​യി​ലൂ​ടെ ശേഖരി​ക്ക​പ്പെ​ടുന്ന വിവരങ്ങൾ ബോധ തലത്തി​ലാണ്‌ അപഗ്ര​ഥി​ക്ക​പ്പെ​ടു​ന്നത്‌. അതു​കൊണ്ട്‌ അതിനു കൂടുതൽ സമയ​മെ​ടു​ക്കും. “എനിക്ക്‌ എന്റെ വായന ക്രമമാ​യി മുമ്പോ​ട്ടു കൊണ്ടു​പോ​കാൻ സാധി​ക്കു​ന്നില്ല” എന്ന്‌ ഉത്‌ക​ണ്‌ഠാ​കു​ല​നായ ഒരു വ്യക്തി വിലപി​ക്കു​ന്നതു സാധാ​ര​ണ​മാണ്‌. നിങ്ങൾക്ക്‌ വളരെ കാര്യങ്ങൾ വായി​ക്കാ​നു​ണ്ടെ​ന്നും വായി​ക്കാൻ അൽപ്പ സമയമേ ലഭിക്കു​ന്നു​ള്ളൂ​വെ​ന്നും തോന്നാ​റു​ണ്ടോ? വായന വളരെ​യ​ധി​കം സമയം അപഹരി​ക്കു​മെ​ന്ന​തി​നാൽ നൊടി​യി​ട​കൊണ്ട്‌ വിജ്ഞാനം സമ്പാദി​ക്കാ​നാ​കുന്ന ഈ യുഗത്തിൽ വായന​യു​ടെ കലയും ആനന്ദവും മിക്ക​പ്പോ​ഴും നഷ്ടപ്പെ​ടു​ന്നു. ഒട്ടനവധി ആളുകൾ തങ്ങളുടെ സമയം ടിവി-ക്ക്‌ അടിയറ വെച്ചി​രി​ക്കു​ന്നു. എങ്കിലും ഭാവനയെ തൊട്ടു​ണർത്താ​നും വിവര​ങ്ങ​ളും ആശയങ്ങ​ളും അഭി​പ്രാ​യ​ങ്ങ​ളും കൈമാ​റാ​നു​മുള്ള ഏറ്റവും ശക്തമായ മാർഗം എഴുത​പ്പെട്ട വിവര​ങ്ങ​ളാണ്‌.

ഇത്ര​യേ​റെ വായനാ സാമ​ഗ്രി​കൾ നമ്മുടെ ശ്രദ്ധയ്‌ക്കാ​യി മുറവി​ളി​കൂ​ട്ടു​ക​യും ടിവി, കമ്പ്യൂട്ടർ കളികൾ, മറ്റു വിനോ​ദ​പ്ര​വർത്ത​നങ്ങൾ എന്നിവ​യു​മാ​യി മത്സരി​ക്കു​ക​യും ചെയ്യു​മ്പോൾ നാം എങ്ങനെ അതിനെ കൈകാ​ര്യം ചെയ്യും? ആവശ്യ​മു​ള്ളതു തിര​ഞ്ഞെ​ടു​ക്കുക എന്നതാണ്‌ ഉത്തരം. അതായത്‌ നാം എന്തു കേൾക്കണം, കാണണം അല്ലെങ്കിൽ വായി​ക്കണം എന്നുള്ള​തെ​ല്ലാം നിശ്ചയി​ക്കു​ക​യോ അവയ്‌ക്കു മുൻഗണന കൽപ്പി​ക്കു​ക​യോ ചെയ്യു​ന്നത്‌, വിജ്ഞാ​നോ​ത്‌കണ്‌ഠ വലി​യൊ​ര​ള​വോ​ളം ഇല്ലാതാ​ക്കും. രണ്ടു വിധങ്ങ​ളിൽ ഇതു ഫലപ്ര​ദ​മാ​യി ചെയ്യാ​വു​ന്ന​താണ്‌.

അപ്രധാ​ന​മായ ഇത്രയ​ധി​കം വിവരങ്ങൾ നമുക്ക്‌ ആവശ്യ​മു​ണ്ടോ?

മിക്ക​പ്പോ​ഴും നമ്മുടെ ആവശ്യ​ങ്ങ​ളെ​ക്കു​റി​ച്ചുള്ള ഗ്രാഹ്യം, നമുക്ക്‌ ആവശ്യ​മു​ള്ള​തെന്ന്‌ മറ്റുള്ളവർ കരുതു​ന്ന​തോ നമുക്ക്‌ ആവശ്യ​മു​ണ്ടെന്ന്‌ മാധ്യ​മ​ങ്ങ​ളി​ലെ ആകർഷ​ക​മായ പരസ്യങ്ങൾ നമ്മെ വിശ്വ​സി​പ്പി​ക്കു​ന്ന​തോ ആയ കാര്യ​ങ്ങ​ളാൽ വികല​മാ​കു​ന്നു. ആശയക്കു​ഴപ്പം സൃഷ്ടി​ക്കുന്ന ഈ വിജ്ഞാന സങ്കീർണ​ത​യിൽനി​ന്നു പുറത്തു​ക​ട​ക്കാൻ ഈ അടിസ്ഥാന നിയമം ബാധക​മാ​ക്കുക: അത്‌ ലളിത​മാ​ക്കുക! റിച്ചാർഡ്‌ എസ്‌. വർമൻ അതി​നെ​ക്കു​റി​ച്ചു പറയു​ന്നത്‌ ഇങ്ങനെ​യാണ്‌: “വിവരങ്ങൾ അപഗ്ര​ഥി​ക്കു​ന്ന​തി​നുള്ള രഹസ്യം നിങ്ങളു​ടെ വിജ്ഞാന മേഖലയെ നിങ്ങളു​ടെ ജീവി​ത​ത്തിന്‌ അനു​യോ​ജ്യ​മായ ഒന്നാക്കി പരിമി​ത​പ്പെ​ടു​ത്തു​ന്ന​താണ്‌ . . . തിര​ഞ്ഞെ​ടു​പ്പു കൂടു​ന്തോ​റും കൂടുതൽ ഉചിത​മായ നടപടി​കൾ കൈ​ക്കൊ​ള്ളാ​നാ​കു​മെ​ന്നും കൂടുതൽ സ്വാത​ന്ത്ര്യം ആസ്വദി​ക്കാ​നാ​കു​മെ​ന്നും പറയു​ന്നത്‌ ഒരു കെട്ടു​ക​ഥ​യാ​ണെ​ന്നാണ്‌ എന്റെ വിശ്വാ​സം. പകരം തിര​ഞ്ഞെ​ടു​പ്പു​കൾ കൂടു​ന്തോ​റും ഉത്‌ക​ണ്‌ഠ​യും കൂടു​ന്ന​താ​യി കാണ​പ്പെ​ടു​ന്നു.”

അതു​കൊണ്ട്‌ വായന​യു​ടെ​യോ ടിവി കാണലി​ന്റെ​യോ കാര്യ​ത്തിൽ നിങ്ങളു​ടെ ശീലങ്ങൾ പരി​ശോ​ധി​ക്കു​ന്നത്‌ ഉചിത​മാ​യി​രി​ക്കും. സ്വയം ചോദി​ക്കുക: ‘ഇത്‌ എന്റെ ജോലി​ക്കോ ജീവി​ത​ത്തി​നോ അനിവാ​ര്യ​മായ സംഗതി​യാ​ണോ? ലോക​ത്തി​ലെ പ്രശസ്‌ത​രും സൗന്ദര്യ​മു​ള്ള​വ​രെന്നു പറയ​പ്പെ​ടു​ന്ന​വ​രു​മായ ആളുക​ളെ​ക്കു​റി​ച്ചുള്ള അപ്രധാ​ന​മായ കാര്യ​ങ്ങ​ളും വിവര​ങ്ങ​ളും ഞാൻ വാസ്‌ത​വ​മാ​യും അറി​യേ​ണ്ട​തു​ണ്ടോ? ഈ ടിവി പരിപാ​ടി കണ്ടി​ല്ലെ​ങ്കി​ലോ ഈ പുസ്‌ത​ക​മോ മാസി​ക​യോ വായി​ച്ചി​ല്ലെ​ങ്കി​ലോ പത്രവാ​യ​ന​യ്‌ക്ക്‌ ഇത്ര സമയം ചെലവ​ഴി​ച്ചി​ല്ലെ​ങ്കി​ലോ എന്റെ ജീവി​ത​ത്തിന്‌ എന്തു മാറ്റമാ​യി​രി​ക്കും സംഭവി​ക്കുക?’ തങ്ങളുടെ വായന​യും ടിവി കാണലും വിശക​ലനം ചെയ്‌ത്‌ മനസ്സി​നെ​യും കുടും​ബ​ത്തെ​യും അലങ്കോ​ല​പ്പെ​ടു​ത്തി​യി​രി​ക്കുന്ന വിവരങ്ങൾ ഒഴിവാ​ക്കാൻ ചിലർക്കു കഴിഞ്ഞി​ട്ടുണ്ട്‌. ഉദാഹ​ര​ണ​ത്തിന്‌, ഒരു ദിനപ്പ​ത്ര​ത്തി​നു മാത്രം വരിസം​ഖ്യ​യെ​ടു​ത്താൽ മതി​യെന്ന്‌ അവർ തീരു​മാ​നി​ച്ചി​രി​ക്കു​ന്നു. മിക്ക പത്രങ്ങ​ളി​ലും ഏറെക്കു​റേ ഒരേ അടിസ്ഥാന വാർത്ത​ക​ളാണ്‌ അടങ്ങി​യി​രി​ക്കു​ന്നത്‌. തങ്ങളുടെ തപാൽപ്പെ​ട്ടി​ക​ളിൽ അനാവശ്യ തപാൽ ഉരുപ്പ​ടി​കൾ കൊണ്ടു​വ​ന്നി​ട​രു​തെന്ന്‌ ചിലർ പ്രത്യേ​കം അഭ്യർഥി​ച്ചി​ട്ടുണ്ട്‌.

ജീവിതം ലളിത​മാ​യും സങ്കീർണ​ര​ഹി​ത​മാ​യും സൂക്ഷി​ക്കാൻ ജീവി​ച്ചി​രു​ന്നി​ട്ടു​ള്ള​തി​ലേ​ക്കും ഏറ്റവും മഹാനായ മനുഷ്യ​നായ യേശു​ക്രി​സ്‌തു ഉപദേ​ശി​ച്ചി​രു​ന്നു. (മത്തായി 6:25-34) പല ഏഷ്യൻ സംസ്‌കാ​ര​ങ്ങ​ളി​ലും ലാളി​ത്യം ശുപാർശ ചെയ്യ​പ്പെ​ടു​ക​യും പരക്കെ അംഗീ​ക​രി​ക്ക​പ്പെ​ടു​ക​യും ചെയ്യുന്നു. പാശ്ചാത്യ സംസ്‌കാ​ര​ങ്ങ​ളിൽപ്പോ​ലും അത്‌ ഒരു ഉയർന്ന ജീവി​ത​രീ​തി​യാ​യി പലരും കണക്കാ​ക്കു​ന്നു. എഴുത്തു​കാ​ര​നായ ഡ്വേൻ എൽഗിൻ പറഞ്ഞു: “കൂടുതൽ ലാളി​ത്യ​ത്തോ​ടെ ജീവി​ക്കുക എന്നാൽ കൂടുതൽ ഉദ്ദേശ്യ​പൂർണ​മാ​യി, അനാവശ്യ ശ്രദ്ധാ​ശൈ​ഥ​ല്യ​ങ്ങൾ പരമാ​വധി ഒഴിവാ​ക്കി ജീവി​ക്കു​ക​യെ​ന്നാ​ണർഥം.”

വിജ്ഞാനം സ്വീക​രി​ക്കുന്ന നിങ്ങളു​ടെ ആവശ്യ​ങ്ങൾക്ക്‌ മുൻഗ​ണ​നകൾ ഏർപ്പെ​ടു​ത്തി​ക്ക​ഴി​ഞ്ഞാൽ താത്‌പ​ര്യ​ത്തി​ന്റെ കാര്യ​ത്തി​ലും അതുതന്നെ ചെയ്യുക. കാരണം താത്‌പ​ര്യ​മാണ്‌ പഠനത്തി​നുള്ള പ്രേര​ക​ശക്തി. എന്നാൽ, വാസ്‌ത​വ​ത്തിൽ നിങ്ങൾക്ക്‌ ഇഷ്ടമു​ള്ള​തും മറ്റുള്ള​വരെ—ഒരുപക്ഷേ നിങ്ങളു​ടെ ജോലി​സ്ഥ​ല​ത്തു​ള്ള​വരെ—പ്രീതി​പ്പെ​ടു​ത്താൻ തക്കവണ്ണം നിങ്ങൾക്ക്‌ അവശ്യ​മു​ണ്ടാ​യി​രി​ക്കേ​ണ്ട​തെന്നു കരുത​പ്പെ​ടു​ന്ന​തും തമ്മിൽ വേർതി​രി​ച്ച​റി​യുക എന്നതാണു പ്രശ്‌നം. മറ്റേ​തൊ​രു പ്രവർത്ത​ന​ത്തെ​യും​പോ​ലെ വായന​യും ടിവി അല്ലെങ്കിൽ കമ്പ്യൂട്ടർ ഉപയോ​ഗ​വും ആസൂ​ത്രണം ചെയ്യു​ക​യാ​ണെ​ങ്കിൽ യഥാർഥ താത്‌പ​ര്യ​ത്തെ ചുറ്റി​പ്പറ്റി അത്‌ പടുത്തു​യർത്തു​ന്നതു നിങ്ങളു​ടെ ജീവി​തത്തെ അനാവശ്യ ഉത്‌ക​ണ്‌ഠ​യി​ല്ലാ​തെ കൂടുതൽ ആനന്ദ​പ്ര​ദ​മായ ഒന്നാക്കി മാറ്റു​ന്ന​താ​യി നിങ്ങൾ കണ്ടെത്തും.

അതു​കൊണ്ട്‌ വിജ്ഞാ​നോ​ത്‌ക​ണ്‌ഠയെ നിങ്ങൾക്ക്‌ എങ്ങനെ തരണം ചെയ്യാം? നിങ്ങൾക്ക്‌ അത്‌ ഒരിക്ക​ലും അപ്പാടെ ഇല്ലാതാ​ക്കാൻ കഴി​ഞ്ഞെന്നു വരില്ല. എന്നാൽ ഞങ്ങൾ വിവരിച്ച ലളിത​മായ ചില നിയമങ്ങൾ പിൻപ​റ്റു​ന്നതു വളരെ സഹായ​ക​മാ​യി​രി​ക്കും. വിജ്ഞാന സമ്പാദ​ന​വും അതിനാ​യുള്ള താത്‌പ​ര്യ​വും ലളിത​മാ​യി സൂക്ഷി​ക്കുക. വ്യക്തി​പ​ര​മായ ആവശ്യ​ങ്ങൾക്കും താത്‌പ​ര്യ​ങ്ങൾക്കും അനുസൃ​ത​മാ​യി വിജ്ഞാ​നത്തെ തരംതി​രി​ക്കുക. വിജ്ഞാ​നോ​ത്‌കണ്‌ഠ ഉൾപ്പെടെ ജീവി​ത​ത്തി​ലെ സങ്കീർണ​ത​ക​ളെ​ല്ലാം പൊയ്‌പോയ സംഗതി​ക​ളാ​കുന്ന കാലം വരുന്നു. എന്നാൽ ഇപ്പോൾ ആധുനിക സാങ്കേ​തി​ക​വി​ദ്യ​യു​ടെ വിസ്‌മ​യ​ങ്ങൾക്ക്‌ അവയു​ടേ​തായ സ്ഥാനം മാത്രം നൽകുക. ലക്ഷ്യ​പ്രാ​പ്‌തി​ക്കുള്ള ഒരു മാർഗ​മാ​യി അവയെ കാണുക. അവയ്‌ക്ക്‌ അടിമ​ക​ളാ​കാ​തി​രി​ക്കുക, അവയ്‌ക്കു മുമ്പിൽ പകച്ചു നിൽക്കാ​തി​രി​ക്കുക. അങ്ങനെ ഉപയോ​ഗ​പ്ര​ദ​മായ വിജ്ഞാനം നിങ്ങളെ ഉത്‌ക​ണ്‌ഠ​പ്പെ​ടു​ത്തു​ന്ന​തി​നു​പ​കരം കെട്ടു​പണി ചെയ്യു​ന്ന​തും പ്രോ​ത്സാ​ഹ​ജ​ന​ക​വും പ്രയോ​ജ​ന​പ്ര​ദ​വു​മായ ഒന്നായി​രി​ക്കും.

[11-ാം പേജിലെ ചതുരം]

ഒരു മാറ്റം പരീക്ഷി​ച്ചു നോക്കുക

“നിങ്ങളു​ടെ കേബിൾ ടിവി സർവീസ്‌ വേണ്ടെ​ന്നു​വെച്ച്‌ മാസം​തോ​റും അതിനാ​യി നൽകുന്ന [പണം] ഒന്നോ അതില​ധി​ക​മോ നല്ല പുസ്‌ത​കങ്ങൾ വാങ്ങാൻ വിനി​യോ​ഗി​ക്കുക. പുസ്‌ത​കങ്ങൾ ടെലി​വി​ഷ​നിൽനി​ന്നു തികച്ചും വിഭി​ന്ന​മാണ്‌: അവ സാവധാ​നം വായി​ക്കാം, നമുക്ക​തിൽ മുഴു​കാം, അവ ഉത്തേജ​നാ​ത്മ​ക​മാണ്‌, ധൈഷ​ണി​ക​ത​യെ​യും ഭാവന​യെ​യും തൊട്ടു​ണർത്തു​ന്ന​തു​മാണ്‌.”

“ഓരോ ആഴ്‌ച​യും ഏതാനും മണിക്കൂർ മാത്രം ഇന്റർനെ​റ്റി​നു മുമ്പിൽ ചെലവി​ടു​ക​യോ ചുരു​ങ്ങി​യ​പക്ഷം അതിനാ​യി ചെലവി​ടുന്ന സമയം പുസ്‌ത​കങ്ങൾ വായി​ക്കു​ന്ന​തി​നു തുല്യ​മാ​ക്കു​ക​യോ ചെയ്യാ​വു​ന്ന​താണ്‌.”—വിവര​ങ്ങ​ളു​ടെ പുകമഞ്ഞ്‌—വിജ്ഞാ​ന​പ്പെ​രു​പ്പത്തെ അതിജീ​വി​ക്കൽ.

[12-ാം പേജിലെ ചതുരം]

അടിമയല്ല, യജമാ​ന​നാ​യി​രി​ക്കുക

“ടെലി​വി​ഷൻ ഓഫാ​ക്കുക. ജീവി​ത​ഗതി, കുടുംബ സമാധാ​നം, ചിന്താ​പ്രാ​പ്‌തി എന്നിവ​യി​ന്മേ​ലുള്ള പൂർണ നിയ​ന്ത്രണം ഏറ്റെടു​ക്കാൻ നമ്മുടെ ജീവി​താ​ന്ത​രീ​ക്ഷത്തെ ചൂഴ്‌ന്നു നിൽക്കുന്ന ആ ഉപകരണം ഓഫ്‌ ചെയ്യു​ന്ന​തി​നോ​ളം എളുപ്പ​മുള്ള വേറൊ​രു മാർഗ​വു​മില്ല. സ്വിച്ച്‌ ഓഫ്‌ ചെയ്യു​ന്ന​തി​ലൂ​ടെ കൈവ​രുന്ന പ്രശാ​ന്ത​ത​യും ആത്മവി​ശ്വാ​സ​വും ലക്ഷക്കണ​ക്കിന്‌ അമേരി​ക്ക​ക്കാർ കണ്ടെത്തി​ക്കൊ​ണ്ടി​രി​ക്കു​ക​യാണ്‌. കഴിഞ്ഞ കാലങ്ങ​ളിൽ ഒരിക്ക​ലും ചെയ്യാൻ സമയം കണ്ടെത്താ​നാ​കാഞ്ഞ കാര്യങ്ങൾ ചെയ്യത്ത​ക്ക​വി​ധം ധാരാളം സമയം അവർക്കി​പ്പോൾ ലഭിച്ചി​രി​ക്കു​ന്നു.”—വിവര​ങ്ങ​ളു​ടെ പുകമഞ്ഞ്‌—വിജ്ഞാ​ന​പ്പെ​രു​പ്പത്തെ അതിജീ​വി​ക്കൽ.

[12-ാം പേജിലെ ചതുരം]

ഇന്റർനെറ്റിനെതിരെ ജാഗ്രത പുലർത്തു​ക

അധാർമിക വ്യക്തികൾ തങ്ങളുടെ വികട​മായ ലൈം​ഗി​ക​മോ​ഹങ്ങൾ ശമിപ്പി​ക്കാ​നും ശാരീ​രി​ക​ബന്ധം പുലർത്താൻ ആഗ്രഹി​ക്കു​ന്ന​വ​രു​മാ​യി അല്ലെങ്കിൽ നിഷ്‌ക​ള​ങ്ക​രായ വ്യക്തി​ക​ളു​മാ​യി സമ്പർക്കം പുലർത്താ​നും ഇന്റർനെറ്റ്‌ ഉപയോ​ഗി​ക്കു​ന്നു. മറ്റുചി​ല​രാ​കട്ടെ വ്യക്തി​പ​ര​മായ വീക്ഷണങ്ങൾ ഉന്നമി​പ്പി​ക്കാ​നാണ്‌ അത്‌ ഉപയോ​ഗി​ക്കു​ന്നത്‌. എട്ടും​പൊ​ട്ടും തിരി​യാ​ത്ത​വരെ കെണി​യി​ല​ക​പ്പെ​ടു​ത്താൻ വിശ്വാ​സ​ത്യാ​ഗി​ക​ളും വെബ്‌ സൈറ്റു​കൾ ഉണ്ടാക്കു​ന്നു.

ഇന്റർനെറ്റ്‌ ഉപയോ​ഗി​ക്കു​മ്പോൾ അതീവ ശ്രദ്ധ പുലർത്തേ​ണ്ടത്‌ ആവശ്യ​മാണ്‌. കുട്ടി​ക​ളാ​രെ​ങ്കി​ലും അത്‌ ഉപയോ​ഗി​ക്കു​ന്ന​പക്ഷം മാതാ​പി​താ​ക്കൾ തീർച്ച​യാ​യും അടുത്ത ശ്രദ്ധ നൽകേ​ണ്ട​തുണ്ട്‌. ഉപയോ​ഗ​പ്ര​ദ​മായ, വിവര​ങ്ങ​ളു​ടെ അനേകം ഉറവി​ടങ്ങൾ അതിൽ കണ്ടെത്താ​മെ​ന്നതു ശരിതന്നെ. ഗവേഷ​ണ​ത്തി​നുള്ള ലൈ​ബ്ര​റി​കൾ, ഗ്രന്ഥ​ശേ​ഖ​രങ്ങൾ, പുതിയ ചാനലു​കൾ എന്നിവ അവയിൽ ചിലതാണ്‌. ഉദാഹ​ര​ണ​ത്തിന്‌, ഈയിടെ വാച്ച്‌ ടവർ സൊ​സൈറ്റി അതിന്റെ സ്വന്തം വെബ്‌ സൈറ്റ്‌ പ്രസി​ദ്ധ​പ്പെ​ടു​ത്തു​ക​യു​ണ്ടാ​യി (http://www.watchtower.org). യഹോ​വ​യു​ടെ സാക്ഷി​ക​ളെ​ക്കു​റി​ച്ചു ശരിയായ വിവരങ്ങൾ പ്രദാനം ചെയ്യു​ക​യാണ്‌ അതിന്റെ ഉദ്ദേശ്യം. എങ്കിലും, അശ്ലീല​പ​ര​മോ വിശ്വാ​സ​ത്യാ​ഗ​പ​ര​മോ ആയവ ഉൾപ്പെടെ തികച്ചും ദോഷ​ക​ര​മായ ചില കാര്യങ്ങൾ ഇന്റർനെ​റ്റിൽ പതിയി​രി​പ്പു​ണ്ടെ​ന്നത്‌ തിരി​ച്ച​റി​യണം.

ഒരു ക്രിസ്‌ത്യാ​നി അപ്പോ​സ്‌ത​ല​നായ പൗലൊ​സി​ന്റെ പിൻവ​രുന്ന ബുദ്ധ്യു​പ​ദേശം ഓർത്തി​രി​ക്കണം: “ആകയാൽ ഞാൻ കർത്താ​വിൽ സാക്ഷീ​ക​രി​ച്ചു പറയു​ന്നതു എന്തെന്നാൽ: ജാതികൾ തങ്ങളുടെ വ്യർത്ഥ​ബു​ദ്ധി അനുസ​രി​ച്ചു നടക്കു​ന്ന​തു​പോ​ലെ നിങ്ങൾ ഇനി നടക്കരു​തു. അവർ അന്ധബു​ദ്ധി​ക​ളാ​യി . . . അത്യാ​ഗ്ര​ഹ​ത്തോ​ടെ സകല അശുദ്ധി​യും പ്രവർത്തി​പ്പാൻ ദുഷ്‌കാ​മ​ത്തി​ന്നു തങ്ങളെ​ത്തന്നേ ഏല്‌പി​ച്ചി​രി​ക്കു​ന്നു. നിങ്ങളോ . . . ക്രിസ്‌തു​വി​നെ​ക്കു​റി​ച്ചു ഇങ്ങനെയല്ല പഠിച്ചതു.” (എഫെസ്യർ 4:17, 20) കൂടാതെ, “ദുർന്ന​ട​പ്പും യാതൊ​രു അശുദ്ധി​യും അത്യാ​ഗ്ര​ഹ​വും നിങ്ങളു​ടെ ഇടയിൽ പേർ പറക​പോ​ലും അരുതു; അങ്ങനെ ആകുന്നു വിശു​ദ്ധ​ന്മാർക്കു ഉചിതം. ചീത്തത്തരം, പൊട്ട​ച്ചൊൽ, കളിവാ​ക്കു ഇങ്ങനെ ചേർച്ച​യ​ല്ലാ​ത്തവ ഒന്നും അരുതു; സ്‌തോ​ത്ര​മ​ത്രേ വേണ്ടതു.” (എഫെസ്യർ 5:3, 4) ഒട്ടേറെ വെബ്‌ സൈറ്റു​ക​ളും അധാർമി​ക​മോ വഞ്ചനാ​ത്മ​ക​മോ ആയ ലക്ഷ്യ​ത്തോ​ടെ​യാ​ണു നിർമി​ച്ചി​രി​ക്കു​ന്ന​തെന്നു നാം മനസ്സിൽപ്പി​ടി​ക്കണം. ചാറ്റ്‌ ഗ്രൂപ്പു​ക​ളു​ടേ​തു​പോ​ലുള്ള വെബ്‌ സൈറ്റു​കൾ അധാർമി​ക​മോ വഞ്ചനാ​ത്മ​ക​മോ ആയിരി​ക്കില്ല. എങ്കിലും അവ സമയം പാഴാ​ക്ക​ലാണ്‌. അവയിൽനി​ന്നെ​ല്ലാം ഒഴിഞ്ഞു​നിൽക്കുക!