സ്വദേ​ശി​ക​ളായ അമേരി​ക്ക​ക്കാ​രും ബൈബി​ളും

യൂറോ​പ്പു​കാർ അമേരി​ക്കകൾ ആക്രമിച്ച കാലം മുതൽ സ്വദേ​ശി​ക​ളായ അമേരി​ക്ക​ക്കാ​രെ ബൈബിൾ പഠിപ്പി​ക്കാൻ അനേക​രും ശ്രമി​ച്ചി​ട്ടുണ്ട്‌.

17-ാം നൂറ്റാണ്ടു മുതൽ, വടക്കേ അമേരി​ക്കൻ ഇന്ത്യക്കാ​രു​ടെ ആറു ഭാഷക​ളിൽ സമ്പൂർണ ബൈബിൾ പരിഭാ​ഷ​പ്പെ​ടു​ത്തി​യി​ട്ടുണ്ട്‌. മസാച്ചു​സെ​റ്റ്‌സി​ലെ ബോസ്റ്റൺ, റോക്‌സ്‌ബെറി എന്നീ സ്ഥലങ്ങൾക്ക്‌ അടുത്തുള്ള മസാച്ചു​സെറ്റ്‌ ഇന്ത്യക്കാർക്കു​വേണ്ടി 1663-ൽ അച്ചടിച്ച ജോൺ എലിയ​ട്ടി​ന്റെ ബൈബിൾ ഭാഷാ​ന്ത​ര​മാണ്‌ അതിൽ ആദ്യ​ത്തേത്‌. എൻ​സൈ​ക്ലോ​പീ​ഡിയ ഓഫ്‌ നോർത്ത്‌ അമേരി​ക്കൻ ഇൻഡ്യൻസിൽ ഹാർവി മാർക്കൊ​വി​റ്റ്‌സ്‌ ഇങ്ങനെ എഴുതു​ന്നു: “കുടി​യേ​റ്റ​ക്കാ​രിൽ മിക്കവ​രും [ഒരു] ഉടമ്പടി​യിൽ [“അമേരി​ക്കൻ ‘ആദിവാ​സി​കളെ’ ‘സംസ്‌കാ​ര​സ​മ്പ​ന്ന​രാ​ക്കാൻ’ ഉള്ള ഉടമ്പടി​യിൽ”] ഏർപ്പെ​ട്ട​തി​ന്റെ ഉദ്ദേശ്യ​ശു​ദ്ധി​യെ ഇപ്പോൾ നിരവധി ചരി​ത്ര​കാ​ര​ന്മാ​രും ചോദ്യം ചെയ്യു​ന്നു​ണ്ടെ​ങ്കി​ലും മസാച്ചു​സെറ്റ്‌ ഭാഷ പഠിക്കാ​നും ബൈബിൾ പരിഭാ​ഷ​പ്പെ​ടു​ത്ത​ത്ത​ക്ക​വണ്ണം പ്രസ്‌തുത ഭാഷയിൽ അക്ഷരവി​ന്യാ​സം വികസി​പ്പി​ച്ചെ​ടു​ക്കാ​നും ഉള്ള എലിയ​ട്ടി​ന്റെ നീണ്ട പതിനഞ്ചു വർഷത്തെ കഠിനാ​ധ്വാ​നം അദ്ദേഹ​ത്തി​ന്റെ പ്രതി​ബ​ദ്ധ​ത​യ്‌ക്കു സാക്ഷ്യം വഹിക്കു​ന്നു. ‘ഭീതി​യോ​ടും സൂക്ഷ്‌മ​ത​യോ​ടും ഭക്ത്യാ​ദ​ര​വോ​ടും കൂടെ നിർവ​ഹി​ക്ക​പ്പെ​ടേണ്ട പാവന​വും പരിശു​ദ്ധ​വു​മായ കൃത്യം’ ആയിട്ടാ​ണു ദുഷ്‌ക​ര​മായ ഈ ഉദ്യമത്തെ എലിയട്ട്‌ വീക്ഷി​ച്ചത്‌.”

ബൈബി​ളി​ന്റെ ചില ഭാഗങ്ങൾ മറ്റു സ്വദേ​ശീയ അമേരി​ക്കൻ ഭാഷക​ളിൽ ലഭ്യമാ​യി​രു​ന്നെ​ങ്കി​ലും, അടുത്ത സമ്പൂർണ ബൈബിൾ പ്രസി​ദ്ധീ​ക​രി​ക്കാൻ ഇരുന്നൂ​റു വർഷ​മെ​ടു​ത്തു. ബ്രിട്ടീഷ്‌ ആൻഡ്‌ ഫോറിൻ ബൈബിൾ സൊ​സൈ​റ്റി​യു​ടെ പ്രവർത്തകർ ചേർന്ന്‌ വെസ്റ്റേൺ ക്രി ഭാഷയിൽ (1862) ആണ്‌ അതു പരിഭാ​ഷ​പ്പെ​ടു​ത്തി​യത്‌. തുടർന്ന്‌, ഈസ്റ്റേൺ ആർട്ടിക്‌ ഇന്യു​വിറ്റ്‌ (1871); ഡക്കോട്ട അഥവാ ഈസ്റ്റേൺ സൂ (1880) എന്നീ ഭാഷക​ളി​ലും ഗ്വിച്ചിൻ എന്ന ഉപ-ആർട്ടിക്‌ അമേരി​ക്കൻ ഭാഷയി​ലും (1898) താമസി​യാ​തെ ബൈബിൾ പരിഭാ​ഷ​പ്പെ​ടു​ത്തി.

രണ്ടു ബൈബിൾ സൊ​സൈ​റ്റി​ക​ളു​ടെ 41 വർഷത്തെ തയ്യാ​റെ​ടു​പ്പി​ന്റെ​യും കൂട്ടായ പ്രവർത്ത​ന​ത്തി​ന്റെ​യും ഫലമായി 1985-ൽ പ്രസി​ദ്ധീ​ക​രിച്ച നാവ​ഹോ​യി​ലുള്ള പരിഭാ​ഷ​യാണ്‌ ഏറ്റവും ഒടുവി​ലത്തെ സമ്പൂർണ ബൈബിൾ. ഇപ്പോൾ 46 ഇന്ത്യൻ ഭാഷക​ളി​ലെ​ങ്കി​ലും എബ്രായ, ഗ്രീക്കു തിരു​വെ​ഴു​ത്തു​ക​ളു​ടെ ചില ഭാഗങ്ങൾ ലഭ്യമാണ്‌.

നേതൃ​ത്വം വഹിച്ചത്‌ ആർ?

മാർക്കൊ​വി​റ്റ്‌സ്‌ പറയുന്നു: “ബൈബിൾ പരിഭാ​ഷ​പ്പെ​ടു​ത്തുന്ന ജോലി അധിക​വും പ്രൊ​ട്ട​സ്റ്റ​ന്റു​കാ​രു​ടെ ശ്രമഫ​ല​മാ​യി​രു​ന്നു . . . എന്നതു ശ്രദ്ധേ​യ​മാണ്‌.” രണ്ടാം വത്തിക്കാൻ കൗൺസി​ലി​നു മുമ്പ്‌ (1962) കത്തോ​ലി​ക്കാ സഭ, “അൽമാ​യർക്ക്‌ ബൈബിൾ വാക്യങ്ങൾ കൃത്യ​മാ​യി വ്യാഖ്യാ​നി​ച്ചെ​ടു​ക്കാൻ ശരിയായ . . . പരിശീ​ലനം ഇല്ലെന്നു കരുതി​യി​രു​ന്ന​തു​കൊണ്ട്‌ അവർക്കി​ട​യിൽ ബൈബിൾ വിതരണം ചെയ്യു​ന്ന​തി​നെ നിരു​ത്സാ​ഹ​പ്പെ​ടു​ത്തി” എന്ന്‌ ആ എഴുത്തു​കാ​രൻ തുടർന്നു പറയുന്നു.

ഷൈയാൻ, ഹാവസൂ​പ്പൈ, മിക്‌മാക്‌, സൂനി എന്നീ ഭാഷകൾ ഉൾപ്പെടെ വടക്കേ അമേരി​ക്ക​യി​ലെ സ്വദേ​ശി​ക​ളായ അമേരി​ക്ക​ക്കാ​രു​ടെ ഭാഷക​ളിൽ ബൈബിൾ പരിഭാ​ഷ​പ്പെ​ടു​ത്തു​ന്ന​തിന്‌ ഉള്ള 20 പദ്ധതി​ക​ളി​ലെ​ങ്കി​ലും ഇപ്പോൾ വിവിധ ബൈബിൾ സൊ​സൈ​റ്റി​കൾ ഉൾപ്പെ​ട്ടി​രി​ക്കു​ന്നു. നാവഹോ ജനതയ്‌ക്കു​വേണ്ടി ഗ്രീക്കു തിരു​വെ​ഴു​ത്തു​ക​ളു​ടെ പുതിയ ഒരു ഭാഷാ​ന്തരം പണിപ്പു​ര​യി​ലാണ്‌. മധ്യ, ദക്ഷിണ അമേരി​ക്ക​യി​ലെ ഇന്ത്യക്കാർക്കു​വേണ്ടി വേറെ പരിഭാ​ഷ​ക​ളും തയ്യാറാ​ക്ക​പ്പെ​ട്ടു​വ​രു​ന്നു.

യഹോ​വ​യു​ടെ സാക്ഷികൾ ഏതെങ്കി​ലും പ്രൊ​ട്ട​സ്റ്റന്റ്‌ സംഘട​ന​യു​ടെ ഭാഗമല്ല. എങ്കിലും സ്വദേ​ശി​ക​ളായ അമേരി​ക്ക​ക്കാർക്കി​ട​യിൽ അവർ സജീവ​മാ​യി പ്രവർത്തി​ച്ചു വരുന്നു. അതിന്റെ ഫലമായി, നീതി വസിക്കുന്ന ‘പുതിയ ആകാശ​വും പുതിയ ഭൂമി​യും’ സംബന്ധിച്ച ബൈബിൾ സത്യ​ത്തോട്‌ അനേക​രും അനുകൂ​ല​മാ​യി പ്രതി​ക​രി​ക്കു​ന്നു. (2 പത്രൊസ്‌ 3:13) അമേരി​ക്ക​ക്കാ​രു​ടെ നാട്ടു ഭാഷക​ളിൽ ഇപ്പോൾ ലഭ്യമാ​യി​രി​ക്കുന്ന ബൈബി​ളു​കൾ ആണു സാക്ഷികൾ ഉപയോ​ഗി​ക്കു​ന്നത്‌. നാട്ടു​ഭാ​ഷ​ക​ളായ ഇനുക്‌റ്റി​റ്റുട്ട്‌, ഇറൊ​ക്വൊ​യി, ഐമറാ, കെച്ച്‌വാ, ക്രി, ഗ്വാറനി, ഡക്കോട്ട, നാവഹോ എന്നിവ​യ്‌ക്കു പുറമേ ഒമ്പതു ഭാഷക​ളിൽ വാച്ച്‌ ടവർ സൊ​സൈറ്റി പ്രസി​ദ്ധീ​ക​രി​ച്ചി​രി​ക്കുന്ന ബൈബിൾ സാഹി​ത്യ​ങ്ങ​ളും അവർ ഉപയോ​ഗി​ക്കു​ന്നു.—1996 സെപ്‌റ്റം​ബർ 8 ലക്കം ഉണരുക! കാണുക.

[25-ാം പേജിലെ ചിത്രം]

നാവഹോ ബൈബി​ളിൽ സങ്കീർത്തനം 68:4-ൽ “യഹോവ” എന്ന്‌ ഉപയോ​ഗി​ച്ചി​രി​ക്കു​ന്നു