മനുഷ്യ​ന്റെ ഭാവി സംബന്ധിച്ച അന്വേ​ഷ​ണം

വിധി​വി​ശ്വാ​സം ഇത്ര വ്യാപ​ക​മാ​യി​രി​ക്കു​ന്നത്‌ എന്തു​കൊ​ണ്ടാണ്‌? ജീവി​ത​ത്തി​ലെ ദുരൂ​ഹ​ത​ക​ളു​ടെ ചുരു​ള​ഴി​ക്കാ​നും ജീവി​ത​ത്തി​ലു​ണ്ടാ​കുന്ന സംഭവ​ങ്ങൾക്കു പിന്നിൽ എന്തെങ്കി​ലും ഉദ്ദേശ്യ​മു​ണ്ടോ എന്നു കണ്ടെത്താ​നും യുഗങ്ങ​ളി​ലു​ട​നീ​ളം മനുഷ്യൻ ശ്രമി​ച്ചി​ട്ടുണ്ട്‌. “ഈ സന്ദർഭ​ത്തി​ലാണ്‌, പ്രസ്‌തുത സംഭവ​വി​കാ​സങ്ങൾ വ്യക്തി​ത്വ​മുള്ള ഒരു ശക്തിയു​ടെ​യോ ഒരു അമൂർത്ത ശക്തിയു​ടെ​യോ അതുമ​ല്ലെ​ങ്കിൽ ഇതിൽ രണ്ടിലും പെടാത്ത ഒന്നി​ന്റെ​യോ പ്രവർത്ത​ന​ഫ​ല​മാണ്‌ എന്ന വിശ്വാ​സത്തെ കേന്ദ്രീ​ക​രിച്ച്‌ ‘ദൈവം,’ ‘വിധി,’ ‘യാദൃ​ശ്ചി​കത’ എന്നിവ​യെ​ല്ലാം രംഗത്തു വരുന്നത്‌,” ചരി​ത്ര​കാ​ര​നായ ഹെൽമർ റിങ്‌ഗ്രെൻ വിവരി​ക്കു​ന്നു. വിധി​യെ​യും തലയി​ലെ​ഴു​ത്തി​നെ​യും സംബന്ധിച്ച വിശ്വാ​സ​ങ്ങ​ളും ഐതി​ഹ്യ​ങ്ങ​ളും സങ്കൽപ്പ​ങ്ങ​ളും കൊണ്ട്‌ ചരി​ത്ര​ത്തി​ന്റെ ഏടുകൾ നിറഞ്ഞി​രി​ക്കു​ന്നു.

അസീറി​യൻ പുരാ​ണ​ങ്ങളെ കുറിച്ചു ഗവേഷണം ചെയ്യുന്ന ഷാൻ ബൊ​ട്ടേ​റൊ പറയുന്നു: “നമ്മുടെ സംസ്‌കാ​ര​ത്തി​ന്റെ എല്ലാ വശങ്ങ​ളെ​യും ഒരു വലിയ അളവു​വരെ രൂപ​പ്പെ​ടു​ത്തി​യി​രി​ക്കു​ന്നത്‌ മെസ​പ്പൊ​ട്ടോ​മി​യൻ സംസ്‌കാ​ര​മാണ്‌.” “പ്രകൃ​ത്യ​തീത ശക്തി​യോ​ടുള്ള മനുഷ്യ​ന്റെ ഏറ്റവും പുരാ​ത​ന​മായ പ്രതി​ക​ര​ണങ്ങൾ, അതേ കുറി​ച്ചുള്ള ആശയങ്ങൾ, ഏറ്റവും പുരാ​ത​ന​മായ മതഘടന എന്നിവ​യ്‌ക്കുള്ള തെളി​വു​കൾ” നാം കാണു​ന്നത്‌ പുരാതന മെസ​പ്പൊ​ട്ടോ​മി​യ​യിൽ അഥവാ ബാബി​ലോ​ണിൽ ആണ്‌ എന്നും അദ്ദേഹം കൂട്ടി​ച്ചേർക്കു​ന്നു. വിധി​വി​ശ്വാ​സ​ത്തി​ന്റെ വേരുകൾ കാണ​പ്പെ​ടു​ന്ന​തും അവി​ടെ​തന്നെ.

വിധി​വി​ശ്വാ​സ​ത്തി​ന്റെ ഉത്ഭവം

ഇന്നത്തെ ഇറാക്കി​ലെ പുരാതന മെസ​പ്പൊ​ട്ടോ​മി​യൻ ശൂന്യ​ശി​ഷ്ട​ങ്ങൾക്കി​ട​യിൽ നിന്ന്‌, അറിയ​പ്പെ​ടു​ന്ന​തി​ലേ​ക്കും ഏറ്റവും പഴക്കമുള്ള ചില ലിഖി​തങ്ങൾ പുരാ​വ​സ്‌തു ഗവേഷകർ കണ്ടെടു​ത്തി​ട്ടുണ്ട്‌. ആയിര​ക്ക​ണ​ക്കി​നു ക്യൂണി​ഫോം ഫലകങ്ങൾ നമുക്ക്‌ സുമേർ, അക്കാദ്‌ എന്നിവി​ട​ങ്ങ​ളി​ലെ​യും പ്രസിദ്ധ നഗരമായ ബാബി​ലോ​ണി​ലെ​യും ആളുക​ളു​ടെ ജീവി​തത്തെ കുറിച്ചു വ്യക്തമായ ഒരു ചിത്രം നൽകുന്നു. പുരാ​വ​സ്‌തു ഗവേഷ​ക​നായ സാമു​വേൽ എൻ. ക്രേമർ പറയു​ന്ന​ത​നു​സ​രിച്ച്‌, “മനുഷ്യ​ന്റെ കഷ്ടപ്പാ​ടു​കളെ കുറി​ച്ചുള്ള, വിശേ​ഷി​ച്ചും അതിന്റെ അജ്ഞാത കാരണ​ങ്ങളെ കുറി​ച്ചുള്ള ചിന്ത” സുമേ​റി​യ​ക്കാ​രെ “അലട്ടി​യി​രു​ന്നു.” ഉത്തരങ്ങൾക്കാ​യുള്ള അവരുടെ അന്വേ​ഷണം വിധി എന്ന സങ്കൽപ്പ​ത്തി​ലേക്കു നയിച്ചു.

“ബാബി​ലോ​ണി​ലെ ഓരോ വ്യക്തി​ക്കും സ്വന്തമാ​യി ഒരു ദേവനോ ദേവി​യോ ഉണ്ടായി​രു​ന്നു” എന്ന്‌ പുരാ​വ​സ്‌തു ഗവേഷ​ക​യായ ജോവാൻ ഓട്ട്‌സ്‌ ബാബി​ലോൺ (ഇംഗ്ലീഷ്‌) എന്ന തന്റെ പുസ്‌ത​ക​ത്തിൽ പറയുന്നു. ദൈവങ്ങൾ “മനുഷ്യ​രു​ടെ—വ്യക്തി​ക​ളെന്ന നിലയി​ലും കൂട്ടമെന്ന നിലയി​ലും—ഭാവി നിർണ​യി​ക്കു​ന്നു” എന്ന്‌ ബാബി​ലോ​ണി​യർ വിശ്വ​സി​ച്ചു. ക്രേമർ പറയു​ന്ന​ത​നു​സ​രിച്ച്‌, “പ്രപഞ്ചത്തെ നിയ​ന്ത്രി​ക്കുന്ന ദൈവങ്ങൾ തിന്മയും നുണയും അക്രമ​വും മാനവ സമൂഹ​ത്തി​ന്റെ അവിഭാ​ജ്യ ഘടകങ്ങ​ളാ​ക്കാൻ ആസൂ​ത്ര​ണങ്ങൾ ചെയ്‌ത്‌ അവ നടപ്പി​ലാ​ക്കി”യതായി സുമേ​റി​യ​ക്കാർ വിശ്വ​സി​ച്ചി​രു​ന്നു. വിധി​വി​ശ്വാ​സം വ്യാപ​ക​മാ​യി​രു​ന്നു, ആളുകൾ അതിന്‌ വലിയ മൂല്യം കൽപ്പി​ക്കു​ക​യും ചെയ്‌തി​രു​ന്നു.

“ദൈവ​ങ്ങ​ളു​മാ​യി ആശയവി​നി​മയം നടത്താ​നുള്ള ഒരു ഉപാധി”യായ ഭാവി​കഥന വിദ്യ​യി​ലൂ​ടെ അവരുടെ പദ്ധതികൾ എന്താ​ണെന്നു കണ്ടുപി​ടി​ക്കാൻ കഴിയു​മെന്ന്‌ ബാബി​ലോ​ണി​യർ കരുതി. ഭാവി​കഥന വിദ്യ​യിൽ, വസ്‌തു​ക്ക​ളും സംഭവ​ങ്ങ​ളും നിരീ​ക്ഷി​ക്കു​ക​യും അവയെ വ്യാഖ്യാ​നി​ക്കു​ക​യും ചെയ്‌തു​കൊണ്ട്‌ ഭാവി അറിയാൻ ശ്രമി​ക്കു​ന്നത്‌ ഉൾപ്പെ​ട്ടി​രു​ന്നു. സ്വപ്‌നങ്ങൾ, മൃഗങ്ങ​ളു​ടെ പെരു​മാ​റ്റം, അവയുടെ ആന്തര അവയവങ്ങൾ എന്നിവ​യെ​ല്ലാം സാധാരണ പരി​ശോ​ധി​ക്കു​മാ​യി​രു​ന്നു. (യെഹെ​സ്‌കേൽ 21:21 താരത​മ്യം ചെയ്യുക; ദാനീ​യേൽ 2:1-4.) ഭാവി വെളി​പ്പെ​ടു​ത്തു​ന്ന​തെന്നു പറയ​പ്പെ​ട്ടി​രുന്ന അപ്രതീ​ക്ഷി​ത​മോ അസാധാ​ര​ണ​മോ ആയ സംഭവങ്ങൾ കളിമൺ ഫലകങ്ങ​ളിൽ രേഖ​പ്പെ​ടു​ത്തി വെക്കു​മാ​യി​രു​ന്നു.

പുരാതന കാലത്തെ ആളുക​ളു​ടെ സംസ്‌കാ​ര​ങ്ങളെ കുറിച്ചു ഗവേഷണം നടത്തുന്ന ഏഡ്‌വർ ദോറം എന്ന ഫ്രഞ്ചു​കാ​രൻ പറയു​ന്ന​ത​നു​സ​രിച്ച്‌, “നാം മെസ​പ്പൊ​ട്ടോ​മി​യൻ ചരി​ത്ര​ത്തി​ന്റെ എത്ര പഴക്ക​മേ​റിയ ഏടുകൾ പരി​ശോ​ധി​ച്ചാ​ലും, ആ ദേശക്കാർ പ്രവചനം, ഭാവി​ക​ഥനം എന്നിവ​യിൽ ഏർപ്പെ​ട്ടി​രു​ന്ന​തി​നുള്ള തെളി​വു​കൾ കാണാം.” ഭാവി​ക​ഥനം അവരുടെ ജീവി​ത​ത്തി​ന്റെ ഒരു ഭാഗമാ​യി​രു​ന്നു. “ഏതൊരു വസ്‌തു​വും ഭാവി​കഥന നിർണ​യ​ത്തി​നാ​യി ഉപയോ​ഗി​ക്കാ​മെന്നു കരുത​പ്പെ​ട്ടി​രു​ന്നു . . . സൂക്ഷ്‌മ പരി​ശോ​ധ​ന​യി​ലൂ​ടെ ഏതെങ്കി​ലു​മൊ​ക്കെ വിധത്തിൽ ഭാവിയെ കുറിച്ചു മനസ്സി​ലാ​ക്കാൻ സഹായി​ക്കുന്ന ഒരു തെളി​വാ​യി​ട്ടാണ്‌ മുഴു ഭൗതിക പ്രപഞ്ച​ത്തെ​യും വീക്ഷി​ച്ചി​രു​ന്നത്‌.” മെസ​പ്പൊ​ട്ടോ​മി​യ​ക്കാർ ഭാവി മുൻകൂ​ട്ടി അറിയാ​നുള്ള ഒരു മാർഗ​മെന്ന നിലയിൽ ജ്യോ​തി​ഷത്തെ വളരെ​യ​ധി​കം ആശ്രയി​ച്ചി​രു​ന്നു.—യെശയ്യാ​വു 47:13 താരത​മ്യം ചെയ്യുക.

അതിനു പുറമേ ബാബി​ലോ​ണി​യർ ഭാവി​കഥന വിദ്യ​യു​ടെ ഭാഗമാ​യി പകിടകൾ അല്ലെങ്കിൽ നറുക്കു​കൾ ഉപയോ​ഗി​ച്ചി​രു​ന്നു. “മനുഷ്യ​രു​ടെ ഇടപെടൽ ഇല്ലാതാ​ക്കി​ക്കൊണ്ട്‌ ദൈവ​ങ്ങൾക്ക്‌ തങ്ങളുടെ ദിവ്യ​ഹി​തം വെളി​പ്പെ​ടു​ത്താൻ വ്യക്തമായ ഒരു സരണി തുറന്നു​കൊ​ടു​ക്കുക” എന്നതാ​യി​രു​ന്നു ലക്ഷ്യം എന്ന്‌ റാൻഡം​നെസ്സ്‌ എന്ന തന്റെ പുസ്‌ത​ക​ത്തിൽ ദെബോറ ബെന്നെറ്റ്‌ പറയുന്നു. എങ്കിലും, ദൈവ​ങ്ങ​ളു​ടെ തീരു​മാ​നങ്ങൾ തീർത്തും അന്തിമ​മാ​ണെന്ന്‌ അവർ കരുതി​യി​രു​ന്നില്ല. ദുർവി​ധി ഒഴിവാ​ക്കാ​നുള്ള സഹായ​ത്തി​നാ​യി അവർക്കു ദൈവ​ങ്ങ​ളോട്‌ അപേക്ഷി​ക്കാ​മാ​യി​രു​ന്നു.

പുരാതന ഈജി​പ്‌തി​ലെ വിധി​വി​ശ്വാ​സം

പൊ.യു.മു. 15-ാം നൂറ്റാ​ണ്ടിൽ ബാബി​ലോ​ണും ഈജി​പ്‌തും അടുത്ത ബന്ധം പുലർത്തി​യി​രു​ന്നു. ഇരു ദേശങ്ങ​ളും പരസ്‌പരം കൈമാ​റിയ സംസ്‌കാ​ര​ങ്ങ​ളു​ടെ കൂട്ടത്തിൽ വിധി​യു​മാ​യി ബന്ധപ്പെട്ട മതാനു​ഷ്‌ഠാ​ന​ങ്ങ​ളും ഉൾപ്പെ​ടു​ക​യു​ണ്ടാ​യി. ഈജി​പ്‌തു​കാർ വിധി​വി​ശ്വാ​സം സ്വീക​രി​ച്ചത്‌ എന്തു​കൊ​ണ്ടാ​യി​രു​ന്നു? ഓക്‌സ്‌ഫോർഡ്‌ സർവക​ലാ​ശാ​ല​യി​ലെ ഈജി​പ്‌ഷ്യൻ പൗരാണ ഗവേഷ​ക​നായ പ്രൊ​ഫസർ ജോൺ ആർ. ബേൻസ്‌ പറയുന്ന പ്രകാരം, “പ്രവച​നാ​തീ​ത​വും ദൗർഭാ​ഗ്യ​ക​ര​വു​മായ സംഗതി​കൾ ഗ്രഹി​ക്കു​ക​യും അവയോ​ടു പ്രതി​ക​രി​ക്കു​ക​യും ചെയ്യേ​ണ്ടത്‌ എങ്ങനെ എന്നതിൽ [ഈജി​പ്‌ഷ്യൻ] മതത്തിനു വളരെ താത്‌പ​ര്യം ഉണ്ടായി​രു​ന്നു.”

ഈജി​പ്‌തി​ലെ അസംഖ്യം ദേവീ​ദേ​വ​ന്മാ​രിൽ ഒരുവ​ളായ ഐസി​സി​നെ “ജീവന്റെ ഉടമസ്ഥ​യും വിധി​യു​ടെ​യും ഭാവി​യു​ടെ​യും ഭരണാ​ധി​കാ​രി​ണി​യു”മായി വിശേ​ഷി​പ്പി​ച്ചി​രു​ന്നു. ഈജി​പ്‌തു​കാർ ഭാവി​ക​ഥ​ന​വും ജ്യോ​തി​ഷ​വും പിൻപ​റ്റി​യി​രു​ന്നു. (യെശയ്യാ​വു 19:3 താരത​മ്യം ചെയ്യുക.) ഒരു ചരി​ത്ര​കാ​രൻ പറയുന്നു: “ദൈവ​ങ്ങളെ ചോദ്യം ചെയ്യു​ന്ന​തിൽ അവർ അത്യു​ത്സാ​ഹി​കൾ ആയിരു​ന്നു.” എന്നാൽ, ബാബി​ലോ​ണിൽനിന്ന്‌ ഈ ആശയം കടമെ​ടു​ത്തത്‌ ഈജി​പ്‌തു​കാർ മാത്ര​മാ​യി​രു​ന്നില്ല.

ഗ്രീസും റോമും

മതപര​മായ വിഷയ​ങ്ങ​ളു​ടെ കാര്യ​ത്തിൽ “ബാബി​ലോ​ണി​ന്റെ സ്വാധീ​ന​വ​ല​യ​ത്തിൽനിന്ന്‌ പുരാതന ഗ്രീസും രക്ഷപ്പെ​ട്ടില്ല,” ജീൻ ബോ​ട്ടെ​റോ അഭി​പ്രാ​യ​പ്പെട്ടു. വിധി​വി​ശ്വാ​സം ഗ്രീസിൽ ഇത്രയ്‌ക്കു പ്രചാ​ര​മാർജി​ച്ചത്‌ എന്തു​കൊ​ണ്ടെന്ന്‌ പ്രൊ​ഫസർ പീറ്റർ ഗ്രീൻ വിശദീ​ക​രി​ക്കു​ന്നു: “ആളുകൾ തങ്ങളുടെ തീരു​മാ​ന​ങ്ങ​ളു​ടെ ഉത്തരവാ​ദി​ത്വം ഏറ്റെടു​ക്കാൻ ഒന്നി​നൊന്ന്‌ വിമുഖത കാട്ടു​ക​യും ദുരൂ​ഹ​വും നിർദ​യ​വു​മായ രീതി​യിൽ വിധി തട്ടിക്ക​ളി​ക്കുന്ന വെറും കളിപ്പ​ന്തു​ക​ളാണ്‌ തങ്ങളെന്നു കരുതു​ക​യും ചെയ്‌തി​രുന്ന ഒരു ലോക​ത്തിൽ വ്യക്തി​ക​ളു​ടെ ഭാവി നിർണി​ക്കു​ന്ന​തി​നുള്ള ഒരു മാർഗ​മാ​യി​രു​ന്നു ദിവ്യ അരുള​പ്പാ​ടു​കൾ [ദൈവ​നി​ശ്ചിത വിധി]. പ്രത്യേക കഴിവോ ഉൾക്കാ​ഴ്‌ച​യോ ഉണ്ടെങ്കിൽ വിധി​നി​ശ്ചയം മുൻകൂ​ട്ടി പറയാൻ ഒരു വ്യക്തിക്കു കഴിയു​മാ​യി​രു​ന്നു. കേൾക്കാൻ ആഗ്രഹിച്ച കാര്യങ്ങൾ ആയിരി​ക്ക​ണ​മെ​ന്നില്ല അവയെ​ങ്കി​ലും ചുരു​ങ്ങി​യ​പക്ഷം ജാഗ്ര​ത​യോ​ടെ​യി​രി​ക്കാൻ തക്കവണ്ണം അത്‌ ആളുകൾക്കു മുന്നറി​യി​പ്പു നൽകി​യി​രു​ന്നു.”

ആളുകൾക്കു ഭാവിയെ കുറിച്ച്‌ ഉറപ്പു നൽകു​ന്ന​തി​നു പുറമേ കുത്സി​ത​മായ ഉദ്ദേശ്യ​ങ്ങൾ നിവർത്തി​ക്കു​ന്ന​തി​നും വിധി​വി​ശ്വാ​സം ഉതകി​യി​ട്ടുണ്ട്‌. വിധി​സ​ങ്കൽപ്പം ജനങ്ങളെ അടക്കി​ഭ​രി​ക്കു​ന്ന​തിന്‌ ചിലരെ സഹായി​ച്ചു. അക്കാര​ണ​ത്താൽ “ലോകം പൂർണ​മാ​യും നയിക്ക​പ്പെ​ടു​ന്നത്‌ ദിവ്യ​മാർഗ​നിർദേ​ശ​ത്താൽ ആണെന്ന വിശ്വാ​സം സമൂഹ​ത്തി​ലെ ഭരണവർഗ​ത്തിന്‌ ആകർഷ​ക​മാ​യി തോന്നി” എന്നു ചരി​ത്ര​കാ​ര​നായ എഫ്‌. എച്ച്‌. സാൻഡ്‌ബാക്ക്‌ പറയുന്നു.

കാരണം? പ്രൊ​ഫസർ ഗ്രീൻ വിശദ​മാ​ക്കു​ന്നു: “[ഈ വിശ്വാ​സം] സാമൂ​ഹി​ക​വും രാഷ്‌ട്രീ​യ​വു​മായ വ്യവസ്ഥി​തി​ക്കു വേണ്ടി കെട്ടി​ച്ചമച്ച ഒരു ന്യായീ​ക​രണം—ധാർമി​ക​വും ദൈവ​ശാ​സ്‌ത്ര​പ​ര​വും സൂചനാർഥ​പ​ര​വു​മായ ഒന്ന്‌—ആയിരു​ന്നു: ഗ്രീക്ക്‌ ഭരണവർഗം സ്വന്തം നിലനിൽപ്പി​നാ​യി രൂപം നൽകി​യി​ട്ടു​ള്ള​തിൽവെച്ച്‌ ഏറ്റവും ശക്തവും കുടി​ല​വു​മായ തന്ത്രങ്ങ​ളിൽ ഒന്നായി​രു​ന്നു അത്‌. എന്തു സംഭവി​ച്ചാ​ലും അതു വിധി​യാ​ണെ​ന്നാ​യി​രു​ന്നു ധാരണ; പ്രകൃ​തി​ശ​ക്തി​കൾ എല്ലായ്‌പോ​ഴും മനുഷ്യ​ന്റെ നന്മ കാംക്ഷി​ക്കു​ന്ന​തി​നാൽ വിധി​നി​ശ്ചയം എന്തായി​രു​ന്നാ​ലും അത്‌ അവന്റെ നന്മയ്‌ക്കാ​യി ഭവിക്കു​മെന്നു വിശ്വ​സി​ക്ക​പ്പെ​ട്ടി​രു​ന്നു.” വാസ്‌ത​വ​ത്തിൽ അത്‌ “കടുത്ത സ്വാർഥ താത്‌പ​ര്യ​ങ്ങൾക്കുള്ള ന്യായീ​കരണ”മായി ഉതകി.

വിധി​വി​ശ്വാ​സം പരക്കെ അംഗീ​ക​രി​ക്ക​പ്പെ​ട്ടി​രു​ന്നു എന്നു ഗ്രീക്ക്‌ സാഹി​ത്യം വെളി​പ്പെ​ടു​ത്തു​ന്നു. ഗ്രീക്കു​കാ​രു​ടെ പുരാതന സാഹി​ത്യ​രൂ​പ​ങ്ങ​ളായ മഹാകാ​വ്യ​ങ്ങൾ, ഇതിഹാ​സങ്ങൾ, ദുഃഖ​പ​ര്യ​വ​സാ​യി​യായ നാടകങ്ങൾ എന്നിവ​യി​ലൊ​ക്കെ വിധി​സ​ങ്കൽപ്പം കഥാഗ​തി​യെ സ്വാധീ​നി​ക്കുന്ന ഒരു പ്രധാന ഘടകമാ​യി​രു​ന്നു. ഗ്രീക്കു പുരാ​ണ​ങ്ങ​ളിൽ, മൊയ്‌റൈ എന്നു വിളി​ക്ക​പ്പെട്ട ഒരു ദൈവ​ത്ര​യ​ത്തി​ലെ മൂന്നു ദേവി​മാ​രാ​യി​രു​ന്നു മനുഷ്യ​ന്റെ വിധി തീരു​മാ​നി​ച്ചി​രു​ന്നത്‌. ജീവി​ത​മെന്ന നൂൽനൂൽക്കു​ന്നത്‌ ക്ലൊ​ഥൊ​യും അതിന്റെ ദൈർഘ്യം നിശ്ചയി​ക്കു​ന്നത്‌ ലാച്ചെ​സി​സും അനുവ​ദിച്ച സമയം തീരു​മ്പോൾ അതു മുറി​ക്കു​ന്നത്‌ ആട്രോ​പ്പോ​സും ആയിരു​ന്നു. റോമാ​ക്കാർക്കും പാർക്കൈ എന്ന ഒരു സമാന ദൈവ​ത്രയം ഉണ്ടായി​രു​ന്നു.

തങ്ങളുടെ വിധി എന്താ​ണെന്ന്‌ അറിയാൻ റോമാ​ക്കാ​രും ഗ്രീക്കു​കാ​രും വളരെ ആകാം​ക്ഷ​യു​ള്ളവർ ആയിരു​ന്നു. അതു​കൊണ്ട്‌ അവർ ബാബി​ലോ​ണിൽനിന്ന്‌ ജ്യോ​തി​ഷ​വും ഭാവി​കഥന വിദ്യ​യും കടമെ​ടുത്ത്‌ അവയെ വികസി​പ്പി​ച്ചു. ഭാവി മുൻകൂ​ട്ടി പറയാൻ സഹായി​ച്ചി​രുന്ന സംഭവ​ങ്ങളെ റോമാ​ക്കാർ അടയാ​ളങ്ങൾ എന്നർഥ​മുള്ള പോർട്ടെന്റ എന്നാണു വിളി​ച്ചി​രു​ന്നത്‌. ഈ അടയാ​ളങ്ങൾ നൽകിയ സന്ദേശ​ങ്ങളെ ഓമിന എന്നും. പൊ.യു.മു. 3-ാം നൂറ്റാ​ണ്ടോ​ടെ ജ്യോ​തി​ഷം ഗ്രീസിൽ പ്രചാ​ര​മാർജി​ച്ചി​രു​ന്നു. പൊ.യു.മു. 62-ലാണ്‌ അറിയ​പ്പെ​ടു​ന്ന​തിൽ വെച്ച്‌ ആദ്യത്തെ ഗ്രീക്ക്‌ ജാതകം പ്രത്യ​ക്ഷ​പ്പെ​ട്ടത്‌. ഗ്രീക്കു​കാർ ജ്യോ​തി​ഷ​ത്തിൽ അതീവ തത്‌പരർ ആയിരു​ന്ന​തു​കൊണ്ട്‌, “ഒരു വിദൂ​ര​ദ്വീ​പി​ലെ നിവാ​സി​കൾക്ക്‌ പുതി​യൊ​രു രോഗം പിടി​പെ​ടു​ന്ന​തു​പോ​ലെ അത്‌ അവരുടെ ഇടയിൽ പടർന്നു പിടിച്ചു” എന്നു പ്രൊ​ഫസർ ഗിൽബർട്ട്‌ മറി പറയുന്നു.

ഭാവി അറിയാ​നാ​യി ഗ്രീക്കു​കാ​രും റോമാ​ക്കാ​രും വെളി​ച്ച​പ്പാ​ടു​ക​ളു​ടെ അല്ലെങ്കിൽ മധ്യവർത്തി​ക​ളു​ടെ സഹായം തേടി​യി​രു​ന്നു. ഇവരി​ലൂ​ടെ ദൈവങ്ങൾ മനുഷ്യ​രോട്‌ ആശയവി​നി​മയം നടത്തു​ന്ന​താ​യി അവർ കരുതി​പ്പോ​ന്നു. (പ്രവൃ​ത്തി​കൾ 16:16-19 താരത​മ്യം ചെയ്യുക.) ഈ വിശ്വാ​സ​ങ്ങ​ളു​ടെ ഫലം എന്തായി​രു​ന്നു? തത്ത്വചി​ന്ത​ക​നായ ബെർട്രൻഡ്‌ റസ്സൽ ഇങ്ങനെ പറഞ്ഞു: “ഭയം പ്രത്യാ​ശ​യു​ടെ സ്ഥാനം കയ്യടക്കി; ക്രിയാ​ത്മ​ക​മായ എന്തെങ്കി​ലും ചെയ്യുക എന്നതല്ല, പകരം ദുർവി​ധി​യിൽനി​ന്നു രക്ഷപ്പെ​ടുക എന്നതാ​യി​ത്തീർന്നു ജീവി​ത​ല​ക്ഷ്യം.” ഇത്തരം കാര്യങ്ങൾ ക്രൈ​സ്‌ത​വ​ലോ​ക​ത്തി​ലും വിവാദ വിഷയ​ങ്ങ​ളാ​യി മാറി.

വിധിയെ കുറി​ച്ചുള്ള “ക്രിസ്‌തീയ” സംവാ​ദ​ങ്ങൾ

ഭാവി​യെ​യും വിധി​യെ​യും കുറി​ച്ചുള്ള ഗ്രീക്ക്‌, റോമാ വിശ്വാ​സങ്ങൾ ശക്തമായി സ്വാധീ​നം ചെലു​ത്തി​യി​രുന്ന ഒരു തലമു​റ​യി​ലാണ്‌ ആദിമ ക്രിസ്‌ത്യാ​നി​കൾ ജീവി​ച്ചി​രു​ന്നത്‌. ഉദാഹ​ര​ണ​ത്തിന്‌, സഭാ പിതാ​ക്ക​ന്മാർ എന്നു വിളി​ക്ക​പ്പെ​ട്ടവർ അരി​സ്റ്റോ​ട്ടിൽ, പ്ലേറ്റോ തുടങ്ങിയ ഗ്രീക്ക്‌ തത്ത്വചി​ന്ത​ക​രു​ടെ കൃതി​ക​ളിൽനി​ന്നു വളരെ​യ​ധി​കം ആശയങ്ങൾ കടമെ​ടു​ത്തു. സർവജ്ഞാ​നി​യും സർവശ​ക്ത​നു​മായ, ‘ആരംഭ​ത്തി​ങ്കൽ തന്നേ അവസാനം’ പറയു​ന്ന​വ​നായ ദൈവം എന്ന ആശയത്തെ സ്‌നേ​ഹ​സ​മ്പ​ന്ന​നായ ദൈവം എന്ന ആശയവു​മാ​യി പൊരു​ത്ത​പ്പെ​ടു​ത്താൻ എങ്ങനെ കഴിയും എന്നതാ​യി​രു​ന്നു അവർ പരിഹ​രി​ക്കാൻ ശ്രമിച്ച ഒരു പ്രശ്‌നം. (യെശയ്യാ​വു 46:10; 1 യോഹ​ന്നാൻ 4:8) ആരംഭ​ത്തിൽത്തന്നെ ദൈവ​ത്തിന്‌ അവസാനം അറിയാ​മാ​യി​രു​ന്നെ​ങ്കിൽ, തീർച്ച​യാ​യും അവന്‌ പാപത്തി​ലേ​ക്കുള്ള മനുഷ്യ​ന്റെ വീഴ്‌ച​യെ​യും അതിന്റെ ദുരന്ത​പൂർണ​മായ പരിണത ഫലങ്ങ​ളെ​യും കുറിച്ച്‌ മുൻകൂ​ട്ടി അറിയാ​മാ​യി​രു​ന്നി​രി​ക്കണം എന്ന്‌ അവർ ന്യായ​വാ​ദം ചെയ്‌തു.

എന്നാൽ, മനസ്സിൽ പിടി​ക്കേണ്ട സുപ്ര​ധാന സംഗതി​ക​ളിൽ ഒന്ന്‌ ഇച്ഛാസ്വാ​ത​ന്ത്ര്യം എന്ന ആശയം ആണെന്ന്‌ പ്രഗത്ഭ​രായ ആദ്യകാല ക്രിസ്‌തീയ എഴുത്തു​കാ​രിൽ ഒരുവ​നാ​യി​രുന്ന ഓറിജൻ വാദിച്ചു. “മനുഷ്യന്‌ ഇച്ഛാസ്വ​ത​ന്ത്ര്യം ഉണ്ടെന്നു വളരെ വ്യക്തമാ​യി കാണി​ക്കുന്ന നിരവധി ഭാഗങ്ങൾ തീർച്ച​യാ​യും തിരു​വെ​ഴു​ത്തു​ക​ളിൽ ഉണ്ട്‌,” അദ്ദേഹം എഴുതി.

നമ്മുടെ പ്രവൃ​ത്തി​കൾക്ക്‌ ഉത്തരവാ​ദി ബാഹ്യ​മായ ഏതോ ശക്തിയാ​ണെന്നു പറയു​ന്നത്‌ “ശരിയോ ന്യായ​യു​ക്ത​മോ അല്ല. പ്രത്യുത, അത്‌ ഇച്ഛാസ്വാ​ത​ന്ത്ര്യം എന്ന ആശയത്തെ എതിർക്കാൻ ആഗ്രഹി​ക്കുന്ന ഒരു വ്യക്തി​യു​ടെ കണ്ടുപി​ടി​ത്ത​മാണ്‌” എന്ന്‌ ഓറിജൻ പറഞ്ഞു. ഓരോ​രോ കാലത്തും എന്തൊക്കെ സംഭവി​ക്കു​മെന്നു മുൻകൂ​ട്ടി അറിയാൻ ദൈവ​ത്തി​നു സാധി​ക്കു​മെ​ങ്കി​ലും, അവൻ ഒരു പ്രത്യേക സംഭവം നടക്കാൻ ഇടയാ​ക്കു​ക​യോ അല്ലെങ്കിൽ അതു സംഭവി​ക്കാൻ തക്കവണ്ണം എന്തെങ്കി​ലും കരുക്കൾ നീക്കു​ക​യോ ചെയ്യുന്നു എന്ന്‌ അതിന്‌ അർഥമി​ല്ലെന്ന്‌ ഓറിജൻ വാദിച്ചു. എന്നാൽ എല്ലാവ​രും അതി​നോ​ടു യോജി​ച്ചില്ല.

സഭാപി​താ​വാ​യി​രുന്ന അഗസ്റ്റിൻ, ജീവി​ത​ത്തി​ലു​ണ്ടാ​കുന്ന കാര്യ​ങ്ങ​ളിൽ ഇച്ഛാസ്വാ​ത​ന്ത്ര്യ​ത്തി​നുള്ള പങ്കിനെ കുറച്ചു​കാ​ണി​ച്ചു​കൊണ്ട്‌ (പൊ.യു. 354-430) ഈ വാദഗ​തി​യെ സങ്കീർണ​മാ​ക്കി. ജനസ്വാ​ധീ​ന​മുള്ള ഒരു വ്യക്തി​യാ​യി​രുന്ന അദ്ദേഹം, ക്രൈ​സ്‌ത​വ​ലോ​ക​ത്തിൽ മുൻനിർണയ വിശ്വാ​സ​ത്തി​നു ദൈവ​ശാ​സ്‌ത്ര​പ​ര​മായ അടിസ്ഥാ​നം നൽകി. അദ്ദേഹ​ത്തി​ന്റെ കൃതികൾ, വിശേ​ഷി​ച്ചും ദെ ലിബെ​റോ ആർബി​റ്റ്‌റ്യോ, മധ്യയു​ഗ​ങ്ങ​ളിൽ വളരെ​യ​ധി​കം വിവാ​ദ​ങ്ങൾക്കു വഴി​തെ​ളി​ച്ചു. ഇത്‌ മതനവീ​ക​ര​ണ​ത്തിൽ കലാശി​ച്ചു. മുൻനിർണയം എന്ന പഠിപ്പി​ക്ക​ലി​നെ​പ്രതി ക്രൈ​സ്‌ത​വ​ലോ​ക​ത്തിൽ വലിയ പിളർപ്പു​ണ്ടാ​കു​ക​യും ചെയ്‌തു.a

വ്യാപ​ക​മായ വിശ്വാ​സം

വിധി​വി​ശ്വാ​സ​വു​മാ​യി ബന്ധപ്പെട്ട ആശയങ്ങൾ പാശ്ചാത്യ ലോകത്തു മാത്രം ഒതുങ്ങി നിൽക്കു​ന്നില്ല. ദുരന്തങ്ങൾ ഉണ്ടാകു​മ്പോൾ, അതു തലയിൽ വരച്ചി​രി​ക്കു​ന്ന​താണ്‌ എന്ന അർഥത്തിൽ മെക്‌തൂബ്‌ എന്ന പദം മുസ്ലീങ്ങൾ ഉപയോ​ഗി​ക്കാ​റുണ്ട്‌. ഇത്‌ വിധി​യി​ലുള്ള അവരുടെ വിശ്വാ​സം പ്രകട​മാ​ക്കു​ന്നു. പൂർവ ദേശത്തെ പല മതങ്ങളും, ഒരു വ്യക്തി​യു​ടെ ജീവി​ത​ത്തി​ലു​ണ്ടാ​കുന്ന കാര്യ​ങ്ങ​ളിൽ അയാൾക്കുള്ള പങ്കിനെ ഊന്നി​പ്പ​റ​യു​ന്നു എന്നതു ശരിയാ​ണെ​ങ്കി​ലും അവയുടെ പഠിപ്പി​ക്ക​ലു​ക​ളിൽ വിധി​വി​ശ്വാ​സ​ത്തി​ന്റെ തെളി​വു​കൾ കാണാം.

ഉദാഹ​ര​ണ​ത്തിന്‌, മുജ്ജന്മ പ്രവൃ​ത്തി​ക​ളു​ടെ ഫലം അനുഭ​വി​ക്കേ​ണ്ടത്‌ അനിവാ​ര്യ​മാ​ണെന്ന വിശ്വാ​സ​മാണ്‌ ഹിന്ദു​മ​ത​ത്തി​ലെ​യും ബുദ്ധമ​ത​ത്തി​ലെ​യും കർമഫല സിദ്ധാ​ന്ത​ത്തിന്‌ ആധാരം. ചൈന​യിൽ കണ്ടെത്തി​യി​ട്ടുള്ള ഏറ്റവും പുരാ​ത​ന​മായ ലിഖി​തങ്ങൾ ഭാവി​കഥന വിദ്യക്ക്‌ ഉപയോ​ഗി​ച്ചി​രുന്ന ആമയുടെ തോടി​ന്മേ​ലു​ള്ള​വ​യാണ്‌. അമേരി​ക്കൻ ഭൂഖണ്ഡ​ങ്ങ​ളി​ലെ ആദിവാ​സി​കൾക്കും വിധി​വി​ശ്വാ​സം ഉണ്ടായി​രു​ന്നു. ഉദാഹ​ര​ണ​ത്തിന്‌ ആസ്‌ടെ​ക്കു​കാർ വ്യക്തി​ക​ളു​ടെ ഭാവി കാണി​ക്കുന്ന ഭാവി​കഥന കലണ്ടറു​കൾ ഉണ്ടാക്കി​യി​രു​ന്നു. വിധി​വി​ശ്വാ​സം ആഫ്രി​ക്ക​യി​ലും സർവസാ​ധാ​ര​ണ​മാണ്‌.

വിധി​വി​ശ്വാ​സ​ത്തി​നു പരക്കെ​യുള്ള അംഗീ​കാ​രം വാസ്‌ത​വ​ത്തിൽ ഒരു ഉയർന്ന ശക്തിയിൽ വിശ്വ​സി​ക്കാ​നുള്ള അടിസ്ഥാ​ന​പ​ര​മായ ആവശ്യം മനുഷ്യ​നു​ണ്ടെന്നു കാണി​ക്കു​ന്നു. മനുഷ്യ​ന്റെ മതങ്ങൾ എന്ന തന്റെ ഇംഗ്ലീഷ്‌ പുസ്‌ത​ക​ത്തിൽ ജോൺ ബി. നോസ്‌ സമ്മതി​ക്കു​ന്നു: “മനുഷ്യന്‌ തന്നെത്താൻ സ്ഥിതി ചെയ്യാൻ കഴിയി​ല്ലെ​ന്നും അവൻ തന്നെത്താൻ അല്ല സ്ഥിതി ചെയ്യു​ന്ന​തെ​ന്നും എല്ലാ മതങ്ങളും ഒരു വിധത്തിൽ അല്ലെങ്കിൽ മറ്റൊരു വിധത്തിൽ പറയു​ന്നുണ്ട്‌. പ്രകൃ​തി​ശ​ക്തി​ക​ളു​മാ​യും ചുറ്റു​മുള്ള സമൂഹ​വു​മാ​യും അവന്‌ അഭേദ്യ​മായ ബന്ധമുണ്ട്‌. അവൻ അവയെ ആശ്രയി​ക്കു​ന്നു. ലോക​ത്തിൽനി​ന്നു വേറിട്ടു നിൽക്കാൻ കഴിയുന്ന സ്വത​ന്ത്ര​മായ ഒരു കേന്ദ്ര ശക്തിയല്ല താൻ എന്ന ബോധം അസ്‌പ​ഷ്ട​മാ​യോ പ്രസ്‌പ​ഷ്ട​മാ​യോ അവനുണ്ട്‌.”

ദൈവ​ത്തിൽ വിശ്വ​സി​ക്കു​ക​യെന്ന ആവശ്യ​ത്തി​നു പുറമേ, നമുക്കു ചുറ്റും നടക്കുന്ന കാര്യ​ങ്ങളെ കുറിച്ച്‌ അറിയാ​നുള്ള അടിസ്ഥാ​ന​പ​ര​മായ ഒരു ആവശ്യ​വും നമുക്കുണ്ട്‌. എങ്കിലും, സർവശ​ക്ത​നായ ഒരു സ്രഷ്ടാ​വി​നെ അംഗീ​ക​രി​ക്കു​ന്ന​തും മാറ്റം വരുത്താ​നാ​കാത്ത വിധത്തിൽ അവൻ നമ്മുടെ വിധി നിശ്ചയി​ച്ചി​രി​ക്കു​ന്നു എന്നു വിശ്വ​സി​ക്കു​ന്ന​തും തമ്മിൽ വ്യത്യാ​സ​മുണ്ട്‌. നമ്മുടെ ഭാവി രൂപ​പ്പെ​ടു​ത്തു​ന്ന​തിൽ നമുക്ക്‌ എന്തു പങ്കുണ്ട്‌? അതിൽ ദൈവ​ത്തിന്‌ എന്തു പങ്കാണു​ള്ളത്‌?

[അടിക്കു​റി​പ്പു​കൾ]

[5-ാം പേജിലെ ചിത്രം]

ഒരു ബാബി​ലോ​ണി​യൻ ജ്യോ​തിഷ കലണ്ടർ, പൊ.യു.മു. 1000

[കടപ്പാട്‌]

Musée du Louvre, Paris

[7-ാം പേജിലെ ചിത്രം]

മൂന്നു ദേവി​മാർ മനുഷ്യ​ന്റെ ഭാവി നിശ്ചയി​ച്ചു​റ​പ്പി​ച്ചി​രി​ക്കു​ന്ന​താ​യി ഗ്രീക്കു​കാ​രും റോമാ​ക്കാ​രും വിശ്വ​സി​ച്ചി​രു​ന്നു

[കടപ്പാട]

Musée du Louvre, Paris

[7-ാം പേജിലെ ചിത്രം]

ഈജിപ്‌തിലെ ഐസിസ്‌, “വിധി​യു​ടെ​യും ഭാവി​യു​ടെ​യും ഭരണാ​ധി​കാ​രി​ണി” ആണ്‌

[കടപ്പാട്‌]

Musée du Louvre, Paris

[8-ാം പേജിലെ ചിത്രം]

ഭാവികഥനത്തിനായി ഉപയോ​ഗി​ച്ചി​രുന്ന ആമത്തോ​ടി​ന്മേ​ലുള്ള പുരാതന ചൈനീസ്‌ ലിഖി​ത​ങ്ങൾ

[കടപ്പാട്‌]

Institute of History and Philology, Academia Sinica, Taipei

[8-ാം പേജിലെ ചിത്രം]

ഈ പേർഷ്യൻ പെട്ടി​മേൽ കാണു​ന്നത്‌ രാശി​ചക്ര ചിഹ്നങ്ങ​ളാണ്‌

[കടപ്പാട്‌]

Photograph taken by courtesy of the British Museum