യുവജ​നങ്ങൾ ചോദി​ക്കു​ന്നു . . .

എനിക്ക്‌ ഒരു മൊ​ബൈൽ ഫോൺ ആവശ്യ​മു​ണ്ടോ?

“മൊ​ബൈൽ ഫോൺ കയ്യിലി​ല്ലെ​ങ്കിൽ എനിക്കാ​കെ അരക്ഷി​ത​ത്വ​വും അസ്വസ്ഥ​ത​യും തോന്നും.”—ഓക്കി​കൊ.a

മിക്ക ദേശങ്ങ​ളി​ലും മൊ​ബൈൽ ഫോണു​കൾക്ക്‌ പ്രചാരം ഏറിവ​രി​ക​യാണ്‌. അവ കൊണ്ടു​ന​ട​ക്കാൻ വളരെ സൗകര്യ​മാണ്‌. ഏതു സമയത്തും എവിടെ വെച്ചും നിങ്ങളു​ടെ കൂട്ടു​കാർക്കും മാതാ​പി​താ​ക്കൾക്കും നിങ്ങളു​മാ​യി ബന്ധപ്പെ​ടാം—നിങ്ങൾക്ക​ങ്ങോ​ട്ടും. ചിലതരം മൊ​ബൈൽ ഫോണു​ക​ളിൽ നിങ്ങൾക്കു പരസ്‌പരം കൊച്ചു​കൊ​ച്ചു സന്ദേശങ്ങൾ ടൈപ്പ്‌ ചെയ്‌ത്‌ അയയ്‌ക്കാം. “യുവജ​ന​ങ്ങ​ളു​ടെ ആശയവി​നി​മ​യ​ത്വ​രയെ തൃപ്‌തി​പ്പെ​ടു​ത്താ​നുള്ള ഏറ്റവും പുതിയ മാർഗ”മാണ്‌ ഇത്‌ എന്ന്‌ ലണ്ടന്റെ ദ ടൈംസ്‌ അഭി​പ്രാ​യ​പ്പെ​ടു​ന്നു. നിങ്ങളെ ഇന്റർനെ​റ്റു​മാ​യി പോലും ബന്ധിപ്പി​ക്കാൻ കഴിവുള്ള മൊ​ബൈൽ ഫോണു​കൾ ഉണ്ട്‌, അവ ഉപയോ​ഗി​ച്ചു വെബ്‌​സൈ​റ്റു​ക​ളി​ലേക്കു പ്രവേ​ശി​ക്കാ​നും ഇ-മെയിൽ അയയ്‌ക്കാ​നും നിങ്ങൾക്കു കഴിയും.

നിങ്ങൾക്ക്‌ ഇപ്പോൾത്തന്നെ ഒരു മൊ​ബൈൽ ഫോൺ ഉണ്ടായി​രി​ക്കാം, അല്ലെങ്കിൽ ഒരെണ്ണം വാങ്ങാൻ ആലോ​ചി​ക്കു​ന്നു​ണ്ടാ​വാം. എന്തായി​രു​ന്നാ​ലും, “ഒരു നാണയ​ത്തി​നു രണ്ടു വശങ്ങളുണ്ട്‌” എന്ന പഴമൊ​ഴി നിങ്ങൾ ഓർക്കേ​ണ്ട​തുണ്ട്‌. മൊ​ബൈൽ ഫോൺകൊ​ണ്ടു ചില പ്രയോ​ജ​നങ്ങൾ ഉണ്ടെന്നു​ള്ളതു ശരിയാണ്‌. എന്നുവ​രി​കി​ലും, നാണയ​ത്തി​ന്റെ മറുവ​ശ​ത്തെ​ക്കു​റി​ച്ചും ചിന്തി​ക്കു​ന്നതു നന്നായി​രി​ക്കും. കാരണം, നിങ്ങൾ ഒരെണ്ണം വാങ്ങാൻ തന്നെ തീരു​മാ​നി​ക്കു​ന്നെ​ങ്കിൽ പോലും, ഉണ്ടാകാ​വുന്ന കുഴപ്പ​ങ്ങ​ളെ​ക്കു​റി​ച്ചു ചിന്തി​ക്കു​ന്നത്‌ അതു ജ്ഞാനപൂർവം ഉപയോ​ഗി​ക്കാൻ നിങ്ങളെ സഹായി​ക്കും.

“ചെലവു കണക്കു​കൂ​ട്ടി​നോ​ക്കുക”

ഒരു സുപ്ര​ധാന പദ്ധതി ഏറ്റെടു​ക്കു​ന്ന​തി​നു മുമ്പ്‌, അതിനു വരാവുന്ന ‘ചെലവു കണക്കു​കൂ​ട്ടി​നോ​ക്കണ’മെന്ന ജ്ഞാനപൂർവ​ക​മായ തത്ത്വം യേശു നൽകു​ക​യു​ണ്ടാ​യി. (ലൂക്കൊസ്‌ 14:28, പി.ഒ.സി. ബൈബിൾ) മൊ​ബൈൽ ഫോണി​ന്റെ കാര്യ​ത്തിൽ ആ തത്ത്വം ബാധക​മാ​കു​മോ? തീർച്ച​യാ​യും. നിങ്ങൾക്ക്‌ ഒരു മൊ​ബൈൽ ഫോൺ വളരെ നിസ്സാ​ര​വി​ല​യ്‌ക്കോ അല്ലെങ്കിൽ സൗജന്യ​മാ​യോ ലഭി​ച്ചേ​ക്കാം. എന്നിരു​ന്നാ​ലും, 17 വയസ്സുള്ള ഹെന്ന പറയു​ന്നത്‌ ശ്രദ്ധി​ക്കുക: “ഫോൺ ബിൽ എത്ര പെട്ടെ​ന്നാ​ണു കുതി​ച്ചു​യ​രു​ന്നത്‌.” മാത്രമല്ല, കൂടുതൽ സവി​ശേ​ഷ​ത​ക​ളുള്ള, വില​യേ​റിയ മോഡ​ലു​കൾ വാങ്ങാ​നുള്ള നിരന്തര സമ്മർദ​വും നിങ്ങൾക്കു​ണ്ടാ​യി​രി​ക്കും. ഹിറോ​ഷി ഇപ്രകാ​രം പറയുന്നു: “എനി​ക്കൊ​രു അംശകാല ജോലി​യുണ്ട്‌, എല്ലാ വർഷവും പുതിയ പുതിയ മോഡ​ലു​കൾ വാങ്ങാ​നാ​യി ഞാൻ പണം കൂട്ടി​വെ​ക്കു​ന്നു.” മിക്ക ചെറു​പ്പ​ക്കാ​രും ഇതു തന്നെയാ​ണു ചെയ്യു​ന്നത്‌.b

ഇനി, മാതാ​പി​താ​ക്കൾ നിങ്ങളു​ടെ ഫോൺ ബിൽ അടയ്‌ക്കാ​മെന്നു സമ്മതി​ച്ചാൽത്തന്നെ അതിന്റെ ചെലവു തിരി​ച്ച​റി​യു​ന്നതു പ്രധാ​ന​മാണ്‌. ജപ്പാനി​ലെ ക്രിസ്‌തീയ ശുശ്രൂ​ഷ​ക​നായ ഒരു സഞ്ചാര മേൽവി​ചാ​രകൻ പിൻവ​രു​ന്ന​പ്ര​കാ​രം പ്രസ്‌താ​വി​ച്ചു. “തങ്ങളുടെ കുട്ടി​ക​ളു​ടെ മൊ​ബൈൽ ഫോൺ ബിൽ അടയ്‌ക്കു​ന്ന​തി​നാ​യി മാത്രം ചില അമ്മമാർക്ക്‌ സാധാരണ ജോലി​സ​മ​യ​ത്തി​നു ശേഷം വേറെ എന്തെങ്കി​ലും തൊഴിൽകൂ​ടെ ചെയ്യേണ്ടി വരുന്നു. വാസ്‌ത​വ​ത്തിൽ കുട്ടി​കൾക്ക്‌ മൊ​ബൈൽ ഫോണി​ന്റെ ആവശ്യം പോലും ഉണ്ടായി​രി​ക്കില്ല.” നിങ്ങളു​ടെ മാതാ​പി​താ​ക്ക​ളു​ടെ​മേൽ അത്തര​മൊ​രു ഭാരം ചുമത്താൻ നിങ്ങൾ ആഗ്രഹി​ക്കി​ല്ലെ​ന്നു​ള്ളതു തീർച്ച​യാണ്‌!

“ഒരു സമയം​കൊ​ല്ലി”

തങ്ങളുടെ മൊ​ബൈൽ ഫോണു​കൾ മിതമായ രീതി​യിൽ ഉപയോ​ഗി​ക്കാൻ ആരംഭിച്ച പലരും, തങ്ങൾ പ്രതീ​ക്ഷി​ച്ച​തി​ലേറെ സമയം അതു കവർന്നെ​ടു​ക്കു​ന്ന​താ​യി തിരി​ച്ച​റി​യാ​നി​ട​യുണ്ട്‌. പ്രാധാ​ന്യ​മേ​റിയ കാര്യ​ങ്ങൾക്കുള്ള സമയം അതു കവർന്നു കളയുന്നു. മീക്കാ തന്റെ കുടും​ബാം​ഗ​ങ്ങ​ളോ​ടൊത്ത്‌ അത്താഴ​മേ​ശ​യിൽ ധാരാളം സമയം ചെലവ​ഴി​ക്കു​മാ​യി​രു​ന്നു. എന്നാൽ “ഇപ്പോൾ, ഭക്ഷണം കഴിഞ്ഞാ​ലു​ടൻ ഞങ്ങൾ അവരവ​രു​ടെ മൊ​ബൈൽ ഫോണു​ക​ളു​മാ​യി സ്വന്തം മുറി​ക​ളി​ലേക്കു പോകു​ന്നു” എന്ന്‌ അവൾ പറയുന്നു.

“പതിനാ​റി​നും ഇരുപ​തി​നും ഇടയ്‌ക്കു പ്രായ​മുള്ള യുവജ​ന​ങ്ങ​ളിൽ മൂന്നി​ലൊ​രു ഭാഗം, മറ്റെല്ലാ ലിഖിത ആശയവി​നി​മയ ഉപാധി​ക​ളെ​ക്കാ​ളും അധികം ഇഷ്ടപ്പെ​ടു​ന്നത്‌ ഫോണി​ലൂ​ടെ ലിഖിത സന്ദേശങ്ങൾ അയയ്‌ക്കാ​നാണ്‌” എന്ന്‌ ലണ്ടന്റെ ദ ഗാർഡി​യൻ പറയുന്നു. ലിഖിത സന്ദേശ​ങ്ങൾക്കു നേരി​ട്ടുള്ള സംഭാ​ഷ​ണ​ത്തെ​ക്കാൾ പണച്ചെ​ലവു കുറവാ​യി​രു​ന്നേ​ക്കാം, എന്നാൽ അതു ടൈപ്‌ ചെയ്യാൻ നിങ്ങൾക്കു കൂടുതൽ സമയം ചെലവാ​കു​ന്നു. മീയേ​ക്കോ ഇങ്ങനെ സമ്മതിച്ചു പറയുന്നു: “ആരെങ്കി​ലും എനിക്ക്‌ ‘ഗുഡ്‌​നൈറ്റ്‌’ എന്ന്‌ എഴുതി അയച്ചാൽ ഞാനും അങ്ങനെ​തന്നെ മറുപടി അയയ്‌ക്കും. പിന്നെ ഒരു മണിക്കൂ​റോ​ളം സന്ദേശങ്ങൾ അങ്ങോ​ട്ടു​മി​ങ്ങോ​ട്ടും പ്രവഹി​ച്ചു​കൊ​ണ്ടി​രി​ക്കും. അതാകട്ടെ, ഒരു കഴമ്പു​മി​ല്ലാത്ത കാര്യ​ങ്ങ​ളാ​യി​രി​ക്കും.”

മൊ​ബൈൽ ഫോൺ ഉപയോ​ഗി​ക്കുന്ന പലരും, തങ്ങൾ ഒരു മാസം അതിനാ​യി ചെലവ​ഴിച്ച സമയം ഒന്നു കൂട്ടി നോക്കു​ക​യാ​ണെ​ങ്കിൽ അതിശ​യി​ച്ചു​പോ​യേ​ക്കാം. തേജ എന്ന പത്തൊ​മ്പ​തു​കാ​രി പിൻവ​രു​ന്ന​പ്ര​കാ​രം സമ്മതിച്ചു പറഞ്ഞു: “പലരു​ടെ​യും കാര്യ​ത്തിൽ മൊ​ബൈൽ ഫോണു​കൾ സമയം ലാഭി​ക്കാൻ സഹായി​ക്കു​ന്ന​തി​നു പകരം സമയം നഷ്ടമാ​കാൻ ഇടയാ​ക്കു​ക​യാ​ണു ചെയ്യു​ന്നത്‌.” ഇനി ഒരു മൊ​ബൈൽ ഫോൺ ഉണ്ടായി​രി​ക്കേണ്ട സാഹച​ര്യ​മാണ്‌ നിങ്ങൾക്കു​ള്ള​തെ​ങ്കിൽ പോലും, അത്‌ ഉപയോ​ഗി​ക്കു​മ്പോൾ സമയ​ബോ​ധം ഉള്ളവരാ​യി​രി​ക്കേ​ണ്ടതു പ്രധാ​ന​മാണ്‌.

മാര്യ എന്ന ക്രിസ്‌തീയ പെൺകു​ട്ടി ഇപ്രകാ​രം അഭി​പ്രാ​യ​പ്പെട്ടു: “ക്രിസ്‌തീയ സമ്മേള​ന​ങ്ങ​ളിൽ നിരവധി യുവജ​നങ്ങൾ മറ്റുള്ള​വർക്കു വെറും നിസ്സാര കാര്യ​ങ്ങളെ കുറിച്ച്‌ സന്ദേശങ്ങൾ അയച്ചു​കൊ​ണ്ടേ​യി​രി​ക്കു​ന്നു. ഇതു വളരെ സാധാ​ര​ണ​മാ​യി തീർന്നി​രി​ക്കു​ക​യാണ്‌!” ക്രിസ്‌തീയ ശുശ്രൂ​ഷ​യിൽ ഏർപ്പെ​ട്ടി​രി​ക്കു​മ്പോ​ഴും ചില യുവ​പ്രാ​യ​ക്കാർ ഇപ്രകാ​രം ചെയ്യു​ന്ന​താ​യി നിരീ​ക്ഷി​ക്ക​പ്പെ​ട്ടി​ട്ടുണ്ട്‌. ആത്മീയ പ്രവർത്ത​ന​ങ്ങൾക്കാ​യി സമയം വിലയ്‌ക്കു വാങ്ങണ​മെന്ന്‌ ബൈബിൾ ക്രിസ്‌ത്യാ​നി​കളെ ഉദ്‌ബോ​ധി​പ്പി​ക്കു​ന്നു. (എഫെ. 5:16, NW) എന്നാൽ അത്തരം വിലപ്പെട്ട സമയം ടെലി​ഫോൺ സംഭാ​ഷ​ണ​ങ്ങൾക്കാ​യി വിനി​യോ​ഗി​ക്കു​ന്നത്‌ എത്ര ഖേദക​ര​മാണ്‌!

രഹസ്യ സംഭാ​ഷ​ണ​ങ്ങൾ

മാരിയേ എന്ന യുവതി മറ്റൊരു കെണിയെ കുറിച്ചു പറയുന്നു: “ഫോൺ കോളു​കൾ വ്യക്തിക്കു നേരിട്ടു ലഭിക്കു​ന്ന​തി​നാൽ, തങ്ങളുടെ കുട്ടികൾ ആരോ​ടാ​ണു സംസാ​രി​ക്കു​ന്നത്‌ എന്ന്‌ മാതാ​പി​താ​ക്കൾക്കു മനസ്സി​ലാ​യെന്നു വരില്ല. എന്തിന്‌, കുട്ടികൾ ഫോണി​ലൂ​ടെ സംസാ​രി​ച്ചു​കൊ​ണ്ടി​രി​ക്കുന്ന കാര്യം​തന്നെ ചില​പ്പോൾ അവർ തിരി​ച്ച​റി​യു​ക​യില്ല.” ഇപ്രകാ​രം ചില യുവജ​നങ്ങൾ വിപരീത ലിംഗ​വർഗ​ത്തിൽ പെട്ടവ​രു​മാ​യി രഹസ്യ ബന്ധങ്ങൾ സ്ഥാപി​ക്കാൻ മൊ​ബൈൽ ഫോണു​കൾ ഉപയോ​ഗി​ക്കു​ന്നു. ചിലരാ​കട്ടെ, സാധാ​ര​ണ​ഗ​തി​യിൽ മറ്റുള്ള​വ​രു​മാ​യി ആശയവി​നി​മയം നടത്തു​മ്പോൾ പാലി​ക്കാ​റുള്ള നിലവാ​രങ്ങൾ മറന്നു​കൊണ്ട്‌ പ്രവർത്തി​ക്കു​ന്നു. അതെങ്ങനെ?

“[യുവ​പ്രാ​യ​ക്കാർ] ചെയ്യു​ന്നത്‌ എന്താ​ണെന്ന്‌ ആർക്കും നിരീ​ക്ഷി​ക്കാൻ കഴിയില്ല എന്നതാണു ലിഖിത സന്ദേശ​ത്തി​ന്റെ ഒരു പ്രശ്‌നം” എന്ന്‌ ലണ്ടന്റെ ദ ഡെയ്‌ലി ടെല​ഗ്രാഫ്‌ പറയുന്നു. അങ്ങേത്ത​ല​യ്‌ക്ക​ലുള്ള ആളെ കാണാ​നോ അയാൾ പറയു​ന്നതു കേൾക്കാ​നോ കഴിയി​ല്ലെ​ന്നു​ള്ള​തും പ്രശ്‌നം സൃഷ്ടി​ക്കു​ന്നു. ടിമൊ പറയുന്നു: “ലിഖിത സന്ദേശം അയയ്‌ക്കു​ന്ന​തി​നെ നേരി​ട്ടുള്ള സംഭാ​ഷണം ഒഴിവാ​ക്കാൻ സഹായി​ക്കുന്ന ഒരു ആശയവി​നി​മയ മാർഗ​മാ​യി ചിലർ കാണുന്നു. അതു​കൊ​ണ്ടു​തന്നെ മുഖത്തു​നോ​ക്കി പറയാൻ മടിക്കുന്ന കാര്യങ്ങൾ എഴുതി അറിയി​ക്കാൻ അവർ ധൈര്യ​പ്പെ​ടു​ന്നു.”

പതി​നേ​ഴു വയസ്സുള്ള കെയ്‌കോ എന്ന ക്രിസ്‌തീയ പെൺകു​ട്ടി മൊ​ബൈൽ ഫോൺ ഉപയോ​ഗി​ച്ചു തുടങ്ങി​യ​പ്പോൾ, കൂട്ടു​കാ​രിൽ മിക്കവർക്കും തന്റെ നമ്പർ നൽകി. അധികം വൈകാ​തെ സ്വന്തം സഭയി​ലുള്ള ഒരു ആൺകു​ട്ടി​യു​മാ​യി അവൾ നിത്യേന സന്ദേശങ്ങൾ കൈമാ​റാൻ തുടങ്ങി. കെയ്‌കോ പറയുന്നു: “ആദ്യ​മൊ​ക്കെ ഞങ്ങൾ സാധാരണ കാര്യ​ങ്ങളെ പറ്റിയാ​യി​രു​ന്നു സംസാ​രി​ച്ചി​രു​ന്നത്‌. പിന്നെ ഞങ്ങൾ പരസ്‌പരം പ്രശ്‌നങ്ങൾ പങ്കു​വെ​ക്കാൻ തുടങ്ങി. അങ്ങനെ മൊ​ബൈൽ ഫോണി​ലൂ​ടെ ഞങ്ങൾ ഞങ്ങളു​ടേ​തായ ഒരു കൊച്ചു​ലോ​കം സൃഷ്ടി​ച്ചെ​ടു​ത്തു.”

സന്തോ​ഷ​ക​ര​മെ​ന്നു പറയട്ടെ, കാര്യങ്ങൾ വഷളാ​കു​ന്ന​തി​നു മുമ്പ്‌ മാതാ​പി​താ​ക്ക​ളിൽ നിന്നും ക്രിസ്‌തീയ മൂപ്പന്മാ​രിൽ നിന്നും അവൾക്കു സഹായം ലഭിച്ചു. അവൾ ഇങ്ങനെ സമ്മതിച്ചു പറയുന്നു: “എനി​ക്കൊ​രു മൊ​ബൈൽ ഫോൺ തരുന്ന​തി​നു മുമ്പു തന്നെ, വിപരീത ലിംഗ​വർഗ​ത്തിൽപ്പെ​ട്ട​വ​രു​മാ​യി സന്ദേശങ്ങൾ കൈമാ​റു​ന്നതു സംബന്ധിച്ച്‌ എന്റെ മാതാ​പി​താ​ക്കൾ വളരെ​യ​ധി​കം മുന്നറി​യി​പ്പു​കൾ നൽകി​യി​രു​ന്നു. പക്ഷേ ഞാൻ എല്ലാ ദിവസ​വും അവനു മെയിൽ അയച്ചു​കൊ​ണ്ടി​രു​ന്നു. ഞാൻ അത്തരത്തിൽ ഫോൺ ദുരു​പ​യോ​ഗം ചെയ്യാൻ പാടി​ല്ലാ​യി​രു​ന്നു.”c

‘നല്ല മനസ്സാ​ക്ഷി​യു​ള്ള​വ​രാ​യി​രി​പ്പിൻ’ എന്നു ബൈബിൾ നമ്മെ ഉദ്‌ബോ​ധി​പ്പി​ക്കു​ന്നു. (1 പത്രൊസ്‌ 3:16) മൊ​ബൈൽ ഫോൺ ഉപയോ​ഗി​ക്കവേ ഈ ബുദ്ധി​യു​പ​ദേശം പിൻപ​റ്റു​ന്നെ​ങ്കിൽ, കോയ്‌ചീ പറയു​ന്ന​തു​പോ​ലെ, ആരെങ്കി​ലും നിങ്ങളു​ടെ സന്ദേശങ്ങൾ കണ്ടാലോ, നിങ്ങളു​ടെ സംഭാ​ഷണം കേട്ടാ​ലോ “നിങ്ങൾക്കു ലജ്ജിക്കേണ്ട കാര്യ​മില്ല.” നമ്മുടെ സ്വർഗീയ പിതാ​വി​ന്റെ മുമ്പാകെ യാതൊ​രു രഹസ്യ​വു​മില്ല എന്ന സംഗതി എല്ലായ്‌പോ​ഴും ഓർക്കുക. ബൈബിൾ ഇപ്രകാ​രം പറയുന്നു: “അവനു മറഞ്ഞി​രി​ക്കുന്ന യാതൊ​രു സൃഷ്ടി​യു​മില്ല, സകലവും അവന്റെ കണ്ണിനു നഗ്നവും മലർന്ന​തു​മാ​യി കിടക്കു​ന്നു, അവനു​മാ​യി​ട്ടാ​കു​ന്നു നമുക്കു കാര്യ​മു​ള്ളതു.” (എബ്രായർ 4:13) പിന്നെ​യെ​ന്തിന്‌ ഒരു രഹസ്യ ബന്ധം വെച്ചു​പു​ലർത്താൻ ശ്രമി​ക്കണം?

പരിധി​കൾ വെക്കുക

ഒരു മൊ​ബൈൽ ഫോൺ വാങ്ങാൻ ഉദ്ദേശി​ക്കു​ന്നെ​ങ്കിൽ, നിങ്ങൾക്ക്‌ ഒരെണ്ണം യഥാർഥ​ത്തിൽ ആവശ്യ​മു​ണ്ടോ എന്നു കാണാൻ സാഹച​ര്യ​ങ്ങളെ ശ്രദ്ധാ​പൂർവം വിലയി​രു​ത്ത​രു​തോ? ഇക്കാര്യം നിങ്ങളു​ടെ മാതാ​പി​താ​ക്ക​ളു​മാ​യി ചർച്ച ചെയ്യുക. യെന്നാ പറയു​ന്ന​തി​നോ​ടു ചിലർ യോജി​ച്ചേ​ക്കാം: “മൊ​ബൈൽ ഫോൺ ഉള്ളത്‌ മിക്ക യുവ​പ്രാ​യ​ക്കാ​രെ​യും സംബന്ധി​ച്ചി​ട​ത്തോ​ളം ഒരു ഭാരിച്ച ചുമത​ല​യാണ്‌.”

ഇനി നിങ്ങൾ ഒരെണ്ണം വാങ്ങുന്നു എന്നിരി​ക്കട്ടെ, അത്‌ ഉചിത​മായ രീതി​യിൽ ഉപയോ​ഗി​ക്കു​ന്നതു പ്രധാ​ന​മാണ്‌. എങ്ങനെ? ഉപയോ​ഗ​ത്തി​നു ന്യായ​മായ പരിധി​കൾ വെക്കുക. ഉദാഹ​ര​ണ​ത്തിന്‌, അതിലെ എല്ലാ സവി​ശേ​ഷ​ത​ക​ളും നിങ്ങൾ ഉപയോ​ഗി​ക്ക​ണ​മെ​ന്നില്ല, അതിനാ​യി ചെലവി​ടുന്ന പണവും സമയവും പരിമി​ത​പ്പെ​ടു​ത്തുക. നിങ്ങൾ ഫോൺ എത്രമാ​ത്രം ഉപയോ​ഗി​ച്ചു എന്നതു സംബന്ധി​ച്ചു മിക്ക കമ്പനി​ക​ളും വിശദ​മായ റിപ്പോർട്ടു​കൾ നൽകാ​റു​ള്ള​തു​കൊണ്ട്‌, ഇടയ്‌ക്കി​ടെ നിങ്ങളു​ടെ മാതാ​പി​താ​ക്ക​ളു​മാ​യി ഫോൺ ബിൽ വിശക​ലനം ചെയ്യുക. മുൻകൂ​ട്ടി ഒരു തുക അടച്ചതി​നു ശേഷം മൊ​ബൈൽ ഫോൺ ഉപയോ​ഗി​ക്കു​ന്നത്‌ അതിന്റെ ഉപയോ​ഗം നിയ​ന്ത്രി​ക്കാൻ പറ്റിയ ഒരു മാർഗ​മാ​യി ചിലർ കണ്ടെത്തി​യി​ട്ടുണ്ട്‌.

കൂടാതെ, ഫോൺവി​ളി​ക​ളോ​ടും സന്ദേശ​ങ്ങ​ളോ​ടും എപ്പോൾ, എങ്ങനെ പ്രതി​ക​രി​ക്കു​ന്നു എന്നതു സംബന്ധി​ച്ചു ജാഗ്ര​ത​യു​ള്ളവർ ആയിരി​ക്കുക. ഉചിത​മായ ഒരു മാർഗ​രേഖ നിങ്ങൾക്കു​തന്നെ ഉണ്ടാക്കാ​വു​ന്ന​താണ്‌. ഷിൻജി ഇപ്രകാ​രം പറയുന്നു: “ഞാൻ ദിവസ​ത്തിൽ ഒരു തവണയേ എനിക്കുള്ള സന്ദേശങ്ങൾ തുറന്നു നോക്കാ​റു​ള്ളൂ, വളരെ പ്രധാ​ന​പ്പെ​ട്ട​വ​യ്‌ക്കു മാത്രമേ സാധാരണ ഞാൻ മറുപടി അയയ്‌ക്കാ​റു​ള്ളൂ. അതു​കൊണ്ട്‌, എന്റെ കൂട്ടു​കാർ വെറുതേ അതുമി​തു​മൊ​ക്കെ എഴുതി അയയ്‌ക്കു​ന്നതു നിറുത്തി. എന്തെങ്കി​ലും അടിയ​ന്തിര പ്രശ്‌ന​മു​ണ്ടെ​ങ്കിൽ എന്തായാ​ലും അവർ എന്നെ വിളി​ക്കും.” അതിലും പ്രധാ​ന​മാ​യി, നിങ്ങൾ ആരുമാ​യി സംഭാ​ഷ​ണ​ത്തിൽ ഏർപ്പെ​ടു​ന്നു എന്ന കാര്യ​ത്തിൽ ശ്രദ്ധി​ക്കുക. നിങ്ങളു​ടെ ഫോൺ നമ്പർ മറ്റുള്ള​വർക്കു നൽകു​ന്ന​തിൽ ജാഗ്രത പാലി​ക്കുക. നല്ല സഹവാ​സ​ത്തി​ന്റെ കാര്യ​ത്തിൽ നിങ്ങൾ എല്ലായ്‌പോ​ഴും പിൻപ​റ്റുന്ന അതേ നിലവാ​രം ഇവി​ടെ​യും ബാധക​മാ​ക്കുക.—1 കൊരി​ന്ത്യർ 15:33, NW.

‘എല്ലാറ​റി​ന്നും ഒരു സമയമുണ്ട്‌. മിണ്ടാ​തി​രി​പ്പാൻ ഒരു കാലം, സംസാ​രി​പ്പാൻ ഒരു കാലം.’ (സഭാ​പ്ര​സം​ഗി 3:1, 7) സ്‌പഷ്ട​മാ​യും, മൊ​ബൈൽ ഫോണി​നും ‘മിണ്ടാ​തി​രി​പ്പാ​നുള്ള’ ഒരു സമയമുണ്ട്‌. നമ്മുടെ ക്രിസ്‌തീയ ശുശ്രൂ​ഷ​യും യോഗ​ങ്ങ​ളും ദൈവത്തെ ആരാധി​ക്കു​ന്ന​തി​നുള്ള ‘സമയമാണ്‌,’ അല്ലാതെ ഫോൺ ചെയ്യാ​നു​ള്ളതല്ല. ചില റസ്റ്ററന്റി​ന്റെ​യും, തീയേ​റ്റ​റി​ന്റെ​യു​മൊ​ക്കെ മാനേ​ജർമാർ തങ്ങളുടെ പതിവു​കാ​രോ​ടു പ്രസ്‌തുത സ്ഥലങ്ങളിൽ വെച്ചു മൊ​ബൈൽ ഫോൺ ഉപയോ​ഗി​ക്ക​രു​തെന്ന്‌ അഭ്യർഥി​ക്കാ​റുണ്ട്‌. അത്തരം അഭ്യർഥ​ന​കളെ നാം ആദര​വോ​ടെ മാനി​ക്കാ​റു​മുണ്ട്‌. അങ്ങനെ​യെ​ങ്കിൽ, അഖിലാണ്ഡ പരമാ​ധി​കാ​രി​യെ നാം അതി​ലേറെ ബഹുമാ​നി​ക്കേ​ണ്ട​തല്ലേ?

അതി​പ്ര​ധാ​ന സന്ദേശങ്ങൾ ഒന്നും പ്രതീ​ക്ഷി​ക്കു​ന്നി​ല്ലെ​ങ്കിൽ, പലരും തങ്ങളുടെ മൊ​ബൈൽ ഫോൺ ഓഫ്‌ ചെയ്‌തു വെക്കുന്നു. അല്ലെങ്കിൽ അത്യാ​വശ്യ പ്രവർത്ത​ന​ങ്ങ​ളിൽ ഏർപ്പെ​ട്ടി​രി​ക്കു​മ്പോൾ ശ്രദ്ധ പതറാ​തി​രി​ക്കാൻ അതു നിശ്ശബ്ദ​മാ​ക്കി വെക്കുന്നു. ചിലർ അത്‌ തങ്ങൾക്കു പെട്ടെന്ന്‌ എടുക്കാൻ പറ്റാത്ത സ്ഥലത്തു കൊണ്ടു​പോ​യി വെക്കുന്നു. മിക്ക സന്ദേശ​ങ്ങ​ളും ഒഴിവു​കി​ട്ടു​മ്പോൾ എടുത്തു നോക്കി​യാൽ മതിയാ​യി​രി​ക്കു​മ​ല്ലോ.

നിങ്ങൾ ഒരു മൊ​ബൈൽ ഫോൺ വാങ്ങാൻ തീരു​മാ​നി​ച്ചു എന്നിരി​ക്കട്ടെ. അതു നിങ്ങളെ നിയ​ന്ത്രി​ക്കാൻ ഇടം​കൊ​ടു​ക്കാ​തെ നിങ്ങൾ അതിനെ നിയ​ന്ത്രി​ക്കു​മെന്നു ദൃഢനി​ശ്ചയം ചെയ്യുക. നിങ്ങൾ മുൻഗണന കൊടു​ക്കേണ്ട കാര്യ​ങ്ങൾക്ക്‌ മൊ​ബൈൽ ഫോൺ ഒരു തടസ്സം ആകുന്നില്ല എന്ന്‌ ഉറപ്പു വരുത്തുക. ബൈബിൾ പിൻവ​രു​ന്ന​പ്ര​കാ​രം നമ്മെ പ്രോ​ത്സാ​ഹി​പ്പി​ക്കു​ന്നു: “നിങ്ങളു​ടെ സൗമ്യത [“ന്യായ​ബോ​ധം,” NW] സകല മനുഷ്യ​രും അറിയട്ടെ.” (ഫിലി​പ്പി​യർ 4:5) ഒരു മൊ​ബൈൽ ഫോൺ സ്വന്തമാ​ക്കാൻ തീരു​മാ​നി​ച്ചെ​ങ്കിൽ, അത്‌ എങ്ങനെ ഉപയോ​ഗി​ക്കു​ന്നു എന്ന കാര്യ​ത്തിൽ നിങ്ങൾ ന്യായ​ബോ​ധം ഉള്ളവരാ​ണെന്നു പ്രകട​മാ​ക്കുക. (g02 10/22)

[അടിക്കു​റി​പ്പു​കൾ]

[20-ാം പേജിലെ ചിത്രങ്ങൾ]

ചില ചെറു​പ്പ​ക്കാർ മൊ​ബൈൽ ഫോണി​ലൂ​ടെ രഹസ്യ​ബ​ന്ധങ്ങൾ പുലർത്തു​ന്നു