കഥ 4
അവർക്കു ഭവനം നഷ്ടപ്പെട്ടതിന്റെ കാരണം
ഇവിടെ എന്താണു സംഭവിക്കുന്നതെന്നു നോക്കൂ. ആദാമിനെയും ഹവ്വായെയും മനോഹരമായ ഏദെൻതോട്ടത്തിൽനിന്നു പുറത്താക്കുകയാണ്‌. എന്തുകൊണ്ടായിരിക്കും അത്‌?
അവർ വളരെ മോശമായ ഒരു കാര്യം ചെയ്‌തതാണു കാരണം. അതുകൊണ്ട്‌ യഹോവ അവരെ ശിക്ഷിക്കുകയാണ്‌. ആദാമും ഹവ്വായും ചെയ്‌ത മോശമായ കാര്യം എന്താണെന്ന്‌ അറിയാമോ?
ചെയ്യരുതെന്നു ദൈവം കൽപ്പിച്ച ഒരു കാര്യം അവർ ചെയ്‌തു. തോട്ടത്തിലെ മരങ്ങളുടെ പഴങ്ങളൊക്കെ അവർക്കു കഴിക്കാം, എന്നാൽ ഒരെണ്ണത്തിന്റേതു മാത്രം കഴിക്കരുതെന്ന്‌ ദൈവം അവരോടു പറഞ്ഞിരുന്നു. അതിൽനിന്നു തിന്നാൽ അവർ മരിക്കും. ആ മരം ദൈവത്തിന്റെ സ്വന്തമായിരുന്നു. മറ്റൊരാളുടെ എന്തെങ്കിലും എടുക്കുന്നതു തെറ്റാണെന്നു നമുക്കറിയാം, ഇല്ലേ? എന്നാൽ എന്താണു സംഭവിച്ചത്‌?
ഒരു ദിവസം ഹവ്വാ തോട്ടത്തിൽ തനിച്ചായിരുന്നു. അപ്പോൾ ഒരു പാമ്പ്‌ അവളോടു സംസാരിച്ചു. അത്ഭുതമായിരിക്കുന്നു, അല്ലേ? തിന്നരുതെന്നു ദൈവം കൽപ്പിച്ച പഴം പറിച്ചു തിന്നാൻ അതു ഹവ്വായോടു പറഞ്ഞു. സംസാരിക്കാനുള്ള കഴിവോടെയല്ല യഹോവ പാമ്പുകളെ ഉണ്ടാക്കിയത്‌. അതുകൊണ്ട്‌ മറ്റാരോ പാമ്പിനെക്കൊണ്ടു സംസാരിപ്പിക്കുകയായിരുന്നു എന്നു വ്യക്തം. അതാരായിരുന്നു?
അത്‌ ആദാമായിരുന്നില്ല. അപ്പോൾപ്പിന്നെ ഭൂമിയെ ഉണ്ടാക്കുന്നതിനു വളരെമുമ്പ്‌ യഹോവ സൃഷ്ടിച്ച വ്യക്തികളിൽ ഒരുവൻ ആയിരിക്കേണ്ടിയിരുന്നു അത്‌. ആ വ്യക്തികൾ ദൂതന്മാരാണ്‌, നമുക്ക്‌ അവരെ കാണാൻ കഴിയുകയില്ല. ഈ ദൂതന്മാരിൽ ഒരാൾ വളരെ അഹങ്കാരിയായിത്തീർന്നിരുന്നു. തനിക്ക്‌ ദൈവത്തെപ്പോലെ ഒരു രാജാവ്‌ ആകണമെന്ന്‌ അവൻ വിചാരിക്കാൻ തുടങ്ങി. യഹോവയെ അനുസരിക്കുന്നതിനു പകരം ആളുകൾ തന്നെ അനുസരിക്കണമെന്ന്‌ അവൻ ആഗ്രഹിച്ചു. പാമ്പിനെക്കൊണ്ടു സംസാരിപ്പിച്ച ദൂതൻ അവനായിരുന്നു.
ഈ ദൂതന്‌ ഹവ്വായെ കബളിപ്പിക്കാൻ കഴിഞ്ഞു. പഴം തിന്നാൽ ദൈവത്തെപ്പോലെ ആയിത്തീരുമെന്ന്‌ അവൻ അവളോടു പറഞ്ഞപ്പോൾ അവൾ അതു വിശ്വസിച്ചു. അതുകൊണ്ട്‌ അവൾ അതു തിന്നു, ആദാമും അങ്ങനെതന്നെ ചെയ്‌തു. ആദാമും ഹവ്വായും ദൈവത്തോട്‌ അനുസരണക്കേടു കാണിച്ചു, അതുകൊണ്ടാണ്‌ അവർക്ക്‌ ആ മനോഹരമായ തോട്ടത്തിലെ ജീവിതം നഷ്‌ടപ്പെട്ടത്‌.
എന്നാൽ ഒരിക്കൽ മുഴുഭൂമിയും ഏദെൻതോട്ടംപോലെ ഭംഗിയുള്ളതായിത്തീരുന്നു എന്ന്‌ ദൈവം ഉറപ്പുവരുത്തും. ഭൂമിയെ ഈ വിധത്തിൽ ആക്കിത്തീർക്കുന്നതിൽ നമുക്ക്‌ എങ്ങനെ പങ്കുപറ്റാമെന്ന്‌ പിന്നീട്‌ നമ്മൾ പഠിക്കും. ഇപ്പോൾ, ആദാമിനും ഹവ്വായ്‌ക്കും എന്തു സംഭവിച്ചെന്ന്‌ നമുക്കു നോക്കാം.