“ഈ മനുഷ്യൻ സംസാ​രി​ക്കു​ന്ന​തു​പോ​ലെ ആരും ഒരിക്ക​ലും സംസാ​രി​ച്ചി​ട്ടില്ല”

1, 2. (എ) യേശു​വി​നെ പിടി​കൂ​ടാൻ പോയവർ ദൗത്യം നിറ​വേ​റ്റാ​തെ തിരി​കെ​വ​ന്നത്‌ എന്തു​കൊണ്ട്‌? (ബി) യേശു മികച്ച ഒരു ഉപദേ​ഷ്ടാ​വാ​യി​രു​ന്നത്‌ എന്തു​കൊ​ണ്ടാണ്‌?

ആലയത്തിൽ കൂടി​വ​ന്നി​രി​ക്കു​ന്ന​വരെ തന്റെ പിതാ​വി​നെ​പ്പറ്റി പഠിപ്പി​ച്ചു​കൊ​ണ്ടി​രി​ക്കു​ക​യാണ്‌ യേശു. അപ്പോൾ ശ്രോ​താ​ക്കൾക്കി​ട​യിൽ അവനെ​ച്ചൊ​ല്ലി ഒരു ഭിന്നി​പ്പു​ണ്ടാ​കു​ന്നു. കൂടി​യി​രു​ന്ന​വ​രിൽ പലരും യേശു​വി​ന്റെ ഉപദേ​ശങ്ങൾ കേട്ട്‌ അവനിൽ വിശ്വാ​സം അർപ്പി​ക്കു​ന്നു. എന്നാൽ ചിലർ അവനെ പിടി​ച്ചു​കെ​ട്ടാൻ ആഗ്രഹി​ക്കു​ന്നു. കോപം അടക്കാ​നാ​വാ​തെ മതനേ​താ​ക്ക​ന്മാർ യേശു​വി​നെ അറസ്റ്റു​ചെ​യ്യാൻ ഭടന്മാരെ അയയ്‌ക്കു​ന്നു. എന്നാൽ ദൗത്യം നിറ​വേ​റ്റാ​തെ​യാണ്‌ ആ ഭടന്മാർ തിരി​ച്ചു​വ​ന്നത്‌. “നിങ്ങൾ അവനെ കൊണ്ടു​വ​രാ​ഞ്ഞ​തെന്ത്‌?” എന്ന്‌ പരീശ​ന്മാ​രും മുഖ്യ​പു​രോ​ഹി​ത​ന്മാ​രും അവരോ​ടു ചോദി​ക്കു​ന്നു. “ഈ മനുഷ്യൻ സംസാ​രി​ക്കു​ന്ന​തു​പോ​ലെ ആരും ഒരിക്ക​ലും സംസാ​രി​ച്ചി​ട്ടില്ല” എന്ന്‌ ഭടന്മാർ ബോധി​പ്പി​ക്കു​ന്നു.a യേശു​വി​ന്റെ ഉപദേ​ശങ്ങൾ കേട്ട്‌ അത്യന്തം വിസ്‌മ​യി​ച്ചു​പോയ അവർക്ക്‌ അവനെ പിടി​കൂ​ടാൻ മനസ്സു​തോ​ന്നി​യില്ല.​—യോഹ​ന്നാൻ 7:45, 46.

² യേശു​വി​ന്റെ ഉപദേ​ശങ്ങൾ കേട്ട്‌ വിസ്‌മ​യി​ച്ചത്‌ ആ ഉദ്യോ​ഗസ്ഥർ മാത്ര​മാ​യി​രു​ന്നില്ല. പലപ്പോ​ഴും ഒരു വലിയ പുരു​ഷാ​രം​തന്നെ അവന്റെ ഉപദേ​ശങ്ങൾ കേൾക്കാൻ തടിച്ചു​കൂ​ടി​യി​രു​ന്നു. (മർക്കോസ്‌ 3:7, 9; 4:1; ലൂക്കോസ്‌ 5:1-3) യേശു ഇത്ര മികച്ച ഒരു ഉപദേ​ഷ്ടാ​വാ​യി​രു​ന്നത്‌ എന്തു​കൊ​ണ്ടാണ്‌? 8-ാം അധ്യാ​യ​ത്തിൽ നാം കണ്ടതു​പോ​ലെ, താൻ പഠിപ്പിച്ച സത്യങ്ങ​ളെ​യും താൻ പഠിപ്പിച്ച ആളുക​ളെ​യും യേശു സ്‌നേ​ഹി​ച്ചി​രു​ന്നു. അത്യന്തം ഫലപ്ര​ദ​മായ അധ്യയ​ന​രീ​തി​ക​ളാണ്‌ അവൻ ഉപയോ​ഗി​ച്ചത്‌. അതിൽ മൂന്നെണ്ണം നമുക്കി​പ്പോൾ നോക്കാം. ഇക്കാര്യ​ത്തിൽ അവനെ എങ്ങനെ അനുക​രി​ക്കാ​മെ​ന്നും നമുക്കു കാണാം.

ലളിത​മായ അധ്യയനരീതി

3, 4. (എ) ആളുകളെ പഠിപ്പി​ക്കാൻ യേശു ലളിത​മായ ഭാഷ ഉപയോ​ഗി​ച്ചത്‌ എന്തു​കൊണ്ട്‌? (ബി) ഗിരി​പ്ര​ഭാ​ഷണം യേശു​വി​ന്റെ അധ്യയ​ന​രീ​തി​യു​ടെ ലാളി​ത്യം എടുത്തു​കാ​ട്ടു​ന്നത്‌ എങ്ങനെ?

³ യേശു​വിന്‌ എത്ര വലിയ പദസമ്പ​ത്തു​ണ്ടാ​യി​രു​ന്നി​രി​ക്കണം! എന്നിരു​ന്നാ​ലും ആളുകളെ പഠിപ്പി​ച്ച​പ്പോൾ അവർക്ക്‌ ഗ്രഹി​ക്കാൻ ബുദ്ധി​മു​ട്ടുള്ള പദങ്ങൾ അവൻ ഒരിക്ക​ലും ഉപയോ​ഗി​ച്ചില്ല. അവന്റെ ശ്രോ​താ​ക്ക​ളിൽ പലരും “പഠിപ്പി​ല്ലാ​ത്ത​വ​രും സാധാ​ര​ണ​ക്കാ​രും” ആയിരു​ന്നു. (പ്രവൃ​ത്തി​കൾ 4:13) അവരുടെ പരിമി​തി​കൾ അവന്‌ നന്നായി അറിയാ​മാ​യി​രു​ന്നു. അതു​കൊ​ണ്ടു​തന്നെ അവർക്ക്‌ ഉൾക്കൊ​ള്ളാ​വു​ന്ന​തി​ലും അധികം വിവരങ്ങൾ അവൻ പകർന്നു​കൊ​ടു​ത്തില്ല. (യോഹ​ന്നാൻ 16:12) ഗഹനമായ സത്യങ്ങൾ ലളിത​മായ വാക്കു​ക​ളി​ലൂ​ടെ അവൻ അവർക്ക്‌ പറഞ്ഞു​കൊ​ടു​ത്തു.

⁴ ഗിരി​പ്ര​ഭാ​ഷ​ണ​ത്തി​ന്റെ കാര്യം​ത​ന്നെ​യെ​ടു​ക്കുക. (മത്തായി 5:3–7:27) ദിവ്യ​നി​യ​മ​ങ്ങ​ളു​ടെ അന്തഃസത്ത എടുത്തു​കാ​ട്ടുന്ന വിലപ്പെട്ട ഉപദേ​ശ​ങ്ങ​ളാണ്‌ യേശു ഈ പ്രഭാ​ഷ​ണ​ത്തി​ലൂ​ടെ നൽകി​യത്‌. കടിച്ചാൽപ്പൊ​ട്ടാത്ത പ്രയോ​ഗ​ങ്ങ​ളോ സങ്കീർണ​മായ ആശയങ്ങ​ളോ ഒന്നും ഗിരി​പ്ര​ഭാ​ഷ​ണ​ത്തി​ലില്ല. ഒരു കൊച്ചു​കു​ട്ടി​ക്കു​പോ​ലും കേട്ടാൽ എളുപ്പം മനസ്സി​ലാ​കുന്ന വാക്കു​കളേ അവൻ അതിൽ ഉപയോ​ഗി​ച്ചു​ള്ളൂ! യേശു പറഞ്ഞു​നി​റു​ത്തി​യ​പ്പോൾ, കർഷക​രും ഇടയന്മാ​രും മീൻപി​ടി​ത്ത​ക്കാ​രു​മൊ​ക്കെ ഉൾപ്പെ​ട്ടി​രി​ക്കാ​വുന്ന ആ വലിയ ജനക്കൂട്ടം “അവന്റെ പഠിപ്പി​ക്ക​ലിൽ വിസ്‌മ​യി​ച്ചു.”​—മത്തായി 7:28.

5. യേശു​വി​ന്റെ ഉപദേ​ശങ്ങൾ ലളിത​വും അതേസ​മയം അർഥസ​മ്പു​ഷ്ട​മാ​യി​രു​ന്നു. ഉദാഹ​രി​ക്കുക.

⁵ ആളുകളെ പഠിപ്പി​ക്കവെ, യേശു മിക്ക​പ്പോ​ഴും ലളിത​വും ഹ്രസ്വ​വും അതേസ​മയം അർഥസ​മ്പു​ഷ്ട​വു​മായ വാചക​ശ​ക​ല​ങ്ങ​ളാണ്‌ ഉപയോ​ഗി​ച്ചത്‌. അച്ചടി​യി​ല്ലാ​തി​രുന്ന ആ കാലത്തും തന്റെ സന്ദേശം ആളുക​ളു​ടെ മനസ്സി​ലും ഹൃദയ​ത്തി​ലും പതിപ്പി​ക്കു​ന്ന​തിൽ അവൻ വിജയി​ച്ചു. ചില ഉദാഹ​ര​ണങ്ങൾ നോക്കുക: “നിങ്ങൾ വിധി​ക്ക​പ്പെ​ടാ​തി​രി​ക്കേ​ണ്ട​തിന്‌ വിധി​ക്കാ​തി​രി​ക്കുക.” “ആരോ​ഗ്യ​മു​ള്ള​വർക്കല്ല, രോഗി​കൾക്കാ​ണു വൈദ്യ​നെ​ക്കൊണ്ട്‌ ആവശ്യം.” “ആത്മാവ്‌ ഒരുക്ക​മു​ള്ളത്‌; ജഡമോ ബലഹീ​ന​മ​ത്രേ.” “കൈസർക്കു​ള്ളതു കൈസർക്കും ദൈവ​ത്തി​നു​ള്ളതു ദൈവ​ത്തി​നും കൊടു​ക്കുക.” “വാങ്ങു​ന്ന​തി​നെ​ക്കാൾ സന്തോഷം കൊടു​ക്കു​ന്ന​തി​ല​ത്രേ.”b (മത്തായി 7:1; 9:12; 26:41; മർക്കോസ്‌ 12:17; പ്രവൃ​ത്തി​കൾ 20:35) 2,000-ത്തോളം വർഷത്തി​നു​മുമ്പ്‌ യേശു പറഞ്ഞ ആ കാര്യങ്ങൾ ഇന്നും അതേ പുതു​മ​യോ​ടെ ആളുക​ളു​ടെ ഓർമ​യിൽ തങ്ങിനിൽക്കു​ന്നു.

6, 7. (എ) ആളുകളെ പഠിപ്പി​ക്കു​മ്പോൾ നാം ലളിത​മായ ഭാഷ ഉപയോ​ഗി​ക്കേ​ണ്ടത്‌ പ്രധാ​ന​മാ​യി​രി​ക്കു​ന്നത്‌ എന്തു​കൊണ്ട്‌? (ബി) ആവശ്യ​ത്തി​ല​ധി​കം വിവരങ്ങൾ പറഞ്ഞു​കൊ​ടു​ത്തു​കൊണ്ട്‌ വിദ്യാർഥി​യെ ആശയക്കു​ഴ​പ്പ​ത്തി​ലാ​ക്കാ​തി​രി​ക്കാൻ നമുക്ക്‌ എങ്ങനെ ശ്രദ്ധി​ക്കാം?

⁶ യേശു​വി​ന്റെ മാതൃക നമുക്ക്‌ എങ്ങനെ അനുക​രി​ക്കാം? ഒന്നാമ​താ​യി, ആളുകൾക്ക്‌ എളുപ്പം മനസ്സി​ലാ​കുന്ന ഭാഷയാ​യി​രി​ക്കണം നാം ഉപയോ​ഗി​ക്കേ​ണ്ടത്‌. ദൈവ​വ​ച​ന​ത്തി​ലെ അടിസ്ഥാന സത്യങ്ങൾ തികച്ചും ലളിത​മാണ്‌. ലോക​ത്തി​ലെ ജ്ഞാനി​കൾക്കല്ല, ആത്മാർഥ​ത​യും താഴ്‌മ​യു​മുള്ള സാധാ​ര​ണ​ക്കാ​രായ ആളുകൾക്കാണ്‌ യഹോവ ആ സത്യങ്ങൾ വെളി​പ്പെ​ടു​ത്തി​ക്കൊ​ടു​ക്കു​ന്നത്‌. (1 കൊരി​ന്ത്യർ 1:26-28) ലളിത​മായ വാക്കുകൾ ശ്രദ്ധാ​പൂർവം തിര​ഞ്ഞെ​ടു​ക്കു​മ്പോൾ ദൈവ​വ​ച​ന​ത്തി​ലെ സത്യങ്ങൾ ഫലപ്ര​ദ​മാ​യി ആളുക​ളു​ടെ ഹൃദയ​ത്തി​ലെ​ത്തി​ക്കാൻ നമുക്കു കഴിയും.

⁷ ആവശ്യ​ത്തി​ല​ധി​കം വിവരങ്ങൾ പറഞ്ഞു​കൊ​ടു​ത്തു​കൊണ്ട്‌ വിദ്യാർഥി​യെ ആശയക്കു​ഴ​പ്പ​ത്തി​ലാ​ക്കാ​തി​രി​ക്കാ​നും നാം ശ്രദ്ധി​ക്കണം. ബൈബി​ള​ധ്യ​യ​ന​മെ​ടു​ക്കു​മ്പോൾ എല്ലാ കാര്യ​ങ്ങ​ളും നാം വിശദീ​ക​രി​ച്ചു​പ​റ​യ​ണ​മെ​ന്നില്ല. അതേസ​മയം ഒറ്റയടിക്ക്‌ കുറെ ഖണ്ഡികകൾ പഠിപ്പി​ച്ചു​തീർക്കു​ക​യെന്ന ലക്ഷ്യത്തിൽ അധ്യാ​യങ്ങൾ ഓടി​ച്ചു​തീർക്കാ​നും നാം ശ്രമി​ക്ക​രുത്‌. വിദ്യാർഥി​യു​ടെ ആവശ്യ​ങ്ങ​ളും പ്രാപ്‌തി​യും കണക്കി​ലെ​ടു​ത്തു​കൊ​ണ്ടു​വേണം എത്ര​ത്തോ​ളം പഠിപ്പി​ക്ക​ണ​മെന്നു തീരു​മാ​നി​ക്കാൻ. നമ്മുടെ വിദ്യാർഥി ക്രിസ്‌തു​വി​ന്റെ അനുഗാ​മി​യും യഹോ​വ​യു​ടെ ആരാധ​ക​നും ആയിത്തീ​രണം എന്നതാണ്‌ നമ്മുടെ ലക്ഷ്യം. അതു​കൊണ്ട്‌ പഠിക്കുന്ന കാര്യങ്ങൾ ഗ്രഹി​ക്കാൻ വിദ്യാർഥിക്ക്‌ എത്രമാ​ത്രം സമയം ആവശ്യ​മാ​ണോ, അത്രയും സമയം അദ്ദേഹ​ത്തി​നു​വേണ്ടി ചെലവ​ഴി​ക്കാൻ നാം തയ്യാറാ​കണം. അങ്ങനെ​യെ​ങ്കിൽമാ​ത്രമേ ബൈബിൾസ​ത്യ​ങ്ങൾ വിദ്യാർഥി​യു​ടെ ഹൃദയ​ത്തി​ലെ​ത്തു​ക​യും പഠിച്ച കാര്യങ്ങൾ അദ്ദേഹം പ്രാവർത്തി​ക​മാ​ക്കു​ക​യും ചെയ്യു​ക​യു​ള്ളൂ.​—റോമർ 12:2.

ഉചിത​മായ ചോദ്യങ്ങൾ

8, 9. (എ) എന്തിനു​വേ​ണ്ടി​യാണ്‌ യേശു ചോദ്യ​ങ്ങൾ ചോദി​ച്ചത്‌? (ബി) ആലയനി​കു​തി കൊടു​ക്കു​ന്നതു സംബന്ധിച്ച്‌ ശരിയായ ധാരണ ലഭിക്കാൻ പത്രോ​സി​നെ സഹായി​ക്കു​ന്ന​തിന്‌ യേശു എന്തു ചെയ്‌തു?

⁸ യേശു​വി​നു വേണ​മെ​ങ്കിൽ സമയം കളയാതെ കാര്യങ്ങൾ നേരിട്ട്‌ ശ്രോ​താ​ക്കൾക്കു പറഞ്ഞു​കൊ​ടു​ക്കാ​മാ​യി​രു​ന്നു. എന്നാൽ അങ്ങനെ ചെയ്യു​ന്ന​തി​നു​പ​കരം അവൻ പലപ്പോ​ഴും ശ്രോ​താ​ക്ക​ളോട്‌ ചോദ്യ​ങ്ങൾ ചോദി​ച്ചു. എന്തു​കൊ​ണ്ടാ​യി​രു​ന്നു അത്‌? എതിരാ​ളി​ക​ളു​ടെ ദുഷ്ടല​ക്ഷ്യ​ങ്ങൾ വെളി​ച്ച​ത്തു​കൊ​ണ്ടു​വ​രാ​നും അങ്ങനെ അവരെ നിശ്ശബ്ദ​രാ​ക്കാ​നും വേണ്ടി​യാണ്‌ ചില​പ്പോൾ അവൻ അതു ചെയ്‌തത്‌. (മത്തായി 21:23-27; 22:41-46) പലപ്പോ​ഴും പക്ഷേ അവൻ ചോദ്യ​ങ്ങൾ ചോദി​ച്ചത്‌, മനസ്സി​ലു​ള്ളതു തുറന്നു​പ​റ​യാൻ ശിഷ്യ​ന്മാ​രെ പ്രേരി​പ്പി​ക്കാ​നും അവരുടെ ചിന്തയെ ഉദ്ദീപി​പ്പി​ക്കാ​നും ചിന്താ​ഗ​തി​കളെ നേരെ​യാ​ക്കാ​നു​മൊ​ക്കെ​യാ​യി​രു​ന്നു. അതു​കൊ​ണ്ടു​തന്നെ, “നിങ്ങൾക്ക്‌ എന്തു തോന്നു​ന്നു?” “നീ ഇതു വിശ്വ​സി​ക്കു​ന്നു​വോ?” എന്നിങ്ങ​നെ​യുള്ള ചോദ്യ​ങ്ങൾ അവൻ അവരോ​ടു ചോദി​ക്കു​മാ​യി​രു​ന്നു. (മത്തായി 18:12; യോഹ​ന്നാൻ 11:26) ഇത്തരം ചോദ്യ​ങ്ങ​ളു​ടെ സഹായ​ത്താൽ ശിഷ്യ​ന്മാ​രു​ടെ ഹൃദയത്തെ സ്‌പർശി​ക്കാൻ യേശു​വി​നു കഴിഞ്ഞു. ഒരു ഉദാഹ​രണം നോക്കാം.

⁹ ഒരിക്കൽ നികു​തി​പി​രി​വു​കാർ പത്രോ​സി​നോട്‌, യേശു ആലയനി​കു​തി കൊടു​ക്കാ​റു​ണ്ടോ​യെന്ന്‌ ചോദി​ച്ചു.c “ഉവ്വ്‌” എന്ന്‌ പത്രോസ്‌ ഉടനെ മറുപടി നൽകി. പിന്നീട്‌ വീട്ടിൽ ചെന്ന​പ്പോൾ യേശു പത്രോ​സി​നോട്‌, ചിന്തി​പ്പി​ക്കുന്ന വിധത്തി​ലുള്ള ചില ചോദ്യ​ങ്ങൾ ചോദി​ച്ചു: “ശിമോ​നേ, നിനക്ക്‌ എന്തു തോന്നു​ന്നു, ഭൂമി​യി​ലെ രാജാ​ക്ക​ന്മാർ ചുങ്കമോ തലക്കര​മോ വാങ്ങു​ന്നത്‌ ആരിൽനി​ന്നാണ്‌? മക്കളിൽനി​ന്നോ അന്യരിൽനി​ന്നോ?” “അന്യരിൽനിന്ന്‌” എന്ന്‌ പത്രോസ്‌ മറുപടി നൽകി​യ​പ്പോൾ യേശു അവനോട്‌, “അങ്ങനെ​യെ​ങ്കിൽ മക്കൾ ഒഴിവു​ള്ള​വ​രാ​ണ​ല്ലോ” എന്നു പറഞ്ഞു. (മത്തായി 17:24-27) യേശു​വി​ന്റെ ചോദ്യ​ങ്ങ​ളു​ടെ അർഥം പത്രോ​സിന്‌ പെട്ടെ​ന്നു​തന്നെ പിടി​കി​ട്ടി​യി​ട്ടു​ണ്ടാ​കണം. കാരണം, രാജകു​ടും​ബാം​ഗങ്ങൾ നികുതി കൊടു​ക്കേ​ണ്ട​തി​ല്ലെന്ന കാര്യം എല്ലാവർക്കും അറിവു​ള്ള​താ​യി​രു​ന്നു. ആലയത്തിൽ ആരാധി​ക്ക​പ്പെ​ട്ടി​രുന്ന സ്വർഗീയ രാജാ​വായ യഹോ​വ​യു​ടെ ഏകജാത പുത്ര​നാ​യി​രു​ന്നു യേശു. അതു​കൊണ്ട്‌ വാസ്‌ത​വ​ത്തിൽ അവൻ നികുതി കൊടു​ക്കേണ്ട ആവശ്യ​മി​ല്ലാ​യി​രു​ന്നു. നേരിട്ട്‌ ഇക്കാര്യം വെളി​പ്പെ​ടു​ത്തു​ന്ന​തി​നു​പ​കരം യേശു പത്രോ​സി​നോട്‌ ചിന്തി​പ്പി​ക്കുന്ന വിധത്തി​ലുള്ള കുറെ ചോദ്യ​ങ്ങൾ ചോദി​ച്ചു. അങ്ങനെ ശരിയായ ധാരണ ലഭിക്കാ​നും എപ്പോ​ഴും ചിന്തിച്ച്‌ ഉത്തരം പറയേ​ണ്ട​തി​ന്റെ പ്രാധാ​ന്യം മനസ്സി​ലാ​ക്കാ​നും യേശു പത്രോ​സി​നെ സഹായി​ച്ചു.

10. വീടു​തോ​റു​മുള്ള ശുശ്രൂ​ഷ​യിൽ നമുക്ക്‌ എങ്ങനെ ഫലപ്ര​ദ​മായ വിധത്തിൽ ചോദ്യ​ങ്ങൾ ചോദി​ക്കാം?

¹⁰ വീടു​തോ​റു​മുള്ള ശുശ്രൂ​ഷ​യിൽ നമുക്ക്‌ എങ്ങനെ ഫലപ്ര​ദ​മായ വിധത്തിൽ ചോദ്യ​ങ്ങൾ ചോദി​ക്കാം? കണ്ടുമു​ട്ടുന്ന ആളുക​ളോട്‌, താത്‌പ​ര്യ​ജ​ന​ക​മായ ചോദ്യ​ങ്ങൾ നമുക്കു ചോദി​ക്കാ​നാ​കും. സുവാർത്ത അവരു​മാ​യി പങ്കു​വെ​ക്കാ​നുള്ള അവസരം അത്‌ നമുക്കു നൽകും. ഉദാഹ​ര​ണ​ത്തിന്‌, പ്രസം​ഗ​വേ​ല​യ്‌ക്കി​ട​യിൽ പ്രായ​മുള്ള ഒരാ​ളെ​യാണ്‌ കണ്ടുമു​ട്ടു​ന്ന​തെ​ങ്കിൽ ആദര​വോ​ടെ നമുക്ക്‌ ഇങ്ങനെ ചോദി​ക്കാ​വു​ന്ന​താണ്‌: “താങ്കളു​ടെ ചെറു​പ്പ​കാ​ലത്തെ അപേക്ഷിച്ച്‌ ഇന്ന്‌ ലോക​ത്തി​ലെ അവസ്ഥകൾ മാറി​യി​ട്ടു​ണ്ടെന്ന്‌ തോന്നു​ന്നു​ണ്ടോ?” മറുപടി കേട്ട​ശേഷം നമുക്ക്‌ ഇങ്ങനെ ചോദി​ക്കാൻ കഴി​ഞ്ഞേ​ക്കും: “ഈ അവസ്ഥക​ളെ​ല്ലാം മാറി നമു​ക്കെ​ല്ലാം സന്തോ​ഷ​ത്തി​ലും സമാധാ​ന​ത്തി​ലും ജീവി​ക്കാൻ കഴിയ​ണ​മെ​ങ്കിൽ എന്താണ്‌ ആവശ്യ​മാ​യി​രി​ക്കു​ന്നത്‌?” (മത്തായി 6:9, 10) ഇനി, കൊച്ചു​കു​ട്ടി​ക​ളുള്ള ഒരു വീട്ടമ്മ​യെ​യാണ്‌ കാണു​ന്ന​തെ​ങ്കി​ലോ? ഒരുപക്ഷേ ഇങ്ങനെ ചോദി​ക്കാം: “നിങ്ങളു​ടെ മക്കൾ വളർന്നു​വ​ലു​താ​കു​മ്പോൾ ഈ ലോക​ത്തി​ന്റെ അവസ്ഥ എന്തായി​രി​ക്കു​മെന്ന്‌ ചിന്തി​ച്ചി​ട്ടു​ണ്ടോ?” (സങ്കീർത്തനം 37:10, 11) ഒരു വീട്ടിൽ ചെല്ലു​മ്പോൾ കാര്യങ്ങൾ നന്നായി നിരീ​ക്ഷി​ക്കു​ന്നെ​ങ്കിൽ, താത്‌പ​ര്യം ഉണർത്തു​ന്ന​തരം ചോദ്യ​ങ്ങൾ വീട്ടു​കാ​ര​നോ​ടു ചോദി​ക്കാൻ നമുക്കു കഴിയും.

11. ബൈബി​ള​ധ്യ​യനം നടത്തു​മ്പോൾ നമുക്ക്‌ എങ്ങനെ ഫലകര​മാ​യി ചോദ്യ​ങ്ങൾ ചോദി​ക്കാം?

¹¹ ബൈബി​ള​ധ്യ​യനം നടത്തു​മ്പോൾ നമുക്ക്‌ എങ്ങനെ ഫലകര​മാ​യി ചോദ്യ​ങ്ങൾ ചോദി​ക്കാം? നന്നായി ചിന്തിച്ച്‌ തയ്യാറാ​ക്കിയ ചോദ്യ​ങ്ങൾ ചോദി​ക്കു​ന്നത്‌ വിദ്യാർഥി​യു​ടെ മനസ്സി​ലു​ള്ളത്‌ എന്താ​ണെന്ന്‌ അറിയാൻ നമ്മെ സഹായി​ക്കും. (സദൃശ​വാ​ക്യ​ങ്ങൾ 20:5) ഉദാഹ​ര​ണ​ത്തിന്‌, ബൈബിൾ യഥാർഥ​ത്തിൽ എന്തു പഠിപ്പി​ക്കു​ന്നു? എന്ന പുസ്‌ത​ക​ത്തി​ലെ “ദൈവ​ത്തി​നു പ്രസാ​ദ​ക​ര​മായ ജീവിതം നയിക്കൽ” എന്ന അധ്യാ​യ​മാണ്‌ നാം പഠിപ്പി​ക്കു​ന്ന​തെ​ന്നി​രി​ക്കട്ടെ.d അധാർമി​കത, മദ്യപാ​നം, നുണപ​റ​ച്ചിൽ തുടങ്ങിയ കാര്യ​ങ്ങളെ ദൈവം എങ്ങനെ വീക്ഷി​ക്കു​ന്നു​വെന്ന്‌ ഈ അധ്യാ​യ​ത്തിൽ വിവരി​ച്ചി​രി​ക്കു​ന്നു. പുസ്‌ത​ക​ത്തിൽ നൽകി​യി​രി​ക്കുന്ന ചോദ്യ​ങ്ങൾക്ക്‌ വിദ്യാർഥി കൃത്യ​മായ ഉത്തരങ്ങൾ നൽകി​യേ​ക്കാം. എന്നാൽ, ആ ബൈബി​ളു​പ​ദേ​ശ​ങ്ങ​ളോ​ടും തത്ത്വങ്ങ​ളോ​ടും അദ്ദേഹം മനസ്സു​കൊണ്ട്‌ യോജി​ക്കു​ന്നു​ണ്ടോ​യെന്ന്‌ നമുക്ക്‌ എങ്ങനെ അറിയാ​നാ​കും? നമുക്ക്‌ ഇങ്ങനെ ചോദി​ക്കാ​വു​ന്ന​താണ്‌: “ദൈവ​ത്തി​ന്റെ ഈ നിയമങ്ങൾ ന്യായ​മാ​ണെന്ന്‌ താങ്കൾക്കു തോന്നു​ന്നു​ണ്ടോ?” വേണ​മെ​ങ്കിൽ ഇങ്ങനെ​യും ചോദി​ക്കാം: “ഈ നിർദേ​ശങ്ങൾ എങ്ങനെ പ്രാവർത്തി​ക​മാ​ക്കാ​നാണ്‌ താങ്കൾ ഉദ്ദേശി​ക്കു​ന്നത്‌?” എന്നാൽ അതോ​ടൊ​പ്പം ഒരു കാര്യം മനസ്സിൽപ്പി​ടി​ക്കണം: വിദ്യാർഥി​ക്കു മാന്യത കൽപ്പി​ച്ചു​കൊണ്ട്‌ അദ്ദേഹ​ത്തി​ന്റെ വികാ​ര​ങ്ങളെ മുറി​പ്പെ​ടു​ത്താ​തെ​വേണം ചോദ്യ​ങ്ങൾ ചോദി​ക്കാൻ. വിദ്യാർഥിക്ക്‌ ജാള്യം തോന്ന​ത്ത​ക്ക​വി​ധ​ത്തി​ലുള്ള ചോദ്യ​ങ്ങൾ ഒരിക്ക​ലും ചോദി​ക്ക​രുത്‌.​—സദൃശ​വാ​ക്യ​ങ്ങൾ 12:18.

യുക്തി​സ​ഹ​മായ വാദമുഖങ്ങൾ

12-14. (എ) യേശു ഏതെല്ലാം വിധങ്ങ​ളിൽ യുക്തി​വാ​ദം ചെയ്‌തു? (ബി) സാത്താന്റെ ശക്തിയാ​ലാണ്‌ യേശു ഭൂതങ്ങളെ പുറത്താ​ക്കു​ന്നത്‌ എന്ന പരീശ​ന്മാ​രു​ടെ ആരോ​പ​ണത്തെ യേശു ഖണ്ഡിച്ചത്‌ എങ്ങനെ?

¹² പൂർണ​നാ​യി​രുന്ന യേശു​വിന്‌, ബോധ്യം​വ​രു​ത്തുന്ന രീതി​യിൽ ആളുക​ളു​മാ​യി യുക്തി​വാ​ദം ചെയ്യാൻ പ്രത്യേക കഴിവു​ത​ന്നെ​യു​ണ്ടാ​യി​രു​ന്നു. പലപ്പോ​ഴും എതിരാ​ളി​ക​ളു​ടെ ആരോ​പ​ണ​ങ്ങളെ ഖണ്ഡിക്കാൻ യുക്തി​സി​ദ്ധ​മായ വാദമു​ഖങ്ങൾ അവൻ നിരത്തി. മറ്റുചില സാഹച​ര്യ​ങ്ങ​ളിൽ, തന്റെ അനുഗാ​മി​കളെ സുപ്ര​ധാന പാഠങ്ങൾ പഠിപ്പി​ക്കാ​നാ​യി അവൻ അവരു​മാ​യി യുക്തി​വാ​ദം നടത്തി. ചില ഉദാഹ​ര​ണങ്ങൾ കാണുക.

¹³ ഒരിക്കൽ, കുരു​ട​നും ഊമനു​മായ ഒരു ഭൂത​ഗ്ര​സ്‌തനെ യേശു സുഖ​പ്പെ​ടു​ത്തി​യതു കണ്ട്‌ പരീശ​ന്മാർ അവനെ​തി​രെ ഇങ്ങനെ​യൊ​രു ആരോ​പണം ഉന്നയിച്ചു: “ഇവൻ ഭൂതങ്ങ​ളു​ടെ അധിപ​നായ ബെയെ​ത്‌സെ​ബൂ​ലി​നെ​ക്കൊ​ണ്ട​ത്രേ ഭൂതങ്ങളെ പുറത്താ​ക്കു​ന്നത്‌.” ഭൂതങ്ങളെ പുറത്താ​ക്കാൻ അമാനു​ഷിക ശക്തി ആവശ്യ​മാ​ണെന്ന്‌ അവർക്ക​റി​യാ​മാ​യി​രു​ന്നു. എന്നാൽ യേശു​വിന്‌ ആ ശക്തി ലഭിച്ചത്‌ സാത്താ​നിൽനി​ന്നാ​ണെന്ന്‌ അവർ ആരോ​പി​ച്ചു. ആ ആരോ​പണം തെറ്റാ​യി​രു​ന്നെന്നു മാത്രമല്ല, യുക്തി​ഹീ​ന​വു​മാ​യി​രു​ന്നു. യേശു നൽകിയ മറുപടി അതു തെളി​യി​ച്ചു: “ഛിദ്രി​ച്ചി​രി​ക്കുന്ന ഏതൊരു രാജ്യ​വും നശിച്ചു​പോ​കും. ഛിദ്രി​ച്ചി​രി​ക്കുന്ന ഒരു പട്ടണമോ ഭവനമോ നിലനിൽക്കു​ക​യില്ല. അങ്ങനെ​തന്നെ, സാത്താൻ സാത്താനെ പുറത്താ​ക്കു​ന്നെ​ങ്കിൽ അവൻ തന്നിൽത്തന്നെ ഛിദ്രി​ച്ചി​രി​ക്കു​ന്നു​വ​ല്ലോ. അപ്പോൾപ്പി​ന്നെ അവന്റെ രാജ്യം നിലനിൽക്കു​ന്നത്‌ എങ്ങനെ?” (മത്തായി 12:22-26) യേശു അർഥമാ​ക്കി​യത്‌ ഇതായി​രു​ന്നു: “സാത്താന്‌ വിരു​ദ്ധ​മായ ഒരു പ്രവൃ​ത്തി​യാണ്‌ ഞാൻ ചെയ്‌തി​രി​ക്കു​ന്നത്‌. ഞാൻ സാത്താന്റെ കൂട്ടാ​ളി​യാ​യി​രി​ക്കെ​യാണ്‌ ഇതു ചെയ്‌ത​തെ​ങ്കിൽ സാത്താൻ സാത്താന്‌ എതിരാ​യി​ത്തന്നെ പ്രവർത്തി​ക്കു​ക​യാ​ണെ​ന്നു​വ​രും. അവന്‌ നിലനിൽപ്പി​ല്ലാ​താ​കു​ക​യും ചെയ്യും.” യേശു​വി​ന്റെ യുക്തി​പൂർവ​ക​മായ ഈ വാദത്തെ അവർക്കു ഖണ്ഡിക്കാൻ കഴിയു​മാ​യി​രു​ന്നോ?

¹⁴ യേശു ഒരു വാദം​കൂ​ടെ നിരത്തി. പരീശ​ന്മാ​രു​ടെ ശിഷ്യ​ന്മാ​രിൽ ചിലർതന്നെ ഭൂതങ്ങളെ പുറത്താ​ക്കി​യി​ട്ടു​ണ്ടെന്ന്‌ അറിയാ​വു​ന്ന​തു​കൊണ്ട്‌ യേശു അവരോട്‌ മറ്റൊരു ചോദ്യം ചോദി​ച്ചു: “ഞാൻ ഭൂതങ്ങളെ പുറത്താ​ക്കു​ന്നത്‌ ബെയെ​ത്‌സെ​ബൂ​ലി​നെ​ക്കൊ​ണ്ടാ​ണെ​ങ്കിൽ നിങ്ങളു​ടെ പുത്ര​ന്മാർ (അതായത്‌, ശിഷ്യ​ന്മാർ) ആരെ​ക്കൊ​ണ്ടാണ്‌ അവയെ പുറത്താ​ക്കു​ന്നത്‌?” (മത്തായി 12:27) യേശു പറഞ്ഞതി​ന്റെ സാരം ഇതായി​രു​ന്നു: “സാത്താന്റെ ശക്തിയാ​ലാണ്‌ ഞാൻ ഭൂതങ്ങളെ പുറത്താ​ക്കു​ന്ന​തെ​ങ്കിൽ നിങ്ങളു​ടെ ശിഷ്യ​ന്മാ​രും അതേ ശക്തിയാ​ലാ​യി​രി​ക്കണം അങ്ങനെ ചെയ്യു​ന്നത്‌.” പരീശ​ന്മാ​രു​ടെ വായട​യ്‌ക്കാൻപോന്ന ഒരു യുക്തി​വാ​ദ​മാ​യി​രു​ന്നി​ല്ലേ അത്‌? തങ്ങളുടെ ശിഷ്യ​ന്മാർ സാത്താന്റെ ശക്തിയാ​ലാണ്‌ കാര്യങ്ങൾ ചെയ്യു​ന്ന​തെന്ന്‌ അവർ ഒരിക്ക​ലും സമ്മതി​ക്കി​ല്ലാ​യി​രു​ന്നു. അങ്ങനെ, അവർ ഉന്നയിച്ച വാദം ഉപയോ​ഗി​ച്ചു​തന്നെ യേശു അവരുടെ ആരോ​പ​ണ​ങ്ങളെ തകർത്തു​ക​ളഞ്ഞു. യേശു​വി​ന്റെ ഈ വാദമു​ഖ​ങ്ങ​ളെ​ക്കു​റി​ച്ചു വായി​ക്കു​ന്ന​തു​പോ​ലും എത്ര രസകര​മാണ്‌! അങ്ങനെ​യെ​ങ്കിൽ, ആ സന്ദർഭ​ത്തിൽ യേശു​വി​ന്റെ വാക്കുകൾ നേരിട്ടു കേൾക്കാ​നി​ട​യാ​യ​വരെ അത്‌ എത്ര കോരി​ത്ത​രി​പ്പി​ച്ചി​രി​ക്കണം!

15-17. തന്റെ പിതാ​വി​നെ​ക്കു​റി​ച്ചുള്ള ഹൃദ​യോ​ഷ്‌മ​ള​മായ സത്യങ്ങൾ ആളുകളെ പഠിപ്പി​ക്കു​ന്ന​തിന്‌ യേശു “എത്രയ​ധി​കം” എന്ന ന്യായ​വാ​ദ​രീ​തി ഉപയോ​ഗി​ച്ചു. ഉദാഹ​രി​ക്കുക.

¹⁵ തന്റെ പിതാ​വി​നെ​ക്കു​റി​ച്ചുള്ള ഹൃദ​യോ​ഷ്‌മ​ള​മായ സത്യങ്ങൾ ആളുകളെ പഠിപ്പി​ക്കു​ന്ന​തി​നും യേശു യുക്തി​വാ​ദങ്ങൾ നടത്തി. ശ്രോ​താ​ക്കൾക്ക്‌ അറിയാ​വുന്ന ഒരു വസ്‌തുത, അവരിൽ ഒരു ഉറച്ച വിശ്വാ​സ​മാ​ക്കി മാറ്റാൻ, “എത്രയ​ധി​കം” എന്ന പദം ഉപയോ​ഗി​ച്ചു​കൊ​ണ്ടുള്ള ഒരു ന്യായ​വാ​ദ​രീ​തി അവൻ അവലം​ബി​ച്ചി​രു​ന്നു. വൈരു​ധ്യ​ങ്ങളെ അടിസ്ഥാ​ന​മാ​ക്കി​യുള്ള ഈ ന്യായ​വാ​ദ​രീ​തി, കാര്യങ്ങൾ ശ്രോ​താ​ക്ക​ളു​ടെ മനസ്സിൽ പതിപ്പി​ക്കാൻ ഉപകരി​ക്കുന്ന ഒന്നാണ്‌. രണ്ട്‌ ഉദാഹ​ര​ണങ്ങൾ നമുക്കി​പ്പോൾ നോക്കാം.

¹⁶ ഒരിക്കൽ ശിഷ്യ​ന്മാർ യേശു​വി​നെ സമീപിച്ച്‌ തങ്ങളെ പ്രാർഥി​ക്കാൻ പഠിപ്പി​ക്ക​ണ​മെന്ന്‌ അപേക്ഷി​ച്ചു. അവർക്ക്‌ മാതൃ​കാ​പ്രാർഥന പറഞ്ഞു​കൊ​ടു​ത്ത​ശേഷം യേശു, തന്റെ പിതാ​വി​നെ​ക്കു​റി​ച്ചുള്ള സുപ്ര​ധാ​ന​മായ ഒരു സത്യം അവരുടെ ഹൃദയ​ങ്ങ​ളിൽ പതിപ്പി​ക്കാൻ ശ്രമിച്ചു. അപൂർണ​രായ മനുഷ്യർ തങ്ങളുടെ മക്കൾക്ക്‌ “നല്ല ദാനങ്ങൾ നൽകാൻ” യാതൊ​രു മടിയും കാണി​ക്കാ​റി​ല്ലെന്ന വസ്‌തുത ചൂണ്ടി​ക്കാ​ണി​ച്ചു​കൊണ്ട്‌ യേശു ഇങ്ങനെ പറഞ്ഞു: “മക്കൾക്കു നല്ല ദാനങ്ങൾ നൽകാൻ ദോഷി​ക​ളായ നിങ്ങൾക്ക്‌ അറിയാ​മെ​ങ്കിൽ സ്വർഗ​സ്ഥ​നായ പിതാവ്‌ തന്നോടു ചോദി​ക്കു​ന്ന​വർക്കു പരിശു​ദ്ധാ​ത്മാ​വി​നെ എത്രയ​ധി​കം നൽകും!” (ലൂക്കോസ്‌ 11:1-13) വൈരു​ധ്യ​ങ്ങളെ അടിസ്ഥാ​ന​മാ​ക്കി​യുള്ള ഒരു യുക്തി​വാ​ദ​മാണ്‌ യേശു ഇവിടെ നടത്തി​യത്‌. അപൂർണ​രും പാപി​ക​ളു​മായ മനുഷ്യർ തങ്ങളുടെ മക്കളുടെ ആവശ്യങ്ങൾ നിറ​വേ​റ്റാൻ ഇത്രയ​ധി​കം ശ്രദ്ധി​ക്കു​ന്നെ​ങ്കിൽ പരിപൂർണ​നും നീതി​മാ​നു​മായ സ്വർഗ​സ്ഥ​പി​താവ്‌ താഴ്‌മ​യോ​ടെ തന്നെ സമീപി​ക്കുന്ന തന്റെ ഭക്തന്മാർക്ക്‌ പരിശു​ദ്ധാ​ത്മാ​വി​നെ എത്രയ​ധി​കം നൽകും!

¹⁷ ഉത്‌ക​ണ്‌ഠകൾ തരണം ചെയ്യാ​നാ​വ​ശ്യ​മായ ഉപദേ​ശങ്ങൾ നൽകി​യ​പ്പോ​ഴും യേശു ഇതേ ന്യായ​വാ​ദ​രീ​തി ഉപയോ​ഗി​ച്ചു. അവൻ പറഞ്ഞു: “കാക്കയെ നോക്കു​വിൻ; അവ വിതയ്‌ക്കു​ന്നില്ല, കൊയ്യു​ന്നില്ല, അവയ്‌ക്കു പത്തായ​പ്പു​ര​യോ കളപ്പു​ര​യോ ഇല്ല; എങ്കിലും ദൈവം അവയെ പോറ്റു​ന്നു. പക്ഷിക​ളെ​ക്കാൾ നിങ്ങൾ എത്രയോ വില​പ്പെ​ട്ടവർ! ലില്ലി​ച്ചെ​ടി​കൾ എങ്ങനെ വളരുന്നു എന്നു നോക്കു​വിൻ. അവ അധ്വാ​നി​ക്കു​ന്നില്ല, നൂൽക്കു​ന്ന​തു​മില്ല. . . ; ഇന്നുള്ള​തും നാളെ അടുപ്പിൽ ഇടുന്ന​തു​മായ വയൽച്ചെ​ടി​കളെ ദൈവം ഇങ്ങനെ ചമയി​ക്കു​ന്നെ​ങ്കിൽ അൽപ്പവി​ശ്വാ​സി​കളേ, നിങ്ങളെ എത്ര അധികം!” (ലൂക്കോസ്‌ 12:24, 27, 28) പക്ഷിക​ളെ​യും ചെടി​ക​ളെ​യും യഹോവ ഇത്രയ​ധി​കം പരിപാ​ലി​ക്കു​ന്നെ​ങ്കിൽ തന്നെ സ്‌നേ​ഹി​ക്കു​ക​യും ആരാധി​ക്കു​ക​യും ചെയ്യുന്ന മനുഷ്യ​രെ എത്രയ​ധി​കം! ഇത്തരം ന്യായ​വാ​ദ​ങ്ങ​ളു​ടെ സഹായ​ത്താൽ ശിഷ്യ​ന്മാ​രു​ടെ ഹൃദയത്തെ സ്‌പർശി​ക്കാൻ യേശു​വി​നു കഴിഞ്ഞു.

18, 19. കാണാൻ കഴിയാത്ത ഒരു ദൈവ​ത്തിൽ തനിക്കു വിശ്വാ​സ​മി​ല്ലെന്ന്‌ ആരെങ്കി​ലും പറഞ്ഞാൽ നമുക്ക്‌ എങ്ങനെ യുക്തി​വാ​ദം ചെയ്യാ​നാ​കും?

¹⁸ ശുശ്രൂ​ഷ​യ്‌ക്കി​ട​യിൽ കണ്ടുമു​ട്ടുന്ന ആളുക​ളു​ടെ തെറ്റായ വിശ്വാ​സ​ങ്ങളെ ഖണ്ഡിക്കു​ന്ന​തിന്‌ പലപ്പോ​ഴും നമുക്കും യുക്തി​സി​ദ്ധ​മായ വാദങ്ങൾ അവതരി​പ്പി​ക്കേ​ണ്ടി​വ​രാ​റുണ്ട്‌. ബോധ്യ​പ്പെ​ടു​ത്തുന്ന രീതി​യിൽ യുക്തി​വാ​ദം നടത്തി​ക്കൊണ്ട്‌ യഹോ​വ​യെ​ക്കു​റി​ച്ചുള്ള ഹൃദ​യോ​ഷ്‌മ​ള​മായ സത്യങ്ങൾ ആളുകളെ പഠിപ്പി​ക്കാ​നുള്ള അവസര​വും നമുക്കുണ്ട്‌. (പ്രവൃ​ത്തി​കൾ 19:8; 28:23, 24) എന്നാൽ അതിസ​ങ്കീർണ​മായ വാദമു​ഖങ്ങൾ നാം നിര​ത്തേ​ണ്ട​തു​ണ്ടോ? അതിന്റെ ആവശ്യ​മില്ല. യുക്തി​സ​ഹ​മായ വാദങ്ങൾ ലളിത​മാ​യി അവതരി​പ്പി​ക്കു​മ്പോ​ഴാണ്‌ അത്‌ ഏറെ ഫലകര​മാ​യി​രി​ക്കു​ന്ന​തെന്ന്‌ യേശു​വി​ന്റെ ദൃഷ്ടാന്തം കാണി​ക്കു​ന്നു.

¹⁹ ദൃഷ്ടാ​ന്ത​ത്തിന്‌, കാണാൻ കഴിയാത്ത ഒരു ദൈവ​ത്തിൽ തനിക്ക്‌ വിശ്വാ​സ​മി​ല്ലെന്ന്‌ ആരെങ്കി​ലും പറയു​ന്നെ​ങ്കി​ലോ? പ്രകൃ​തി​യി​ലെ കാര്യ-കാരണ നിയമം ഉപയോ​ഗി​ച്ചു നമുക്കു ന്യായ​വാ​ദം ചെയ്യാൻ സാധി​ക്കും. ഏതൊരു കാര്യ​ത്തി​നും ഒരു കാരണ​മു​ണ്ടെ​ന്നു​ള്ളത്‌ എല്ലാവ​രും അംഗീ​ക​രി​ക്കുന്ന ഒരു വസ്‌തു​ത​യാണ്‌. നമുക്കി​ങ്ങനെ പറയാം: വിജന​മായ ഒരു പ്രദേ​ശത്ത്‌ നിങ്ങൾ എത്തിയി​രി​ക്കു​ക​യാ​ണെന്ന്‌ കരുതുക. നല്ല ഭംഗി​യുള്ള ഒരു വീട്‌ നിങ്ങൾ കാണുന്നു. അവിടെ വളരെ​യ​ധി​കം ഭക്ഷണസാ​ധ​നങ്ങൾ ശേഖരി​ച്ചു​വെ​ച്ചി​ട്ടുണ്ട്‌. ആ വീട്‌ പണിത​തും അവിടെ ഭക്ഷണം ശേഖരി​ച്ചു​വെ​ച്ച​തും ആരോ ഒരാളാ​ണെന്ന്‌ നിങ്ങൾ ന്യായ​മാ​യും നിഗമനം ചെയ്യും. പ്രകൃ​തി​യി​ലെ വിസ്‌മ​യി​പ്പി​ക്കുന്ന രൂപര​ച​ന​യും ഭൂമി​യു​ടെ ‘കലവറ​ക​ളിൽ’ ശേഖരി​ച്ചു​വെ​ച്ചി​രി​ക്കുന്ന ഭക്ഷ്യവ​സ്‌തു​ക്ക​ളും കാണു​മ്പോൾ അതിന്റെ പിന്നി​ലും ആരു​ടെ​യോ കരങ്ങളു​ണ്ടെന്ന്‌ ചിന്തി​ക്കു​ന്നത്‌ ന്യായ​യു​ക്ത​മല്ലേ? ബൈബിൾ പറയു​ന്നതു ശ്രദ്ധി​ക്കുക: “ഏതു ഭവനവും നിർമി​ക്കാൻ ഒരാൾ വേണം; സകലവും നിർമി​ച്ച​വ​നോ ദൈവം​തന്നെ.” (എബ്രായർ 3:4) ഒരു കാര്യം പക്ഷേ നാം മനസ്സിൽപ്പി​ടി​ക്കണം: എത്ര നല്ല വാദമു​ഖങ്ങൾ നിരത്തി​യാ​ലും ചിലരെ ബോധ്യ​പ്പെ​ടു​ത്താ​നാ​യെ​ന്നു​വ​രില്ല.​—2 തെസ്സ​ലോ​നി​ക്യർ 3:2.

20, 21. (എ) യഹോ​വ​യു​ടെ വഴിക​ളെ​യും ഗുണങ്ങ​ളെ​യും കുറിച്ച്‌ പഠിപ്പി​ക്കു​മ്പോൾ യേശു​വി​ന്റെ ഏത്‌ അധ്യയ​ന​രീ​തി നമുക്ക്‌ പിൻപ​റ്റാം? (ബി) അടുത്ത അധ്യാ​യ​ത്തിൽ നാം എന്തി​നെ​ക്കു​റി​ച്ചു പഠിക്കും?

²⁰ വയൽശു​ശ്രൂ​ഷ​യി​ലും സഭയി​ലും യഹോ​വ​യു​ടെ വഴിക​ളെ​യും ഗുണങ്ങ​ളെ​യും കുറിച്ച്‌ ആളുകളെ പഠിപ്പി​ക്കു​മ്പോൾ യേശു​വി​നെ അനുക​രി​ച്ചു​കൊണ്ട്‌, 15-ാം ഖണ്ഡിക​യിൽ പറഞ്ഞി​രി​ക്കുന്ന ന്യായ​വാ​ദ​രീ​തി നമുക്ക്‌ ഉപയോ​ഗി​ക്കാ​വു​ന്ന​താണ്‌. ഉദാഹ​ര​ണ​ത്തിന്‌, അഗ്നിന​ര​ക​ത്തെ​ക്കു​റി​ച്ചുള്ള ഉപദേശം യഹോ​വയെ എത്രമാ​ത്രം നിന്ദി​ക്കു​ന്ന​താ​ണെന്ന്‌ കാണി​ക്കാ​നാ​യി നമുക്ക്‌ ഇങ്ങനെ പറയാം: “സ്‌നേ​ഹ​മുള്ള ഏതെങ്കി​ലു​മൊ​രു അച്ഛൻ തന്റെ കുട്ടിയെ ശിക്ഷി​ക്കാ​നാ​യി അവന്റെ കൈ പൊള്ളി​ക്കു​മോ? അങ്ങനെ​യെ​ങ്കിൽ സ്‌നേ​ഹ​വാ​നായ നമ്മുടെ സ്വർഗ​സ്ഥ​പി​താവ്‌ ആളുകളെ നരകത്തിൽ ദണ്ഡിപ്പി​ക്കു​മെന്നു പറയു​ന്നത്‌ യുക്തിക്കു നിരക്കു​ന്ന​താ​ണോ?” (യിരെ​മ്യാ​വു 7:31) വിഷാ​ദ​ത്തി​ന​ടി​മ​യായ ഒരു സഹവി​ശ്വാ​സി​യെ ആശ്വസി​പ്പി​ക്കു​മ്പോൾ, യഹോവ ആ വ്യക്തിയെ സ്‌നേ​ഹി​ക്കു​ന്നു​ണ്ടെന്ന്‌ ഉറപ്പു​നൽകാ​നാ​യി ഇങ്ങനെ പറയാ​വു​ന്ന​താണ്‌: “ചെറിയ ഒരു കുരു​വി​ക്കു​പോ​ലും യഹോവ ഇത്രയ​ധി​കം വിലകൽപ്പി​ക്കു​ന്നു​ണ്ടെ​ങ്കിൽ തന്റെ ദാസരിൽ ഓരോ​രു​ത്ത​രെ​യും യഹോവ എത്രയ​ധി​കം സ്‌നേ​ഹി​ക്കു​ന്നു​ണ്ടാ​കണം! അവർക്കു​വേണ്ടി അവൻ എത്രയ​ധി​കം കരുതു​ന്നു​ണ്ടാ​കണം!” (മത്തായി 10:29-31) ആളുക​ളു​ടെ ഹൃദയത്തെ സ്‌പർശി​ക്കാൻ ഇത്തരം ന്യായ​വാ​ദ​ങ്ങൾക്കാ​കും.

²¹ ആളുകളെ പഠിപ്പി​ക്കാൻ യേശു ഉപയോ​ഗിച്ച വെറും മൂന്നു​രീ​തി​ക​ളാണ്‌ നാം ഇതുവരെ കണ്ടത്‌. എങ്കിൽപ്പോ​ലും, “ഈ മനുഷ്യൻ സംസാ​രി​ക്കു​ന്ന​തു​പോ​ലെ ആരും ഒരിക്ക​ലും സംസാ​രി​ച്ചി​ട്ടില്ല” എന്ന ആ ഭടൻമാ​രു​ടെ പ്രസ്‌താ​വ​ന​യിൽ ഒട്ടും അതിശ​യോ​ക്തി​യി​ല്ലെന്നു നാം സമ്മതി​ക്കും. അടുത്ത അധ്യാ​യ​ത്തിൽ യേശു​വി​ന്റെ സുപരി​ചി​ത​മായ മറ്റൊരു പഠിപ്പി​ക്കൽരീ​തി, അതായത്‌ ദൃഷ്ടാ​ന്ത​ങ്ങ​ളു​ടെ ഉപയോ​ഗം, നാം കാണും.