മാതാ​പി​താക്കളോട്‌ എങ്ങനെ ഉള്ളു തുറക്കാം?

നിങ്ങൾ എന്തു ചെയ്‌തേനേ?

ഈ രംഗ​മൊ​ന്നു സങ്കൽപ്പി​ക്കുക: ഒരു ബുധനാഴ്‌ച രാത്രി. 17-കാരൻ കിരൺ, വീട്ടിലെ പതിവ്‌ പണി​യെ​ല്ലാം തീർത്ത്‌ അൽപ്പം വിശ്ര​മി​ക്കാ​നാ​യി വന്നതാണ്‌. ടിവി ഓൺ ചെയ്‌തിട്ട്‌ കിരൺ തന്റെ പ്രിയ​പ്പെട്ട കസേര​യി​ലേക്കു ചെന്ന്‌ വീണു.

കൃത്യം ആ സമയത്ത്‌ ഡാഡി അവിടെ എത്തി, ആൾ ഗൗരവ​ത്തി​ലാണ്‌.

കിരണി​ന്റെ സ്ഥാനത്ത്‌ നിങ്ങളാ​യി​രു​ന്നെ​ങ്കിൽ ഈ ഏറ്റുമു​ട്ടൽ എങ്ങനെ ഒഴിവാ​ക്കി​യേനേ?

ഒരു നിമിഷം ചിന്തി​ക്കുക!

മാതാ​പി​താ​ക്ക​ളു​മാ​യി ആശയവി​നി​മയം ചെയ്യു​ന്നതു കാർ ഓടി​ക്കു​ന്ന​തു​പോ​ലെ​യാണ്‌. മുന്നിൽ ഒരു തടസ്സം കണ്ടാൽ നിങ്ങൾക്കു മറ്റൊരു വഴിക്കു യാത്ര തുടരാം.

ഉദാഹരണത്തിന്‌:

ലേയ പറയുന്നു: “എന്റെ ഡാഡിയെ ഒരു കാര്യം പറഞ്ഞ്‌ മനസ്സി​ലാ​ക്കാൻ ഭയങ്കര ബുദ്ധി​മു​ട്ടാണ്‌. ചില​പ്പോൾ ഞാൻ ഡാഡി​യോ​ടു കുറെ സമയം സംസാ​രി​ച്ചു​ക​ഴി​യു​മ്പോ​ഴാ​യിരി​ക്കും ഡാഡി എന്നോടു ചോദി​ക്കു​ന്നത്‌: ‘മോളേ, നീ എന്നോടു വല്ലതും പറഞ്ഞോ?’”

ലേയയുടെ മുന്നിൽ കുറഞ്ഞതു മൂന്നു വഴിക​ളുണ്ട്‌.

1. 1. ഡാഡിയുടെ നേരെ ഒച്ചവെ​ക്കാം.

   ലേയ അലറി​വി​ളി​ക്കു​ന്നു, “ഡാഡീ, ഇതു കേട്ടേ, ഒരു അത്യാ​വ​ശ്യ​മാ! കേട്ടേ പറ്റൂ!”

2. 2. സംസാരം അവി​ടെ​വെച്ച്‌ നിറു​ത്താം.

   പ്രശ്‌നത്തെക്കുറിച്ച്‌ ഡാഡി​യോ​ടു സംസാ​രി​ക്കാ​നുള്ള ശ്രമം ലേയ പെട്ടെ​ന്നങ്ങ്‌ ഉപേക്ഷി​ക്കു​ന്നു.

3. 3. കാത്തിരുന്നിട്ട്‌, കുറെ​ക്കൂ​ടെ നല്ല ഒരു സമയത്ത്‌ വിഷയം വീണ്ടും അവതരി​പ്പി​ക്കാം.

   ലേയ പിന്നീ​ടൊ​രു സമയത്ത്‌ ഡാഡിയെ കണ്ട്‌ സംസാ​രി​ക്കു​ന്നു. അല്ലെങ്കിൽ പ്രശ്‌നം വിവരിച്ച്‌ ഒരു കത്ത്‌ എഴുതു​ന്നു.

ഇതിൽ ഏതു വഴിയാ​ണു നിങ്ങൾ ലേയയ്‌ക്കു പറഞ്ഞു​കൊ​ടു​ക്കുക?

ചിന്തിച്ചുനോക്കൂ: ലേയയു​ടെ ഡാഡി മറ്റ്‌ എന്തോ ചിന്തയി​ലാ​യി​രു​ന്നു. അതു​കൊ​ണ്ടു​തന്നെ അവളുടെ നിരാശ ഡാഡിക്കു മനസ്സി​ലാ​ക്കാ​നാ​യില്ല. ലേയ 1-ാമത്തെ വഴി സ്വീക​രി​ക്കു​ക​യാ​ണെ​ങ്കിൽ അവൾ അലറു​ന്നത്‌ എന്തിനാ​ണെന്ന്‌ അറിയാ​തെ ഡാഡി ഞെട്ടി​പ്പോ​യേ​ക്കാം. ഇങ്ങനെ ചെയ്യു​ന്ന​തു​കൊണ്ട്‌ ലേയ പറയു​ന്നതു കേൾക്കാൻ അദ്ദേഹം കൂടുതൽ താത്‌പ​ര്യം കാണി​ക്ക​ണ​മെ​ന്നില്ല. മാത്രമല്ല, ഇതു ഡാഡി​യോ​ടുള്ള ആദരവും ബഹുമാ​ന​വും സൂചി​പ്പി​ക്കുന്ന കാര്യ​വു​മല്ല. (എഫെസ്യർ 6:3) ഫലത്തിൽ, ഈ മാർഗം രണ്ടു കൂട്ടർക്കും ഗുണം ചെയ്യില്ല.

2-ാമത്തെ വഴി ഏറ്റവും എളുപ്പ​മാ​ണെന്നു തോന്നി​യേ​ക്കാ​മെ​ങ്കി​ലും ഏറ്റവും നല്ലത്‌ അതല്ല. എന്തു​കൊണ്ട്‌? ലേയയു​ടെ പ്രശ്‌നങ്ങൾ ഭംഗി​യാ​യി പരിഹ​രി​ക്ക​ണ​മെ​ങ്കിൽ അവൾ ഡാഡി​യോ​ടു സംസാ​രി​ച്ചേ മതിയാ​കൂ. അദ്ദേഹ​ത്തി​നു സഹായി​ക്കാൻ കഴിയ​ണ​മെ​ങ്കിൽ, അവളെ അലട്ടുന്ന കാര്യങ്ങൾ അദ്ദേഹം അറി​യേ​ണ്ട​തുണ്ട്‌. മിണ്ടാ​തി​രു​ന്നാൽ രണ്ടു കാര്യ​വും നടക്കില്ല.

3-ാമത്തെ വഴി സ്വീക​രി​ക്കു​ക​യാ​ണെ​ങ്കി​ലോ? വഴിയി​ലെ തടസ്സം കണ്ട്‌ യാത്ര നിറു​ത്തി​ക്ക​ള​യുന്ന ഒരാ​ളെ​പ്പോ​ലെ​യാ​കാ​തെ, അവൾ ആ വിഷയം മറ്റൊരു അവസര​ത്തിൽ ചർച്ച ചെയ്യാ​മെന്നു വെക്കുന്നു. ഇനി, ഡാഡിക്ക്‌ ഒരു കത്ത്‌ എഴുതു​ക​യാ​ണെ​ങ്കിൽ അവൾക്ക്‌ അപ്പോൾത്തന്നെ ആശ്വാ​സ​വും തോന്നി​യേ​ക്കാം.

കത്ത്‌ എഴുതി​യാൽ, ലേയയ്‌ക്കു പറയാ​നുള്ള കാര്യങ്ങൾ ചിട്ട​പ്പെ​ടു​ത്തി അവതരി​പ്പി​ക്കാൻ കഴിയു​മെ​ന്നൊ​രു ഗുണവു​മുണ്ട്‌. ആ കത്തു വായി​ക്കു​മ്പോൾ മോൾ എന്താണു പറയാൻ ശ്രമി​ച്ച​തെ​ന്നും അവളുടെ ശരിക്കുള്ള പ്രശ്‌നം എന്താ​ണെ​ന്നും മനസ്സി​ലാ​ക്കാൻ ഡാഡിക്കു കഴി​ഞ്ഞേ​ക്കും. അങ്ങനെ, 3-ാമത്തെ വഴി രണ്ടു പേർക്കും ഒരു​പോ​ലെ ഉപകാ​ര​പ്പെ​ടും. ഡാഡിയെ കണ്ട്‌ സംസാ​രി​ച്ചാ​ലും ഡാഡിക്കു കത്ത്‌ എഴുതി​യാ​ലും 3-ാമത്തെ ഈ വഴി, ‘സമാധാ​ന​ത്തിന്‌ ഉതകുന്ന കാര്യങ്ങൾ പിൻപ​റ്റുക’ എന്ന ബൈബി​ളു​പ​ദേ​ശ​ത്തി​നു ചേർച്ച​യി​ലാണ്‌.—റോമർ 14:19.

ലേയയുടെ മുന്നിൽ മറ്റ്‌ എന്തെല്ലാം വഴിക​ളുണ്ട്‌?

നിങ്ങളുടെ മനസ്സിൽ ഒരു വഴി തെളി​യുന്നുണ്ടോ? എങ്കിൽ, ആ വഴി എവിടെ എത്തി​ച്ചേ​ക്കാ​മെ​ന്നു ചിന്തിക്കുക.

നിങ്ങളുടെ വാക്കുകൾ അവർ തെറ്റി​ദ്ധ​രി​ക്കാ​തി​രി​ക്കട്ടെ

ഓർക്കുക! പലപ്പോ​ഴും നിങ്ങൾ പറയു​ന്ന​തും മാതാ​പി​താ​ക്കൾ മനസ്സി​ലാ​ക്കു​ന്ന​തും രണ്ടും രണ്ടായി​രി​ക്കാം.

ഉദാഹരണത്തിന്‌:

നിങ്ങൾ വല്ലാതി​രി​ക്കു​ന്നതു കണ്ട്‌ മാതാ​പി​താ​ക്കൾ കാര്യം തിരക്കു​മ്പോൾ “ഓ, ഒന്നുമില്ല” എന്നു നിങ്ങൾ പറയുന്നു.

പക്ഷേ മാതാ​പി​താ​ക്കൾ മനസ്സി​ലാ​ക്കു​ന്നത്‌ ഇങ്ങനെ​യാ​കാം: “അത്‌ എനിക്കു നിങ്ങ​ളോ​ടു പറയാൻ തോന്നു​ന്നില്ല. കൂട്ടു​കാ​രോ​ടു പറഞ്ഞോ​ളാം, എന്നാലും നിങ്ങ​ളോ​ടില്ല.”

നിങ്ങൾ കുഴപ്പം​പി​ടിച്ച ഒരു പ്രശ്‌ന​ത്തി​ലാണ്‌. മാതാ​പി​താ​ക്കൾ സഹായി​ക്കാ​മെന്നു പറയുന്നു. “വേണ​മെ​ന്നില്ല, എന്റെ കാര്യം ഞാൻ നോക്കി​ക്കൊ​ള്ളാം” എന്നാണു നിങ്ങളു​ടെ മറുപടി എങ്കിലോ?

• മാതാപിതാക്കൾ അത്‌ എങ്ങനെയായിരിക്കും മനസ്സി​ലാ​ക്കു​ന്നത്‌?

• നിങ്ങൾക്കു കുറെ​ക്കൂ​ടെ നന്നായി എങ്ങനെ പറയാം?