പ്രകൃ​തി​വി​പ​ത്തു​കൾ ദൈവം ഉത്തരവാ​ദി​യോ?

“ദൈമേ, നീ എന്താണു ഞങ്ങളോ​ടീ ചെയ്‌തി​രി​ക്കു​ന്നത്‌?”

1985 നവംബർ 13-നു കൊളം​ബി​യ​യി​ലെ മഞ്ഞുമൂ​ടി​ക്കി​ട​ന്നി​രുന്ന നെവാ​ഡോ ഡെൽ റൂയീസ്‌ പൊട്ടി​ത്തെ​റി​ച്ചു​ണ്ടായ നാശത്തെ അതിജീ​വിച്ച ഒരാൾ പ്രതി​ക​രി​ച്ചത്‌ അങ്ങനെ​യാ​യി​രു​ന്നു. അതിന്റെ അനന്തര​ഫ​ല​മാ​യു​ണ്ടായ മണ്ണിടി​ച്ചിൽ അർമേ​രോ നഗരത്തെ മുഴു​വ​നാ​യി മൂടി​ക്ക​ള​യു​ക​യും ഒററ രാത്രി​കൊണ്ട്‌ 20,000-ത്തിൽ അധികം ആളുകളെ കൊ​ന്നൊ​ടു​ക്കു​ക​യും ചെയ്‌തു.

രക്ഷപെ​ട്ടു​വ​രു​ന്നവൻ അങ്ങനെ പ്രതി​ക​രി​ക്കു​ന്നതു നമുക്കു മനസ്സി​ലാ​ക്കാ​വു​ന്ന​താണ്‌. ഭയായ​ന​ക​മായ പ്രകൃ​തി​ശ​ക്തി​കൾക്കു​മു​മ്പിൽ നിസ്സഹാ​യ​രാ​യി നിന്ന്‌ അത്തരം വിപൽക്ക​ര​മായ സംഭവങ്ങൾ ദൈവം വരുത്തു​ന്ന​താ​ണെന്ന്‌ ആളുകൾ പണ്ടു​തൊ​ട്ടേ പറഞ്ഞി​ട്ടുണ്ട്‌. സമുദ്രം, ആകാശം, ഭൂമി, പർവതം, അഗ്നിപർവതം എന്നിവ​യ്‌ക്കും ഭയമു​ള​വാ​ക്കുന്ന മറെറ​ന്തി​നും ദൈവ​ങ്ങ​ളു​ണ്ടെന്നു കരുതി​യി​രുന്ന പ്രാചീന മനുഷ്യർ അവരെ പ്രസാ​ദി​പ്പി​ക്കാൻ കാഴ്‌ച​ക​ളും ചില​പ്പോൾ നരബലി​യും​പോ​ലും അർപ്പി​ക്കു​മാ​യി​രു​ന്നു. വിനാ​ശ​കാ​രി​ക​ളായ പ്രകൃ​തി​സം​ഭ​വ​ങ്ങ​ളു​ടെ ഭവിഷ്യത്ത്‌ കേവലം തങ്ങളുടെ വിധി​യാ​യോ ദൈവം വരുത്തി​യ​താ​യോ കാണുന്ന ചിലർ ഇന്നുമുണ്ട്‌.

ലോക​മെ​മ്പാ​ടും മനുഷ്യർക്ക്‌ ഒരുപാ​ടു കഷ്ടങ്ങളും നഷ്ടങ്ങളും വരുത്തി​വെ​ക്കുന്ന വിപത്തു​കൾക്കു വാസ്‌ത​വ​ത്തിൽ ദൈവ​മാ​ണോ ഉത്തരവാ​ദി? അവിടു​ത്തെ​യാ​ണോ കുററ​പ്പെ​ടു​ത്തേ​ണ്ടത്‌? ഉത്തരം ലഭിക്ക​ണ​മെ​ങ്കിൽ അത്തരം ദുരന്ത​ങ്ങ​ളിൽ എന്താണ്‌ ഉൾപ്പെ​ട്ടി​രി​ക്കു​ന്ന​തെന്നു നാം കൂടുതൽ സൂക്ഷ്‌മ​മാ​യി പരി​ശോ​ധി​ക്കേ​ണ്ട​തുണ്ട്‌. വാസ്‌ത​വ​ത്തിൽ നമുക്ക​റി​യാ​വുന്ന ഏതാനും വസ്‌തു​തകൾ പുനഃ​പ​രി​ശോ​ധി​ക്കേ​ണ്ട​തു​മുണ്ട്‌.

“പ്രകൃ​തി​വി​പത്ത്‌” എന്താണ്‌?

ചൈന​യി​ലെ ഡങ്ക്‌ഷാ​നിൽ ഒരു ഭൂമി​കു​ലു​ക്ക​മു​ണ്ടാ​യ​പ്പോൾ ചൈന​യിൽനി​ന്നുള്ള ഔദ്യോ​ഗിക റിപ്പോർട്ട​നു​സ​രി​ച്ചു മരണമ​ട​ഞ്ഞത്‌ 2,42,000 പേരാ​യി​രു​ന്നു. ഐക്യ​നാ​ടു​ക​ളിൽ സൗത്ത്‌ ഫ്‌ളോ​റി​ഡ​യി​ലും ലൂസി​യാ​ന​യി​ലും ആൻഡ്രു കൊടു​ങ്കാ​ററ്‌ ആഞ്ഞടി​ച്ച​പ്പോ​ഴു​ണ്ടായ സാമ്പത്തിക നഷ്ടം ആയിര​ക്ക​ണ​ക്കി​നു കോടി​ക​ളു​ടേ​താ​യി​രു​ന്നു. അത്തരം പ്രകൃ​തി​വി​പ​ത്തു​കളെ കുറി​ച്ചുള്ള വാർത്തകൾ അന്താരാ​ഷ്‌ട്ര ശ്രദ്ധ പിടി​ച്ചു​പ​ററി. എന്നുവ​രി​കി​ലും, ആ ഭൂമി​കു​ലു​ക്കം സംഭവി​ച്ചത്‌ ഡങ്ക്‌ഷാ​നിൽനി​ന്നു 1,100 കിലോ​മീ​ററർ വടക്കു​പ​ടി​ഞ്ഞാ​റുള്ള ആൾപ്പാർപ്പി​ല്ലാത്ത ഗോബി മരുഭൂ​മി​യി​ലാ​യി​രു​ന്നെ​ങ്കിൽ, അല്ലെങ്കിൽ ആൻഡ്രു കൊടു​ങ്കാ​ററ്‌ അതിന്റെ ഗതിമാ​റി കരയി​ലെ​ത്താ​തെ സമു​ദ്ര​ത്തിൽ ആഞ്ഞുവീ​ശി​യി​രു​ന്നെ​ങ്കിൽ, അവയു​ടെ​യൊ​ക്കെ ഫലമെ​ന്താ​കു​മാ​യി​രു​ന്നു? ഇന്ന്‌ ആരും അവ ഓർക്കു​മാ​യി​രു​ന്നില്ല.

അപ്പോൾ സുവ്യ​ക്ത​മാ​യും പ്രകൃ​തി​വി​പ​ത്തു​ക​ളെ​പ്പ​ററി സംസാ​രി​ക്കു​മ്പോൾ നാം കേവലം പ്രകൃ​തി​ശ​ക്തി​ക​ളു​ടെ നാടകീ​യ​മായ പ്രകട​ന​ത്തെ​ക്കു​റി​ച്ചല്ല സംസാ​രി​ക്കു​ന്നത്‌. ഓരോ വർഷവും വലുതും ചെറു​തു​മായ ആയിര​ക്ക​ണ​ക്കി​നു ഭൂകമ്പ​ങ്ങ​ളും ഡസൻക​ണ​ക്കി​നു കൊടു​ങ്കാ​റ​റു​ക​ളും ചുഴലി​ക്കാ​റ​റു​ക​ളും അഗ്നിപർവ​ത​സ്‌ഫോ​ട​ന​ങ്ങ​ളും ഉപദ്രവം വരുത്തി​വെ​ക്കുന്ന മററു പ്രതി​ഭാ​സ​ങ്ങ​ളും ഉണ്ടാകാ​റുണ്ട്‌, എന്നാൽ അവയെ​ല്ലാം കേവലം സ്ഥിതി​വി​വ​ര​ക്ക​ണ​ക്കിൽ കയറി​പ്പ​റ​റു​ന്ന​ത​ല്ലാ​തെ മറെറാ​ന്നും ചെയ്യു​ന്നില്ല. എന്നിരു​ന്നാ​ലും, അത്തരം സംഭവങ്ങൾ ജീവനും സ്വത്തി​നും വൻനാ​ശങ്ങൾ വരുത്തി സാധാരണ ജീവി​തത്തെ തടസ്സ​പ്പെ​ടു​ത്തു​മ്പോൾ അവ വിപത്തു​കൾ ആയിത്തീ​രു​ന്നു.

കെടു​തി​ക​ളും നഷ്ടങ്ങളും എല്ലായ്‌പോ​ഴും അവയിൽ ഉൾപ്പെ​ട്ടി​രി​ക്കുന്ന പ്രകൃ​തി​ശ​ക്തി​ക​ളോട്‌ ആനുപാ​തി​ക​മാ​യി​ട്ടാ​യി​രി​ക്കി​ല്ലെന്നു നാം ശ്രദ്ധി​ക്കേ​ണ്ട​തുണ്ട്‌. ഏററവും വലിയ ദുരന്ത​ത്തി​നു കാരണം പ്രകൃ​തി​ശ​ക്തി​ക​ളു​ടെ ഏററവും ശക്തമായ പ്രകട​ന​മാ​ക​ണ​മെ​ന്നില്ല. ഉദാഹ​ര​ണ​ത്തിന്‌, ഐക്യ​നാ​ടു​ക​ളിൽ കാലി​ഫോർണി​യ​യി​ലെ സാൻ ഫെർനാ​ണ്ടോ​യിൽ 1971-ലുണ്ടായ ഭൂമി​കു​ലു​ക്കം റിക്‌ററർ സ്‌കെ​യി​ലിൽ 6.6 എന്നു രേഖ​പ്പെ​ടു​ത്തി​യി​രു​ന്നെ​ങ്കി​ലും ആൾനാശം സംഭവി​ച്ചതു 65 പേർക്കാ​യി​രു​ന്നു. എന്നാൽ ഒരു വർഷം കഴിഞ്ഞ്‌ നിക്കാ​രാ​ഗ്വ​യി​ലെ മനാഗ്വ​യിൽ 6.2 എന്നു രേഖ​പ്പെ​ടു​ത്തിയ ഭൂമി​കു​ലു​ക്ക​മാ​കട്ടെ കൊ​ന്നൊ​ടു​ക്കി​യത്‌ 5,000 പേരെ​യും!

അതിനാൽ, പ്രകൃ​തി​വി​പ​ത്തു​ക​ളു​ടെ വർധി​ച്ചു​വ​രുന്ന സംഹാ​ര​ശേഷി കണക്കി​ലെ​ടു​ക്കു​മ്പോൾ നാം ഇങ്ങനെ ചോദി​ക്കണം, പ്രകൃ​തി​ഘ​ട​കങ്ങൾ കൂടുതൽ അക്രമ​കാ​രി​കൾ ആയിത്തീർന്നി​രി​ക്കു​ക​യാ​ണോ? അതോ മാനു​ഷിക ഘടകങ്ങൾ പ്രസ്‌തുത പ്രശ്‌ന​ത്തി​നു വളം​വെ​ച്ചി​രി​ക്കു​ക​യാ​ണോ?

ആരാണ്‌ ഉത്തരവാ​ദി?

ഈ ഭൂമി​യി​ലെ പ്രകൃ​തി​ശ​ക്തി​കൾ ഉൾപ്പെടെ സകലത്തി​ന്റെ​യും മഹാ​സ്ര​ഷ്ടാ​വാ​യി ബൈബിൾ യഹോ​വ​യാം ദൈവത്തെ തിരി​ച്ച​റി​യി​ക്കു​ന്നു. (ഉല്‌പത്തി 1:1; നെഹെ​മ്യാ​വു 9:6; എബ്രായർ 3:4; വെളി​പ്പാ​ടു 4:11) എന്നാൽ കാററി​ന്റെ ഓരോ ചലനവും അഥവാ ഓരോ മഴയും തൊടു​ത്തു​വി​ടു​ന്നത്‌ അവിടു​ന്നാ​ണെന്ന്‌ ഇതിനർഥ​മില്ല. നേരെ​മ​റിച്ച്‌, ഭൂമി​യെ​യും അതിന്റെ പരിസ്ഥി​തി​യെ​യും നിയ​ന്ത്രി​ക്കുന്ന നിശ്ചിത നിയമങ്ങൾ അവിടു​ന്നു ക്രമീ​ക​രി​ച്ചി​ട്ടുണ്ട്‌. ഉദാഹ​ര​ണ​ത്തിന്‌, ഭൂമി​യിൽ ജീവൻ സാധ്യ​മാ​ക്കുന്ന അടിസ്ഥാന പ്രവർത്ത​ന​ങ്ങ​ളിൽ മൂന്നെ​ണ്ണ​ത്തെ​ക്കു​റി​ച്ചു സഭാ​പ്ര​സം​ഗി 1:5-7-ൽ നാം വായി​ക്കു​ന്നു—ദിവ​സേ​ന​യുള്ള സൂര്യോ​ദ​യ​വും സൂര്യാ​സ്‌ത​മ​യ​വും, സ്ഥിരമായ കാററു​വീ​ശ​ലു​ക​ളു​ടെ രീതി, ജലപരി​വൃ​ത്തി​കൾ. അവയെ​ക്കു​റി​ച്ചു മനുഷ്യ​വർഗം ബോധ​വാൻമാർ ആണെങ്കി​ലും ഇല്ലെങ്കി​ലും ഈ പ്രകൃ​തി​വ്യ​വ​സ്ഥ​ക​ളും ഭൂമി​യു​ടെ കാലവസ്ഥ, ഭൂവി​ജ്ഞാ​നം, പരിസ്ഥി​തി വിജ്ഞാനം എന്നിവ ഉൾക്കൊ​ള്ളു​ന്ന​തു​പോ​ലുള്ള മററു വ്യവസ്ഥ​ക​ളും ആയിര​ക്ക​ണ​ക്കി​നു വർഷങ്ങ​ളാ​യി പ്രവർത്ത​ന​ത്തി​ലുണ്ട്‌. വാസ്‌ത​വ​ത്തിൽ സഭാ​പ്ര​സം​ഗി​യു​ടെ എഴുത്തു​കാ​രൻ സൃഷ്ടി​യു​ടെ സ്ഥിരവും അനന്തവു​മായ വിധങ്ങ​ളും മനുഷ്യ​ജീ​വി​ത​ത്തി​ന്റെ പരിവർത്ത​നാ​ത്മ​ക​വും താത്‌കാ​ലി​ക​വു​മായ സ്വഭാ​വ​വും തമ്മിലുള്ള വലിയ വൈരു​ദ്ധ്യ​ത്തി​ലേക്കു ശ്രദ്ധ ക്ഷണിക്കു​ക​യാ​യി​രു​ന്നു.

യഹോവ പ്രകൃ​തി​ശ​ക്തി​ക​ളു​ടെ സ്രഷ്ടാവ്‌ മാത്രമല്ല, അവയെ നിയ​ന്ത്രി​ക്കാൻ ശക്തിയു​ള്ള​വ​നു​മാണ്‌. തന്റെ ഉദ്ദേശ്യ​നി​വൃ​ത്തി​ക്കാ​യി അത്തരം ശക്തികളെ യഹോവ നിയ​ന്ത്രി​ക്കു​ന്ന​തി​ന്റെ​യോ ഉപയോ​ഗ​പ്പെ​ടു​ത്തു​ന്ന​തി​ന്റെ​യോ വിവര​ണങ്ങൾ ബൈബി​ളി​ലു​ട​നീ​ളം നാം കാണുന്നു. മോശ​യു​ടെ നാളിൽ ചെങ്കടൽ മുറി​ച്ചു​ക​ട​ന്ന​തും യോശു​വാ​യു​ടെ നാളിൽ സൂര്യ​നെ​യും ചന്ദ്ര​നെ​യും ആകാശ​ത്തി​ലെ അവയുടെ പന്ഥാവിൽ പിടി​ച്ചു​നിർത്തി​യ​തും ഇവയിൽ ഉൾപ്പെ​ടു​ന്നു. (പുറപ്പാട്‌ 14:21-28; യോശുവ 10:12, 13) ദൈവ​പു​ത്ര​നും വാഗ്‌ദത്ത മിശി​ഹ​യു​മായ യേശു​ക്രി​സ്‌തു​വും പ്രകൃ​തി​ശ​ക്തി​ക​ളു​ടെ മേലുള്ള തന്റെ അധികാ​രം പ്രകട​മാ​ക്കി. ഉദാഹ​ര​ണ​ത്തിന്‌, ഗലീലാ കടലിൽ വെച്ചു​ണ്ടായ കൊടു​ങ്കാ​റ​റി​നെ അവിടു​ന്നു ശാന്തമാ​ക്കി. (മർക്കൊസ്‌ 4:37-39) ഇതു​പോ​ലുള്ള വിവര​ണങ്ങൾ യഹോ​വ​യാം ദൈവ​ത്തി​നും അവിടു​ത്തെ പുത്ര​നായ യേശു​ക്രി​സ്‌തു​വി​നും ഇവിടെ ഭൂമി​യിൽ ജീവനെ ബാധി​ക്കുന്ന സകലതി​നെ​യും പൂർണ​മാ​യി നിയ​ന്ത്രി​ക്കാ​നാ​കും എന്നതിന്‌ ഒരു സംശയ​വും അവശേ​ഷി​പ്പി​ക്കു​ന്നില്ല.—2 ദിനവൃ​ത്താ​ന്തം 20:6; യിരെ​മ്യാ​വു 32:17; മത്തായി 19:26.

സത്യം ഇതായ​തു​കൊണ്ട്‌, ഈ നാളു​ക​ളി​ലെ പ്രകൃ​തി​വി​പ​ത്തു​കൾ വരുത്തി​ക്കൂ​ട്ടിയ വർധിച്ച കെടു​തി​കൾക്കും നാശത്തി​നും ഉത്തരവാ​ദി​യാ​യി നമുക്കു ദൈവത്തെ കാണാ​നാ​കു​മോ? ഈ ചോദ്യ​ത്തിന്‌ ഉത്തരം കണ്ടെത്തു​ന്ന​തി​നു നാം ആദ്യമാ​യി പ്രകൃ​തി​ശ​ക്തി​കൾ ഈയിടെ നാടകീ​യ​മാ​യി കൂടുതൽ തീക്ഷ്‌ണ​മോ നിയ​ന്ത്ര​ണാ​തീ​ത​മോ ആയിട്ടു​ണ്ടോ എന്നു പരി​ശോ​ധി​ക്കേ​ണ്ട​തുണ്ട്‌.

ഈ വിഷയം സംബന്ധി​ച്ചു പ്രകൃ​തി​വി​പ​ത്തു​കൾ—ദൈവ​ത്തി​ന്റെ പ്രവൃ​ത്തി​ക​ളോ മമനു​ഷ്യ​ന്റെ പ്രവൃ​ത്തി​ക​ളോ? [ഇംഗ്ലീഷ്‌] എന്ന പുസ്‌ത​ക​ത്തി​നു പറയാ​നു​ള്ള​തെ​ന്തെന്നു ശ്രദ്ധി​ക്കുക: “വരൾച്ചകൾ, പ്രളയങ്ങൾ, ചുഴലി​ക്കാ​റ​റു​കൾ എന്നിവ​യു​മാ​യി ബന്ധപ്പെട്ട കാലാ​വ​സ്ഥ​യു​ടെ പ്രവർത്ത​ന​വി​ധ​ങ്ങൾക്കു മാററം സംഭവി​ച്ചു​കൊ​ണ്ടി​രി​ക്കു​ക​യാ​ണെ​ന്ന​തിന്‌ ഒരു തെളി​വു​മില്ല. ഭൂകമ്പങ്ങൾ, അഗ്നിപർവ​തങ്ങൾ, ഭൂകമ്പ തരംഗങ്ങൾ എന്നിവ​യോ​ടു ബന്ധപ്പെട്ട ഭൂചല​നങ്ങൾ കൂടുതൽ തീവ്ര​മാ​യി​ത്തീ​രു​ക​യാ​ണെന്ന്‌ ഒരു ഭൂതത്ത്വ​ശാ​സ്‌ത്ര​ജ്ഞ​നും അവകാ​ശ​പ്പെ​ടു​ന്നില്ല.” അതു​പോ​ലെ ഭൂകമ്പനം [ഇംഗ്ലീഷ്‌] എന്ന പുസ്‌തകം ഇങ്ങനെ നിരീ​ക്ഷി​ക്കു​ന്നു: “വലുതും ചെറു​തു​മായ എണ്ണമററ ഭൂവി​ജ്ഞാ​നീയ സംഭവ​ങ്ങ​ളു​ടെ ഒരു രേഖ ഓരോ ഭൂഖണ്ഡ​ത്തി​ലെ​യും പാറ​ക്കെ​ട്ടു​ക​ളിൽ അടങ്ങി​യി​ട്ടുണ്ട്‌. അവ ഇപ്പോൾ സംഭവി​ച്ചി​രു​ന്നെ​ങ്കിൽ മനുഷ്യ​വർഗ​ത്തിന്‌ അത്‌ ഒരു അതിഭ​യങ്കര വിപത്താ​കു​മാ​യി​രു​ന്നു—ഭാവി​യിൽ അത്തരം സംഭവങ്ങൾ ആവർത്തിച്ച്‌ ഉണ്ടാകു​മെ​ന്നതു ശാസ്‌ത്രീ​യ​മാ​യി തീർച്ച​യു​ള്ള​തു​മാണ്‌.” മറെറാ​രു വിധത്തിൽ പറഞ്ഞാൽ ഭൂമി​യും അതിന്റെ ചലനാത്മക ശക്തിക​ളും നൂററാ​ണ്ടു​ക​ളാ​യി ഏറെക്കു​റെ മാററ​മി​ല്ലാ​തെ നിലനി​ന്നു​പോ​ന്നി​ട്ടുണ്ട്‌. അതു​കൊണ്ട്‌, ചില സ്ഥിതി​വി​വ​ര​ക്ക​ണ​ക്കു​കൾ ഭൂവി​ജ്ഞാ​നീ​യ​മോ മറേറാ ആയ ഏതെങ്കി​ലും തരത്തി​ലുള്ള പ്രവർത്ത​ന​ത്തിൽ ഒരു വർധനവു സൂചി​പ്പി​ച്ചാ​ലും അല്ലെങ്കി​ലും ഈ നാളു​ക​ളിൽ ഭൂമി നിയ​ന്ത്ര​ണാ​തീ​ത​മാ​യി അക്രമ​കാ​രി​യാ​യി​ത്തീർന്നി​ട്ടില്ല.

അപ്പോൾപ്പി​ന്നെ നാം വായി​ച്ച​റി​യുന്ന പ്രകൃ​തി​വി​പ​ത്തു​ക​ളു​ടെ ആവർത്ത​ന​സ്വ​ഭാ​വ​ത്തി​ലും സംഹാ​ര​ശേ​ഷി​യി​ലും വന്ന വർധന​വിന്‌ എന്താണു കാരണം? പഴി ചാരേ​ണ്ടതു പ്രകൃ​തി​ശ​ക്തി​ക​ളെ​യ​ല്ലെ​ങ്കിൽപ്പി​ന്നെ കുററ​മാ​രോ​പി​ക്കാൻ വിരൽ ചൂണ്ടേ​ണ്ടത്‌ മനുഷ്യ​രു​ടെ നേർക്കാ​ണെന്നു വരുന്നു. തീർച്ച​യാ​യും മമനു​ഷ്യ​ന്റെ പ്രവർത്ത​നങ്ങൾ നമ്മുടെ പരിസ്ഥി​തി​യെ പ്രകൃ​തി​വി​പ​ത്തു​കൾക്കു ചായ്‌വു​ള്ള​താ​ക്കു​ക​യും അവയ്‌ക്കു വിധേ​യ​മാ​കാൻ പാകത്തി​ലാ​ക്കു​ക​യും ചെയ്‌തി​രി​ക്കു​ന്നു എന്ന്‌ പണ്ഡിതൻമാർ ഇപ്പോൾ തിരി​ച്ച​റി​ഞ്ഞി​രി​ക്കു​ന്നു. വികസ്വര രാഷ്‌ട്ര​ങ്ങ​ളിൽ ഭക്ഷണത്തി​നാ​യുള്ള വർധി​ച്ചു​വ​രുന്ന ആവശ്യം നിമിത്തം കർഷകർ തങ്ങളുടെ നിലത്തിൽ അമിത​മാ​യി കൃഷി​യി​റ​ക്കാ​നോ ജീവത്‌പ്ര​ധാ​ന​മായ കാടു വെട്ടി​ത്തെ​ളി​ച്ചെ​ടു​ക്കാ​നോ നിർബ​ന്ധി​ത​രാ​കു​ന്നു. ഇതു വൻതോ​തി​ലുള്ള മണ്ണൊ​ലി​പ്പി​ലേക്കു നയിക്കു​ന്നു. ചേരി​പ്ര​ദേ​ശ​ങ്ങ​ളു​ടെ​യും തോന്നിയ വിധത്തിൽ സുരക്ഷി​ത​മ​ല്ലാ​ത്തി​ട​ങ്ങ​ളിൽ പണിതി​രി​ക്കുന്ന കുടി​ലു​ക​ളു​ടെ​യും വ്യാപ​ന​ത്തി​ന്റെ ആക്കം കൂട്ടാൻ ജനസം​ഖ്യാ​പെ​രു​പ്പ​വു​മുണ്ട്‌. കൂടുതൽ വികസിത രാഷ്‌ട്ര​ങ്ങ​ളിൽപ്പോ​ലും സ്ഥിതി വ്യത്യ​സ്‌തമല്ല. വ്യക്തമായ മുന്നറി​യി​പ്പു കൊടു​ത്തി​ട്ടും കാലി​ഫോർണി​യ​യി​ലെ സാൻ അൻഡ്ര​യാസ്‌ ഫാൾട്ടി​ന്റെ ഓരം​ചേർന്നു ജീവി​ക്കുന്ന ദശലക്ഷ​ങ്ങ​ളെ​പ്പോ​ലുള്ള ആളുകൾ തങ്ങളേ​ത്തന്നെ അപകട​സാ​ധ്യ​ത​യിൻ കീഴി​ലാ​ക്കി​യി​രി​ക്കു​ന്നു. അത്തരം സാഹച​ര്യ​ങ്ങ​ളിൽ അസാധാ​ര​ണ​മായ ഒരു സംഭവം—ഒരു കൊടു​ങ്കാ​റേറാ, പ്രളയ​മോ, ഭൂമി​കു​ലു​ക്ക​മോ—ഉണ്ടാകു​മ്പോൾ അതിന്റെ ഭവിഷ്യ​ത്തി​നെ വാസ്‌ത​വ​ത്തിൽ “സ്വാഭാ​വിക”മെന്നു വിളി​ക്കാ​നാ​വു​മോ?

ആഫ്രിക്കൻ സഹേലി​ലെ വരൾച്ച ഇതിന്‌ ഒരു ഉത്തമ ഉദാഹ​ര​ണ​മാണ്‌. വരൾച്ച​യെ​ന്നാൽ മഴയു​ടെ​യോ വെള്ളത്തി​ന്റെ​യോ അഭാവ​മാ​ണെ​ന്നും അതു ക്ഷാമം, പട്ടിണി, മരണം എന്നിവ​യി​ലേക്കു നയിക്കു​ന്നു എന്നുമാ​ണു നാം സാധാ​ര​ണ​ഗ​തി​യിൽ ചിന്തി​ക്കു​ന്നത്‌. പക്ഷേ ആ പ്രദേ​ശത്തെ കടുത്ത ക്ഷാമവും പട്ടിണി​യും കേവലം വെള്ളമി​ല്ലാ​ത്ത​തു​കൊ​ണ്ടാ​ണോ? ആക്രമ​ണ​ത്തി​നി​ര​യാ​കുന്ന പ്രകൃതി [ഇംഗ്ലീഷ്‌] എന്ന പുസ്‌തകം ഇങ്ങനെ പറയുന്നു: “ഇന്നത്തെ ക്ഷാമം തുടരു​ന്നത്‌ ഏറിയ​പ​ങ്കും ദീർഘ​നാ​ളത്തെ വരൾച്ച​കൊ​ണ്ടല്ല, മറിച്ച്‌ നിലത്തി​ന്റെ​യും ജലവി​ഭ​വ​ങ്ങ​ളു​ടെ​യും ദീർഘ​നാ​ളത്തെ ദുരു​പ​യോ​ഗം​കൊ​ണ്ടാണ്‌ എന്നു ശാസ്‌ത്ര​ജ്ഞ​രും ദുരി​താ​ശ്വാ​സ ഏജൻസി​ക​ളും ശേഖരിച്ച തെളി​വു​കൾ സൂചി​പ്പി​ക്കു​ന്നു. . . . സഹേൽ അനുസ്യൂ​തം മരുഭൂ​മി​യാ​യി വളരു​ന്നതു തികച്ചും മനുഷ്യ​നിർമി​ത​മായ ഒരു പ്രതി​ഭാ​സ​മാണ്‌.” ഒരു ദക്ഷിണാ​ഫ്രി​ക്കൻ പത്രമായ ദ നേററൽ വിററ്‌നസ്‌ ഇങ്ങനെ നിരീ​ക്ഷി​ക്കു​ന്നു: “ക്ഷാമം ഭക്ഷണമി​ല്ലാ​യ്‌മയല്ല; ഭക്ഷണം എത്തിപ്പി​ടി​ക്കാൻ കഴിയാത്ത അവസ്ഥയാണ്‌. മററു വാക്കു​ക​ളിൽ പറഞ്ഞാൽ അതു ബന്ധപ്പെ​ട്ടു​കി​ട​ക്കു​ന്നതു ദാരി​ദ്ര്യ​വു​മാ​യി​ട്ടാണ്‌.”

മററു വിപത്തു​കൾ വരുത്തുന്ന നാശങ്ങ​ളിൽ അധിക​പ​ങ്കി​നെ​ക്കു​റി​ച്ചും ഇതുതന്നെ പറയാ​വു​ന്ന​താണ്‌. പ്രകൃ​തി​വി​പ​ത്തു​ക​ളു​ടെ ഫലമാ​യുള്ള മരണനി​രക്കു ലോക​ത്തി​ലെ സമ്പന്ന രാഷ്‌ട്ര​ങ്ങ​ളി​ലേ​തി​നെ​ക്കാൾ ദരിദ്ര രാഷ്‌ട്ര​ങ്ങ​ളി​ലാണ്‌ ആനുപാ​തി​ക​മ​ല്ലാ​ത്ത​വി​ധം കൂടു​ത​ലാ​യി അനുഭ​വ​പ്പെ​ടു​ന്ന​തെന്നു പഠനങ്ങൾ കാണി​ച്ചി​രി​ക്കു​ന്നു. ഉദാഹ​ര​ണ​ത്തിന്‌, ഒരു പഠനമ​നു​സ​രിച്ച്‌ ജപ്പാനിൽ 1960 മുതൽ 1981 വരെ അനുഭ​വ​പ്പെട്ട 43 ഭൂകമ്പ​ങ്ങ​ളി​ലും മററു ദുരന്ത​ങ്ങ​ളി​ലു​മാ​യി മരണമ​ട​ഞ്ഞത്‌ 2,700 പേരാ​യി​രു​ന്നു, അതായത്‌ ഓരോ ദുരന്ത​ത്തി​ലും മരണമ​ട​ഞ്ഞത്‌ ശരാശരി 63 പേർ. അതേ കാലഘ​ട്ട​ത്തിൽ പെറു​വിൽ 31 ദുരന്ത​ങ്ങ​ളി​ലാ​യി മരണമ​ട​ഞ്ഞത്‌ 91,000 പേരാ​യി​രു​ന്നു, അല്ലെങ്കിൽ ഓരോ ദുരന്ത​ത്തി​ലും 2,900 പേർ. എന്തു​കൊ​ണ്ടാ​ണീ വ്യത്യാ​സം? കാരണം പ്രകൃ​തി​വി​പ​ത്തു​കൾ ആയിരി​ക്കാം, പക്ഷേ തത്‌ഫ​ല​മാ​യി സംഭവിച്ച ജീവനാ​ശ​ത്തി​ലും വസ്‌തു​ന​ഷ്ട​ത്തി​ലും കാണുന്ന ഈ വൻവ്യ​ത്യാ​സ​ത്തിന്‌ ഉത്തരവാ​ദി​ത്വം പേറേ​ണ്ടതു മമനു​ഷ്യ​ന്റെ സാമൂ​ഹി​ക​വും സാമ്പത്തി​ക​വും രാഷ്‌ട്രീ​യ​വു​മായ നയങ്ങളാണ്‌.

എന്താണു പരിഹാ​രം?

പ്രകൃ​തി​വി​പ​ത്തു​കളെ നേരി​ടു​ന്ന​തി​നുള്ള പദ്ധതികൾ ആവിഷ്‌ക​രി​ക്കാൻ വർഷങ്ങ​ളോ​ളം ശാസ്‌ത്ര​ജ്ഞൻമാ​രും വിദഗ്‌ധ​രും പാടു​പെ​ട്ടി​ട്ടുണ്ട്‌. ഭൂമി​കു​ലു​ക്ക​ങ്ങ​ളും അഗ്നിപർവ​ത​സ്‌ഫോ​ട​ന​ങ്ങ​ളും എങ്ങനെ സംഭവി​ക്കു​ന്നു എന്നതിനെ സംബന്ധിച്ച ഗ്രാഹ്യം ലഭിക്കാൻ അവർ ഭൂമി​യു​ടെ അഗാധ​ങ്ങ​ളി​ലേക്ക്‌ ആഴ്‌ന്നി​റങ്ങി കൂലങ്ക​ഷ​മാ​യി പരി​ശോ​ധി​ക്കു​ന്നു. ചുഴലി​ക്കാ​റ​റു​ക​ളു​ടെ​യോ കൊടു​ങ്കാ​റ​റു​ക​ളു​ടെ​യോ ഗതി മനസ്സി​ലാ​ക്കാ​നോ പ്രളയ​മോ വരൾച്ച​യോ മുൻകൂ​ട്ടി​പ​റ​യാ​നോ വേണ്ടി ബഹിരാ​കാശ ഉപഗ്ര​ഹങ്ങൾ ഉപയോ​ഗി​ച്ചു​കൊണ്ട്‌ അവർ കാലാ​വ​സ്ഥ​യി​ലെ വ്യതി​യാ​നങ്ങൾ നിരീ​ക്ഷി​ക്കു​ന്നു. ഈ ഗവേഷ​ണ​ങ്ങ​ളി​ലൂ​ടെ ലഭിച്ചി​ട്ടുള്ള വിവര​ങ്ങ​ളെ​ല്ലാം​തന്നെ പ്രകൃ​തി​വി​പ​ത്തു​ക​ളു​ടെ സ്വാധീ​നത്തെ കുറച്ചു​കൊ​ണ്ടു​വ​രാൻ തങ്ങളെ പ്രാപ്‌ത​രാ​ക്കു​മെ​ന്നാണ്‌ അവരുടെ പ്രത്യാശ.

അത്തരം ശ്രമങ്ങൾക്കു ഫലമു​ണ്ടാ​യി​ട്ടു​ണ്ടോ? ചെല​വേ​റി​യ​തും ഉന്നത സാങ്കേ​തി​ക​വി​ദ്യ ആവശ്യ​മു​ള്ള​തു​മായ ഇത്തരം നടപടി​ക​ളെ​ക്കു​റിച്ച്‌ ഒരു പരിസ്ഥി​തി നിരീക്ഷണ സ്ഥാപനം ഇങ്ങനെ വിലയി​രു​ത്തു​ന്നു: “അവയ്‌ക്ക്‌ അവയുടെ സ്ഥാനമുണ്ട്‌. എന്നാൽ അവയ്‌ക്കു​വേണ്ടി താരത​മ്യേന വലിയ അളവിൽ പണവും ശ്രമവും ചെലവ​ഴി​ക്കേ​ണ്ടി​വ​രു​ന്നെ​ങ്കിൽ—ഇരകളാ​കു​ന്നവർ വസിക്കുന്ന സമൂഹ​ത്തി​നു​മേൽ സ്ഥിരമാ​യി ഉരുണ്ടു​കൂ​ടുന്ന അപകടത്തെ അവഗണി​ക്കാൻ അവ ഒരു ഒഴിക​ഴി​വാ​യി ഉതകു​ക​യും അവ വിപത്തു​കളെ കൂടുതൽ വഷളാ​ക്കു​ക​യും ചെയ്യു​ന്നെ​ങ്കിൽ—അപ്പോൾ അവർ ചെയ്യു​ന്നതു നൻമ​യെ​ക്കാ​ളേറെ ദ്രോ​ഹ​മാ​യി​രി​ക്കും.” ഉദാഹ​ര​ണ​ത്തിന്‌, ബംഗ്ലാ​ദേ​ശി​ന്റെ തീര​പ്ര​ദേശം തുട​രെ​ത്തു​ടരെ പ്രളയ​ങ്ങ​ളു​ടെ​യും കടലാ​ക്ര​മ​ണ​ങ്ങ​ളു​ടെ​യും ഭീഷണി​യി​ലാണ്‌ എന്നറി​യു​ന്നത്‌ ഉപകാ​ര​പ്ര​ദ​മാണ്‌, എന്നാൽ ആ അറിവു ലക്ഷക്കണ​ക്കി​നു ബംഗ്ലാ​ദേ​ശി​കളെ അവി​ടെ​ത്തന്നെ വസിക്കു​ന്ന​തിൽനി​ന്നു പിന്തി​രി​പ്പി​ക്കു​ന്നില്ല. ഫലമാ​കട്ടെ, ആവർത്തി​ച്ചുള്ള വിപത്തു​ക​ളും ലക്ഷങ്ങളു​ടെ മരണവും.

സാങ്കേ​തി​ക​മാ​യ അറിവ്‌ ഒരു പരിധി​വരെ മാത്രമേ പ്രയോ​ജ​ന​പ്ര​ദ​മാ​വൂ എന്നതാണു യാഥാർഥ്യം. അപകടങ്ങൾ ഒഴിയാ​ബാ​ധ​യാ​യി​ട്ടുള്ള പ്രദേ​ശ​ങ്ങ​ളി​ലോ പരിസ്ഥി​തി​യെ താറു​മാ​റാ​ക്കുന്ന വിധത്തി​ലോ ജീവി​ച്ചാ​ലും മറെറാ​രി​ട​ത്തും പോയി ജീവി​ക്കാൻ കഴിയാ​ത്ത​വ​രുണ്ട്‌, അവരുടെ സമ്മർദത്തെ ലഘൂക​രി​ക്കാ​നുള്ള പ്രാപ്‌തി​യാണ്‌ ആവശ്യ​മാ​യി​രി​ക്കുന്ന മറെറാ​രു സംഗതി. മറെറാ​രു വിധത്തിൽ പറയു​ക​യാ​ണെ​ങ്കിൽ, ഈ ഘടകങ്ങൾ വരുത്തി​ക്കൂ​ട്ടുന്ന കെടു​തി​കൾക്ക്‌ ഒരു ശമനം വരണ​മെ​ങ്കിൽ നാം ജീവി​ക്കുന്ന സാമൂ​ഹിക, സാമ്പത്തിക, രാഷ്‌ട്രീയ വ്യവസ്ഥി​തി​യെ ഉടച്ചു​വാർക്കേ​ണ്ടി​വ​രും. ആർക്കാണ്‌ അത്തര​മൊ​രു കൃത്യം സാധി​ക്കുക? പ്രകൃ​തി​വി​പ​ത്തു​കൾക്കു കാരണ​മാ​യി​രി​ക്കുന്ന ശക്തിക​ളെ​പ്പോ​ലും നിയ​ന്ത്രി​ക്കാ​നാ​വു​ന്ന​വനു മാത്രം.

ദൈവ​ത്തി​ന്റെ പ്രവൃ​ത്തി​കൾ ആസന്നം

യഹോ​വ​യാം ദൈവം ചികി​ത്സി​ക്കാൻ പോകു​ന്നത്‌ രോഗ​ല​ക്ഷ​ണ​ങ്ങ​ളെയല്ല. മറിച്ച്‌, മനുഷ്യ​ദു​രി​ത​ങ്ങ​ളു​ടെ മൂലകാ​ര​ണ​ത്തെ​യാണ്‌. “മനുഷ്യ​ന്റെ​മേൽ അധികാ​രം സ്ഥാപിച്ച്‌ ദ്രോ​ഹി​ക്കുന്ന” അത്യാർത്തി​പൂ​ണ്ട​തും മർദക​വു​മായ രാഷ്‌ട്രീയ, വാണിജ്യ, മത വ്യവസ്ഥി​തി​കൾക്ക്‌ അവിടുന്ന്‌ അറുതി വരുത്തും. (സഭാ​പ്ര​സം​ഗകൻ 8:9, പി.ഒ.സി. ബൈ.) ഭൂമി​യിൽനി​ന്നു ദുഷ്ടത​യും കഷ്ടപ്പാ​ടും നീക്കി സമാധാ​ന​വും നീതി​യും കളിയാ​ടുന്ന ഒരു ഭൗമിക പറുദീസ വീണ്ടെ​ടു​ക്കാൻ ദൈവം നടപടി എടുക്കുന്ന സമയത്തെ ചൂണ്ടി​ക്കാ​ട്ടുന്ന നിരവധി പ്രവച​നങ്ങൾ ബൈബി​ളി​ന്റെ പേജു​ക​ളി​ലു​ട​നീ​ളം കാണാം. ബൈബിൾ പരിചി​ത​മാ​യി​രി​ക്കുന്ന ആരും അതു ശ്രദ്ധി​ക്കാ​തെ പോക​യില്ല.—സങ്കീർത്തനം 37:9-11, 29; യെശയ്യാ​വു 13:9; 65:17, 20-25; യിരെ​മ്യാ​വു 25:31-33; 2 പത്രൊസ്‌ 3:7; വെളി​പ്പാ​ടു 11:18.

ഫലത്തിൽ അതു യേശു തന്റെ അനുഗാ​മി​കളെ പ്രാർഥി​ക്കാൻ പഠിപ്പിച്ച “അങ്ങയുടെ രാജ്യം വരണമേ. അങ്ങയുടെ ഹിതം സ്വർഗ്ഗ​ത്തി​ലെ​പ്പോ​ലെ ഭൂമി​യി​ലു​മാ​ക​ണമേ” എന്ന സംഗതി​ത​ന്നെ​യാണ്‌. (മത്തായി 6:10, പി.ഒ.സി. ബൈ.) “ആ രാജാ​ക്കൻമാ​രു​ടെ നാളു​ക​ളിൽ, ഒരിക്ക​ലും നശിപ്പി​ക്ക​പ്പെ​ടാ​ത്ത​തും പരമാ​ധി​കാ​രം മറെറാ​രു ജനതയ്‌ക്കും വിട്ടു​കൊ​ടു​ക്കാ​ത്ത​തു​മായ ഒരു രാജ്യം സ്വർഗ്ഗ​സ്ഥ​നായ ദൈവം പടുത്തു​യർത്തും. മേല്‌പറഞ്ഞ രാജ്യ​ങ്ങളെ എല്ലാം തകർത്ത്‌, ഇല്ലാതാ​ക്കി, അത്‌ എന്നേക്കും നിലനിൽക്കും” എന്ന്‌ ദാനി​യേൽ പ്രവാ​ച​ക​നി​ലൂ​ടെ മുൻകൂ​ട്ടി​പ്പ​റ​ഞ്ഞി​രി​ക്കു​ന്ന​തു​പോ​ലെ മിശി​ഹൈക രാജ്യം സകല അപൂർണ മനുഷ്യ​ഭ​ര​ണ​ത്തെ​യും നീക്കി​ക്ക​ള​യും.—ദാനി​യേൽ 2:44, പി.ഒ.സി. ബൈ.

രാഷ്‌ട്ര​ങ്ങൾക്ക്‌ ഇന്നു കഴിയാത്ത ഏതു കാര്യ​ങ്ങ​ളാ​യി​രി​ക്കും ദൈവ​രാ​ജ്യം കൈവ​രി​ക്കുക? വരാനി​രി​ക്കുന്ന സംഗതി​ക​ളു​ടെ ഒരു പുളക​പ്ര​ദ​മായ ഭാവി​ദർശനം ബൈബിൾ നൽകു​ന്നുണ്ട്‌. ക്ഷാമത്തി​നും പട്ടിണി​ക്കും പകരം “ഭൂമി​യിൽ ധാന്യ​സ​മൃ​ദ്ധി ഉണ്ടാകട്ടെ! മലകളിൽ കതിർക്കുല ഉലയട്ടെ!,” “വയലിലെ വൃക്ഷങ്ങൾ ഫലം നല്‌കും; ഭൂമി വിളവു തരും; അവർ തങ്ങളുടെ ദേശത്തു സുരക്ഷി​ത​രാ​യി​രി​ക്കും.” (സങ്കീർത്തനം 72:16എ; എസെക്കി​യേൽ 34:27, പി.ഒ.സി. ബൈ.) പരിസ്ഥി​തി​യെ സംബന്ധി​ച്ചു ബൈബിൾ നമ്മോട്‌ ഇങ്ങനെ പറയുന്നു: “വിജന​ദേ​ശ​വും വരണ്ട പ്രദേ​ശ​വും സന്തോ​ഷി​ക്കും; മരുഭൂ​മി ആനന്ദി​ക്കു​ക​യും പുഷ്‌പി​ക്കു​ക​യും ചെയ്യും. . . . വരണ്ട ഭൂമി​യിൽ ഉറവകൾ പൊട്ടി​പ്പു​റ​പ്പെ​ടും. മരുഭൂ​മി​യി​ലൂ​ടെ നദികൾ ഒഴുകും. തപിച്ച മണലാ​ര​ണ്യം ജലാശ​യ​മാ​യി മാറും. ദാഹി​ച്ചി​രുന്ന ഭൂമി അരുവി​ക​ളാ​യി മാറും.” (ഏശയ്യാ 35:1, 6, 7, പി.ഒ.സി. ബൈ.) മേലാൽ യുദ്ധങ്ങൾ ഉണ്ടായി​രി​ക്കില്ല.—സങ്കീർത്തനം 46:9.

യഹോവ ഇതെല്ലാം എങ്ങനെ നിവർത്തി​ക്കു​മെ​ന്നും മേലാൽ ഒരു ഉപദ്ര​വ​വും ഉണ്ടാക്കാ​ത്ത​വി​ധ​ത്തിൽ പ്രകൃ​തി​ശ​ക്തി​കളെ അവിടുന്ന്‌ എങ്ങനെ മെരു​ക്കി​യെ​ടു​ക്കു​മെ​ന്നും ബൈബിൾ പറയു​ന്നില്ല. എങ്കിലും ഒരു കാര്യം ഉറപ്പാണ്‌, ആ നീതി​നി​ഷ്‌ഠ​മായ ഗവൺമെൻറിൻ കീഴിൽ ജീവി​ക്കു​ന്ന​വ​രു​ടെ “അദ്ധ്വാനം വൃഥാ ആവുക​യില്ല. അവർക്കു ജനിക്കുന്ന ശിശുക്കൾ അത്യാ​ഹി​ത​ത്തിന്‌ ഇരയാ​വു​ക​യില്ല. അവർ കർത്താ​വി​നാൽ അനു​ഗ്ര​ഹി​ക്ക​പ്പെ​ട്ട​വ​രു​ടെ സന്തതി​ക​ളാ​യി​രി​ക്കും; അവരുടെ സന്തതി​ക​ളും അവരോ​ടൊ​പ്പം അനുഗൃ​ഹീ​ത​രാ​കും.”—ഏശയ്യാ 65:23, പി.ഒ.സി. ബൈ.

ദൈവ​രാ​ജ്യം 1914 എന്ന വർഷത്തിൽ സ്വർഗ​ത്തിൽ സ്ഥാപി​ത​മാ​യി എന്ന്‌ ഈ മാഗസി​നി​ലൂ​ടെ​യും വാച്ച്‌ ടവർ സൊ​സൈ​റ​റി​യു​ടെ മററു പ്രസി​ദ്ധീ​ക​ര​ണ​ങ്ങ​ളി​ലൂ​ടെ​യും യഹോ​വ​യു​ടെ സാക്ഷികൾ ആവർത്തി​ച്ചു ചൂണ്ടി​ക്കാ​ണി​ച്ചി​ട്ടുണ്ട്‌. ആ രാജ്യ​ത്തി​ന്റെ മാർഗ​നിർദേ​ശ​ത്തിൻ കീഴിൽ ഏതാണ്ട്‌ 80 വർഷ​ത്തോ​ള​മാ​യി ഒരു ആഗോള സാക്ഷ്യം കൊടു​ത്തി​ട്ടുണ്ട്‌, നാം ഇപ്പോൾ വാഗ്‌ദത്തം ചെയ്യപ്പെട്ട ഒരു “പുതിയ ആകാശ”ത്തിന്റെ​യും ഒരു “പുതിയ ഭൂമി”യുടെ​യും കവാട​ത്തി​ലാണ്‌. പ്രകൃ​തി​വി​പ​ത്തു​ക​ളു​ടെ കെടു​തി​ക​ളിൽനി​ന്നു മാത്രമല്ല കഴിഞ്ഞ ആറായി​രം വർഷ​ത്തോ​ള​മാ​യി മനുഷ്യ​വർഗത്തെ ക്ലേശി​പ്പി​ച്ചു​കൊ​ണ്ടി​രുന്ന സകല വേദന​ക​ളിൽനി​ന്നും കഷ്ടപ്പാ​ടു​ക​ളിൽനി​ന്നും മനുഷ്യ​വർഗം സ്വത​ന്ത്ര​മാ​കും. “പഴയ​തെ​ല്ലാം കടന്നു​പോ​യി” എന്ന്‌ ആ സമയ​ത്തെ​ക്കു​റി​ച്ചു നമുക്കു സത്യമാ​യും പറയാ​നാ​വും.—2 പത്രൊസ്‌ 3:13; വെളി​പ്പാ​ടു 21:4, പി.ഒ.സി. ബൈ.

അങ്ങനെ​യെ​ങ്കിൽ ഇപ്പോ​ഴോ? സാഹച​ര്യ​ങ്ങ​ളാ​ലോ മററു കാരണ​ങ്ങ​ളാ​ലോ അരിഷ്ട​ത​യി​ലാ​യി​രി​ക്കു​ന്ന​വർക്കു​വേണ്ടി ദൈവം പ്രവർത്തി​ക്കു​ന്നു​ണ്ടോ? നിസ്സം​ശ​യ​മാ​യും അവിടു​ന്നു പ്രവർത്തി​ക്കു​ന്നുണ്ട്‌, എന്നാൽ അതു മിക്കയാ​ളു​ക​ളും പ്രതീ​ക്ഷി​ക്കുന്ന വിധത്തി​ലാ​യി​ക്കൊ​ള്ള​ണ​മെ​ന്നില്ല.

[8, 9 പേജു​ക​ളി​ലെ ചിത്രങ്ങൾ]

മമനുഷ്യന്റെ പ്രവർത്ത​നങ്ങൾ നമ്മുടെ പരിസ്ഥി​തി​യെ പ്രകൃ​തി​വി​പ​ത്തു​കൾക്കു കൂടുതൽ ചായ്‌വു​ള്ള​താ​ക്കി​യി​രി​ക്കു​ന്നു

[കടപ്പാട്‌]

Laif/Sipa Press

Chamussy/Sipa Press

Wesley Bocxe/Sipa Press

Jose Nicolas/Sipa Press