മൈ​മോ​നി​ഡസ്‌—യഹൂദ​മ​തത്തെ പുനർനിർവ​ചിച്ച മനുഷ്യൻ

“മോശ​മു​തൽ മോശ​വരെ മോശ​യെ​പ്പോ​ലൊ​രു​വൻ ഉണ്ടായി​രു​ന്നി​ട്ടില്ല.” 12-ാം നൂററാ​ണ്ടി​ലെ യഹൂദ തത്ത്വചി​ന്ത​ക​നും നിയമ സംജ്ഞാ​താ​വും തൽമൂ​ദി​ന്റെ​യും തിരു​വെ​ഴു​ത്തി​ന്റെ​യും വ്യാഖ്യാ​താ​വു​മായ മോശ ബേൻ​മൈ​മോ​ന്റെ—മൈ​മോ​നി​ഡസ്‌, രാംബാംa എന്നീ പേരു​ക​ളി​ലും അറിയ​പ്പെ​ടു​ന്നു—ആശയ​പ്ര​ക​ട​ന​മാ​യി അനേകം യഹൂദർ ഈ ഗുപ്‌ത വാക്യത്തെ തിരി​ച്ച​റി​യും. ഇന്ന്‌ അനേകർക്കും മൈ​മോ​നി​ഡ​സി​നെ പരിച​യ​മില്ല. എങ്കിലും അദ്ദേഹ​ത്തി​ന്റെ എഴുത്തു​കൾ അദ്ദേഹ​ത്തി​ന്റെ നാളു​ക​ളി​ലെ യഹൂദ​രു​ടെ​യും മുസ്ലീ​ങ്ങ​ളു​ടെ​യും സഭാചി​ന്താ​ഗ​തി​യു​ടെ​യും​മേൽ ആഴമായ സ്വാധീ​നം ചെലു​ത്തി​യി​ട്ടുണ്ട്‌. അടിസ്ഥാ​ന​പ​ര​മായ ഒരു വിധത്തിൽ അദ്ദേഹം യഹൂദ​മ​തത്തെ പുനർനിർവ​ചി​ച്ചു. മൈ​മോ​നി​ഡസ്‌ ആരായി​രു​ന്നു, അനേക യഹൂദ​രും അദ്ദേഹത്തെ “രണ്ടാം മോശ”യായി കാണു​ന്ന​തി​നു കാരണ​മെന്ത്‌?

മൈ​മോ​നി​ഡസ്‌ ആരായി​രു​ന്നു?

1135-ൽ സ്‌പെ​യി​നി​ലെ കോർഡോ​ബ​യി​ലാണ്‌ മൈ​മോ​നി​ഡസ്‌ ജനിച്ചത്‌. മതപര​മായ പ്രഥമ പരിശീ​ല​ന​ത്തി​ല​ധി​ക​വും പ്രദാനം ചെയ്‌ത അദ്ദേഹ​ത്തി​ന്റെ പിതാ​വായ മൈ​മോൻ കീർത്തി​പ്പെട്ട റബ്ബിനി​ക്കൽ കുടും​ബ​ത്തിൽനി​ന്നുള്ള ഒരു വിഖ്യാ​ത​നായ പണ്ഡിത​നാ​യി​രു​ന്നു. 1148-ൽ അൽമോ​ഹ​ഡ്‌സ്‌ കോർഡോബ കീഴട​ക്കി​യ​പ്പോൾ യഹൂദൻമാർ ഇസ്ലാം മതത്തി​ലേക്കു മതംമാ​റു​ക​യോ പലായനം ചെയ്യു​ക​യോ ചെയ്യുക എന്ന പ്രതി​സ​ന്ധി​യി​ലാ​യി​രു​ന്നു. ഇത്‌ മൈ​മോ​നി​ഡ​സി​ന്റെ കുടും​ബം ദീർഘ​കാ​ലം അലഞ്ഞു​തി​രി​യാൻ ഇടയാക്കി. 1160-ൽ അവർ മൊ​റോ​ക്കോ​യി​ലെ ഫെസ്‌ എന്ന സ്ഥലത്തു താമസ​മു​റ​പ്പി​ച്ചു. അവി​ടെ​വച്ച്‌ അദ്ദേഹ​ത്തിന്‌ ഒരു ഡോക്ട​റാ​കാ​നുള്ള പരിശീ​ലനം ലഭിച്ചു. 1165-ൽ അദ്ദേഹ​ത്തി​ന്റെ കുടും​ബ​ത്തിന്‌ പാലസ്‌തീ​നി​ലേക്കു പലായനം ചെയ്യേ​ണ്ടി​വന്നു.

എന്നിരു​ന്നാ​ലും, ഇസ്രാ​യേ​ലി​ലെ സ്ഥിതി​ഗ​തി​കൾ അസ്ഥിര​മാ​യി​രു​ന്നു. ഒരു ചെറിയ യഹൂദ സമുദാ​യം ക്രൈ​സ്‌ത​വ​ലോ​ക​ത്തി​ലെ കുരി​ശു​യോ​ദ്ധാ​ക്ക​ളിൽനി​ന്നും മുസ്ലീ​ങ്ങ​ളിൽനി​ന്നും ഒരു​പോ​ലെ അപകടത്തെ അഭിമു​ഖീ​ക​രി​ക്കേ​ണ്ടി​വന്നു. “വിശു​ദ്ധ​ദേശ”ത്തിൽ ആറു മാസം തികയു​ന്ന​തി​നു​മു​മ്പു​തന്നെ മൈ​മോ​നി​ഡ​സും കുടും​ബ​വും ഈജി​പ്‌തിൽ കെയ്‌റോ​യി​ലുള്ള പഴയ നഗരമായ ഫുസ്‌റ​റാ​റ​റിൽ അഭയം പ്രാപി​ച്ചു. ഇവി​ടെ​വ​ച്ചാ​ണു മൈ​മോ​നി​ഡ​സി​ന്റെ കഴിവു​കൾ പൂർണ​മാ​യും തിരി​ച്ച​റി​യാ​നി​ട​യാ​യത്‌. 1177-ൽ അദ്ദേഹം യഹൂദ സമുദാ​യ​ത്തി​ന്റെ തലവനാ​യി​ത്തീർന്നു. 1185-ൽ പ്രസിദ്ധ മുസ്ലീം നേതാ​വാ​യി​രുന്ന സാലദി​ന്റെ കോട​തി​യി​ലെ ഡോക്ട​റാ​യി അദ്ദേഹം നിയു​ക്ത​നാ​യി. 1204-ൽ മരിക്കു​ന്ന​തു​വരെ മൈ​മോ​നി​ഡസ്‌ ഈ രണ്ടു സ്ഥാനങ്ങ​ളും നിലനിർത്തി. വൈദ്യ​ശാ​സ്‌ത്ര രംഗത്ത്‌ അദ്ദേഹ​ത്തി​നു​ണ്ടാ​യി​രുന്ന വൈദ​ഗ്‌ധ്യം പ്രഖ്യാ​ത​മാ​യി​രു​ന്നു. തൻമൂലം അങ്ങകലെ ഇംഗ്ലണ്ടി​ന്റെ അതിശൂ​ര​നാ​യി​രുന്ന റിച്ചാർഡ്‌ രാജാവ്‌ മൈ​മോ​നി​ഡ​സി​നെ തന്റെ വ്യക്തി​പ​ര​മായ ഡോക്ട​റാ​ക്കാൻ ഉദ്യമം നടത്തി​യ​താ​യി പറയ​പ്പെ​ടു​ന്നു.

അദ്ദേഹം എന്താണ്‌ എഴുതി​യത്‌?

മൈ​മോ​നി​ഡസ്‌ ഒരു ഫലപ്ര​ദ​നായ എഴുത്തു​കാ​ര​നാ​യി​രു​ന്നു. മുസ്ലീം പീഡന​ത്തിൽനി​ന്നു പലായനം ചെയ്‌ത്‌ പാത്തും പതുങ്ങി​യും കഴിയവേ അദ്ദേഹം മിഷ്‌ന​യെ​പ്പ​റ​റി​യുള്ള ഭാഷ്യം (ഇംഗ്ലീഷ്‌) എന്ന തന്റെ പ്രമുഖ ഗ്രന്ഥത്തി​ന്റെ സിംഹ​ഭാ​ഗ​വും സമാഹ​രി​ച്ചു.b അറബി​ഭാ​ഷ​യിൽ എഴുതിയ മിഷ്‌ന, ചില​പ്പോ​ഴെ​ല്ലാം യഹൂദ​മതം സംബന്ധി​ച്ചുള്ള മൈ​മോ​നി​ഡ​സി​ന്റെ തത്ത്വചി​ന്ത​യി​ലേക്കു വഴുതി​വീ​ണു​കൊണ്ട്‌ അനേകം സങ്കൽപ്പ​ങ്ങ​ളും പദപ്ര​യോ​ഗ​ങ്ങ​ളും വ്യക്തമാ​ക്കു​ന്നു. സൻഹെ​ദ്രീം എന്ന ലഘു​ലേ​ഖ​യെ​പ്പ​ററി വിശദീ​ക​രി​ക്കുന്ന ഭാഗത്തു മൈ​മോ​നി​ഡസ്‌ യഹൂദമത വിശ്വാ​സ​ത്തി​ന്റെ 13 അടിസ്ഥാന തത്ത്വങ്ങൾ നിർവ​ചി​ച്ചു. യഹൂദ​മതം ഒരിക്ക​ലും ഒരു ആധികാ​രിക പ്രമാ​ണ​മോ വിശ്വാസ പ്രഖ്യാ​പ​ന​മോ നിർവ​ചി​ച്ചി​രു​ന്നില്ല. ഇപ്പോൾ മൈ​മോ​നി​ഡ​സി​ന്റെ 13 വിശ്വാസ തത്ത്വങ്ങൾ യഹൂദ പ്രമാ​ണ​ങ്ങ​ളി​ലെ എത്രയോ നിർവ​ച​ന​ങ്ങൾക്കുള്ള പൂർവ​മാ​തൃ​ക​യാ​യി തീർന്നി​രി​ക്കു​ന്നു.—23-ാം പേജിലെ ചതുരം കാണുക.

സകല വസ്‌തു​ക്ക​ളു​ടെ​യും, ഭൗതി​ക​മാ​യാ​ലും ശരി ആത്മീയ​മാ​യാ​ലും ശരി, യുക്തി​സ​ഹ​മായ ക്രമം നിർവ​ചി​ക്കാൻ മൈ​മോ​നി​ഡസ്‌ ശ്രമം നടത്തി. ഉചിത​മെ​ന്നും ന്യായ​യു​ക്ത​മെ​ന്നും താൻ വീക്ഷി​ച്ച​തി​ന്റെ അടിസ്ഥാ​ന​ത്തിൽ സകലത്തി​നും വിശദീ​ക​രണം തേടി​ക്കൊണ്ട്‌ അദ്ദേഹം അന്ധവി​ശ്വാ​സത്തെ തള്ളിക്ക​ളഞ്ഞു. ഈ സ്വാഭാ​വിക പ്രവണത അദ്ദേഹ​ത്തി​ന്റെ മഹദ്‌ഗ്ര​ന്ഥ​മായ മിഷ്‌നെ തോറc എഴുതു​ന്ന​തി​ലേക്ക്‌ അദ്ദേഹത്തെ നയിച്ചു.

മൈ​മോ​നി​ഡ​സി​ന്റെ നാളിൽ “തോറ” അഥവാ “ന്യായ​പ്ര​മാ​ണം” എന്നത്‌ മോശ രേഖ​പ്പെ​ടു​ത്തി​യി​രി​ക്കുന്ന ലിഖിത വചനങ്ങളെ മാത്രമല്ല നൂററാ​ണ്ടു​ക​ളി​ലു​ട​നീ​ളം ഈ ന്യായ​പ്ര​മാ​ണ​ത്തെ​പ്പ​റ​റി​യുള്ള റബ്ബിമാ​രു​ടെ സകല വ്യാഖ്യാ​ന​ങ്ങ​ളെ​യും പരാമർശി​ക്കു​ന്ന​താ​ണെന്ന്‌ യഹൂദർ കരുതി​യി​രു​ന്നു. തൽമൂ​ദി​ലും തൽമൂ​ദി​നെ​പ്പ​റ​റി​യുള്ള റബ്ബിമാ​രു​ടെ ആയിര​ക്ക​ണ​ക്കി​നു തീരു​മാ​ന​ങ്ങ​ളി​ലും മററു ലേഖന​ങ്ങ​ളി​ലും ഈ ധാരണകൾ രേഖ​പ്പെ​ടു​ത്തി​യി​രു​ന്നു. ഈ വിവര​ങ്ങ​ളു​ടെ​യെ​ല്ലാം വലിപ്പ​വും ക്രമ​ക്കേ​ടും സാധാ​ര​ണ​ക്കാ​ര​നായ ഒരു യഹൂദനെ സംബന്ധി​ച്ചി​ട​ത്തോ​ളം തന്റെ ദൈനം​ദിന ജീവി​തത്തെ ബാധി​ക്കുന്ന തീരു​മാ​നങ്ങൾ എടുക്കു​ന്നത്‌ അസാധ്യ​മാ​ക്കി​ത്തീർത്തു. റബ്ബിമാ​രു​ടെ സാഹി​ത്യ​ങ്ങ​ളെ​ല്ലാം ജീവി​ത​കാ​ലം മുഴുവൻ പഠിക്കാൻ പററിയ സാഹച​ര്യ​ത്തി​ലാ​യി​രു​ന്നില്ല മിക്കവ​രും. പോരാ​ഞ്ഞിട്ട്‌ അതില​ധി​ക​വും പ്രയാ​സ​ക​ര​മായ അരമായ ഭാഷയി​ലാ​യി​രു​ന്നു എഴുത​പ്പെ​ട്ടി​രു​ന്ന​തും. ഈ വിവര​ങ്ങ​ളെ​ല്ലാം അതിന്റെ പ്രാ​യോ​ഗിക തീരു​മാ​നങ്ങൾ പ്രദീ​പ്‌ത​മാ​ക്കി​ക്കൊ​ണ്ടു പ്രകാ​ശനം ചെയ്യു​ക​യും വിഷയ​മ​നു​സ​രിച്ച്‌ 14 പുസ്‌ത​ക​ങ്ങ​ളാ​യി ക്രമീ​ക​രി​ക്കു​ക​യും ചെയ്യുക എന്നതാ​യി​രു​ന്നു മൈ​മോ​നി​ഡസ്‌ കണ്ട പരിഹാ​രം. അദ്ദേഹം അത്‌ വിദഗ്‌ധ​മാ​യി, വ്യക്തമായ, ഒഴുക്കുള്ള എബ്രായ ഭാഷയിൽ എഴുതി.

മിഷ്‌നെ തോറ തൽമൂ​ദി​നെ പൂർണ​മാ​യും കവച്ചു​വ​യ്‌ക്കു​മെന്നു ചില യഹൂദ നേതാക്കൾ ഭയപ്പെ​ടാൻ പോന്ന​വി​ധം അത്ര പ്രാ​യോ​ഗിക സഹായി​യാ​യി​രു​ന്നു അത്‌. അതിനെ എതിർത്ത​വർപോ​ലും അതിൽ അടങ്ങി​യി​രി​ക്കുന്ന വിസ്‌മ​യാ​വ​ഹ​മായ പാണ്ഡി​ത്യ​ത്തെ അംഗീ​ക​രി​ച്ചു. അത്യന്തം ക്രമീ​കൃ​ത​മായ ഈ നിയമ​സം​ഹിത വിപ്ലവാ​ത്മ​ക​മായ ഒരു നേട്ടമാ​യി​രു​ന്നു. അത്‌ യഹൂദ​മ​ത​ത്തെ​പ്പ​ററി ഒരു സാധാരണ യഹൂദനു വിവരി​ച്ചു​കൊ​ടു​ക്കാ​നോ മനസ്സി​ലാ​ക്കാ​നോ കഴിയാഞ്ഞ ഒരു യഹൂദ​മ​ത​സ​മ്പ്ര​ദാ​യ​ത്തി​നു നവജീവൻ പകർന്നു.

പിന്നീട്‌, മൈ​മോ​നി​ഡസ്‌ ചഞ്ചലചി​ത്ത​രു​ടെ വഴികാ​ട്ടി (ഇംഗ്ലീഷ്‌) എന്ന മറെറാ​രു പ്രമുഖ കൃതി എഴുതാ​നുള്ള പുറപ്പാ​ടാ​യി. ഗ്രീക്കു സാഹി​ത്യ​ങ്ങൾ അറബി​യി​ലേക്കു തർജമ ചെയ്യാൻ തുടങ്ങി​യ​തോ​ടെ അരിസ്‌റേ​റാ​ട്ടി​ലും മററു തത്ത്വചി​ന്ത​ക​രു​മാ​യി കൂടുതൽ യഹൂദൻമാർ സുപരി​ചി​ത​രാ​യി. ബൈബി​ളി​ലെ പദപ്ര​യോ​ഗ​ങ്ങ​ളു​ടെ അക്ഷരീയ അർഥം തത്ത്വചി​ന്ത​യു​മാ​യി പൊരു​ത്ത​പ്പെ​ടു​ത്തുക എന്നത്‌ ചിലർക്ക്‌ ആകെ ചിന്താ​ക്കു​ഴപ്പം സൃഷ്ടിച്ചു. അരിസ്‌റേ​റാ​ട്ടി​ലി​നെ അത്യന്തം ആദരിച്ച മൈ​മോ​നി​ഡസ്‌ ചഞ്ചലചി​ത്ത​രു​ടെ വഴികാ​ട്ടി എന്ന ഗ്രന്ഥത്തിൽ തത്ത്വചി​ന്ത​യ്‌ക്കും യുക്തി​ക്കും നിരക്കുന്ന രീതി​യിൽ ബൈബി​ളി​ന്റെ​യും യഹൂദ​മ​ത​ത്തി​ന്റെ​യും സാരാം​ശം വിശദീ​ക​രി​ക്കാൻ ശ്രമം നടത്തി.—താരത​മ്യം ചെയ്യുക: 1 കൊരി​ന്ത്യർ 2:1-5, 11-16.

ഈ പ്രമുഖ കൃതി​കൾക്കും മതപര​മായ മററു ലേഖന​ങ്ങൾക്കും പുറമേ മൈ​മോ​നി​ഡസ്‌ വൈദ്യ​ശാ​സ്‌ത്ര രംഗ​ത്തെ​യും ജ്യോ​തി​ശ്ശാ​സ്‌ത്ര​ത്തെ​യും​പ​ററി ആധികാ​രി​ക​മാ​യി എഴുതി. അദ്ദേഹ​ത്തി​ന്റെ ശക്തമായ തൂലി​ക​യു​ടെ മറെറാ​രു വശം അവഗണി​ച്ചു കൂടാത്ത ഒന്നാണ്‌. “മൈ​മോ​നി​ഡ​സി​ന്റെ ലേഖനങ്ങൾ ലേഖന​മെ​ഴു​ത്തിൽ ചരിത്രം കുറിച്ചു. ഗണ്യമായ അളവിൽ സൂക്ഷി​ച്ചു​വ​ച്ചി​രി​ക്കുന്ന ലേഖന​ങ്ങ​ളു​ടെ ഉടമയായ ആദ്യത്തെ യഹൂദ​നാണ്‌ അദ്ദേഹം. . . . അദ്ദേഹ​ത്തി​ന്റെ ലേഖനങ്ങൾ കത്തിട​പാ​ടു നടത്തിയ വ്യക്തി​ക​ളു​ടെ മനസ്സി​നെ​യും ഹൃദയ​ത്തെ​യും ഹഠാദാ​കർഷി​ച്ചു. അവർക്ക്‌ ഉതകുന്ന രീതി​യിൽ അദ്ദേഹം വൈവി​ധ്യ​മാർന്ന ശൈലി സ്വീക​രി​ച്ചു” എന്ന്‌ എൻ​സൈ​ക്ലോ​പീ​ഡിയ ജൂഡാ​യിക്ക അഭി​പ്രാ​യ​പ്പെ​ടു​ന്നു.

അദ്ദേഹം എന്താണു പഠിപ്പി​ച്ചത്‌?

വിശ്വാ​സം സംബന്ധിച്ച 13 തത്ത്വങ്ങ​ളിൽ മൈ​മോ​നി​ഡസ്‌ വിശ്വാ​സ​ത്തി​ന്റേ​തായ വ്യക്തമായ ബാഹ്യ​രേഖ നൽകു​ക​യു​ണ്ടാ​യി. അതിൽ ചിലതു തിരു​വെ​ഴു​ത്തു​ക​ളിൽ വേരൂ​ന്നി​യ​താ​യി​രു​ന്നു. എന്നിരു​ന്നാ​ലും, ഏഴും ഒമ്പതും തത്ത്വങ്ങൾ യേശു മിശി​ഹാ​യാ​ണെന്ന തിരു​വെ​ഴു​ത്ത​ധി​ഷ്‌ഠിത വിശ്വാ​സ​ത്തി​ന്റെ സാരത്തിന്‌ എതിരാ​യി​ട്ടാണ്‌.d ത്രിത്വം​പോ​ലുള്ള ക്രൈ​സ്‌ത​വ​ലോ​ക​ത്തി​ന്റെ വിശ്വാ​സ​ത്യാ​ഗ​പ​ര​മായ പഠിപ്പി​ക്ക​ലു​ക​ളും കുരി​ശു​യു​ദ്ധ​ത്തിൽ സംഭവിച്ച രക്തച്ചൊ​രി​ച്ചി​ലി​ലൂ​ടെ പ്രകട​മാ​ക്കിയ നിർല​ജ്ജ​മായ കാപട്യ​വും കണക്കി​ലെ​ടു​ക്കു​മ്പോൾ യേശു​വി​ന്റെ മിശി​ഹാ​പ​ദവി സംബന്ധി​ച്ചു മൈ​മോ​നി​ഡസ്‌ കൂടുതൽ ഗവേഷണം നടത്തി​യില്ല എന്നതിൽ അതിശ​യി​ക്കാ​നില്ല.—മത്തായി 7:21-23; 2 പത്രൊസ്‌ 2:1, 2.

മൈ​മോ​നി​ഡസ്‌ ഇങ്ങനെ എഴുതു​ന്നു: “[ക്രിസ്‌ത്യാ​നി​ത്വ]ത്തെക്കാൾ വലി​യൊ​രു ഇടർച്ച​ക്കല്ല്‌ ഉണ്ടായി​രി​ക്കു​മോ? മിശിഹാ ഇസ്രാ​യേ​ലി​ന്റെ വീണ്ടെ​ടു​പ്പു​കാ​ര​നും അതിന്റെ രക്ഷകനു​മാ​ണെന്ന്‌ എല്ലാ പ്രവാ​ച​കൻമാ​രും പറഞ്ഞി​ട്ടുണ്ട്‌ . . . [അതിനു വിപരീ​ത​മാ​യി ക്രിസ്‌ത്യാ​നി​ത്വം] യഹൂദൻമാ​രെ വാളി​നി​ര​യാ​ക്കു​ക​യും അതിന്റെ ശേഷി​പ്പി​നെ നട്ടംതി​രി​യാ​നും അവമാ​നി​ത​രാ​കാ​നും തോറ​യിൽ മാററങ്ങൾ വരുത്താ​നും ലോക​ജ​ന​ത​യിൽ ഭൂരി​പ​ക്ഷ​വും പാപം ചെയ്യാ​നും കർത്താ​വി​നെ​യ​ല്ലാ​തെ വേറൊ​രു ദൈവത്തെ ആരാധി​ക്കാ​നും ഇടയാക്കി.”—മിഷ്‌നെ തോറ, “രാജാ​ക്കൻമാ​രു​ടെ നിയമ​വും അവരുടെ യുദ്ധങ്ങ​ളും,” അധ്യായം 11.

മൈ​മോ​നി​ഡ​സിന്‌ വളരെ​യ​ധി​കം ആദരവു നൽകി​യെ​ന്നു​വ​രി​കി​ലും, അദ്ദേഹം വെട്ടി​ത്തു​റന്നു പറഞ്ഞ ചില വിഷയ​ങ്ങ​ളെ​പ്രതി അദ്ദേഹത്തെ അവഗണി​ക്കാ​നാണ്‌ അനേകം യഹൂദ​രും താത്‌പ​ര്യം കാട്ടി​യത്‌. നിഗൂഢ യഹൂദ​മ​ത​ത്തി​ന്റെ (കബാല) വർധി​ച്ചു​വന്ന സ്വാധീ​നം​മൂ​ലം ജ്യോ​തി​ഷം യഹൂദൻമാ​രു​ടെ​യി​ട​യിൽ കൂടുതൽ പ്രബല​മാ​യി​ത്തീർന്നു. “ജ്യോ​തി​ഷ​ത്തിൽ ഉൾപ്പെ​ട്ടി​രി​ക്കു​ക​യും ജ്യോ​ത്സ്യൻമാർ പറയുന്ന സമയത്തെ ആശ്രയി​ച്ചു തങ്ങളുടെ തൊഴി​ലും യാത്ര​യും ക്രമീ​ക​രി​ക്കു​ക​യും ചെയ്യു​ന്നവർ ചാട്ടവാ​റു​കൊ​ണ്ടുള്ള അടിക്ക്‌ അർഹരാണ്‌ . . . ഈ വക കാര്യ​ങ്ങ​ളെ​ല്ലാം നുണയും വഞ്ചനയു​മാണ്‌ . . . ഇത്തരം കാര്യ​ങ്ങ​ളിൽ വിശ്വ​സി​ക്കുന്ന ഏവനും വിഡ്‌ഢി​യും വിവേ​ക​ശൂ​ന്യ​നു​മാണ്‌” എന്നു മൈ​മോ​നി​ഡസ്‌ എഴുതി.—മിഷ്‌നെ തോറ, “വിഗ്ര​ഹാ​രാ​ധന സംബന്ധിച്ച നിയമം,” അധ്യായം 11; താരത​മ്യം ചെയ്യുക: ലേവ്യ​പു​സ്‌തകം 19:26; ആവർത്ത​ന​പു​സ്‌തകം 18:9-13.

മറെറാ​രു ആചാര​ത്തെ​യും മൈ​മോ​നി​ഡസ്‌ നിശി​ത​മാ​യി വിമർശി​ച്ചു: “[റബിമാർ] വ്യക്തി​ക​ളിൽനി​ന്നും സമുദാ​യ​ങ്ങ​ളിൽനി​ന്നും തങ്ങൾക്കു​വേണ്ട പണം ആവശ്യ​പ്പെ​ട്ടത്‌ അവർക്ക്‌ അതു നൽകാൻ കടപ്പെ​ട്ടി​രി​ക്കു​ന്നു​വെ​ന്നും അത്‌ ഉചിത​മാ​ണെ​ന്നും ചിന്തി​ക്കാൻപോ​ന്ന​വി​ധം ജനങ്ങളെ വിഡ്‌ഢി​ക​ളാ​ക്കി. . . . ഇതെല്ലാം തെററാണ്‌. ഈ ധാരണയെ പിന്താ​ങ്ങുന്ന ഒരൊററ വാക്കു​പോ​ലും തോറ​യി​ലോ [തൽമൂദ്‌ കാലഘ​ട്ട​ത്തി​ലെ] പണ്ഡിത​ശ​ക​ല​ങ്ങ​ളി​ലോ ഇല്ല.” (മിഷ്‌ന​യെ​പ്പ​റ​റി​യുള്ള ഭാഷ്യം, അവൊട്ട്‌ 4:5) ഈ റബിമാ​രിൽനി​ന്നു വ്യത്യ​സ്‌ത​നാ​യി മൈ​മോ​നി​ഡസ്‌ സ്വന്ത ആവശ്യ​ങ്ങൾക്കു​വേണ്ടി ഒരു ഡോക്ട​റെന്ന നിലയിൽ കഠിന​മാ​യി പ്രയത്‌നി​ച്ചു. മതപര​മായ സേവന​ങ്ങൾക്കു​വേണ്ടി അദ്ദേഹം ഒരിക്ക​ലും പ്രതി​ഫലം വാങ്ങി​യില്ല.—താരത​മ്യം ചെയ്യുക: 2 കൊരി​ന്ത്യർ 2:17; 1 തെസ്സ​ലൊ​നീ​ക്യർ 2:9.

യഹൂദ​മ​ത​ത്തെ​യും മററു വിശ്വാ​സ​ങ്ങ​ളെ​യും എങ്ങനെ​യാ​ണു ബാധി​ച്ചത്‌?

യെരു​ശ​ലേ​മി​ലെ ഹീബ്രൂ സർവക​ലാ​ശാ​ല​യി​ലെ പ്രൊ​ഫ​സ​റായ യഷിയാ​ഹൂ ലൈ​ബോ​വി​റ​റ്‌സ്‌ ഇങ്ങനെ പ്രസ്‌താ​വി​ച്ചു: “ഗോ​ത്ര​പി​താ​ക്കൻമാ​രു​ടെ​യും പ്രവാ​ച​കൻമാ​രു​ടെ​യും യുഗം​മു​തൽ ഇന്നേവരെ യഹൂദമത ചരി​ത്ര​ത്തി​ലെ ഏററവും പ്രഭാ​വ​ശാ​ലി​യായ വ്യക്തി മൈ​മോ​നി​ഡ​സാണ്‌.” എൻ​സൈ​ക്ലോ​പീ​ഡിയ ജൂഡാ​യിക്ക ഇങ്ങനെ അഭി​പ്രാ​യ​പ്പെ​ടു​ന്നു: “യഹൂദ​മ​ത​ത്തി​ന്റെ ഭാവി വികസ​ന​ത്തിൽ മൈ​മോ​നി​ഡ​സി​നുള്ള പങ്കു കണക്കു​കൂ​ട്ടാ​നാ​വാ​ത്ത​താണ്‌. മൈ​മോ​നി​ഡസ്‌ ഇല്ലായി​രു​ന്നെ​ങ്കിൽ യഹൂദ​മതം വ്യത്യസ്‌ത മതവി​ഭാ​ഗ​ങ്ങ​ളും വിശ്വാ​സ​ങ്ങ​ളു​മാ​യി ഛിന്നഭി​ന്ന​മാ​യി​ത്തീർന്നേനെ . . . വ്യത്യസ്‌ത വിഭാ​ഗ​ങ്ങളെ ഏകീഭ​വി​പ്പി​ക്കുക എന്നത്‌ അദ്ദേഹ​ത്തി​ന്റെ വലിയ നേട്ടമാ​യി​രു​ന്നു എന്നുവരെ സി. ചിർനോ​വി​റ​റ്‌സ്‌ . . . പ്രസ്‌താ​വി​ക്കു​ന്നു.”

ക്രമം, യുക്തി എന്നിവ സംബന്ധിച്ച തന്റെ സ്വന്തം ധാരണ​കൾക്കു ചേരും​വി​ധം യഹൂദ ചിന്താ​ഗ​തി​യെ പുനഃ​ക്ര​മീ​ക​രി​ച്ചു​കൊണ്ട്‌ മൈ​മോ​നി​ഡസ്‌ യഹൂദ​മ​തത്തെ പുനർനിർവ​ചി​ച്ചു. ഈ പുതിയ നിർവ​ചനം പ്രാ​യോ​ഗി​ക​വും ആകർഷ​ക​വു​മാ​ണെന്നു പണ്ഡിത​രും സാമാന്യ ജനവും ഒരു​പോ​ലെ കണ്ടെത്തി. മൈ​മോ​നി​ഡ​സി​ന്റെ എതിരാ​ളി​കൾപോ​ലും ക്രമേണ അദ്ദേഹ​ത്തി​ന്റെ സമീപ​ന​ത്തിൽ അധിക​വും അംഗീ​ക​രി​ച്ചു. അദ്ദേഹ​ത്തി​ന്റെ എഴുത്തു​കൾ, കയ്യും​ക​ണ​ക്കു​മി​ല്ലാത്ത ഭാഷ്യ​ങ്ങ​ളിൽനി​ന്നു യഹൂദരെ മോചി​പ്പി​ക്കുക എന്ന ഉദ്ദേശ്യ​ത്തി​ലാ​യി​രു​ന്നു എന്നുവ​രി​കി​ലും പെട്ടെ​ന്നു​തന്നെ അദ്ദേഹ​ത്തി​ന്റെ കൃതി​ക​ളെ​പ്പ​ററി ഭാഷ്യങ്ങൾ എഴുതാൻ തുടങ്ങി.

“മധ്യയു​ഗ​ങ്ങ​ളി​ലെ ഏററവും അഗ്രഗ​ണ്യ​നായ യഹൂദ തത്ത്വചി​ന്തകൻ മൈ​മോ​നി​ഡസ്‌ ആയിരു​ന്നു . . . അദ്ദേഹ​ത്തി​ന്റെ ഗ്രന്ഥമായ ചഞ്ചലചി​ത്ത​രു​ടെ വഴികാ​ട്ടി യഹൂദർ രചിച്ചി​ട്ടുള്ള തത്ത്വചി​ന്താ​പ​ര​മായ കൃതി​ക​ളിൽ വച്ചേറ​റ​വും പ്രധാ​ന​പ്പെ​ട്ട​താണ്‌” എന്ന്‌ എൻ​സൈ​ക്ലോ​പീ​ഡിയ ജൂഡാ​യിക്ക അഭി​പ്രാ​യ​പ്പെ​ടു​ന്നു. ചഞ്ചലചി​ത്ത​രു​ടെ വഴികാ​ട്ടി അറബി​ഭാ​ഷ​യി​ലാണ്‌ എഴുത​പ്പെ​ട്ട​തെ​ങ്കി​ലും മൈ​മോ​നി​ഡസ്‌ ജീവി​ച്ചി​രി​ക്കു​മ്പോൾതന്നെ അത്‌ എബ്രാ​യ​ഭാ​ഷ​യി​ലേ​ക്കും അതിനു​ശേഷം ഉടൻതന്നെ ലത്തീനി​ലേ​ക്കും തർജമ ചെയ്യു​ക​യു​ണ്ടാ​യി. അങ്ങനെ അത്‌ പഠനത്തി​നു​വേണ്ടി യൂറോ​പ്പി​ലു​ട​നീ​ളം ലഭ്യമാ​ക്കി​ത്തീർത്തു. തൽഫല​മാ​യി അരിസ്‌റേ​റാ​ട്ടി​ലി​ന്റെ തത്ത്വചി​ന്ത​യും യഹൂദ്യ ചിന്താ​ഗ​തി​യും അനുപ​മ​മാ​യ​വി​ധം സംശ്ലേ​ഷി​ച്ചു​ണ്ടാ​ക്കിയ മൈ​മോ​നി​ഡ​സി​ന്റെ ആശയങ്ങൾ പെട്ടെ​ന്നു​തന്നെ ക്രൈ​സ്‌ത​വ​ലോ​ക​ത്തി​ന്റെ ചിന്താ​ഗ​തി​യു​ടെ മുഖ്യ​ധാ​ര​യിൽ പ്രവേ​ശി​ച്ചു. ആ കാലഘ​ട്ട​ത്തി​ലെ കൈസ്‌ത്ര​വ​ലോക പണ്ഡിതൻമാ​രാ​യി​രുന്ന അൽബർട്ടസ്‌ മാഗ്നസും തോമ​സി​നെ​യും അക്വി​നാ​സി​നെ​യും​പോ​ലു​ള്ളവർ മിക്ക​പ്പോ​ഴും മൈ​മോ​നി​ഡ​സി​ന്റെ വീക്ഷണങ്ങൾ പരാമർശി​ക്കാ​റുണ്ട്‌. ഇസ്ലാമിക പണ്ഡിതൻമാ​രും അതിനാൽ സ്വാധീ​നി​ക്ക​പ്പെട്ടു. മൈ​മോ​നി​ഡ​സി​ന്റെ തത്ത്വചി​ന്താ​പ​ര​മായ സമീപനം ഓർത്തോ​ഡോ​ക്‌സ്‌ യഹൂദ​മ​ത​ത്തിൽനി​ന്നു പൂർണ​മാ​യും വിട്ടു​പോ​രാൻ തക്കവണ്ണം ബാറൂക്‌ സ്‌പി​നോ​സാ​യെ​പ്പോ​ലുള്ള പിൽക്കാല യഹൂദ തത്ത്വചി​ന്ത​കൻമാ​രെ സ്വാധീ​നി​ക്കു​ക​യു​ണ്ടാ​യി.

നാനകാ​ല​ത്തി​നു​മു​മ്പു ജീവി​ച്ചി​രുന്ന ഒരു മത നകനായി മൈ​മോ​നി​ഡ​സി​നെ പരിഗ​ണി​ക്കാ​വു​ന്ന​താണ്‌. വിശ്വാ​സം യുക്തിക്കു നിരക്കു​ന്ന​താ​യി​രി​ക്ക​ണ​മെന്ന അദ്ദേഹ​ത്തി​ന്റെ വാദം ഇപ്പോ​ഴും മൂല്യ​മുള്ള ഒരു തത്ത്വമാണ്‌. മതപര​മായ അന്ധവി​ശ്വാ​സ​ത്തി​നെ​തി​രെ രൂക്ഷമാ​യി സംസാ​രി​ക്കു​ന്ന​തിന്‌ ഈ തത്ത്വം അദ്ദേഹത്തെ നയിച്ചു. എങ്കിലും, ക്രൈ​സ്‌ത​വ​ലോ​ക​ത്തി​ന്റെ മോശ​മായ മാതൃ​ക​യും അരിസ്‌റേ​റാ​ട്ടി​ലി​ന്റെ തത്ത്വചി​ന്താ​പ​ര​മായ സ്വാധീ​ന​വും ബൈബിൾ സത്യ​ത്തോ​ടു പൂർണ യോജി​പ്പിൽ നിഗമ​ന​ങ്ങ​ളിൽ എത്തി​ച്ചേ​രു​ന്ന​തിന്‌ അദ്ദേഹ​ത്തി​നു തടസ്സമാ​യി. മൈ​മോ​നി​ഡ​സി​ന്റെ കല്ലറയിൽ ആലേഖനം ചെയ്‌തി​രി​ക്കുന്ന “മോശ​മു​തൽ മോശ​വരെ മോശ​യെ​പ്പോ​ലൊ​രു​വൻ ഉണ്ടായി​രു​ന്നി​ട്ടില്ല” എന്ന സ്‌മാ​ര​ക​ലേ​ഖ​യോട്‌ എല്ലാവ​രു​മൊ​ന്നും യോജി​ക്കു​ക​യി​ല്ലെ​ങ്കി​ലും അദ്ദേഹം യഹൂദ​മ​ത​ത്തി​ന്റെ ഘടനയും ഗതിയും പുനർനിർവ​ചി​ച്ചു​വെന്നു സമ്മതിച്ചേ മതിയാ​വൂ.

[അടിക്കു​റി​പ്പു​കൾ]

[23-ാം പേജിലെ ചതുരം]

മൈമോനിഡസിന്റെ 13 വിശ്വാസ തത്ത്വങ്ങൾe

1.സകലത്തി​ന്റെ​യും സ്രഷ്ടാ​വും ഭരണാ​ധി​പ​തി​യും ദൈവ​മാണ്‌. സകലവും സൃഷ്ടി​ച്ച​തും സൃഷ്ടി​ക്കു​ന്ന​തും സൃഷ്ടി​ക്കാൻ പോകു​ന്ന​തും അവൻ മാത്ര​മാണ്‌.

2.ദൈവം ഏകനാണ്‌. ഏതെങ്കി​ലും വിധത്തിൽ അവനെ​പ്പോ​ലുള്ള യാതൊ​രു ഏകത്വ​വും ഇല്ല.

3.ദൈവ​ത്തിന്‌ ഒരു ശരീര​മില്ല. ഭൗതിക സങ്കൽപ്പങ്ങൾ അവനു ബാധക​മാ​കു​ന്നില്ല.

4.ദൈവം ആദിയും അന്തവു​മാണ്‌.

5.ദൈവ​ത്തോ​ടു​മാ​ത്രം പ്രാർഥി​ക്കു​ന്ന​താണ്‌ ഉചിതം. വേറൊ​രു​വ​നോ​ടോ വേറൊ​ന്നി​നോ​ടോ ഒരുവൻ പ്രാർഥി​ക്ക​രുത്‌.

6.പ്രവാ​ച​കൻമാ​രു​ടെ എല്ലാ വചനങ്ങ​ളും സത്യമാണ്‌.

7.മോശ​യു​ടെ പ്രവചനം തികച്ചും സത്യമാണ്‌. അവൻ തനിക്കു മുമ്പും പിമ്പും ഉണ്ടായി​രു​ന്നി​ട്ടുള്ള സകല പ്രവാ​ച​കൻമാ​രി​ലും മുഖ്യ​നാണ്‌.

8.നമ്മുടെ പക്കലുള്ള മുഴു തോറ​യും മോശ​യ്‌ക്കു നൽക​പ്പെ​ട്ട​താണ്‌.

9.തോറ​യിൽ ഒരിക്ക​ലും മാററ​മു​ണ്ടാ​ക​യില്ല, ദൈവം വേറൊ​ന്നു നൽകു​ക​യു​മില്ല.

10.മമനു​ഷ്യ​ന്റെ സകല പ്രവൃ​ത്തി​ക​ളും ചിന്താ​ഗ​തി​ക​ളും ദൈവം അറിയു​ന്നു.

11.തന്റെ കൽപ്പനകൾ പാലി​ക്കു​ന്ന​വർക്കു ദൈവം പ്രതി​ഫലം നൽകുന്നു, തനി​ക്കെ​തി​രെ പാപം ചെയ്യു​ന്ന​വരെ അവൻ ശിക്ഷി​ക്കു​ന്നു.

12.മിശിഹാ വരും.

13.മരിച്ചവർ ജീവനി​ലേക്കു തിരികെ വരുത്ത​പ്പെ​ടും.

[അടിക്കു​റി​പ്പു​കൾ]

[21-ാം പേജിലെ ചിത്ര​ത്തിന്‌ കടപ്പാട]

Jewish Division / The New York Public Library / Astor, Lenox, and Tilden Foundations