കൊടു​ക്കൽ—അതു പ്രതീ​ക്ഷി​ക്കു​ന്നു​ണ്ടോ?

സമ്മാനങ്ങൾ കൊടു​ക്കു​ന്നതു മിക്ക​പ്പോ​ഴും ആചാര​പ്ര​കാ​ര​മാ​ണെ​ന്നതു നിങ്ങൾക്കു നന്നായി അറിയാ​മാ​യി​രി​ക്കും. മിക്ക സംസ്‌കാ​ര​ങ്ങ​ളി​ലും സമ്മാനങ്ങൾ പ്രതീ​ക്ഷി​ക്കുന്ന സന്ദർഭ​ങ്ങ​ളുണ്ട്‌. അത്തരം സമ്മാനങ്ങൾ ആദരവി​ന്റെ​യോ സ്‌നേ​ഹ​പ്ര​ക​ട​ന​ങ്ങ​ളു​ടെ​യോ സൂചക​മാ​ണെന്ന്‌ അർഥമാ​ക്കി​യേ​ക്കാം. അവയി​ല​നേ​ക​വും സ്വീകർത്താ​ക്കൾ ഒരിക്ക​ലും ഉപയോ​ഗി​ക്കു​ന്നില്ല; മറ്റു ചിലവ യഥാർഥ ആവശ്യം നികത്താൻ സഹായി​ക്കു​ക​യും ആഴമായി വിലമ​തി​ക്ക​പ്പെ​ടു​ക​യും ചെയ്യുന്നു.

ഡെൻമാർക്കിൽ ഒരു കുട്ടി ജനിക്കു​മ്പോൾ സുഹൃ​ത്തു​ക്ക​ളും ബന്ധുക്ക​ളും സന്ദർശി​ക്കു​ക​യും കുഞ്ഞിനു പ്രയോ​ജ​ന​പ്ര​ദ​മെന്നു കരുതുന്ന സമ്മാനങ്ങൾ തങ്ങളോ​ടൊ​പ്പം കൊണ്ടു​വ​രി​ക​യും ചെയ്യുന്നു. മറ്റു ചില നാടു​ക​ളിൽ, ജനനം പ്രതീ​ക്ഷി​ച്ചു സമ്മാനങ്ങൾ കൊടു​ക്കുന്ന സത്‌കാ​രം സുഹൃ​ത്തു​ക്കൾ നടത്തുന്നു.

മിക്ക​പ്പോ​ഴും, വാർഷിക പരിപാ​ടി​ക​ളി​ലാ​ണു സമ്മാനങ്ങൾ പ്രതീ​ക്ഷി​ക്കു​ന്നത്‌. അത്തരം ആഘോ​ഷങ്ങൾ ആദിമ ക്രിസ്‌ത്യാ​നി​ക​ളു​ടെ​യി​ട​യിൽ ഒരു പതിവാ​യി​രു​ന്നി​ല്ലെ​ങ്കി​ലും ഇന്നു ക്രിസ്‌ത്യാ​നി​ക​ളെന്ന്‌ അവകാ​ശ​പ്പെ​ടു​ന്ന​വ​രു​ടെ​യും അ​ക്രൈ​സ്‌ത​വ​രു​ടെ​യും ഇടയിൽ അവ ഒരു​പോ​ലെ പ്രചു​ര​പ്ര​ചാ​രം നേടി​യി​രി​ക്കു​ക​യാണ്‌. ചില സംസ്‌കാ​ര​ങ്ങ​ളിൽ, കുട്ടി​കൾക്കു പ്രായ​മാ​കു​ന്ന​തോ​ടെ ജന്മദി​ന​ങ്ങ​ളിൽ സമ്മാനങ്ങൾ നൽകുന്ന പതിവ്‌ കുറഞ്ഞു​കു​റഞ്ഞു വന്നേക്കം. എന്നാൽ ഗ്രീക്കു​കാ​രു​ടെ ആചാരം മറിച്ചാണ്‌ അനുശാ​സി​ക്കു​ന്നത്‌. ഗ്രീസിൽ ജന്മദി​ന​ത്തി​നു വളരെ​യ​ധി​കം ശ്രദ്ധ​കൊ​ടു​ക്കു​ന്നു. അവർ ഒരു വ്യക്തിക്ക്‌ അയാളു​ടെ “പേരിടൽ ദിന”ത്തിലും സമ്മാനങ്ങൾ നൽകുന്നു. അതെന്താണ്‌? കൊള്ളാം, മതപര​മായ ആചാരങ്ങൾ വർഷത്തി​ലെ ഓരോ നാളി​നും ഓരോ “പുണ്യ​വാള”ന്റെ പേരു നൽകി​യി​രി​ക്കു​ന്നു. അനേകർക്കും “പുണ്യ​വാ​ള​ന്മാ​രു”ടെ പേരു നൽക​പ്പെ​ടു​ന്നു​മുണ്ട്‌. “പുണ്യ​വാ​ളന്റെ” നാൾ വന്നെത്തു​മ്പോൾ ആ പേരി​ലുള്ള വ്യക്തിക്കു സമ്മാനങ്ങൾ കിട്ടുന്നു.

കുട്ടി​ക​ളു​ടെ ജന്മദി​നാ​ഘോ​ഷ​ങ്ങൾക്കു പുറമേ, കൊറി​യ​ക്കാർക്ക്‌ ശിശു​ദി​നം എന്നറി​യ​പ്പെ​ടുന്ന ഒരു ദേശീയ വിശേ​ഷ​ദി​ന​മുണ്ട്‌. കുടും​ബങ്ങൾ ഉല്ലാസ​വേ​ള​കൾക്കാ​യി പുറത്തു​പോ​കു​ക​യും കുട്ടി​കൾക്ക്‌ അവരുടെ ജന്മദിനം കണക്കി​ലെ​ടു​ക്കാ​തെ സമ്മാനങ്ങൾ നൽകു​ക​യും ചെയ്യുന്ന സമയമാ​ണത്‌. കൊറി​യ​ക്കാർക്ക്‌ രക്ഷാകർത്തൃ ദിനവും അധ്യാപക ദിനവു​മുണ്ട്‌. അന്നു കുട്ടികൾ മാതാ​പി​താ​ക്കൾക്കും വിദ്യാർഥി​കൾ അധ്യാ​പ​കർക്കും സമ്മാനങ്ങൾ നൽകി അവരെ ആദരി​ക്കു​ന്നു. കൊറി​യാ​ക്കാ​രു​ടെ ആചാര​മ​നു​സ​രിച്ച്‌, ഒരു വ്യക്തിക്ക്‌ 60 വയസ്സാ​കു​മ്പോൾ വലിയ ഒരു സത്‌കാ​രം നടത്തുന്നു. ആ ജീവിത ഘട്ടത്തിൽ എത്തിയ ആൾക്കു കുടും​ബാം​ഗ​ങ്ങ​ളും സുഹൃ​ത്തു​ക്ക​ളും ദീർഘാ​യു​സ്സും സന്തുഷ്ടി​യും നേരു​ക​യും സമ്മാനങ്ങൾ നൽകു​ക​യും ചെയ്യുന്നു.

ജനസമ്മ​തി​യു​ള്ള ആചാര​മ​നു​സ​രി​ച്ചു സമ്മാനങ്ങൾ നൽകേണ്ട മറ്റൊരു സന്ദർഭം വിവാ​ഹ​മാണ്‌. കെനി​യ​യിൽ ഒരു ദമ്പതികൾ വിവാ​ഹി​ത​രാ​കു​മ്പോൾ വരന്റെ കുടും​ബം വധുവി​ന്റെ കുടും​ബ​ത്തി​നു സമ്മാനം നൽകാൻ പ്രതീ​ക്ഷി​ക്ക​പ്പെ​ടു​ന്നു. അതിഥി​ക​ളും സമ്മാനങ്ങൾ കൊണ്ടു​വ​രും. വധുവും വരനും പ്രസ്‌തുത ആചാരം അനുഷ്‌ഠി​ക്കു​ന്ന​പക്ഷം, ഒരു പ്ലാററ്‌ഫാ​റ​ത്തിൽ ഇരിക്കും. തത്സമയം അതിഥി​കൾ തങ്ങളുടെ സമ്മാനങ്ങൾ കൊണ്ടു​വ​രു​ന്നു. ഓരോ​രു​ത്ത​രും സമ്മാനം നൽകു​മ്പോൾ, “ഇന്നയാൾ ദമ്പതി​കൾക്ക്‌ ഒരു സമ്മാനം കൊണ്ടു​വ​ന്നി​രി​ക്കു​ന്നു” എന്നു വിളി​ച്ചു​പ​റ​യും. അത്തര​മൊ​രു അംഗീ​കാ​രം ലഭിക്കാ​ത്ത​പക്ഷം ദാതാ​ക്ക​ളി​ല​നേ​കർക്കും കടുത്ത നീരസം തോന്നും.

ലെബ​നോൻകാ​രു​ടെ ഇടയിൽ ഒരാൾ വിവാഹം ചെയ്യു​മ്പോൾ സുഹൃ​ത്തു​ക്ക​ളും അയൽക്കാ​രും ദമ്പതി​കളെ നന്നായി അറിയു​ക​യി​ല്ലാ​ത്ത​വർപോ​ലും വിവാ​ഹ​ത്തി​നു​ശേഷം ദിവസ​ങ്ങ​ളോ​ളം സമ്മാന​ങ്ങ​ളു​മാ​യി വരുന്നു. സമ്മാനം നൽകു​ന്നതു കടം വീട്ടു​ന്ന​തു​പോ​ലെ​തന്നെ ഒരു ഉത്തരവാ​ദി​ത്വ​മാ​ണെന്നു ചെറു​പ്പം​മു​തലേ അവർ പഠിപ്പി​ക്ക​പ്പെ​ടു​ന്നു. “സമ്മാനം കൊടു​ത്തി​ല്ലെ​ങ്കിൽ ഒരു സുഖവു​മു​ണ്ടാ​വില്ല” എന്ന്‌ ഒരു ലെബ​നോൻകാ​രൻ പറയുന്നു. “അതു പാരമ്പ​ര്യ​മാണ്‌.”

എന്നിരു​ന്നാ​ലും, അനേക നാടു​ക​ളി​ലും സമ്മാനം നൽകാൻ പ്രതീ​ക്ഷി​ക്ക​പ്പെ​ടുന്ന സന്ദർഭ​ങ്ങ​ളിൽ ഏറ്റവും പ്രമുഖം ക്രിസ്‌മ​സാണ്‌. നിങ്ങളു​ടെ നാട്ടി​ലും അങ്ങനെ​ത​ന്നെ​യല്ലേ? ക്രിസ്‌മസ്‌ സമ്മാന​ങ്ങൾക്കു​വേണ്ടി അമേരി​ക്ക​ക്കാർ വർഷം​തോ​റും 4,000 കോടി ഡോള​റി​ല​ധി​കം ചെലവ​ഴി​ക്കു​ന്ന​താ​യി 1990-ൽ കണക്കാ​ക്ക​പ്പെട്ടു. ജപ്പാനിൽ ബുദ്ധമ​ത​ക്കാ​രും ഷിന്റോ മതക്കാ​രും വലിയ ഉത്സാഹ​ത്തോ​ടെ​യാണ്‌ ആ വിശേ​ഷ​ദി​വസം കൊണ്ടാ​ടു​ന്നത്‌. യൂറോ​പ്പി​ലും ദക്ഷിണ അമേരി​ക്ക​യി​ലും ആഫ്രി​ക്ക​യു​ടെ ചില ഭാഗങ്ങ​ളി​ലും ഈ ആഘോ​ഷ​ത്തി​ന്റെ നാനാ​രൂ​പങ്ങൾ നിലവി​ലുണ്ട്‌.

ആളുകൾ സന്തുഷ്ട​രാ​യി​രി​ക്കാൻ പ്രതീ​ക്ഷി​ക്കുന്ന ഒരു കാലഘ​ട്ട​മാ​ണു ക്രിസ്‌മസ്‌, എന്നാൽ അനേക​രും സന്തുഷ്ടരല്ല. സമ്മാനങ്ങൾ വാങ്ങു​ന്ന​തി​ലെ പരി​ഭ്ര​മ​വും തുക മുടക്കു​ന്നതു സംബന്ധി​ച്ചുള്ള ഉത്‌ക​ണ്‌ഠ​യും തങ്ങൾ അനുഭ​വി​ക്കുന്ന ഏതൊരു ഉല്ലാസ​നി​മി​ഷ​ത്തെ​യും മൂടി​ക്ക​ള​യു​ന്നു​വെന്നു കണ്ടെത്തു​ന്നവർ ചുരു​ക്ക​മൊ​ന്നു​മല്ല.

എങ്കിലും, സ്വീക​രി​ക്കു​ന്ന​തി​ലു​ള്ള​തി​നെ​ക്കാൾ കൊടു​ക്കു​ന്ന​തിൽ കൂടുതൽ സന്തുഷ്ടി​യു​ണ്ടെന്നു ബൈബിൾ പറയുന്നു. തീർച്ച​യാ​യും ഉണ്ട്‌. എന്നാൽ അത്‌, സമ്മാനം കൊടു​ക്കു​ന്ന​തി​ന്റെ പിന്നിലെ മനോ​ഭാ​വത്തെ ആശ്രയി​ച്ചി​രി​ക്കും.—പ്രവൃ​ത്തി​കൾ 20:35.