അപ്പോ​ക്ക​ലി​പ്‌സിൽ നിന്നുള്ള “സദ്വർത്ത​മാ​നം”

“വേറൊ​രു ദൂതൻ ആകാശ​മ​ദ്ധ്യേ പറക്കു​ന്നതു ഞാൻ കണ്ടു, ഭൂവാ​സി​ക​ളോ​ടു സദ്വർത്ത​മാ​ന​മാ​യി അറിയി​ക്കാൻ അവന്റെ പക്കൽ ഒരു നിത്യ​സു​വാർത്ത ഉണ്ടായി​രു​ന്നു.”—വെളി​പ്പാ​ടു 14:6, NW.

1. യഹോ​വ​യു​ടെ സാക്ഷികൾ അപ്പോ​ക്ക​ലി​പ്‌സ്‌ പുസ്‌ത​ക​ത്തി​ന്റെ ദിവ്യ​നി​ശ്വ​സ്‌ത​ത​യിൽ വിശ്വ​സി​ക്കു​ന്നു​വെ​ങ്കി​ലും അവർ ഒരു “അപ്പോ​ക്ക​ലി​പ്‌റ്റിക്‌ മതഭേദം” അല്ലാത്തത്‌ എന്തു​കൊണ്ട്‌?

പൊതു​വെ ആരോ​പി​ക്ക​പ്പെ​ടു​ന്നതു പോലെ യഹോ​വ​യു​ടെ സാക്ഷികൾ ഒരു “അപ്പോ​ക്ക​ലി​പ്‌റ്റിക്‌ മതഭേദ”മോ ഒരു “വിനാ​ശ​ദിന മതപ്ര​സ്ഥാന”മോ അല്ല. എന്നിരു​ന്നാ​ലും അവർ അപ്പോ​ക്ക​ലി​പ്‌സി​നെ, അഥവാ വെളി​പ്പാ​ടു പുസ്‌ത​കത്തെ ദൈവ​ത്തി​ന്റെ നിശ്വസ്‌ത വചനത്തി​ന്റെ ഭാഗമാ​യി സ്വീക​രി​ക്കു​ന്നു. വെളി​പ്പാ​ടു പുസ്‌ത​ക​ത്തിൽ ദുഷ്ടന്മാർക്ക്‌ എതിരായ ന്യായ​വി​ധി സന്ദേശങ്ങൾ അടങ്ങി​രി​ക്കു​ന്നു എന്നതു സത്യമാണ്‌. എന്നാൽ ദൈവ​ദാ​സ​ന്മാ​രു​ടെ പരസ്യ സാക്ഷീ​ക​ര​ണ​ത്തിൽ അപ്പോ​ക്ക​ലി​പ്‌സ്‌ അഥവാ വെളി​പ്പാ​ടു ഉൾപ്പെ​ടെ​യുള്ള ബൈബിൾ പുസ്‌ത​ക​ങ്ങ​ളിൽ അടങ്ങി​യി​രി​ക്കുന്ന വിസ്‌മ​യാ​വ​ഹ​മായ പ്രത്യാ​ശ​യി​ലാണ്‌ അവർ മുഖ്യ​മാ​യും ശ്രദ്ധ കേന്ദ്രീ​ക​രി​ക്കു​ന്നത്‌. അങ്ങനെ, അതിൽ കാണ​പ്പെ​ടുന്ന പ്രാവ​ച​നിക വാക്കു​ക​ളോട്‌ അവർ എന്തെങ്കി​ലും കൂട്ടി​ച്ചേർക്കു​ക​യോ അവയിൽനിന്ന്‌ എന്തെങ്കി​ലും നീക്കി​ക്ക​ള​യു​ക​യോ ചെയ്യു​ന്നില്ല.—വെളി​പ്പാ​ടു 22:18, 19.

സദ്വർത്ത​മാ​നം പ്രസി​ദ്ധ​മാ​ക്കൽ

2. യഹോ​വ​യു​ടെ സാക്ഷികൾ തങ്ങളുടെ പ്രസം​ഗ​വേ​ല​യിൽ മിക്ക​പ്പോ​ഴും ഉപയോ​ഗി​ക്കുന്ന ചില തിരു​വെ​ഴു​ത്തു​കൾ ഏവ?

² യഹോ​വ​യു​ടെ സാക്ഷി​ക​ളു​ടെ പരസ്യ ശുശ്രൂ​ഷ​യ്‌ക്കുള്ള തിരു​വെ​ഴു​ത്തു​പ​ര​മായ അടിസ്ഥാ​ന​മാ​യി മിക്ക​പ്പോ​ഴും പരാമർശി​ക്ക​പ്പെ​ടു​ന്നത്‌ യേശു​വി​ന്റെ പിൻവ​രുന്ന പ്രസ്‌താ​വ​ന​യാണ്‌: “രാജ്യ​ത്തി​ന്റെ ഈ സുവി​ശേഷം സകലജാ​തി​കൾക്കും സാക്ഷ്യ​മാ​യി ഭൂലോ​ക​ത്തിൽ ഒക്കെയും പ്രസം​ഗി​ക്ക​പ്പെ​ടും [“പ്രസി​ദ്ധ​മാ​ക്ക​പ്പെ​ടും,” NW അടിക്കു​റിപ്പ്‌]; അപ്പോൾ അവസാനം വരും.” (മത്തായി 24:14) എന്താണ്‌ “രാജ്യ​ത്തി​ന്റെ ഈ സുവി​ശേഷം”? മിക്ക യഹോ​വ​യു​ടെ സാക്ഷി​ക​ളും വെളി​പ്പാ​ടു 20-ഉം 21-ഉം അധ്യാ​യ​ങ്ങ​ളിൽ നിന്നുള്ള വാക്യങ്ങൾ ഉദ്ധരി​ച്ചു​കൊണ്ട്‌ അതിന്‌ ഉത്തരം നൽകും. അവ ക്രിസ്‌തു​വി​ന്റെ ആയിര​വർഷ വാഴ്‌ച​യെ​യും അവന്റെ രാജ്യ ഗവൺമെ​ന്റി​നെ​യും മരണവും വിലാ​പ​വും വേദന​യും ‘ഇനി ഉണ്ടാക​യി​ല്ലാത്ത’ മനുഷ്യ സമുദാ​യ​ത്തെ​യും പരാമർശി​ക്കു​ന്നു.—വെളി​പ്പാ​ടു 20:6; 21:1, 4, 5.

3. യഹോ​വ​യു​ടെ സാക്ഷി​ക​ളു​ടെ പരസ്യ ശുശ്രൂഷ ഏതു ദൗത്യ​ത്തോ​ടു സമാന​മാണ്‌?

³ ഈ സദ്വർത്ത​മാ​ന​ങ്ങ​ളു​ടെ ഘോഷകർ എന്ന നിലയിൽ യഹോ​വ​യു​ടെ സാക്ഷികൾ വാസ്‌ത​വ​ത്തിൽ ഒരു പ്രതീ​കാ​ത്മക സ്വർഗീയ സന്ദേശ​വാ​ഹ​കന്റെ വക്താക്ക​ളാണ്‌. അവന്റെ ദൗത്യ​വും വെളി​പ്പാ​ടു പുസ്‌ത​ക​ത്തിൽ വിവരി​ച്ചി​രി​ക്കു​ന്നു. “വേറൊ​രു ദൂതൻ ആകാശ​മ​ദ്ധ്യേ പറക്കു​ന്നതു ഞാൻ കണ്ടു, ഭൂവാ​സി​ക​ളോട്‌ ഒരു സദ്വർത്ത​മാ​ന​മാ​യി അറിയി​ക്കാൻ അവന്റെ പക്കൽ ഒരു നിത്യ​സു​വാർത്ത ഉണ്ടായി​രു​ന്നു.” (വെളി​പ്പാ​ടു 14:6, NW) “ലോക​രാ​ജ​ത്വം [അഥവാ ഭരണാ​ധി​പ​ത്യം] നമ്മുടെ കർത്താ​വി​ന്നും അവന്റെ ക്രിസ്‌തു​വി​ന്നും ആയിത്തീർന്നി​രി​ക്കു​ന്നു” എന്നും “ഭൂമിയെ നശിപ്പി​ക്കു​ന്ന​വരെ നശിപ്പി​പ്പാ​നു”ള്ള യഹോ​വ​യു​ടെ നിയമിത ‘കാലം’ വന്നിരി​ക്കു​ന്നു എന്നും ഉള്ള അറിയിപ്പ്‌ “നിത്യ​സു​വാർത്ത”യിൽ അടങ്ങി​യി​രി​ക്കു​ന്നു. (വെളി​പ്പാ​ടു 11:15, 17, 18) അതു വാസ്‌ത​വ​ത്തിൽ ഒരു സുവാർത്ത അല്ലേ?

വെളി​പ്പാ​ടിൽ അടങ്ങി​യി​രി​ക്കു​ന്നത്‌

4. (എ) വെളി​പ്പാ​ടു പുസ്‌തകം ഒന്നാം അധ്യാ​യ​ത്തിൽ ഏത്‌ അടിസ്ഥാന സത്യങ്ങൾ വിവരി​ച്ചി​രി​ക്കു​ന്നു? (ബി) സദ്വർത്ത​മാ​ന​ങ്ങ​ളിൽ നിന്നു പ്രയോ​ജനം അനുഭ​വി​ക്കാൻ ആഗ്രഹി​ക്കു​ന്നവർ എന്തു ചെയ്യണം?

⁴ വെളി​പ്പാ​ടു പുസ്‌ത​ക​ത്തി​ന്റെ പ്രാരംഭ അധ്യായം യഹോ​വയെ “അല്‌ഫ​യും ഓമേ​ഗ​യും . . . ഇരിക്കു​ന്ന​വ​നും ഇരുന്ന​വ​നും വരുന്ന​വ​നു​മാ​യി സർവ്വശ​ക്തി​യുള്ള” ദൈവ​മാ​യി ചിത്രീ​ക​രി​ക്കു​ന്നു. അത്‌ അവന്റെ പുത്ര​നായ യേശു​ക്രി​സ്‌തു​വി​നെ “വിശ്വ​സ്‌ത​സാ​ക്ഷി​യും മരിച്ച​വ​രിൽ ആദ്യജാ​ത​നും ഭൂരാ​ജാ​ക്ക​ന്മാർക്കു അധിപ​തി​യും” ആയി ചിത്രീ​ക​രി​ക്കു​ന്നു. യേശു “നമ്മെ സ്‌നേ​ഹി​ക്കു​ന്ന​വ​നും നമ്മുടെ പാപം പോക്കി നമ്മെ തന്റെ രക്തത്താൽ വിടുവി”ക്കുന്നവ​നും ആണെന്നും അതു പറയുന്നു. (വെളി​പ്പാ​ടു 1:5, 6, 8) അങ്ങനെ, വെളി​പ്പാ​ടു പുസ്‌തകം തുടക്ക​ത്തിൽത്തന്നെ ജീവര​ക്ഷാ​ക​ര​മായ അടിസ്ഥാന സത്യങ്ങൾ പ്രസ്‌താ​വി​ക്കു​ന്നു. തങ്ങളുടെ പക്കൽ എത്തിക്കുന്ന സദ്വർത്ത​മാ​ന​ങ്ങ​ളിൽ നിന്നു ‘ഭൂവാ​സി​കൾ’ പ്രയോ​ജനം നേടണ​മെ​ങ്കിൽ അവർ യഹോ​വ​യു​ടെ പരമാ​ധി​കാ​രം തിരി​ച്ച​റി​യു​ക​യും യേശു​വി​ന്റെ ചൊരി​യ​പ്പെട്ട രക്തത്തിൽ വിശ്വാ​സം അർപ്പി​ക്കു​ക​യും യഹോവ ക്രിസ്‌തു​വി​നെ ഉയിർപ്പി​ച്ചെ​ന്നും അവൻ ഇപ്പോൾ ഭൂമി​യു​ടെ ദൈവ​നി​യ​മിത ഭരണാ​ധി​പൻ ആണെന്നും വിശ്വ​സി​ക്കു​ക​യും വേണം.—സങ്കീർത്തനം 2:6-8.

5. വെളി​പ്പാ​ടു 2-ഉം വെളി​പ്പാ​ടു 3-ഉം അധ്യാ​യ​ങ്ങ​ളിൽ ക്രിസ്‌തു ഏതു ധർമം നിർവ​ഹി​ക്കു​ന്ന​താ​യി ചിത്രീ​ക​രി​ക്ക​പ്പെ​ട്ടി​രി​ക്കു​ന്നു?

⁵ അടുത്ത രണ്ട്‌ അധ്യാ​യങ്ങൾ ക്രിസ്‌തു​യേ​ശു​വി​നെ ഭൂമി​യി​ലെ തന്റെ ശിഷ്യ​ന്മാ​രു​ടെ സഭകളു​ടെ സ്‌നേ​ഹ​വാ​നായ സ്വർഗീയ മേൽവി​ചാ​ര​ക​നാ​യി ചിത്രീ​ക​രി​ക്കു​ന്നു. പൊ.യു. ഒന്നാം നൂറ്റാ​ണ്ടിൽ ഏഷ്യാ മൈന​റിൽ സ്ഥിതി ചെയ്‌തി​രുന്ന തിര​ഞ്ഞെ​ടു​ക്ക​പ്പെട്ട ഏഴു ക്രിസ്‌തീയ സഭകളെ അഭിസം​ബോ​ധന ചെയ്‌തു​കൊ​ണ്ടുള്ള ചുരു​ളു​ക​ളിൽ അടങ്ങി​യി​രി​ക്കുന്ന പ്രോ​ത്സാ​ഹ​ന​വും ശക്തമായ ബുദ്ധി​യു​പ​ദേ​ശ​വും ഇന്നും ബാധക​മാണ്‌. ‘ഞാൻ നിന്റെ പ്രവൃ​ത്തി​കൾ അറിയു​ന്നു,’ അല്ലെങ്കിൽ ഞാൻ ‘നിന്റെ കഷ്ടത അറിയു​ന്നു’ എന്നിങ്ങ​നെ​യുള്ള വാക്കു​ക​ളോ​ടെ​യാണ്‌ മിക്ക​പ്പോ​ഴും സഭകൾക്കുള്ള സന്ദേശ​ങ്ങൾക്കു തുടക്കം കുറി​ച്ചി​രു​ന്നത്‌. (വെളി​പ്പാ​ടു 2:2, 9) അതേ, തന്റെ ശിഷ്യ​ന്മാ​രു​ടെ സഭകളിൽ എന്താണു സംഭവി​ച്ചു​കൊ​ണ്ടി​രു​ന്നത്‌ എന്നു ക്രിസ്‌തു​വി​നു കൃത്യ​മാ​യും അറിയാ​മാ​യി​രു​ന്നു. ചില സഭകളെ അവയുടെ സ്‌നേ​ഹ​ത്തെ​യും വിശ്വാ​സ​ത്തെ​യും ശുശ്രൂ​ഷ​യി​ലെ കഠിനാ​ധ്വാ​ന​ത്തെ​യും സഹിഷ്‌ണു​ത​യെ​യും തന്റെ നാമ​ത്തോ​ടും വചന​ത്തോ​ടും ഉള്ള വിശ്വ​സ്‌ത​ത​യെ​യും പ്രതി അവൻ അഭിന​ന്ദി​ച്ചു. മറ്റുള്ള​വയെ അവൻ ശാസിച്ചു. കാരണം അവ യഹോ​വ​യോ​ടും അവന്റെ പുത്ര​നോ​ടും ഉള്ള സ്‌നേഹം തണുത്തു​പോ​കാൻ അനുവ​ദി​ച്ചു, അല്ലെങ്കിൽ ലൈം​ഗിക അധാർമി​ക​ത​യി​ലോ വിഗ്ര​ഹാ​രാ​ധ​ന​യി​ലോ വിശ്വാ​സ​ത്യാ​ഗ​പ​ര​മായ വിഭാ​ഗീ​യ​ത​യി​ലോ ഉൾപ്പെട്ടു.

6. 4-ാം അധ്യാ​യ​ത്തിൽ രേഖ​പ്പെ​ടു​ത്തി​യി​രി​ക്കുന്ന ദർശനം എന്തു മനസ്സി​ലാ​ക്കാൻ ആളുകളെ സഹായി​ക്കു​ന്നു?

⁶ 4-ാം അധ്യായം യഹോ​വ​യാം ദൈവ​ത്തി​ന്റെ സ്വർഗീയ സിംഹാ​സ​ന​ത്തി​ന്റെ ഭയാദ​ര​ജ​ന​ക​മായ ഒരു ദർശനം പ്രദാനം ചെയ്യുന്നു. അത്‌ യഹോ​വ​യു​ടെ സാന്നി​ധ്യ​ത്തി​ന്റെ മഹത്ത്വ​ത്തെ​യും അവൻ ഉപയോ​ഗി​ക്കാ​നി​രി​ക്കുന്ന സ്വർഗീയ ഭരണ സംവി​ധാ​ന​ത്തെ​യും കുറി​ച്ചുള്ള ഒരു ഹ്രസ്വ​ചി​ത്രം നൽകുന്നു. പ്രപഞ്ച​ത്തി​ന്റെ കേന്ദ്ര സിംഹാ​സ​ന​ത്തി​നു ചുറ്റു​മുള്ള സിംഹാ​സ​ന​ങ്ങ​ളിൽ ഉപവി​ഷ്ട​രാ​യി​രി​ക്കുന്ന കിരീ​ട​മ​ണിഞ്ഞ ഭരണാ​ധി​കാ​രി​കൾ യഹോ​വ​യു​ടെ മുമ്പാകെ കുമ്പിട്ട്‌ ഇപ്രകാ​രം ഘോഷി​ക്കു​ന്നു: “കർത്താവേ, നീ സർവ്വവും സൃഷ്ടി​ച്ച​വ​നും എല്ലാം നിന്റെ ഇഷ്ടം ഹേതു​വാൽ ഉണ്ടായ​തും സൃഷ്ടി​ക്ക​പ്പെ​ട്ട​തും ആകയാൽ മഹത്വ​വും ബഹുമാ​ന​വും ശക്തിയും കൈ​ക്കൊൾവാൻ യോഗ്യൻ.”—വെളി​പ്പാ​ടു 4:11.

7. (എ) ഭൂമി​യി​ലെ നിവാ​സി​ക​ളോട്‌ എന്തു ചെയ്യാൻ ദൂതൻ പറയുന്നു? (ബി) നമ്മുടെ വിദ്യാ​ഭ്യാ​സ വേലയു​ടെ ഒരു പ്രധാന ഭാഗം എന്താണ്‌?

⁷ ഇത്‌ ഇന്നത്തെ ആളുകൾക്ക്‌ എന്തെങ്കി​ലും അർഥമാ​ക്കു​ന്നു​ണ്ടോ? തീർച്ച​യാ​യും ഉണ്ട്‌. സഹസ്രാബ്ദ രാജ്യ​ത്തിൻ കീഴിൽ ജീവി​ച്ചി​രി​ക്കാൻ ആഗ്രഹി​ക്കു​ന്നെ​ങ്കിൽ, അവർ ‘ആകാശ​മ​ദ്ധ്യേ പറക്കുന്ന ദൂതൻ’ ഘോഷി​ക്കുന്ന കാര്യ​ങ്ങൾക്കു ശ്രദ്ധ കൊടു​ക്കണം: “ദൈവത്തെ ഭയപ്പെട്ടു അവന്നു മഹത്വം കൊടു​പ്പിൻ; അവന്റെ ന്യായ​വി​ധി​യു​ടെ നാഴിക വന്നിരി​ക്കു​ന്നു.” (വെളി​പ്പാ​ടു 14:6, 7) യഹോ​വ​യു​ടെ സാക്ഷികൾ നടത്തുന്ന ബൈബിൾ വിദ്യാ​ഭ്യാ​സ വേലയു​ടെ പ്രധാന ഉദ്ദേശ്യ​ങ്ങ​ളിൽ ഒന്ന്‌, യഹോ​വയെ അറിയാ​നും ആരാധി​ക്കാ​നും അവന്റെ സൃഷ്ടി​കർതൃ​ത്വം തിരി​ച്ച​റി​യാ​നും അവന്റെ നീതി​നി​ഷ്‌ഠ​മായ പരമാ​ധി​കാ​ര​ത്തി​നു സ്വമന​സ്സാ​ലെ കീഴ്‌പെ​ടാ​നും ‘ഭൂവാ​സി​കളെ’ സഹായി​ക്കുക എന്നതാണ്‌.

ബഹുമാന യോഗ്യ​നായ കുഞ്ഞാട്‌

8. (എ) വെളി​പ്പാ​ടു 5-ഉം വെളി​പ്പാ​ടു 6-ഉം അധ്യാ​യ​ങ്ങ​ളിൽ ക്രിസ്‌തു ചിത്രീ​ക​രി​ക്ക​പ്പെ​ട്ടി​രി​ക്കു​ന്നത്‌ എങ്ങനെ? (ബി) സദ്വർത്ത​മാ​നങ്ങൾ ശ്രദ്ധി​ക്കുന്ന സകലർക്കും ഈ ദർശന​ത്തിൽ നിന്ന്‌ എന്തു പഠിക്കാ​നാ​കും?

⁸ അടുത്ത രണ്ട്‌ അധ്യാ​യങ്ങൾ—5-ഉം 6-ഉം—യേശു​ക്രി​സ്‌തു​വി​നെ ഏഴു മുദ്ര​ക​ളുള്ള ഒരു ചുരുൾ തുറന്ന്‌ നമ്മുടെ നാളിൽ സംഭവി​ക്കുന്ന കാര്യങ്ങൾ പ്രതീ​കാ​ത്മക ഭാഷയിൽ വെളി​പ്പെ​ടു​ത്താൻ യോഗ്യ​നാ​യി കണ്ടെത്ത​പ്പെട്ട ഒരു കുഞ്ഞാ​ടാ​യി ചിത്രീ​ക​രി​ക്കു​ന്നു. (യോഹ​ന്നാൻ 1:29 താരത​മ്യം ചെയ്യുക.) ഈ പ്രതീ​കാ​ത്മക കുഞ്ഞാ​ടി​നോ​ടു സ്വർഗീയ ശബ്ദങ്ങൾ ഇങ്ങനെ പറയുന്നു: “പുസ്‌തകം വാങ്ങു​വാ​നും അതിന്റെ മുദ്ര പൊട്ടി​പ്പാ​നും നീ യോഗ്യൻ; നീ അറുക്ക​പ്പെട്ടു നിന്റെ രക്തം​കൊ​ണ്ടു സർവ്വ​ഗോ​ത്ര​ത്തി​ലും ഭാഷയി​ലും വംശത്തി​ലും ജാതി​യി​ലും നിന്നു​ള്ള​വരെ ദൈവ​ത്തി​ന്നാ​യി വിലെക്കു വാങ്ങി; ഞങ്ങളുടെ ദൈവ​ത്തി​ന്നു അവരെ രാജ്യ​വും പുരോ​ഹി​ത​ന്മാ​രും ആക്കി​വെച്ചു; അവർ ഭൂമി​യിൽ വാഴുന്നു.” (വെളി​പ്പാ​ടു 5:9, 10) ക്രിസ്‌തു​വി​ന്റെ ചൊരി​യ​പ്പെട്ട രക്തത്തിന്റെ അടിസ്ഥാ​ന​ത്തിൽ, സകല വംശങ്ങ​ളി​ലും പെട്ട ചില ആളുകൾ അവനോ​ടൊ​പ്പം സ്വർഗ​ത്തിൽ ആയിരി​ക്കാ​നും ‘ഭൂമി​യു​ടെ മേൽ വാഴാ​നും’ വിളി​ക്ക​പ്പെ​ട്ടി​രി​ക്കു​ന്നു എന്ന്‌ ഈ ദർശനം നമ്മെ പഠിപ്പി​ക്കു​ന്നു. (വെളി​പ്പാ​ടു 1:5, 6 താരത​മ്യം ചെയ്യുക.) അവരുടെ ക്ലിപ്‌ത സംഖ്യ വെളി​പ്പാ​ടു പുസ്‌ത​ക​ത്തിൽ മറ്റൊ​രി​ടത്തു വെളി​പ്പെ​ടു​ത്തി​യി​രി​ക്കു​ന്നു.

9. 6-ാം അധ്യാ​യ​ത്തിൽ ക്രിസ്‌തു ചിത്രീ​ക​രി​ക്ക​പ്പെ​ട്ടി​രി​ക്കു​ന്നത്‌ എങ്ങനെ?

⁹ മറ്റൊരു ദർശന​ത്തിൽ, “ജയിക്കു​ന്ന​വ​നാ​യും ജയിപ്പാ​നാ​യും” വെള്ളക്കു​തി​ര​പ്പു​റത്തു കിരീടം ധരിച്ചു പുറ​പ്പെ​ടുന്ന ഒരു സഞ്ചാരി​യാ​യി ക്രിസ്‌തു​വി​നെ ചിത്രീ​ക​രി​ക്കു​ന്നു. സന്തോ​ഷ​ക​ര​മെന്നു പറയട്ടെ, അപ്പോ​ക്ക​ലി​പ്‌സി​ലെ മറ്റു മൂന്നു കുതി​ര​ക്കാ​രാൽ ചിത്രീ​ക​രി​ക്ക​പ്പെ​ട്ടി​രി​ക്കുന്ന ദുഷ്‌ഫ​ല​ങ്ങളെ അവൻ നിർവീ​ര്യ​മാ​ക്കും. ആ കുതി​ര​ക്കാ​രു​ടെ തീവ്ര സവാരി 1914 എന്ന നിർണാ​യക വർഷം മുതൽ മനുഷ്യ​വർഗ​ത്തി​ന്മേൽ യുദ്ധവും ക്ഷാമവും മരണവും വരുത്തി​വെ​ച്ചി​രി​ക്കു​ന്നു. (വെളി​പ്പാ​ടു 6:1-8) മനുഷ്യ​വർഗ​ത്തി​ന്റെ രക്ഷയി​ലും യഹോ​വ​യു​ടെ വിസ്‌മ​യാ​വ​ഹ​മായ ഉദ്ദേശ്യ​ങ്ങ​ളു​ടെ നിവൃ​ത്തി​യി​ലും ദൈവ​ത്തി​ന്റെ കുഞ്ഞാ​ടായ ക്രിസ്‌തു​വി​നുള്ള അതുല്യ​മായ പങ്ക്‌ യഹോ​വ​യു​ടെ സാക്ഷി​ക​ളു​ടെ ബൈബിൾ പഠിപ്പി​ക്കൽ വേലയി​ലെ ഒരു മുഖ്യ വിഷയ​മാണ്‌.

10. (എ) വെളി​പ്പാ​ടു 7-ാം അധ്യാ​യ​ത്തിൽ ഏതു സുപ്ര​ധാന വിവരം അടങ്ങി​യി​രി​ക്കു​ന്നു? (ബി) രാജത്വം സ്വീക​രി​ക്കു​ന്ന​വരെ കുറിച്ച്‌ ക്രിസ്‌തു എന്തു പറഞ്ഞു?

¹⁰ 7-ാം അധ്യാ​യ​ത്തിൽ അടങ്ങി​യി​രി​ക്കു​ന്നത്‌ തീർച്ച​യാ​യും സദ്വർത്ത​മാ​ന​ങ്ങ​ളാണ്‌. കുഞ്ഞാ​ടി​ന്റെ പിതാ​വിൽനി​ന്നു രാജത്വം സ്വീക​രി​ക്കുന്ന, ‘ചെറിയ ആട്ടിൻകൂ​ട്ടം’ എന്ന്‌ യേശു വിളിച്ച ഗണത്തിന്റെ എണ്ണം വെളി​പ്പാ​ടു പുസ്‌ത​ക​ത്തിൽ മാത്രമേ നാം കാണു​ന്നു​ള്ളൂ. (ലൂക്കൊസ്‌ 12:32; 22:28-30) യഹോ​വ​യാം ദൈവം തന്റെ പരിശു​ദ്ധാ​ത്മാ​വി​നാൽ അവരെ മുദ്ര​യി​ട്ടി​രി​ക്കു​ന്നു. (2 കൊരി​ന്ത്യർ 1:21, 22) വെളി​പാ​ടു ലഭിച്ച യോഹ​ന്നാൻ അപ്പൊ​സ്‌തലൻ ഇപ്രകാ​രം സാക്ഷ്യ​പ്പെ​ടു​ത്തു​ന്നു: “മുദ്ര​യേ​റ​റ​വ​രു​ടെ എണ്ണവും ഞാൻ കേട്ടു; . . . മുദ്ര​യേ​റ​റവർ നൂററി​നാ​ല്‌പ​ത്തി​നാ​ലാ​യി​രം പേർ.” (വെളി​പ്പാ​ടു 7:4) ഈ കൃത്യ​മായ എണ്ണം പിന്നീട്‌ ഒരു അധ്യാ​യ​ത്തിൽ സ്വർഗീയ സീയോൻ മലയിൽ കുഞ്ഞാ​ടി​നോ​ടു​കൂ​ടെ വാഴാൻ “ഭൂമി​യിൽനി​ന്നു വിലെക്കു വാങ്ങിയി”രിക്കു​ന്ന​വ​രു​ടെ മൊത്തം എണ്ണമായി സ്ഥിരീ​ക​രി​ക്ക​പ്പെ​ട്ടി​രി​ക്കു​ന്നു. (വെളി​പ്പാ​ടു 14:1-4) ക്രൈ​സ്‌തവ ലോക​ത്തി​ലെ സഭകൾ ഈ സംഖ്യക്ക്‌ അവ്യക്ത​വും അയുക്ത​വു​മായ വിശദീ​ക​ര​ണ​ങ്ങ​ളാണ്‌ നൽകു​ന്നത്‌. എന്നിരു​ന്നാ​ലും, രസാവ​ഹ​മാ​യി, ബൈബിൾ പണ്ഡിത​നായ ഇ. ഡബ്ലിയു. ബുള്ളിങ്ങർ അതിനെ കുറിച്ച്‌ ഇങ്ങനെ പറയുന്നു: “ലളിത​മായ വസ്‌തുത ഇതാണ്‌: ഇതേ അധ്യാ​യ​ത്തിൽ തന്നെയുള്ള അനിശ്ചിത സംഖ്യക്കു വിപരീ​ത​മാ​യി ഒരു നിശ്ചിത സംഖ്യ ഉപയോ​ഗി​ച്ചി​രി​ക്കു​ന്നു.”

11. (എ) വെളി​പ്പാ​ടു 7-ാം അധ്യാ​യ​ത്തിൽ ഏതു സദ്വർത്ത​മാ​നങ്ങൾ കാണാ​വു​ന്ന​താണ്‌? (ബി) “മഹാപു​രു​ഷാര”ത്തിലെ അംഗങ്ങ​ളു​ടെ മുന്നിൽ ഏതു പ്രതീ​ക്ഷ​ക​ളാണ്‌ ഉള്ളത്‌?

¹¹ ഏത്‌ അനിശ്ചിത സംഖ്യയെ ആയിരു​ന്നു ബുള്ളിങ്ങർ പരാമർശി​ച്ചത്‌? 9-ാം വാക്യ​ത്തിൽ യോഹ​ന്നാൻ അപ്പൊ​സ്‌തലൻ ഇങ്ങനെ എഴുതി: “ഇതിന്റെ ശേഷം സകല ജാതി​ക​ളി​ലും ഗോ​ത്ര​ങ്ങ​ളി​ലും വംശങ്ങ​ളി​ലും ഭാഷക​ളി​ലും​നി​ന്നു ഉള്ളതായി ആർക്കും എണ്ണിക്കൂ​ടാത്ത ഒരു മഹാപു​രു​ഷാ​രം . . . നില്‌ക്കു​ന്നതു ഞാൻ കണ്ടു.” (വെളി​പ്പാ​ടു 7:9) ഈ മഹാപു​രു​ഷാ​ര​ത്തിൽ പെടു​ന്നത്‌ ആരാണ്‌? ദൈവ​മു​മ്പാ​കെ ഇപ്പോൾ അവരുടെ നില എന്താണ്‌? ഭാവി അവർക്ക്‌ എന്തു കൈവ​രു​ത്തും? അപ്പോ​ക്ക​ലി​പ്‌സ്‌ നൽകുന്ന ഉത്തരം ഭൂവാ​സി​കൾക്ക്‌ ഒരു സുവാർത്ത​യാണ്‌. നാം ഇങ്ങനെ വായി​ക്കു​ന്നു: “ഇവർ മഹാക​ഷ്ട​ത്തിൽനി​ന്നു [“മഹോ​പ​ദ്ര​വ​ത്തിൽനി​ന്നു,” NW] വന്നവർ; കുഞ്ഞാ​ടി​ന്റെ രക്തത്തിൽ തങ്ങളുടെ അങ്കി അലക്കി വെളു​പ്പി​ച്ചി​രി​ക്കു​ന്നു.” ക്രിസ്‌തു​വി​ന്റെ ചൊരി​യ​പ്പെട്ട രക്തത്തി​ലുള്ള വിശ്വാ​സം ഹേതു​വാ​യി അവർ “മഹോ​പ​ദ്ര​വ​ത്തിൽ” സംരക്ഷി​ക്ക​പ്പെ​ടും. ക്രിസ്‌തു അവരെ “മേച്ചു ജീവജ​ല​ത്തി​ന്റെ ഉറവു​ക​ളി​ലേക്കു നടത്തു​ക​യും ദൈവം താൻ അവരുടെ കണ്ണിൽനി​ന്നു കണ്ണുനീർ എല്ലാം തുടെ​ച്ചു​ക​ള​ക​യും ചെയ്യും.” (വെളി​പ്പാ​ടു 7:14-17) അതേ, ഇന്നു ജീവി​ക്കുന്ന ദശലക്ഷ​ക്ക​ണ​ക്കിന്‌ ആളുകൾക്ക്‌ ഇപ്പോ​ഴത്തെ ദുഷ്ടവ്യ​വ​സ്ഥി​തി​യു​ടെ അന്ത്യത്തെ അതിജീ​വി​ക്കുന്ന ഈ എണ്ണമറ്റ പുരു​ഷാ​ര​ത്തി​ന്റെ ഭാഗമാ​യി​ത്തീ​രാൻ കഴിയും. രാജാ​വായ യേശു​ക്രി​സ്‌തു​വി​ന്റെ പ്രജകൾ എന്ന നിലയിൽ അവർ അവന്റെ സഹസ്രാബ്ദ വാഴ്‌ച​ക്കാ​ലത്തു ഭൂമി​യി​ലെ നിത്യ​ജീ​വ​നി​ലേക്കു നയിക്ക​പ്പെ​ടും. ഇതു സുവാർത്ത​യല്ലേ?

“അവന്റെ ന്യായ​വി​ധി​കൾ സത്യവും നീതി​യു​മു​ള്ളവ”

12, 13. (എ) വെളി​പ്പാ​ടു 8 മുതൽ 19 വരെയുള്ള അധ്യാ​യ​ങ്ങ​ളിൽ എന്ത്‌ അടങ്ങി​യി​രി​ക്കു​ന്നു? (ബി) അത്തരം പ്രവച​നങ്ങൾ ആത്മാർഥ​ഹൃ​ദ​യരെ അസഹ്യ​പ്പെ​ടു​ത്തേ​ണ്ടത്‌ ഇല്ലാത്തത്‌ എന്തു​കൊണ്ട്‌?

¹² അപ്പോ​ക്ക​ലി​പ്‌സ്‌, അഥവാ വെളി​പ്പാ​ടു പുസ്‌തകം ഭീതി​ദ​മായ വിനാശം മുൻകൂ​ട്ടി​പ്പ​റ​യുന്ന ഒരു പുസ്‌ത​ക​മാ​യി അറിയ​പ്പെ​ടാ​നുള്ള പ്രധാന കാരണം 8 മുതൽ 19 വരെയുള്ള അധ്യാ​യങ്ങൾ ആണ്‌. സാത്താന്റെ വ്യവസ്ഥി​തി​യു​ടെ വ്യത്യസ്‌ത ഘടകങ്ങൾക്ക്‌ എതിരാ​യുള്ള അതിശ​ക്ത​മായ ന്യായ​വി​ധി സന്ദേശങ്ങൾ അവയിൽ അടങ്ങി​യി​രി​ക്കു​ന്നു. ആ ന്യായ​വി​ധി സന്ദേശങ്ങൾ കാഹള നാദങ്ങൾ, ബാധകൾ, ദിവ്യ​കോ​പ​ത്തി​ന്റെ കലശങ്ങൾ എന്നിവ​യാൽ പ്രതീ​ക​വൽക്ക​രി​ക്ക​പ്പെ​ട്ടി​രി​ക്കു​ന്നു. ആദ്യം വ്യാജ​മ​ത​ങ്ങൾക്കും (“മഹതി​യാം ബാബി​ലോൻ”) തുടർന്ന്‌ വന്യമൃ​ഗ​ങ്ങ​ളാൽ പ്രതീ​ക​വൽക്ക​രി​ക്ക​പ്പെ​ടുന്ന അഭക്ത രാഷ്‌ട്രീയ വ്യവസ്ഥ​കൾക്കും എതിരാ​യി ഈ ന്യായ​വി​ധി​കൾ നടപ്പാ​ക്ക​പ്പെ​ടും.—വെളി​പ്പാ​ടു 13:1, 2; 17:5-7, 15, 16.a

¹³ സാത്താ​നെ​യും അവന്റെ ഭൂതങ്ങ​ളെ​യും ഭൂമി​യു​ടെ പരിസ​ര​ത്തേക്കു വലി​ച്ചെ​റി​ഞ്ഞു​കൊണ്ട്‌ സ്വർഗത്തെ ശുദ്ധീ​ക​രി​ക്കു​ന്ന​തി​നെ കുറിച്ച്‌ ഈ അധ്യാ​യങ്ങൾ വിവരി​ക്കു​ന്നു. ഇത്‌ 1914 മുതലുള്ള അഭൂത​പൂർവ​മായ ലോകാ​രി​ഷ്ട​ത​കൾക്കുള്ള ഒരേ​യൊ​രു യുക്തി​സ​ഹ​മായ വിശദീ​ക​രണം നൽകുന്നു. (വെളി​പ്പാ​ടു 12:7-12) സാത്താന്റെ ഭൗമിക ദുഷ്ട വ്യവസ്ഥി​തി​യു​ടെ നാശവും അവ പ്രതീ​കാ​ത്മക ഭാഷയിൽ വർണി​ക്കു​ന്നു. (വെളി​പ്പാ​ടു 19:19-21) പ്രകമ്പനം കൊള്ളി​ക്കുന്ന അത്തരം സംഭവങ്ങൾ ആത്മാർഥ​ഹൃ​ദ​യ​രായ ആളുകളെ ഞെട്ടി​ക്ക​ണ​മോ? വേണ്ട. കാരണം, ദൈവ​ത്തി​ന്റെ ന്യായ​വി​ധി​കൾ നടപ്പാ​ക്കവെ, സ്വർഗീയ സംഘം ഇങ്ങനെ ഉദ്‌ഘോ​ഷി​ക്കു​ന്നു: “ഹല്ലെലൂ​യ്യാ! [“യാഹിനെ സ്‌തു​തി​പ്പിൻ,” NW] രക്ഷയും മഹത്വ​വും ശക്തിയും നമ്മുടെ ദൈവ​ത്തി​ന്നു​ള്ളതു . . . അവന്റെ ന്യായ​വി​ധി​കൾ സത്യവും നീതി​യു​മു​ള്ളവ.”—വെളി​പ്പാ​ടു 19:1, 2.

14, 15. (എ) ഇപ്പോ​ഴത്തെ ദുഷ്ട വ്യവസ്ഥി​തി​യു​ടെ അന്ത്യം നീതി കൈവ​രു​ത്തു​ന്നത്‌ എങ്ങനെ? (ബി) അപ്പോ​ക്ക​ലി​പ്‌സി​ന്റെ ഈ ഭാഗം ആത്മാർഥ​ഹൃ​ദ​യ​രായ ആളുകൾക്കു സന്തോ​ഷി​ക്കാ​നുള്ള ഒരു കാരണം ആയിരി​ക്കേ​ണ്ടത്‌ എന്തു​കൊണ്ട്‌?

¹⁴ ഭൂമിയെ നശിപ്പി​ക്കു​ന്നവർ നീക്കം ചെയ്യ​പ്പെ​ടാ​തെ യഹോവ നീതി​നി​ഷ്‌ഠ​മായ ഒരു വ്യവസ്ഥി​തി കൊണ്ടു​വ​രില്ല. (വെളി​പ്പാ​ടു 11:17, 18; 19:11-16; 20:1, 2) എന്നാൽ, ഏതെങ്കി​ലും മനുഷ്യ​നോ രാഷ്‌ട്ര​ത്തി​നോ അതു ചെയ്യാ​നുള്ള അധികാ​ര​മോ ശക്തിയോ ഇല്ല. അതു നീതി​പൂർവ​ക​മാ​യി ചെയ്യാൻ യഹോ​വ​യ്‌ക്കും അവന്റെ നിയമിത രാജാ​വും ന്യായാ​ധി​പ​നു​മായ ക്രിസ്‌തു​യേ​ശു​വി​നും മാത്രമേ സാധിക്കൂ.—2 തെസ്സ​ലൊ​നീ​ക്യർ 1:6-9.

¹⁵ ഇന്നത്തെ ദുഷ്ട വ്യവസ്ഥി​തി​യെ നശിപ്പി​ക്കാ​നുള്ള യഹോ​വ​യു​ടെ ഉദ്ദേശ്യം അപ്പോ​ക്ക​ലി​പ്‌സ്‌ വളരെ വ്യക്തമാ​യി പ്രകട​മാ​ക്കു​ന്നു. ഈ വസ്‌തുത, ഇപ്പോൾ ‘നടക്കുന്ന സകല മ്ലേച്ഛത​ക​ളും നിമിത്തം നെടു​വീർപ്പി​ട്ടു കരയുന്ന’ സ്‌ത്രീ​പു​രു​ഷ​ന്മാർക്കു സന്തോ​ഷി​ക്കാ​നുള്ള ഒരു കാരണം ആയിരി​ക്കണം. (യെഹെ​സ്‌കേൽ 9:4) സദ്വർത്ത​മാന ദൂതൻ നൽകിയ ആഹ്വാ​ന​ത്തി​നു ശ്രദ്ധ കൊടു​ക്കേ​ണ്ട​തി​ന്റെ അടിയ​ന്തി​രത ഇത്‌ അവരിൽ ഉളവാ​ക്കണം. അവൻ ഇങ്ങനെ പ്രഖ്യാ​പി​ച്ചു: “ദൈവത്തെ ഭയപ്പെ[ടുവിൻ] . . . അവന്റെ ന്യായ​വി​ധി​യു​ടെ നാഴിക വന്നിരി​ക്കു​ന്നു; ആകാശ​വും ഭൂമി​യും സമു​ദ്ര​വും നീരു​റ​വു​ക​ളും ഉണ്ടാക്കി​യ​വനെ നമസ്‌ക​രി​പ്പിൻ.” (വെളി​പ്പാ​ടു 14:7) “ദൈവ​ക​ല്‌പ​നകൾ പാലി​ക്ക​യും യേശു​വി​ന്നു സാക്ഷ്യം വഹിക്ക​യും ചെയ്യുന്ന” യഹോ​വ​യു​ടെ സാക്ഷി​ക​ളോ​ടൊ​പ്പം അത്തരം ആളുകൾ യഹോ​വയെ ആരാധി​ക്കു​ക​യും സേവി​ക്കു​ക​യും ചെയ്യട്ടെ.—വെളി​പ്പാ​ടു 12:17, ഓശാന ബൈബിൾ.

മഹത്ത്വ​പൂർണ​മായ സഹസ്രാബ്ദ വാഴ്‌ച

16. (എ) ക്രൈ​സ്‌തവ ലോക​ത്തി​ലെ സഭകൾ സഹസ്രാബ്ദ പ്രത്യാശ തള്ളിക്ക​ള​ഞ്ഞി​രി​ക്കു​ന്നത്‌ എന്തു​കൊണ്ട്‌? (ബി) മാതൃകാ പ്രാർഥ​ന​യ്‌ക്ക്‌ ഉത്തരം ലഭിക്കു​മെന്ന്‌ യഹോ​വ​യു​ടെ സാക്ഷികൾ വിശ്വ​സി​ക്കു​ന്നത്‌ എന്തു​കൊണ്ട്‌?

¹⁶ വെളി​പ്പാ​ടു പുസ്‌ത​ക​ത്തി​ന്റെ 20 മുതൽ 22 വരെയുള്ള അധ്യാ​യ​ങ്ങ​ളിൽ സഹസ്രാബ്ദ പ്രത്യാ​ശ​യ്‌ക്കുള്ള തിരു​വെ​ഴു​ത്തു​പ​ര​മായ അടിസ്ഥാ​നം അടങ്ങി​യി​രി​ക്കു​ന്നു. സ്വർഗ​ത്തി​ലെ​യും ഭൂമി​യി​ലെ​യും നിത്യ​സ​ന്തു​ഷ്ടി​യ്‌ക്കു നാന്ദി കുറി​ക്കുന്ന ആയിരം-വർഷ കാലഘ​ട്ടത്തെ കുറിച്ച്‌ സ്‌പഷ്ട​മാ​യി പറയുന്ന ബൈബി​ളി​ലെ ഏക ഭാഗം ഇതാണ്‌. ക്രൈ​സ്‌തവ ലോക​ത്തി​ലെ സഭകൾ സഹസ്രാബ്ദ പ്രത്യാശ തള്ളിക്ക​ള​ഞ്ഞി​രി​ക്കു​ന്നു. സഭയുടെ ഉപദേശം അനുസ​രിച്ച്‌, നീതി​മാ​ന്മാർ സ്വർഗ​ത്തി​ലും ദുഷ്ടന്മാർ നരകത്തി​ലും പോകു​ന്ന​തി​നാൽ അവരെ സംബന്ധി​ച്ചി​ട​ത്തോ​ളം പറുദീ​സാ ഭൂമി അപ്രസ​ക്ത​മാണ്‌. ക്രൈ​സ്‌തവ ലോക സഭകളി​ലെ മിക്ക അംഗങ്ങ​ളു​ടെ​യും കാര്യ​ത്തിൽ, ദൈവ​ത്തി​ന്റെ “ഇഷ്ടം സ്വർഗ്ഗ​ത്തി​ലെ​പ്പോ​ലെ ഭൂമി​യി​ലും ആകേണമേ” എന്ന്‌ അപേക്ഷി​ച്ചു​കൊ​ണ്ടുള്ള മാതൃകാ പ്രാർഥ​ന​യ്‌ക്ക്‌ അതിന്റെ മുഴു അർഥവും നഷ്ടമാ​യി​രി​ക്കു​ന്നു. (മത്തായി 6:10) എന്നാൽ യഹോ​വ​യു​ടെ സാക്ഷി​ക​ളു​ടെ കാര്യ​ത്തിൽ അത്‌ അങ്ങനെയല്ല. യഹോ​വ​യാം ദൈവം ഭൂമിയെ സൃഷ്ടി​ച്ചത്‌ “വ്യർത്ഥ​മാ​യി​ട്ടല്ല” മറിച്ച്‌ ‘പാർപ്പി​നാ​ണെന്ന്‌’ അവർ ഉറച്ചു വിശ്വ​സി​ക്കു​ന്നു. (യെശയ്യാ​വു 45:12, 18) അങ്ങനെ, പുരാതന പ്രവച​ന​വും മാതൃകാ പ്രാർഥ​ന​യും സഹസ്രാ​ബ്ദത്തെ കുറി​ച്ചുള്ള അപ്പോ​ക്ക​ലി​പ്‌റ്റിക്‌ പ്രത്യാ​ശ​യും തീർച്ച​യാ​യും പരസ്‌പര യോജി​പ്പി​ലാണ്‌. തന്റെ ആയിരം-വർഷ വാഴ്‌ച​ക്കാ​ലത്തു സ്വർഗ​ത്തി​ലെ​പ്പോ​ലെ തന്നെ ഭൂമി​യി​ലും യഹോ​വ​യു​ടെ ഇഷ്ടം നടപ്പാ​കു​ന്നു എന്ന്‌ ക്രിസ്‌തു ഉറപ്പു​വ​രു​ത്തും.

17. ‘ആയിര​മാ​ണ്ടി​നെ’ അക്ഷരീ​യ​മാ​യി എടു​ക്കേ​ണ്ട​താ​ണെന്ന്‌ എന്തു പ്രകട​മാ​ക്കു​ന്നു?

¹⁷ വെളി​പ്പാ​ടു 20-ാം അധ്യാ​യ​ത്തി​ലെ ആദ്യത്തെ ഏഴു വാക്യ​ങ്ങ​ളിൽ ‘ആയിര​മാണ്ട്‌’ എന്ന പ്രയോ​ഗം ആറു പ്രാവ​ശ്യം പ്രത്യ​ക്ഷ​പ്പെ​ടു​ന്നു. മൂല ഗ്രീക്കു ഭാഷയിൽ അത്‌ നാലു പ്രാവ​ശ്യം നിശ്ച​യോ​പ​പ​ദ​ത്തോട്‌ (ഇംഗ്ലീ​ഷിൽ “the”) ഒപ്പമാണ്‌ ഉപയോ​ഗി​ച്ചി​രി​ക്കു​ന്നത്‌ എന്ന വസ്‌തുത ശ്രദ്ധേ​യ​മാണ്‌. അത്‌ അനിശ്ചി​ത​മായ ഒരു ദീർഘ​കാ​ല​ഘ​ട്ട​ത്തെയല്ല മറിച്ച്‌ ഒരു അക്ഷരീയ സഹസ്രാ​ബ്ദത്തെ പരാമർശി​ക്കു​ന്നു എന്ന്‌ ഇതു പ്രകട​മാ​ക്കു​ന്നു. ക്രൈ​സ്‌തവ ലോക​ത്തി​ലെ മിക്ക ഭാഷ്യ​കാ​ര​ന്മാ​രും അവകാ​ശ​പ്പെ​ടു​ന്ന​തു​പോ​ലെ അത്‌ ഒരു അനിശ്ചിത കാലഘ​ട്ടമല്ല. സഹസ്രാബ്ദ കാലത്ത്‌ എന്തു സംഭവി​ക്കും? ഒന്നാമ​താ​യി, ആ മുഴു കാലഘ​ട്ട​ത്തേ​ക്കും സാത്താൻ നിഷ്‌ക്രി​യൻ ആക്കപ്പെ​ടു​ന്നു. (വെളി​പ്പാ​ടു 20:1-3; എബ്രായർ 2:14 താരത​മ്യം ചെയ്യുക.) അത്‌ എത്ര മഹത്തായ ഒരു സുവാർത്ത​യാണ്‌!

18. (എ) സഹസ്രാ​ബ്ദത്തെ ഒരു ന്യായ​വി​ധി ‘ദിവസം’ എന്നു വിളി​ക്കാ​വു​ന്നത്‌ എന്തു​കൊണ്ട്‌? (ബി) ആയിരം വർഷത്തി​ന്റെ അവസാനം എന്തു സംഭവി​ക്കും?

¹⁸ “ക്രിസ്‌തു​വി​നോ​ടു​കൂ​ടെ ആയിരം ആണ്ടു വാഴു”ന്നവർക്കു “ന്യായ​വി​ധി​യു​ടെ അധികാ​രം” കൊടു​ത്തി​രി​ക്കു​ന്ന​തി​നാൽ ഈ കാലഘട്ടം വാസ്‌ത​വ​ത്തിൽ ഒരു ആയിര​വർഷ ന്യായ​വി​ധി ‘ദിവസം’ ആണ്‌. (വെളി​പ്പാ​ടു 20:4, 6; പ്രവൃ​ത്തി​കൾ 17:31-ഉം 2 പത്രൊസ്‌ 3:8-ഉം താരത​മ്യം ചെയ്യുക.) മരിച്ചവർ പുനരു​ത്ഥാ​നം പ്രാപി​ക്കു​ക​യും “മഹോ​പ​ദ്രവ”ത്തിലെ അതിജീ​വ​ക​രോ​ടൊ​പ്പം അന്നത്തെ അവരുടെ പ്രവൃ​ത്തി​കൾ അനുസ​രിച്ച്‌ നീതി​നി​ഷ്‌ഠ​മാ​യി ന്യായം വിധി​ക്ക​പ്പെ​ടു​ക​യും ചെയ്യും. (വെളി​പ്പാ​ടു 20:12, 13) ആയിരം വർഷത്തി​ന്റെ അവസാ​ന​ത്തിൽ മനുഷ്യ​വർഗത്തെ അന്തിമ​മാ​യി പരി​ശോ​ധി​ക്കാൻ സാത്താനെ ഹ്രസ്വ​കാ​ല​ത്തേക്കു സ്വത​ന്ത്ര​നാ​ക്കും. തുടർന്ന്‌ അവനും അവന്റെ ഭൂതങ്ങ​ളും അവനെ അനുഗ​മി​ക്കുന്ന ഭൂമി​യി​ലെ എല്ലാ മത്സരി​ക​ളും എന്നേക്കു​മാ​യി നശിപ്പി​ക്ക​പ്പെ​ടും. (വെളി​പ്പാ​ടു 20:7-10) ആ പരി​ശോ​ധ​നയെ അതിജീ​വി​ക്കു​ന്ന​വ​രു​ടെ പേരുകൾ “ജീവപു​സ്‌ത​ക​ത്തിൽ” ശാശ്വ​ത​മാ​യി എഴുത​പ്പെ​ടും. ഒരു പറുദീ​സാ ഭൂമി​യിൽ യഹോ​വയെ സേവി​ക്കു​ക​യും ആരാധി​ക്കു​ക​യും ചെയ്‌തു​കൊണ്ട്‌ അവർ എന്നേക്കും സന്തുഷ്ട​രാ​യി ജീവി​ക്കും.—വെളി​പ്പാ​ടു 20:14, 15; സങ്കീർത്തനം 37:9, 29; യെശയ്യാ​വു 66:22, 23.

19. (എ) വെളി​പ്പാ​ടു പുസ്‌ത​ക​ത്തിൽ വിവരി​ച്ചി​രി​ക്കുന്ന വിസ്‌മ​യാ​വ​ഹ​മായ വാഗ്‌ദാ​നങ്ങൾ നിസ്സം​ശ​യ​മാ​യും നിവൃ​ത്തി​യേ​റു​മെന്നു നമുക്ക്‌ ഉറപ്പു​ണ്ടാ​യി​രി​ക്കാ​വു​ന്നത്‌ എന്തു​കൊണ്ട്‌? (ബി) അടുത്ത ലേഖന​ത്തിൽ എന്തു പരിചി​ന്തി​ക്കു​ന്ന​താ​യി​രി​ക്കും?

¹⁹ അപ്പോ​ക്ക​ലി​പ്‌സിൽ വിവരി​ച്ചി​രി​ക്കുന്ന സദ്വർത്ത​മാ​ന​ങ്ങ​ളാണ്‌ ഇവ. അവ പൊള്ള​യായ മനുഷ്യ വാഗ്‌ദാ​നങ്ങൾ അല്ല. യോഹ​ന്നാൻ അപ്പൊ​സ്‌തലൻ എഴുതി: “സിംഹാ​സ​ന​ത്തിൽ ഇരിക്കു​ന്നവൻ: ഇതാ, ഞാൻ സകലവും പുതു​താ​ക്കു​ന്നു എന്നു അരുളി​ച്ചെ​യ്‌തു. എഴുതുക, ഈ വചനം വിശ്വാ​സ​യോ​ഗ്യ​വും സത്യവും ആകുന്നു എന്നും അവൻ കല്‌പി​ച്ചു.” (വെളി​പ്പാ​ടു 21:5) ഈ സദ്വർത്ത​മാ​ന​ങ്ങ​ളു​ടെ നിവൃ​ത്തി​യിൽ പങ്കുപ​റ്റു​ന്ന​തിന്‌ നാം എന്തു ചെയ്യണം? ദൈവത്തെ പ്രസാ​ദി​പ്പി​ക്കാൻ ആഗ്രഹി​ക്കു​ന്ന​വർക്കു വെളി​പ്പാ​ടു പുസ്‌ത​ക​ത്തിൽ ധാരാളം ബുദ്ധി​യു​പ​ദേ​ശങ്ങൾ ഉണ്ട്‌. അടുത്ത ലേഖനം പ്രകട​മാ​ക്കാൻ പോകു​ന്നതു പോലെ, അത്തരം ബുദ്ധി​യു​പ​ദേ​ശങ്ങൾ പിൻപ​റ്റു​ന്നതു നമുക്ക്‌ അതിരറ്റ സന്തുഷ്ടി കൈരു​ത്തും, ഇന്നും, എന്നേക്കും.

[അടിക്കു​റി​പ്പു​കൾ]

പുനര​വ​ലോ​കന ആശയങ്ങൾ

□ വെളി​പ്പാ​ടു 4 മുതൽ 6 വരെയുള്ള അധ്യാ​യ​ങ്ങ​ളിൽ, സദ്വർത്ത​മാ​ന​ങ്ങ​ളു​ടെ സുപ്ര​ധാന ഭാഗമായ ഏത്‌ അടിസ്ഥാന സത്യങ്ങൾ കാണ​പ്പെ​ടു​ന്നു?

□ വെളി​പ്പാ​ടു ഏഴാം അധ്യാ​യ​ത്തിൽ ഏതു സദ്വർത്ത​മാ​നങ്ങൾ കാണാ​വു​ന്ന​താണ്‌?

□ വെളി​പ്പാ​ടിൽ കാണുന്ന ന്യായ​വി​ധി സന്ദേശങ്ങൾ ആത്മാർഥ ഹൃദയരെ അസഹ്യ​പ്പെ​ടു​ത്തേ​ണ്ടത്‌ ഇല്ലാത്തത്‌ എന്തു​കൊണ്ട്‌?

□ സഹസ്രാ​ബ്ദം ഒരു ന്യായ​വി​ധി ‘ദിവസം’ ആയിരി​ക്കു​ന്നത്‌ ഏതു വിധത്തി​ലാ​യി​രി​ക്കും?

[10-ാം പേജിലെ ചിത്രം]

രാജാവായ യേശു​ക്രി​സ്‌തു ഭൂമിയെ യുദ്ധം, ക്ഷാമം, മരണം എന്നിവ​യിൽനിന്ന്‌ പൂർണ​മാ​യും മുക്തമാ​ക്കും